Ātreyatilakam

 

Ātreyatilakam

(pratibimbalakṣaṇam )

 

namo buddhāya |

 

ātreyatilake bauddhaśāstre'nyatra purātanaiḥ |

uktaṁ yatpūrvamunibhiḥ pratimāmānalakṣaṇam ||1||

 

tatsaṁhṛtyeha caikatra piṇḍīkṛtya yathākramam |

natvā sarvavidaṁ devamarccālakṣaṇamucyate ||2||

 

dvādaśāṅgulitālañca vitastirmukhameva ca |

jñeyamevārca(rcā)nāmetat dvyaṅgulaṁ golakaṁ kalā ||3||

 

pallavānāṁ caturbhāgo māpanāṅgulikā smṛtā |

tato'ṅgulyaṣṭabhāgena yavaṁ vindyādvicakṣaṇaḥ ||4||

 

arcānāmaṅga pratyaṅgamāpanārthamiti smṛtam |

anenaiva vidhānena māpayetpratimāṁ budhaḥ ||5||

 

yatkiñcidrūpakāyāmaṁ vibhajya navabhāgataḥ |

ekatālaṁ mukhaṁ kuryādvistārañca tathaiva ca ||6||

 

vakārākṛti cūtābhaṁ mukhaṁ khagāṇḍābhaṁ tilākṛti |

sārddhāṅgulavihīnaṁ yattat vakārākṛtīṣyanta (te)||7||

 

dvyaṅgulena vihīnena cūtābhamānanaṁ bhavet |

sārddhadvyaṅgulahīnaṁ tu khagāṇḍākāramucyate ||8||

 

varjayettryaṅgulaṁ yattu nāmadheyaṁ tilākṛti |

caturṇṇāmapi vaktrāṇāṁ kapoleṣu vivarjayet ||9||

 

kevalaṁ tilasaṁsthānaṁ nārīṇāmiṣyate mukham |

aśāstreṇa mukhaṁ kṛtvā yajamāno vinaśyati ||10||

 

saśāstreṇa mukhaṁ kṛtvā barddhate sahabāndhavaiḥ |

evaṁ śāstrāgamaṁ kṛtvā arcānāṁ kārayedbudhaḥ ||11||

 

dvītā(go)laṁ śīrṣabhāgañca chatrākāraṁ prayojayet |

aṅgulārddhaṁ dvigolañca lalāṭaṁ parikīrtitam ||12||

 

tiryyañcaṁ lalāṭasya niyataṁ pañcagolakam |

dvikalo dviyavaścaiva nāsikāyāma ucyate ||13||

 

dviyavaścāgravistāro niṣkāsaṁ sārddhamaṅgulam |

dvyaṅgulaṁ pārśvayorūrdhvaṁ nāśā(sā)cayayavatrayam ||14||

 

arddhāṅgulisame vṛtte vaṁśamūle yavadvayam |

śrotasī triyave syātāṁ śaṅkhākṛtisuśobhanā(ne)||15||

 

iti mānasamāyuktā jihvāpiṇḍī praśasyate |

tilapuṣpasamākārā śukasenamukhopamā ||16||

 

tryaṅgulaṁ dviyavaṁ tasya adhobhāgaṁ pracakṣate |

ṣaḍyavaṁ bhojakaṁ kuryāduttaroṣṭhaṁ caturyavam ||17||

 

tribhāgāṅgulikā kāryā gojī(dhiḥ)tasyopariḥ sthitā |

adharaṁ bhojakaṁ tulyaṁ vistāramaṅguladvayam ||18||

 

niṣkāsaṁ ṣaḍyavaṁ madhye viśvarekhāṁ ca kārayet |

sṛkkaṇīṁ cāṅgulārddhena kiñcinnimnāṁ tu kārayet ||19||

 

dvyaṅgulaṁ cibukaṁ tiryyagāyāmena yavā daśa |

arddhāṅgulaṁ bhruvormadhye dīrghaṁ pañcāṅgulaṁ bhavet ||20||

 

yavārddhamānā bhrūrekhā cāpākṛtirakhaṇḍitā |

dvyaṅgulaṁ dviyavaṁ netramāyataṁ tanti(ttri)bhāgataḥ ||21||

 

locanasya trayo bhāgaṁ (gā)tathā tāraṁ prakīrtitam |

tasya bhāgatrayaṁ kuryādasitaṁ saṁprakīrtitam ||22||

 

kumudotpalapatrābhaṁ padmapatraṁ jhaṣodaram |

apāṅge dve kale jñeye tetramadhyañca dvyaṅgulam ||23||

 

karṇau dvyaṅgulavistārau dīrghaṁ tu caturaṅgulam |

pṛṣṭhataḥ karṇaniṣkāsaṁ dvyaṅgulaṁ parikīrtitam ||24||

 

tuṭikā dvyaṅgulaṁ sampattadarddhā kakunā bhavet |

aṅgulasya caturthāṁśaḥ karṇavartyāstu vistaraḥ ||25||

 

tri(dvi)yavaiḥ karṇayorguhyaṁ yathāśobhā ca pāśikā |

karttarīmūlasaṁsthānaṁ karṇanālaṁ prakīrtitam ||26||

 

karṇayorubhayormadhye mastako'ṣṭādaśāṅgulaḥ |

caturdaśāṅgulaṁ pṛṣṭhaṁ lalāṭasya na saṁśayaḥ ||27||

 

bhrūrekhā netrayormadhye golakaṁ parikīrtitam |

aṣṭāṅgulaṁ bhavenmadhyaṁ cibukākarṇamūlayoḥ ||28||

 

tathā cibulalāṭaṁ ca kartavyaṁ netrayoḥ samam |

sṛkkaṇī tārakā pārśve samasūtreṇa māpayet ||29||

 

bhrūrekhā karṇaśīrṣaṁ ca samasūtreṇa tāḍayet |

tuṭikā netramadhyaṁ ca tathaiva samatāḍanam ||30||

 

dvigolaṁ mukhaniṣkāsaṁ grīvāyāmastathaiva ca |

skandhamūlācchrutermūlaṁ yāvat syāt golakatrayam ||31||

 

cibukādho yathāśobhaṁ kartavyaṁ māṁsavartana(rtula)m |

tadā lambapramāṇena gṛhinīṁ hrāsayetsanāk ||32||

 

maulikotha jaṭābandhaḥ kuñcitāśca śiroruhāḥ |

kirīṭi triśikhaṁ caiva mukuṭaṁ khaṇḍameva ca ||33||

 

teṣāmaṣṭāṅgulaṁ dīrghaṁ kartavyaṁ nādhikaṁ tataḥ |

mukhātā(khadvā)raṁ pravakṣyāmi śubhaṁ vā yadi vā'śubham ||34||

 

kiñcitprahasitaṁ kuryānmādhuryalavaṇānvitam |

kaṣāyaṁ kaṭukaṁ kruddhamāmlaṁ ca tiktameva ca |

vaktraṁ vedanasaṁsthānaṁ dūrataḥ parivarjayet ||35||

 

ataḥparaṁ pravakṣyāmi dehānāṁ mānalakṣaṇam |

hikkāto nābhiparyantaṁ dvimukhaṁ kārayedbudhaḥ ||36||

 

nābhito vṛṣaṇāmūlaṁ tiryyak pārśvau sphicau tathā |

hikkācūcukayormadhye cūcukāntarameva ca ||37||

 

grīvāpārśvāt bhujāśīrṣaṁ tālamekaṁ prakīrtitam |

nābhicūcukayormadhye bhāgaścaturdaśāṅgulam ||38||

 

samasūtraṁ ca kartavyaṁ hikkā cāṁsāgrameva ca |

aṁsayormadhyavistāraḥ tritālaḥ samudāhṛtaḥ ||39||

 

akṣaṁ(pṛṣṭhaṁ)ṣaḍaṅgulaṁ kuryāttathā kakṣastanāntata(ra)m |

ekagolapramāṇaṁ ca cūcukāpārśvamaṇḍalam ||40||

 

dviyavaṁ cūcukaṁ vṛttaṁ triyavaṁ nābhimaṇḍalam |

nimnā nābhiśca kartavyā dakṣiṇāvartalāñchanā ||41||

 

tryaṅgulau vṛṣaṇau syātāṁ meḍhraṁ tu caturaṅgulam |

hi(sphi)cāvaṣṭāṅgulādūrdhvaṁ pīnavṛttau suśobhanau ||42||

 

bhujāyāmaṁ praśaṁsanti tajjñā mukhacatuṣṭayam |

bāhū cāṣṭakalau syātāṁ prabāhū navagolakau ||43||

 

trigolaṁ karadīrghaṁ taṁ bhāvatī madhyamāṅguliḥ |

kuryād dvigolamaṅguṣṭhaṁ tattulyā ca kanīyasī ||44||

 

madhyamāyā nakhārddhena hīnā cānāmikāṅguliḥ |

hīnā nakhena vijñeyā madhyamasya pradeśinī ||45||

 

aṅguṣṭhasya tu vistāraṁ kalpayeta yavā nava |

sārddhamaṣṭayavaṁ tiryak madhyamāyāśca yojayet ||46||

 

ubhau cāṣṭayavaṁ kṛtvā saptayavā kanīyasī |

kaniṣṭhāmūlato bandhaṁ maṇeḥ pañcāṅgulaṁ matam ||47||

 

tatpramāṇena jānīyāttiryak karatalasya tu |

aṅguṣṭhamūlato bandhamaṇeryāvad dvigolakam ||48||

 

aṅguṣṭhamūlāttarjjinyā mūlaṁ sārddhakalaṁ kalet |

aṅgulyastāstriparvāḥ syurdviparvo'ṅguṣṭhako bhavet ||49||

 

aṅguṣṭhasyāṅgulīnāṁ ca samaparvo vidhīyate |

suvartitāgrasūkṣmāśca susandhāśca prayojayet ||50||

 

svāṅgulārddhaṁ nakhaṁ tiryak parvārddhadīrghameva ca |

mūle'rddhacandrasaṁyuktaṁ karajaṁ kārayedbudhaḥ ||51||

 

pāṇiṁ pañcāṅgulaṁ kuryāttatpārśvamaṅguladvayam |

pūrṇaṁ karatalaṁ kuryāt śubhale(re)khopaśobhitam ||52||

 

hastarekhāṁ pravakṣyāmi devānāṁ śubhalakṣaṇam |

śaṅkhaṁ padmaṁ dhvajaṁ vajraṁ cakraṁ svastikakuṇḍalam ||53||

 

kalaśaṁ śaśinaṁ chatraṁ śrīvatsāṁśukameva ca |

triśūlaṁ yavamālāśca kurvīta vasudhāṁ tathā ||54||

 

nābhiguhyakayormadhyenorumūlaṁ samaṁ kalet |

dvivitastyurudīrghatvaṁ jaṅghāṁ dīrghaṁ mukhadvayam ||55||

 

jānunī dvikale syātāṁ gulphāke(ve)kakalau smṛtau |

dvikalau pārṣṇikau jñeyau pakvabimbaphalākṛtī ||56||

 

aṅghreḥ saptāṅgulaṁ tiryagāyāmena daśāṅgulam |

caturbhāgena pādasyāṅguṣṭhāyāmaṁ vidhīyate ||57||

 

tatsamā sūcikā hīnā madhyamā dviyavena tu |

anāmikānakhārddhena hīnaparvā kanīyasī ||58||

 

aṅguṣṭhasya ca vistāra ekādaśayavaḥ smṛtaḥ |

sūcyaṅguṣṭhakayoragre cāntaraṁ triyavaṁ bhavet ||59||

 

sūca(cī)navayavā tiryak sārddhāṣṭayavamadhyamā |

anāmāṣṭayavā tiryakkīrtyate mānalakṣaṇe ||60||

 

bāle cūtakasaṁsthānāvaṅguṣṭhau parikīrtitāḥ (tau)|

kūrmapṛṣṭhasamākāraṁ pādasyopari kārayet ||61||

 

jalūkapadasaṁsthānā aṅgulyaḥ parikīrtitāḥ |

pādau samatalau kāryau śuktyākārā nakhāḥ smṛtāḥ ||62||

 

ataḥ paraṁ pravakṣyāmi pariṇāhasya lakṣaṇam |

ṣaṭtriṁśadaṅgulaṁ jñeyaṁ śirasaḥ parimaṇḍalam ||63||

 

grīvāṣṭāṅgulivistārā triguṇaṁ parimaṇḍalam |

kakṣayormadhyavistārau viṁśatyaṅguliratra tu ||64||

 

ūna viṁśatikalaṁ kuryātpariṇāhena buddhimān |

bhujayormūlamadhyāgramaṣṭaṣaṭcaturaṅgulam ||65||

 

svavistārapramāṇena maṇḍalaṁ triguṇaṁ bhavet |

kukṣeśca madhyavistāro jñeyaḥ pañcadaśāṅgulaḥ ||66||

 

ṣoḍaśāṅgulirasyādhaḥ kaṭiraṣṭādaśāṅguliḥ |

ṣaṭgolamurumūle ca jaṁghāmadhye ṣaḍaṅguliḥ ||67||

 

jaṅghānte dvikalaṁ vindyādvistāratvena paṇḍitaḥ |

eteṣāmeva sarveṣāṁ maṇḍalaṁ triguṇaṁ bhavet ||68||

 

tathāṅgulīnāṁ sarveṣāṁ vṛttatvaṁ yatra vidyate |

pṛṣṭhataḥ śīrṣaniṣkāsaṁ kalamekaṁ prakīrtitam ||69||

 

pṛṣṭhād vaṁśasamaṁ kuryāt sphicau tulyāvalambinau |

ūrū ca piṇḍikā pārṣṇiḥ kuryāttulyāvalambinaḥ ||70||

 

pṛṣṭhasya lakṣaṇaṁ vindyādetatsaṁkṣepato dvijaḥ |

muktāhārādirasanākaṭakakeyūrakuṇḍalam ||71||

 

vastrasāṭakavinyāsaṁ śarīrasthaṁ ca kārayet |

athārcānāṁ guṇadoṣau cocyete'dhikahīnataḥ ||72||

 

dīrghavistārasaṁyuktaṁ dadyātsthānaṁ tu susthiram |

śiraścchatrasamaṁ kāryaṁ dhanadhānyasamṛddhidam ||73||

 

lalāṭe subhru rekhā ca śāśvatīṁ dadataḥ śriyam |

sukṛtā sā bhavedarcā jāyate sasukhā prajāḥ ||74||

 

kambugrīvā bhavedarcā sarvasiddhikarī sadā |

śarīraṁ siṁhasaṁsthānaṁ subhikṣabalabarddhanam ||75||

 

bhujau karikarākārau sarvakāmārthasādhakau |

śasyasampatkaraṁ nityaṁ sūdanaṁ ca subhikṣakṛt ||76||

 

rambhorucchāgagobṛddhirgrāmabṛddhiḥ supiṇḍikā |

supādā ca bhavedarcā śīlavidyāprasādhikā ||77||

 

ityarcānāṁ praśaṁsoktā hīnadoṣamathāha ca |

durbhikṣo rāṣṭrabhaṅgaḥ syād hīnā vistāradīrghayoḥ ||78||

 

dehahīnā bhavet kubjo nāsāhīnā ca rogikaḥ |

vāmadṛṣṭiḥ paśornāśa ūrdhvadṛṣṭirdhanakṣayaḥ ||79||

 

alpākṣī maṇḍalākṣī ca kekarākṣī tathaiva ca |

hīnadṛṣṭiradhodṛṣṭirdūrataḥ parivarjayet ||80||

 

nimnakukṣirbhavedarcā śasyanāśaṁ sadā bhavet |

uruhīnā bhavedarcā garbhaṁ patati śāśvatam ||81||

 

trayo hrasvā mahādoṣo nāsikā netramaṅguliḥ |

trayo dīrghā mahādoṣā jaṅghā grīvā cibustathā ||82||

 

trayaḥ sūkṣmā mahādoṣāḥ śiraḥ karṇañca nāsikā |

trayaḥ sthūlā mahādoṣāḥ sandhiḥ kukṣirnakhastathā ||83||

 

trayo nimnā mahādoṣā hastau pādau ca locanau |

trayo hrasvā mahādoṣā grīvāṁsau bhuja eva ca ||84||

 

iti doṣaguṇaṁ jñātvā kartavyārcā vipaścitā |

navatālalakṣaṇāyāmapariṇāhau saṁprakīrtitau ||85||

 

na ca vaktre dhruvaṁ deve aṣṭādvā devamānuṣā |

mānuṣyaṁ aṣṭatālaṁ ca jananyā cāṣṭasaptamam ||86||

 

mukhaṁ (śubhaṁ)ṣaṭsaptatālānāṁ pariṇāhe samucchrayam |

kīrtitā(taṁ)ca yathānyāyamātreyaṁ lakṣaṇanirmitamiti ||87||

 

dīrghaṁ cāṣṭamukhaṁ kṛtvā devīṇāṁ(nāṁ)lakṣaṇaṁ budhaḥ |

mukhaṁ ṣatkalaṁ kṛtvā dehaṁ caikādaśakalam ||88||

 

triya(striyāḥ)grīvāstanaścaiva aṅgau cucumukhāntarau |

sarve te mukhaṁ ma(mū)rddhā ca devīnāñca vidhīyate ||89||

 

madhyaṁ cāṣṭāṅgulaṁ kṛtvā sroṇī pañcakalā smṛtā |

kaṭī viṁśāṅgulaṁ kuryādurū caikādaśau kalau ||90||

 

jānunī a(trya)ṅgulā caiva piṇḍī vā viṁśadaṅgulā |

gulphaṁ dvyaṅgulaṁ kuryāddevīnāṁ lakṣaṇaṁ śubham ||91||

 

kṛtvā triṁśāṅgulaṁ caiva śirasi parimaṇḍalam |

pañcāṅgulaṁ bhujo mūlaṁ triguṇaṁ maṇḍalaṁ bhavet ||92||

 

tryaṅgulaṁ maṇibandhañca maṇḍalānāṁ tathaiva ca |

ūrumadhye kalāṣaḍbhistriguṇaṁ parimaṇḍalam ||93||

 

madhye pañcāṅgulaṁ jaṅgho maṇḍalaṁ triguṇaṁ bhavet |

sarvatra triguṇaṁ kāryamaṅgulīnāṁ tathaiva ca ||94||

 

apāṅgalocanañcaiva stanau tu kaṭireva ca |

īṣanmānādhikaṁ kuryādyena vṛ(dṛ)ṣṭisu(duḥ)khaṁ bhavet ||95||

 

||iti devīlakṣaṇam aṣṭatālasya ||

 

athātaḥ sampravakṣyāmi bālānāṁ mānalakṣaṇam |

ṣaḍguṇaṁ bālarūpīṇāṁ saināpatyañca ṣaḍguṇam ||96||

 

vināyakānāṁ yakṣāṇāṁ pratimālakṣaṇaṁ śubham |

golakaṁ mūrdhni vijñeyaṁ mukhaṁ ṣaḍgolakasya tu ||97||

 

grīvā dvyaṅgulaṁ kurvīta dehe viṁśāṅgulaṁ bhavet |

arddhagolakalā nābhyāṁ khanitaṁ tryaṅgulaṁ tathā ||98||

 

ūrū saptakalā kuryāt golakaṁ jānunī tathā |

piṇḍikaṁ ṣaṭkalaṁ kuryād gulphamekāṅgulaṁ smṛtam ||99||

 

pārṣṇikaṁ tryaṅgulaṁ caiva yathāvadanupūrvaśaḥ |

pādau pañcakalaṁ dīrghamaṅguṣṭhagolakaṁ tataḥ ||100||

 

sūcyaṅguṣṭhasamā kuryād dviyava [hīnā]madhyamā |

nakhahīnaṁ anāmañca parva(yava)hīnā kanīyasī ||101||

 

aṣṭāṅgulena hikkāso(to)bāhū caiva navāṅgulam |

prabāhū pañcagolañca karadīrghaṁ dvigolakam ||102||

 

madhyamāṅgulaṁ dvau golaṁ nakhahīnā pradeśinī |

madhyaṁ parvanakhāhīnaṁ kārayettadanāmikā |

anāmikāparva(yava)hīnā dīrghāṅguṣṭhakanīyasā ||103||

 

athātaḥ saṁpravakṣyāmi vistāreṇa kalāni ca |

dvikalārddhaṁ bhavenmūrdhni triguṇaṁ parimaṇḍalam ||104||

 

ṣaṭkalaṁ mukhamadhyaṁ ca karṇanāsāgrameva ca |

trikaraṁ(laṁ)grīvamadhye ca kukṣau tu ṣoḍaśāṅgulam ||105||

 

madhye ṣaḍgolaṁ kāyasya kaṭiñca saptagolakam |

ūrūmadhyacaturgolā jānudvikalaṣaḍyavam ||106||

 

madhye pañcāṅgulañjaṅghaṁ gulphaṁ tryaṅgulameva ca |

dvikalādvyaṅgulaṁ pādau vistāreṇa prakīrtitam ||107||

 

navayavāṅguṣṭhakaṁ caiva antaraṁ triyavaṁ smṛtam |

yavāṣṭasūcikaṁ kuryāt yavasapta ca madhyamam ||108||

 

ṣaḍyavānāmikāṁ yasya yavapañca kanīyasī |

evaṁ kārayate vidvānpādāṅgulasuśobhanam ||109||

 

tryaṅgulañca tathā pārṣṇi vistareṇa prakīrtitā |

aṣṭa cāṅguṣṭhakā caiva navasaptañca madhyamā ||110||

||iti ātreyatilake ṣaḍrūpalakṣaṇam ||

 

ataḥ paraṁ pravakṣyāmi daśatālasya lakṣaṇam |

brahmā ca carccikādevī ṛṣīṇāṁ brahmarakṣasām ||111||

 

divyānāṁ caiva buddhānāṁ kārayetpratimāṁ śubhām |

eteṣāṁ kārayedvidvān anyeṣāṁ naiva (caiva)kārayet ||112||

 

dvigolakaṁ bhavecchīrṣaṁ mukhaṁ ṣaḍgolameva ca |

grīvāṁ dvigolakaṁ kuryāddehaṁ ṣaḍviṁśamaṅgulam ||113||

 

nitambaṁ dvikalaṁ viddhi kaṭiḥ pañcakalaṁ bhavet |

ṣaḍ viṁśāṅgulakaṁ ūrū jānu pañcāṅgulau smṛtau ||114||

 

ṣaḍ viśāṅgulakau jaṅghau gulphau tryaṅgulakau smṛtau |

adho bhāgā prakartavyā pañcāṅgulasusaṁsthitā ||115||

 

bāhubhāgāḥ prakartavyā aṣṭagolakameva ca |

daśagolakavijñeyā prabāhū ca vipaścitā ||116||

 

karapallavabhāgañca ṣaṭkalaṁ tu vijānantuḥ(ta)|

eteṣāṁ ceṣṭamānānāṁ kartavyaṁ śāstracintakaiḥ ||117||

 

|| iti ātreyatilake daśatālalakṣaṇam ||

 

athātaḥ saṁpravakṣyāmi saptatālasya lakṣaṇam |

śiro tryaṅgulavijñeyaṁ mukhaṁ ṣaṭkalameva ca ||118||

 

grīvā tryaṅgulavijñeyā kambugrīvañca kārayet |

ūnaviṁśāṅgulaṁ devamānavṛttasuśobhitam ||119||

 

ekāṅguli nitambaṁ ca golaṁ [ca]kaṭideśakam |

ūnaviṁśāṅgulaṁ urūjānu tryaṅgulameva ca ||120 ||

 

ūnaviṁśāṅgulaṁ jaṅghaṁ gulphamekāṅgulaṁ matam |

tryaṅgulañca adhobhāgaṁ pratimā saptatālakam ||121||

 

aṣṭāṅgulaṁ prakartavyaṁ hikkā cāsyā(cāṁsā)grameva ca |

bāhū aṅgulivijñeyā ekatālaṁ prakīrtitam ||122||

 

prabāhūsaptagolakaṁ ca kartavyaṁ munisattama |

karapallavabhāgaṁ ca aṣṭāṅgulaṁ prakīrtitam |

mānuṣyapramāṇaṁ tu kartavyaṁ śāstracintakaiḥ ||123||

 

|| iti ātreyatilake saptatālalakṣaṇam ||

 

athātaḥ sampravakṣyāmi catustālasya lakṣaṇam |

ekāṅguliśiraḥ kuryāt mukhaṁ dvādaśamaṅgulam ||124||

 

grīvā ekāṅgulaṁ viddhi dehaṁ dvādaśamaṅgulam |

arddhāṅgulanitambaṁ ca kaṭimekāṅgulaṁ matam ||125||

 

navāṅgulaṁ bhavedūru jānū ekāṅgulaṁ smṛtam |

jaṅghā navāṅgulā jñeyā gulphamarddhāṅgulaṁ bhavet ||126||

 

adho bhāgā prakartavyā ekāṅgulaprakīrtitā |

catuḥkalaṁ ca vijñeyā hikkā cāsyā(cāṁsā)grameva ca ||127||

 

bāhū trigolakaṁ caiva prabāhū aṣṭamaṅgulam |

saptāṅgulamitaṁ jñeyaṁ ucchritaṁ karapallavam ||128||

 

yathāśobhena vijñeyā kartavyā māṁsavartanam(nī)|

vāmanasya pramāṇaṁ tu kathitaṁ munisattama ||129||

 

|| iti ātreyatilake catustālasya lakṣaṇam ||

 

mahāpratimāvinyāsaṁ pravakṣyāmyadhunā śṛṇu |

daśapañcādhikairhastaiḥ pratimā kanyasī smṛtāḥ ||130||

 

dviguṇā madhyamā jñeyā jyeṣṭhā tu triguṇā smṛtāḥ |

ataḥ paraṁ na kurvīta yadicchet śreyamātmanaḥ | ||131||

 

dagdhā jīrṇā ca bhagnā ca sphuṭitā cāpi devatāḥ |

sthitāvasthāpyamānā vā sadā doṣakarā bhavet ||132||

 

dagdhārcayā anāvṛṣṭirjīrṇārcayā dhanakṣayaḥ |

bhagnārcayā kule nāśaḥ sphuṭitā yuddhamādiśet ||133||

 

arccā vā yadi vā liṅgaṁ devī mātṛgaṇastathā |

śīghramutpāṭayedeva vidhidṛṣṭena karmaṇā ||134||

 

puṣpārghaṁ ca tathā dhūpaṁ naivedyaṁ balimeva ca |

dattvā ca vāsasī caiva homakarmasamanvitaḥ ||135||

 

vipraśāntyudakaṁ caiva veda(deva)mantreṇa kārayet |

bālarajju tathā mauñjaṁ dukūlakṣomakastathā ||136||

 

vidhirevaṁ samuddiṣṭaṁ rajju cātra vidhīyate |

vṛṣasya kakude baddhvā ākarṣejjīrṇadevatām ||137||

 

śailīmayī bhavedarccā tīrthe bahūdakeṣu ca |

nadīsaṅgamasaṁsthāne tasmiṁścaiva tu nikṣipet ||138||

 

sauvarṇaṁ rajataṁ caiva tāmraṁ raityamayīmapi |

drāvayedagninā sarvaṁ yadicchecchreyamātmani ||139||

 

dārumayī bhavedarcā navavastreṇa veṣṭayet |

ghṛtena madhunā snigdhaṁ dīptamagnau pradāpayet ||140||

 

pārthivī ca bhavedarccā yadi syānmṛṇmayīmapi |

bhūkhanitvā śiro mātre nyasettasmin prapūrayet ||141||

 

arccā [vā]yadi vā liṅgaṁ punaḥ śīghraṁ tu sthāpayet |

sarvalakṣaṇasampannā vidhidṛṣṭena sthāpayet ||142||

 

dvijaśca (jānāṁ)bālavṛddhānāṁ mānuṣāṇāṁ śubhāya ca |

rājā jayamavāpnoti śasyavṛddhikaraṁ bhavet ||143||

 

jīrṇoddhāraṇamarccānāṁ kṛtvā(taṁ)yena mahātmanā |

yugakoṭiśatasahasraṁ devaloke mahīyate ||144||

 

||ātreyatilake jīrṇoddhāraḥ samāptaḥ ||

 

pārthivī ca bhavedarccā yadi syānmṛṇmayīmapi |

bhūkhanitvā śiro mātre nyasettasmin prapūrayet ||141||

 

arccā [vā]yadi vā liṅgaṁ punaḥ śīghraṁ tu sthāpayet |

sarvalakṣaṇasampannā vidhidṛṣṭena sthāpayet ||142||

 

dvijaśca (jānāṁ)bālavṛddhānāṁ mānuṣāṇāṁ śubhāya ca |

rājā jayamavāpnoti śasyavṛddhikaraṁ bhavet ||143||

 

jīrṇoddhāraṇamarccānāṁ kṛtvā(taṁ)yena mahātmanā |

yugakoṭiśatasahasraṁ devaloke mahīyate ||144||

 

||ātreyatilake jīrṇoddhāraḥ samāptaḥ |