vādanyāyaḥ

vādanyāyaḥ

nigrahasthānalakṣaṇam

1. nyāyavādinamapi vādeṣu asadvyavasthopanyāsaiḥ śaṭhā nigṛhṇanti, tanniṣedhārthamidamārabhyate |

asādhanāṅga gavacanamadoṣodbhāvanaṁ dvayoḥ |

nigrahasthānam, anyatu na yuktamiti neṣyate ||

iṣṭasyārthasya siddhiḥ sādhanam. tasya nirvartakam aṅgam. tasya avacanaṁ tasyāṅgasyānuccāraṇaṁ vādino nigrahādhikaraṇam: tadabhyupagamya apratibhayā tūṣṇīmbhāvāt | sādhanāṅgasyāsamarthanād vā ||

2. [svabhāvahetau sādhanāṅgasamarthanam]

trividhameva hi liṅgamapratyakṣasya siddheraṅgam - svabhāvaḥ, kāryam, anupalambhaśca |

tasya samarthanaṁ sādhyena vyāptiṁ prasādhya dharmiṇi bhāvasādhanam | yathā 'yat sat kṛtakaṁ vā, tat sarvamanityam, yathā ghaṭādiḥ, san kṛtako vā śavdaḥ' iti |

3. atrāpi na kaścit kramaniyamaḥ, iṣṭārthasiddherubhayatrāviśeṣāt | |

yasmād dharmiṇi prāk sattvaṁ prasādhya paścādapi vyāptiḥ prasādhyata eva | yathā - ''san śabdaḥ kṛtako vā, yaścaivaṁ sa sarvo'nityaḥ, yathā - ghaṭādiḥ' iti |

4. atra vyāptisādhanaṁ viparyaye bādhakapramāṇopadarśanam |

yadi na sarvaṁ sat kṛtakaṁ vā pratikṣaṇavināśi syād, akṣaṇikasya kramayaugapadyābhyāmarthakriyā'yogād arthakriyāsāmarthyalakṣaṇamato vyāvṛttam - ityasadeva syāt |

sarvasāmarthyopākhyāvirahalakṣaṇaṁ hi nirupākhyamiti |

evaṁ sādhanasya sādhyaviparyaye bādhakapramāṇānupadarśane virodhābhāvādasya viparyayavṛtteradarśane san kṛtako vā syāt, nityaśca ityanivṛttireva śaṅkāyāḥ |

5. na ca sarvānupalabdhirbhāvasya bādhikā, tatra sāmarthyaṁ kramākramayogena vyāptaṁ siddham; prakārāntarābhāvāt |

tena vyāpakadharmānupalabdhirakṣaṇike sāmarthyaṁ bādhate |

kramayaugapadyāyogasya sāmarthyābhāvena vyāptisiddhernānavasthāprasaṅgaḥ |

6. atrāpyadarśanamapramāṇam, yataḥkramayaugapdyāyogasyaivāsāmarthyena vyāptyasiddheḥ pūrvakasyāpi hetoravyāptiḥ | ihāpi punaḥ sādhanopagame'navasthāprasaṅga iti cet | na; abhāvasādhanasyādarśanasyāpratiṣedhāt |

yadadarśanaṁ viparyayaṁ sādhayati hetoḥ sādhyaviparyaye, tadasya viruddhapratyupasthānād bādhakaṁ pramāṇamucyate |

evaṁ hi sa hetuḥ sādhyābhāve'san sidhyet, yadi tatra pramāṇavatā svaviruddhena bādhyeta | anyathā tatrāsya bādhakāsiddhau saṁśayo durnivāraḥ |

tato vyatirekasya sandehādanaikāntikaḥ syāddhetvābhāsaḥ |

nāpyadarśanamātrād vyāvṛttiḥ; viprakṛṣṭeṣvasarvadarśino'darśanasyābhāvāsādhanād, arvāgdarśanena satāmapi keṣāñcidarthānāmadarśanāt |

7. bādhakaṁ punaḥ pramāṇam | yatra kramayaugapadyāyogo na tasya kvacit sāmarthyam | asti cākṣaṇike sa iti pravartamānamasāmarthyamasallakṣaṇamākarṣati | teha 'yat sat kṛtakaṁ vā tadanityameva' iti sidhyati |

tāvatā sādhanadharmamātrānvayaḥ sādhyadharmasya svabhāvahetulakṣaṇaṁ ca siddhaṁ bhavati |

evaṁ svabhāvahetuprayogeṣu samarthitaṁ sādhanāṅgaṁ bhavati | tasyāsamarthanaṁ sādhanāṅgāvacanam | tad vādinaḥ parājayasthānam; prārabdhārthāsādhanāt | vastutaḥ samarthasya hetorupādāne'pi sāmarthyāpratipādanāt |

8. [kāryahetau sādhanāṅgasamarthanam]

kāryahetāvapi sādhanāṅgasya samarthanam | yat kāryaṁ liṅgaṁ kāraṇasya sādhanāyopādīyate, tasya tena saha kāryakāraṇabhāvaprasādhanaṁ bhāvābhāvaprasādhanapramāṇābhyām | yathā - 'idamasmin sati bhavati', 'satsvapi tadanyeṣu samartheṣu taddhetuṣu tadabhāve na bhavati' iti |

evaṁ hyasyāsandigdhaṁ tatkāryatvaṁ samarthitaṁ bhavati | anyathā kevalaṁ 'tadabhāve na bhavati' ityupadarśane anyasyāpi tatrābhāve sandigdhamasya sāmarthyam | anyat | tatra samarthaṁ, tadabhāvāt tanna bhūtam |

etannivṛttau punarnivṛttiryadṛcchāsaṁvādaḥ | mātṛvivāho hi tddeśajanmanaḥ piṇḍakharjūrasya deśāntareṣu mātṛvivāhābhāve'bhāvavat | evaṁ hi samarthitaṁ tat kāryaṁ sidhyati |

siddhiṁ tat svasambhavena tatsambhavaṁ sādhyati, kāryasya kāraṇāvyabhicārāt |

avyabhicāre ca svakāraṇaiḥ sarvakāryāṇāṁ sadṛśo nyāyaḥ |

evamasamarthanaṁ kāryahetāvapi sādhanāṅgāvacanaṁ tad vādinaḥ parājayasthānam | asamarthite tasmin kāryatvāsiddherarthāntarasya tadbhāvāpratibaddhasvabhāvasya bhāve tadbhāvaniyamābhāvāt, ārabdhārthāsiddhesarvastutaḥ kāryasyāpyupādāne tadapradipādanāt |

9. [anupalabdhāvapi sādhanāṅgasamarthanam]

anupalabdhāvapi pratipatturupalabdhilakṣaṇaprāptasyānupalabdhisādhanaṁ samarthanam; tādṛśyā evānupalabdhe rasadvyavahārasiddheḥ | anupalabdhilakṣaṇaprāptasya pratipattṛpratyakṣopalabdhinivṛttāvapyabhāvāsiddheḥ |

tatropalabdhilakṣaṇaprāptiḥ svabhāvaviśeṣaḥ kāraṇāntarasākalyaṁ ca | svabhāvaviśeṣo yanna tribidhena viprakarṣeṇa viprakṛṣṭam | yadanātmarūpapritibhāsavivekena pratipattṛpratyakṣapratibhāsarūpam | tādṛśaḥ satsvanyeṣūpalambhapratyayeṣu tathā'nupalabdho'sadvyavahāraviṣayaḥ, anyathā sati liṅge saṁśayaḥ |

10. atrāpi sarvamevaṁvidhamasadvyavahāraviṣaya iti vyāptiḥ, kasyacidasato'bhyupagame tallakṣaṇāviśeṣāt |

na hyevaṁvidhasyāsattvānabhyupagame'nyatra tasya yogaḥ | na hyevaṁvidhasya sataḥ satsvanyeṣūpalambhakāraṇeṣvanupalabdhiḥ | anupalabhyamānaṁ tvīdṛśaṁ nāstītyetā - vanmātranimitto'yamasadvyavahāraḥ, anyasya tannimittasyābhāvāt |

11. sarvasāmarthyaviveko nimittamiti cet | evametat, tasyaiva sarvasāmarthyavivekina evaṁ pratītiḥ, anyasya tatpratipattyupāyasyābhāvāt | tatpratipattau ca satyāmasadvyavahāra itīdaṁ tannimittamucyate |

12. buddhivyapadeśārthakriyābhyaḥ sadvyavahāro viparyaye cāsadvyavahāra iti cet | bhavati buddheryathoktapratibhāsāyāḥ sadvyavahāraḥ, viparyaye'sadvyavahāraḥ |

pratyakṣāviṣaye tu syālliṅgajāyā api kutaścit sadvyavahāraḥ |

asadvyavahārastu tadviparyaye'naikāntikaḥ, viprakṛṣṭe'rthe pratipattṛpratyakṣasya anyasya vā pramāṇasya nivṛttāvapi saṁśayāt |

13. na ca sarve buddhivyapadeśāstadbhedābhedau vā vastusattāṁ vastubhedābhedasattāṁ vā sādhayanti, astsvapi kathañcidatītānāgatādiṣu nānaikārthakriyākāriṣu vā'rtheṣu tadbhāvakhyāpanāya nānaikātmatā'bhāve'pinānaikarūpāṇāṁ vṛtteḥ - rājā mahāsammataḥ prabhavo rājavaṁśasya, saṅkhaścakravartī mahāsammatanirmitasya yūpasyotthāpayitā, śaśaviṣāṇaṁ, rūpaṁ sanidarśanaṁ sapratighaṁ ghaṭaśceti |

14. nahi sanidarśanādiśabdā nānāvastuviṣayāḥ, ekatropasaṁhārāt |

nānāviṣayatve'pyekatropasaṁhārastannimittānāṁ tattatsamavāyāditi cet | āyāse batāyaṁ tapasvī padārthe [padarthaḥ?] patito'nekasambandhinamupakṛtyānekaṁśabdamātmani tebhyaḥ samāśaṁsan ! sa yaiḥ śaktibhedairanekasambandhina mupakaroti tairevānekaṁ śabdaṁ kiṁ notthāpayati ! evaṁ hyanena pramparānusārapariśramaḥ parihṛto bhabati |

nānāśabdotthāpanāsāmarthye nānāsambandhyupakāro'pi mā bhūt, anupakāre hi teṣāṁ tatsambandhitā'pi na sidhyati | ghaṭa ityapi ca rūpādaya eva bahava ekārthakriyākāriṇa ekaśabdavācyā bhavantu, kimarthāntarakalpanayā ?

bahavo'pi hi ekārthakāriṇo bhaveyuḥ, cakṣurādivat | tatsāmarthyakhyāpanāya tatraikaśabdaniyogo'pi syāditi yuktaṁ paśyāmaḥ |

15. na ca niṣprayojanā lokasyārtheṣu śabdayojanā | tatra ye'rthāḥ saha pṛthagvā ekaprayojanāḥ teṣāṁ tadbhāvakhyāpanāya hi ekśabdo niyujyeta yadi, kiṁ syāt ? tadarthakriyāśaktikhyāpanāya niyuktasya samudāyaśabdasyaikavacanavirodho'pi nāstyeva; sahitānāṁ sā śaktirekā, na pratyekamiti |

samudāyaśabda ekasmin samudāye vācye ekavacanaṁ ghaṭa iti |

jātiśabdeṣvarthānāṁ pratyekaṁ sahitānāṁ ca śaktirnānaikā ca śaktiriti, nānaikaśaktivivakṣāyāṁ bahuvacanamekavacanaṁ cecchātaḥ, vṛkṣā vṛkṣamiti [? vṛkṣa iti] syāt |

yadyeṣa niyamo bahuṣveva bahuvacanam ekasminnekavacanamiti |

asmākaṁ tu sāṅketikeṣvartheṣu saṅketavaśāt tāvitya bhiniveśa eva |

16. nāneko rūpādirekaśabdotthāpane samartha iti cet | kiṁ vai puruṣavṛtteranapekṣāḥ śabdānarthaḥ svayamutthyāpayanti, āhosvit puruṣaiḥ śabdā vyavahārārthamartheṣu niyujyante? svayamutthāpane hi bhāvaśaktiḥ, āśaktirvā cintyeta | na ca tadyuktam, puruṣaisteṣāṁ niyoge yatheṣṭaṁ niyuñjīranniti kastatropānambhaḥ ?

nimittaṁ ca niyogasyoktameva |

api ca - yadi na rūpādīnāmekena śabdena sambandhaḥ, kathamekenaiṣā - māśrayābhimatena dravyeṇa sambandha iti kevalamayamasadbhūtābhiniveśa eva |

na vayamekasambandhavirodhādekaṁ śabdaṁ necchāmaḥ, api tvabhinnānāṁ rūpādīnāṁ ghaṭakambalādiṣu nānārthakriyāśabdavirodhāt te ekarūpāḥ samudāyāntarā - sambhāvinīmarthakriyāmeva na kuryuḥ, tena tatprakāśanāyaikenāpi śabdenocyeran |

bhavatu nāma kasyacidiyaṁ vāñchā - bhaveyurekarūpā rūpādayaḥ sarvasamudāyeṣu iti | kimidaṁ parasparaviviktarūpapratibhāsādhyakṣadarśanamenāmupekṣate ?

aniṣṭaṁ cedaṁ rūpādīnā| pratisamudāyaṁ svabhāvabhedopagamāt |

17. yadyanya eva rūpādibhyo ghaṭaḥ syāt kiṁ syāt ?

astu, tasya pratyakṣasya sato'rūpādirūpasya tadvivekena buddhau svarūpeṇa pratibhāsane kimāvaraṇam ?

pratibhāsamānāśca vivekena pratyakṣārthā dṛśyante'pṛthagdeśatve'pigandharasādayaḥ. vātātapasparśādayaścaikendriyagrāhyatve'pi |

idameva ca pratyakṣasya pratyakṣatvaṁ yadanātmarūpādivivekena svarūpasya buddhau samarpaṇam | ayaṁ punarghaṭādiramūlyadānakrayī yaḥ svarūpaṁ ca nopadarśayati, pratyakṣatāṁ ca svīkartumicchati |

18. etena buddhiśabdādayo'pi vyākhyātāḥ, yadi taistatsādhanamiṣyate |

na ca pratyakṣasyānabhibhave rūpānupalakṣaṇam; yena tatsādhanāya liṅgamucyate | apratyakṣatve'pyapramāṇasya sattopagamo na yuktaḥ | tanna rūpādibhyo'nyo ghaṭaḥ evaṁ tāvanna buddhivyapadeśābhyāṁ sattāvyavahāraḥ, sattābhedābhedavyavahāro vā | ata eva na tadviparyayād viparyayaḥ |

19. arthakriyātastu sattāvyavahāraḥ syāt, na sattābhedābhedavyavahāraḥ, ekasyāpyanekārthakriyādarśanāt | yathā pradīpasya vijñānavartivikārajvālāntarotpādanāni | anekasyāpi cakṣurāderekavijñānakriyādarśanāt |

na brūmaḥ - arthakriyābhedamātreṇa sattābheda iti | kiṁ tarhi ? adṛṣṭārthakriyābhedena | yā arthakriyā yasminnadṛṣṭā punardṛśyate sā sattābhedaṁ sādhayati | yathā mṛdyadṛṣṭā satyudakadhāraṇādyarthakriyā ghaṭe dṛśyamānā | adṛṣṭā ca tantuṣu prāvaraṇādyarthakriyā paṭe dṛsyate iti sattābhedaḥ |

sidhyatyevamarthāntaraṁ, tathā'pyavayavī na sidhyati | yathāpratyayaṁ saṁskārasantatau svabhāvabhedo tpatterarthakriyābhedaḥ | araṇinirmathanāvasthādāvivāgneḥ sthūlakarīṣatṛṇakāṣṭhadahanaśaktibhedaḥ, tathā yathāpratyayaṁ svabhāvabhedotpattestantvādiṣvarthakriyābhedaḥ |

etena buddhivyapadeśabhedābhedau vyākhyātau |

20. tatrayaduktam - 'arthakriyātaḥ sattāvyavahārasiddhiḥ, viparyayād viparyayaḥ' iti; satyametat | sa eva tu viparyayo'nupalabdhilakṣaṇaprāpteṣu na sidhyati |

tatra punaridamanicchato'pyāyātam - 'yasyedaṁ sāmarthyamupalabdhilakṣaṇaprāptaṁ sannopalabhyate, so'sadvyavahāraviṣayaḥ, sāmarthyalakṣaṇatvāt sattvasya' iti |

tathāpi ko'tiśayaḥ pūrvakādasya ? na hi svabhāvādarthāntaraṁ sāmarthyam | tasyopalabdhilakṣaṇaprāptasya yo'nupalambhaḥ sa svabhāvasyaiveti pūrvakaiveyamanupalabdhiḥ |

tasmādanena kvacit keṣāñcidasadvyavahāramabhyupagacchatā ato'nupalambhādabhyupagantavyaḥ |

so'nyatrāpi tathāvidhe'viśiṣṭa iti so'pi tathāstu iti | na vā kvacid, viśeṣābhāvāt | vyāptiḥ - sarva evaṁvidho'nupalabdho'sadvyavahāraviṣaya iti |

21. naiva kaścit kvacit kathañcidanupalabdho'pyasadvyavahāraviṣaya iti cet | sarvasya sarvarūpāṇāṁ sarvadā'nivṛtteḥ sarvaṁ sarvatra sarvadā samupayujyeta |

idaṁ ca na syāt - 'idamataḥ', 'nāta idam', 'ihedam', 'iha nedam', 'idānīmidam', 'idānīṁ nedam', 'idamevam' 'idaṁ naivam' iti; kasyacidapi rūpasya kathañcit kvacit kadācid viviktahetorabhāvāt | ananvayavyatirekaṁ viśvaṁ syāt, bhedābhāvāt |

avasthānivṛttipravṛttibhedebhyo vyavastheti cet | nanvata eva sarvaviṣayasyāsadvyavahārasyābhāvānna te sambhavanti, yatastebhyo vyavasthā syāt |

kvacid viṣaye'sadvyavahāropagame sa kuta iti vaktavyam | na hyanupalambhādanyo vyavacchedaheturasti; vidhipratiṣedhābhyaṁ vyavacchede sarvadā'nupalambhasyaiva sādhanatvāt |

anupalambhādeva tadabhyupagame, sa yatraivāsti sarvo'sadvyavahāraviṣaya iti vaktavyam, viśeṣābhāvāt |

22. sarvapramāṇanivṛttiranupalabdhiḥ | sā yatra so'sadviṣaya [ ? so'sadvyavahāra-viṣaya] iṣṭa iti cet | sukumāraprajño devānāmpriyo na sahate pramāṇacintā - parikleśaṁ, yena nātrādaraṁ kṛtavān !

na hyanumānādinivṛttirabhāvaṁ gamayati, vyabhicārāt | na sarvapratyakṣanivṛttiḥ, asiddheḥ |

nātmapratyakṣāviśeṣanivṛttirapi viprakṛṣṭeṣu |

tasmāt svabhāvaviśeṣo yataḥ pramāṇānniyamen sadvyavahāraṁ pratipadyate, tannivṛttistasyāsadvyavahāraṁ sādhayati, tatsvabhāvasattāyāḥ tatpramāṇāsattayā iṣṭeḥ |

na copalabdhilakṣaṇaprāptasyārthasyāpraptyakṣādanyopalabdhiḥ, yenānumānādasyopalabdhiḥ syāt | na ca tadrūpānyathābhāvamantareṇāpratyakṣatā, anyathābhāve ca tadeva na syāt |

api ca - kuta idamamantrauṣadhamindrajānaṁ bhāvena śikṣitam, yadayamajātānaṣṭarūpātiśayo'vyavadhānadūrasthānastasyaiva tadavasthendriyādereva puruṣasya kadācit pratyakṣaḥ, apratyakṣaśca; yena kadācidasyānumānamupalabdhiḥ, kadācit pratyakṣaṁ, kadācidāgamaḥ ! ekasminnevānatiśaye amīṣāṁ prakārāṇāṁ virodhāt |

23. nānatiśayanivṛttyā, [naikātiśayanivṛtyā ?] aparātiśayotpattyā ca tairvyavahārabhedopagamāt |

so'tiśayastasyātmabhūto'nanvaye [ ... nanvayaḥ ?] nivartamānaḥ pravartamānaśca kathaṁ na svabhāvanānātvamākarṣayati, sukhaduḥkhavat | sānvayatve ca kā kasya pravṛttirnivṛttirvā iti yatkiñcidetat |

athavā yadi ca kasyacitsvabhāvasya pravṛttirnivṛttirveti svayamapyabhyanujñāyate, tadetadeva paro bruvāṇāḥ kimiti nānumanyate ?

tasya niranvayopajananavināśopagamāditi cet |

ko'yamanvayo nāma ? bhāvasya janmavināśayoḥ śaktiḥ; sā'styeva prāgapi janmano nirodhādapyūrdhvam | tenāyaṁ nāpūrvaḥ sarvathā jāyate, na pūrvo vinaśyatīti |

yadi sā sarvadā'natiśayā, kimidānīmatiśayavad yatkṛto'yaṁ vyavahāravibhāgaḥ ?

tā avasthā atiśayavatya iti cet, tā avasthāḥ sā ca śaktiḥ kimeko bhavaḥ ? āhosvit nānā ? ?

ekaścet kathamidānīmidamekatrāvibhaktātmani niṣparyāyaṁ parasparavyāhataṁ yokṣyate - janmājanma, nivṛttiranivṛttiḥ, ekatvaṁ nānātvaṁ, pratyakṣatā'pratyakṣatā, arthakriyopayogaḥ anupayogaścetyādi |

24. asti paryāyo'vasthā śaktiriti, tenāvirodha iti cet | vismaraṇaśīlo devānāmpriyaḥ prakaraṇaṁ na lakṣayati | śaktiravasthetyeko bhāvo'vibhāga iti yat ko'yaṁ virodha uktaḥ ?

athāpyanayorvibhāgaḥ, nakaścid virodhaḥ, kevalaṁ sānvayau bhāvasya janmavināśau iti na syāt |

tasmād yasyānvayo na tasya janmavināsau, yasya ca tau na tasyānvayaḥ |

tayorabhedādadoṣa iti ced, anuttaraṁ bata doṣasaṅkaṭamatrabhavān dṛṣṭirāgeṇa pravesyamāno'pi nātmānaṁ| cetayati | abhedo hi nāmaikyam, 'tau' ityayaṁ ca bhedādhiṣṭhāno bhāviko vyavahāraḥ | nivṛttiprādurbhāvayoḥ anivṛttiprādurbhāvau, sthitāvasthitiḥ ityādikaṁ nānātvalakṣaṇaṁ ca kathaṁ yotsyate ?

atha hi bhāvānāṁ bheda etadvirahaścābhedaḥ, yathā - sukhādiṣu śaktyavasthayoccaikātmani | anyathā bhedābhedalakṣaṇābhāvād bhedābhedayoravyavasthā syātsarvatra |

tadātmani prādurbhāvo'bhedaḥ, viparyaye bhedaḥ, yathā - mṛdātmani prādurbhavato ghaṭasya tasmādabhedaḥ, bhedaśca viparyaye sukhaduḥkhayoriti idaṁ bhedābhedalakṣaṇaṁ, tenāvirodha iti cet |

na vai mṛdātmani ghaṭasya prādurbhāvaḥ | kiṁ tarhi ? mṛdātmaiva kaścid ghaṭaḥ, na hyekastrailokye mṛdātmā | prativijñaptipratibhāsabhedaśca dravyasvabhāvabhedāt | evaṁ hyasyāpi sukhādiṣu caitanyeṣu bhedāvagamaḥ samartho bhavati |

yadyeva, bhedaḥ syāt |

satyapyetasmin kasyacidātmano'nvayā devamiti cet | sukhādiṣvapyayaṁ prasaṅgaḥ caitanyeṣu ca |

na ca ghaṭādiṣvapi sarvātmanā'nvayaḥ, avaiśvarūpyasahotpattyādiprasaṅgāt |

na ca ghaṭaṁ mṛdātmānaṁ ca kaścid vivekenopalakṣayati, yenaivaṁ syādidamiha prādurbhūtamiti |

na hyadhiṣṭhānādhiṣṭhāninorvivekenānupalakṣaṇe evaṁ bhavati | na ca śakteḥ śaktyātmani prādurbhāvaḥ iti tasyāḥ svātmano'bhedo na syāt !

25. etenaiva pariṇāmaḥ pratyuktaḥ | yo'pi hi kalpayed - 'yo yasya pariṇāmaḥ sa tasmādabhinnaḥ' iti | na hi śaktirātmanaḥ pariṇāma iti |

kiñcedamuktaṁ bhavati - pariṇāma ityavasthitasya dravyasya dharmāntaranivṛttiḥ, dharmāntaraprādurbhavaśca pariṇāmaḥ |

yattaddharmāntaraṁ nivartate prādurbhavati ca, kiṁ tat tadevāvasthitaṁ dravyaṁ syāt, tato'rthāntaraṁ vā, anyavikalpābhāvat ?

yadi tattadeva, tasyāvasthānānna nivṛttiprādurbhāvāviti kasya tāviti vaktavyam |

avasthitasya dharmāntaramiti ca na sidhyati | na hi tadeva tasyānapāśritavyapekṣābhedaṁ dharmāntaraṁ bhavati |

atha dravyādarthāntaraṁ dharmaḥ, tadā tasya nivṛttiprādurbhāvābhyaṁ na dravyasya pariṇatiḥ | na hyarthāntaragatābhyāṁ syāt nivṛttiprādurbhāvābhyāmarthāntarasya pariṇatiḥ, caitanye'pi prasaṅgāt |

dravyasya dharma iti ca vyapadeśo na sidhyati, sambandhābhāvāt | na hi kāryakāraṇabhāvādanyo vastusambandho'sti |

na cānayoḥ kāryakāraṇabhāvaḥ, svayamatadātmano'tatkāraṇatvāt, dharmasya dravyādarthāntarabhūtatvāt |

arthāntaratve'pi dharmakāraṇatve, arthāntarasya kāryasyotpādanāt dravyasya pariṇāmaḥ itīṣṭaṁ syāt | tadviruddhasyāpi hetuphalasantāne mṛddravyākhye, pūrvakānmṛtpiṇḍadravyāt kāraṇāduttarasya ghaṭadravyasya kāryasyotpattau 'mṛd dravyaṁ pariṇatam' iti vyavahārasyopagamāt |

na ca dharmasya dravyāt tattvānyatvābhyāmanyo vikalpaḥ sambhavati, ubhayathā yena pariṇāmaḥ |

26. na nirvivekandravyameva dharmaḥ, nāpi dravyādarthāntaram, kiṁ tarhi ? dravyasya sanniveśo'vasthāntaram, yathā aṅgulīnāṁ muṣṭiḥ | na hyaṅulya eva nirvivekā muṣṭiḥ, prasāritānāmamuṣṭitvāt |

nāpyarthāntaraṁ, pṛthaksvabhāvānnopalabdhiriti cet | na, muṣṭeraṅguliviśeṣatvāt | aṅgulya eva hi kāścana muṣṭiḥ, na tu sarvāḥ | na hi prasāritā aṅgulyo nirvivekasvabhāvāḥ muṣṭyaṅgulyaḥ, avasthādvaye'pi ubhayapratipattiprasaṅgāt |

yatra cahi khalu vivekaḥ svabhābhūtaḥ, sa eava vastubhedalakṣaṇaṁ sukhuduḥkhavat |

parabhūte ca vivekotpāde'ṅgulyaḥ prasāritā evopalabhyeran | na hi svayaṁ svabhāvādapracyutasyārthāntarotpāde'nyathopalabdhi ratiprasaṅgāt |

nanūktaṁ, 'dravyameva nirvivekamavasthā, nāpi dravyādarthāntaram' iti |

uktamidaṁ, na punaryuktam | na hi sato vastunastattvānyatve muktvā anyaḥ prakāraḥ sambhavati, tayorvastuni paraspara parihāra-sthitilakṣaṇatvenaikatyāgasyāparopādānanāntarīyakatvāt |

aṅgulīṣu punaḥ pratikṣaṇavināśinīṣvanyā eva prasaritaḥ anyā muṣṭiḥ |

tatra muṣṭyādiśabdā viśeṣaviṣayāḥ, aṅgulīśabdaḥ sāmānyaviṣayaḥ, bījāṅkurādiśabdavat, vrīhyādiśabdavacca | tenāṅgulyaḥ prasāritā na muṣṭiḥ |

27. tadyadi prāgasadeva kāraṇe kāryaṁ bhavet, kiṁ na sarvaḥ sarvasmāt bhabvati, na hyasattve kaścid viśeṣa iti ?

nanu sarvatra sattve'pyayaṁ tulyo doṣaḥ - na hi sattve kaścid viśeṣaḥ, viśeṣe vā sa viśeṣa straigunyād bhinnaḥ syāt, tadbhāve viśeṣasyānanvayāt |

sataśca sarvātmanā niḥsvabhāvāvasthāyāmiva kiṁ jāyate ? sādhanavaiphalyaṁ ca, sādhyasya kasyacidabhāvāt |

yasya kasyacidatiśayasya tatra kathañcidasata utpattau so'tiśayastatra asan kathaṁ jāyeta ? jāto vā sarvaḥ sarvasmājjāyeta iti tulyaḥ paryanuyogaḥ |

nātiśayastatra sarvathā nāsti, kathañcitsata eva bhāvāditi cet | yathā nāsti sa prakāraḥ, tatra asan kathaṁ jāyeta ?

28. na ca sarvathā sataḥ kaścijjanmārtha ityuktam | asato'pi kāryasya kāraṇādutpāde yo yajjananasvabhāvastata eava tasya janma, nānyasmāditi niyamaḥ |

tasyāpi sa svabhāvaniyamaḥ svahetorityanādisvabhāvaniyamaḥ |

api ca - yadi mṛtpiṇḍe ghaṭo'sti, kathaṁ tadavasthāyāṁ na paścādvadupalabdhiḥ, tadarthakriyā vā ?

vyakteraprādurbhāvāditi cet | tasyā eva tadarthakriyādibhāve ghatvāt tadrūpasya ca prāgasattvāt kathaṁ ghaṭo'sti ? na hi rūpāntarasya sattve rūpāntaramasti |

na ca rūpapratibhāsavede vastvabhedo yuktaḥ, atiprasaṅgāt |

29. tasmād yaḥ upalabdhilakṣaṇaprāptasvabhāvānupalabdhiḥ sa nāstyeva | na hi tasyatatsvabhāvasthitāvanupalabdhitaḥ, asthitiścātattvam, parasparaṁtathāsthitayoreva [tathāsthitayoriva? ] sukhaduḥkhayoriti vyāptiḥ, asadvyavahāraniścayena anupalabdhiviśeṣasya | tenānupalabdhyā kasyacid vyavacchedaṁ prasādhayatā tasya yathoktopalabdhilakṣaṇaprāptirūpatā darśanīyā |

upadarśyānupalabdhinirdeśāsamarthanaṁ svabhāvānupalabdhau, vyāpakānupalabdhāvapi dharmayorvyāpyavyāpakabhāvaṁ prasādhya vyāpakasya nivṛttiprasādhanaṁ samarthanam |

kāraṇānupalabdhāvapi kāryakāraṇabhāvaṁ prasādhya kāraṇasya nivṛtti prasādhanaṁ samarthanam |

tadviruddhopalabdhiṣvapi dvayorviruddhayorekasya viruddhasyopararśanaṁ samarthanam |

evamanupalabdhau sādhanāṅgasyāsamarthanaṁ sādhanāṅgāvacanam | tad vādino nigrahasthānasamarthane [ ? nigrahasthānam, asamarthane] tasmin vyāpyāsiddheḥ |

30. athavā - sādhyate yena pareṣāmapratīto'rtha iti sādhanaṁ, trirūpahetu-vacanasamudāyaḥ | tasyāṅgaṁ pakṣadharmādivacanam | tasyaika-syāpyavacanamasādhanāṅga-vacanaṁ, tadapi vādino nigrahasthānam | tadavacane heturūpasyaivāvacanam, avacane siddherabhāvāt |

31. [pratijñādīnāmasādhanāṅgatvam]

athavā - tasyaiva sādhanasya yannāṅgaṁ pratijñopanayanigamanādi tasyāsādhanāṅgasya sādhanavākye upādānaṁ vādino nigrahasthānaṁ, vyarthāmidhānāt |

anvayavyatirekavacanayorvā sādharmyavati vaidharmyavati ca sādhanaprayoga ekasyaivābhidhānena siddherbhāvād dvitīyasyāsāmarthyamiti tasyāpyasādhanāṅgasyābhidhānaṁ nigrahasthānaṁ, vyarthābhidhānādeva |

nanu ca viṣayopadarśanāya pratijñāvacanamasādhanāṅgamapyupādeyameva | na, vaiyarthyāt | asatyapi pratijñāvacane yathoktāt sādhanavākyād bhavatyeveṣṭārthasiddhirityapārthakaṁ tasyopādānam |

yadi ca viṣayopadarśanamantareṇa pratīterutpattiḥ, kathaṁ na pratijñā sādhanādayaḥ [sadhanāvayavaḥ? ] ? na hi pakṣadharmavacanasyāpi pratītihetubhāvādanyaḥ sādhanārthaḥ, sa pratijñāvacane'pi tulya iti kathaṁ na sādhanam ?

kevalasyāsāmarthyādasādhanatvamiti cet | tattulyaṁ pakṣadharmavacanasyāpīti tadapi na sādhanāvayavaḥ syāt |

na hi pakṣadharmavacanāt kevalā [kevalāt?] pratipatterutpattiḥ |

etena saṁśayotpattiḥ pratyuktā, pakṣadharmavacanādapi kevalādapradarśite sambandhe saṁśayotpatteḥ |

tasmād vyarthameva sādhanavākye pratijñāvacanopādānaṁ vādino nigrasthānam |

32. athavā sādhanasya siddheryannāṅgam - asiddhaḥ, viruddhaḥ anaikāntiko vā hetvābhāsaḥ tasyāpi vacanaṁ vādino nigrahasthānam, asamarthopādānāt |

tathā sādhyādivikalasya anvayāpradarśitānvayā tairapi [? ananvayāpradarśitānvayāderapi] dṛṣṭāntābhāsasya sādhanāṅgasya [?asādhanāṅgasya] vacanamapi vādino nigrahasthānam asamarthopādānādeva | na hi tairhetoḥ sambandhaḥ śakyate pradarśayitum | apradarśanādasāmarthyam |

33. athavā - siddhiḥ sādhanaṁ, tadaṅgaṁ dharmo yasyārthasya vivādāśrayasya vādaprastāvahetoḥ sa sādhanāṅgaḥ | tadvayatirekeṇāparasyāpyajijñāsitasya viśeṣasyāśāstrāśrayavyājādibhiḥ prakṣepo moṣaṇaṁ [ghoṣaṇaṁ?] ca paravyāmohanānubhāṣaṇa-śaktivighātādihetoḥ, tadapyasādhanāṅgavacanaṁ vādino nigrahasthānam, aprastutābhidhānāt |

ebhiḥ kathāviccheda eva; tathā viśeṣasahitasyārthasya prativādino'jijñāsitatvāt | jijñāsāyāmadoṣḥ | jijñāsitaṁ punararthasyānyasya prasaṅgaparaṁparayā ye ṣa pannādinā (?) bahiḥ prativādinaḥ, prāśnikānāṁ ca nyāyadarśināmiti |

ebhiḥ kathāviccheda eva karaṇīyaḥ | na hi kaścidarthaḥ kvacit kriyamāṇaprasaṅge na prayujyate, nairātmyavādinastu tatsādhane nṛtyagītyāderapi tatra prasaṅgāt |

yathā - pratijñābhidhānapūrvakaṁ kaścit kuryāt - 'nāstyātmā' iti vayaṁ bauddhā brūmaḥ | ke bauddhāḥ ? ye buddhasya bhagavataḥ śāsanamabhyupagatāḥ | ko buddho bhagavān ? yasya śāsane bhadantāśvaghoṣaḥ pravrajitaḥ | ka ḥ punarbhadantāśvaghoṣaḥ ? yasya rāṣṭrapālaṁ nāma nāṭakam | kīdṛśaṁ rāṣṭrapālaṁ nāma nāṭakam ? iti prasaṅgaṁ kṛtvā 'nāndyante tataḥ praviśati sūtradhāraḥ' iti paṭhet, nṛtyed, gāyecca | prativādī taṁ ca sarvaprasaṅgaṁ nānukartuṁ samartha iti parājitaḥ syāt | iti sabhyaḥ sādhusammatānāṁ viduṣāṁ tattvacintāprakāraḥ !

34. na caivaṁ prastutasya paryavasānaṁ sa bhavati [? sambhavati], 'aniścaya phalatvādanārambha eva vādasya |

kathaṁ caiva jayaparājayau ? prativādino'pyananubhāṣaṇasyaivamprakārasya prasaṅgasya vistareṇānubhāṣaṇavyājena sambhavād, aniscitatvācca |

tasmāt pratijñāvacanameva tāvanna nyāyyam | kutaḥ punastatrājijñāsitaviśeṣaprasaṅgopanyāsaḥ, tadvyākhyāprasaṅgavitathapralāpaśca ?

sarvaścāyaṁprakāro durmatibhiḥ śaṭhairnyāyasāmarthyenārthapratipādane'samarthaiḥ pravartitaḥ |

yathā - 'puruṣātiśayapūrvakāṇi tanubhuvanakaraṇādīni' iti pratijñāya tanukaraṇabhuvanavyākhyāvyājena sakalavaiśeṣikaśāstrārthaghoṣaṇam |

'nityaḥ śabdo'nityo vā' iti vāde dvādaśalakṣaṇaprapañcaprakāśanaśāstra praṇetṛ-jaiminipratijñātatattvanityatādhikaraṇaśabdaghaṭānyatarasadvitīyo ghaḥṭa iti pratijñāmuparacayya dvādaśalakṣaṇādivyākhyānam |

sarvo'yaṁ durmatīnāmasāmarthyapracchādanopāyaḥ, na tu satyairastyupetaḥ, tattvaparīkṣāyāṁ phalādipratisaraṇadaṇḍaprayogādīnāmayuktatvāt |

35. bhavatyeva nāṭakādighoṣaṇe'rthāntaragamanāt parājaya iti cet, anyasyāpyajijñāsitasya kiṁ na bhavati ? na hi tasyāpi kācid vivakṣitasādhyadharmasiddhau nāntarīyakatā | yathā hetupratyayapāratantryalakṣaṇasaṁskāraduḥkhatādisiddhimantareṇa nānityatāsiddhiḥ |

tathāvidhastu dharmaḥ pṛthaganukto'pi sādhyadharme'ntarbhāvāt pakṣīkṛta eveti na pṛthagasyopanyāsaḥ, vyākhyānaṁ vā | tasmādevaṁvidhasyāpi tadānīṁ prativādino jijñāsitasyārthasya pratijñāyāmanyatraivopanyāso vyākhyānaṁ vā arthāntaragamanānnigrahasthānameva |

tena jijñāsitadharmamātrameva sādhanāṅgaṁ vācyaṁ, na prasaṅga upakṣeptavyaḥ, tadupakṣepe'tiprasaṅgāt |

evamasādhanāṅgavacanaṁ vādino nigrahasthānaṁ prativādinā tathābhāve pratipādite, anyathā dvayorekasyāpi na jayaparājayāviti |

36. [adoṣodbhāvanaṁ nigrahasthānam]

adoṣodbhāvanaṁ prativādino nigrahasthānam | vādinā sādhane pratyukte'bhyupagatottarapakṣo yatra viṣaye prativādī yadā na doṣamudbhāvayati, tadā parājito vaktavyaḥ |

sādhanadoṣāḥ punaḥ - nyūnatvam, asiddhiḥ, anaikāntikatā, vādinaḥ sādhayitumiṣṭasyārthasya viparyayasādhanam, aṣṭādaśa dṛṣṭāntābhāsāśca | teṣāmanudbhāvanamapratipādanaṁ prativādinaḥ parājayādhikaraṇam |

tat punaḥ sādhanasya nirdoṣatvāt, sadoṣatve'pi prativādino'jñānāt, pratipādanāsāmarthyād vā |

na hi duṣṭa sādhanābhidhāne'pi vādinaḥ prativādino'pratipādite doṣe parājayavyavasthāpanā yuktā, tayoreva parasparasāmarthyopaghātāpekṣayā jayaparājayavyavasthāpanāt |

kevalaṁ hetvābhāsād bhūtapratipatterabhāvāda pratipādakasya jayo'pi nāstyeva | na hi tattvacintāyāṁ kaścicchalavyavahāraḥ |

yadyevaṁ, kiṁnu parājayaḥ, tattvasiddhibhraṁśāt ? na anirākaraṇāt | nirākaraṇaṁ hi tasyānyena parājayaḥ, na siddhyabhāvaḥ, pratiyogyapekṣaṇāt | siddhyabhāvasya sādhanābhāve'satyapi pratiyogini bhāvāt | pratiyoginaśca tannirākaraṇe'sāmarthyāt parājayasyānutpatteraparājayaḥ |

tasmādayamasamarthasādhanābhidhāyyapi pareṇa tathābhāve'pratipādite'parājito vaktavyaḥ |

37. [vāde chalavyavahāraniṣedhaḥ]

chalavyavahāro'pi vijigīṣuṇaṁ vāda iti cet | na, durjanavipratipattyadhikāre satāṁ śāstrāpravṛtteḥ | na hi parānugrahapravṛttā mithyāpralāpārambhāt sotkarṣaparapaṁsanādīn [svotkarṣaparapaṁsanādīn ?] asadvyavahārān upadiśanti | na ca paravipaṁsanena lābhasatkāraślokopārjanaṁ satāmācāraḥ |

nāpi tathāpravṛttebhyaḥ svahastadānena prāṇināmupatāpanaṁ satsammatānāṁ śāstrakāra sabhāsadāṁ yuktam | na ca nyāyaśāstrāṇi sadbhirlābhādyupārjanāya praṇīyante |

tasmānna yogavihitaḥ kaścid vijigīṣuvādo nāma | parānugrahapravṛttāstu santo vipratipannaṁ pratipādayanto nyāyamanusareyuḥ satsādhanābhidhānena, bhūtadoṣodbhāvanena vā |

sākṣipratyakṣaṁ tasyaivānuprabodhāya | tadeva nyāyānusaraṇaṁ satāṁ| vādaḥ - uktanyāye tattvārthī cet pratipadyeta, tadapratipattāvapyanyo na vipratipadyeteti |

tattvarakṣaṇārthaṁ sadbhirupahartavyameva chalādi vijigīṣubhiriti cet | nakhacapeṭaśastraprahārādīpanādibhirapīti vaktavyam ! tasmānna jyāyānayaṁ tattvarakṣaṇopāyaḥ |

sādhanaprakhyāpanaṁ satāṁ tattvarakṣaṇopāyaḥ, sādhanābhāsadūṣaṇaṁ ca | tadabhāve mithyāpralāpādatra paropatāpavidhāne'pi tattvāpratiṣṭāpanāt | anyathāpi nyāyopavarṇane vidvatpratiṣṭhānāt |

tasmāt parānugrahāya tattvakhyāpanaṁ vādino vijayaḥ, bhūtadoṣadarśanena mithyāpratipattinivartanaṁ prativādinaḥ |

38. athavā - yo na doṣaḥ sādhanasya, tadbhāve'pi vādinā tadasādhayitum [tadā sādhayitum ?] iṣṭasyārthasya siddhervighātābhāvāt, tasyodbhāvanaṁ prativādino nigrahādhikaraṇaṁ, mithyottarābhidhānāt | yathā sādhyatayā'niṣṭo'pi vādino dharmaḥ śāstropagamāt sādhya iti tadviparyāsena na virodhodbhāvanam |

'nāstyātmā' iti tava pratijñāpadayorvirodha iti pratijñādoṣodbhāvanaṁ, 'prayatnāntarīyakaḥ śabdo'nityaḥ, prayatnāntarīyakatvād' iti hetordharmaviśeṣatvāt pratijñārthaikadeśa ityasiddhodbhāvanaṁ, sarvāṇi sādharmyavaidharmyasamādīni jātyuttarāṇi ityevamāderdoṣasyodbhāvanamadoṣodbhāvanam | tasya vādinā doṣābhāsatve prakhyāpite prativādī parājito vaktavyaḥ, pūrvapakṣe sādhanasya nirdoṣatvāt |

doṣavati punaḥ sādhane na dvayorekasyāpi jayaparājayau, tattvāprakhyāpanāt, adoṣodbhāvanaṁ ca | apratipakṣāyāṁ ca pakṣasiddhau kṛtāyāṁ jetā bhavati |

tasmājjigīṣatā svapakṣaśca sthāpanīyaḥ, parapakṣaśca nirākartavyaḥ |

nirdoṣe sādhanābhidhāne'pi vādinaḥ prativādinā doṣābhāsa udbhāvite dūṣaṇābhāvatvakhyāpane eva jayaparājayau, nānyathā, bhāvatastattvābhidhāne'pi pratipakṣanirākaraṇena tattvasya prakhyāpanāsāmarthyāt, na prativādinno'pyatra, bhāvato mithyāpratipatteriti |

idaṁ nyāyyaṁ nigrahasthānalakṣaṇamuktamasmābhiḥ |

nyāyamatakhaṇḍanam

39. anyatu na yuktamiti neṣyate | yatredaṁ yathoktaṁ nigrahasthānalakṣaṇaṁ nāsti, tasya nigrahasthānatvamayuktamiti noktamasmābhiḥ |

[1] 'pratidṛṣṭāntadharmābhyanujñā svadṛṣṭānte pratijñāhāniḥ nigrahasthānam' [nyā.sū. 5.2..2] ityatra bhāṣyakāramataṁ dūṣayitvā vārtikakāro yaṁ sthitapakṣamāha, tatraivaṁ brūmaḥ - pratidṛṣṭāntasya yo dharmastaṁ yadā svadṛṣṭānte'bhyanujānāti nigṛhīto veditavyaḥ |

tatra dṛṣṭaścāsāvante ca vyavasthita iti dṛṣṭāntaḥ | svadṛṣṭāntaḥsvapakṣaḥ | pratidṛṣṭāntaḥ pratipakṣaḥ | pratipakṣasya dharmaṁ svapakṣe'bhyanujānan parājitaḥ | yathā 'anityaḥ śabda aindriyakatvād' iti bruvan pratipakṣavādini sāmānyena pratyavasthite āha - 'yadi sāmānyamaindriyakaṁ nityaṁ śabdo'pyevamastu' ityeṣā pratijñāhāniḥ, prākpratijñātasya śabdānityatvasya tyāgāditi |

40. atropagatapratijñātyāgāt pratijñāhānau viśeṣapratiniyamaḥ kiṁkṛto'nena prakāreṇa pratijñāṁ tyajataḥ pratijñāhāniriti |

sambhavati hyanenāpi prakāreṇa hetudoṣodbhāvanādinā pratipakṣasādhanābhidhānena ca svapakṣaparityāgaḥ, parapakṣopagamaśca |

idameva ca pratijñāhāneḥ pradhānaṁ nimittam | evaṁ pratipāditena pratijñā hātavyā, hānau ca parājaya iti |

41. idaṁ punarasambhaddhameva - 'sāmānyaṁ nityamaindriyakam' ityukte 'śabdo'pyevamastu; iti kaḥ svasthātmāsvayamaindriyakatvādanityaḥ śabdo ghatavaditi bruvan sāmānyenopadarśanamātreṇa nityaṁ śabdaṁ pratipadyeta ?

sāmānyasyāpi nityasyaindriyakatve tasyānitye ghaṭe darśanāt saṁśayitaḥ syāt | jātyā pratipadyetāpīti cet | tathapi kiṁ sāmānyopadarśanena ?

evameva nityaḥ śabdaḥ iti vaktavyam, jaḍasya pratipattau vicārābhāvāt |

na ca nityasāmānyopadarśanena taddharmaṁ śabde pratipadyamānena pratipakṣadharmo'bhyanujñāto bhavati | 'anityaḥ śabdaḥ' iti ca vadato nityaśabda ityāñjasaḥ pratipakṣaḥ syāt, na nityaṁ sāmānyamiti |

tasmādaindriyakatvasya nityānityapakṣavṛttervyabhicārādasādhanāṅgasyopādānānnigrahārhaḥ, na pratipakṣadharmānujñyā'nena prakāreṇa pratijñāhāneḥ |

42. [2] 'pratijñātārthapratiṣedhe dharmavikalpāt tadarthanirdeśaḥ pratijñāntaram |' [nyā. sū. 5.2.3] pratijñāto'rtho'nityaḥ śabda aindriyakatvādityeva, tasya hetuvyabhicāropadarśanena pratiṣedhe kṛte dharmabhedavikalpāt sāmānyaghaṭayo sarvagatatvāsarvagatatvadharmavikalpena pratijñāntaraṁ karoti - yathā ghaṭo'sarvagato'nityaḥ evaṁ śabdo'pyasarvagato'nitya iti | etatpratijñāntaraṁ nāma nigrahasthānaṁ sādhanasāmarthye'pyaparijñānāt | sa hi pūrvasyāḥ 'anityaḥ śabda' iti pratijñāyāḥ sādhanāttadā yām 'asarvagataḥ śabda' iti pratijñāmāha, taddarśanāya taddarthanirdeśa ityāha | tadarthaḥ pūrvoktasādhyasiddhyarthaḥ | uttarapratijñānirdeśastadarthanirdeśaḥ | na ca pratijñā pratijñāntarasādhane samarthā, iti nigrahasthānam

43. atrāpi naivaṁ bruvatā pratijñāntaraṁ pūrvapratijñāsādhanāyoktaṁ bhavati | kiṁ tarhi ? viśeṣaṇam | aindriyakatvasya hetoḥ sāmānye vṛttyā vyabhicāra udbhāvite'sarvagatatve satyaindriyakatvasyahetorviśeṣaṇopādāne vyābhicāraṁ pariharati, na punaḥ pratijñāntaramāha; asarvagatatvasya śabde siddhatvāt, pratijñāyāśca sādhyanirdeśalakṣaṇatvāt |

yadapyuktaṁ - 'pūrva pratijñāsādhanāyottarāṁ pratijñāmāha' iti, tadapyuktam | na hi pratijñā pratijñāsādhanāyocyamānā pratijñāntaraṁ bhavati | kiṁ tarhi ? hetvāderanyatamaḥ sādhyasādhanāyopādānāt | sādhananirdeśaḥ sa syāt, na sādhyanirdeśaḥ |

udāharaṇasādharmyādeśca hetulakṣaṇasyāsarvagatatve bhāvāt, pratijñālakṣṇasya cābhāvāt | hetutvamasarvagatatve prayuktaṁ na pratijñāntaram |

44. atyantāsambaddhaṁ cedaṁ - pratijñāṁ pratijñāsādhanāyāheti | yo hi prāk pratijñāmuktvā hetūdāharaṇādikaṁ vaktuṁ jānāti, sa kiñcidanukramaṁ [kañcidanukramaṁ ?] sādhanasya jānātyeva hi | jānan kathamavikalāntaḥkaraṇaḥ pratijñāmeva pratijñāsādhanāyopādadīta ?

upādadatā cānena pratijñāmātreṇa siddhiriṣṭā bhavati | tataśca na prāgapi hetuṁ brūyāt |

evaṁprakārāṇāmasambaddhānāṁ parisaṁkhyātumaśakyatvāt lakṣaṇaniyamo'pyasambadaddha eva - pratijñāntarābhidhāne pratijñāntaraṁ nāma nigrahasthānamiti | evamprakārāṇāmekameva lakṣaṇaṁ vācyaṁ syāt |

na caivaṁvidhaḥ kaścid vivādeṣu dṛṣṭapūrvo vyavahāro yena tadarthaṁ yatnaḥ kriyate | na ca bālapralāpānuddiśya śāstraṁ pravartate | pravṛttau ca kā niṣṭā, teṣāmaniṣṭhānāt ?

45. dṛśyate ca viduṣāmapi nātinirūpaṇādasiddhābhidhānamiti vyavahāradarśanāt tādṛśaṁ parājayādhikaraṇaṁ vyavasthāpyate | tasmādihāpi yadi nivṛttākaṁkṣe vādini paro'naikāntikatāmudbhāvayed, asādhanāṅgasyānaikāntikasyābhidhānānnigrahasthānaṁ vādinaḥ |

evaṁ yadi prativādī satsāmānyamaindriyakaṁ nityaṁ ca pramāṇena pratipādayituṁ śaknuyāt anuddiśyāpramāṇakaṁ śāstropagamaṁ, pramāṇenaiṣāmarthānāmapratipādanena bhūtadoṣodbhāvanametat | na kaścitparājayaḥ, abhyupagamamātreṇa vastusiddherabhāvāt, prativādinā doṣasyāpratipāditatvāt |

pramāṇairasamarthitasādhanābhidhānāt tu jetā'pi na bhavatīti |

anityākāṁkṣe [? anivṛttākāṁkṣe] punarvādini na kaścad doṣoḥ, viśeṣaṇābhidhānena hetoḥ samarthanopakramāt |

46. [3.] "pratijñāhetvorvirodhaḥ pratijñāvirodhaḥ |" [nyā.sū.5 2. 4.] yathā 'guṇavyatiriktiṁ dravyam; iti pratijñā, 'rūpādibhyo'rthāntarasyānupalabdheḥ iti hetuḥ, so'yaṁ pratijñāhetvorvirodhaḥ | etenaiva pratijñāvirodho'lapyuktaḥ, yatra pratijñā vacanena [svavacanena? virudhyate | yathā - śramaṇā garbhiṇī, nāstyātmeti vā |

hetuvirodho'pi, yatra pratijñayā heturvirudhyate | yathā - 'sarvaṁ pṛthak, samūhe bhāvaśabdaprayogād' iti |

etena pratijñayā dṛṣṭāntavirodho vyākhyātaḥ |

47. hetośca dṛṣṭāntādibhirvirodhaḥ, pramāṇavirodhaśca pratijñāhetvorvaktavyaḥ |

yaḥ parapakṣaṁ svasiddhena gotvādinā vyabhicārayati, tad viruddhamuttaraṁ veditavyam |

svapakṣānapekṣaṁ ca | yaṁ ca svapakṣānapekṣaṁ hetuṁ prayuṅkte - 'anityaḥ śabdaḥ aindriyakatvād' iti, tasya svasiddhasya gotvāderanityavirodhād viruddhaḥ | iti parapakṣeṣvasiddhena gotvādinā'naikāntikacodanāviruddhaḥ |

ubhapakṣasampratipannastvanaikāntikaḥ | yadubhayapakṣaṁ [yadubhayapakṣa-?] pratipannaṁ vastu tenānaikāntikacodanā iti |

48. atrāpi pratijñārthaḥ, sādhanavākye prayogapratiṣedhāt | tadāśrayastatkṛto vā hetudṛśṭāntayorna virodha iti na pratijñāvirodho nāma kiñcinnigrahasthānam |

syādetat | asatyapi pratijñāprayoge gamyamāno'pi pratijñāhetvorvirodho bhavati | yathā - rūpādibhyo'rthāntarasyānupalabdhistad guṇavyatiriktam, nopalabhyate ca rūpādibhyo'rthāntaraṁ dravyam | ityukte'pi gamyata eva sādhyasādhanayorvirodhaḥ - kathaṁ tato'rthāntarasyānupalabdhiḥ, tadvyatirekaśceti |

satyaṁ, syādayaṁ virodhaḥ, yadi hetuḥ sādhyadharmaviparyayaṁ sādhayet | yadi hyupalabdhilakṣaṇavyāptatvena [hyupalabdhilakṣaṇaprāptatveva ?] upagatasya sato dravyarūpādipratibhāsavivekena svapratibhāsānupalabdhistasya tadvyatireke nāsti [tadvyatirekeṇāsti ?] iti iṣṭavyatirekaviparyayasādhanād viruddho heturasmābhirukta eveti | bhavatyevedaṁ nigrahādhikaraṇaṁ, yadyevaṁvidhaḥ pratijñāhetoḥ [? pratijñāhetvoḥ] virodha iṣṭaḥ | atha punarasyopalabdhilakṣaṇaprāptirlupyate, tadā na kaścit pratijñāhetoḥ [? pratijñāhetvoḥ] virodhaḥ, vyatiriktānāmapi bhāvānāṁ kutaścid viprakarṣiṇāṁ tadvyatirekeṇānupalabdhāvapi vyatirekasya bhāvāt |

49. yaduktaṁ - 'svavacanapratijñāyāḥ [? pratijñāyāḥ] svavacanavirodhe pratijñāvirodhaḥ' iti tatredameva nigrahādhikaraṇam, asādhanāṅgabhūtāyāḥ pratijñāyāḥ sādhanavākye prayogaḥ, na virodhaḥ, tadadhikaraṇatvāt |

yadi pratijñānapekṣoḥ virodhaḥ syāt, syāt parājayāśrayaḥ | pratijñādhikaraṇatve punastatprayogakṛta eva parājayaḥ, asya prastāvopasaṁhārāvasānatvād vyarthaṁ virodhodbhāvanam, parājitaparājayābhāvād bhasmīkṛtānalavat |

ye tu kecid vicāraprasaṅgeṣu ekatra sādhye bahavo hetava ucyante, teṣa| vikalpena tatsādhyasādhanāya vṛtteḥ sāmarthyam, anyathā dvitīyasya vaiyarthyāt |

yadi hi tatrāpyekaprayogamantareṇāparasya prayogo na sambhavet, na tadā dvitīyasya kaścit sādhanārthaḥ, pratītapratipādanābhāvāt |

tasmānna pratijñāyāḥ svavacanavirodho nāma kiñcinnigrahasthānam |

na ca 'nāstyātmā' ityatra kaścit pratijñāvirodhaḥ nāstyātmaśabdārthasya bhāvopādānatvaniṣedhāt | sabdārthaniṣedhe hi virodhaḥ syāt | na ca svalakṣaṇaṁ śabdārtha iti |

50. yaḥ punaḥ pratijñāyā bādhanāddhetuvirodha uktaḥ, yathā - 'sarvaṁ pṛthak samūhe bhāvaśabdaprayogāt' iti | nātra pratijñāprayogaḥ, nāpi hetoḥ, yena virodhaḥ syāt | kiṁ tarhi ? pratipāditārthopadarśanenopasaṁhāravacanametasmāt [... vacanametatsyāt ? |

anyaireva hetubhiḥ śabdasyaikaviśeṣānabhidhānam, anekārthasāmānyābhidhānaṁ ca pratipādya sarvasya śabdārthasya nānārtharūpatayaikavastuviśeṣasvabhāvatā'bhāvamupadarśayan śabdārthamadhikṛtya sarvaṁ pṛthagiti brūyāt |

etena tadvirodhaḥ pratyuktaḥ |

51. dṛṣṭāntopadarśanaṁ caitad - 'anityaḥ śabdaḥ kṛtakānityatvād; |

yathā kvacid arthe vipratipattau prasiddhamanekārthasāmānye śabdaprayogamupadarśya pratipāditavipratipattisthānaḥ sāmānyenopasaṁharati - sarvaṁ pṛthagiti |

yadi dṛṣṭāntaprayogaḥ, kimṛjunaivatatprayogakrameṇa na prayuktaḥ, vipratipattiviṣayaśca kiṁ na darśita iti cet |

na, samāsanirdeśāt | evamapi prayogadarśanād, asādhanavākyatvācca |

ata eva na pratijñayā hetorbādhanam | na caikameva kiñcinnāstīti bruvāṇaḥ kaścit tatsamuccayarūpamekaṁ ca samūhamicchati, yena virodhaḥ syāt |

yo'pi ''yugapat kaṅkena yogād' ityādinā paramāṇorbhedamāha, na tasyāpyekaḥ samuccayarūpaḥ sādhayitumiṣṭaḥ | kiṁ tarhi ? abhāva eva, ekānekapratiṣedhāt | ataḥ so'pi na samūhastasyeṣṭo na tatra śabda iti na virodhaḥ |

52. na viruddho'yaṁ pūrvakāt pratijñāhetuvirodhāt bhidyate, yena pṛthagucyeta |

tatra hetupratijñayorbādhanam, iha pritijñayā hetorityasti bheda iti cet | arthavirodhe hi hetupratijñayorbādhyabādhakabhāvaḥ syāt | 'sarvārthavirodho dviṣu' iti yamapi [yadapi?] parasparaṁ bbādhakam, ekārthasannidhāvaparārthāsambhavāt, tatra hetupratijñayoḥ sahapṛthagvā bādhodāharaṇayorna kaścidarthabhedaḥ |

53. api cāyaṁ viruddho vā sati hetuprayoge vyadhikaraṇatvādasiddha ityasiddhatā hetornigrahasthānam | sa khalūcyamāna evātaddharmatayā pratīto vaktuḥ parājayamānayati | parājite tasmiṁstadarthavirodhacintayā na kiñcit |

api ca - sarvatrāyaṁ pratijñāhetvorvirodhaḥ sambhavan dvayīṁ doṣajātimabhipatati viruddhatāmasiddhatāṁ ceti |

viruddhatā siddhe hetordharmiṇi bhāve sādhyadharmaviparyaya eva, bhāva pratijñāvirodhāt |

asiddhatāpunardharrmiṇi pratijñātārthasiddhau, viruddhayoḥ svabhāvayoḥ ekatrāsambhavāt, na cānyathā virodhaḥ |

asiddhe dharmasvabhāve'bhihitayorhetupratijñātārthayorvirodhād virodhasambhava iti cet |

apramāṇayoge tūbhayordharmiṇi saṁśayaḥ | tathā sati hetordharmiṇi bhāvasaṁśaye'siddhataiva hetudoṣa ityasiddhaviruddhābhyāmanyo na pratijñayā virodho nāma parājayahetuḥ |

asiddhaviruddhe ca hetvābhāsavacanādevokte iti na pṛthak pratijñāvirodho vaktavya iti |

54. ubhayāśrayatvād virodhasya vivakṣāto'nyataranirdeśa iti cet | syādetat | pratijñāhetvorvirodha iti pratijñāhetū āśrityobhayāśrayo bhavati | tatra yadā pratijñāvirodho vivakṣitastadā pratijñāvirodha ityucyate, yadā pratijñāyā hetorvā virodhastadā viruddho heturiti | ataḥ pratijñāvirodhaḥ, hetuvirodho vā ityadoṣoḥ |

tatra hetorudāharaṇam - nityaḥ śabdaḥ utpattidharmakatvāditi | pratijñāvirodhasya - nāstyātmeti | pratijñāhetvoḥ parasparaviruddhodāharaṇam - guṇavyatiriktamityādi | pratijñayā hetuvirodhodāharaṇam 'nāstyeko bhava' ityādikam iti | na, sarvahetvapekṣasya virodhahetvābhāsānatikramāt, yathoktaṁ prāk |

anapekṣe ca kevale svataḥ prativirodhe [pratijñāvirodhe ?] vivakṣite pratijñāhetvorvirodha iti hetugrahaṇamasambaddham |

na cotpattidharmatvānnityamityatrāpi hetuvirodho yuktaḥ | pratijñayā hi hetorbādhane hetuvirodhaḥ, iha tu hetunā pratijñā bādhyate iti pratijñāvirodho yuktaḥ |

ubhayāśraye'pi virodhe bādhyamānavivakṣayā tadvirodhavyavasthāpanāt |

55. yadapyuktam - etena pratijñayā dṛṣṭāntavirodhādayo'pi vaktavyā bhaṇḍālekhyanyāyeneti, tatrāpi pakṣīkṛtadharmaviparyavati dṛṣṭānte virodhaḥ syāt | viruddhe ca dṛṣṭānte yadi pakṣadharmasya vṛttirananyasādhāraṇā prasādhyate viruddhastadā hetvābhāsaḥ |

sādhāraṇāyāmaprasādhite vā tadvṛttiniyame'naikāntikaḥ | avṛttau vā'sādhāraṇaḥ |

viruddhadṛṣṭāntāvṛttau viparyayavṛttau ca na kaścid hetudoṣaḥ, dṛṣṭāntavirodhaśca pratijñāyā iti cet |

na, tadāpi saṁśayahetutvānativṛtteḥ | dṛṣṭāntavirodho hi pratijñāyāḥ sādharmye doṣo na vaidharmye, abhimatatvāt |

sādharmyadṛṣṭānte ca viparītadharmavati vastutaḥ sādhyāvyabhicāre'pi hetornāvyabhicāradharmatā śakyā darśayitumiti nāpradarśitāvinābhāvasambandhāt hetorniścayaḥ | tanna pratijñayā dṛṣṭāntavirodho hetvābhāsānativartate |

56. ubhayathā'pi doṣo'stviti cet | na | na hetudoṣasya prāk prasaṅgena parājitasya doṣāntarānpekṣaṇāt |

viśeṣeṇa sādhanāvayavānukramaniyamavādinaḥ | udāharaṇasādharnyaṁ hetulakṣaṇaṁ viruddhe dṛṣṭānte na sambhavatīti prākprayuktasya hetordoṣeṇa parājaya iti nottaradṛṣṭāntāpekṣayā virodhaścintāmarhati |

hetorapi dṛṣṭāntavirodhe'sādhāraṇatvaṁ viruddhatvaṁ vā, vaidharmye yadi vṛttiḥ syāt |

pramāṇavirodhe tu hetoryathā - 'na dahano'gniḥ saityāt' ityādi hyasiddho hetvābhāsaḥ |

pratijñāyā pramāṇavirodhaḥ svavacanavirodhena vyākhyātaḥ iti sarve evaite sādhanavirodhe hetvābhāseṣvantarbhavantīti hetvābhāsavacanenaivoktāḥ |

57. yattu viruddhamuttaraṁ parapakṣe svasiddhena gotvādinānaikāntikacodaneti, tadasambaddhameva | yadi hi svasiddhena gotvādinā parasya vyabhicārasiddhimākāṅkṣeta, tasya tatsvapakṣaviruddhaṁ nābhimatamiti virodho yujyeta | sa hi svayaṁ pratipanne gotve hetuvṛtteḥ saṁśayāno'pratipattimātmanastathā khyāpayati |

sa ca hetuḥ satyasati gotve'prasādhitasādhanasāmarthyaḥ saṁśaye hetutvādanaikāntika eva |

prasādhite tu sāmarthye gotve'vṛttyā hetau na saṁśaya eva, sarvasaṁśayaprakārāṇāṁ parihāreṇa samarthanāt |

etena svapakṣānapekṣahetuprayogasyānaikāntikatā vyākhyātā | so'pi svābhimatanityagotvavṛttihetumanityatve bruvāṇo'samarthatayā'sādhanāṅgatayā saṁśayahetumevāheti |

yatpunaruktam - ubhayapakṣasampratipannena vastunā'naikāntikacodaneti, tatrāpyavaśyaṁ saṁśayahetutvamukhenaivānaikāntiko vaktavyaḥ | tadasamarthite'nyatrāpi tulyamiti nobhayasiddhetarayoranaikāntikatvaviśeṣaḥ |

58. yadapyuktaṁ - 'dṛṣṭāntābhāsā hetvābhāsapūrvakatvāt tadabhidhānenaivoktā iti na pṛthag nigrahasthāneṣūktāḥ' iti tadapyavayavāntaravādino'yuktam | yo'vayavāntaraṁ dṛṣṭāntahetoḥ [dṛṣṭāntaṁ hetoḥ? ] āha tasya na hetvābhāsoktyā dṛṣṭāntābhāsoktirvyāpyā, tadvacanena gamyamānsya tasmāt sādhanāntarābhāvaprasaṅgāt |

dṛṣṭāntābhāsānāṁ hetvābhāse'pyantarbhāvād dṛṣṭāntasyāpi hetāvantarbhāva iṣṭo bhavati | tathā ca na dṛṣṭāntaḥ pṛthaksādhanāvayavaḥ syād, apṛthagvṛtteḥ |

yo dṛṣṭāntasādhyo'rthastasya hetāvantarbhāvāddhetunaiva sādhita iti na dṛṣṭāntasya pṛthak kiñcitsāmarthyam |

api ca - na kiñcit pūrvapakṣavādino hetvābhāsāsaṁsparśe nyāyyaṁ nigrahasthānamastīti tatsambhandhīni sarvāṇyeva hetvābhāsatāvacanenaiva uktānīti na pṛthagvācyāni syuḥ |

arthāntaragamanāderapi hetoraśāmarthye eva sambhavāt | na hi samarthe hetau sādhye ca siddhe'rthāntaragamanaṁ kañcidārabhate, asamarthasya mithyāpravṛtteriti

59. [4] "pakṣapratiṣedhe pratijñātārthāpanayanaṁ pratijñāsaṁnyāsaḥ |" [nyā. sū.5.2.5] yaṁ pratijñātamartham ' anityaḥ śabdaḥ eindriyakatvād' iti sāmānyavṛttyā hetorvyabhicārapradarśanena saḥ pratiṣedhe kṛte, 'ka evamāha-anityaḥ śabdaḥ' iti parityajati, tasya pratijñāsaṁnyāso nāma nigrahasthānamiti |

atrāpi yadyudbhāvite'pi hetorvyabhicāre na sapakṣaṁ [svapakṣaṁ parityajati?[, kiṁ na gṛhyeta ? anigṛha ta [?anigṛhīta] eva hetvābhāsābhidhānāditi cet |

kimidānīmuttarapratijñāsaṁnyāsāpekṣayā tasya tadevādyaṁ nigrahasthānamiti kimanyairaśaktaparicchedaiḥ klībapralāpapraceṣṭitairupanyastaiḥ ? evaṁ hi atiprasaṅgaḥ

syāt | pakṣapratiṣedhe tūṣṇīmbhavatastūṣṇīmbhāvo nāma nigrahasthānam, prapalāyamānasya prapalāyitaṁ nāmeti evamādyapi vācyaṁ syāt | tasmādetadapi asambaddhamiti |

60. [5.] 'aviśeṣokte hetau pratiṣiddhe viśeṣamicchato hetvantaram |" [nya.sū.5.2.6.] nidarśanam - 'ekaprakṛtīdaṁ vyaktaṁ, parimāṇāt, mṛtpūrvakāṇāṁ śarāvaprabhṛtīnaṁ dṛṣṭaṁ parimāṇam' iti |

asya vyabhicāreṇa pratyavasthānam - nānāprakṛtīnāmekaprakṛtīnāṁ ca dṛṣṭaṁ parimāṇamiti |

evaṁ pratyavasthita āha - ekaprakṛtisamanvayaprakārāṇāṁ pariṇāmadarśanāt [parimāṇadarśanāt?] sukhaḥduḥkhamohasamanvitaṁ hīdaṁ sarvaṁ vyaktaṁ parigṛhyate [parimitaṁ gṛhyate?] | tasya prakṛtyantararūpasamanvayābhāvo'sati [? prakṛtyantararūpasamanvayābhāve sati] ekaprakṛtikatvamiti tadaviśeṣokte hetau pratiṣedhaṁ bruvato hetvantaraṁ bhavati | sati hetvantarabhāve pūrvasya hetorasādhakatvānnigrahasthānam |

atrāpi pūrvasyaiva hetoranaikāntikasyābhidhānānnigṛhīte hetvantaracintā kvopayujyate ? yadi prāksādhanavādī hetumanaikāntikamuktvā dattottarāvasaraḥ tenaiva nigṛhyate | adattottarāvasaro hetvantarābhidhāne'pi na nigrahamarhati, avirāmāt |

61. [6.] "prakṛtādarthādapratibaddhārthamarthāntaram" [nyā.sū. 5.2.7.] yathoktalakṣaṇe pakṣapratipakṣaparigrahe hetutaḥ sādhyasiddhau prakṛtāyāṁ kuryāt-nityaḥ śabdo'sparśatvāditi hetuḥ | hetuśca nāma hinoterdhātostuśabde pratyaye kṛdantaṁ padam | padaṁ ca nāmākhyhātopasarganipātā iti prastutya nāmādīni vyācaṣṭe | | idamarthānantaraṁ nāma nigrahasthānam, abhyupagatārthāsaṅgatatvāditi |

nyāyyametannigrahasthānaṁ, pūrvottarapakṣavādinoḥ pratipādite doṣa prakṛtaṁ parityajyāsādhanāṅgavacanamadoṣodbhāvanaṁ ca | sādhanavādinā hyupanyastasādhanasya samarthane

kartavye tadakṛtvā parasya prasaṅgenāprasaṅgena vā'tannāntarīyakasyābhidhānamuttaravādino'pi doṣodbhāvanamātrādaparasyopakṣepa iti |

62. [7.] "varṇakramanirdeśavannirarthakam |" [nyā. sū.5.2.8] yathā 'nityaḥśabdo jabagaḍatvāt jhabhaghaḍhavad' iti | sādhanānupādānāt nigṛhyate iti |

idamapyasambaddham | na hi varṇakramanirdeśasiddhāvānarthakyaṁ yadeva kiñcidasādhanāṅgasya vacanaṁ tadevānarthakaṁ; sādhyasiddhyupayogino'bhidheyasyābhāvāt, niṣprayojanatvācveti | prakāraviśeṣopādānamasambaddham |

vaterupādānādadoṣa iti cet | syādetat varṇakramanirdeśavaditi vatiratropāttaḥ so'nyadāpi [so'nyadapi?] ananurūpaṁ gṛṇhāti ityadoṣaḥ iti |

na| arthāntārādernigrahasthānasyāvacanaprasaṅgāt | evaṁ hi tā nirarthakā vācyā nirarthakenaivābhidhānāhitam [nirarthakenaivābhidhānāt ?] |

na sādhyasiddhau anarthakaṁ nirarthakaṁ, yasya naiva kaścidarthastannirarthakamiṣṭamiti cet |

yasya kasyacidavādino'pi hi nirarthakābhidhāne kiṁ na nigrahaḥ ? nigrahanimittāviśeṣāt |

na; tasyehāprastāvāditi cet |

āyātamiha - yo nirarthakaṁ bravīti, tasya tenaiva nigraha iti | tattunyaṁ sarvasyāsādhanāṅgavādina iti | sa sarvo nirarthakābhidhāno'pyanenaiva nigrahasthānena nigrahārhaḥ |

na ca varṇakramanirdeśaḥ sarvatra nirarthakaḥ; kvacitprakaraṇe tasyāpyarthavattvāt | tasmādatraivāsyānarthakyāt nigrahasthānatvam | api cānyadidamucyate - 'varṇakramanirdeśo nigrahasthānam' iti; kapolavāditakaṁkṣyaghaṭṭitakamityevamādīnāmapi vācyatvāt |

63. [8.] "parṣatprativādibhyāṁ trirabhihitamapyavijñātārtham |" [nya. sū. 5.2.9] yadvākyaṁ parṣadā prativādinā ca trirabhihitaṁ na vijñāyate kliṣṭaśabdamapratīta - prayogamatidrutoccāritamityevamādinā kāraṇena tadavijñātārthamasāmarthyasaṁvaraṇāya prayuktaṁ nigrahasthānamiti |

nedaṁ nirarthakād bhidyate; sapadiprakṛtārthasambaddhaṁ gamakamevakuryāt, nāsyāsāmarthyaṁ, na ca jāḍyāt parṣadādayo na pratipadyante iti na vidvānnigrahamarhati |

parṣatpratibhāsaparikalpyārhavacanāt nigrahārha eveti cet | nyāyavādino jāḍyāduktamajānan kiṁ na prativādī nigṛhyate ? jāḍyāt parṣadādeḥ avijñātapratipādanasāmarthya iti vijetā na syānna nigrahārhaḥ | asambaddhābhidhāne nirarthakameveti na pṛthak vivakṣitārthaṁ [vivakṣitam avijñātārthaṁ ?] nāma nigrahasthānamiti |

64. [9.] " paurvāparyāyogādapratibaddhārthamapārthakam |" [nyā. sū. 5.2.10] yatrānekasya padasya vākyasya vā paurvāparyeṇa yogo nāstītyasambaddhārthatā gṛhyate, tatsamudāyārthāpāyād apārthakaṁ daśadāḍimādivākyavat | idaṁ kila padānām asambaddhāt [asambandhāt ?] asambaddhavarṇāt nirarthakāt pṛthaguktam |

nanvevamasambaddhavākyamapi pṛthag vācyam; nobhayasaṅgrahādapārthakaṁ yuktam; nirarthakasya saṁgrahaprasaṅgāt |

evaṁvidhācca viśeṣasamāśrayāt pṛthag nigrahasthānalakṣaṇapralapane'tiprasaṅgo'pyuktaḥ | na ca saṅgrahanirdeśe kañciddoṣaṁ paśyāmaḥ | prabhede vā guṇāntaramiti yatkiñcidetat |

65. [10] "avayavaviparyāsavacanamaprāptakālam |" [nyā.sū. 5.2.11] pratijñādīnāṁ yathālakṣaṇamarthavaśāt kramaḥ, tatrāvayavānāṁ viparyayeṇābhidhānaṁ nigrahasthānam |

na; evamapi siddheriti cet | na; prayogāpetaśabdatulyatvāt | yathā- gaurityasya padasyārthe goṇīti prayujyamānaṁ padaṁ kakudādimantamarthaṁ pratipādayatīti na śabdārthākhyānaṁ vyartham | anena ca padena gośabdameva pratipadyate, gośabdat kakudādimantamartham, tathā pratijñādyavayavaviparyayeṇānupūrvīṁ pratipadyate, ānupūrvyā cārthamiti | tathā hi pūrvaṁ karmopādīyate mṛtpiṇḍādikaṁ loke, tataḥ karaṇam iti |

66. tadetadunmattakasyonmattakasaṁvarṇanamiva prayogāpetaśabdavadetaditi | yadi goṇīśabdāt kakudādimatyarthe pratītiśabdānvākhyānaprayatnena [? pratītiḥ, śabdānvākhyānaprayatne na] arthaṁ paśyāmaḥ |

goṇīśabdasyārthapratipādane'sāmarthyāt | satyaṁ dṛṣṭā, na tu sākṣādityuktam

nanu goṇīśabdādapi loke pratītirdṛṣṭā | satyaṁ dṛṣṭā, na tu sakṣādityuktam |

uktametanna punaryuktaṁ; strīśūdrāṇāmubhayapratīterabhāvāt | yaḥ khalu ubhayaṁ vetti, śabdamapaśabdaṁ ca, sa eva pratipadyate | yastu nakkaśabdaṁ mukkaśabdameva vā vetti, na nāsāśabdaṁ, sa kathamapaśabdācchabdaṁ pratipadetat, tato'rthaṁ pratipadyeta ?

dṛṣṭā cānubhayavedino'pi pratītiriti |

na paramparayā pratītiḥ, arthe'samarthasya śabdo'pi pratītijananāsāmarthyācca |

na hyarthe'pi vācakatvaṁ nāmānyadeva, anyatra tadviṣayapratītijananāt |

apaśabdaścecchabde pratītiṁ janayed, artha eva kiṁ na janayati ? na hyetasyārthāt kañcid bhedaṁ paśyāmaḥ, yena taṁ pariharet |

akṛtasamayasya śabde'pyapratītijananācca |

na hyayamapaśabdaḥ śabde'pi svabhāvataḥ pratītiṁ janayati, adarśanāt samaya eva tu janayet | samayavaśāt pravartate |

evaṁ hi pratipattiparamparāpariśramaḥ parihṛto bhavati |

67. viparyayadarśanācca | śabdādarthamapratipadyamānā apaśabdaireva jñānaṁ vyutpadyamānā loke dṛsyante iti vyarthaṁ śabdānuśāsanam |

na vyarthaṁ, saṁskṛtaśabdavyutpattyarthamiti cet | ko'yaṁ śabdānāṁ saṁskāraḥ ? na hyeṣāṁ prajñābāhuśrutyādikaṁ saṁskāraṁ pasyāmaḥ |

nāpyeṣāmekāntena śravyatā | nāpyarthapratyāyane kaścidatiśayaḥ |

na dharmasādhanatā, mithyāvṛtticodanebhyaḥ saṁskṛtebhyo'pyadharmotpatteḥ |

anyebhyo'pi viparyayeṇa dharmotpatteḥ | śabddsya suprayogādeva svargamodanaghoṣaṇā vacanamātram | na caivaṁvidhānāgamānādriyante yuktijñāḥ |

na ca dānādidharmasādhanacodanāśūnyakevalaśabdasuprayogāt nagapātam iti bruvāṇasya kasyacinmukhaṁ vakrī bhavati | tasmānna saṁskṛto nāma kaścicchabdaḥ |

śiṣṭaprayogaḥ saṁskāra iti cet | ke śiṣṭāḥ ? ye viditavedyādiguṇayuktāḥ | kaḥ punareṣāṁ guṇotkarṣānapekṣo'līkanirbandho yatte'mūneva śabdān prayuñjate nāparān ? na cātra kaścicchabde 'parokṣaḥ sākṣī, yata idameva prayuñjate nāparān śiṣṭā iti niścinumaḥ |

nanvevaṁ [na tvevaṁ ?] vayaṁ guṇātiśayamapasyantaḥ saṁskāraṁ keṣāñcicchabdānāmanumanyāmahe, tadanvākhyānaṁ [tadanvākhyāne ?] yatnaṁ vā; guṇātiśayābhāvāt | vedarakṣādikaṁ cāprayojanameva atatsamayasthāyinaḥ | satyapi guṇātiśaye na karaṇīya evānvākhyāne yatnaḥ, tatsvabhāvasyānyato'pi siddheḥ | prākṛtāpabhraṁśadramiḍāndhrādibhāṣāvat | na hi pratideśaṁ bhāṣāṇāṁ kiñcillakṣaṇamasti | atha ca sampradāyasāmyāllokastathaiva pratipadyate, tāsāṁ ca prayogabhraṁśaṁ, tathā saṁskṛtānāṁ śabdānāṁ pratītirbhaviṣyati | iti jaḍapratipattirevaiṣā, yā śabdānāṁ lakṣaṇe pravṛttiḥ |

68. avayavaviparyaye'pi yadi teṣāṁ vacanānāṁ sambandhapratītiḥ, na viparyayaḥ nāpi arthāpratītiḥ; sāmarthyāt | na hyatra kaścit samayaḥ pratyāyānāviśeṣe'pi evameva avayavāḥ prayoktavyā iti |

sa eva teṣāṁ kramo yathā'vastitebhyo'rthapratītirbhavati | iti na viparyayāt pratītiḥ, tata ānupūrvīpratipattyā pratītiriti cet | nāpratīyamānasambandhebhyaḥ ānupūrvīpratipattiḥ |

yeṣāṁ śabdānāṁ kaścit sambandho jāyate [jñāyate ?] 'idamiha sambadhyate' iti, teṣu viditasambandheṣu kaḥ kasya pūrvo'paro vā kramaḥ, yo yathāvasthitānāṁ sambandhaḥ pratīyate | na hi vākyeṣu padānāṁ kramaniyamaḥ kaścit, yathā rājñaḥ puruṣaḥ, puruṣo rajña iti |

yāvadbhiḥ padairarthaparisamāptistadekaṁ vākyaṁ, yathā- 'devadatta gāmānaya kṛṣṇām' iti | atra padānāṁ yathākāmaṁ prayoge'pi nārthapratītau viśeṣa iti kaścit kramābhiniveśaḥ |

pratipāditaṁ ca pratijñāvacanāntareṇāpi yathā pratītirbhaviṣyatīti | pratīyamānārthasya śabdasya prayoge'tiprasaṅgaḥ | pariśiṣṭeṣu ca sambandhaṁ pradarśya dharmiṇi bhāvaḥ pradarśyeta, dharmiṇi bhāvaṁ pradarśya sambandhaḥ pradarśyeta iti na niyamaḥ kaścid; ubhayathā'pi pratītyutpatteḥ ityuktam | apratīyamānasambandheṣu ca padeṣu na tebhya ānupūrvyā api pratīteriti nedamapārthakād bhidyate iti nāprāptakālaṁ pṛthag vācyaṁ syāditi |

69. [11.] "hīnamanyatamenāpyavayavena nyūnam |" [nyā.sū. 5.2.12.] yasmin vākye pratijñādīnāmanyatamo'vayavo na bhavati, tadvākyaṁ hīnaṁ; sādhanābhāve sādhyāsiddheḥ |

na pratijñānyūnaṁ hīnaṁ; tadabhāve pratītibhāvāditi pratipāditam |

hīnameva tat; nyūnatāyāmapi nigrahādityaparaḥ |

yaḥ pratīyamānārthamanarthakaṁ śabdaṁ prayuṅkte, sa nigrahamarhet, nārthopasaṁhitasyābhidhāteti asamīkṣitābhidānametat | ata eva pratijñāyā na sādhanāṅgabhāva iti |

70. [12] "hetūdāharaṇādhikamadhikam |" [nyā.sū.5.2.13. ] ekena kṛtakatvād itarasya ānarthakyamiti tadetanniyamābhyupagame veditavyam | yatraikasādhanavākyaprayogapūrvako vicārastatrādhikābhidhānamanarthakamiti nigrahasthānam |

prapañcakathāyāṁ tu na kaścidoṣaḥ, niyamābhāvāditi |

71. [13.] "śabdārthayoḥ punarvacanaṁ punaruktamanyatrānuvādāt |" [nyā.sū. 5.2.14] śabdapunaruktam - anityaḥ śabdo'nityaḥ śabda iti | arthapunaruktam anityaḥ śabdo nirodhadharmako dhvāna iti |

atra na śabdapunaruktaṁ pṛthagvācyam: arthapunaruktavacanenaiva gatatvāt | na hyarthabhede śabdasāmye'pi kaścid doṣaḥ | yathā-

hasati hasati svāminyuccai rudatyabhiroditi |

kṛtiparikaraṁ svedo'ṅgāraṁ [svedodgāraṁ ?] pūrdhāvati [pradhāvati ?] dhāvati ||

guṇasamuditaṁ doṣāpetaṁ praṇindati nindati |

dhanalavaparikrītaṁ yantraṁ pranṛtyati nṛtyati ||

yathā vā- yadyasmin sati bhavati bhavati, na bhavati na bhavati tattasya kāryamitarat kāraṇamiti |

72. gamyamānārthaṁ punarvacanamapi punaruktam; niyatapradaprayoge sādhanavākye yathā pratijñāvacanamiti arthapunaruktenaiva gatārthatvānna pṛthagvācyam |

ayamapi niyatasādhanavākye eva doṣo vaktavyaḥ; na vistarakathāyām | vyācakṣāṇo hi kadācidasamyak śravaṇapratipattiśaṅkayā sākṣiprabhṛtīnāṁ punaḥ punarbrūyāditi na tatra kiñcicchalam |

nāviṣayatvāditi cet; nāyaṁ gururna śiṣya iti na yatnataḥ pratipādanīyaḥ, yena punaḥ punarucyate, iti punarvacane nigraha eveti cet | na; sākṣiṇāṁ yatnena pratipādyatvāt, tadpratipādane doṣābhidhānāt, pratipādyasya śiṣyatvāt, vijigīśuvādapratiṣedhatvāt, trirabhidhānavacanāt, punarvacanaprasaṅge samayaniyamābhāvācca |

73. na cedamadhikād bhidyate iti na pṛthagvācyam | viniyatapradaprayoge hi sādhanavākye ādhikyadoṣa iti punarvacane'pi gatārthasyādhikyameva padasyeti |

prapañcakathāyām anirūpitai kārthasādhanādhikaraṇāyāṁ nānārthasādhanepsāyāṁ nānāsādhanepsāyāṁ vā śrotuḥ hetvādi bāhulyasya punarvacanasya doṣatvāt | pratītapratyayābhāvād hetvādibāhulyaṁ vacanabāhulyaṁ ca sādhanadoṣa iti |

ādhikyapunarvacanayostulyadoṣa iti saṁgrahavacanaṁ nyāyyam; doṣābhāvādeva guṇābhāvāt, evamprakārāṇāṁ bhedānāṁ vacane cātiprasaṅgādityuktam |

paryāyaśabdakalpo hyaparo hetuḥ pratipādite viṣaye pravartamānaḥ' pratipādyasya viśeṣābhāvāt |

arthaḥ punaḥ pratipādanānna bhidyate |

74. yatpunaruktam- "anuvāde tvapunaruktaṁ; śabdābhyāsādarthaviśeṣopapatteḥ" | yathā "hetvapadeśāt pratijñāyāḥ punarvacanaṁ nigamanam" [nya. sū. 1.1.39] iti | pratijñāyā evaṁ [eva?] gamyamānārthāyā vacanaṁ punarvacanaṁ. kiṁ punarasyāḥ punarvacanam ityuyuktaṁ nigamanam |

75. [14.] "vijñātasya parṣadā trirabhihitasyāpratyuccāraṇamananubhāṣaṇam |" [nyā.sū. 5.2.17] vijñātavākyārthasya parṣadā trirabhihitasya yadapratyuccāraṇaṁ tadananubhāṣaṇaṁ nāma nigrahasthānamapratyuccārayan kimāśrayaṁ parapakṣapratiṣedha kuryāditi |

uttareṇāvasānānnedaṁ nigrahasthānamiti cet | syādetat | uttareṇa guṇadoṣavatā mūḍhāmūḍhatvaṁ gamyate iti kimuccāritena ? asti hi kaścid uttareṇa samartho na pratyuccāraṇena, nāsau tāvatā nigrahamarhediti | na: uttaraviṣayāparijñānāt | yadyayaṁ na pratyuccārayati, nirviṣayamuttaraṁ prasajyeta | athottaraṁ bravīti, kathaṁ noccārayati ? tadidaṁ vyāhatamucyate- 'noccārayati, uttaraṁ ca bravīti' iti | apratijñānācca | na cedaṁ na [? na cedaṁ ] parijñāyate- pūrvaṁ sarvamuccārayitavyaṁ paścāduttaramabhidhātavyamiti | apitu yathākathañciduttaraṁ vācyam uttaraṁ cāśrayābhāve'yuktamiti yuktamapratyuccāraṇaṁ nigrahasthānamiti |

76. yadi nāma vādī svas ādhanārthavivaraṇavyājena prasaṅgādaparaṁ ghoṣayed, vivādāspadaṁ ca jijñāsitamarthamātramukttvā pratijñādiṣvarthaviśeṣaparamparayā aparānarthānupakṣipya kathāṁ vistārayet, tacca sarvaṁ yadā nānuvaktuṁ śaknuyāt, kastasya vivādāśrayārthamātrottaravacane sāmarthyavighātaḥ yena vādivacanānubhāṣaṇaṁ nigrahasthānamucyate | tasmānna sarvaṁ vādikathāmananubhāṣamāṇo nottare samarthaḥ |

yadvacanāntarīyakā jijñāsitārthasiddhiḥ, yathā pakṣadharmatāvyāptiprasādhanamātraṁ, na tatrāpi prasaṅgāntaropakṣepaḥ, tadavaśyaṁ sādhanāṅgaviṣayatvād dūṣaṇasya upadarśyata eva | tatrāpi na sarvaṁ prāganukrameṇoccārayitavyaṁ, paścād dūṣaṇaṁ vācyaṁ; dviruccāraṇaprasaṅgāt | dūṣaṇaviṣayopadarśanārthe'nubhāṣaṇe vādivacanānukramaghoṣaṇaṁ vyarthamiti na kāryameva dūṣayatā | 'asyāyaṁ doṣoḥ' iti nāntarīyatvāt pratidoṣavacanaṁ viṣayopadarśanaṁ kriyate eva |

77. na hi sarvaviṣayopadarśanaṁ kṛtvā yugapad doṣaḥ śakyate'bhidhātum; pratyarthaṁ doṣabhedāt | tasmād yaṁ padārthaṁ dūṣayati, sa eva taddūṣaṇaviṣayastadā pradarśanīyaḥ | nāparastuḥ; dūṣṇe'paropadarśanasyāsambhavāt | tasmin dūṣite punaranyo'rtho'paradoṣaviṣaya ityayamanubhāṣaṇe dūṣaṇe ca nyāyaḥ |

sakṛt sarvānubhāṣaṇe'pi doṣavacanakāle punarviṣayaḥ pradarśanīya eva; apradarśite doṣasya vaktumaśakyatvāt | tathā ca dviranubhāṣaṇaṁ kṛtaṁ syāt | tatra prathamaṁ sarvānukramānubhāṣaṇaṁ niṣprayojanam | dūṣaṇavādinā dūṣaṇe vaktavye yanna tatropayujyate tasyābhidānamadoṣodbhāvanam | dviruktiśca | iti sakṛt sarvānubhāṣaṇaṁ parājayādhikaraṇaṁ vācyam |

tathā'stviti cet | syādetat | uktametadarthāntaraṁ nigrahasthānamiti | tatra sādhane yataḥ kutaścit prasaṅgādinā nāntarīyakābhidhāna| ['nāntarīyakābhidhānaṁ ?] vādino'rthāntaragamanameveti sa nigrahārhaḥ | na kaścit kvacit kriyamāṇaprasaṅgo na prayujyate, nāpi tat tasyānubhāṣaṇīyam | na cedamapyasmābhiranujñāyate- sarvaṁ prāk sakṛdvaktavyaṁ, paścāddūṣaṇamiti | kintu dūṣayatā'vaśyaṁ viṣayo darśanīyaḥ, anyathā dūṣaṇāvṛtteriti |

78. evaṁ tarhi nānanubhāṣaṇaṁ pṛthag nigrahasthānaṁ vācyam, apratibhayā gatatvāt | uttarasya hyapratipattirapratibhā [nyā.sū. 5.2.18] | na cottaraviṣayamapradarśayan uttaraṁ pratipattuṁ sararthaḥ | na hyanākṣiptānuttarapratipattikamananubhāṣaṇam | tenānanubhāṣaṇasya vyāpikāyāmapratibhāyāṁ vihitaṁ nigrahasthānatvam ananubhāṣaṇam [ananubhāṣaṇe?] | gavyaparāmṛṣṭatadbhedāyāṁ vihitamiva sāsnādimattvaṁ bāhuleye'pi | tasmādpratibhaiva nigrahādhikaraṇatvena vā [vācyā?] nānanubhāṣaṇam |

kaścāyaṁsamayaniyamastrirabhihitasyānanubhāṣaṇamiti ? yadi tāvat parapratyāyanārthā pravṛttiḥ, kiṁ trirabhidhīyeta ? tathā tathā sa grāhaṇīyo yathā'sya pratipattirbhavati | atha paropatāpanārthā tadāpi kiṁ trirabhidhīyate ? sākṣiṇāṁ karṇe nivedya prativādī kaṣṭāpratītadrutasaṁkṣisādibhirupadrotavyaḥ, yathottarapratipattivimūḍhastūṣṇīmbhavati | na hi paropatāpanakrame kaścinnyāyaḥ, yena kaṣṭāpratītaprayogadrutoccāritā nivāryante, trirabhidhānaṁ vā vidhīyate | na ca paropatāpāya santaḥ pravartante, śāstrāṇi vā praṇīyante ityado vakttavyam ! tasmāttāvadvaktavyaṁ, yāvadanena na gṛhītam | na trireva |

agrahaṇasāmarthye prāgeva vā paricchinnasāmarthye parihartavyaḥ punaranupratibodhyeti |

79. [15.] "avijñātamajñānam |" [nyā.sū. 5.2.17] vijñātaṁ parṣadā prativādinā yadavijñātaṁ tadajñānaṁ nāma nigrahasthānam | arthe khalvavijñāte na tasya pratiṣedhaṁ grūyāditi |

etadapyananubhāṣaṇavadatreti tatraiva gamyatvādavācyam | yathā'nanubhāṣaṇe'pradarśitaviṣayatvāduttarapratipattiraśakyeti anuttarapratipattyaiva nigrahasthānatvam; uttaraviṣayapradarśanaprasaṅgamantareṇānubhāṣaṇasya vaiyarthyāt |

tathā'jñāne'pyuttarāpratipattyaiva nigrahasthānatvam | ajānānaḥ kathamuttaram uttaraviṣayaṁ ca brūyāt ? iti viṣayājñānamuttarājñānaṁ ca nigrahasthānam | anyathā evaṁ sati apratibhayā [? apratibhāyā] nirviṣayatvāt |

anavadhāritārtho hi nānubhāṣate, ananubhāṣamāṇo viṣayamupadarśyottaraṁ pratipattuṁ na śaknuyādityuttaraṁ na pratipadyeta; jñātottaratadviṣayasyottarāpratipatterasambhavāt | ubhayametaduttarāpratipatteḥ kāraṇamiti |

tadabhāve pratipattirbhavatyeveti tayoḥ pṛthagvacane'pratibhāyāḥ ko viṣaya iti vaktavyam ! nirviṣayatvādavācyaiva syāt |

80. nottarajñānam [? nottarājñānam] ajñānam | kiṁ tarhi ? viṣayājñānam | jñāte hi viṣaye uttarājñānāt tanna pratipadyeteti asti viṣayo'pratibhāyā iti cet | evaṁ tarhi ananubhāṣaṇaṁ nirviṣayam; ajñānenākṣepāt | na hi viṣayaṁ samyak pratipadyamānaḥ kaścinnānubhāṣeteti nānanubhāṣaṇaṁ pṛthag vācyam |

uttarājñānasya cākṣepāt | viṣayājñānenottarājñānamapyākṣiptameva na hi viṣayamajānannuttaraṁ jānātīti naivāpratibhāyā viṣayo'sti |

jñāte'pi viṣaye punaruttarājñānamapratibhāyā viṣaya iti cet | evaṁ tarhi viṣayottarājñānayorapi prabhedāt nigrahasthānāntarālavācyāni [nigrahasthānāntarāṇi vācyāni ?] | yathā'jñānasya viṣayo jñānam [? viṣayājñānam ] uttarājñānamiti prabhedādasatyapi guṇātiśaye nigrahasthānāntaravyavasthā kriyate, tathā'jñānayorapi sarvottarājñānamityādi prabhedānnigrahasthānāntarāṇi kiṁ nocyante ? na cobhayasyāpyajñānasya saṁgrahavacane doṣaḥ, guṇastu lāghavasaṁjñaḥ syāditi saṁgrahavacanaṁ nyāyyam | tasmādananubhāṣaṇājñānayorapratibhāviṣayatvānna pṛthagvacanam |

api ca - na pūrvottarapakṣavādino hetvābhāsāpratibhābhyāmanyat nigrahasthānaṁ nyāyyamasti, tadubhayavacanenaiva sarvamuktamiti | tadubhayākṣiseṣu prabhedeṣu guṇātiśayamantareṇa vacanādare'tiprasaṅgāt vyarthaḥ prapañca iti |

81. [16.] "uttarasyāpratipattirapratibhā |" [nyā.sū. 5.2.18] parapakṣapratiṣedhe uttaraṁ yadā na pratipadyate, tadā nigṛhīto vaktavyaḥ |

sādhanavacanānantaraṁ prativiṣayamuttare vyarthaṁ tadajñānakramaghoṣaṇaślokapāṭhādinā kālaṁ gamayan kartavyāpratipattyā nigrahārha iti nyāyyaṁ nigrahasthānamiti |

82. [17.] "kāryavyāsaṅgāt kathāvicchedo vikṣepaḥ |" [nyā. sū. 5.2.20] yatkiñcit kartavyaṁ vyāsajya kathāṁ vicchinatti | 'idaṁ me karaṇīyaṁ prahīyate, asminnavasite paścāt kariṣyāmi | pratiśyākalāme kaṇṭhaṁ kṣiṇoti' - ityevamādinā kathāṁ vicchinatti | sa vikṣepo nāma nigrahasthānamekataranigrahāntāyāṁ kathāyāṁ svayameva kathāntaṁ pratipadyate iti |

idamapi yadi pūrvapakṣavādī kuryād vyājopakṣepamātreṇa, na punarbhūtasya tathāvidhakathoparodhinaḥ karyasya bhāve, tasya svasādhanāsāmarthyaparicchedādeva vikṣepaḥ syāt | tathā cedamarthāntaragamane evāntarbhavet; asamarthasādhanābhidhānāt hetvābhāseṣu vā | prakṛtasādhanāsambaddhapratipatteśca nirarthakāpārthakābhyāṁ ca na bhidyate | atiprasaṅgaścaivamprakārāṇāmasambaddhasādhanavākyapratipattibhedānāṁ pṛthag nigrahasthānavyavasthāpane proktaḥ |

athottaravādī evaṁ vikṣipet, sādhanānantaram uttare pratipattavye tadapratipattyā vikṣepapratipattirapratibhāyāmarthāntare vā'ntarbhavati |

83. nanu nāvaśyaṁ sādhanadūṣaṇābhyāmeva sarvasya pratipattiḥ, yena sarvā vādiprativādinorna samyak pratipatterhetvābhāse'rthe pratibhāyāṁ vāntarbhavāt | bhavati hi anibaddhenāpi kathāprapañcena vivāda iti | na; asambhavāt | ekatrādhikaraṇe viruddhābhyupagamayorvivādaḥ syāt; aviruddhābhyupagamayoranabhyupagamayorvā virodhābhāvāt | tatrāvaśyamekasya vāgvacanapravṛttiḥ; yugapatpravṛttau parasparavacanagrahaṇāvadhāraṇottarāṇāmasambhavena pravṛttivaiphalyāt svasthātmanāmapravṛtteḥ | tena ca svopagamopanyāse'vaśyaṁ sādhanaṁ vaktavyaṁ; anyathā pareṣāmaprattipatteḥ | apareṇa ca tatsambandhi dūṣaṇam | ubhayorasamyakpratipattau hetvābhāsāpratibhayoḥ prasaṅga iti sarvo nyāyapravṛttaḥ pūrvottarapakṣopanyāso dvayaṁ nātipatati |

etenaiva vitaṇḍā pratyuktā; abhyupagamābhāve vivādābhāvāt |

84. yadā tarhyabhyupagamya vādaṁ viphalatayā na kiñcid vakti, anyadvā yatkiñcit pralapati, tadā kathaṁ hetvābhāsāntarbhāvaḥ ?

asamarthitasādhanābhidhāne evamuktam | anabhidhānānyābhidhānayorapi parājaya evetyuktam; abhyupagamya vādamasādhanāṅgavacanāt |

etenādhikasya punaruktasya ca pratijñādervacanasya na nigrahasthānatvaṁ vyākhyātam | tadapi hi pratipāditārthaviparyayatvātsādhanasāmarthyavidhānamapratītapratyayatayā na lakṣaṇāt sādhanasya | asādhanāṅgavacanamiti nigrahasthānamiti |

85" [18.] :svapakṣadoṣābhyupagamāt parapakṣe doṣaprasaṅgo matānujñā |" [nyā. sū. 5.2.21] yaḥ pareṇa coditaṁ doṣamanuddhṛtya bhavato'pyayaṁ doṣa iti bravīti, yathā - 'bhavāṁścauraḥ puruṣatvāt' ityukte sa taṁ prati brūyād-bhavānapīti | sa svapakṣe doṣābhyupagamāt parapakṣe taṁ doṣaṁ prasañjayan paramatamanujānātīti matānujñā nigrahasthānamiti |

atrāpi yadi puruṣatvāccauro bhavānapi syāt, na ca bhavatātmaivamiṣṭaḥ, tasmānnāyaṁ cauryaheturiti yadyayamabhiprāyaḥ, tadā na kaściddoṣaḥ, anabhimate tadātmani cauratvena hetudarśane dūṣaṇāt |

prasaṅgamantareṇaivamṛjunaiva krameṇa kiṁ na vyabhicārita iti cet | yatkiñcidetat | santi hyevamprakārā api vyavahārā loka iti |

atha tadupakṣepamabhyupagacchati, etadapi uttarāpratipattyaiva tatsādhane nigrahārhaḥ | nāparatra; svadoṣopakṣepāt | tatsādhananirdoṣatāyāṁ hi tadabhyupagama evottarāpratipattiriti tāvataiva pūrvamāpannanigrahasya paradoṣopakṣepasyānapekṣaṇīyatvāditi |

86. [19.] : nigrahaprāptasyānigrahaḥ paryanuyojyopakṣaṇam |" [nyā.sū. 5.2.22]paryanuyojyo gāma nigrahopapattyā codanīyaḥ | tasyopekṣaṇaṁ nigrahaprāptau satyananuyogaḥ | etacca 'kasya parājayaḥ' ityanuyuktayā parṣadā vaktavyaṁ, na khalu nigrahaprāptaḥ svakaupīnaṁ vivṛṇuyāditi |

atrāpi yadi sādhanavādinaṁ nigrahaprāptamuttaravādī na paryanuyuṅkte, aprati-bhaivāsyottarāpratipatteriti na paryanuyojyopekṣaṇaṁ pṛthag nigrahasthānam | nyāyacintāyāṁ punarna dvayorekasyāpyatra jayaparajājayau; sādhanābhāsenārthāpratipādanāt, bhūtadoṣānabhidhānācca |

87. atha kañciddoṣamudbhāvayati, kañcinna, na tadā nigrahamarhati; uttarapratipatteḥ | arhatyeva, sato doṣasyānudbhāvanāditi cet | na santa iti kṛtvā sarve doṣā avaśyaṁ vaktavyāḥ |

avacane vā nigrahaḥ; ekenāpi tatsādhanavighātādekasādhanavacanavat |

yathaikasyārthasyānekasādhanasadbhāve'pyekenaiva sādhanena tatsiddherna sarvopādānam iti na doṣamudbhāvayannevāparasyānudbhāvanānnigrahārhaḥ pūrvavat |

atha pūrvapakṣavādī uttarapakṣavādinaṁ nigrahaprāptaṁ na nigṛṇhāti, tadā tayornyāye naikasyāpi pūrvavat jayaparājayau; doṣābhāsaṁ bruvāṇamuttaravādinaṁ svasādhanādanutsārayato'samarthitasādhanatvānna jayo vādinaḥ; sarvadoṣāsambhavapradarśanena sādhanāṅgāsamarthanāt | nāpyuttaravādinaḥ, ubhayadoṣāpratipādanāt |

tasmādevamapi na paryanuyojyopekṣaṇaṁ nāma parājayādhikaraṇamiti |

88. [20.] "anigrahasthāne nigrahasthānānuyogo niranuyojyānuyogaḥ |" [nyā. sū. 5.2.23] nigrahasthānalakṣaṇasya mithyāvyavasāyādanigrahasthāne nigṛhīto'sīti paraṁ bruvan niranuyojyānuyogānnigṛhīto vaktavyaḥ |

atrāpi yadi tatsādhanavādinamabhūtaistaddoṣairuttaravādyabhiyuñjīta, so'sthāne nirdoṣe nigrahasthānasya niyoktodbhāvayitā na bhavati tathā | bhūtadoṣodbhāvanalakṣaṇasyottarasyā-pratipatteritareṇottarābhāsatve pratipādite'pratibhayaiva nigṛhīta iti nedamato nigrahasthānāntaram |

athottaravādinaṁ sādhanadoṣamudbhāvayantamaparo doṣābhāsavacanenābhiyuñjīta, tasya tena bhūtadoṣatve pratipādite sādhanābhāsavacanenaiva nigṛhīta iti |

evamapi nedaṁ hetvābhāsebhyo bhidyate | avaśyaṁ hi viṣayāntaraprāptyarthaṁ hetvābhāsā nigrahasthānatvena vaktavyāḥ, taduktāvaparoktiranarthiketi |

89. [21.] "siddhāntamabhyupetyāniyamāt kathāprasaṅgo'pasiddhāntaḥ |" [nyā. sū. 5.2.24] kasyacidarthasya tathābhāvaṁ pratijñāya pratijñātārthaviparyayāt kathāprasaṅgaṁ kurvato'pasiddhānto vijñeyaḥ | tathā 'na sato vināśaḥ, nāsadutpadyate' iti siddhāntamabhyupetya pakṣamavasthāpayati - 'ekāntā prakṛtiḥ vyaktasya avyaktalakṣaṇā; vikārāṇām anvayadarśanāt | mṛdanvayānāṁ śarāvādīnāṁ dṛṣṭamekaprakṛtikatvam | tathā cāyaṁ vyaktabhedaḥ sukhaduḥkhamohasamanvito gṛhyate, tatsukhādibhirekaprakṛtiḥ' iti |

sa evamuktavān paryanuyujyate - atha prakṛtirvikāra iti kathaṁ lakṣayitavyam ? yasyāvasthitasya dharmāntaranivṛttau dharmāntaraṁ pravartate sā prakṛtiḥ, yat tad dharmāntaraṁ sa vikāra iti | so'yaṁ prakṛtārthaviparyayādaniyamāt kathāṁ prasañjayati | pratijñātaṁ cānena - 'nāsadāvirbhavati, na sat tirobhavati' iti |

90. sadasatośca tirobhāvāvirbhāvāvantaraṇa na kasyacit pravṛttyuparamaḥ, pravṛttirvā-ityevaṁ pratyavasthite yadi sa sata ātmahānamasataścātmalābhamabhyupaiti, apasiddhānto bhavati | atha nābhyupaiti, pakṣo'sya na sidhyatīti |

ito'pina kaścidaniyamāt kathāprasaṅgo yattenopagataṁ nāsadutpadyate na sadvinaśyati' iti tasya samarthanāyedamuktam 'ekaprakṛtikamidaṁ vyaktamanvayadarśanād' iti | tatraikā prakṛtiḥ sukhaduḥkhamohāstadavibhaktayonikam idaṁ vyaktaṁ, tadanvayadarśanāt | vyaktasya tatsvabhāvatā'bhedopalabdheriti |

sukhādīnāmutpattivināśābhyupagamābhāvāt sarvasya tadātmakasya notpatti-vināśāviti siddhaṁ bhavati |

91. atra taduktasya hetordoṣamanudbhāvya vikāraprakṛtilakṣaṇaṁ pṛcchan svayamayaṁ prakṛtāsambandhena aniyamāt kathāṁ pravartayati | tatredaṁ syād vācyaṁ - vyaktaṁ nāma pravṛttinivṛttidharmakaṁ, na tathā sukhādayaḥ, vyaktasya sukhādyanvaye sukhādisvabhāvatā pravṛttinivṛttidharmatālakṣaṇamavahīyata iti | na tadrahitasukhādisvabhāvatā, vyaktalakṣaṇavirodhāditi, sukhādyanvayadarśanādityasiddho heturiti |

evaṁ hi tasya sādhanadoṣodbhāvanena pakṣo dūṣito bhavati | so'nupasaṁhṛtya sādhanadoṣaṁ, kathāṁ pratānayan svadoṣaṁ paratropakṣipati |

ayameva doṣo'nena prakāreṇocyate iti cet |

eṣa naimittikānāṁ viṣayaḥ, na lokaḥ śabdairapratipāditamarthaṁ pratipattuṁ samartha iti, sa evāyaṁ bhaṇḍālekhyanyāyo'trāpi |

yathoktena nyāyena pūrvakasyāsādhanāṅgasyāsiddhasya hetorabhidhānādeva nigrahaḥ, nāpi niyamāt [aniyamāt?] kathāprasaṅgāt iti idamapi hetvābhāseṣvantarbhāvāt na pṛthagvācyam |

92. [22.] "hetvābhāsāścayathoktāḥ |" [nyā.sū. 5.2.25] hetvābhāsāśca nitrahasthānāni | kiṁ punarlakṣaṇāntarayogād hetvābhāsā nigrahasthānatvamāpadyante, yathā pramāṇāni prameyatvam ? ityata āha yathoktahetvābhāsalakṣaṇenaiva nigrahasthānabhāva iti |

atrāpi yathoktatvāccintyemeva - kiṁ te yathā lakṣitaprabhedāstathaiva, āhosvidanyathaiveti ? tattu cintyamānamihātiprasajyate iti na pratanyate | hetvābhāsāśca yathānyāyaṁ nigrahasthānamiti, etāvanmātramiṣṭamiti |

93. loke'vidyātimirapaṭalollekhanastattvadṛṣṭe -

rvādanyāyaḥ parahitarataireṣa sadbhiḥ praṇītaḥ |

tattvālokaṁ timirayati taṁ durvidagdho jano'yaṁ,

tasmādyatnaḥ kṛta iha mayā tatsamujjvālanāya ||

vādanyāyo nāma prakaraṇaṁ samāptam |

[kṛtiriyamācāryadharmakīrticaraṇānām]

Technical Details

Text Version: 

Romanized

Input Personnel: 

DSBC Staff

Input Date: 

2007

Proof Reader: 

Milan Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0