atha prathamaṁ prakaraṇam

upāyahṛdayam|

atha prathamaṁ prakaraṇam|

etādvādāvabodhena vādadharmāvabodhanam|

vistareṇa ca gambhīro'yamartho'trābhidhīyate||

vādo na kartavyaḥ| kasmāt ? prāyeṇa hi vādakārakāṇāṁ sañjātavipulakrodhamadamattānāṁ svayaṁ vibhrāntacittānāṁ manaso'natimṛdutā parapāpaprakāśakatvaṁ svapāṇḍityānumodakatvañcetyādayo doṣā budhirnirbhatsitāḥ| tasmādāryajanā asaṁkhyeyopāyairvivādachedakāstatparihāraprītāśca viṣabhājanaparityāgādiva| vādakārakāṇāñcāntaraṁ vastuto mṛdvapi paraṁ bahirbahudoṣaṁ dṛśyate| tasmātsvahitaparahitābhilāṣiṇaite vivādadharmāḥ praheyāḥ|

atrocyate| maivaṁ, naiṣa vādaprārambhaḥ paribhavalābhakhyātyartho'pi tu sulakṣaṇadurlakṣaṇopadeśecchayaiva vādasya prārambhaḥ|

yadīha loke vādo na bhavet, mugdhānāṁ bāhulyaṁ syāt| tataśca laukikamithyājñānakuśalatāsahacarabhrāntisamubhdūtakukarmabhiḥ saṁsāradurgatiḥ sadarthahāniśca|

vādāvagame tu svayaṁ sulakṣadurlakṣaṇaśūnyalakṣaṇaparijñānatvāt sarve mārāstīrthikā mithyādṛṣṭimanuṣyāśca viheṭhanāsamarthā apratibandhakārāśca| tasmātsattvahitecchayeha loke saddharmasya pracārecchayā ca mayaiṣa samyagvāda ārabhyate|

yathāsraphalaparipuṣṭikāmena tat(phala)parirakṣaṇārthaṁ bahirbahutīkṣṇakaṇṭakanikaravinyāsaḥ kriyate|

vādārambho'pi tathaivādhunā saddharmmarakṣaṇecchayā na tu khyātilābhāya| yaduktaṁ (bhavatā) pūrvaṁ [eṣa vādo] vivādapravardhaka iti| tadayuktam| dharmarakṣaṇārthameva hi vāda ārabdhavyaḥ|

āha| yaduktaṁ pūrvaṁ bhavatā yadyetaṁ vādaṁ jānīyādvādadharmānavagacchediti vaktavyametasya lakṣaṇam|

atrocyate| tasya vādasyāṣṭavidho bhedaḥ| tadarthagatiprajñānasāmarthye paravādāvagamaḥ, yathā dhānyamuptvā siktā codakena tasya puṣṭiḥ samṛddhiśca sādhyate| tṛṇādyanutsāraṇe tūṭkṛṣṭāṅkurā na jāyante| yadi kaścidetamaṣṭāvidhaṁ [vādaṁ] śṛṇuyādarthantu tasya nāvagacchettadā [tasya] sarveṣu vādeṣu saṁśayo bhavet| yadi kaścidetamaṣṭavidhamarthaṁ parijānīyānniyatameva sarvavādadharmāvagame samartho bhavet|

āha| etadvādaparijñānādeva vādadharmā niyatamavagamyanta iti (bhavato)ktam| atha tīrthikānāṁ vādadharmāḥ santi na vā| atrocyate santyeva| yathā vaiśeṣikāṇāṁ ṣaṭ padārthāḥ| dravyaṁ guṇaḥ sāmānyaṁ viśeṣaḥ karma samavāyaścetyādikavādadharmeṣu svavagateṣvapi parasūtraśāstrāṇāmapratītiḥ|

ato vādanayapratipādanārthaṁ prapañcocchedanārthañcaite 'ṣṭavidhā gambhīrāḥ sadvādadharmāḥ saṁkṣepato mayā kathyante| dṛṣṭāntaḥ siddhānto vākyapraśaṁsā vākyadoṣaḥ pramāṇaṁ prāptakālavākyaṁ hetvābhāso vākchalam|

dṛṣṭānto dvividhaḥ| saṁpūrṇadṛṣṭānta āśiṁkadṛṣṭāntaśca| siddhānto niścitārtha iti| vākyapraśaṁsā vākyasyārthānugamaḥ| vākyadoṣo vākyasya yuktivyatyayaḥ| pramāṇaṁ dvividhajñāpakaheturutpattiheturvyañjanahetuśca| prāptakāla vākyam| yathā yadi pūrvaṁ dhātvāyatanāni vadet| paścāttu pañcaskandhān tadaitadaprāptakālamityucyate| prāptakālavākyaṁ tu vākyakramāvagame| hetvābhāso yathā marīcābudakābhāsaḥ, na tu vastuta udakam| yadi vādī svalaṅkṛtairvākyairudakamiti vadettadā sa hetvābhāsaḥ| vākchalaṁ yathā| navakambala ityukte taddūṣayan vadet| vastraṁ na kālaḥ kathaṁ nava ityucyate| iti chalam| evaṁ samāmato'ṣṭavidho'rthaḥ samākhyātaḥ| idānīṁ krameṇa tallakṣaṇāni vistareṇa vyākhyāsyāmaḥ|

āha| ukto bhavatā pūrvaṁ dṛṣṭāntaḥ| kastāvadupāyo dṛṣṭāntasya sthāpane| atrocyate| dṛṣṭāntavacanaṁ hi yatra pṛthagjanānāmāryāṇāñca buddhisāmyaṁ tadā vaktavyam| yathā cittaṁ cañcalaṁ drutavāyuvat| sarveṣāṁ janānāṁ vāyucāñcalyasya pratīteḥ| tadā cittasthiratāyā niścayaḥ| apratītau dṛṣṭāntālābhaḥ| āha| kasmātsadartha eva nocyate'pi tu dṛṣṭāntaḥ| atrocyate| dṛṣṭāntavacanaṁ hi sadarthadyotanārtham|

āha| bhavatā pūrvamuktam pṛthagjanānāmāryāṇāñca buddhisāmyadṛṣṭāntalābha iti| kiṁ sāmyaṁ ko vā viśeṣaḥ| atrocyate| pūrvavat| vāyudṛṣṭāntasya sāmyamityucyate| āryāṇāṁ nirvāṇaprāptiḥ pṛthagjanānāṁ tvaprāptirayaṁ viśeṣa ityucyate|

āha| uktaṁ dṛṣṭāntalakṣaṇam| kiṁ punaḥ siddhāntalakṣaṇam| atrocyate| sādhyasya hetubhirvistareṇa sthāpanaṁ nirṇayaśca| etatsiddhāntalakṣaṇam|

āha| siddhāntadharmāḥ kiyantaḥ| atrocyate| catvāraḥ| sarvasamaḥ sarvabhinna ādau samaḥ paścābhdinna ādau bhinnaḥ paścātsamaśca| āha| adhunā bhavataitāni catvāri lakṣaṇāni vyākhyātavyāni|

atrocyate| arthasthāpanamicchatā caturvidhaṁ jñānamāśrayitavyam| kiṁ taccaturvidham| pratyakṣamanumānamupamānamāgamaśca|

sarvasamo yathā, (vādī vadeda-)ātmātmīyañca na vidyete, prativadyapi vadedātmātmīyañca na vidyeta ityayaṁ sarvasamaḥ| sarvabhinno yathā, (vādī vadet) pṛthagiti prativādī tu vadedekamityayam sarvabhinnaḥ| ādau samaḥ paścābhdinno yathā, (vādī vadet) sarvaṁ dṛṣṭadharmaṁ sat| ātmā punarapratyakṣo'pi sag| prativādī vadedyatpratyakṣadharmakaṁ tadeva saditi vaktavyam| ātmā cedapratyakṣaḥ kathaṁ san| anumānena cedātmā sanniti tarhi pratyakṣapūrvakamanumānamiti| apratyakṣadharmaka ātmā kathamanumīyate| yadi punarupamānenātmā sanniti, atha sādharmyapūrvakamupamānamityātmā kenopamīyate| yadi tvāgamenātmā siddha ityucyate tadayuktam| durbodhaṁ hi sūtram| kutracitsanniti kutracidasanniti kathaṁ tatpratītirityayamādau samaḥ paścābhdinnaḥ| ādau bhinna paścātsamo yathā, (vādī vadeda)ātmātmīyañca na vidyete| prativādī tu vadedastyātmā, asti puruṣaḥ| nirvāṇābhyupagamastrūbhayorvādinoḥ| ayamucyata bhinnaḥ paścātsamaḥ|

api cāparimitāni lakṣaṇāni siddhāntasya, tadyathā dvādaśa nidānāni, duḥkhaṁ, samudayaḥ, nirodhaḥ, mārgaḥ saptatriṁśatpakṣāḥ, catvāri śrāmaṇyaphalānītyādayo dharmā buddhasya samyagarthā ityucyante|

sandhyāpūjā, balidānaṁ, dhūpadīpanaṁ, tailadīpanivedanamiti caturvidhā yājñikatīrthikānāṁ kriyā|

triṣaṣṭyakṣarāṇāṁ caturṇāṁ ca padānāmartha iti śābdikāstīrthikāḥ|

oṣadhividyā ṣaḍvidhā| oṣadhināma, oṣadhiguṇaḥ, oṣadhirasaḥ, oṣadhivīryaṁ, sannipātaḥ, vipākaśceti bhaiṣājyadharmāḥ|

ṣaṭpadārthā vaiśeṣikāṇām||

pradhanasyaikyaṁ puruṣā bahavaḥ| [teṣāṁ ca] vimuktiriti sāṁkhyāḥ|

aṣṭau sūkṣmāṇi yathā| catvāri mahābhūtāni buddhirākāśo, vidyā, avidyā, aṣṭaiśvaryāṇi [tadyathā] aṇimā, mahimā, laghimā, prāptiḥ, prākāmyaṁ, kāyavibhāgaḥ, īśitvaṁ tirobhāvaśca| iti yogatīrthikāḥ|

jīvo'jīvaḥ pāpaṁ puṇyamāśravaḥ, nirjarā, sambaraḥ, bandhaḥ, mokṣaḥ| pañcajñānāni [tadyathā] śrutajñānaṁ, matijñānaṁ, avadhijñānaṁ, manaḥparyāyajñānaṁ, kevalajñānam| ṣaḍāvaraṇāni, darśanāvaraṇaṁ, duḥkhavedanīyāvaraṇaṁ, mohāvaraṇamāyurāvaraṇaṁ, gotrāvaraṇaṁ, nāmāvaraṇañca| catvāraḥ kaṣāyāḥ [tadyathā] krodhaḥ, mānaḥ, lābhaḥ, māyā ceti nirgranthadharmāḥ|

apare'pi santi ye vadanti sarvamekaṁ sabhdāvājjñeyam| sarvadharmāṇāṁ ca guṇavattvādaikyam, kiñca pradhānāt samutpannaṁ sarvamekaṁ jñeyamekamūlatvā ityevamekavādinastīrthikāḥ|

apare vadanti| sarvaṁ pṛthak| kuta iti cet| yathā śiraḥpadādi kāyātpṛthak| api ca lakṣaṇapṛthaktaṁ yathā vṛṣabho'śvavilakṣaṇaḥ| tasmātsarvaṁ pṛthagiti jñeyam| iti pṛthagvādinastīrthikāḥ|

atha kathaṁ sarvamekaṁ sabhdāvāditi| yataḥ saddhi dvedhā cetanamacetanañca| tatkathamekaṁ hetuvaiṣamyāṁditi| evaṁ dharmāṇāṁ samāsato dūṣaṇam|

yadi punaḥ kaścidvadedduḥkhasamudayanirodhamārgadvādaśanidānasaṁskṛtādidharmāṇāmekatvaṁ pṛthaktaṁ veti sarvametadasaddhetukam| kasmāt| yadyekatvaṁ tadā duḥkhāntavādāpattiḥ| yadi pṛthaktaṁ tadā sukhāntavādāpattiḥ| tasmāduktaṁ [ekatve pṛthakte vā]ntadvayavādāpattiḥ| naiṣa buddhadharmasyārtha iti|

api ca yathā kecidvadanti nirvāṇabhāvaḥ na duḥkhaṁ na ca sukham| kathaṁ jñātamiti cet| sarve hi dharmāścetanāḥ saduḥkhasukhā nirvāṇaṁ tvacetanaṁ kathaṁ sukhaṁ syāt|

api ca kecidvādinaḥ sukhaṁ vadanti| kuta iti cet| sukhaṁ trividham| sukhavedanāsukhaṁ, anupaghātaḥ, anākāṅkṣā ca| nirvāṇa ākāṅkṣābhāvānnirvāṇaṁ sukham|

api ca nirvāṇaṁ nityamiti mayā pūrvaṁ jñātam| idānīntu [vaktavyaṁ] saṁskārebhyastat pṛthak na veti kecit | atrocyate| nirvāṇaṁ nityamiti pūrvaṁ jñātaṁ kimucyate saṁksāraistattulyam| saṁskārāṇāṁ svabhāvaḥ pariṇāmaḥ pradhvaṁsaśca| nirvāṇabhāvasya tu nityatā sukhatvañca| kathaṁ vidvāṁstatsaṁskāraistulyaṁ vadet|

anyacca kecidāhuḥ| ātmabhāvasya rūpavattve nityo'nityo vāyamiti na niścīyate|

atrocyate| sarvaṁ mūrtamanityameva yathā murto ghaṭo vināśī| ātmāpi tadvaditi cettadā'nitya eva| ātmano mūrtatvantu sūtrairna samarthitaṁ, yuktihīnañcaitat| yathā ratnabudhyā sikatopalādānaṁ tathā bhavato vacanamatīva mithyā| atha kasmādātmā'murta iti cenmayā pūrvamuktaṁ ghaṭo mūrtatvādvināśīti| yadyātmaivaṁ syāt, tadā so'pi vināśī bhavet| kathamidānīṁ bhavatā pṛcchyate “kasmādātmā'mūrta” iti|

aparañca| aniyatasiddhāntalakṣaṇam, yathā kaścit pṛcchet| kiṁ śabdo vastu[bhūto] nityo'nityo vā| atrocyate| yadvibhāganiṣpannaṁ tadanityameva| śabdo'pi vibhāganiṣpannaḥ kathaṁ nityo bhavet|

atha kiṁ nāma śabdo vastu[bhūtaḥ]| atrocyate| aniścaye kathaṁ praśnaḥ|

atha kiṁ kevala evātmānāgate'dhvani sukhaduḥkhe vedayate saśarīro vā|

atrocyate| etasmiccharīre vinaṣṭa ātmano'parasmiñcharīre vedanam|

nanu ka eṣa ātmā yo'nāgate'dhvani sukhaduḥkhe vedayate| atrocyate|‘ātmā, iti pūrvamuktaṁ bhavatā| kathaṁ punaḥ sannasan vātmā’ iti pṛcchyate| ayuktametat|

atha siddhāntārtha uktaḥ| kiṁ punarvākyapraśaṁsālakṣaṇam| atrocyate| yuktyaviruddhamanadhikamanyūnamadhigatapadārthaṁ vacanadharmanibaddhaṁ prasiddhadṛṣṭāntāviruddhamananuyojyañca| ebhirhetubhirvākyapraśaṁsetyucyate|

nanu kiṁ nāma yuktyaviruddham| atrocyate| vijñānamevātmeti kecinmanyante sarvaskārāṇāṁ śūnyatvādanātmatvācca| na hi sarve saṁskārā vijñānamiti tadayuktam| saṁskārā hi vijñānasya hetavaḥ| hetūnāṁ cānātmatvāt, kathaṁ vijñānamātmā|

atha sarve dharmāṁ anityāḥ śabdastu naiva sarvaṁ, tasmācchabdo nitya iti| atrocyate| bhavatā sarvamityuktam, ko'rthaḥ punaḥ śabdasya, yo naiva sarvam| etadahetukamayuktañca|

anyacca| sarve kṛtakadharmā anityā eva| agnisantānavat| śabdo'pi tathā| tasmādanityaḥ| etadaviruddhalakṣaṇam|

atha kimanadhikamanyūnañca| atrocyate| ahikanyūnatvayorlakṣaṇaṁ pūrvamuktam| nyūnatvaṁ trividham hetunyūnatvaṁ vākyanyūnatvaṁ dṛṣṭāntanyūnatvañca| yadi kaścidvadet| ṣaḍvijñānanyanityāni ghaṭavat| kāraṇantu na vadettadā taddhetunyūnatvamityucyate| yadi kaścidvadeheho'yamanātmā sakāraṇatvāt| śabdo'pyanātmā sakāraṇatvādetadṛṣṭāntanyūnatvam|

yadi kaścidvadedanityāni catvāri mahābhūtāni ghaṭavatkṛtakāni| etadvākyanyūnatvam| etadvīparītaṁ tu sampannamityucyate|

sampannañca yathā| ātmavādyevaṁ praṣṭavyaḥ| yaduktaṁ bhavatātmeti sa nityo'nityo vā| yadyanityastadā saṁskāravadvināśadharmā| nitya iti cettarhi kathaṁ nirvāṇaspṛhā| etat sampannalakṣaṇam|

atha kiṁ nāmādhikam| atrocyate| adhikaṁ trividham, hetvadhikaṁ, dṛṣṭāntādhikaṁ, vākyādhikañca| yadi kaścidvadecchabdo'nityaḥ samyogajaḥ| yathā ghaṭaḥ kṛtako'nityaśca| punarapi vadecchabda ākāśasya guṇaḥ| ākāśo'mūrtaḥ śabdastu rūpadharmā kathamanyonyasamāśrayaḥ| etaddhetvadhikam yadyucyate pañcendriyāṇyanityāni pratidhvanivatkṛtakatvāt| śabdo'pi tathā| kathaṁ tajjñāyate| oṣṭhamukhādisamubhdavatvāt| tadṛṣṭāntādhikam| yadyucyate 'ṇuḥ sūkṣma ākāśastu vyāpī| ubhāvapi nityau| śabdastu na tathā tasmādanitya etadṛṣṭāntādhikam| api ca śabdo 'nityaḥ sakāraṇatvāt| nitya iti cet, tadayuktam| kasmāt ? dvābhyāṁ hetubhyām| murtobhdavatvādaindriyakatvācca| kathaṁ nitya iti yacca samānadharmakaṁ tatsarvamanityam| etadvākyādhikamucyate|

atrāha| kīdṛśaṁ vākyaṁ laukikānāṁ pratipādanāya smartham| ucyate| yadi mūrkhāya gambhīrārtha vadedyathā sarve dharmā śūnyāḥ śāntā nirātmāno niṣpugdalā māyāvat nirmāṇavattattvarahitā ityādi tadā taṁ gambhīrārthaṁ vidvāneva jñātuṁ śankoti pṛthagjanastu śrutvā bhrāntyāpanno bhavet| etadaprāptakālam| athocyate| asti dharmāṇāṁ karma, asti viṣākro'sti ca bandhamokṣaḍiḥ| yaḥ karoti so'nubhuṅkta ityalpabuddhayo'pi śrutvāvagacchanti yathā vedhakāraṇisaṁyogenāgnerūtpattiḥ| yadabhidhīyate tadyadi sattvopayogi bhavet, tadā sarveṣāṁ [tatra] pratītiranumodanañca| etat prāptakālam|

atha kiṁ pratipattiḥ| ucyate| abhihitasya bāhulye'pi smaraṇasāmarthyam, arthānāṁ gāmbhīrye'pi tallakṣaṇopalabdhiḥ, janaprītikaraśca sādhyasāraḥ| yathā kaścidvadet sarve dharmāḥ śūnyā anīśvarāḥ sarvavastūnāṁ pratītyasamutpannatvāditi pratipattiḥ|

atha ke vākyadoṣāḥ| atrocyate| pūrvoktaviparītā vākyadoṣāḥ| vākyadoṣāḥ punardvividhāḥ| kiñca taddvaividhyam| arthasyābhede punaruktiḥ| vākyasya cābhede punaruktiriti| kā nāmaikārthapunaruktiḥ| yathā kauśika ityuktvā punarvadeddevendraḥ śakraḥ purandaro veti| iyamucyata etasyaivārthasya nāmāntarapunaruktiḥ|

nāmārthatulyatā yathā| indra ityuktvā punarapīndra iti vadet| iyaṁ nāmārthābhede punaruktiḥ|

yadalaṅkṛtamasaṅgaṁ voktaṁ sa sarvo vākyadoṣa ityucyate| aparañca yadyuktisamupetamapyakramam eṣo'pi vākyadoṣa iti|

yathā gāthayoktam|

yathā kaściddevānāmindrasya śakrasya bhāryāṁ praśaṁmayan suvarṇarūpiṇīm||

komalapādahastāṁ paścācca śakro devānāmindro 'suratripuravināśīti tu vadannityakramaṁ vacanamuktam|

atha katividhaṁ pramāṇam| caturvidhaṁ pramāṇam| pratyakṣamanumānamupamānamāgamaśceti| caturṣu pramāṇeṣu pratyakṣa śreṣṭham| kutaḥ punaḥ pratyakṣaṁ śreṣṭhamiti cedapareṣāṁ trayāṇāṁ pramāṇānāṁ pratyakṣopajīvakatvācchreṣṭham| yathā dṛṣṭe dhūmavatyagnau paścāddhumadarśanādagneranumānam| tasmātpratyakṣaṁ viśiṣyate| yatha ca marīcidarśanenodakopamānam| tasmātpratyakṣe pūrvaṁ jñāte paścādupamānalābhaḥ| .....paścātpratyakṣakāle pūrvajñānaṁ satyam|

tataśca pratyakṣādeva [pramāṇa]trayaṁ jñānamiti jñātam| idānīntu tatpratyakṣaṁ kathaṁ saditi| atrocyate| pañcendriyajñānaṁ kadācinmithyā| yattu sādhyavasāyaṁ samyagdharmāvabodhakaṁ tatparamam| grīṣme marīcīnāmalātacakragandharvanagarāṇāṁ ca pratyakṣe'pi tadasat|

aparañca| lakṣaṇāspaṣṭatvāddarśanabhramaḥ| yathā rātrau sthāṇuṁ dṛṣṭvā manuṣya eṣa ityucyate| aṅgulyā cakṣuḥpīḍanācca dvicandradarśanam| śūnyatājñāne prāpte samyagdṛṣṭirucyate| jñāta pratyakṣaṁ tāvat| atha kimanumānalakṣaṇam| ucyate tatpūrvamuddiṣṭam| adhunā vyākhyāyate| anumānaṁ trividhaṁ pūrvavat, śeṣavat, sāmānyato [dṛṣṭaṁ] ca| yathā ṣaḍaṅguliṁ sapiḍakamūrdhānaṁ bālaṁ dṛṣṭvā paṣcāddhṛddhaṁ bahuśrutaṁ devadattaṁ dṛṣṭvā ṣaḍaṅgulismaraṇāt so'yamiti pūrvavat|

śeṣavat yathā, sāgarasalilaṁ pītvā tallavaṇarasamanubhūya śeṣamapi salilaṁ tulyameva lavaṇamiti| etaccheṣavadanumānam|

sāmānyato dṛṣṭaṁ yathā| kaścigdacchaṁstaṁ deśaṁ prāpnoti| gagane'pi sūryācandramasau pūrvasyāṁ diśyuditau paścimāyāñcāstaṁ gatau| tacceṣṭāyāmadṛṣṭāyāmapi tadgamanamanumīyate| etatsāmānyato dṛṣṭam| nanu kā śrutiḥ| atrocyate, satyaprācīnavṛddhabuddhabodhisattvadarśanādāryasūtradharmaśravaṇagrahaṇayorjñānadarśanotpādasāmarthyameṣā śrutirityucyate| yathā suvaidyako bheṣajakuśalo maitracittena śikṣakaḥ suśruta ityucyate|

evamapi yat kṛtasarvadharmasākṣātkārairmahājñānairāryaiḥ śrutaṁ tat suśrutamucyate|

atha kimupamānalakṣaṇam| atrocyate| yathā sarve dharmā śūnyāḥ śāntā māyāvat nirmāṇavat| saṁjñā'dāntāśvavat, saṁskārāḥ kadalīvat, kāmalakṣaṇaṁ piḍakavat viṣavat| etadupamānamucyate| evaṁ catvāro hetavaḥ| tadavagamanaṁ hetujñānamityuktam|

atha ke hetvābhāsāḥ| atrācyate| hetvābhāsā eteṣu vādadharmesu mahādoṣā eva jñeyāḥ| śīghrañcāpahartavyāḥ| athedānīṁ hetvābhāsā vyākhyāsyante| hetvābhāsānāṁ lakṣaṇānyaparimitāni saṁkṣepatastvaṣṭāveva| vākchalaṁ, sāmānyachalaṁ, saṁśayasamaḥ, kālātītaḥ, prakaraṇasamaḥ, varṇyasamaḥ, savyabhicāraḥ, viruddhaḥ|

nanvete'ṣṭau dharmā vistareṇa vivektavyāḥ| ucyate| nava iti caturvidham| navaḥ, nava, na vaḥ, nava iti|

yathā kaścidāha| yo maya parihitaḥ sa navakambalaḥ| atra dūṣaṇaṁ (vadet) yabhdavatā parihitaṁ tadekameva vastraṁ kathaṁ naveti| atra prativedenmayā nava ityuktaṁ tathāca navaḥ kambalaḥ natu naveti| atra dūṣayetkathaṁ nava ? navalomairnirmitatvānnava ityukte prativādī vadet tattvato'parimitāni lomāni kathaṁ navalomānītyucyate|

atrāha| nava iti mayā pūrvamuktaṁ na tu navasaṁkhyā| atra dūṣaṇam| tadvastraṁ yuṣmākameveti jñātaṁ kasmādetanna vaḥ kathyate| atrottaram| mayā nava ityuktaṁ kintu na va iti noktam| atra dūṣaṇam| bhavataḥ kāyaṁ kambalo vasta iti pratyakṣametat| kathamucyate na vaḥkambalaḥ| ayaṁ hetvābhāsa ityucyate vākchalaṁ ca|

aparañca vākchalam| yathā girirdahyata ityukte, dūṣaṇam| tattvatastṛṇataravo dahyante kathaṁ girirdahyata ityuktam| etadvākchalamityucyate|

api ca chalaṁ dvividhaṁ| pūrvavat sāmānyañceti| yathā| saṁskṛtā dharmāḥ śrūnyāḥ śāntā ākāśavadityukte, dūṣaṇam| yadyevaṁ, ubhayorapi śūnyatvamabhāvaśca, tadā niḥsvabhāvā dharmā ākāśatulyā iti sāmānyachalam|

kā tāvadutpattiriti| atrocyate| sata utpattiriti| yathā mṛdo ghaṭatvattvāddhaṭotpādakatvam| yadi mṛdo ghaṭatvavattvaṁ tadā mṛdeva ghaṭaḥ syāt| tadā tadutpattaye kṛtaṁ kumbhakārarajjucakrasaṁyogena| yadi mṛdaḥ sabhdāvena ghaṭotpādakatvaṁ, tadodakasyāpi sabhdāvena ghaṭotpādakatvaṁ syāt| yadyudakasya sabhdāvena ghaṭānutpādakatvaṁ kathaṁ tarhi mṛdo ghaṭotpādakatvam| iti sāmānyachalam|

kiṁ nāma saṁśayahetvābhāsalakṣaṇam| ucyate| sthāṇormanuṣyasādṛśyāt, rātrau taṁ dṛṣṭvā, eṣa sthāṇuḥ puruṣo veti vimarśaḥ| ayaṁ saṁśayahetvābhāsa iti|

kaḥ punaḥ kālātītahetvābhāsaḥ| ucyate| yathā kaścidvadennityaḥ śabdaḥ| śabdamayatvādvedo'pi nitya iti| atra dūṣaṇam| idānīṁ bhavatā śabdasya nityatākāraṇamapratiṣṭhāpya kathaṁ vedo nitya ityucyate|

atra vadedyathākāśamarūpatvānnityaṁ tathā śabdo'pyarūpatvānnityaḥ| tadvacane paścādapyukte so'rthaḥ sidhyati| atra dūṣaṇaṁ kālatītametadvacanam| yathā gṛhe dagdha udākānveṣaṇaṁ bhavatopyevamiti kālātītaḥ|

atha ko nāma prakaraṇasamaḥ ? (ātmanaḥ) śarīra bhinnatvādātmā nityaḥ| yathā (ghaṭasya) ākaśabhinnatvādvaṭo'nityaḥ| ayaṁ prakaraṇasama ityucyate|

atra dūṣaṇam| yadyātmā śarīrabhinnatrvānnitya iti, tadā (ghaṭasya) ākāśabhinnatvādvaṭo'nityaḥ| ayam prakaraṇasama ityucyate|

atra dūṣaṇam| yadyātmā śarīrabhinnatvānnitya iti, tadā (ghaṭasya) śarīrabhinnatvādvaṭo'pi nityaḥ syāt śarīrabhinnatve'pi ghaṭo'nitya iti cet, tarhyātmāpi śarīrabhinnatvāt kathaṁ nityaḥ| iti prakaraṇasamaḥ|

ko nāma varṇyasamaḥ| ucyate| yathā nityamākāśamasparśatvāt| manovijñānamapi tathā| ayaṁ varṇyasama ityucyate|

kaḥ savyabhicāraḥ| ucyate| yathā pañcaviṣayā anityā indriyagrāhyatvāt| catvāri mahābhūtānyapi tathā tasmādanityāni|

atra dūṣaṇam| kūrmaroma lavaṇagandhaśca nirābhāsamātraṁ manovijñānopalabhyatvātkimanityamiti savyabhicāraḥ|

atha ko nāma viruddhaḥ| ucyate| viruddho dvividhaḥ| dṛṣṭāntaviruddho yuktiviruddhaśca| yathātmā nityo'mūrtatvāt, vṛṣabhavat| ayaṁ dṛṣṭāntaviruddhaḥ|

yuktiviruddho yathā, brāhmaṇasya kṣatrakarmānupālanaṁ mṛgayādiśikṣā ca, kṣatriyasya dhyānasamāpattiriti yuktiviruddhaḥ| evambhūtau dharmāvajñā abuddhaiva satyaṁ manyante|

nanu kimaviruddham| atrocyate| etabhdinnamaviruddhamityabhidhīyate|

iti hetvābhāsāḥ|

|| iti prathamaṁ prakaraṇam||

atha dvitīyaṁ prakaraṇam

atha dvitīyaṁ prakaraṇam|

pūrvamaṣṭavidhā vādadharmā uktāḥ| atha nigraha[sthāna]dharmān vakṣyāmaḥ|

nanu katame vādadharmāḥ| (atrocyate) yathā catvāri mahābhūtāni prajñaptireva| kasmāt| rūpādidharmatvādeva| aparaḥ punarāha| catvāri mahābhūtāni tattvataḥ santi| kathametajjñātam| kāṭhinyaṁ pṛthivīdharmo yāvaccalatvaṁ vāyudharmaḥ| tatsaditi jñeyam| etacca prativiruddham| tasmādvivādaḥ| yathā vā| pṛthivī śarīrakāraṇameva| aparāṇi mahābhūtānyapi tathā| atra dūṣaṇam| pṛthivyādi sarvavastusādhanasamarthaṁ sat, kathaṁ śarīramātraṁ sādhayediti nātra vivādaḥ| yadyevaṁ na syāttadā vāda ityucyate|

nanu kāni nigrahasthānāni| (atrocyate) yathā śabdo nityo'mūrtatvādākāśavat|

atra dūṣaṇam| yadyapi śabdo'mūrtaḥ| tathāpyaindriyakaḥ, saṁpratighaḥ, ghaṭavatkṛtakaḥ| api tvākāśe 'kṛtake kathaṁ tadṛṣṭāntalābhaḥ| etannigrahasthānamityucyate|

atha ghaṭo mūrta ityanityaḥ śabdasya tvamūrtatvāt kathaṁ tadṛṣṭāntalābhaḥ|

atra dūṣaṇam| śabdo ghaṭabhinno'pyaindriyakaḥ śrāvaṇatvāt| tasmādanityaḥ|

nanu kasyārthasyānigrahasthānatvāpattiḥ| saṁskārā vijñānañca kṛtakatvādanityam| nirvāṇamakṛtakatvānnityam| etadvākyaṁ samyakpadarasam| etaducyate 'nigrahasthānam|

nanu kiṁ vacanaṁ dūṣayitavyam| cuayte| vākyavaiparītyaṁ, asaddhetusthāpanaṁ, udāharaṇavaiṣamyañcaitaddūṣayitavyam|

yatha saṁjñā saṁyojanocchedikā, ityukte kaścit pṛcchet| kathaṁ saṁjñā samyojanocchedikā| jñānasya saṁjñāta utpādaṁ pūrvamanutkā saṁjñāmātrakathanādvākyavaiparītyamitīdaṁ dūṣaṇīyam|

nanu kathaṁ punaretadvākyamucyate| asidvasthāpanānnigrahasthānāpattijñāpanārthamuktam|

aparañca| anuyojyānanuyogaḥ| prativaktavye 'prativaktavyata| trirabhihitasya parairavijñātam| trirabhihitasya svayamavijñānam| etāni nigrahasthānāni|

anyacca| pareṇa vivadamānastadvikalatāṁ nāvagacchati| anyastu vadati| eṣo'rthaḥ mithyaiva, kiṁ bhavānnopalabhate tadā nigrahasthānam|

anyacca| parasya samyagarthe doṣasamārope'pi nigrahasthānam|

anyacca| vādinoktaṁ sarvairvijñātamapyasāveva (prativādī) nāvagacchati cettadapi nigrahasthānam| praśno'pi tadvat| etāni nigrahasthānāni vādasya mahākaṇṭakāni gambhīraduḥkhāni jñeyāni, drutañca heyāni|

nanu praśnāḥ katividhāḥ| ucyate| trividhāḥ| yathā vacanasamaḥ, arthasamaḥ, hetusamaśca| yadi vādinastaistribhiḥ praśnottarāṇi na kurvanti tadvibhrāntam| yadyeteṣāṁ trayāṇāmuttarāṇāmanyatamaṁ nyūnaṁ syāttadasampannam|

yadi vadedahamevamprakārān trīn praśnānnāvagacchāmi mama yathājñānamanyonyaṁ praṣṭavyaṁ, tadā'doṣaḥ|

vākyasamaḥ yathā| ātmā nāstītyukte tadvākyāśrayeṇa praśnaḥ| ayaṁ vākyasama ityucyate|

arthasamaḥ tanmatopādānamevāyamarthasama ityucyate|

hetusamaḥ| paramanogaterutpādakasya hetorjñāmayaṁ hetusama ityucyate|

evaṁ sāmarthye satye nigrahasthānamityucyate|

yadyatidrutaṁ vadecchrotāraśca nāvagaccheyustadapi nigrahasthānam|

athaitāvamātramaparāṇi vā santi| atrocyate| santyeva yathā nyūnaṁ, adhikam nirarthakaṁ, aprāptakālaṁ, punaruktaṁ pratijñāsannyāsa ityādīni nigrahasthānānītyucyante|

yadyevamādi pūrvapakṣī vadet, tadā nigrahasthānāpattiḥ|

atha pratijñāvirodhaḥ| yathā vijñānaṁ nityam| kasmāt| vijñānasya hi dvaividhyam| vijñānotpāttirvijñākriyā ca|

ghaṭasyāpi dvaividhyam, ghaṭotpattirghaṭakriyā ca| evaṁ vijñānamutpādyamānameva sakriyaṁ tasmānnityam| ghaṭasya tūtpattyanantaraṁ sakriyatvam, tasmādanityatvam|

atra dūṣaṇam| utpattāveva sakriyatvānnityamiti ceddīpasyāpyutpattāveva sakriyatvānnityatvaprasaṅgaḥ| atha dīpaścakṣuṣā dṛṣṭaḥ syāt, śabdaśca śravaṇena śrūyata iti kathaṁ dṛṣṭāntopapattiḥ| etatpratijñāsannyāsanigrahasthānam|

aparañca| kecidvadantyātmā nitya iti| kathaṁ jñātam| anaindriyakatvāt| yathā ākāśo'naindriyakatvānnityaḥ|

atra dūṣaṇam| paramāṇavo'nindriyakā api tvanityāḥ|

atrocyate| ātmā'kṛtakatvānnityaḥ paramāṇavastu kṛtakatvādanityāḥ|

atra dūṣaṇam| anupalabdheriti bhavatā pūrvamuktam| adhunā cākṛtakatvādibyucyate| ayaṁ pratijñāvirodhaḥ|

nanūcyate 'haṁ virodhīti cebhdavāṁstu mama vacanaṁ pratikūlayan katham virodhau na syāt|

kiñca kathametadyuktisaham| yadvi viruddhamityucyate mayā, sā bhavata eva vacanasya pūrvoktenārthan pratikūlatā| tasmādviruddhamityuktam|

anyacca| bhavatā pūrvamuktamaspaṣṭatvānme saṁśaya utpanna iti| nāhaṁ bhavadvirodhītyevaṁ saṁśayena virodhaḥ| etadapi nigrahasthānamiti|

||iti dvitīyaṁ prakaraṇam||

atha tṛtīyaṁ prakaraṇam

atha tṛtīyaṁ prakaraṇam|

vādī prāha| yadi kaścidvadedasti sattvo yāvatsanti prāṇā asti jīva ityādi| kathaṁ jñātam| aindriyakatvāt| yathā nirupadhiśeṣanirvāṇasyendriyairanupalabdherabhāvaḥ sattvānāntu na tathā| tasmātsantyeva iti jñātam|

atmā nityaḥ| yathārhattvaphalaṁ kasmiṁścideva kāle vidyamānamapi pūrvaṁ paścāccāvidyamānatvādabhāva iti jñāyate| yathā ca dvītīyo mūrdhā tṛtīyo hastaśca| abhūtvā bhāvāt prāgabhāvaḥ| bhūtvā tu vināśātpradhvaṁsābhāva iti jñāyate| ātmā tu na tathā tasmānnityaḥ|

atra dūṣaṇam| yathā mūla[kīla]odakānyadṛśyatvānna sadityuktam| arhattva-[phalasyāpi] tathātvameva na tvabhāvaḥ| etattu na bhavatā sākṣātkriyate|

nanu maivam| udakasya pṛthivyāvaraṇādadṛśyatvam| arhattva-[phalasya tu] kenāvaraṇenādṛśyatvam| tasmāttadasaditi jñāyate|

atra dūṣaṇam| yabhdavatoktaṁ [yathā] dvitīyasya mūrdhnastṛtīyasya hastasya cādṛśyatvāda-[bhāvaḥ] arhattva-[phalasyāpya]bhāvaḥ iti spaṣṭam| tadayuktam| dvitīyasya mūrdhno nāstitve'pi tarhi na prathamasya nāstitvam| arhattva-[phalaṁ] tu nāstyeveti tasyaivātyantābhāvaḥ| kathaṁ dṛṣṭāntatopapattiḥ| yacca bhavatoktamanupalabdhernirvāṇābhāvaḥ siddha iti tadapyayuktam| kiṁ nāma (mahā) śāgarodakasya binduparimāṇasyāśakyajñānatvāttadasaditi vaktuṁ śakyate| yadyapi binduparimāṇaṁ na jñāyate tathāpyastyeva sāgaraḥ| nirvāṇasyāpi tathātvam| anupalabdhāvapi tattattvataḥ sadeva| asaditi cedvaktavyam tasya kāraṇam| yadi na śakyate vaktaṁ tadā bhavata evārthahāniḥ| ayamucyate yathādharmavādaḥ|

anyacca yadyanupalabdhernirvāṇasyāsattvaṁ, tadā parasya saṁśayaḥ| yathā rātrau taruṁ dṛṣṭvā citte saṁśayaḥ| eṣa sthāṇurvā manuṣyo veti| na khalū taruḥ sthāṇoḥ puruṣasya vo[palabdhau] niyato hetuḥ| anupalabdhireva nirvāṇasyābhāve niyato heturiti cennātra saṁśayasambhavaḥ|

anyacca karmavipākāvināśāt, sadeva nirvāṇam| kuta iti cet| yathā davena girestarudāhe 'gnistadvināśahetuḥ| kaḥ punastasya karmavipākasya vināśaheturyena tadvinaśyate| nirvāṇalābhe tadā prahāniḥ|

atrocyate| asti tattvato vināśahetuḥ| āvaraṇāttvanupalabdhaḥ|

atra dūṣaṇam| nirvāṇamapi sadāvaraṇāttvanupalabdham|

kiñca yadi vipākasya vināśaheturvartata iti cennocyate| tadā bhavato'rthahāniḥ| yadyabhāvādvināśaheturanuktastadāvaraṇābhāvo'pi kathamuktaḥ| evaṁ kāraṇairkarmāṇāmavināśo jñāyate|

eṣa yathādharmavāda ityucyate|

pūrvapakṣī vadati| yadi sāgarodakasabhdāvānnirvāṇasabhdāvaḥ siddhastadā kiṁ dvitīyasyāpi mūrdhnaḥ sabhdāvo na sidhyati| dvitīyasyāpi mūrdhnaḥ sabhdāvo na siddha iti cet kathaṁ nirvāṇasya sabhdāvaḥ| tasmābhdavatoktaḥ sāgarodakadṛṣṭāntaḥ nirvāṇasabhdāvaṁ sādhayituṁ na samarthaḥ| kiṁ dvitīyasya mūrdhnaḥ sabhdāvaṁ sādhayet|

atra dūṣaṇam| kiṁ nirvāṇamasaditi bhavadabhipretam| asataḥ sattā vā'sato'sattā vā| asato'satteti cet kathaṁ nirvāṇamasaditi pratijñāyate| yadi tvasataḥ sattā kathaṁ bhavatā'sattocyate|

yadyasato nirvāṇasya sattā tadā svato'sato'sattvamapi saditi cet, kathaṁ na nirvāṇasabhdāvalāba ityatra heturvaktavyaḥ| yadi vaktuṁ na śakyate, tadā niścitameva nirvāṇaṁ saditi jñeyam| etadapi yathādharmavāda ityucyate|

nanvātmā nityo'nityo vā| atmā 'kṛtakatvānnityaḥ, ghaṭādiṣṭu kṛtakatvādanityaḥ|

atra dūṣaṇam| akṛtakatvādātmā nitya iti cettadayuktam| kasmāt| puruṣāṇāṁ saṁśayajanakatvāt| yadyakṛtakatvānnitya evātmeti tadā nityo'nitya veti saṁśayasyāsambhavaḥ| saṁśayajanakatvāddoṣaḥ|

vādī| iyaṁ doṣāpattirna mamaivāpi tu sarveṣāmeva vādināṁ yathā śabdo nityo 'mūrtatvāt| atītaḥ kāyo'styeva pūrvanivāsānusmaraṇādityādipratijñā pūrvavatsaṁśayamutpādayatīti| tasmatsarvatraiva doṣāpattiḥ|

atra dūṣaṇam| dṛṣṭānta eva saṁśayaṁ nirdhārayati| bhavatāṁ tūdāhṛto dṛṣṭānto mama saṁśayamutpādayati tasmādasiyo'yaṁ dṛṣṭāntaḥ| dṛṣṭānte'siddhe'rthahāniḥ| tadeva nigrahasthānam|

yatpunarbhavatoktaṁ sarveṣāmeva doṣāpattirna tu mamaivetyeṣa svadoṣa eva na tu paradoṣaḥ| kuta iti cet| yathā kaścidabhiyukta ātmānamaprakāśya sarva eva taskarā iti vadettadāsau puruṣa ātmānamapi taskaraṁ manyata iti jñeyam| bhavānapi tathā tasmānnigrāhyaḥ|

idānīṁ yadi bhavānātmānaṁ prakāśayitumiḥcchu pūrvayuktimatikramya punarvaktumicchennūnaṁ bahudoṣāpattiḥ syāt| bhavataḥ prathamaḥ pakṣo dvitīyena [pakṣeṇa] dūṣitaḥ| tṛtīyaścārtho mayā dūṣitaḥ| pañcamena doṣāvadhimicchan pūrvaṁ nātikrāmedataḥ bhavato'ntyaḥ pakṣaḥ punaruktaṁ bhavet| punaruktaṁ ca nigrahasthānam|

nanvanuyojyaḥ ṣaṣṭho'pi ?

atrocyate| sidvastāvatpañcamasya doṣaḥ| tatkathaṁ ṣaṣṭho'nuyojyaḥ| asmin hi pratyukte pūrvadoṣatulyatā| anuyoktuḥ sadoṣatve pratipakṣeṇa tūṣṇīmbhaviṁtavyam|

aparañca| ṣaṣṭhasya doṣaḥ pañcamenāparyanuyojyaḥ| kuta iti cet| pañcamenaiva hyeṣa ṣaṣṭho'nuyuktaḥ| ato'yaṁ svayame sadoṣaḥ kathaṁ taṁ dūṣayet| evaṁ saddharmavādaḥ|

|| iti tṛtīyaṁ prakaraṇam||

athe caturthaṁ prakaraṇam

athe caturthaṁ prakaraṇam|

nanu bhavatā vyākhyāto yathādharmasadvādaḥ| kaḥ punaḥ sambandhaḥ|

atrocyate| praśnottarasambandho viṁśatividhaḥ| yadi kaścittena viṁśatividhenārthena samyagnyāyamārabhate sa sadvādasya jñātetyucyate| yadi naivaṁ tadā nāyaṁ vivādadharmāvagantā| eṣāṁ viṁśatividhānāṁ sāro dvividhaḥ| vaidharmyaṁ sādharmyañca| sajātīyatvātsādharmyaṁ vijātīyatvādvaidharmyam| arthasya hi tatsamāśrayatvātte viṁśatidharmān vyāpnuvataḥ|

kiṁ sādharmyam| yathā kleśakṣayo nirābhāsa eva, ākāśabhāvo'pi nirābhāsa iti sādharmyam|

kiṁ vaidharmyam| yathā nirvāṇamakṛtakatvānnityaṁ tathā sarve saṁskārāḥ kṛtakatvādanityāḥ| iti vaidharmyam|

nanu sādharmyavaidharmyābhyāṁ kathaṁ dūṣaṇam|

atrocyate| sādharmyadūṣaṇamicchatā evaṁ vaktavyam| rūpaṁ cakṣuṣā dṛṣṭaṁ, śabdastu śravaṇena śruta iti, kathaṁ tayoḥ sādharmyam| yadi rūpābhdinnaḥ śabdastadā rūpasyānityatvācchabdo nityo bhavet|

vaidharmyadūṣaṇam| yatha rūpasyaindriyakatvādanityatā, ātmano'naindriyakatvānnityatā|

ghaṭasyātmanaśca sabhdāvaḥ| sabhdāvasādharmye ghaṭasyānityatvādātmano'pi tathātvāpattiḥ| ghaṭasabhdāva ātmasabhdāvābhdinnastataścātmā nityo ghātastvanitya iti cet| nityatāsādharmyada[pya]ātmanā nityena bhavitavyam|

evaṁ dūṣaṇaṁ viṁśatividhaṁ yathā 1 utkarṣa[sama]m, 2 apakarṣa[sama]m, 3 bhedābheda[sama]m, 4 praśnabāhulyamuttarālpatā, 5 praśnālpatottarabāhulyam, 6 hetusamam, 7 kāryasamam, 8 vyāptisamam, 9 avyāptisamam, 10 kālasamam, 11 prāptisamam, 12 aprāptisamam, 13 viruddham, 14 aviruddham, 15 saṁśaya[sama]m, 16 asaṁśaya[sama]m, 17 pratidṛṣṭānta[sama]m, 18 śrutisamam, 19 śrutibhinnam, 20 anupapatti[sama]ñceti praśnottaradharmā viṁśatidhā|

1. utkarṣa [sam]m| yathā (kaścidvaded), ātmā nitya indriyānupalabdheḥ| ākāśo hyanupalabdhernityaḥ| sarvamanupalabhyaṁ nityameva| ātmāpyanupalabhyaḥ kathaṁ tadanityatāprāptiḥ|

atra dūṣaṇam| ākāśo'cetanatvānnityaḥ| ātmā tu cetanaḥ kathaṁ nityaḥ| ākāśaścetana ityanyāyyam| yadyātmā'cetanastadaivākāśena sadharmā| evaṁ vidvāṁsaḥ so'nitya iti manyante| etadutkarṣa[sama]m|

2. apakarṣa[sama]m| yathākāśo'cetana ātmā tu cetanaḥ| kathamākāśa ātmano dṛṣṭāntaḥ| etadapakarṣa[sama]m|

3. bhedābheda[sama]m| yathātmanityatāsthāpana ākāśa udāharaṇam| [atra dūṣaṇaṁ] ātmā ākāśaścābhinnau iti cedaikadharmyāt kathamākāśasyātmano dṛṣṭāntatā| bhinnau iti cedanyānyasādharmyāprāptiḥ| etaducyate bhedābheda[sama]m|

4. anyacca| ātmā nityo'naindriyakatvāt| yathākāśo'nindriyakatvānnitya iti bhavataḥ sthāpanā|

atha yadanaindriyakaṁ tannāvaśyaṁ nityam| tatkathaṁ siddham| etaducyate praśnabāhulyamuttarālpatā ca|

5. anyacca| ātmā nityonaindriyakatvāditi bhavatsthāpanā| anaindriyakasya dvaividhyam| yathā paramāṇavo'nupalabhyā anityāḥ| ākāśastvindriyānupalabhyo nityaśca| kathaṁ bhavatocyate yadanupalabhyatvānnitya ityucyate praśnālpatottarabāhulyañca|

6. anyacca| anupalabdhihetunātmā nitya iti bhavatā pratijñātam| ākāśaścātmā ca bhinnauḥ kathamubhayoranupalabhyatvaṁ heturbhavet| iti hetusamam|

7. anyacca| yatpañcamahābhūtamayaṁ tadanityam| ākāśa ātmā ca pañcamahābhūtamayau kathaṁ nityāvuktau| iti kāryasamam|

8. anyacca| anupalabhyatvānnitya ākāśa iti bhavataḥ sthāpanā| ākāśaśca sarvavyāpī [tataśca] kiṁ sarvāṇi bastūnyanupalabhyāni| etadyāptisamam|

9. anyacca| paramāṇuravyāpyanaindriyako'pyanityaḥ| ātmā tvanaindriyakaḥ kathaṁ nityaḥ| iti avyāptisamam|

10. anyacca| ātmā nityo'nindriyakatvāditi bhavatsthāpanā| so'yaṁ[hetu]rvartamāne'tīte 'nāgate vā| atīta iti cedatītatvānnaṣṭāḥ| anāgata iti cedabhāvaḥ| vartamāna iti cettadā'hetuḥ| yathā śṛṅge yugapadeva jātatvānnānyonyahetuke| iti kālasamam|

11. anyacca| ātmā nityo'naindriyakatvāditi bhavatsthāpanā| atha prāpyāprāpya vā heturiti| aprāpya cedasiddho hetuḥ| yathāgniraprāpya dahanāsamarthaḥ, asiścāprāpya chedanāsamarthaḥ| ātmānamaprāpya kathaṁ heturbhavet| ityaprāpti[samam]|

12. anyacca| prāpya iti cet, prāpterahetutvam| iti prāptisamam|

13. anyacca| sarvamanityam| na tvātmā sarvaṁ, tato nitya iti bhavatpratijñā ātmā ca tabhdāvādanitya iti vaktavyaḥ, kiñciddagdho hi kambalaḥ prāyeṇādagdhatvādadagdha ityucyate| etadviruddham|

14. anyacca| ātmā'naindriyakatvādākāśatulya iti bhavatsthāpanā| ākāśasyānupalabdhirātmano'pi tathātvam|

ātmana upalabdhiriti cettadākāśo'pi sukhadūḥkhadikamupalabheta| ātmana ākāśasya cābhinnatvāt| etadaviruddham|

15. anyacca| ātmanaḥ sabhdāvavannityatā'niyatā| laukikānāṁ saṁśayasambhavo nityo 'nityo veti| etat saṁśayasamam|

16. anyacca| astyātmā'naindriyakatvāditi bhavadvacanam atha vimarśaḥ kenāvaraṇenānupalabdhiḥ| kāraṇamatra vaktavyam| yadi kāraṇaṁ na vidyata ātmārthasya hāniḥ| ityasaṁśayasamam|

17. anyacca| ātmānaindriyakatrvānnitya iti bhavatā pratijñātam| atha mūlakilodakānyanaindriyakānyapyanityānyātmā tu kathaṁ nityaḥ| iti pratidṛṣṭānta[sama]m|

18. anyacca| sūtreṣu ātmano'nupalabdhiruktā tasmāttasya nityatā jñāteti bhavataḥ [sthāpanā]| (parantu) nāstyātmā nāstyātmīyamityapi sūtreṣūktam| nirgranthadharme cātmānityatoktā| ātmanityatve niyate sati sūtrāṇāṁ vaiṣamyānupapattiḥ| iti śrutisamam|

19. anyacca| yadi bhavatā ekameva sūtramadhigacchatātmā nitya iti manyate| athānyeṣāmapi sūtrāṇāṁ pratīterātmānityo mantavyaḥ| ubhayathā pratītiriti cedekasyaivātmano nityatvānityatvaprasaṅgaḥ| iti śrutibhinnam|

20. anyacca| yadi sabhdāvāditi hetunātmāstīti| atha śālasya sabhdāvāttāla utpadyate| yadyabhāvānnāstīti tadā tālabījeṣu vṛkṣākārābhāvāttadutpattyaprāptiḥ| sabhdāve'nutpattiḥ| abhāve'pyanutpattiḥ| ātmano'pi tathātvam|

yadi kiṁcitsadeva na tadānaindriyakatvaṁ hetutvena prayoktavyam| yadi ca sadeva tadā nānaindriyakatvena tasya sattā sādhyā| ityanutpattisamam|

yadi punaḥ kaścicchabdanityatāṁ sthāpayet, tadaivamvidhairuktapūrvairviśatiṁdharmaistadvadeva dūṣayet|

nanvātmasabhdāvādeva bhavānātmānaṁ dūṣayati| ātmano'bhāve kiṁ bhavatā dūṣaṇīyam| dūṣaṇāddhyasti dūṣayitavyam|

atra dūṣaṇam| yuktito nāsyātmā| bhavatā tu tatsabhdāvasya vikalpānmayā bhavato dūṣaṇaṁ kṛtam| yabhdavatoktaṁ dūṣayitavyabhavādastyātmeti| tato dūṣaṇānnāstyātmeti jñātam| bhavata ātmaparigraha ātmābhāvadyotanarthamiti cettadayuktam| bhavadarthāprayogāt| idānīntu svayaṁ bhavatā mama siddhāntaḥ prayuktaḥ|

nanu kathaṁ bhavatā jñātaṁ yanmayā bhavadarthaḥ parigṛhītaḥ| atra kāraṇaṁ vaktavyamiti cenmayā khalu pūrvamuktaṁ yatsvārthamaparigṛṇhatā bhavatā parasthāpanā parigṛhītā kathamidānīṁ punaridaṁ pṛcchyate| kathaṁ jñātaṁ yabhdavato'rtho maya parigṛhīta iti| yato bhavadvacanaṁ viruddhaṁ tasmānnigrahasthānāpattiḥ|

anyacca| anaindriyakatvātsannevātmeti bhavatā pūrvaṁ pratijñātaṁ paścāttu dharmabāhulyena sādhitam| sthāpitahetoraniyatatvātpratijñāvirodhācca nigrahasthānam| tasmābhdavadarthanāhau yadi punarahaṁ kiṁcibdravīmi, [yanmayā] pūrvamuktaṁ tasmādetanna bhidyate| tadā vacanasya bahudoṣaprasaṅgaḥ| pakṣapratipakṣayoḥ pratipakṣamaryādā pañcame| tadatikramyoktaṁ vacanaṁ doṣaḥ| yadi vidvān gambhīraṁ nyāyaṁ bhāvayatyuktena dṛṣṭāntenārthāvagamasamarthaśca syāttadā tasya vāda evaṁvidhaṁ dharmaṁ nātikrāmati|

vādī prāha| evamukto vadadharmāṇāṁ sāraḥ| eṣa vādasāraḥ sarvavādānāṁ mūlam| etasmādvādātpakṣapratipakṣayoḥ paramotkarṣajñānaṁ jāyate| yathā bīje sukṣetra upte mūlāṅkurāḥ samṛddhāḥ| kukṣetre tūpte phalabhāva eva| etasya dharmasyāpi tathātvam|

yadi vidvān kaścit pramāṇavicārakuśalastadā vādānutpādayati| mūrkhastvalpabuddhiretadvādābhyāsenāpi tadavagamāsamarthastattvato vidvān nocyate| tasmādye ye sañjñānotpattiṁ subhāśubhavivekañcecchanti taistaireva saddharmavāda āśrayitavyaḥ|

||iti caturthaṁ prakaraṇam||

samāptaścāyaṁ granthaḥ|