1 pratyakṣam

tarkabhāṣā

pratyakṣam

maṅgalācaraṇam

guruṁ praṇamya lokeśaṁ śiśunāmalpamedhasām |

dharmakīrtimataṁ śrutyai tarkabhāṣā prakāśyate ||

pramāṇasāmānyalakṣaṇam

iha khalu prekṣāpūrvakāriṇo'rthijanāḥ sarvapuruṣārthasiddhinimittaṁ pramāṇamanusarantīti pramāṇamādau vyutpāddyate |

pramāṇaṁ samyagjñānamapūrvagocaram | pramīyate'rtho'neneti pramāṇam | tadeva samyagjñānam, sandehaviparyāsadoṣarahitatvāt | avisaṁvādakaṁ jñānaṁ loke samyag jñānamabhidhīyate | na ca saṁśayaviparyāsajñānayoravisaṁvādakatvamasti |yathā sthāṇurvā puruṣo veti jñānasya, marīcikāsu vā jalajñānasya | apūrvo gocaro asyetyapūrvagocaram | gocaro viṣayo ghaṭādiḥ | tasmādutpannaṁ tadarthaprāpaṇayogyaṁ jñānaṁ pramāṇam ||

pramāṇasya kāryam

nanu jñānaṁ kartṛ puruṣaṁ prayojyamartha karmabhūtaṁ yadi kadācinna prāpayati tatkathamaprāpakatvāt pramāṇaṁ syāt ? ucyate | na hi jñānena puruṣo gale pādukānyāyena balādarthe pravartayitavyaḥ | api tvevaṁbhūtamidaṁ vatusvarupaṁ nānyathetyanenākāreṇa niścayo janayitavyaḥ | sa cettena kṛtaḥ, etāvataivāsya prāmāṇyamaviruddham | puruṣastu tatra prayojanavaśāt pravartatāmṛte prayojanaṁ na pravartatām , artho vā yogipiśācādibhirapahriyatām | jñānasya kimāyātam ? ||

kṣaṇikaṁ sannapi pramāṇasya saṁgatiḥ

nanvavisaṁvādakatvena jñānasya prāmāṇyam | avisaṁvādakatvaṁ ca dṛṣṭārthaprāpaṇāt | na ca yad dṛṣṭaṁ tatprāpyate, kṣaṇikatvāt kiṁ ca , rupaṁ dṛṣṭa, prāpyate ca spraṣṭavyam | tato'nyad dṛṣṭamanyat prāpyata ityapratītaprāpaṇāt kathaṁ prāmāṇyamasya saṁgacchatām | na , yadi nāma vastuto'nyadeva prāpyate tathāpi dṛṣṭameva mayā prāptamityekatvādhyavasāyāt pratītaprāpaṇamabhidhīyate | yattu marīcikādijalajñānaṁ tadaprāpaṇayogyatvādapramāṇameva ||

arthakriyāsthitiḥ

nanvidaṁ prāpaṇayogyamidaṁ netyarthakriyā prāptimantareṇa niścetumaśakyam | jñānotpattimātreṇa tu na bhrāntābhrāntayorbhedo'vadhāryate | tataśca kathaṁ tatsamyagjñānamiti cet ? naiṣa doṣaḥ | yaddyapi jñānamātrodayād vaiśiṣṭyamanayoravadhārayituṁ na śakyate, tathāpi jñānaviśeṣodayāddyathaikasya vaiśiṣṭayaṁ tathocyate | tathā hi- yadi nāma mandabuddhirutpattivaśādavisaṁvādakatvaṁ jñānasya nāvadhārayituṁ samarthaḥ , tathāpi dāhapākāvagāhanasnānapānonmajjanāddyarthakriyāṁ dūrato'nubhavato narasya darśanenoccalad dhūmādidarśanena cāvadhārayati | amandabuddhistu paṭutarapratyakṣeṇaivāvadhārayati , na tvarthakriyāprāptyā |

yadyavisaṁvādalakṣaṇaṁ prāmāṇyaṁ tadā śrotrajñānasyādhigatārthāprāpakatvāt kathaṁ prāmāṇyamini cet ? na | arthasvarupapratītirhi prāmāṇyam | tacca bāhyārthakriyāprāptimantareṇāpi sambhavati | yaduktam-

pramāṇamavisaṁvādi jñānamarthakriyāsthitiḥ |

avisaṁvādanam iti|

śabdasya śrutimātreṇaiva caritārthatvāt śrutireva tatrārthakriyāsthitiḥ | yathā ravicandrāmbudacitrādīnāṁ darśanamevārthakriyāsthitiḥ | taduktam -

jñeyasvarupasaṁvittiriṣṭā tatra kriyāsthitiḥ iti|

prathamaṁ tu prekṣāvānarthakriyārthitayā jalānalādāvarthakriyāsandehādeva pravartate |

yadi nāma tasyaiva nāsti sandeho me vartata iti tathāpi sādhakabādhakapramāṇābhāvādyuktaḥ sandeho bhavan kena vāryate iti | tasmāt

sthitametat - āsāditanirantarārthakriyāvyavahārāt paṭutarapratyakṣodayādevārtha pravartate, mandabuddhistu tādrūpyānumānāditi |

ata eva tu pratyakṣasya svataḥ prāmāṇyam | kasyacittu parataḥ | yogijñānasya svasaṁvedanasya ca svata eva prāmāṇyam | anumānasya tu niścayātmakatvāt svata eva pramāṇyam |

apūrvagocaram

tenāyamarthaḥ- prathamata eva yadvijñānaṁ viṣaye pravṛttaṁ tadeva pramāṇam , na tu tatraiva paścādbhāvi jñānāntaramapi , gṛhitagrāhitvena tasyāprāmāṇyāt | yathā ghaṭaṁ nirvikalpakena jñānena dṛṣṭvā paścāttasminneva viṣaye ghaṭo'yamiti savikalpakaṁ jñānaṁ smaraṇarupam , yathā vā parvatādau dhūmaṁ dṛṣṭvā vahniratretyanumānajñānānantaraṁ punarapi tatraiva vahniratretyanumānajñānam|

indriyādera apramāṇam

samyagjñānaṁ pramāṇamityukte sāmarthyājjaḍasvabhāvasyendriyādeḥ paricchedakatvābhāvāt prāmāṇyaṁ nirastam paricchedakatvaṁ hi boddhṛtvam |tacca jñānasyaiva nijarupam | tatkathamajñānātmana indriyādeḥ svarupaṁ bhavitumarhatīti ||

pramāṇasya dvaividhyam , pratyakṣaśabdanirvacanaṁ ca

tad dvividhaṁ pratyakṣamanumānaṁ ceti | pratigatamakṣaṁ pratyakṣam | akṣamindriyaṁ cakṣuḥ śrotraghrāṇajihvākāyākhyam | tasmādutpannaṁ jñānaṁ pratyakṣamabhidhīyate | nanu yadyakṣāśritaṁ jñānaṁ pratyakṣaṁ tadā mānasādi vakṣyamāṇaṁ jñānatrayamindriyādanutpatteḥ pratyakṣaṁ na syāt? atrocyate- pratigatamakṣamiti yaduktaṁ tatpratyakṣaśabdasyāvyutpattimātranimittaṁ pratipāditam | pravṛttinimittaṁ tu pratyakṣaśavdasāyārthasākṣātkāritvameva ruḍhivaśādavagantavyaṁ paṅkajavat | tataḥ svasaṁvedanādikamapi jñānaṁ svasaṁvedanarupamartha sākṣātkarotīti pratyakṣaśavdavācyaṁ siddhyatīti ||

anumānaśabdanirvacanam

mīyate'rtho'neneti mānam | anuḥ paścādarthe | paścānmānamanumānam | liṅgagrahaṇaliṅgaliṅgisambandhasmaraṇayoḥ paścāt yadvijñānaṁ parvatādau dharmiṇi parokṣavastvālambakaṁ tadevānumānaśabdenābhidhīyate | etacca ruḍhivaśādavagantavyam |

pramāṇasaṁkhyāvipratipattiḥ

dvividhavacanena ekaṁ trīṇi catvāri pañca ṣaḍhiti vipratipattayo nirasyante | tathā hi - pratyakṣamevaikaṁ pramāṇamiti cārvākaḥ| pratyakṣamanumānaṁ śābdaṁ ceti sāṁkhyaḥ|

pratyakṣamanumānamupamānaṁ śābdaṁ ceti naiyāyikaḥ | pratyakṣamanumānaṁ śāvdamupamānamarthapattiriti prābhākaraḥ | pratyakṣamanumānaṁ śābdamupamānamarthapattirabhāvaśceti mīmāṁsakaḥ|

dvividhavacanena dvitve prāpte pratyakṣamanumānaṁ ceti punaryaduktaṁ tadanyathādvitvanirāsārtham| tathā hi vaiyāka raṇo brūte pratyakṣaṁ śābdaṁ ceti pramāṇadvayam ||

cārvākābhimatānumānāpramāṇyanirasanam

tatra anumānasya prāmāṇyamavaśyamabhyupagantavyaṁ cārvākeṇeti pratipādyate | tathā hi - sa khalu pratyakṣalakṣaṇaṁ parapratipādanāya praṇayati | parasya ca buddhirna pratyakṣā | kiṁ tarhi kāyavāgvyāpārādikāryādanumeyā | tato'nena kāryaliṅgajamanumānaṁ balādabhyupagataṁ syāt | paralokaniṣedhāya cānupalambhākhyaṁ sādhanamācaṣṭe| ato'sau svayamevānumānena pramāṇena vyavaharati, nānumānaṁ pramāṇamiti ca bruvan kathaṁ nāma nonmattaścārvākaḥ syāt ?

śabdopamānārthāpatyabhāvānāṁ pramāṇāntaratvanirasanam

śābdaṁ ca jñānaṁ bāhyārthāvisaṁvādakatvena pramāṇameṣṭavyam | avisaṁvādakatvaṁ ca sambandhamantareṇa na saṁgacchate | na ca śabdānāṁ bāhyārthena saha kaścitsambandho'sti| tathā hi - śabdārthayoḥ sambandho bhavan tādātmyaṁ tadutpattirarvā bhavet | tatra na tāvāttādātmyaṁ śabdārthayoḥ , atyantabhedena pratibhāsanāt | tādātmyaṁ hyekatvamabhidhīyate bhinnapratibhāsayorapyekatve svīkriyamāṇe gavāśvādīnāmapyekatvaprasaṅgaḥ| nāpi tadutpattiḥ | nāpi tadutpattiḥ , anvayavyatirekābhāvāt | tasmāt tadutpattirityevaṁ vaktuṁ na śakyate | tathā hi - śabdavyāpāramantareṇa svahetoreva mṛtpiṇḍadaṇḍasalilakulālacakrādeḥ sakāśādutpadyamāno ghaṭādirartho dṛśyate | śabdo'pi bāhyārtha vinaiva puruṣecchāmātreṇa tālvādivyāpārādevotpadyate|

atha tādātmyatadutpattibhyāmanya eva vācyāvācakatvalakṣaṇaḥ śabdārthayoḥ vāstavaḥ sambandhadho'sti | evaṁ tarhyasaṁketavido'pi puruṣasya śabdāduccaritānniyatā - rthapratītiḥ prāptā, yogyatā mātreṇaiva pradīpāt ghaṭādipratītivat na caitadasti|

tathā hi -abhinavo nālikeradvīpādāyātaḥ pumānagniśabdaṁ śrutvā'pyagniśavdānna kiñcidartha pratyetīti |

atha tāṁstān saṁketānapekṣya tattadarthapratyāyanayogya evāyaṁ śabdo jāyata ityucyate | tanna | na hyevamasya prāmāṇyamavatiṣṭhate | sarvatra saṁketasya yogyatvāt |tato na jñāyate kiṁ vivakṣitārthamāha, āhosvidanyaṁ veti |

astu vā anya eva kaścitsambandhaḥ | tathā ca so'pi kena sambandhena tayoḥ sambadhda iti praṣṭavyaḥ | anyena caturthena sambandheneti cet , caturtho'pi teṣu kena sambandhena sambaddhaḥ ? pañcamena kenaciccet , so'pi kenetyanavasthāyāṁ antyāsidhdau pūrveṣāmapyasiddhiḥ |

athāsambaddha eva śabdārthayoḥ samvandha iti cet | tanna | yo na sambaddhaḥ sa kathaṁ sambandho bhavati ghaṭasyeva paṭaḥ | atha vaktavyaṁ sambandhasya tādṛśa eva svabhāvaḥ, yena sambandhāntaranirapekṣa evaṁ paraṁ sambadhnāti? taduyuktam | pramāṇasidhde hi svabhāve nottaramabhidhīyate | yathāgnerevāyamīdṛśaḥ svabhāvo yaduta dāhakatvaṁ nāma nānyasyākāśādeḥ | sambandhasiddhau tu pramāṇaṁ kiñcinnirupayanto na paśyāmaḥ | na caivaṁ vaktavyaṁ śabdaśaktisvabhāvādeva śabdānāṁ niyatārthāvyabhicāritvamiti | tathā hi - yadi ghaṭa ityayaṁ śabdaḥ svabhāvādeva kambugrīvākāraṁ vārisaṁdhāraṇasamartha padārthamabhidadhāti, tatkathaṁ saṁketāntaramapekṣya puruṣecchayā turagādikamabhidadhyāt | na hi śālibījaṁ svahetoraṅkurajananasvabhāvamutpannaṁ saṁketāntamapekṣya gardabhaṁ janayituṁ samartha syāt | nāpyāptapraṇītaśabdānāṁ prāmāṇyamabhidhātumucitam | āptatvasyaiva niścetumaśakyatvāt | tathā hi - āptatvaṁ kṣiṇadoṣatvamucyate | kṣīṇadoṣatā ca paracittavṛttiḥ kācidabhidhīyate | paracittavṛttīnāṁ durlakṣyatvāt , kāyavāgvyāpārādikāryaliṅgasyānyathā'pi vṛttidarśanāt | sarāgā api vītarāgā iva ceṣṭanta iti nyāyātkathamāptatvaṁ niścīyatāmiti | samvandhadūṣaṇena ca vaidikaśabdānāṁ prāmāṇyaṁ nirastamiti pṛthaṅnoktam | kathaṁ tarhi sarvo'yamasandigdho laukiko vyavahāra iti cet | tathā tathā saṁketena vivakṣāvaśāditi na kācit kṣatiḥ | yathoktam ' vakturabhiprāyaṁ sūcayeyuḥ śabdā' iti ||

naiyāyikasammatasyopamānapramāṇasya nirasanam

naiyāyikasyopamānaprapañcaḥ | yaḥ pratipattā gāṁ jānāti na gavayam , sa ca apadiṣṭaḥ svāminā araṇyaṁ gatvā gavayamānayeti | sa ca gavayaśabdavācyamarthamajānāno vanecaramanyaṁ tajjñaṁ puruṣaṁ pṛṣṭavān , kīdṛśo gavaya iti | sa cāha yādṛśī gaustādṛśo gavaya iti|tasyāraṇyagatasya preṣyapuruṣasya atideśa vākyārthasmaraṇasahakāri gavayasārūpyajñānaṁ kartṛ ayamasau gavayaśabdavācyo'rtha iti pratipattiṁ falasvarupāṁ janayatpramāṇam | etaccāyuktam | yatprāmāṇyaṁ nāma viṣayavattayāṁ vyāptam | na cāsya nipuṇamapi nirupayanto viṣayaṁ saṁpaśyāmaḥ | tathā hi - samākhyā nāma sambandhaḥ tasya viṣayo varṇyate | sa ca paramārthato nāsti | dṛśyatve tasyānupalambhena bādhā | adṛśyatve tasya sattāsādhakaṁ pramāṇaṁ nekṣyate | kiṁ ca -sa hi sambandhaḥ sambadhibhyāṁ bhinno'bhinno vā |yadā bhinnastadā tayoḥ sambandhaḥ kena sambandheneti vācyam |

sambandhāntarakalpanāyāmanavasthā | athābhinnastadā sambandhināveva kevalau | na samākhyā nāma sambandhaḥ kaścit | atha sambaddhabuddhijanakatvaṁ sambandhaḥ | tanna yuktam | yataḥ sambaddhāvetāviti buddhiḥ svahetubalāt sambaddhavastudvayādapi sambhāvyamānā na sambandhāntaramākṣiptuṁ prabhavati||

mīmāṁsakasammatasyopamānapramāṇasya nirasanam

evaṁ mīmāṁsakopavarṇitasyāpi prāmāṇyaṁ nirākartavyam | tathā hi, sādṛśyaviśiṣṭaḥ piṇḍaḥ piṇḍaviśiṣṭaṁ vā sādṛśyamupamānasya viṣayastena varṇyate | na ca sadṛśavastuno'tiriktaṁ sādṛśyaṁ vyavasthāpayituṁ śakyate, pramāṇenāpratītatvāt | tathā hi - yadi sadṛśādatiriktaṁ sādṛśyaṁ dṛśyaṁ syāt tadā dṛśyānulambhagrastametat | athādṛśyaṁ tadā tatpratibadhdaliṅgābhāvāt anumānādapi kathaṁ tatsidhdiḥ | sādṛśyapratyayastu svahetostathotpannena sadṛśavastunā'pi kriyamāṇo ghaṭata iti na tatpratyayādapi tatsiddhiryuktā | upamānādeva sādṛśyasiddhiriti cet ? na | yataḥ pramāṇāntarasiddhayoreva sādṛśyapiṇḍaoyoryo viśeṣaṇaviṣeṣyabhāvastasyopamānaviṣayatvaṁ tena vādinā parikaldhdapyate | tatkathaṁ sādṛśyamātrasyāpyupamānāt siddhiriti||

arthāpattipramāṇanirasanam

arthāpatterapi prāmāṇyaṁ pṛthaṅnopapadyate| tathā hi pratyakṣādipratīto yo'rthaḥ sa yena vinā nopapadyate tasyārthasya kalpanamarthāpattirityarthāpatterlakṣaṇam | atredaṁ cintyate - yo'sau pramāṇadṛṣṭo'rthaḥ , tasya yadi parikalpyamānena parokṣārthena saha kaścittādāmyalakṣaṇaḥ tadutpattilakṣaṇo va pratibandho'sti tadā svabhāvaliṅgajā kāryaliṅgajā vā'sau pratipattirityarthāpattiranumānameva | atha nāsti pratibandhaḥ , tadānīmarthāpattiḥ pramāṇameva na bhavati, asambandhāt ghaṭātpaṭapratītivaditi ||

abhāvapramāṇanirasanam

abhāvasya svarupameva tāvannopalabhāmahe, kuta eva tasya prāmāṇyaṁ bhaviṣyati | tathā hi - pratyakṣādipramāṇānāmanutpattirabhāvākhyaṁ pramāṇaṁ mīmāṁsakairabhidhīyate | tatra keyamanutpattiḥ ? kiṁ prasajyavṛtyā pramāṇānutpattimātram ? atha paryudāsavṛtyā vastvantaram? vastvantaramapi jaḍarupaṁ, jñānarupaṁ vā? jñānamapi kiṁ jñānamātram ekajñānasaṁsargivastuno jñānaṁ vā ? tatra na tāvat prasajyarupo'bhāvo yujyate | tasya sarvaśaktiśūnyatvāt paricchedakatvaṁ vā kathaṁ bhavet ? ata eva kenāpi na tatpratidyate| yadāha paṇḍitacakracūḍāmaṇiḥ-

nābhāvaḥ kasyacitpratipattiḥ pratipattiheturvā |

tasyāpi kathaṁ pratipattiḥ iti|

nāpi jaḍarupam , jaḍasya paricchedakatvābhāvāt | na hi jaḍarupaṁ śakaṭādikaṁ ghaṭaṁ paricchinattīti kvāpi dṛṣṭaṁ śrutaṁ veti | nāpi jñānamātram , deśakālasvabhāvaviprakṛṣṭasyāpi sumeruśaṁkhacakravartipiśācāderapi jñānamātrādabhāvapramāṇādabhāvaprasaṅgāt| athaikajñānasaṁsargibhūtalādivastujñānamabhāvo'bhidhīyate tadā pratyakṣaviśeṣasyaivābhāvapramāṇanāmaka raṇānnāsmākaṁ kācid vipratipattiriti | sthitametat- pratyakṣamanumānaṁ ceta dvividhameva pramāṇamiti||

pratyakṣalakṣaṇam

tatra pratyakṣaṁ kalpanāpoḍhamabhrāntam | pūrvoparamanusandhāya śabdasaṅkīrṇākārā pratītirjalpākārā vā kalpanā | yathā vijñapuruṣasya so'yaṁ ghaṭa iti pratītiḥ| bālamūkatiryagādīnāmantarjalpākārā parāmarśarupā vā pratītiḥ | tathā coktam -

abhilāpasaṁsargayogyapratibhāsapratītiḥ kalpanā ||iti||

nanu bālamūkādīnāmantarjalpākāraṁ kalpanājñānamastīti kuto niścetavyamiti ceta, vikalpakāryādiṣṭāpādānaparihārāt | dṛṣṭaṁ cedaṁ kārya bālamūkādau , īptisatārthasvīkaraṇamanīpsitārthatyajanaṁ nāma | bālamūkādivijñānasya kalpanātva sūcanena bhattoktālocanājñānaṁ savikalpakamiti pratipāditaṁ bhavati| kiṁ punaḥ kāraṇaṁ kalpanāvibhramātmakaṁ ca jñānaṁ pratyakṣaṁ na syāditi ceta ? na | arthasvarupasākṣākāri hi jñānaṁ pratyakṣamiti sarvoṣāṁ prasiddham | na ca kalpanāvibhramāvartharupaṁ sākṣātkartu samarthau | tathā hi - arthagrāhakaṁ jñānamarthasya kāryam | artho hi grāhyatvāt jñānasya kāraṇam | yathoktam -

bhinnakālaṁ kathaṁ grāhyamiti cet grāhyatāṁ viduḥ|

hetutvameva yuktijñā jñānākārārpaṇakṣamam ||iti||

kalpanājñānamarthamantareṇa vāsanāmātrādevopajāyamānaṁ kathamarthasya kāryaṁ syāt , arthena saha anvayavyatirekābhāvāt | na hi yadantareṇāpi yadbhavati tattasya kāryam , atiprasaṅgāt | yadi punaḥ kalpanājñānamarthādupajāyeta , tenāpi tadā ghaṭādirartho dṛśyeta | tataścāndhasyāpi rupadarśanaprasaṅgaḥ, na cāsti | ata evoktam -

śābdyāṁ buddhāvarthasya pratyakṣa iva pratibhāsābhāvād nāsti kalpanāyā arthasākṣātkāritvam iti||

etena yaduktaṁ pareṇaḥ

na so'sti pratyayo loke yaḥ śabdānugamādṛte |

anuviddhamiva jñānaṁ sarva śabdena bhāsate||iti||

tannirastam | tathāhi - ghaṭe purovartini uccāryamāṇe tatsamīpavarti bhūtalādijñānamuccāraṇarahitamanubhūyata eva | na ca tathā tatra śabdānugato'sti | na ca vikalpadvayaṁ sakṛditi nyāyāt ||

bhrāntajñānam

bhrāntamapi jñānaṁ nārthasākṣātkāri | bhrāntaṁ hyarthakriyāsamarthae vastuni viparyastamucyate | arthakriyākṣamaṁ ca vastusvarupaṁ deśakālākāraniyataṁ, tatkathaṁ viparītapratibhāsinā bhrāntena jñānena sākṣātkriyate | yadāha ācāryaḥ-

'timirāśubhramaṇanauyānasaṁkṣobhādyanāhitavibhramaṁ jñānaṁ pratyakṣam'||iti||

etena kāmalinaḥ śukle śaṁkhe pītapratibhāsi jñānaṁ , bhramādalātādau cakrādinirbhāsi jñānaṁ , gacchantyāṁ nāvi sthitasya caladavṛkṣādibhrāntijñānaṁ , gāḍhamarmaprahārahatasya jvalatstambhādipratibhāsi jñānaṁ ca , na pratyakṣamityuktaṁ bhavati |

nanu yadi nāma tajjñānaṁ na pratyakṣaṁ kathaṁ tato vastuprāptiriti cet? na tato vastuprāptiḥ | kiṁ tarhi , jñānāntarādeveti kecit |

pratyakṣasya cāturvidhyam

taccaturvidhaṁ- indriyajñānaṁ mānasaṁ svasaṁdanaṁ yogijñānaṁ ceti |

indriyapratyakṣam

cakṣurādīndriyapañcakāśrayeṇotpadyamānaṁ bāhyarupādipañcaviṣayālambanamindriyapratyakṣam | tatra cakṣurvijñānaṁ rupaviṣayam | śrotravijñānaṁ ca śabdaviṣayam | ghrāṇavijñānaṁ gandhaviṣayam | jihvāvijñānaṁ rasaviṣayam | kāyavijñānaṁ sparśaviṣayam|

indriyapratyakṣasya vyapadeśaḥ

indriyapratyakṣamiti vyapadeśasyāsādhāraṇakāraṇatvaṁ nimittam| yathā bherīśabdo yavāṅkara iti | idaṁ ca pratyakṣaṁ yatraiva svānurupaṁ vikalpaṁ janayati tatraiva pramāṇam , sāṁvyāvahārika pramāṇādhikārāditi ||

mānasapratyakṣam

svaviṣayānantaraviṣayasahakāriṇendriyajñānena samanantarapratyayena janitaṁ manovijñānaṁ mānasam | svaśabdenendriyajñānamabhimatam , svasya viṣayo bāhyo ghaṭādiḥ, svaviṣayasyānantaraḥ , svaviṣayānantaraḥ indriyajñānaviṣayādanyo ghaṭādirdvitīyakṣaṇaḥ | tena sahakāriṇā saha militvā , indriyajñānenopādānena samanantarapratyayasaṁjñakena yajjanitaṁ tanmānasaṁ pratyakṣamucyate | tato yaduktaṁ pareṇātraḥ

' gṛhītagrāhitvamandhabadhirādyabhāvo yogijñānasyāpi mānasatvaprasaṅgaḥ avyavahāritvaṁ ca ' iti |

tannirastam | tathā hi - dvitīyakṣaṇagrahaṇāt gṛhītagrāhitvasya nirāsaḥ | indriyajñānajanitaṁ hi mānasam | andhādīnāṁ rupādiviṣayālambanakamindriyajñānameva nāsti , kutastajjanitaṁ mānasaṁ bhaviṣyati ? ato nāstyandhabadhirādyabhāvadoṣaḥ |samanantarapratyayaviśeṣaṇena yogijñānasya mānasapratyakṣaprasaṅgo nirastaḥ| samanantarapratyayaśabdaḥ svasantānavartinyupādānajñāne ruḍhyā prasidhdaḥ | tato bhinnasantānavartiyogijñānamapekṣya pṛthagjanacittānāṁ samanantarapratyayavyapadeśo nāstīti| avyavahāritvaṁ punarasya dūṣaṇaṁ nopapadyate, sūkṣmakālabhāvitvena pṛthagjanairdurlakṣyatvāt | vyavahārāṅgetvena cānabhyupagamāt | āgamaprasiddhaṁ hi mānasapratyakṣam | na tvasya niścāyakaṁ kiñcidasti | yathoktaṁ bhagavatā-

' dvābhyāṁ bhikṣavo rupaṁ gṛhyate, cakṣuṣā tadākṛṣṭenamanasā ca ' iti ||

nanu ca vyavahārānupayuktamupadarśayituṁ kiṁ prayojanam , īdṛglakṣaṇayuktaṁ yadi mānasaṁ pratyakṣaṁ syāt , na kaściddoṣaḥ syādityāgamasyāpi viśuddhiranena pratipāditeti prayojanam ||

svasaṁvedanapratyakṣam

cittacaittānāṁ svasaṁvedanatvasamarthanam

sarvacittacaittānāmātmasaṁvedanaṁ svasaṁvedanam | cittaṁ vastumātragrāhakaṁ jñānam | citte bhāvāḥ caittāḥ , vastuno viśeṣarupagrāhakā sukhaduḥkhopakṣālakṣaṇāḥ | teṣāṁ sarvacittacaittānāmātmā saṁvidyate yena rupeṇa tatsvarupamātmasvarupasākṣatkāritvāt svasaṁvedanaṁ pratyakṣaṁ kalpanāpoḍhamabhrāntaṁ cocyate|

atra kecidāhuḥ -na ca cittacaittānāṁ svasaṁvedanaṁ ghaṭate , svātmani kriyāvirodhāt | na ca suśikṣito'pi naṭavaṭuḥ svaskandhamāroḍhuṁ śaknoti | na hi tīkṣṇā'pyasidhārā svamātmānaṁ chinatti | na hi prajjvalito'pi vahniskandha ātmānaṁ dahati | tathā cittacaittamapi kathamātmānaṁ vedayatu vedyavedakabhāvo hi karmakartṛbhāvaḥ |

karmakartṛtvaṁ ca loke bhedenaiva prasiddham , vṛkṣasūtradhārayoriva | atrocyate , na karmakartṛbhāvena vedyavedakatvaṁ jñāne varṇyate | kiṁ tarhi ? vyavasthāpyavyavasthāpakabhāvena |

yathā pradipa ātmānaṁ prakāśayati tathā jñānamapi jaḍapadārthavilakṣaṇaṁ svahetoreva prakāśasvabhāvamupajāyamānaṁ svasaṁvedanaṁ vyavasthāpyate | tathā coktam -

vijñānaṁ jaḍarupebhyo vyāvṛttamupajāyate|

iyamevātmasaṁvittirasya yā'jaḍarupatā ||iti||

alaṅkārakāreṇāpyuktam -

kalpitaḥ karmakartrādiḥ paramārtho na vidyate |

ātmānamātmanaivātmā nihantīti nirucyate ||iti||

na ca cittacaittānāṁ jñānāntareṇa prakāśyatvaṁ yujyate | tathā hi - na tāvatsamānakālabhāvinā jñānāntareṇa cittacaittaṁ prakāśyata iti ghaṭate, upakāryopakārakatvābhāvāt , savyetaragoviṣāṇayoriva | nāpi bhinnakālabhāvinā , kṣaṇikatvāt , prakāśitavyasyaivābhāvāt | api ca yadi jñānaṁ svasaṁvedanaṁ na syāt , tadā jñāto'rtho iti durghaṭaḥ syāt , ' nāgṛhītaviśeṣaṇā budhdirviśeṣye varttate ' iti nyāyāt | tathā hi -artho viśeṣyaḥ , jñāta iti viśeṣaṇam , jñāto jñānena viśeṣita iti | jñānaṁ cetsvayaṁ na bodharupeṇa pratītaṁ , tatkathaṁ jñānena viśeṣito'rthaḥ pratīyatām | na hi daṇḍāgrahaṇe daṇḍino grahaṇaṁ yuktisaṅgatam | yaccoktaṁ trilocanena -

cakṣuṣo'grahaṇe'pi cākṣuṣaṁ rupaṁ pratīyate , tathā

jñānānavabodhe'pi jñāto'rtha iti ghaṭiṣyate ||iti||

tadasādhu | prastute'nupayogāt | na hi cakṣū rupasya viśeṣaṇam | kiṁ tarhi ? cakṣurvijñānāsaṁvedane kathaṁ jñāyatāmiti codyamakṣatameva ||

yatpunarjñānasya parokṣatvapratipādanāya bhaṭṭenoktam -

yathā ca rupādiprakāśanyathānupapatyā indriyasidhdiḥ , tathā jñānasyāpi sidhdiriti|

tathā hi tatra bhāṣyam -

na hi kaścidajñāte'rthe budhdimupalabhate | jñāte tvanumānādavagacchati iti||

vārtikaṁ ca -

tasya jñānaṁ tu jñātatāvaśāt |iti|

jñātatā ca viṣayaprākaṭyamucyate | tadapi cāyuktam | prākaṭyasyāpi jñānāt pṛthaktve viṣayarupatāyāṁ vyaktau jaḍarupatā , jaḍasya prakāśāyogāt | viṣayādarthāntaratve jaḍatāyāṁ tasyāpi svataḥ prakāśāyogāt | prākaṭayāntareṇa nu prakāśane'navasthā syāt | jñānasvabhāvatve prākaṭayasyāpi parokṣatvaprasaṅgaḥ | tato'vaśyaṁ jñānasya svasaṁvedanatvamabhidheyam | anubhavaprasidhdaṁ ca svasaṁvedanatva kathamapahnuyeta ? taduktam -

apratyakṣopalambhasya nārthadṛṣṭiḥ prasidhdayati | iti|

alaṅkārakāro'pyāha -

parokṣaṁ yadi tat jñānaṁ jñātamityeva tatkutaḥ |

parokṣasya svarupaṁ kastasya lakṣayituṁ kṣamaḥ ||iti||

nanu sarvajñānānāṁ svasaṁvedanapratyakṣatve ghaṭo'yamityādivikalpajñānasya nirvikalpakatvaṁ, pītaśaṅkhādijñānasyābhrāntatvaṁ ca kathaṁ na bhavet ? ucyate - vikalpajñānamapi svātmani nirvikalpameva | ghaṭo'yamityanena bāhyamevārtha vikalpayati , na tvātmānam | taduktam -

śabdārthagrāhi yadyatra jñānaṁ tattatra kalpanā |

svarupaṁ ca na śabdārthastatrādhyakṣamato'khilam ||iti||

bhrāntamapyātmanyabhrāntaṁ svaprakāśarupeṇaivāvabhāsanāt | asadviṣayatvācca bhrāntirucyate | taduktam -

svarupe sarvamabhrāntaṁ pararupe viparyayaḥ |iti||

tasmādanyathā prakāśāsidhdeḥ yadyamī prakāśante , tadā svahetoreva prakāśasvabhāvādutpannāḥ santaḥ prakāśanta iti svīkartavyam ||

yogipratyakṣanirupaṇam

bhūtārthabhāvanāprakarṣaparyantajaṁ yogijñānaṁ ceti | yogaḥ samādhiḥ , cittaikāgratālakṣaṇaḥ | niśśeṣavastutatvavivecikā prajñā| yogo'syāstīti yogī | yogino yat jñānaṁ tatpratyakṣam | kīdṛśaṁ taditi cet ? bhūtārthabhāvanāprakarṣaparyantajam |bhūtārthaḥ pramāṇopapannārthaḥ | bhāvanā punaḥ punaścetasi samāropaḥ | bhūtārthabhāvanāprakarṣaparyantājjātaṁ yadvijñānaṁ tat kalpanāpoḍhabhrāntam | bhūtārthaścaturāryasatya duḥkhasamudayanirodhamārgasaṁjñakam , pañcaskandhasvabhāvaṁ kṣaṇikaśūnyanirātmakaduḥkhādirupatayā pratipattavyam | yatsat tat kṣaṇikamityādyanumānena pramāṇopapannamupagantavyamiti ||

nanu bhāvanā vikalpaḥ , vikalpaścāvastuviṣayaḥ , tatkathaṁ vastunaḥ sphuṭībhāvo bhavatu | kathaṁ vā vikalpo nirvikalpatāṁ vrajet ? kṣaṇikaṁ ca citaṁ kathamekāgrībhavati? viśeṣaśca kasya kena vā kriyatām ? śarīrī ca rāgādivirahānmuktaśceti sarvamasaṁgatam | atrocyate - avastuviṣayo'pi vikalpo vastvadhyavasyatīti bhāvanāto vastuna evātra sphuṭībhāvaḥ | na ca vikalpa eva nirvikalpakaḥ, kiṁ tu vikalpānnirvikalpakasyodayaḥ | anubhavasidhdaṁ caitat bhāvayatāṁ nirvikalpakapratibhāsanaṁ , kāmaśokādivat | na hi dṛṣṭe kiñcidanupapannaṁ nāma | kṣaṇikamapi cittaṁ sajātīyakṣaṇeṣu grahaṇapravīṇatvāt ekāgramucyate | kṣaṇikatvanaiva viśeṣotpattiḥ , na tu nityatvena , nityasyānādheyātiśayatvāt yaduktam -

nityaṁ tamāhurvidvāṁso yaḥ svabhāvo na naśyati|

tasya śaktiraśaktirvā yā svabhāvena saṁsthitā|

nityavādapi kiṁ tasya kastāṁ kṣapayituṁ kṣamaḥ ||iti||

yattu śarīritve sukhaduḥkhayorbhāvādanugrahanigrahāt śarīrī rāgādivirahānmukta śceti vighaṭanamuktaṁ , tadayuktam | na hi śarīraṁ rāgādihetuḥ , kiṁ tu avidyā | anitye nityamiti , anātmanyātmeti , duḥkhe sukhamiti, aśucau śuciteti , caturvipayāsasvabhāvā mithyopalabdhiḥ | ata eva viṣayasukhatṛṣṇā syāt | ātmānaṁ nityaṁ paśyata eva sukhābhikāṅkṣaṇādisukhaheturātmīyaḥ syāt | eṣu cā''saṅgo rāgaḥ | etatpratibandhāśca dveṣādayaḥ | tasmādavidyaiva mūlaṁ rāgāderna tu śarīram | satyapi śarīre yadyavidyā na syāt , kuta eva rāgādiyogāḥ ? tasmājjīvaccharīre satyapi avidyāvirahāt sarvasaṅgavirahalakṣaṇā muktirvītarāgāṇāṁ bhavatīti sarvaṁ susthitam |

pratyakṣasya svalakṣaṇāviṣayatvasamarthanam

tasya viṣayaḥ svalakṣaṇam | tasya caturvidhasya pratyakṣasya svalakṣaṇaṁ viṣayo boddhavyaḥ | svalakṣaṇamityasādhāraṇaṁ vastusvarupaṁ deśakālākāraniyatam | etenaitaduktaṁ bhavati- ghaṭādirudakādyāharaṇasamartho deśakālākāraniyataḥ puraḥ prakāśamāno'nityatvādyanekadharmāntarodāsīnaḥ pravṛttiviṣayaḥ sajātīyavijātīyavyāvṛttaḥ svalakṣaṇamityarthaḥ |

ayogānyogavyavacchedayoḥ bhedaḥ

nanu yadi svalakṣaṇameva pratyakṣasya viṣayo na sāmānyaṁ tadānīṁ dhūmadahanasāmānyayorvyāptiḥ kathaṁ pratyakṣeṇa gṛhyatām ? nāyaṁ doṣaḥ | yato'yogavyavacchedena svalakṣaṇaṁ tasya viṣaya eva , na tvanyayogavyavacchedena svalakṣaṇameva tasya viṣaya iti | kiṁ tarhi , sāmānyamapyasya viṣayaḥ |

pramāṇa phala vyavasthā

dvividho hi pramāṇasya viṣayaḥ grāhyo'dhyavaseyaśca | tatra pratyakṣasya pratibhāsamānaṁ svalakṣaṇam eko grāhyaḥ | adhyavaseyastu pratyakṣapṛṣṭhabhāvino vikalpasya pratibhāsamānaṁ sāmānyameva | tacca sāmānyaṁ dvividham , ūrdhvatālakṣaṇaṁ tiryaglakṣaṇaṁ ceti | tatraikasyāmeva ghaṭādivyaktau sajātīyavyāvṛttāyāmanekakṣaṇasamudāyaḥ sāmānyaṁ ūrdhvatālakṣaṇaṁ sādhanapratyakṣasya viṣayaḥ | vijātīyavyāvṛttāstvanekavyaktayaḥ tiryaksāmānyaṁ vyāptigrāhakapratyakṣasya viṣayaḥ | anumānasya tu sāmānyaṁ grāhyaṁ , adhyavaseyastu svalakṣaṇameva | pratyakṣasya svalakṣaṇaviṣayapratipādane paroktāḥ ṣaṭ padārthā na viṣayā ityuktam yathā - avayavidravyaṁ , guṇaḥ, karma, sāmānyaṁ, viśeṣaḥ, samavāyaśceti| na caiṣāṁ pratyakṣe jñāne pratibhāso'sti | na cāpratibhāsamāno viṣayo yujyate, atiprasaṅgāt | tathā hi - ghaṭādau paridṛśyamāne pūrvāparādibhāgaṁ vihāya nānyatkiñcidekamavayavidravyamupalabhāmahe | yadāha nyāyaparameśvaraḥ -

bhāgā eva hi bhāsante sanniviṣṭāstathā tathā|

tadvānnaiva punaḥ kaścidvibhāgaḥ sampratīyate ||iti||

evaṁ guṇakarmādīnāṁ ca duṣaṇaṁ pratyetabyam ||

pramāṇaphalāvabodhaḥ

nanu pramitirupāṁ kriyāṁ phalabhūtāṁ niṣpādayajjñānaṁ pramāṇamiti prasiddham | tatra kā'sau pramitiḥ , yāṁ janajjñānaṁ pramāṇamiti cet ? ucyate -iha nīlāderarthāt jñānaṁ dvirupamutpadyate nīlākāraṁ , nīlabodhasvabhāvaṁ ca | tatrānīlākāravyāvṛtyā nīlākāraṁ jñānaṁ pramāṇam | anīlabodhavyāvṛtyā nīlabodharupaṁ pramitiḥ | saiva phalam | yathoktam -

arthasārupyamasya pramāṇam ,

arthādhigatiḥ pramāṇaphalam | iti||

etacca vikalpapratyayena bhinnaṁ vyavasthāpyate paramārthatastu nāstyeva bhedaḥ | yathoktam -

tadeva pratyakṣaṁ jñānaṁ pramāṇafalam | iti||

pramāṇatatphalayorabhedaḥ

sākāraṁ cedaṁ jñānameṣṭavyam | yadi punaḥ sākāraṁ jñānaṁ neṣyate , tadā'nākāratvena sarvatra viṣaye tulyatvāt vibhāgena viṣayavyavasthā na sidhyati| yatpunaḥ kecidāhuḥ-pūrvaṁ jñānaṁ pramāṇaṁ uttaraṁ jñānaṁ pramāṇaphalamiti , tanna yuktam | tathā hi prathamakṣaṇabhāvi tāvajjñānaṁ pramāṇaphalabhūtasya dvitīyajñānasyānutpatteḥ ,phalabhūtajñānotpattau ca pūrvasya kṣaṇikatvena vināśāt kathaṁ ghaṭādiviṣayaṁ jñānaṁ pramāṇaṁ bhavati ? nāpi samānakālabhāvi jñānaṁ phalamucitam , upakāryopakārakatvābhāvāt , savyetaragoviṣāṇayoriva |[tasmāt paramārthataḥ pramāṇaphalayornāsti bhedaḥ| kālpanikastu vyāvṛttikṛto bhedaḥ vikalpabuddhau vyavasthāpyate] ||

iti tarkabhāṣāyāṁ pratyakṣaparicchedaḥ prathamaḥ samāptaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2007

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

2 svārthānumānam

svārthānumānam

anumānasya dvaividhyam svārthānumānalakṣaṇam

anumānaṁ dvividham - svārthaṁ parārthaṁ ca | svasmai yattat svārthamanumānaṁ jñānātmakam | parvatādau dharmiṇi dhūmādikaṁ dṛṣṭvā yasya pratipattuḥ vahnijñānamutpadyate, sa eva tena jñānena parokṣamarthaṁ pratipadyate nānya iti svārthānumānamucyate | parasmai yattat parārtham | parārthānumānaṁ vacanātmakam | trirupaliṅgapratipādakaṁ vacanaṁ paraṁ pratipādayati jñāpayatīti kṛtvā vacanamapyanumānaśabdenocyate, upacārāt , yathā āyurghṛtamiti |

anumānasya kāryam

tatra svārtha trirupaliṅgādyadanumeye jñānam | rupatrayayuktālliṅgādanumeye parokṣaviṣaye yad jñānaṁ rpatipatturutpadyate , tat svārthānumānam | tacca dharmaviśeṣa sambandhitayā sādhyāvinābhāvitvaniścaya ityeke | agnyadhyavasāya ityanye |

liṅgasya trirupatvam

samprati liṅgasya trirupatvamucyate - anumeye satvameva niścitam | anumeye parvatādau dharmiṇi liṅgasyāstitvameva niścitaṁ , tadekaṁ rupaṁ pakṣadharmatāsaṁjñakam | atra sattvagrahaṇenāsidhdasya nirāsaḥ , yathā -anityaśśabdaścākṣuṣatvāt , cākṣuṣatvaṁ cakṣurvijñānagrāhyatvamucyate , tacca śabde dharmiṇi nāsti | evakāreṇa pakṣaikadeśāsidhdasya nirāsaḥ , yathā digambaraprayogaḥ - cetanāstaravaḥ svāpāt | patrasaṅkocalakṣaṇo hi svāpaḥ , sa ca sarveṣu taruṣvasidhdaḥ | niścitagrahaṇena sandigdhāsiddhasya nirāsaḥ , yathā - agniratra vāṣpāditvena sandihyamānād bhūtasaṁghātāt | satvaśabdātpaścādevakāreṇa asādhāraṇasya nirāsaḥ , yathā- anityaśśabdaḥ śrāvaṇatvāt ghaṭavat ||

sapakṣanirupaṇam

sapakṣa eva sattvaṁ niścitamiti vartate| samānaḥ pakṣaḥ sapakṣaḥ | pakṣeṇa saha sadṛśo dṛṣṭāntadharmītyarthaḥ | sapakṣa eva satvaṁ niścitamityanvayasaṁjñakaṁ dvitīyaṁ rupam | atra sattvagrahaṇena virudhdasya nirāsaḥ , yathā - śabdo nityaḥ kṛtakatvāt ghaṭavat | kṛtakatva hi nityatvavipakṣeṇānityatvena vyāptamiti virudhdamucyate | evakāreṇa sādhāraṇasya nirāsaḥ , yathā - nityaśśabdaḥ prameyatvāt ghaṭavat | prameyatvaṁ hi vikalpaviṣayīkṛtatvam , tacca sapakṣe ākāśādau vipakṣe ca ghaṭādau sarvatrāstīti sādhāraṇamucyate | sattvaśabdāt pūrvasminnevakāreṇa sarvasapakṣāvyāpino'pi prayatnānantarīyakasya hetutvaṁ kathitam | yathā - anityaśśavdaḥ prayatnānantarīyakatvādghaṭavadvidyudvat | niścitagrahaṇena sandigdhānvayasya nirāsaḥ , yathā - asarvajño'yaṁ kaścit vaktṛtvādiṣṭapuru ṣavat | iṣṭapuruṣe sapakṣe ca vaktṛtvamasarvajñatvena vyāptamavyāptaṁ vā na jñāyate ||

vipakṣanirupaṇam

asapakṣe cāsattvameva niścitam | na sapakṣo'sapakṣaḥ | tatrāsattvameva niścitaṁ vyatirekasaṁjñakaṁ tṛtīyaṁ rupam | atrāpyasattvagrahaṇena virudhdasya nirāsaḥ | yathā nityaśśabdaḥ kṛtakatvādghaṭavat | virudhdo hi vipakṣe'sti | evakāreṇa sādhāraṇasya vipakṣaikadeśavṛtternirāsaḥ | prayatnānantarīyakatve sādhye anityatvaṁ vipakṣaikadeśe vidhudādāvasti | ākāśādau nāsti | tato niyamenāsya nirāsaḥ | asattvavacanātpūrvasminnavadhāraṇe ayamarthaḥ syāt | vipakṣa eva yo nāsti sa hetuḥ | tathā ca prayatnānantarīyakatvaṁ sapakṣe'pi nāsti , tato na hetuḥ syāt , tataḥ pūrva na kṛtamiti | niścitagrahaṇena sandigdhavipakṣavyāvṛttikasya nirāsaḥ | yathā'vītarāgo'yaṁ puruṣo vaktṛtvāt , rathyāpuruṣavat | yatrā'vītarāgatvaṁ nāsti tatra vaktṛtvamapi nāsti , yathopalakhaṇḍe | yadi nāma pāṣaṇakhaṇḍādubhayaṁ vyāvṛttaṁ tathāpi na jñāyate kimavītarāgatvanivṛttyā pāṣaṇakhaṇḍādbaktṛtvaṁ nivṛttaṁ , ahosvit svata eveti| tataḥ sandigdhavyatireko'yamanaikāntikaḥ | asattvaśabdātpaścādevakāreṇa vipakṣaikadeśavṛtternirāsaḥ | yathā - prayatnānantarīyakaśśabdo'nityatvāt | anityatvaṁ vipakṣādākāśānnivṛttaṁ , na vidyutaḥ | tato vipakṣaikadeśavṛttitvamasya||

trirupaprayogasya prayojanam

nanu sapakṣa eva sattyamityukte sāmārthyādevāsapakṣe cāsattvamiti gamyate | tatkimarthamubhayorupādanamiti cet ? vipakṣaniyamārthamiti pūrvavṛddhāḥ | te ca trividha eva vipakṣo bhavatīti manyante | sādhyābhāvamātraṁ , sādhyādanyaḥ , sādhyena saha viruddhaśca prayoganiyamārthamiti kecit | anvayaprayogo vyatirekaprayogo vā niyamavānekaḥ prayoktavyo na dvāvapīti | sādharmyavaidharmyaprayogasūcanārthamiti kecit|

triliṅgabhedanirupaṇam

trirupāṇi ca trīṇyeva liṅgāni | trīṇi rupāṇi yeṣāṁ tāni trirupāṇi trīṇyeva liṅgāni | kāryaṁ trirupaṁ liṅgam | svābhāvastrirupaṁ liṅgam | anupalabdhistrirupaṁ liṅgam | sādhanaṁ jñāpakaṁ heturvyāpyaṁ ceti liṅgāparanāmāni |

kāryahetunirupaṇam

tatra kāryaṁ yathā - yatra dhūmastatrāgniryathā mahānase , dhūmaścātreti | vyāptipakṣadharmatāsaṁjñakaṁ dvayavayavameva sādhanavākyaṁ saugatānām | anye tu pratijñāhetudṛṣṭāntopanayanigamanaṁ ceti pañcāvayavaṁ sādhanavākyamāhuḥ | upanyāsaścedṛśaḥ - agniratra , dhūmāt , yatra dhūmastatrāgniryathā mahānase , tathā cāyaṁ, tasmādagniriti | etaccāyuktam | pratijñāvacanamātrātsambandharahitāt sādhyapratipatterayogāt | sambandhābhāvastu śabdārthayoḥ sambandhadūṣaṇe pratipāditatvānna punarucyate | pratijñāmantareṇa pañcapyantahetuprayogo'pyayuktaḥ | hetuṁ vinopanayadṛṣṭāntāvapyayuktau| yatra pratijñaiva nāsti tatra pratijñāyāḥ punarvacanaṁ nigamanaṁ kuto bhaviṣyatīti sarvamāmūlaṁ viśīrṇam |

kāryasambandhanirapaṇam

ayaṁ ca kāryaheturviṣayabhedena trividhaḥ | agnyādau sādhye dhūmādiḥ trividhapratyakṣānupalambhena niścetavyaḥ | cakṣurādau sādhye jñānaṁ kādācitkāryotpādānniścīyate | rupādau sādhye rasādirekasāmagryadhīnatayā niścīyate, yathā mātuluṅgafale rasādrūpānumānam | na rupādrasānumānam | atra rupe janayitavye pūrvakaṁ rupamupādānam | rasastu sahakārikāraṇam | pūrvapuñjāduttarapuñjasyotpattau nyāya eṣaḥ | nanūpādānasahakārikāraṇayoranvayavyatirekānuvidhānasya kāryaṁ prati tulyatvātko bhedaḥ ? ucyate, yadvikriyayā yanniṣpattirekasantāne tatkāryaṁ pratipūrvakamupādānam | yatsantānāntare viśeṣodayanimittaṁ tatsahakārikāraṇam | yathā śālyaṅkure janayitavye śālibījamupādānam , kṣitisalilādi tatra sahakāri | tadevaṁ kāryahetustadutpattisambandhād gamaka iti sthitam ||

svabhāvahetunirupaṇam

svabhāvo yathā - svabhāvaḥ svasattāmātrabhāvini sādhyadharme yo heturucyate sa tasya sādhyasya dharmasya svabhāvo boddhavyaḥ | yathā- vṛkṣavyavahārayogyo'yaṁ śiṁśapāvyavahārayogyatvāt | ayamiti puraḥ paridṛśyamānaḥ padārtho dharmī | śiṁśapāvyavahārayogyatvāditi hetuḥ | śiṁśapāvyavahārayogyatvāditi ko'rthaḥ ? śākhāpatravarṇasaṁsthānaviśeṣavyavahārayogyatvādityarthaḥ | vṛkṣavyavahārayogyatvaṁ sādhyam| nanvekatve sādhyasādhanabhāvo na yuktaḥ , pratijñārthaikadeśatvāt ? na | abhede'pi kaścitpratipattā śiṁśapāvyavahāraṁ kṛtvā tatra vṛkṣavyavahāraṁ prāk kṛtamapi vyāmohāt kiñcidāropya punarna karoti | sa idāniṁ svabhāvahetunā vyavahāryate | tasmādetayoḥ paramārthata ekatve'pi vikalpabuddhau vyāvṛttisamāśrayeṇa samutpannāyāṁ bhedena pratibhāsanāt sādhyasādhanatvaṁ na virudhyata iti ||

anupalabdhihetunirupaṇam

anupalabdhiryathā - nāstīha pradeśe ghaṭaḥ , upalabdhilakṣaṇaprāptasyānupalabdheḥ | upalabdhilakṣaṇaprāptasyeti dṛśyasyetyarthaḥ |

nanvasataḥ kathaṁ dṛśyatā ? ekendriyajñānagrāhyo pradeśādāvupalabhyamāne yadi ghaṭaḥ syāt dṛśya eva bhavediti| upalambhapratyayāntarasākalyāt dṛśtayā sambhāvitaḥ , na tu dṛśya eva | tasyānupalabdheriti hetuḥ | sa caikajñānasaṁsargipadārthādekajñānasaṁsargipadārthopalambhādvā niścīyata iti tadubhayaṁ karmakartṛbhāvena paryudāsavṛttyā anupalabdhirucyate , na tu prasajyavṛttyā upalabdhinivṛttimātram | taddhi svayameva na kiñciditi kathaṁ sādhanaṁ syāt | nāpi pratiṣedhyādanyasya jñānamātram , rupopalambhādapi nāraṅgarasaniṣedhaprasaṅgāt | tasmānniṣedhyādanyadviśiṣṭameva vastudvayaṁ pradeśaḥ pradeśajñānaṁ vā'nupalabdhiriti sthitam |

abhāvo'sādhyaḥ

ata evābhāvo na sādhyate | tasya ghaṭaviviktapradeśagrāhiṇā pratyakṣeṇaiva siddhatvāt | abhāvavyavahārastu mṛḍhaṁ prati anulambhena sādhyate | tathā hi - kaścinmūḍho rajaḥprabhṛtiṣu sāṁkhyaprasiddheṣu guṇeṣvanupalambhena pravarttitābhāvabyavahāro'pi punaḥ sarvaṁ sarvatrāstīti svasiddhāntābhyāsāt kvā'pi pradeśādau ghaṭānupalambhe satyapi nābhāvavyavahāraṁ karotītyanupalambhena trividho vyavahāraḥ kāryate | tatra niḥ śaṅkagamanāgamanalakṣaṇaḥ kāyiko vyavahāraḥ | ghaṭo nāstīti vācikaḥ | īdṛśa eva antarjalpākāro mānasikaśceti |

anupalabdhertādātmyatadutpattisambandhanirupaṇam

anupalambhasya karmadharmapakṣe sādhyena saha [sādṛśye] tādātmyalakṣaṇa eva sambandho boddhavyaḥ | kartṛdharmapakṣe tu tadutpattiḥ | tathā hi - ghaṭaviviktapradeśaḥ pradeśajñānaṁ vā'nupalabdhirityuktam | asadvyavahārayogyatvaṁ ca tasya svabhāvaḥ [na kārya ] jñānaṁ tu pradeśasya kāryamiti ||

anupalabdhervyapadeśaḥ

nanu yadyanupalabdherapi tādātmyatadutpattī eva sambandhau , kathaṁ tarhi kāryasvabhāvābhyāmanupalabdherbhedaḥ ? pratiṣedhasādhanāt bhedau na vastutaḥ | yathoktamācāryeṇa -

atra dvau vastusādhanau , ekaḥ pratiṣedhahetuḥ iti |

upalavdhilakṣaṇaprāptatvaviśiṣṭena deśavipakṛṣṭe sumervādau kālaviprakṛṣṭe bhaviṣyacchaṅkhacakravartyādau svabhāvaviprakṛṣṭe piśācādāvanupalambhamātrasambhave'pi nābhāvavyavahāra ityuktaṁ bhavati |

anupalabdhervartamānakāle anāgatakāle ca pramāṇam

iyaṁ cānupalabdhirvartamānakāle pramāṇaṁ viśiṣṭasmaraṇasadbhāve'tītakāle ca , anāgatakāletvanupalabdhiḥ svayameva sandigdharupā | tato na pramāṇam | [anayā'nulabdhyā'bhāvavyahāraḥ sādhyate, na tvabhāvaḥ | tasya pratyakṣeṇaiva sidhdatvādityuktaṁ prāk ] yathā''hanyāyavādī -

amūḍhasmṛtisaṁskārasyātītasya vartamānasya ca pratipattṛpratyakṣasya

nivṛttiranupalabdhi rabhāvavyavahārasādhanī iti|

anupalabdhibhedāḥ

tatra yadā dūratvānniṣedhyasyāyogyadeśatvaṁ syāt , tadā dṛśyānupalabdhiḥ sākṣātprayoktuṁ na śakyata iti kāryānupalabdhyādayaḥ prayujyante | ata eveyaṁ prayogabhedena ṣoḍaśadhā bhavati | (1) tatra svabhāvānupalabdhiryathā- nāstyatra dhūmaḥ , upalabdhilakṣaṇaprāptasyānupalabdheḥ | pratiṣedhyasya dhūmasya yaḥ svabhāvaḥ tasyehānupalabdhiḥ | (2) kāryānupalabdhiryathā- nehāpratibaddhasāmarthyāni dhūmakāraṇāni santi , dhūmābhāvāt | pratiṣedhyānāṁ hi dhūmakāraṇānāṁ kārya dhūmaḥ , tasyehānupalabdhiḥ | (3) kāraṇānupalavdhiryathā- nāstyatra dhūmaḥ dahanābhāvāt | pratiṣedhyasya dhūmasya kāraṇaṁ dahanaḥ , tasyehānupalabdhiḥ | (4) vyāpakānupalabdhiryathā - nātra śiṁśapā , vṛkṣābhāvāt | pratiṣedhyāyāḥ śiṁpāyāḥ vyāpako vṛkṣaḥ , tāsyehānupalabdhiḥ | (5) svabhāvaviruddhopalabdhiryathā- nātra śītasparśaḥ , vahneriti | pratiṣedhyasy śītasparśasya yaḥ

svabhāvaḥ tasya virudhdo vahniḥ tasya cehopalabdhiḥ |(6) kāryaviruddhopalavdiryathā -nehāpratibadhdasāmarthyāni śītakāraṇāni santi , vahneriti| antyadaśāprāptameva kāraṇaṁ kāryaṁ janayati , na sarvaṁ kāraṇām , tato viśeṣaṇopādānam | pratiṣedhyānāṁ śītakāraṇānāṁ kāryaṁ śītaṁ , tasya viruddho vahniḥ , tasyehopalabdhiḥ | (7) kāraṇaviruddhopalabdhiryathā -nāsya romaharṣādiviśeṣāḥ santi , sannihitadahanaviśeṣatvāt | pratiṣedhyānāṁ romaharṣādiviśeṣāṇāṁ kāraṇaṁ śīta , tasya viruddho dahanaviśeṣaḥ , tasya cehopalabdhiḥ | (8) vyāpakaviruddhopalavdhiryathā - nātra tuṣārasparśaḥ , dahanāt | pratiṣedhyasya tuṣārasparśasya vyāpakaṁ śītaṁ , tasya viruddho dahanaviśeṣaḥ tasyehopalabdhiḥ | (9) svabhāvaviruddhakāryopalabdhiryathā, nātra śītasparśaḥ, dhūmāt | pratiṣedhyasya śītasparśasya yaḥ svabhāvastasya viruddho'gniḥ, tasya kārya dhūmaḥ , tasya cehopalabdhiḥ | (10) kāryaviruddhakāryopalabdhiryathā-nehāpratibadhdasāmarthyāni śītakāraṁṇāni santi dhūmāditi | pratiṣedhyānāṁ śītakāraṇānāṁ kāryaṁ śītaṁ , tasya viruddho vahniḥ , tasya kāryaṁ dhūmaḥ , tasya cehopalabdhiḥ | (11) kāraṇaviruddhakāryopalabdhiryathā -na romaharṣādiviśeṣayukta sparśavānayaṁ pradeśo dhūmāditi | pratiṣedhyānāṁ hi romaharṣādisparśaviśeṣāṇāṁ kāraṇaṁ śītam , tasya viruddho'gniḥ , tasya kāryaṁ dhūmaḥ, tasya cehopalabdhiḥ | (12) vyāpakaviruddhakāryopalabdhiryathā - nātra tuṣārasparśaḥ , dhūmāditi | niṣedhyasya tuṣārasparśasya vyāpakaṁ śītam , tasya viruddho'gniḥ , tasya kāryaṁ dhūmaḥ , tasya cehopalabdhiḥ |

(13) svabhāvaviruddhavyāptopalabdhiryathā - nātra vahniḥ , tuṣārasparśāt | pratiṣedhyasya hi vahneryaḥ svabhāvastasya viruddhaṁ śītam , tena vyāptastuṣārasparśaḥ , tasya cehopalabdhiḥ | (14) kāryaviruddha - vyāptopalabdhiryathā - nehāpratibaddhasāmarthyāni vahnikāraṇāni santi , tuṣārasparśāditi | pratiṣedhyānāṁ vahnikāraṇānāṁ kāryaṁ vahniḥ , tasya viruddhaṁ śītam , tena vyāptastuṣārasparśaḥ , tasya cehopalabdhiḥ | (15) kāraṇaviruddhavyāptopalabdhiryathā - nātra dhūmastuṣārasparśāditi | pratiṣedhyasya dhūmasya yatkāraṇamagniḥ , tasya viruddhaṁ śītam , tena vyāptastuṣārasparśaḥ , tasya cehopalabdhiḥ|

(16) vyāpakaviruddha -vyāptopalabdhiryathā - nāyaṁ nityaḥ , kadācitkāryakāritvāt | pratiṣedhyasya nityatvasya niratiśayatvaṁ vyāpakaṁ, tasya viruddhaṁ sātiśayatvaṁ , tena vyāptaṁ kadācitkāryakāritvaṁ , tasya cehopalabdhiḥ |

ete ca kāryānupalabdhyādayaḥ pañcadaśa prayogāḥ svabhāvānupalabdhisvabhāvā eva pratipattavyāḥ | prayuktibhedena paraṁ bhedaḥ | tatra svabhāvānupalambhenāsad vyavahārayogyatvaṁ sādhyate, na tvābhāvaḥ | tasya ca pratyakṣeṇaiva siddhatvāt | aparaiśca sarvairabhāvo'bhāvabyavahāraśca sādhyate , teṣāṁ parokṣaviṣayatvāt ||

iti tarkabhāṣāyāṁ svārthānumānaparicchedo dvitīyaḥ samāptaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2007

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

3 parārthānumānam

parārthānumānam

parārthānumānalakṣaṇam

trirupaliṅgākhyānaṁ parārthānumānam | anvayavyatirekapakṣadharmatāsaṁjñakāni trīṇi rupāṇi, yena vacanena prakhyāpyante tadvacanamupacārādanumānaśabdenocyate||

tasya dvaividhyam

tad dvividham sādharmyavadvaidharmyavacca | sādhyadharmidṛṣṭāntadhamiṇorhetu sattākṛtaṁ sādṛśyaṁ sādharmyam | tadyasyāsti tat sādharmyavat sādhanavākyam | sādhyadharmidṛṣṭāntadharmiṇorhetusattākṛtaṁ vaisādṛśyaṁ vaidharmyam | tadyasyāsti tadvaidharmyavata sādhanavākyam |

svabhāvahetossādharmyavatprayoganirupaṇam , saṁskṛtasya sarvasya kṣaṇika tvasamarthanaṁ ca

tatra svabhāvahetoḥ sādharmyavantaṁ prayogaṁ darśayituṁ sautrāntikamatamāśritya bhagavatā yaduktaṁ -

'saṁskṛtaṁ kṣaṇikaṁ sarvaṁ ' iti|

tad vyutpādyate | sametya sambhūya hetupratyayaiḥ kṛtaṁ vastujātaṁ saṁskṛtam| kṣaṇikamiti utpattikṣaṇa eva sattvāt |

sarvasaṁkṛtavināśanirupaṇam

' sarvaṁ tāvat ghaṭādikaṁ vastu mudgarādisannidhau nāśaṁ gacchat dṛśyate | tatra yena svarupeṇa antyāvasthāyāṁ ghaṭādikaṁ vinaśyati taccet svarupamutpannamātrasya vidyate tadānīmutpādānantarameva tena vinaṣṭavyamiti vyaktamasya kṣaṇikatvam |'

athedṛśa eva svabhāvastasya svahetorjātaḥ , yat kiyantaṁ kālaṁ sthitvā vinaśyatīti |

' evaṁ tarhi mudgarādisannidhāne ca eṣa eva asya svabhava iti punarapyanena tāvantameva kālaṁ sthātavyam , punarapyevamiti naiva vinaśyediti | tasmāt kṣaṇadvayasthāyitvenāpyutpattau prathamakṣaṇavad dvitīyakṣaṇe'pi kṣaṇadvayasthāyitvāt punaraparaṁ kṣaṇadvayamavatiṣṭheta | evaṁ tṛtīye'pi kṣaṇe tatsvabhāvatvānnaiva vinaśyatīti |'

syādetat , sthāvarameva tadvastu svahetorjātam , balena virodhakena mudgarādinā vināśyata iti ? tadasat , kathaṁ punaretadyujyate, na ca tadvinaśyati sthāvaratvāt , vināśaśca tasya virodhina balena kriyata iti ? na hyetatsambhavati jīvati devadatto maraṇaṁ cāsya bhavatīti |

atha vinaśyati , kathaṁ tarhyavinaśvaraṁ tadvastu svahetorjātam ? na hi mriyate cāmaraṇadharmā ceti yujyate vaktum | tasmādanaśvaratve kadācidapi naśāyogāt , dṛṣṭatvācca nāśasya , naśvarameva tadvastu svahetorupajāta ityaṅgīkurmaḥ | tasmādutpannamātrameva vinaśyati | tatha ca kṣaṇakṣayitvaṁ sidhdaṁ bhavati | prayogaḥ punarevaṁ kartavyaḥ - yadyat vinaśvarasvarupaṁ tattadanantarānavasthāyi yathā antyakṣaṇavartighaṭasya svarupam | vinaśvararupaṁ ca rupādikamudayakāla iti svabhāvahetuḥ |

nirviśeṣaṇasvabhāvahetoḥ prayogaḥ

yadi kṣaṇakṣayiṇo bhāvāḥ, kathaṁ tarhi sa evāyamiti pratyabhijñānaṁ syāt ? ucyate - nirantarasadṛśāparāparotpādādavidyānubandhācca pūrvakṣaṇavināśakāla eva tatsadṛśaṁ kṣaṇāntaramudayate | tenākāreṇa vailakṣaṇyasyābhāvād bhāvena cāvyavadhānāt bhede'pi sa evāyamityabhedādhyavasāyapratyayaḥ pṛthagjanānāṁ prasūyate | atyantabhinneṣvapi ca lūnapunarjātakuśakeśādiṣvapi dṛṣṭa eva sa evāyamiti pratyayaḥ | tathehāpi kiṁ na sambhāvyate? tasmātsarva saṁskṛtaṁ kṣaṇikamiti sidhdamevaitat nirviśeṣaṇasya svabhāvahetorayaṁ prayoga iti ||

tathā'paro'pi nirviśeṣaṇaprayogaḥ - yatsat tatsarvamanityaṁ , yathā ghaṭaḥ | santaścāmī pramāṇapratītāḥ | tathā'paro'pi vedasya pauruṣayatvasādhanāya svabhāvahetuḥ| yadvākyaṁ tatpauruṣeyaṁ , yathā rathyāpuruṣa vākyam | vākyaṁ cedam -

'agnihotraṁ juhuyātsvargakāma' iti|

saviśeṣaṇasvabhāvahetoḥ prayogaḥ

saviśeṣaṇaprayogo yathā - yadyadutpattimat tatsarvamanityaṁ , yathā ghaṭaḥ | utpattimāṁśca śabdaḥ | anutpannebhyo vyāvṛtto bhāva utpanna ucyate | yadā saiva vyāvṛttirvyāvṛttyantaravyavacchedena vyatiriktocyate bhāvasyotpattiriti tadā kalpitena bhedena svabhāvabhūtadharmeṇa viśiṣṭaḥ svabhāvo hetuḥ |

bhinnaviśeṣaṇasvabhāvahetoḥ prayogaḥ

tathā bhinnaviśeṣaṇasya prayogaḥ - yatkṛtakaṁ tadanityaṁ yathā ghaṭaḥ, kṛtakaśca śabdaḥ |

nanu citraguriti bhinnaviśeṣaṇasya prayogaḥ , yathā cātra citragośabde bhinnaviśeṣaṇavācako'sti na tathā kṛtakaśabde bhinnaviśeṣaṇavācakaṁ kimapyasti | tatkathaṁ bhinnaviśeṣaṇasyodāharaṇamiti ced ? ucyate - apekṣitaparavyāpāro hi svabhāvaniṣpattau bhāvaḥ kṛtakaḥ ityucyate | tatraḥ kṛtakaśabdaḥ paravyāpārasāpekṣaṁ svabhābaṁ prakṛtyaiva vadan bhinnaviśeṣaṇamevāha ||

prayuktabhinnaviśeṣaṇasvabhāvahetoḥ prayogaḥ

prayuktabhinnaviśeṣaṇasya svabhāvasya prayogaḥ - yaḥ pratyayabhedabhedī sa kṛtakaḥ , yathā dhūmaḥ , pratyayabhedabhedī ca śabdaḥ | pratyayaḥ kāraṇaṁ , tasya bhedastena bhettuṁ śīlaṁ yasya sa pratyayabhedabhedī | kāraṇamahattvena mahattvaṁ kāraṇālpatvenālpatvaṁ yasyetyarthaḥ pratyayabhedabhediśabdasya bhinnaviśeṣaṇavācakasyātra prayuktatvāt prayuktabhinnaviśeṣaṇo'yam | svabhāvahetoḥ nānāprabhedadarśanaṁ ca vyāmohanivṛttaye dharmabhedakalpanayāpi svabhāvahetureva prayujyata iti pratipādayitum |

svabhāvahetorvaidharmyavatprayoganirupaṇam

svabhāvahetorvaidharmyavān prayogo yathā - yadyadā'nantarānavasthāyi na bhavati na tattadā vinaśvararupaṁ, yathā''kāśam | vinaśvararupaṁ ca rupādikamudayakāle | vyatirekaprayoge sādhanābhāvena sādhyābhāvasya vyāptatvāt sādhyābhāvaḥ sādhanābhāve niyato bhavatīti bodhdavyam | tathā'paro'pi vaidharmyavān prayogaḥ - yatra kṣaṇikatvaṁ nāsti tatra sattvamapi nāsti, yathā gaganāravinde | saṁśca śabdaḥ | tathā yatrānityatvaṁ nivṛttaṁ tatrotpattimattvamapi, yathā kūrmaromṇi | utpattimāṁśca śabdaḥ | yatrānityatvaṁ nivṛttaṁ tatra kṛtakamapi, yathā śaśaśriṅge| kṛtakaśca śabdaḥ | yatra kṛtakatvaṁ nāsti tatra pratyayabhedabheditvamapi nāsti, yathā gagane | pratyayabhedabhedī ca śabda iti||

kāryahetoḥ sādharmyavadvaidharmyavatprayoganirupaṇam

kāryahetoḥ sādharmyavān prayogo yathā - yatra yatra dhūmastatra tatrāgniḥ, yathā mahānase , dhūmaścātra| kāryaheturapi pratyakṣānupalambhābhyāṁ sidhda eva kāryakāraṇabhāve sati kāraṇe sādhye prayoktavyaḥ | vaidharmyaprayogo yathā asatyagnau na bhavatyeva dhūmaḥ yathā - mahāhrade| asti ceha dhūma iti|

anupalabdhessādharmyavad prayogaḥ

anupalabdheḥ sādharmyavan prayogo'vayavinirākaraṇāya yathā - yadyatropalavdhilakṣaṇaprāptaṁ sannopalabhyate tattatrāsadvyavahārayogyam , yathā naraśirasi śṛṅgam | nopalabhyate cātropalabdhilakṣaṇaprāptaḥ parābhimato'vayavī ghaṭaśabdavācyeṣu kapāleṣu|

vaidharmyavatprayoganirupaṇam

anupalabdhervaidharmyavān prayogo yathā - yatsadupalabdhilakṣaṇaprāptaṁ tadupalabhyata eva, yathā nīlādiviśeṣaḥ | neha upalabdhilakṣaṇaprāptasya sata upalabdhirghaṭasyeti|

sādhyasādhanayorvyāptiḥ

sarvatra sādharmyavati sādhanavākye sādhyena sādhanaṁ vyāptam | baidharmyavati [punaḥ] sādhanavākye sādhanābhāvena sādhyābhāvo vyāpta iti pratipattavyam| sādhanasya ca sādhye

niyatatvakathanaṁ sādhyābhāvasya sādhanābhāve niyatatvakathanaṁ nāma vyāptirabhidhīyate | tataḥ pramāṇena vyāptisidhdau satyāṁ nedaṁ kvāpi śaṅkanīyaṁ sādhanaṁ ca syāta, sādhyaṁ ca tatra dharmiṇi na syāditi |

parāṅgīkṛteśvarasādhakānumānasya nirasanam

yatra pramāṇena sarvopasaṁhāravatī vyāptireva na sidhdā , tatra śaṅkāprasaro'nivāryaḥ | yatheśvarasidhdau kāryatvānumāne | tathā hi teṣāṁ sādhanopanyāsaḥ | ihānyaḥ sarvajño bhagavān bhavatu vā mā bhūt , īśvaraḥ punassarvajñaḥ śakyate sādhayitum | tathā hi , loke trayaḥ khalu bhāvāḥ kecinniścitakartṛkāḥ , yathā ghaṭādayaḥ | kecinniścita- kartṛnivṛttayaḥ , yathā vyomādayaḥ | anye punaḥ sandigdhakartṛkāḥ , yathā kṣityādayaḥ | na punaretebhyo'nyaḥ prakāro'sti | tatra ye dṛśyamānotpattayo vanaspatyādayo ye ca cirotpannā viśvambharādayaḥ te sarve sandigdhakartṛtvena vyavatiṣṭhamānā budhdimatkartṛkāḥ kāryatvāt , ghaṭādivat | nāyamasidhdo hetuḥ , kāryatvasya sarvoṣāṁ pramāṇasidhdatvāt | nāpi virudhdaḥ , sapakṣe bhāvāt | na cānaikāntaḥ , sādhyaviparyaye bādhakapramāṇasadbhāvāt | tathāhi - kārya tāvat budhdimataḥ kumbhakārādupajāyamānaṁ bhūyodarśanasahāyena mānasa pratyakṣeṇopalabdham |

tadyadi budhdimantareṇāpi syāt tadānīṁ budhdimataḥ sakāśātkadācidapi nopajāyeta | kāraṇābhāve kāryasya sakṛdapyutpādāyogāt | tasmānnedaṁ kvāpi śaṅkanīyaṁ kāryaṁ ca syāt na budhdimaddhetukamiti | atredamabhidhīte - sādhanaṁ khalu sarvatra sādhyasādhanayoḥ sarvopasaṁhareṇa pramāṇena vyāptau sidhdāyāṁ sādhyaṁ gamayediti sarvavādisammatam | tatra yadi dṛsyaśarīraviśiṣṭena budhdimatā vyāptirgṛhyate tadā tathābhūtasādhyamantareṇāpi jāyamāne tṛṇādau kāryatvasya darśanāt prameyatvādivat sādhāraṇānaikāntiko'yaṁ hetuḥ | tṛṇādayaḥ pakṣīkṛtā ityapi na vaktavyam | na hi vyabhicāraviṣaya eva pakṣo bhavitumarhati-

'sandigdhe hetuvacanāt vyasto hetoranāśraya' iti nyāyāt |

athāśakyārohaṇe'pi parvate dahanamantareṇa ca dhūmadarśanāt , evaṁ dhūme'pi vyabhicāro vaktuṁ sulabha eva? tanna | aśakyārohaṇatvena parvate dahanasya draṣṭumaśakyatvāt yuktaṁ tatra sandigdhaviṣayatvam | prastute tu dṛśyaśarīraviśiṣṭena budhdimatā vyāptau gṛhyamāṇāyāṁ dṛśyānupalambhena budhdimato bādho bhavatīti yuktam | atha dṛśyaśarīreṇa budhdimanmātreṇa vā vyāptiravagamyate tadā adṛśyasya budhdimanmātrasya vā sādhyasya dṛśyānupalambhena vyatirekāsidhdeḥ sandigdhavipakṣavyāvṛttiko'yaṁ hetuḥ |

sādhyābhāvaprayuktasya sādhānābhāvasya [kāśadāva] sidhdatvena vyāpterabhāvāt tathā coktam jñānaśrīmitrapādaiḥ |

kāryatvasya vipakṣavṛttihataye sambhāvyate'tīndriyaḥ |

kartā cedvayatirekasidhdividhurā vyāptiḥ kathaṁ sidhyati ||

dṛśyo'tha vyatirekasidhdimanasā kartā samāśrīyate |

tattyogo'pi tadā tṛṇādikamiti vyaktaṁ vipakṣekṣaṇam ||

trilocanābhyupagatasya vahnidhūmayoḥ svābhāvavika sambandhavādasya nirasanam

yacca trilocanenoktam-

'yathā svābhāvikaḥ sambandho dhūmādīnāṁ vahnayādibhissaha tathā

kāryatvasya budhdimatā sārdham , tadupādheranupalabhyamānatvāt ,

kvacidvyabhicārasyādarśanāt ' iti|

tanna yuktam | yato'rthāntaraṁ kiñcidapekṣaṇīyamupādhiśabdenābhidhīyate | na cārthāntaramavaśyaṁ dṛśyaṁ syāt | adṛśyamapi deśakālasvabhāvaviprakṛsṭam sambhāvyate | ato dhūmasya dahanena saha sambandhe bhaviṣyatyupādhiḥ | na copalabhyata iti kathamadarśanamātreṇa nāstyevetyucyate | yadapyuktaṁ vyabhicārasyādarśanāditi sādhanaṁ , tadapi sandigdhāsidhdam | pratyayāntaravaikalyenāhatya vyabhicārasyādarśane'pi sarvatra niṣeddhumaśakyatvāt | na caitāvatā prāmaṇikalokayātrātikramaḥ | prāmāṇikaireva sādhakabādhakapramāṇābhāve saṁśayasya vihitatvāt | na ca caivaṁ saṁśayena sarvatrapravṛttiprasaṅgaḥ , pramāṇādarthasandehācca pravṛtterupapatteḥ | yadapyuktam -

'yathā'nyatvāviśeṣe'pi baudhdānāṁ kiñcideva vastu kāryaṁ syāt ,

kiñcideva kāraṇaṁ , na sarva, tathā mamāpyanyatvāviśeṣe'pi kiñcideva

dhūmādikaṁ vastu svābhāvika sambandhena sambadhdaṁ na sarvam' iti |

tanna yuktam |yathā dhūmākhyaṁ vastu dahanāyattamiti pramāṇasidhdiṁ tathā kiṁ svābhāvikasambandho'pi pramāṇasidhdaḥ , yenaivamucyate ? kiñca svābhāvikasambandha iti ko'rthaḥ ? kiṁ svato bhūtaḥ , svahetorvā bhūtaḥ ahetuko vā iti trayo vikalpāḥ | tatra na tāvadādyaḥ pakṣaḥ, svātmani kriyāvirodhāt | nāpi dvitīyaḥ , tadutpattisambandhasvīkāraprasaṅgāt | athāhetukaḥ , tadā deśakālasvabhāvaniyamābhāvādatīvāsaṅgataḥ svābhāvikasambandhavādaḥ |

kiñca sādharmyeṇa vaidharmyeṇa vā dṛṣṭāntamātramastīti na vyāptisidhdiḥ | yadṛcchayā militayorapi karabhagadarbhayostathābhāvaprasaṅgāt | tasmānnidarśanaṁ nāma [ dṛṣṭānta ucyate | sa ca ] gṛhītavismṛtapratibandhasādhaka pramāṇasmaraṇadvāreṇaiva hetāvupayujyate , na svasannidhimātreṇa | tathāhi -na tāvadākāśe sādhyābhāvena sadhanābhāvaḥ pratīyate | ākāśe hi yathā budhdimatkāraṇanivṛttistathā acetanasyāpi kāraṇasya nivṛttirnāstyeva | tatkasyābhāvaprayuktakāryatvābhāvaḥ pratīyatāṁ , yena sādhyābhāvaprayuktasādhanābhāva vyatirekaḥ sidhyatīti | nāpi ghaṭe kāryatvasya budhdimadanvayadarśanādākāśe'pi budhdimadabhāvādeva kāryatvābhāvo vaktuṁ yujyate, yasmādanayostādātmyaṁ tadutpattiranyo vā svābhāvikādisambandhaḥ pūrvapramāṇena na prasādhitaḥ syādityuktam|

adarśanamātreṇa vyatireko'sidhdaḥ

kiñcādarśanamātrena vyatireko na sidhyati | tathā hi , vipakṣe heturnopalabhyata ityanena tadupalambhakapramāṇa nivṛttirucyate| pramāṇaṁ ca prameyasya kāryam , ' nākāraṇaṁ viṣaya ' iti nyāyāt | na ca kāryanivṛttau kāraṇanivṛttiryujyate , nirdhūmasyāpi vahnerbhānāt | yadi punaḥ pramāṇasattayā prameyasattā vyāptā syāt , tadā yuktamevaitat | kevalamiyameva vyāptirasambhāvinī , sarvasya sarvadarśitvaprasaṅgāt | tasmānnādarśanamātreṇa vyatirekaḥ sidhyati |yathoktam -

'sarvā'dṛṣṭiśca sandigdhā svā'dṛṣṭirvyabhicāriṇī |

bhūjalāntargatasyāpi bījasyāsattvadarśanāt ||' iti ||

vācaspatimatanirasanam

yadapi vācaspatirāha -

' viśeṣasmṛtyapekṣa eva saṁśayo bhavati tato yathādarśanameva śaṅkitumucitam ' iti |

atrocyate - nāyaṁ nyāyaḥ sārvatrikaḥ | tathā cābhyupagamyāpi brūmaḥ | tathā hi - [ kāryatvadhūmatvayoḥ ] tādātmyatadutpattisambandha viyogitvena sādhāraṇena dharmeṇa prameyatvadhūmatvakāryatvādīnāṁ tanmatenāpi sajātīyatvam | tatra prameyatvasyavyabhicāradarśanamevānyatrāpi śaṅkāmupasthāpayatīti yathādarśanamevedamāśaṅkitam | ataḥ sandigdhavipakṣavyāvṛttikatvaṁ nāma hetudūṣaṇaṁ durvārameva | etacca saddūṣaṇameva | ato yadanenoktam - ' nāyaṁ hetudoṣaḥ , ato na parihartavyaḥ, tasya copanyāso'doṣodbhāvanaṁ nāma nigrahasthānam ' iti | tadidānīṁ svamatenaivānena vādinā niranuyojyānuyogalakṣaṇena nigrahasthānenātmā bādhita ityupekṣaṇiyo'yaṁ devānāṁ priyaḥ ||

īśvarasādhakānumāne anupapattiḥ

nanu yadi dṛśyāgnidhūmasāmānyayoriva dṛśyātmanoreva kāryakāraṇasāmānyayoḥ pratyakṣānulambhato vyāptistadā santānāntarānumānaṁ na syāt , paracittasyādṛśyātmakatayā vyāptigrahaṇakāle'nantarbhāvāditi cet ? na | svasaṁvedanaṁ hi tatra vyāptigrāhakam | svasaṁvedanamātrāpekṣayā paricittasyāpi dṛśyatvāt | na caivaṁ vyāvahārikendriyapratyakṣamātrabudhdimanmātraṁ jaṭharacitrasādhāraṇaṁ vahnimātraṁ vā gocaro yujyate , yenāsyāpi dṛśyatā syāt | tasmāt dṛśyenaiva vahninā dhūmasya pratyakṣānupalambhābhyāṁ vyāptiriti nyāyaḥ ||

kiñca yadi budhdimanmātrapūrvakatvamanena sādhyate , tadā sidhdasādhanatādūṣaṇaṁ sādhanasya | atha eko nityaḥ sarvajña ityādiviśeṣaṇaviśiṣṭabudhdimatpūrvakatvaṁ sādhyate , tadā evaṁ viśeṣaṇaviśiṣṭena sādhyena saha kāryatvasya sādhanasya dṛṣṭāntadharmiṇi pramāṇena vyāpterasidhderanaikāntikatvam | atha sāmānyena vyāptimādāya viśeṣasya pakṣadharmatābalāt sidhdirucyate ? tanna yuktam | yena sādhyagatena viśeṣaṇena vinā hetorvṛttirdharmiṇi na ghaṭate, tasya viśeṣasya pakṣadharmabalādyuktā sidhdiḥ | yathā dhūmāt parvatadeśavṛttitvasya dahanadharmasya , na tu tārṇatvādīnāṁ viśeṣāṇām | tārṇatāmantareṇāpi parvate dhūmadarśanāt | tadvad budhdimato'pi śarīrādivṛttitvaṁ yadi sidhyati, siddhyatu| na punaratyantavilakṣaṇaṁ sarvajñatvam | asarvajñatve'pi kāryatvasya sambhavāt | upādānādyabhijñatvādapi na sarvajñatvasidhdiḥ , ekatvasidhdau sidhtyetat | na caikatvaṁ sidhdam | anekakartṛpūrvakatve'pi kāryatvasya sambhavāt | yathā'nekakīṭikāniṣpāditaḥ śakramūrdhā | atha śakramūrdhno'pīśvarapūrvakatvaṁ sādhyaṁ , tarhi ghaṭasyāpīśvarapūrvakatvasidhdau kuto dṛṣṭāntatvam ? atha kumbhakārasya kartṛtvaṁ dṛṣṭaṁ kathamapākriyate ? kīṭakādīnāṁ ca hetutvaṁ dṛṣṭaṁ tadapi kathaṁ vāryate ? nāpi bahūnāṁ kāraṇatve vipratipattisambhāvanā , dṛṣṭatvādeveti | tasmāt sādhyasādhanayoḥ sarvopasaṁhāravatī vyāptirdṛṣṭāntadharmiṇi pramāṇenāvaśyaṁ darśayitavyeti sthitam | kiñca nityaikasarvajñe budhdimati sādhye virudhdo'pyeṣaḥ | anityānekāsarvajñena budhdimatā vyāptatvāt kāryatvasya | tathā hi , sādhyaviparyayasādhanādiha virudhda ucyate | ayaṁ ca sādhyaviparītaṁ sādhyatītyāstāṁ tāvat prastāvāyāteśvaradūṣaṇodbhāvanānibandhakaraṇam ||

sādharmyavaidharmyaprayogeṣu trairupyāsiddhyāśaṁṅkā tannirasanañca

nanu sādharmyavati sādhanavākye anvaya evoktaḥ na tu vyatirekaḥ | vaidharmyavati ca vyatireka evoktaḥ , na tvanvayaḥ | tatkathamābhyāṁ trirupaṁ liṅgaṁ kathyata iti cet , naiṣa doṣaḥ | yasmāt sādharmyavati ca sādhanavākye , upanyaste sāmarthyādeva vyatireko'vagamyate | vyatirekāgṛhītau ca sādhyābhāve'pi na sādhanābhāva iti viparyayaḥ sambhāvayitavyaḥ | evaṁ cānvayasyaivābhāvaḥ syāt | satyapi sādhane sādhyābhāvāditi sāmarthyam | tathā vaidharmyavati sādhanavākye upanyaste sāmarthyādevānvayo'vagamyate, anvayagṛhītau hi sādhanaṁ ca syāt sādhyaṁ ca na bhavediti viparyayaḥ sambhāvayitavyaḥ | evaṁ ca vyatireka eva na bhavet | sādhyābhāve'pi sādhanasya bhāvāditi sāmarthyam | tasmāt dvāvapi prayogau trirupaliṅgaprakāśakāvityadoṣaḥ ||

vyaptigrāhaka pramāṇanirupaṇam

samprati sādhyasādhanayorvyāptiḥ yatra dharmiṇi grahītavyā ,yena ca pramāṇena, tadubhayaṁ sukhāvabodhārtha kathyate - svabhāvahetoḥ sattvalakṣaṇasya kṣaṇikatvena vyāptiḥ sādhyadharmiṇyeva grahītavyeti kecit | teṣāmantarvyāptipakṣo'bhimataḥ | prasaṅgaprasaṅgaviparyayābhyāṁ dṛṣṭāntadharmiṇi ghaṭādau vyāptirgrahītavyetyanye | teṣāṁ bahirvyāptipakṣo'bhimataḥ | sattvādanyeṣāṁ svabhāvahetūnāṁ kāryahetūnāmanupalambhahetūnāṁ ca dṛṣṭānta eva vyāptirgrahītavyā | tatra śiṁśipātvasya vṛkṣatvavyavahāre, sādhye dṛṣṭānte pratyakṣānupalambhābhyāṁ vyāptirgrāhyā | sattvakṣaṇikatvayostu prasaṅgaprasaṅgaviparyayābhyāṁ pramāṇābhyāṁ , sādhyaviparyayabādhakapramāṇena vā kramayaugapadyanivṛttilakṣaṇena svasaṁvedanasāmarthyasidhdervikalpasidhdervā vastutvāvastutvābhyāṁ sandihyamāne vipakṣe dharmiṇi, kāryahetordhūmādervahnyādinā mahānasādau dṛṣṭāntadharmiṇi trividhapratyakṣānupalambhataḥ , pañcavidhapratyakṣānupalambhato vā vyāptirgrahītavyā |, anupalambhasya tu asadvyavahārayogyatvena saha vyāptiḥ pratyakṣeṇaiva | , anyeṣāṁ tu svabhāvahetūnāṁ kāryahetūnāṁ vā keṣāñcit , yathāsvabhāvaṁ pramāṇenonnīya grahītavyeti ||

hetvābhāsanirupaṇam

vyāptyaniścaye hetoranaikāntiko doṣaḥ | sa ca trividhaḥ - asādhāraṇānaikāntikaḥ sādhāraṇānaikāntikaḥ , sandhigdhavipakṣavyāāvṛttikaśceti | tatra

asādhāraṇānaikāntiko yathā - sātmakaṁ jīvaccharīram , prāṇādimattvāt aparajīvaccharīravat , ghaṭavat | ayaṁ heturaparajīvaccharīre ātmanā vyāpta iti na niścitaḥ |ghaṭe ca vipakṣe ātmano'bhāvānnivṛtta iti na niścitaḥ | dharmiṇi tu jīvaccharīre vidyata iti asādhāraṇānaikāntika ucyate | aparaścāsādhāraṇo yathā - anityaśabdaḥ śrāvaṇatvāt , ghaṭavat , ākāśavaditi | sādhāraṇanaikāntiko yathā - nityaḥ śabdaḥ prameyatvāt , ghaṭavat ākāśavat | , sandigdhavipakṣavyāvṛttiko yathā - saḥ śyāmastatputratvāt , paridṛśyamānatatputravaditi ||

yaduktaṁ prāk , sattvasya kṣaṇikatvena saha vyāptiḥ prasaṅgaprasaṅgaviparpayābhyāṁ grahītavyeti , tatra ko'yaṁ prasaṅgo nāma ? pramāṇaprasidhdavyāptikena vākyena parasyāniṣṭatvāpādanāya prasañjanam prasaṅgaḥ , yathā - sāmānyasya , anekavṛttitvābhyupagame anekatvaprasañjanam | tathā hi - yadanekavṛtti tadanekaṁ yathā anekabhājanagataṁ tālafam | anekavṛtti ca sāmānyam | tasmādanenāpyanekena bhavitavyamiti prasaṅgaḥ |

prasaṅgasya kāryam

athānekatvaṁ neṣyate, tadā'nekavṛttitvaṁ ca mā svīkurvīthāḥ |

nanu yadyetat prasaṅgākhyaṁ sādhanaṁ pramāṇa , na bhavati [trairupyābhāvāt ] kathamasyopanyāsa iti , vyāptismaraṇārthaṁ vyāpyaikadeśakathanavaditi | yaduktam -

' prasaṅgo dvayasambandhādekābhāve'nyahānaye ' iti |

asyāyamarthaḥ - vyāpyavyāpakayoḥ sambandhe sati yadi vyāpakaṁ neṣyate tadā vyāpyamapi neṣyatām | atha vyāpyamiṣyate tadā vyāpakamapīṣyatāmiti |

vādinā sādhanā upanyaste prativādinā tatra dūṣaṇaṁ vaktavyamiti nyāyaḥ | asidhdavirudhdānaikāntikānāmanyatamasyodbhāvanaṁ dūṣaṇam| yathoktam -

'dūṣaṇāni nyūnatādyukti' iti |

hetudūṣaṇam

nanveṣāmevodbhāvanaṁ yadi dūṣaṇaṁ ,kva tarhi vaiyarthyāsāmarthyātiprasaṅgādīnāmantarbhāvaḥ ? atraiva triṣu | tatra vaiyarthyaṁ tāvadasidhde'ntarbhavati | sandigdhasādhyadharmo hi

heturucyate | vaiyarthyaṁ tu yatropanyasyate tatra sandigdhasādhyadharmakatvaṁ hetorlakṣaṇaṁ hetau na sambhavatīti asidhda ucyate | [ hetorlakṣaṇasyāsidhdeḥ] yaduktam -

' sandigdhe hetuvacanāt vyasto hetoranāśrayaḥ ' iti |

asāmarthyaṁ tu svarupāsidhdāvantarbhavati | na hi hetoḥ sāmarthya nāma hetusvarupādanyat | hetoravastutvaprasaṅgāt | atiprasaṅgaścānaikāntike'ntarbhāvyaḥ , sādhyadharmamatikramya vipakṣe'pi prasakteriti ||

ātmanirasanam

yatra tu dharmiṇi sādhyaṁ sādhayitumārabdhaṁ tasya dharmiṇaḥ pramāṇabādhitve āśrayāsidhdirhetordūṣaṇam | yathā sarvagata ātmā sarvatropalabhyamānaguṇatvāt | tadiha baudhdasyātmaiva na sidhdaḥ , kiṁ punasasya sarvadeśopalabhyamānaguṇatvaṁ setsyati | tathā hi , tairthikāḥ khalvevaṁ bruvanti | śarīrādivastuvyatiriktaṁ śubhāśubhakarmakartṛtatfalabhoktṛ nityavyāpirupamātmākhyaṁ dravyāntaramasti | tena ca yadi nāma viśvaṁ vyāptaṁ tadapi yadupabhogāyatanatayā pareṇa parigṛhītaṁ jīvaccharīraṁ tadeva sātmakamabhidhīyata iti | etaccāyuktam | ātmanaḥ sidhdaye pramāṇābhāvāt | na hi pratyakṣeṇa ātmā pratīyate|

cakṣurādijñānānāṁ rupādiviṣayapañcakaniyatatvāt | mānasasyāpyahaṁpratyayasya śarīrādiviṣayatvāt gauro'haṁ sthūlo'haṁ gacchāmyahamityādyākāreṇa ahaṁ pratyaya utpadyate yadāha alaṅkārakāraḥ -

ahamityapi yajjñānaṁ taccharīrendriyāṁśavit |

ahaṁ kāṇassukhī gauraḥ samānādhāravedanāt ||

na cāsya śarīravyatiriktasya taddharmo gauratvaṁ sthūlatvaṁ vā | na ca vibhoramūrttasya mūrtadravyānuvidhāyinī gamanakriyā yuktimatī | na cāyaṁ māṇavake siṁhapratyaya eva bhākto yuktaḥ , skhaladvṛttiprasaṅgāt | nāpyanumānena pratīyate , kāryasvabhāvaliṅgābhāvāt | nityaparokṣeṇa deśakālākāravyatirekavikalenātmanā saha kasyacidanvayavyatirekātmakāryakāraṇabhāvāsidhdeḥ kāryaliṅgāyogat | dharmisattāyāścāsidhdatvāt svabhāvaliṅgānupapatteḥ | na cānyalliṅgamasti | anyenāpi liṅgena bhavatā sādhyavyāptena bhavitavyam | tasya ca sarvathā'sidhdeḥ, kathaṁ tena vyāptatvaṁ liṅgasya niścīyatām ? kiñca , kiyamātmā bodharupaḥ , abodharupo vā ? yadi bodharupo nityaśca tadā cakṣurādivaifalyaprasaṅgo durvāraḥ | athānityo bodharupastadājñānasyaivātmeti nāma kṛtam , na vipratipattiḥ | athābodharupo dṛśyaśca tadā'nupalambho'sya sattāṁ na kṣamata iti nirātmasidhdiranavadyā | tasmāt sarvaṁ saṁskṛtaṁ vastu nirātmakamiti ||

svarupāsiddhyāpi hetvabhāsanirupaṇam

svarupāsidhdayā'pyasidhdo hetvābhāso bhavati | yathā anityaśśabdaḥ cākṣuṣatvāditi | nanu vyāptyasidhdirapi dūṣaṇam , tenāpi pareṣṭārthāsidhdeḥ | tatkiṁ nocyate? anaikāntikadūṣaṇenaiva gatārthatvāt pṛthaḍnoktam | tathā hi - na svalakṣaṇābhyāṁ vyāptirgrahītuṁ śakyā |svalakṣaṇasya deśakālākāraniyatatvenāpyanyatrānugamābhāvāt | api tu sādhyasādhanasāmānyābhyāmeva vyāptirgrahītavyā | tatra ca yadi sādhanaṁ sādhyena vyāptaṁ na pratīyate tadā sādhanaṁ ca syāt sādhyaṁ ca na syādityanaikāntikameva bhavati ||

apohanirupaṇam , sāmānyanirasanaṁ ca

nanu sāmānyaṁ cedaprasidhdaṁ , tatkathaṁ sādhyasādhanasāmānyābhyāṁ sarvopasaṁhāravatī vyāptiḥ pramāṇena gṛhyate ? naiṣa doṣaḥ | yato yādṛśaṁ sāmānyaṁ paraiḥ parikalpyate tādṛśaṁ pramāṇena bādhyata iti nābhyupeyate tatsaugataiḥ | na tu vyavahāraprasidhdamanyavyāvṛttilakṣaṇamapohasaṁjñitamapi | nanu ko'yamapoho nāma ? yathādhyavasāyaṁ bāhya eva ghaṭādirartha apoha ityabhidhīyate , apohyate'smādanyadvijātīyamiti kṛtvā | yathāpratibhāsaṁ buddhyākāro vā'pohaḥ , apohyate pṛthak kriyate'smin buddhyākāre vijātīyamiti kṛtvā | yathātattvaṁ nivṛttimātraṁ prasajyarupo vā'pohaḥ , apohanamapoha iti kṛtvā |

nanu yathādhyavasāyaṁ vidhireva , tarhi kevalo visāya ityāgatam | na apohaviśiṣṭo vidhirabhipretaḥ | yattu gopratītau na gavātmā agavātmeti sāmarthyādapohaḥ paścānniścīyata iti vidhivādināṁ matam | anyāpohapratipattau ca sāmarthyādanyapoḍho gavādirartho'vadhāryata iti nivṛttyapohavādināṁ matam | tanna yuktam , vyavahārakāle prathamaṁ vartamānasyāpi pratītikramādarśanāt | na hi vidhiṁ pratipadya kaścidarthāpattitaḥ paścādapohamavagacchati , apohaṁ vā pratipadya paścādanyāpoḍhamavagacchati | tasmāt gopratipattireva anyāpoḍha pratipattirucyate | yadyapi gośabdāduccaritādanyāpoḍhaśabdānullekha uktaḥ , tathā'pi nāpratipattireva viśeṣaṇabhūtasyānyāpohasya | agavāpoḍha eva vastuni gośabdasya saṁketitatvāt | yathā nīlotpalasaṁketitendīvaraśabdāt utpalapratītau tatkāla eva nīlamasfuraṇamanivāryaṁ tathā gośabdādapyagavāpoḍha eva vastuni saṁketitāt gopratītau tulyakālameva viśeṣaṇatvāt apohasya agavāpoha- sfuraṇamanivāryam | yathā ca pratyakṣasya prasajyapratiṣedharupābhāvagrahaṇamabhāva vikalpotpādanaśaktireva , tathā vidhivikalpānāmapi tadanurupānuṣṭhānaśaktirevābhāva - grahaṇamabhidhīyate | anyathā yadi gośabdādarthapratipattikāle nāvagataḥ parāpohaḥ , kathaṁ tarhi anyaparihāreṇa pratipattā gavi vartatām | tatto gāṁ badhāneti codito'śvānapi badhnīyāditi | tasmāt sthitametat ,bāhyārtho'dhyavasāyādeva śabdavācye vyavasthāpyate, na tu svalakṣaṇaparisfūrtyā , pratyakṣaddyeśakālākārāvasthāniyata pravyaktasvalakṣaṇāsfuraṇāt | yadāha nyāyaparameśvaraḥ -

' śabdenāvyāpṛtākṣasya budhdāvapratibhāsanāt |

arthasya dṛṣṭāviva ' iti ||

kiñca svalakṣaṇātmani vastuni vācye sarvātmanā pratipatteḥ vidhiniṣedhayorayogaḥ | tasya hi sadbhāve astīti vyartham , nāstītyasamartham | asadbhāve tu nāstīti vyartham ,astitya samartham | asti cāstyādipadaprayogaḥ | tasmāt paramārthato na svalakṣaṇaṁ śabdairabhidhīyata iti sthitam ||

nanu yathā pratyakṣeṇa ghaṭasvarupe gṛhīte'paścāttatraiva kṣaṇikatvādiniścayārtha pramāṇāntaraṁ pravartate , tathā vṛkṣaśabdena vṛkṣatvāṁśe pratipādite satvāṁśaniścayārthameva sadādipadaprayogo bhaviṣyatīti cet , na | pratyakṣasyāniśyātmakatvādanabhyastasvarupaviṣaye pramāṇāntaraṁ vartata iti yuktam | vikalpasya tu svayaṁ niśyātmakatvāt , gṛhīte svarupe kiṁ pramāṇāntareṇa paraṁ grahītavyamiti ||

paraparikalpitasāmānyanirasanam

yādṛśaṁ sāmānyaṁ paraiḥ parikalpyate , anekavyaktisamavetaṁ dṛśyamekaṁ nityaṁ tādṛśasya sattāsādhakaṁ na kiñcitpramāṇāmupalabhāmahe | tataḥ saditi vyavasthāpayituṁ tanna yuktam | tathā hi - gavādivyaktyanubhavakāle varṇāsaṁsthānādyātmakaṁ vyaktisvarupamapahāya nānyat kiñcidekamanuyāyi pratyakṣe bhāsate | tādṛśasyānubhavābhāvāt | nāpi svalakṣaṇānubhānantaramekākāraparāmarśapratyayāt anyathā'nupapattyā sāmānyaparikalpanaṁ yuktisaṅgatam | vyaktibhya eva svahetudattaśaktibhyo'sya pratyayasya paramparayotpatteḥ | bhede'pi kāścideva vyaktayo'sya jananāya samarthāḥ, na sarvāḥ , ityatra kāryakāraṇabhāvasya pratyakṣānupalambhābhyāṁ dṛṣṭasyātivartayitumaśakyatvāt | dṛṣṭaṁ cedaṁ sāmarthyaṁ bhedāviśeṣe'pi kāsāñcideva vyaktīnām | yathā jvarādipraśamane guḍūcīnimbādīnām | yathoktam -

' ekapratyavamarśārthajñānādyekārthasādhane |

bhede'pi niyatāḥ kecitsvabhāvenendriyādivat' ||iti||

kiñca sarvagate vijātīyād vyāvṛtte satyapi sāmānye kiṁ bhedāviśeṣe'pi govyaktiṣveva samavetaṁ tat sāmānyaṁ tatraiva caikākārāṁ budhdiṁ janayatīti praśne svabhāvenaivetyuttaraṁ parasya | tacca pramāṇāsaṅgatam | asmākaṁ tu svabhāvenottaraṁ pramāṇāsidhdatvāt yuktisaṅgatameva ||

tathedamaparaṁ jātisādhanāya sādhanaṁ parasya | yad viśiṣṭaṁ jñānaṁ tad viśeṣaṇagrahaṇanāntarīyakam , yathā daṇḍijñānam | viśiṣṭajñānaṁ cedaṁ gaurayamityarthataḥ kāryahetuḥ | atrocyate - viśiṣṭabudhderbhinnaviśeṣaṇagrahaṇanāntarīyakatvaṁ sādhyaṁ , viśeṣaṇamātrānubhavanāntarīyakatvaṁ vā | prathamapakṣe pratyakṣabādhā |vastugrāhiṇi pratyakṣe ubhayapratibhāsābhāvāt | viśiṣṭabudhditvaṁ ca sāmānyamityanaikāntiko hetuḥ syāt ,bhinnaviśeṣaṇagrahaṇamantareṇāpi tasya darśanāt | yathā svarupavānayaṁ ghaṭaḥ , gotvasāmānyamiti vā | dvitīyapakṣe tu sidhdasādhanam , svarupavān ghaṭa ityādivat gotvādijātimān piṇḍa iti parikalpitabhedamupādāya viśeṣaṇaviśeṣya bhāvasyeṣṭatvāt |

agovyāvṛttyanubhavabhāvitvāt gaurayamiti vyavahārasya | tadevaṁ ato'pi sādhanānna sāmānyasidhdiriti | tadevaṁ paraparikalpitasāmānyasya vicārāsahatvāt , atadrūpaparāvṛttavastumātrameva sāmānyamapohaśabdavācyaṁ vyavahārāṅgaṁ yathādhyavasāyamanavadyamiti sthitam |

sāmānyasya niṣedhāya prayogaḥ punarevaṁ kartavyaḥ - yadyatropalabdhilakṣaṇaprāptaṁ sannopalabhyate tattatra asadvyavahāraviṣayaḥ ,yathā turaṅgamottamāṁge śṛṅgaṁ , nopalabhyate copalabdhilakṣaṇaprāptaṁ sāmānyaṁ paridṛśyamānāsu vyaktiṣviti svabhāvānupalabdhiḥ | na cāsidhdasambhāvanā | varṇasaṁsthānalakṣaṇaṁ vyaktisvarupamapahāya dvitīyasyānuyāyino rupasya nipuṇamapi nirupyamāṇasya sarvathā darśanābhāvāt , nāpi jñānavaddarśanābhāve'pi pratyakṣasidhdatvamasyābhidhātumucitam | jñānaṁ hi svasaṁvedanapramāṇasidhdam , na tu cakṣurvijñānagrāhyam | idaṁ [ tu sāmānyaṁ ] cakṣurvijñānagrāhyamarthadharmatvāt | pratyakṣaṁ ca parairiṣṭamiti | tadevaṁ paraparikalpitasāmānyasya vicārāsahatvāt , atadrūpaparāvṛttavastumātrameva sāmānyamuktam | tasmāt sarvaṁ saṁskṛtaṁ vastu paraparikalpitasāmānyena śūnyamiti sthitam ||

īśvarasādhananirasanam

nāpi kenacidbudhdimatoparacittamityapi vijñeyam | tathā hi - asya jagataḥ karttā bhavan nityo vā bhavedanityo vā | tatra na tāvannityo yuktaḥ , nitye karttari samarthe sati sargasthitipralayānāṁ niyamena yaugapadyaprasaṅgāt | yena hi svarupeṇa sthitipralayayoḥ sa karttā tadasya svarupaṁ sargakāle'pi sannihitamiti tadaiva sthitipralayau kuryāt | sahakārivirahānna karotīti cet , tadasat | na hi nityena sahakāriṇā kadācidapyayaṁ virahitaḥ sadā sannihitatvāt | nāpyanityena sahakāriṇā virahitaḥ , anityasahakāriṇo'pi tadāyattajanmatvāt | tata ekadā sarvakaraṇādiprasaṅgaḥ ||

nanu budhdimattvādīśvarasya naiṣa doṣaḥ | budhdiśūnyo hi svasattāmātrajanyaṁ kāryamakrameṇaiva kuryāt | budhdimāṁstu karttumīśāno'pi anicchanna karotīti kastasyopālambhaḥ ? ucyate - tā apīcchāḥ svasattāmātranibandhanāḥ kiṁ na karotīti sa evāsyopālambhaḥ | atha svarupeṇa sāmarthye satyapi eṣa eva tasya svabhāvaḥ , yatsahakārilakṣaṇayā'gantukaśaktyā vinā na karotīti cet , tarhi mātā'pi sati vandhyā sā prakṛtyaivaitadapi vaktavyaṁ bhavedbhavatāmiti yatkiñcidetat ||

nanveṣa eva kāryasvabhāvaḥ , kevalāt samarthādapi nodeti , sahakāriṇamapekṣyaiva paścādbhavati [ nāsyopālambha iti ] tanna yuktam | samartho hi sahakāryapekṣāmanādṛtya balādeva kāryaṁ kuryāt | anyathā [ hyasya ] asamarthatvaprasaṅgāt |

nityasya kramakāritvaniṣedhanam

nāpi nityaḥ krameṇa kāryakārīti yuktam , nirapekṣatvāt | yadāha diṅmaṇḍalavikhyātakīrtirdharmakīrtiḥ -

nityasya nirapekṣatvāt kramotpattirna yujyate |

kriyāyāmakriyāyāṁ ca kālayoḥ sadṛśātmanaḥ ||iti||

etena ātmādīnāmakṣaṇikānāṁ ghaṭādīnāṁ kṣaṇikānāṁ ca krameṇa kāryakaraṇaṁ pratyuktam | na cātra pratyakṣavirodhaḥ , pratyakṣeṇākṣaṇikasya grahaṇāyogāt | na hi kṣaṇikaṁ pratyakṣamakṣaṇikamīkṣituṁ kṣamate| anikakṣaṇavyāpāro hyakṣaṇikaḥ | sa kathamekakṣaṇabhāvinādhyakṣeṇa grahītuṁ śakyaḥ | na hi prāgūrdhvaṁ cāvasthānamadhunā prakāśate| tasyāpyadhunātanatāprasaṅgāt | janmavināśāvadhipratibhāsaprasaṅgāditi nedaṁ pratyakṣaṁ pūrvāparakālavyāptamarthaṁ kañcidapi grahītumalam |

pratyabhijñānasya pratyakṣatvaṁ nirasanam

etena pratyabhijñānasyāpratyakṣatvamākhyātam | sākṣātkāri hi jñānaṁ pratyakṣam | na ca prāgavasthamadhunā sākṣātkartavyam , api tu smartavyam | na ca smaraṇasvarupam pratyakṣam |

atha mataṁ bhavedidaṁ smaraṇaṁ yadidānīntanamavasthānaṁ na sākṣātkuryāt , tatsākṣātkaraṇapravaṇaṁ kathamidaṁ smaraṇaṁ nāma ? yadāha bhaṭṭaḥ-

' pūrvapramitamātre hi jāyate sa iti smṛtiḥ |

sa evāyamitīyaṁ tu pratyabhijñā'tirekiṇi ||' iti ||

smaraṇagrahaṇasvarupaṁ tarhi pratyabhijñānaṁ syāt , na tu grahaṇasvarupameva | smaryamāṇe grahaṇāyogāt , gṛhyamāṇe ca smaraṇāyogāt | na caikasya smaraṇagrahaṇe sambhavataḥ , parasparavirodhāt | yena hi svarupeṇa smaraṇaṁ na tena svarupeṇa grahaṇamityanunmattena śakyate vaktum | rupāntareṇa caikasya smaraṇagrahaṇe na syātām | bhāve'pi pratyakṣāpratyakṣe syātām | na tu smaryamāṇe pratyakṣameva , pratyakṣāyogāt | tasmāt pratyabhijñāpratyayo bhrānta eva ,nirviṣayatvāt |

prayogaścaivam -yaḥ pratyabhijñāpratyayaḥ sa tattvato naikālambanaḥ , yathā lūnapunarjātatṛṇādiṣu | pratyabhijñā pratyayaścāyaṁ tadevedaṁ nīlādīti pratyaya iti virudhdavyāptopalabdhiḥ | ekatvānekatvayoḥ parasparavirodhāt tadviṣayakasaṁvedanayorapi virodhaḥ tenaikālambanatvena anekālambanatvavirudhdena anekālambanatvena pūrvoktyā nītyā pratyabhijñāpratyayo vyāpta iti na pratyabhijñānaṁ kṣaṇikānumānabādhakam | na ca keśādiṣvapi sāmānyālambanatayā ekālambanatvam keśādivyaktereva pratyabhijñāyamānatvāt | sāmānye pratyabhijñāyamāne tadevedaṁ keśādīti syāt , na tadevedaṁ keśādīti | ata evaikālambanatve pratyabhijñāpratyayasya krametarābhyāmutpattivirodhāt , virudhdānaikāntikatve nāśaṅkanīye | na ca pratyabhijñānameva tadavasthāpakam , yasyaiva vicāryamāṇatvāt | tasmāt sthitametat nityaḥ kartā nāstīti | yadi nityaḥ kartā jagato na kāraṇaṁ , kimasya tarhi kāraṇam ?

sattvānāṁ śubhakarmaṇaḥ jagataḥ kāraṇatvasamarthanam

sattvānāṁ śubhāśubhākhyaṁ karma | yathoktam -

sattvalokamatha bhājanalokaṁ

cittameva racayatyaticitram |

karmajaṁ hi jagaduktamaśeṣaṁ

karma cittamavadhūya na cāsti ||iti||

vaibhāṣikamāśritya punarbhagavatā sarvajñena coktam -

' ākāśaṁ dvau nirodhau ca nityaṁ trayamasaṁskṛtam |

saṁskṛtaṁ kṣaṇikaṁ sarvamātmaśūnyamakartṛkam ||' iti||

sarvajñasamarthanam bhavaparamparāsamarthanaṁ ca

nanu sarvajñasidhdau hi tadvacanaṁ nidarśanīkartumucitam | sarvajñasidhdaye kiṁ pramāṇamiti cet ? ucyate | yo yaḥ sādaranirantaradīrghakālābhyāsakalitacetoguṇaḥ sa sarvaḥ sphuṭībhāvayogyaḥ , yathā yuvatyākāraḥ kāminaḥ puruṣasya | yathoktābhyāsakalitacetoguṇāścāmī caturāryasatyaviṣayākārā iti svabhāvahetuḥ |

na tāvadāśrayadvāreṇa hetudvāreṇa vāsidhdasambhāvanā | saṅkalparuḍhānāṁ caturāryasatyaviṣayākārāṇāṁ dharmiṇāṁ cetoguṇamātrasya ca hetoḥ pratyātmavedyatvāt | na caiṣa virudhdaḥ , sapakṣe kāminyākāre sambhavāt | na cānaikāntikaḥ , abhyāsena sahitacetoguṇasfuṭapratibhāsayoḥ kāraṇakāryayoḥ kumbhakāraghaṭayoriva sarvopasaṁhāreṇa pratyakṣānupalambhataḥ kāryakāraṇabhāvasidhdau abhyāsasahitacetoguṇatvasya sādhanasya sfuṭapratibhāsakāraṇayogyatayā vyāptisidhdeḥ | tathā hi - vyāptyadhikaraṇe kāmāturavartini yuvatyākāre sādaranirantaradīrghakālābhyāsasahitacetoguṇāt pūrvamanupalabdhiḥ sfuṭābhatvasya paścādabhyāsasaṁvedanaṁ ,sfuṭābhasaṁvedanamiti trividhapratyakṣānupalambhasādhyaḥ kāryakāraṇabhāvaḥ sfuṭapratibhāsābhyāsa sahitacittākārayorityupapannā sarvopasaṁhāravatī vyāptiḥ | ato'naikāntikatvābhāvāt anavadyo hetuḥ ||

nanvanena sādhanena caturāryasatyākārāṇāṁ sākṣātkaraṇāt caturāryasatyākārasākṣatkārī vivakṣitassarvajñaḥ sidhyati , na tvaviśeṣeṇa sarvadharmasākṣatkārī , tatastatsidhdaye sādhanāntaramabhidheyam | ucyate - yatpramāṇasaṁvādi niścitārthaṁ vacanaṁ , tat sākṣāt pāramparyeṇa vā tadarthasākṣatkārijñānapūrvakaṁ , yathā dahano dāhaka iti vacanam , pramāṇasaṁvādi niścitārtha cedaṁ vacanaṁ , kṣaṇikāḥ sarvasaṁskārā iti arthataḥ kāryahetuḥ | nāsyāsidhdiḥ , sarvadharmakṣaṇabhaṅgaprasādhanādasya vacanasya satyārthatvāt | nāpi virudhdaḥ , sapekṣe bhāvāt | na cānaikāntikatā , vacanamātrasya saṁśayaviparyāsapūrvakatve'pi pramāṇa saṁvādi ] niścitārthasya [ vacanasya ] sākṣāt pāramparyeṇa vā tadarthasākṣātkārijñānapūrvakatvena pratyakṣānupalambhābhyāmupalambhāt | anyathā dhūmādāvapi hetutyāgaprasaṅgādaśeṣakāryahetūcchedaprasaṅgaḥ ||

bhavaparamparānirupaṇam

syādetat | anekabhavaparamparālakṣaṇena dīrghakālena bhāvyasya saṅkalpāruḍhasya sfuṭābhatvaṁ sambhāvyate | bhavaparamparāsidhdaye tu kiṁ pramāṇam ? ucyate | yaccittaṁ tat cittāntaraṁ pratisandhatte , yathedānīntanaṁ cittam | cittaṁ ca maraṇakālabhāvīti svabhāvahetuḥ | na cārhaccaramacittena vyabhicāraḥ | tasyāgamamātrapratītatvāt niḥ kleśacittāntarajananādvā| hetoḥ kleśe sati | viśeṣāpekṣaṇādi tyanāgatabhavasidhdiḥ | iha pūrvajanmābhyāsāt tapodānādhyayanādau sarvasattvānāmabhyāse pravṛttiriti pravādaḥ | tatastatsidhdaye pramāṇamucyate - yaccittaṁ tat cittāntarapūrvakaṁ yathedānīntanaṁ cittam | cittaṁ ca janmasamayabhāvītyarthataḥ kāryahetuḥ ||

vaibhāṣikamatanirupaṇam

nanu tattvasākṣātkāraṇānmuktiḥ | tattvaṁ caikameva, yathoktam -

' muktistu śūnyatādṛṣṭistadarthāśeṣabhāvanā ' iti |

tatkathaṁ sarvajñadvaitaṁ, baudhdaprabhedaśceti ? naiṣa doṣaḥ | yasmātsarvametad bhūtārthe sattvānavatārayituṁ bhagavatā pratipāditam | tathā hi vaibhāṣikāṇāṁ matam -

' ākāśaṁ dvau nirodhau ca nityaṁ trayamasaṁskṛtam |

saṁskṛtaṁ kṣaṇikaṁ sarvamātmaśūnyamakartṛkam ||'iti ||

sautrāntikānāṁ matam

jñānamevedaṁ sarvaṁ nīlādyākāreṇa pratibhāsate, na bāhyo'rthaḥ , jaḍasya prakāśāyogāt | yathoktam -

'svakārajñānajanakā dṛśyā nendriyagocārāḥ ' ||iti ||

alaṅkāreṇāpyuktam -

yadi saṁvedyate nīlaṁ kathaṁ bāhyaṁ taducyate |

na cetsaṁvedyate nīlaṁ kathaṁ bāhyaṁ taducyate ||

nanu yadi prakāśamānaṁ jñānamevadaṁ , tadā'sti bāhyo'rtha iti kutaḥ ? bāhyārthasidhdistu syādvayatirekataḥ | na hi sarvatra sarvadā nīlādaya ākārāḥ prakāśante|

na caitat svopādānamātrabalabhāvitve sati yujyate | niyataviṣaye pravṛttyayogāt | tasmādasti kiñcideṣāṁ samanantarapratyayavyatiriktaṁ yadbalena kvacit kadācit bhavantīti śakyamavasātum | sa eva bāhyo'rtha iti , na punarasau bāhyo'rthaḥ avayavī , guṇādayo dharmāḥ dravyāśrayiṇaḥ parābhimatāḥ, navavidhaṁ dravyaṁ paramāṇāvo veti | tatra na tāvat guṇādayaḥ , dravyaniṣedhenaiva teṣāṁ niṣedhāt | na cāsati samavāyini dravye samavāya iti tadduṣaṇamatra nādriyate | dravyaṁ ca pṛthivyāpastejovāyurākāśaṁ kālo digātmā mana iti navavidham |

ātmākāśakāladiṅmanasāṁ nirasanam

tatrātmaniṣedhāyedamapi sādhanam - yatkādācitkaṁ jñānaṁ tatkādācitkakāraṇapūrvakam , yathā saudāminījñānam | kādācitkaṁ cedamahaṁkārajñānamityarthataḥ kāryahetuḥ | nāyamasidhdaḥ ahaṁkāre dharmiṇi jñānatvasya pratyakṣasidhdatvāt | nāpi kādācitkaviśeṣaṇamasidhdam , sarvadā'hamiti jñānābhāvāt | nāpi virudhdaḥ , sapakṣe darśanāt | na cānaikāntikaḥ , dhūmapāvakayoriva kādācitkajñānakādācitkakāraṇayoḥ pratyakṣānupalambhābhyāṁ vyāptisidhdeḥ | kādācitkajñānasya cākādācitkakāraṇādutpattau kādācitkakāraṇādanutpattiprasaṅgaḥ | aniyatahetukatāyāṁ cāhetukatāprasaṅgaḥ , tathā'pyanaikāntikatve prasidhdadhūmādiheturapyanaikāntikaḥ syāt , viśeṣābhāvāt | api cāhaṁkārasya akādācitkakāraṇapūrvakatve sadaivodayaprasaṅgaḥ | kāraṇasya kurvadrūpatvāt , akurvataścopacārataḥ kāraṇatvāt , kurvadakurvatoraikyābhāvāt | bhāve vā kurvato'pyakurvadrūpatāpattiḥ , tatsvabhāvatvāt | kiñcāhaṁkārasya akādācitka kāraṇādutpāde yugapadevotpādaprasaṅgaḥ , avyagrasāmagrīkatvāt | nanvahaṁkārasyālambanamātmā na kāraṇamiti cenna | akāraṇasyālambanatvāyogādatiprasaṅgāditi ||

atha kimākāśaṁ nāma kiñcidvastubhūtamasti? uta nāsti vā ? nāstyevaitat | yatra hi sapratighaṁ dravyamasti na tatrākāśamavakāśaṁ vā dadāti | yatra nāsti tatra tadabhāvādevāvakāśaḥ sidhda iti kva vā''kāśamavakāśaṁ dadyāt ? [ yasmādavakāśapradamākāśaṁ bhaṇyate ] tasmāt satyasmin sarvadā sarvathā sarvatrāvakāśaḥ syāt | na caitadasti | tasmānnāstyevākāśamiti pratīmaḥ | etacca vaibhāṣīkamatapekṣya dūṣaṇamuktam |

paraistvākāśaṁ śabdaguṇakamiṣyate | taccaikamiti cet samānadeśatvāt sarvaśabdānāṁ vibhāgena śravaṇaṁ na syāt | tatassannihitadeśa iva dūradeśābhimato'pi śabdaḥ śrūyeta | na vānyo'pītyekāntaḥ | dikkālayoścaikatvāt pūrvāparādipratyayānupapattiḥ | etena nityasyāpi manaso'sambhava eva | tathā hi - yugapajjñānānutpattyā mano'numīyate tadvādibhiḥ | anubhūyanta eva yugapadbahūni jñānāni narttakīdarśanādau | yadi punarmano [ nityaṁ ] syāttadānīmetāni jñānāni na yujyante | tasmānnāstyeva mano'pi ||

avayavinirasanapūrvakaṁ paramāṇumātrasamarthanam

pṛthivyādayo'vaśiṣyante | te cāvayaviparamāṇubhedena dvidhā iṣyante | tatra yo'vayavī ghaṭādiḥ paramāṇubhidvaryaṇukādi krameṇārabdhaḥ prasidhdaḥ , tasya upalabdhi lakṣaṇaprāptasyānupalambho bādhaka ityuktam | yadyavayavī nāsti kathaṁ tarhyayamekatvena pratibhāsata iti cet -

bhāgā eva bhāsante sanniviṣṭāstathā tathā |

tadvānnaiva punaḥ kaścinnirbhāgaḥ sampratīyate ||

ityuktam | nanu ko'yaṁ bhāgapratibhāso nāma ? nānādigdeśāvaṣṣṭambhena sañcitaḥ paramāṇupratibhāsa eva | yadyevaṁ kathaṁ ' pratibhāsadharmaḥ sthaulyam ' ityuktaṁ dharmottareṇa,tatrāpyayamevārthaḥ arthasya svarupeṇa nāsti vedanam, 'bhāktaṁ syādarthavedanam' iti vacanāt | tasmādyo'yaṁ nīlādiprabhāso nānādeśavyāpitvenānubhūyate sa eva sthūlapratibhāsa ityadoṣaḥ ye'pi tadārambhakāḥ paramāṇavo vaiśeṣikāṇāṁ , sākṣādadhyakṣyagocarā vaibhāṣikāṇāṁ darśane, svasvākārasamarpaṇapravaṇāḥ sautrāntikānāṁ mate , te'pi yogācārāṇāṁ darśane na sambhavanti | na khalvekaḥ paramāṇuḥ prasidhdimadhyāste | tasyādharottaracaturdikṣu paramāṇumadhyāsīnasya niyamena ṣaḍaṁśatāpatteḥ |yo hyasya svabhāvaḥ pūrvaparamāṇupratyāsannaḥ na sa evāparaparamāṇupratyāsanno ghaṭate | tayorekadeśatāprāpteḥ | evaṁ ca sa pūrvaparamāṇusannihitasvabhāvo'paraparamāṇuṁ pratyāsīdedyadi so'pi tatra syāt | asatyāmapi pratyāsattāvābhimukhyamātre'pyayameva vṛttāntaḥ | tataśca paramāṇumātraṁ piṇḍaḥ prasaktaḥ ||

yogācārasya matam

athavā'yaṁ vicāraḥ , yadetatpratibhāsamānaṁ tadekaṁ tāvanna yuktam , anantaroktavicārāt | nāpyanekaṁ , paramāṇuśaḥ paramāṇorayogāt | tathā hi - yadyasau sāṁśaḥ kathaṁ paramāṇuḥ ? atha niraṁśaḥ tadā saṁyuktāḥ paramāṇāvaḥ sarvātmanā saṁyogāt parasparamabhinnadeśāḥ syuriti sarvaḥ piṇḍaḥ paramāṇumātraṁ syāt , parvato'pi kṣitirapīti| tasmādavaśyaṁ tayoḥ svabhāvayorbhedo'bhyupetavyaḥ | yathā cānayostathā 'dharottaradakṣiṇottaraparamāṇupratyāsannānāṁ svabhābānāṁ ca bheda iti ṣaḍaṁśataiva paramāṇornyāyabalādāpatati | yadāha -

ṣaṭkena yugapadyogāt paramāṇoḥ ṣaḍāṁśatā |

ṣaṇṇāṁ samānadeśatvāt piṇḍaḥ syādaṇumātrakaḥ ||iti|

na caikāsiddhau anekasyāpi sidhdiriti na santi paramāṇavaḥ | yadi bāhyo'rtho nāsti kiṁ viṣayastarhyayaṁ pratibhāsaḥ ? pratibhāsaḥ khalveṣo'nādivitathavāsanātaḥ pravartamāno nirālambana eva lakṣyate | tathā hi -sati viṣaye sālambanatā syāt | tena cāvayavinā bhavitavyam , paramāṇupracayena vā | sa cāyamubhayo'pyanantarokta bādhakapramāṇa [ grāha ] grastavigraho na vyomatāmarasamatiśete yathoktam -

[ na sannāvayavī nāma na santi paramāṇavaḥ |]

pratibhāso nirālambhaḥ svapnānubhavasannibhaḥ ||iti||

nirālambanavādaḥ

svapnajñānaṁ nirālambanaṁ viditameva | na ca svaprajāgradanubhavayorbhedaḥ kaścidapyasti | sarvaprakārasādharmyadarśanāt | na cānālambanādanavāptarupaviśeṣaṁ vijñānaṁ sālambanasambandhamanubhavitumutsahate | yadanālambanādaviśiṣṭaṁ tadanālambanam , yathaikasmādākāśakeśadarśanāt dvitīyam [ jñānaṁ ] anālambanācca svapnajñānādaviśiṣṭaṁ vivādāspadībhūtaṁ jāgradvijñānamiti svabhāvahetuḥ ||

vijñānasyasya sākāratvanirākāratvapakṣabhedaḥ

yadi bāhyo'rtho nāsti kiṁ tarhi paramārthasat ? grāhyagrāhakādikalaṅkānaṅkitaṁ niṣprapañcavijñānamātraṁ paramārthasat | yathoktam -

' grāhyagrāhakanirmuktaṁ vijñānaṁ paramārthasat ' iti |

punaścoktam -

' nānyo'nubhāvyo budhdyā'sti tasyā nānubhavo'paraḥ |

grāhyagrāhakavaidhuryāt svayaṁ saiva prakāśate ||'

uktaṁ caitadbhagavatā -

' bāhyo na vidyate hyartho yathā bālairvikalpyate |

vāsanāluṭhitaṁ cittamarthābhāsaṁ pravarttate ||'iti ||

sākāravādināṁ matam

tatra kecidevamāhuḥ - vijñānamevedaṁ sarva sarvaśarīraviṣayabhāvena prasidhdam , tacca svasaṁvedanamiti na kasyacit grāhyaṁ grāhakaṁ vā | kalpanayā tu grāhyagrāhakabhāva iti vyavasthāpyate | tataḥ parikalpitagrāhyagrāhakabhāvarahitaṁ vijñānaṁ [ sākāraṁ ] satyamiti |

nirākāravādināṁ matam

anye tu sakalākārakalaṅkānaṅkitaṁ śudhdasfaṭikasaṁkāśaṁ vāstavaṁ vijñānam | ākārāstvamī vitathā evāvidyayā darśitāḥ prakāśante | tasmāt grāhyaṁ nāma nāstyeva grāhyābhāvāt tadapekṣayā yadgrāhakatvaṁ vijñānasya tadapi nāstīti | mādhyamikānāṁ tu darśane tadapi vijñānaṁ na paramārthasat , vicārāsahatvāt | svabhāvena hi yuktaṁ pāramārthika mucyate loke | na cāsya vicārataḥ kaścitsvabhāvo ghaṭate, eko vā'neko vā , pūrvavicārāsahatvāt | yathoktam -

' neṣṭaṁ tadapi dhīrāṇā vijñānaṁ pāramārthikam |

ekānekasvabhāvena viyogādganābjavat ||'iti ||

kīrtipādairapyuktam -

' bhāvā yena nirupyante tadrūpaṁ nāsti tattvataḥ |

yasmādekamanekaṁ vā rupaṁ teṣu na vidyate ||' iti||

tathā'laṅkārakāreṇāpyuktam -

' yadā tu na vikalpasya na cānyasya pramāṇatā |

tadā viśīryamāṇe'pi sarvasmin ko'parādhyatu ||'

'badhdamuktādi bhedo'pi naivāsti paramārthataḥ |

bhedo hi nāvabhātyeva sarvatra samadarśinām ||'iti||

prayogaḥ punarevam - yadekānekasvabhāvaṁ na bhavati na tatparamārthasat , yathā vyomakamalam ,ekānekasvabhāvaṁ ca na bhavati vijñānamiti vyāpakānupalabdhiḥ | na tāvadayamasidhdo hetuḥ | sākāre jñāne bahirartha iva ekānesvabhāvāyogyatvasya parisfuṭatvāt | yatra hi lokasya bāhyārthavyavahārastadeva sākāravādino jñānam , tato yattasya bahirbhāve bādhakaṁ tadevāntarbhāve'pi bādhakam | na hi sthūlamekamanekaṁ ca paramāṇurupamapīṣyate | vijñānātmakānāmayamākāro yadyekaḥ sthūlo yati vā'nekaḥ paramāṇuśo bhinnaḥ , ubhayathā'pi bāhyārthapakṣabhāvi dūṣaṇamaśakyamurdhdatum | na hi tadvijñāne bahirbhāvanibandhanaṁ dūṣaṇam! yena tadbhāvena bhavet | mūrtinimittaṁ bādhakam,

nāmūrte vijñānātmani ityapi nissāram | sākāratāyāṁ vijñānasyāpi mūrtatvāt | ayameva hi deśāvitānavā [ nākāro ] mūrtiriti ||

śrīmanmahājagaddalavihārīya mahāpaṇḍita bhikṣumokṣākaraguptaviracitāyāṁ tarkabhāṣāyaṁ parārthānumānaparicchedaḥ tṛtīyaḥ samāptaḥ ||

granthāgraṁ ślokamānaṁ 840

tarkabhāṣāmimāṁ kṛtvā puṇyamāsādi yanmayā |

tena yuṇyena loko'yaṁ budhdatvamadhigacchatu ||

* yādṛśaṁ pustake dṛṣṭaṁ tādṛśaṁ likhitaṁ mayā |

yadi śudhdamaśudhdaṁ vā mama doṣo na dīyate ||

udakānalacaurebhyaḥ mūrkhakebhyastathaiva ca |

kaṣṭena likhitaṁ śāstraṁ yatnena paripālayet ||*

tarkabhāṣā samāptā

Technical Details

Text Version: 

Romanized

Input Personnel: 

DSBC Staff

Input Date: 

2007

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0