piṇḍīkramaḥ

ācāryanāgārjunapraṇītaḥ

piṇḍīkramaḥ

namaḥ sarvajñāya

trailokyācāramuktaṁ gaganasamagataṁ sarvabhāvasvabhāvam,
śuddhaṁ śāntaṁ viviktaṁ paramaśivamayaṁ yogināmeva gamyam|
durbodhaṁ durvicāraṁ svaparahitatamaṁ vyāpinaṁ nirnimittam,
vande kāyaṁ jinānāṁ sukhamasamasamaṁ nirvikalpaikamūrtim||1||

śrīmatsamājatantrasya ṣaṭkoṭyarthāvabodhataḥ|
piṇḍīkramamahaṁ vakṣye sarvasattvahitodayam||2||

vikalpavāsanādoṣān jagattrayavimohakān|
samabhivīkṣya tān dhīmān yogatantreṇa śodhayet||3||

pañca kāmān parityajya tapobhirna ca pīḍayet|
sukhena dhārayed vodhiṁ yogatantrānusārataḥ||4||

teneha saṁvarastho'yamabhedastu sadā vratī|
kāyavākcittavajrasya sādhanaṁ tu samārabhet||5||

mahāṭavīpradeśeṣu phalapuṣpādyalaṅkṛte|
parvate vijate sādhyaṁ sarvasiddhisamuccayam||6||

mṛdvāsanasamāsīnaḥ sattvaparyaṅkasaṁsthitaḥ|
dveṣavajrasamādhisthaḥ sthānarakṣāṁ vicintayet||7||

daśakrodhān samutsṛjya jvālābhāsurabhīṣaṇān|
hūṁkārodbhūtabhānusthān pratyālīḍhapade sthitān||8||

daśadigmaṇḍalāgre tu sañcintyaivaṁ yathākramam|
sarvavidhnavināśārthaṁ sumbhamājñāya kīlayet||9||

aṁ sumbha nisumbha hūṁ gṛhṇa gṛhṇa hūṁ gṛhṇāpaya gṛhṇāpaya hūṁ ānaya ho bhagavan vidyārāja hūṁ phaṭ|

anena krodharūpeṇa ākṛṣyaivaṁ vināyakān|
kīlayed vidhivat sarvān prayogeṇa tu buddhimān||10||

vajrāmṛtamahārājaṁ vrajakīlaṁ vibhāvayet|
nīlotpaladalaśyāmaṁ jvālāmālākulapratham||11||

nābhideśādadhoobhāgaṁ śūlākāraṁ vibhāvayet|
ūrdhvaṁ krodhākṛtiṁ caiva trimukhākāraṣaḍbhujam||12||

adho vighnagaṇān vīkṣya tān mantraṁ samudāharan|
nikhanet vajrakīlaṁ tu vighnadeheṣu niścalam||13||

oṁ gha gha ghātaya ghātaya sarvaduṣṭān phaṭ phaṭ kīlaya kīlaya sarvapāpān phaṭ phaṭ hūṁ hūṁ hūṁ vajrakīla vajradhara ājñāpayati sarvavighnānāṁ kāyavākcittavajraṁ kīlaya hūṁ hūṁ hūṁ phaṭ|

vajramudgarahastaṁ ca sumbharājaṁ vibhāvayet|
vajravahniṁ samantācca vispharantaṁ vicintya vai|
duṣṭān pralapitāṁścinted dahyamānānitastataḥ||14||

daśadik kīlayitvā tu adha ūrdhvamadhiṣya ca|
bhāvayet paramārthena niḥsvabhāvabhavatrayam||15|

abhāve bhāvanābhāvo bhāvanā naiva bhāvanā|
iti bhāvo na bhāvaḥ syād bhāvanā nopalabhyate||16||

anayā gāthayā śūnyaṁ dhyātvā sthiracarātmakam|
anena vidhiyogena jñānabhūmiradhiṣyate||17||

ākāśadhātumadhyasthaṁ bhāvayed vāyumaṇḍalam|
dvi-hūṁ yaṁ bījaniṣpannaṁ vajradvayasamāyutam||18||

agnimaṇḍalakaṁ cāpi tasyopari vibhāvayet|
dvi-hūṁ raṁ bījaniṣpannaṁ vajradvayasamāṅkitam||19||

vārimaṇḍalakaṁ cāpi tasyopari vibhāvayet|
dvi-hūṁ vaṁ bījaniṣpannaṁ vajradvayasamāyutam||20||

pṛthvīmaṇḍalakaṁ cāpi tasmopari vibhāvayet|
dvi-hūṁ laṁ bījaniṣpannaṁ vajradvayasamanvitam||29||

caturmaṇḍalasaṁhāre vajrabhūbhāgamaṇḍalam|
tatra bhrūṁkāraniṣpatraṁ kūṭāgāraṁ vibhāvayet||22||

caturastraṁ caturdvāraṁ catustoraṇaśobhitam|
catuḥsūtrasamāyuktamaṣṭambhopaśobhitam||23||

hārārddhahāraracitaṁ maṇivajrārdhacandrakam|
khacitaṁ vajraratnaistu dvāraniryūhasandhiṣu||24||

kumbhastambhamahāvajraṁ kramaśīrṣastu pakṣiṇī|
ghaṇṭāpatākasaṁśobhaṁ cāmarādivibhūṣitam||25||

madhyamaṇḍalake dhyāyādātmānaṁ mudrayā yutam|
trimukhaṁ ṣaḍbhujākāramindranīlasamapratham||26||

śrīvairocana-ratnau ca amitābhaśca karmarāṭ|
pūrvādidikṣu sañcintyāstrimukhākāraṣaḍbhujāḥ||27||

moharatyādikā devyastrimukhākāraṣaḍbhujāḥ|
āgneyīṁ diśāmārabhya sanniveśyā yathākramam||28||

rūpavajrādikāstadvad bāhyakoṇacatuṣṭaye|
sthitaiva sparśavajrā tu vajrasattvasamāyutā||29||

paṭṭikāyāṁ nyaset pūrve maitreyaṁ kṣitigarbhakam|
vajrapāṇiṁ khagarbhaṁ ca nyased dakṣiṇato vratī||30||

lokeśaṁ mañcughoṣaṁ ca paścimāyāṁ nyaset punaḥ|
sarvāvaraṇaviṣkambhiṁ samantabhadrañcottare||31||

yamāntakaśca prāgdvāre dakṣiṇe tvaparājitaḥ|
paścime tu hayagrīva uttare'mṛtakuṇḍaliḥ||32||

acalaṣṭakkirājaśca nīladaṇḍo mahābalaḥ|
pūrvādikoṇamārabhya pravicintyā yathāyatham||33||

sumbharājamahākrodhamadhastāt pravicintayet|
uṣṇīṣacakravartī ca pravicintyastathopari||34||

dhyātvaivamadhimuktayā vai māṇḍaleyān yathāvidhi|
punaḥ sampuṭayogena svakāye tān praveśayet||35||

kāyacakragatān buddhān sañcintyaivaṁ yathāyatham|
pāramārthikacakreṇa tathatāyāṁ praveśayet||36||

mārayet tvāgataṁ vyūhaṁ sutarāṁ siddhimāpnuyāt|
asyārtho vajramālāyāṁ vistṛto visphuṭaṁ yathā||37||

rūpaskandhagatādarśo bhūdhāturnayanendriyam|
rūpaṁ ca pañcamaṁ yāti krodhamaitreyasaṁyutam||38||

vedanā skandhasamatā abdhātuḥ śravaṇendriyam|
śabdaśca pañcamaṁ yāti krodhadvayasamanvitam||39||

saṁjñā ca pratyavaikṣaṇyaṁ hutabhug nāsikendriyam|
gandhaśca pañcaṁ yāti krodhadvayasamanvitam||40||

saṁskāraḥ kṛtyānuṣṭānaṁ māruto rasanendriyam|
rasaśca pañcamaṁ yāti krodhadvayasamanvitam||41||

urdhvādhaḥ krodhasaṁyuktaṁ prakṛtyābhāsameva ca|
vijñānaskandhamāyāti vijñānaṁ ca prabhāsvaram||42||

nirvāṇaṁ sarvaśūnyaṁ ca dharmakāyaśca gadyate|
dṛḍhīkaraṇahetutvān mantrametadudāharet||43||

oṁ śūnyatājñānavajrasvabhāvātmako'ham|

paramārthamaṇḍalaṁ hyetannirābhāsamalakṣaṇam|
paramārthasatyanāmāpi sarvatāthāgatālayaḥ||44||

prabhāsvarapraviṣṭasya vyutthānaṁ ca pradarśate|
mantramūrtiprayogeṇa devatālambanaṁ prati||45||

ākāśadhātumadhyasthaṁ bhāvayet sūryamaṇḍalam|
tasyopari punarmantrī candrabimbaṁ vibhāvayet||46||

tatra cāṣṭadalaṁ padmaṁ raktavarṇaṁ vibhāvayet|
padmopari mahāmantraṁ tryakṣaraṁ bhāvayet punaḥ||47||

mantraṁ padmaṁ tathā sūryaṁ praviṣṭaṁ candramaṇḍale|
candramaṇḍalamāpūrṇaṁ bodhicittaṁ vibhāvayet||48||

sthāvaraṁ jaṅgamaṁ sarvaṁ tatraiva pravicintayet|
dṛḍhīkaraṇahetutvānmantrametadudāharet||49||

oṁ dharmadhātusvabhāvātmako'ham|

yogamevaṁ samālambya anuyogaṁ samācaret|
punaśca tryakṣaraṁ yogī candramadhye vicintayet||50||

tatastryakṣarasambhūtaṁ sitakundendusannibham|
ādināthaṁ vicintyātha atiyogaṁ samārabhet||51||

akṣobhyānupraveśena trimukhaṁ ṣaḍbhujojjvalam|
indranīlaprabhaṁ dīptaṁ vajrasattvaṁ vibhāvayet||52||

vajraṁ cakraṁ tathā padmaṁ savyahasteṣu bhāvayet|
ghaṇṭāṁ ratnaṁ tathā khaṅgaṁ vāmahasteṣu bhāvayet||53||

tato nyāsaṁ prakurvīta skandhādīnāṁ vibhāgavit|
vairocanādisumbhāntaṁ bījanyāsena tattvataḥ||54||

vairocanīyabījaṁ tu oṁkāraṁ śuklavarṇakam|
rūpaskandhasvabhāvena nyasen mūrdhani mantravit||55||

āḥkāramamittābhasya saṁjñāskandhasvabhāvakam|
raktavarṇaṁ mukhe dhyātvā vāgaiśvaryamavāpnuyāt||56||

akṣobhyasya tu hūkāraṁ rājāvartakasuprabham|
vinyaseddhṛdaye mantrī vijñānaskandharūpataḥ||57||

svākāraṁ ratnanāthasya vedanāskandharūpataḥ|
pītavarṇaṁ nyasennābhau vedanāśuddhihetukam||58||

pādadvaye tu hāḥkāraṁ saṁskāaskandhabhāvataḥ|
haritābhaṁ nyasenmantrī karmanāthasya tattvataḥ||59||

moharatyādikairmantrī pṛthivyādīn praveśayet|
kharatvaṁ dravatā auṣṇyamīraṇatvaṁ ca te kramāt||60||

thlīṁkāraṁ cakṣuṣi nyasya kṣitigarbhaṁ vibhāvayet|
oṁkāraṁ karṇayornyasya vajrapāṇiṁ vibhāvayet||61||

oṁkāraṁ vinyased ghrāṇe khagarbhaṁ tu vibhāvayet|
oṁkāraṁ rasane dhyātvā lokeśaṁ ca vikalpayet||62||

hūṁkāraṁ manasi dhyātvā mañjughoṣaṁ prabhāvayet|
oṁkāraṁ sarvakāye ca dhyātvā viṣkambhiṇaṁ smaret||63||

maiṁ-kāreṇa śiraḥsaṁsthaṁ maitreyaṁ parikalpayet|
bhadraṁ samantato dhyātvā sarvasandhiṣu sannyaset||64||

yamāntakaḥ savyabhuje apasavye'parājitaḥ|
hayagrīvo mukhe bhāvyo vajre cāmṛtakuṇḍaliḥ||65||

acalaṁ dakṣiṇe bhāge vāme ca ṭakkirājakam|
jānau ca dakṣiṇe cintennīladaṇḍaṁ mahojjavalam||66||

vāmajānau mahābalaṁ mūrdhni coṣṇīṣajriṇam|
pādāntadvayavinyastaṁ sumbharājaṁ vicintayet||67||

nyāsaṁ kṛtvā tato mantrī skandhādīnāṁ yathāvidhi|
kāyamaṇḍalamāpanno mahāyogaṁ samārabhet||68||

mūrdhni madhyagataṁ cintet sampūrṇaṁ candramaṇḍalam|
tatra oṁkāraṁ śuklābhaṁ prasphurat-pañcaraśmikam||69||

tato devīṁ viniścārya ādhipatyaprayogataḥ|
locanāṁ vividhāṁ cintet sarvavyomni prapūritām||70||

kāyavajraṁ vicintyātha vyomāpūrya vyavasthitam|
tanmadhye'dhipatiṁ cintedātmanaśca puraḥsthitam||71||

dvātriṁśallakṣaṇadharaṁ vyañcanāśītibhūṣitam|
prārthayet tu tato mantrī gāthādvayamudāharan||72||

buddhakāyadharaḥ śrīmāṁstrivajrābhedyabhāvitaḥ|
adhiṣṭhānapadaṁ me'dya karotu kāyavajriṇaḥ||73||

daśadiksaṁsthitā buddhāstrivajrābhedyabhāvitāḥ|
adhiṣṭhānapadaṁ me'dya kurvantu kāyavajriṇaḥ||74||

locanāsahasaṁyuktaṁ śāścataṁ ca vibhāvayet|
tatpraveśyādhitiṣṭheta pañcuskandhaprapūritam||75||

yatkāyaṁ sarvabuddhānāṁ pañcaskandhaprapūritam|
buddhākāyasvabhāvena mamāpi tādṛśaṁ bhavet||76||

oṁ sarvatathāgatakāyavajrasvabhāvātmako'ham|

jihvābjamadhyagataṁ cinted āḥkāraṁ raktavarṇakam|
pāṇḍarākhyāṁ ca sagaṇāṁ saṁspharet vyomapūritām||77||

vāgvajraṁ ca tathā mantrī vyomāpūrya vyavasthitam|
prārthayet tu tato mantrī gāthādvayamudāharan||78||

dharmo vai vākpathaḥ śrīmāṁstrivajrābhedyabhāvitaḥ|
adhiṣṭhānapadaṁ me'dya karotu vāgvajriṇaḥ||79||

daśadiksaṁsthitā buddhāstrivajrābhedyabhāvitāḥ|
adhiṣṭhānapadaṁ me'dya kurvantu vāgvajriṇaḥ||80||

svanāyakena saṁyuktāṁ pāṇḍarāṁ sahasaiva tu|
jihvāpraviṣṭāṁ sañcintya vāgadhiṣṭhānamārabhet||81||

yadeva vajradharmasya vācā niruktisampadā|
mamāpi tādṛśī vācā bhaved dharmadharopamā||82||

oṁ sarvatathāgatavāgvajrasvabhāvātmako'ham|

vinyasya hṛdaye mantrī śaśibimbaṁ samujjvalam|
rājāvartanibhaṁ tatra hūṁkāraṁ pañcaraśmikam||83||

tato niścārayed devīṁ māmakīṁ sagaṇāṁ tataḥ|
cittavajraṁ tathā dhyātvā prārthayeta yathā puraḥ||84||

cittavajradharaḥ śrīmāṁstrivajrābhedyabhāvitaḥ|
adhiṣṭhānapadaṁ me'dya karotu cittavajriṇaḥ||84||

daśadiksaṁsthitā buddhāstrivajrābhedyabhāvitāḥ|
adhiṣṭhānapadaṁ me'dya kurvantu cittavajriṇaḥ||84||

cittavajrasamāyuktaṁ hṛdaye sampraveśya ca|
māmakīvyūhamakhilaṁ cittādhiṣṭhānamārabhet||87||

yaccittaṁ samantabhadrasya guhyakendrasya dhīmataḥ|
mamāpi tādṛśaṁ cittaṁ bhaved vajradharopamam||88||

oṁ sarvatathāgatacittavajrasvabhāvātmako'ham|

evaṁ pṛthagadhiṣṭhāya kulatrayavibhāgataḥ|
punaḥ sarvātmakaṁ kuryānmantreṇānena buddhimān||89||

oṁ sarvatathāgatakāyavākcittavajrasvabhāvātmako'ham|

adhiṣṭhāyaivamātmānaṁ śaśimaṇḍalamadhyagam|
ṣaḍbhiścihnaiḥ samāyuktaṁ cintet samayasattvakam||90||

hṛnmadhyasaṁsthitaṁ sūkṣmaṁ jñānasattvaṁ vibhāvayet|
samādhisattvasaṁjñaṁ ca hūṁkāraṁ taddṛḍhī nyaset||91||

niṣpādyaivaṁ mahāyogaṁ trisattvātmakamātmavān|
anena vidhiyogena mahāsādhānamārabhet||92||

prāpya kanyāṁ viśālākṣīṁ rūpayauvanamaṇḍitām|
nīlotpaladalaśyāmāṁ rajakasya mahātmanaḥ||93||

suśikṣitāṁ samādāya sādhake bhaktivatsalām|
oṁkāraṁ śirasi dhyātvā āḥkāraṁ vākyathe nyaset||94||

hūṁkāraṁ hṛdaye dhyātvā svā nābhau hā dvipādayoḥ|
locanāṁ māmakīṁ cāpi tathā pāṇḍaravāsinīm||15||

tārāṁ cāpi tathā mantrī pṛthivyādiṣu sannyaset|
rūpavajrādikā devīstasyāmeva vibhāvayet|| 96||

kṣitigarbhādibhistāsāṁ samāpattiṁ vibhāvayet|
dakṣiṇe vajravetālīṁ bhuje vāme'parājitām||97||

bhṛkuṭiṁ ca mukhe tasyā ekajaṭāṁ ca guhyake|
bhūyo dakṣiṇapārśvasthāṁ viśvavajrīṁ tathāgatīm||98||

viśvaratnāṁ ca vāme tu mudrāyāḥ pravibhāvayet|
purnadakṣiṇajānusthāṁ viśvapadmāṁ tathāgatīm||99||

viśvakarmāṁ ca vāme tu mūrdhni gaganavajriṇīm|
pādāntadvayavinyastāṁ dharaṇīndharadevatīm||100||

evaṁ saṁskṛtya tāṁ yogī vajrapadmathārabhet|
mantrī hūṁkārajaṁ vajraṁ dhyāyād vai pañcasūcikam||101||

madhyasūcau tathā tasya praṇavaṁ va vibhāvayet|
tathaivāṣṭadalaṁ padmam āḥkāreṇa tu bhāvayet|
pañcaraśmisamākīrṇaṁ tataḥ sādhanamārabhet||102||

oṁ sarvatathāgatānurāgaṇavajrasvabhāvātmako'ham|

hūṁkāragītena tu cālayeta
samudvahan vajradharasya garvam|
svabodhicittodayakāla eva
phaṭkāramantraṁ samudīrayet saḥ||103||

visargānte punarmantrī bodhicittena pūjayet|
daśadiksaṁsthitān buddhān mantrametadudīrayet||104||

oṁ sarvatathāgatapūjājrasvabhāvātmako'ham|
svamantrākṣaraniṣpannaṁ trivajrādhiṣṭhitasvakam|
padmamadhye tu niṣpādya dveṣavajro bhavet punaḥ||105||

vajradhṛg-mantraniṣpannaṁ paśyedakṣobhyavajriṇam|
jaṭāmukuṭadharaṁ nātham akṣobhyakṛtaśekharam||106||

nṛpāvartakasaṅkāśaṁ kṛṣṇaraktasitānanam|
sarvālaṅkārasampūrṇaṁ ṣaḍbhujaṁ tu vibhāvayet||107||

vajraṁ cakraṁ tathā padmaṁ savyahasteṣu dhārayet|
ghaṇṭāṁ cintāmaṇiṁ khaḍgaṁ tasya vāmeṣu bhāvayet||108||

niṣkramya hṛdayādeṣa vyavalokya diśo daśa|
buddharddhimakhilāṁ kṛtvā dharmacakraṁ pravartya ca||109||

saṁśodhya nikhilān sattvān dveṣavajrapade sthitān|
āgatya vajranāthasya purato'bhiniṣīdati||110||

anupraveśya tanmantrī hṛdyātmānaṁ vibhāvayet|
pūrvarūpaṁ parāvṛttya dveṣavajrapade sthitaḥ||111||

indranīlaprabhaṁ dīptaṁ sūryamaṇḍalamadhyagam|
svamudrāliṅgitaṁ vīraṁ sarvālaṅkārabhūṣitam||112||

raudraśāntamahārāgaṁ mukhatrayavirājitam|
dveṣavajrasamādhisthaḥ protsṛjet sarvamaṇḍalam||113||

jinajig-mantraniṣpannaṁ sṛjed vairocanaṁ vibhum|
śaraccandrāṁśusaṅkāśaṁ jaṭāmukuṭamaṇḍitam||114||

sitaraktakṛṣṇavadanaṁ ṣaḍbhujaṁ śāntarūpiṇam|
cakravajrasitāmbhojaṁ dakṣiṇeṣu vicintayet||115||

ghaṇṭāṁ cintāmaṇiṁ khaḍgaṁ vāmeṣvasya vibhāvayet|
hṛdayāt tathaiva nirgatya mohacaryāsthitāḥ prajāḥ||116||

saṁśodhya punarāgatya punaścake niṣīdati|
ratnadhṛg-mantraniṣpannaṁ ratnaketuṁ sṛjed budhaḥ||117||

jaṭājūṭadharaṁ saumyamakṣobhyakṛtaśekharam|
pītakṛṣṇasitāsyaṁ ca ṣaḍbhujaṁ cāpi cintayet||118||

tasya cintāmaṇiṁ vajraṁ cakraṁ savyeṣu bhāvayet|
ghaṇṭāṁ ca pītakamalaṁ khaḍgaṁ vāmeṣu bhāvayet||119||

hṛdayāt tathaiva nirgatya ahaṅkārapade sthitān|
saṁśodhya dakṣiṇe bhāge ratnamadhye niṣīdati||120||

ārolig-mantraniṣpannaṁ sṛjedamitavajriṇam|
padmarāgaprabhaṁ saumyamakṣobhyakṛtaśekharam||121||

jaṭāmukuṭadharaṁ nāthaṁ raktakṛṣṇasitānanam|
śṛṅgārarasasaṁyuktaṁ ṣaḍbhujaṁ tu vibhāvayet||122||

padmanālaṁ gṛhītvā tu vāmena saha ghaṇṭayā|
hṛtpradeśasthitaṁ padmaṁ dakṣiṇena vikāśayet||123||

savyayorvajracakre tu vāmayoḥ ratnakhaḍgakau|
pūrvavad rāgiṇaḥ śodhya pṛṣṭhato'bje niṣīdatī||124||

amoghavajriṇaṁ mantrī prajñādhṛg-mantranirmitam|
haritābhaṁ sṛjennāthaṁ jaṭāmukuṭamaṇḍitam||125||

haritakṛṣṇasitāsyaṁ ca ṣaḍbhujaṁ raśmibhāsuram|
khaḍgaṁ ca viśvavajraṁ ca cakraṁ savyeṣu bhāvayet||126||

ghaṇṭāmapasavyahasteṣu haritapadmaṁ maṇiṁ tathā|
abhūtavacasaḥ sattvān viśodhya punarāgataḥ||127||

uttarasyāṁ diśi tathā viśvavajre niṣīdati|
dveṣo mohastathā rāgaścintāmaṇiḥ samayastathā||128||

kulā hyete tu vai pañca kāmamokṣaprasādhakāḥ|
mantrānmoharaterjātāṁ sṛjed devīṁ tu locanām||129||

śvetāṁ śāntarasopetāṁ mūrdhni vairocanāṅkitām|
sitaraktakṛṣṇavadanāṁ ṣaḍbhujāṁ tu vibhāvayet||130||

savye cakraṁ va vajraṁ ca tathaiva sitamutpalam|
vāme ghaṇṭāṁ tathā ratnaṁ khaḍgaṁ cāpi vibhāvayet||139||

hṛdayāt tu vinirgatya vyavalokya diśo daśa|
grahavyādhyāture loke śāntiṁ kṛtvā mahākṛpā||132||

āgatya cakramadhye tu pūrvakoṇe niṣīdati|
mantrād dveṣaraterjātā sṛjed devīṁ tu māmakīm|

nīlotpaladalaśyāmāṁ cāruvaktrāṁ manoramām|
kṛṣṇaraktasitāsyāṁ ca akṣobhyakṛtaśekharām||134||

savyeṣu vajraṁ cakraṁ ca nīlaraktotpalaṁ tathā|
ghaṇṭāṁ ratnaṁ ca khaḍgaṁ ca vāhasteṣu dhārayet||135||

mahāvighnabhayārtānāṁ rakṣāṁ kṛtvā mahākṛpā|
niṣkramya punarāgatya nairṛtyāṁ sā niṣīdati||136||

mantrād rāgaraterjātā sṛjet pāṇḍaravāsinīm|
raktakṛsṇasitāsyāṁ vai padmarāgamaṇiprabhām||137||

sāmitābhajaṭājūṭāṁ ṣaḍbhujāṁ tu vibhāvayet|
gṛhītvolpalanālaṁ tu vāmena saha ghaṇṭayā||138||

utpalaṁ hṛtpradeśasthaṁ rakta savyena bodhayet|
vajraṁ cakraṁ ca savyābhyāṁ maṇiṁ khaḍgaṁ ca vāmataḥ||139||

dhārayantī vinirgatya śāntiṁ kṛtvā mahāture|
āgatya padmamadhye vai vāyukoṇe niṣīdati||140||

mantrād vajraraterjātāṁ sṛjet tārāṁ manoramām|
haritakṛṣṇasitāsyāṁ ca dūrvāpatrasamaprabhām||141||

amoghena kṛtosṇīṣāṁ ṣaḍbhujāṁ tu vibhāvayet|
viśvavajraṁ ca cakraṁ ca savyato'sitamutpalam||142||

vāmeṣu vinyased ghaṇṭāṁ ratnaṁ khaḍgaṁ tathā vratī|
sarvasattvān vaśīkṛtya viśvavajrāsanā punaḥ||143||

nirgatā'sau samāgamya śivasthāne niṣīdati|
dvitīye tu puṭe yogī rūpavajrādikaṁ sṛjet||144||

agnikoṇe sṛjed devīṁ rūpavajrāṁ manoramām|
trimukhāṁ ṣaḍbhujāṁ śvetāṁ śrīvairocanamaulikām||145||

gṛhītadarpaṇāṁ dvābhyāṁ śeṣaṁ moharateriva|
nairṛtyāṁ vinyased devīṁ śabdavajrāṁ tu ṣaḍbhujām||146||

pītavarṇāṁ trivaktrāṁ ca ratnasambhavamaulikām|
vīṇāvyagradvihastāṁ ca śeṣaṁ māmakīvad bhavet||147||

vāyusthāne nyased devīṁ gandhavajrāṁ tu ṣaḍbhujām|
raktavarṇāṁ trivaktrāṁ ca amitābhajaṭādharām||148||

śaṅkhavyagradvihastāṁ ca śeṣaiḥ pāṇḍaravāsinīm|
aiśānyāṁ vinyased devīṁ rasavajrāṁ tu ṣaḍbhujām||149||

trimukhāṁ śyāmavarṇā ca dandubhisvaramaulikām|
hastastharasabhāṇḍāṁ ca śeṣaistārāsamākṛtim||150||

vajrasattvaṁ samāliṅgya cakramadhye vyavasthitām|
cintayet sparśavajrāṁ tu patitulyāṁ mukhādibhiḥ||151||

tṛtīye tu puṭe pūrve paṭṭikāyāṁ sṛjed vratī|
maiṁ-thlīṁ bījaviniṣpanau maitreyakṣitigarbhakau||152||

praṇavena samutpannau vajrapāṇikhagarbhakau|
paṭṭikāyāṁ sṛjenmantrīṁ dakṣiṇāyāṁ yathākramam||153||

o-hūṁkāraviniṣpannaṁ lokeśaṁ mañcughoṣakam|
paścimāyāṁ sṛjedetāvuttarasyāṁ punaḥ sṛjet||154||

oṁ-saṁ-bījaviniṣpannaṁ saviṣkambhisamantakam|
ete svanāthamukuṭā varnādyaistatsamāḥ punaḥ||155||

bhujaiḥ praharaṇaiścāpi svasvādhipatibhiḥ samāḥ|
maitreyaḥ kevalaṁ savye nāgapuṣpaṁ bibharti ca||156||

saṁśodhyāyatanānyete divyanetrādidāyakāḥ|
sattvānāṁ punarāgatya niṣīdantyāsaneṣu vai||157||

yamāntakṛnmantrabhavaṁ kṛṣṇaraktasitānanam|
yamāntakaṁ sṛjenmantrī suliṅgagahanākulam||158||

daṇḍaṁ cakraṁ tathā vajraṁ savyahasteṣu dhārayan|
hṛddeśe tarjanīpāśaṁ ghaṇṭā paraśuṁ ca vāmataḥ||159||

vighnān santrāsayan ghorān indrādīn sagaṇānapi|
padmasūryaṁ samākramya pūrvasyāṁ diśi tiṣṭhati||160||

prajñāntakṛnmantrabhavaṁ ratnasambhavamaulikam|
aparājitaṁ sṛjenmantrī śvetābhamahibhūṣaṇam||161||

sitakṛṣṇaraktavadanaṁ bṛhatkukṣiṁ trilocanam|
daṁṣṭrākarālavikaṭaṁ sphuliṅgagahanākulam||162||

vajraṁ daṇḍaṁ tathā khaḍgaṁ savyahasteṣu dhārayan|
hṛddeśe tarjanīpāśaṁ ghaṇṭāṁ paraśuṁ ca vāmataḥ||163||

vighnān santrāsayan ghorān pratyālīḍhapadena tu|
padmasūryaṁ samākramya yāmyāṁ diśi sa tiṣṭhatio||164||

yamāntakṛnmantrabhavaṁ hayagrīvaṁ sṛjed vratī|
padmarāganibhaṁ tryakṣaṁ raktakṛṣṇasitānanam||165||

karālāsyaṁ bṛhatkukṣimamitābhakirīṭinam|
pratyālīḍhapadaṁ vīraṁ sphuliṅgagahanākulam||166||

padmaṁ khaṅgaṁ ca musalaṁ savyahasteṣu bhāvayet|
ghaṇṭāṁ sagarvaparaśuṁ pāśaṁ savyetareṣu ca||167||

padmasūryaṁ samāruhya vyavalokya diśo daśa|
vidhnasantrāsanaṁ kṛtvā vāruṇyāṁ diśi tiṣṭhati||168||

vidhnāntakṛnmantrabhavaṁ dundubhisvaramaulikam|
nīlotpaladalaśyāmaṁ sṛjedamṛtakuṇḍalim||169||

nīlaraktasitāsyaṁ ca karālamukhavibhramam|
bṛhatkukṣiṁ trinayanaṁ raktajvālāvibhūṣitam||170||

viśvavajraṁ tathā vakraṁ musalaṁ cāpi savyataḥ|
dhārayaṁstarjanīpāśaṁ ghaṇṭāṁ paraśuṁ ca vāmataḥ||171||

vidhnasantrāsanaṁ kṛtvā pratyālīḍhapadena tu|
padmasūryaṁ samāruhya kauberyāṁ diśi tiṣṭhati||172||

svamantrākṣaraniṣpannamacalaṁ ca sṛjet punaḥ|
indranīlaprabhaṁ tryakṣaṁ śrīvairocanamaulikam||173||

daṁṣṭrākarālavadanaṁ kṛṣṇaraktasitānanam|
aṭṭahāsaravaṁ ghoraṁ bṛhatkukṣiṁ mahābalam||174||

khaṅkaṁ vajraṁ tathā cakraṁ savyahasteṣu dhārayet|
tarjanīṁ cāpi paraśuṁ pāśaṁ vāmeṣu pāṇiṣu||178||

vighnān jvarādikān hatvā pratyālīḍhapadena tu|
padmasūryaṁ samāruhya vahnisthāne sa tiṣṭhati||176||

svamantrākṣaraniṣpannaṁ ṭakkirājaṁ sṛjed vratī|
indranīlaprabhaṁ vīraṁ ratnasambhamaulikam||177||

kṛṣṇaraktasitāsyaṁ ca bṛhatkukṣiṁ bhayānakam|
dadhānaṁ vajraṁ hūṁkāramudrāṁ paṇidvayena tu||178||

vajraṁ khaḍgaṁ ca savyābhyāṁ vāmataḥ pāśamaṅkuśam|
pratyālīḍhena sūryastho nairṛtyāṁ vidhnanāśakaḥ||179||

svamantrākṣaranispannaṁ nīladṇḍaṁ sṛjed vratī|
nīlameghanibhaṁ tryakṣamamitābhakirīṭinam||180||

nīlaraktasitāsyaṁ ca bṛhatkukṣiṁ bhayāvaham|
daṇḍaṁ khaṅgaṁ tathā savyahasteṣu dhārayan||181||

hṛdeśe tarjanīpāśaṁ padmaṁ paraśuṁ ca vāmataḥ|
hatvetyupadravabhayaṁ pratyālīḍhapade sthitaḥ||182||

padmasūryaṁ samāruhya vāyavyāṁ diśi tiṣṭhati|
svamantrākṣaraniṣpannaṁ dundubhisvaramaulikam||183||

mahābalaṁ sṛjenmantrī nīlotpaladalaprabham|
kṛṇṇaraktasitāsyaṁ ca tryakṣaṁ bhairavanāditam||184||

nāgabhūṣitasarvāṅgaṁ bṛhatkukṣiṁ bhayānakam|
daṇḍaṁ khaḍgaṁ tathā cakraṁ savyahasteṣu dhārayan||185||

hṛddeśe tarjanīpāśaṁ padmaṁ paraśuṁ ca vāmataḥ|
ḍākinyādibhayadhvaṁsī pratyālīḍhapadena saḥ||186||

padmasūryaṁ samāruhya aiśānyāṁ diśi tiṣṭhati|
svamantrākṣaraniṣpannaṁ sṛjeduṣṇīṣacakriṇam||187||

ākāśaśyāmakaṁ ghoramakṣobhyakṛtaśekharam|
kṛṣṇaraktasitāsyaṁ ca tryakṣaṁ lambodaraṁ vibhum||188||

vāmadakṣiṇahastābhyāmuṣṇīṣaṁ mūrdhniṁ dhārayan|
vajraṁ padmaṁ ca savyābhyāṁ tarjanīkhaḍgamanyataḥ||189||

sarvopadravavidhvaṁsī pratyālīḍhapadodyataḥ|
padmasūryaṁ samāruhya brahmasthāne sa tiṣṭhati||190||

svamantrākṣaraniṣpannaṁ sumbharājaṁ sṛjed vratī|
ākāśasuprabhaṁ tryakṣaṁ kṛṣnaraktasitānanam||191||

bṛhatkukṣiṁ karālāsyamakṣobhyakṛtaśekharam|
vajraṁ cakraṁ tathā ratnaṁ savyahasteṣu dhārayan||192||

hṛddeśe tarjanīpāśaṁ padmakhaḍgaṁ ca vāmataḥ|
kālakūṭādikaṁ sarvaviṣaṁ sthāvarajaṅgamam||193||

hatvā vināyakān sarvān śāntiṁ kṛtvā tu sarvataḥ|
ājñāṁ sampādya nikhilāṁ pratyālīḍhapade sthitaḥ|
padmasūryaṁ samāruhya bhuvo'dhastāt sa tiṣṭhati||194||

utsṛjya maṇḍalaṁ sarvaṁ dvātriṁśaddevatāmayam|
cakramadhyasthito bhūtvā sūkṣmayogamathārabhet||194||

nāsagre sarṣapaṁ cintet sarṣape sacarācaram|
bhāvayejjñānapadaṁ ramyaṁ rahasyaṁ jñānakalpitam||196||

sthiraṁ tu sphārayed ratnamasthiraṁ naiva sphārayet|
sphārayet pravarairmeghaibuddhajvālāsamaprabhaiḥ||197||

bhikṣāśinā na japtapyaṁ na ca bhaikṣarato bhavet|
japenmantramabhinnāṅgaṁ sarvakāmopabhogakṛt||198||

uccārya saṁsphared vajraṁ samāptau saṁhāramādiśet|
idaṁ tat sarvabuddhānāṁ japoktaṁ paramārthataḥ||iti| 199||

sūkṣmayogajapaṁ cāpi dvidhā kṛtvā yathāruci|
ātmānaṁ ca punarmantrī tathatāyāṁ praveśayet||200||

maṇḍalasthāścaturdevyo na paśyantyastataḥ patim|
gāthācatuṣṭayenetthaṁ bodhayanti mahāsukham||201||

tvaṁ vajrasattva bhuvaneśvara sattvadhāto
trāyāhi māṁ ratinojñamahārthakāmaiḥ|
kāmāhi māṁ janaka sattvamahāgrabandho
yadīcchase jīvatu mahya nātha||202||

tvaṁ vajrakāya bahusattvapriyāgracakra
buddhārthabodhiparamārthahitānudarśīṁ|
rāgeṇa rāgasamayāṁ mama kāmayasva
yadīcchase jīvatu mahya nātha||203||

tvaṁ vajravāca sakalasya hitānukampī
lokārthakāryakaraṇe sada sampravṛttaḥ|
kāmāhi māṁ sugatacarya samantabhadra
yadīcchase jīvatu mahya nātha||204||

tvaṁ vajrakāma samayāgra mahāhitārtha
saṁbuddhavaṁśatilakaḥ samatānukampī|
kāmāhi mām guṇanidhiṁ bahuratnabhūtāṁ
yadīcchase jīvatu mahya nātha||205||

evamutthāpitaṁ nāthaṁ sadbhūtaguṇakīrtanaiḥ|
akṣobhyādisvabhāvena saṁstuvanti tathāgatāḥ||206||

akṣobhyavajra mahājñāna vajradhātu mahābudha|
trimaṇḍala trivajrāgra bhāṣa guhyaṁ namo'stu te||207||

vairocana mahāśuddha vajraśānta mahārate|
prakṛtiprabhāsvarān dharmān deśa vajra namo'stu te||208||

ratnarāja sugambhīra khavajrākāśanirmala|
svabhāvaśuddha nirlepa bhāṣa guhyaṁ namo'stu te||209||

vajrāmitamahārāja nirvikalpa khavajriṇa|
rājapāramitāprāpta bhāṣa vajra namo'stu te||210||

amoghavajra saṁbuddha sarvāśāparipūraka|
śuddhasvabhāvasambhūta vajrasattva namo'stu te||211||

nutvātha buddhaiaranurāgya cakram
prakāśya guhyaṁ paramaṁ yathāyatham|
svakāyacakre viniveśya cakram
mahāsukhastiṣṭhati nātha ekaḥ||212||

evaṁ caturyogakarastu yogī
hūṁkāragarbhaṁ pravicintya lokam|
dṛṣṭvā japat tadbhavavajrasattvaṁ
vyutthāya taddhīrvicared yathāvad||iti|213||

samādhimālambayan mantrī śuṣkamūrtiryadā bhavet|
vicintayedimaṁ yogaṁ kāyavākcittaprīṇanam||214||

vitastimātramākramya mūrdhni maṇḍalakalpanā|
oṁkāraṁ tatragaṁ dhvātvā pañcāmṛtanipātanam||215||

anena vajrayogena tejasvī bhavati kṣaṇāt|
kāyavākcittasausthityaṁ labhate nātra saṁśayaḥ||216||

evamabhyāsato mantrī śodhayed bodhayet yathā|
hṛtkaṇṭhaṁ caiva saṁśodhyaṁ prīṇayecca tathāgatān||217||

hūṁkāreṇa ca saṁśodhya āḥkāreṇa tu bodhayet|
jvālayet praṇavākrāntam iyamāhāraśodhanā||218||

kaṇṭhe śaṅkhaṁ vicintyādau tasmin hrīḥkārasambhavam|
padmamaṣṭadalaṁ cinted hūṁkāraṁ karṇikopari||219||

hūṁkārajaṁ mahāvajraṁ pañcaśūkaṁ vibhāvayet|
madhyaśūkāgre sañcinted oṁkāraṁ kaṇṭhaśodhanam||220||

meghanādaṁ hṛdi dhyātvā triśikhāgniṁ tataḥ spharet|
tatrāhāraṁ ca juhuyād homamādhyātmikaṁ tvidam||221||

vāyavyaṁ dīpayed agniṁ vāruṇaṁ pacate tu saḥ|
māhendramaṇḍalaṁ sthānaṁ yatra sañcarate haviḥ||222||

annaṁ pānaṁ ca yat kiñcit tat sarvaṁ vāruṇena tu|
aśanaṁ mukhapadmena hṛtpadyaṁ sampraveśayet||223||

nābhipadmagataṁ paścāt sampuṭīkaraṇayogataḥ|
gudapadmād vinirgatya bhaśmāntaṁ ca vinirdiśet||224||

na jarā nāpi rogaśca na mṛtyurna viṣādikam|
nākālamaraṇaṁ tasya sarvopadravanāśanam||iti| 225||

śrīvajramālāvaramanthanena
gūḍhaṁ samājāmbunidhiṁ mathitvā|
yat sādanāṅgāmṛtamāpi tena
lokaḥ samasto'maratāmupaitu||226||

|| piṇḍīkramasādhanaṁ samāptam||
| kṛtirācāryaśrīnāgārjunapādānām|

Technical Details

Text Version: 

Romanized

Input Personnel: 

DSBC Staff

Input Date: 

2008

Proof Reader: 

Milan Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0