vajrajāpakramaḥ prathamaḥ

ācāryanāgarjunapraṇītaḥ

pañcakramaḥ
[ 1 ]
vajrajāpakramaḥ prathamaḥ

oṁ namo buddhāya

sarvabuddhātmakaṁ nāthaṁ natvā śrīmanmahāsukham|
vajrajāpakramaṁ vakṣye yogatantrānusārataḥ||1||

utpattikramasaṁsthānāṁ niṣpannakramakāṅkṣiṇām|
upāyaścaiṣa saṁbuddhaiḥ sopānamiva nirmitaḥ||2||

prāṇabhūtaśca sattvānāṁ vāyvākhyaḥ sarvakarmakṛt|
vijñānavāhanaścaiṣa pañcātmā daśadhā punaḥ||3||

vāyutattvānupūrveṇa mantratattvaṁ samāviśet|
mantranidhyaptimāgamya vajrajāpaḥ suśikṣyate||4||

vajrajāpasthito mantrī cittanidhyaptimāpnuyāt|
mayopamasamādhistho bhūtakoṭyāṁ samāviśet||5||

bhūtakoṭeḥ samuttiṣṭhannadvayajñānamāpnuyāt|
yuganadvasamādhistho na kiñcicchakṣate punaḥ||6||

ayaṁ niṣpannayogākhyo mahāvajradharaśca saḥ|
sarvākāravaropetaḥ sarvajño jāyate tataḥ||7||

anāgatamatītaṁ ca vartamānaṁ bhavatrayam|
tatkṣaṇāt nikhilaṁ paśyet prabhāsvaraviśuddhitaḥ||8||

etattattvaṁ sthitaṁ tantre śrīsamāje sumudritam|
vyākhyātantrānusāreṇa boddhavyaṁ guruvaktrataḥ||9||

tatra prathamataraṁ vāyutattvoddeśapadaṁ mūlasūtrādevāvatāryate-

nāsāgre sarṣapaṁ cintet sarṣape sacarācaram|
bhāvayejjñānapadaṁ ramyaṁ rahasyaṁ jñānakalpitam||10||

pañcavarṇaṁ mahāratnaṁ sarṣapasthūlamātrakam|
nāsikāgre prayatnena bhāvayed yogataḥ sadā||11||

iti sandhābhāṣeyamasya vajrapadasya nirdeśamāha caturdevīvyākhyātantre ḥ

tad devi sampravakṣyāmi sārāt sārataraṁ param|
rahasyaṁ sarvabuddhānāṁ yat tat sarvātmani sthitam ||12||

paścajñānamayaṁ tattvaṁ sarṣapasthūlamātrakam|
tasya madhye sthito devo hyavyakto vyaktarūpavān||iti|13||

samājottare'pyamumarthaṁ dyotayannāhaḥ|
pañcajñānamayaṁ śvāsaṁ pañcabhūtasvabhāvakam|
niścārya padmanāsāgre piṇḍarūpeṇa kalpayet||14||

pañcavarṇaṁ mahāratnaṁ prāṇāyāmamiti smṛtam|
svamantraṁ hṛdaye dhyātvā cittaṁ bindugataṁ nyaset||15|

ityasyāpi pratinirdeśamāha vajramālānāmni vyākhyātantreḥ

nāsāgre sarṣapaṁ nāma prāṇāyāmasya kalpanā|
prāṇāyāmasthitāḥ pañca raśmayo buddhabhāvataḥ||16||

ūrdhvaṁ ghrāṇād viniṣkrānto vāmadakṣiṇadvandvataḥ|
stabdhaśceti caturdhā'smād velā ādhyātmikā smṛtā||17||

kaṇṭhahṛnnābhiguhyābje gatyāgatī vinirdiśet|
vihared ardhayāmikāṁ velāṁ paripāṭyā yathākramam||18||

dakṣiṇād vinirgato raśmirhutabhuṅmaṇḍalaṁ ca tat|
raktavarṇamidaṁ vyaktaṁ padmanātho'tra devatā||19||

vāmād vinirgato raśmirvāyumaṇḍalasaṁjñitaḥ|
haritaśyāmasaṅkāśaḥ karmanātho'tra devatā||20||

dvābhyāṁ vinirgato raśmiḥ pītavarṇo mahādyutiḥ|
māhendramaṇḍalaṁ caitad ratnanātho'tra devatā||21||

stabdho mandrapracārastu sitakundendusannibhaḥ|
maṇḍalaṁ vāruṇaṁ caitad vajranātho'tra devatā||22||

sarvadehānugo vāyuḥ sarvaceṣṭāpravartakaḥ|
vairocanasvabhāvo'sau mṛtakāyād viniścaret||23||

vāyutattvamidaṁ vyaktaṁ pañcajñānasvabhāvakam|
tārkikā na prajānanti agamyaṁ bālayoginām||24||

ityevaṁ vāyuttatvaṁ pratipādyedānīṁ mantratattvasyoddeśapadaṁ mūlasūtrādavatāryate ḥ

sarvatathāgatakāyavākcittarahasyaṁ sarvatantrahṛdayasañcodanaṁ nāma paramaguhyaṁ svakāyavākcittavajrebhyo vākpathaniruktyā mantrasamuccayamudājahāra oṁ āḥ hūṁ|

arthānumajāpena niḥsvabhāvena cāruṇā|
vicāraṇā tryadhvabuddhebhyo vajrajāpaḥ sa ucyate||25||

bhikṣāśinā na japtavyaṁ na ca bhaikṣarato bhavet|
japenmantramabhinnāṅgaṁ sarvakāmopabhogakṛt||26||

ityuddeśapadam asya nirdeśamāha sandhyāvyākaraṇavyākhyātantre tadavatāryateḥ

pratyuvāca tataḥ śrīmān mahāvairocanaṁ vibhum|
viśvarūpamidaṁ cittaṁ sarvasattvopapattitaḥ||27||

jātaṁ san niḥsvabhāvo'pi bhāvākhyaṁ tu pratītyataḥ|
kṛtvā cānubhavaṁ samyag bodhicittaṁ khatulyakam||28||

jagadarthaṁ vidhātuṁ ca taddeśayottame jane|
sādhanopāyitāmātraṁ jñātvā tantre vipañcitam||29||

ācāryā vayamityevaṁ vadantyāgāmikā vibho|
yad vākyaṁ mametyevamuktvā kṣipanti bāliśāḥ|
sandhyāya bodhicittaṁ te na vidanti yathārthataḥ|| iti| 30||

yathedaṁ bhagavān svāmī mahāvairocano vibhuḥ|
triṣkṛtvā sādhuvacanaṁ vajrapāṇiṁ vadedidam||31||

kathayamāmi prabhedena nirvikalpārthatattvataḥ|
pravyāhāropalambhākhyaṁ sāṅketaṁ pāramārthikam||32||

pravyāhāro hi sāmānyaṁ buddharūpopalambhakam|
sāṅketaṁ mantratattvākhyaṁ tathatā pāramārthikam||33||

ekādirnavamadhye tu daśabhiryo na badhyate|
tamabaddhaṁ vijānīyāt sa vetti parasampadam||34||

svaravyañcanavarṇāśca navasaṁkhyānuvartinaḥ|
' abaddhānyonyasaṁyoogād yo vetti sa jagadguruḥ||35||

bhūtāntena samāyuktaṁ kalādiṣoḍaśe sthitam|
pañcapañcakasaṁyuktaṁ catustrayaniyojitam||36||

sānusvāraṁ sadīrghaṁ na guṇasaṁyolopavat|
hrasvaṁ samastavākyaṁ syānna cānekaṁ na caikakam||37||

ye varṇāḥ pṛṣṭhataḥ proktā abhimukhāśca ye punaḥ|
strī-puṁ-napuṁsakāste ca dhātvādiparikalpitāḥ||38||

adha-ūrdhvasamāyuktaṁ jñātvā buddhyā niyojayet|
pravyāhāramidaṁ mantraṁ niḥsvabhāvasvabhāvajam||39||

tataḥ pariṇataṁ rūpaṁ yaddevatopalambhikam|
sāṅketikaṁ tritattvasthaṁ prakṛtijāpalapakṣaṇam||40||

akāroddeśakaṁ jñānaṁ buddhasya hṛdayaṁ bhavet|
oṁkāraḥ saṁsṛjet sattvān buddharūpāgrakalpitān||41||

hūṁkāraḥsaṁharet sattvān āḥkāraḥ sthāpako bhavet|
praveśaśva sthitiścaiva vyutthānaṁ ca krameṇa ca||42||

japen mantramabhinnāṅgaṁ prajñopāyapade sthitaḥ|
pāṇḍarādijapaḥ praktaḥ pañcaviṁśacchatadvayam||43||

caturbhirguṇitaṁ samyak caturyogaśataṁ nava|
navaśataṁ tu yad dṛṣṭaṁ caturviṁśatparikramaiḥ|
pratyutpādād bhavet tatra dvyayutaṁ śataṣoḍaśam||44||

idamevādhyātmikavelāyāṁ dyotayannāha samājottare ḥ

vidyānayavidhānena catuḥsandhyāprayogataḥ|
japenmantramabhinnāṅgaṁ lakṣamakṣarasaṁkhyayā||45||

bāhyajāpaṁ tyajed yogī bhāvanāyāntarāyikam|
mantrārtho bhagavān vajrī vajrātmātra kathaṁ japet||46||

hastinaṁ labhate sadyo mṛgayeddhastinaḥ padam|
mantramūrtiḥ svayaṁ sākṣāt kimanyattu gaveṣate||47||

api ca vajradhṛk kaścit trisaṁyogānvito naraḥ|
āvāhanavisarjanaṁ syāt tathā sthāpanameva ca||48||

āvāhanaṁ praveśena tvaritena visarjanam|
vāṣpeṇa sthāpanaṁ tat syād viśvastāt siddhiruttamā||49||

tvarite nibandhake vāṣpe mantraniyojanā kathitā|
karṇamūle tu śiṣyāyācāryeṇa suprayatnataḥ||50||

atha yogeśvarāṇāṁ tu divyopāyaḥ pradarśitaḥ|
guhyākṣaraṁ pravakṣyāmi yogasiddhiphalapradam||51||

yena cintitamātreṇa yoginaḥ syurvarapradāḥ|
ādyakṣaraprayogeṇa ucchavāsaṁ kurute sadā||52||

aṣṭāntena samāyuktamukāreṇa sabindukam|
niśvāsaṁ kurute yogī rucijāptamihocyate||53||

ayutadvayaṁ sahasraṁ ca ṣaṭ śatāni tathaiva ca|
ahorātreṇa yogīndro japasaṁkhyāṁ karoti ca||54||

tadevaṁ guhyasandhyāyāṁ sūkṣmayogaḥ prakāśitaḥ|
dhyānādhyayanavītaṁ tu tathāpi jāpa ucyate||55||

anena vajrajāpena sevāṁ kṛtvā yathāvidhi|
sādhayet sarvakāryāṇi māyopamasamādhinā||56||

atrāha advayasamatāmahāyogatantre ḥ
japitvā mantramatulaṁ sādhayet sādhanātmakaḥ|
sidhyate tasya trailokyaṁ māsaikena na saṁśayaḥ||57||

ṣaḍ lakṣāṇi japitvā tu mantraṁ jñānasamudbhavam|
vajrasattvaṁ namaskṛtya pūrṇamāsyāṁ sa sidhyati||58||

na tasya vratamākhyātaṁ nākṣasūtraṁ na mantrakam|
dhāraṇā homakarmāṇi varjyante ca parāparam||59||

yakārārthena yat kiñcit siddhimicchatā|
rephāditritayenaiva jatatkāryaṁ pravartate||60||

agnivāyavyamāhendravāruṇe pratimaṇḍale|
ardhayāmikavelāyāṁ dvau dvau karmaṇi tiṣṭhataḥ||61||

pūjāprāyo bhavet pūjyo jāpaprāyo viśudhyati|
agnihotraparo bhūtiṁ mokṣaṁ dhyānaparo labhet||62||

jñātvā itthaṁ tato mantrī jagadbālavadācaret|
tataḥ sidhyanti mantrāśca nirvikalpaikadharmataḥ||63||

mantratattvamidaṁ vyaktaṁ vāgvajrasya prasādhanam|
jñānatrayaprabhedena cittamātre niyojayed|| iti|| 64||

guroravajñāsuśaṭho'prasanno
mantroddhataḥ pustakadṛṣṭigarvaḥ|
aśraddadhānastvabhiṣekahīno
vārtā kramasyāpi ca tasya noktā||65||

yaḥ śraddadhāno gurubhaktiraktaḥ
śuśrūṣaṇāyāṁ ca sadābhiyuktaḥ|
grāhyaḥ śrutiṁ naiva dhanaṁ nirīkṣyaṁ
gurupradhāno'ya guruprasādaḥ||66||

girīndramūrdhnaḥ prapatet tu kaścit
neccheccyutiṁ tu cyavate tathāpi|
guruprasādāptahitopadeśa
icchenna moktaṁ sa tathāpi muktaṁḥ||67||

|| vajrajāpakramaḥ samāptaḥ||

kṛtiriyaṁ śrīnāgārjunapādānāmiti|
granthapramāṇamasya ṣadadhikasaptatiḥ|| prathamaḥ kramaḥ||

anuttarasandhirityaparanāmā sarvaśuddhiviśuddhikramaḥ dvitīyaḥ

[2]

anuttarasandhirityaparanāmā
sarvaśuddhiviśuddhikramaḥ dvitīyaḥ

namaḥ śrīvajrasattvāya

namaste'stu namaste'stu namaste'stu namo namaḥ|
evaṁ stute namaste'stu kaḥ stotā kaśca saṁstutaḥ||1||

yathā jalaṁ jale nyastaṁ ghṛtaṁ caiva yathā ghṛte|
svakīyaṁ ca svayaṁ paśyej jñānaṁ yatreha vandanā||2||

kintu sarvajñagatibhirvinā tannopalabhyate|
tamaḥpaṭalasañchannaṁ prasādād dvīpamāpnuyāt||3||

śūnyaṁ ca atiśūnyaṁ ca mahāśunyaṁ tṛtīyakam|
caturthaṁ sarvaśūnyaṁ ca phalahetuprabhedataḥ||4||

prajñopāyasamāyogānniṣpannamupalabdhakam|
upalabdhācca niṣpannāt sarvaśūnyaṁ prabhāsvaram||5||

hetukramaviśuddhaṁ tu vijñānatrayayogataḥ|
śūnyatrayasamāyogāllabhyate'nuttaraṁ padam||6||

ālokaśśūnyaṁ prajñā ca cittaṁ ca paratantrakam|
tasyedānīṁ pravakṣyāmi prakṛtispharaṇaṁ sphuṭam||7||

virāgo madhyamaścaiva adhimātrastathaiva ca|
manogatāgataṁ caiva śokāditṛtīyaṁ tathā||8||

saumyaṁ vikampo bhītaśca madhyabhīto'tibhītakaḥ|
tṛṣṇā madhyatṛṣṇā cātitṛosṇoopādānakaṁ tathā||9||

niḥśubhaṁ kṣuttṛṣā caiva vedanā samavedanā|
ativedanā kṣaṇaścaiva vettividdhāraṇāpadam||10||

pratyavekṣaṇaṁ lajjā ca kāruṇyaṁ snehatastrayam|
cakitaṁ saṁśayaścaiva mātsaryaṁ ceti kīrtitāḥ||11||

trayastriṁśat prakṛtayaḥ svasaṁvedyāḥ śarīriṇām|
saṁvṛtisphuṭarupeṇa niśāsaṁjñā pradarśitāḥ||12||

strīsaṁjñā tathā proktā mandākārā tathaiva ca|
vāmasaṁjñā punaścaiva candramaṇḍalapaṅkajam||13||

dṛḍhīkaraṇahetutvāt sabinduḥ prathamaḥ svaraḥ|
niśākarāṁśusaṅkāśa ālokajñānasambhavaḥ||14||

ālokābhāsamityutkam atiśūnyamupāyakam|
parikalpitaṁ tathā proktaṁ proktaṁ caitasikaṁ tathā||15||

rāgo raktaṁ tathā tuṣṭaṁ madhyatuṣṭātituṣṭakam|
harṣaṇaṁ caiva prāmodyaṁ vismayo hasitaṁ tathā||16||

hlādanāliṅganaṁ caiva tathā cumbanacūṣaṇam|
dhairyaṁ vīryaṁ ca mānaśca kartṛhartṛbalāni ca||17||

utsāhaḥ sāhasaṁ caiva tathā cottamasāhasam|
madhyamaṁ sāhasaṁ rādraṁ vilāso vairameva ca||18||

śubhaṁ ca vāk sphuṭā satyamasatyaṁ niścayastathā|
nirupādānadātṛtve codanaṁ śūratā tathā|

alajjā dhūrtaduṣṭaśca haṭhaḥ kuṭila eva ca|
catvāriṁśat prakṛtayaḥ kṣaṇikāścātiśūnyajjāḥ||20||

divāpuruṣasaṁjñā ca kharākāraśca dakṣiṇaḥ|
sūryamaṇḍalasaṁjñā ca vajrasaṁjñā tathaiva ca||21||

kalā saiva tu vijñeyā bindudvayavibhūṣitā|
divākarāṁśuisaṅkāśā ālokābhāsayogajā||22||

ālokasyopalabdhiśca upalabdhaṁ tathaiva ca|
pariniṣpannakaṁ caiva avidyā caiva nāmataḥ||23||

mahāśūnyapadasyaite paryāyāḥ kathitā jinaiḥ|
madhyarāgakṣaṇaścaiva vismṛtirbhrāntireva ca||24||

tūṣṇīṁbhāvaśca khedaśca ālasyaṁ dandhatā tathā|
avidyāyāḥ kṣaṇāḥ sapta vijñeyāḥ sukṣmayogibhiḥ||25||

na bījaṁ vindusaṁyuktaṁ na vāyurdvāranirgataḥ|
yadālokopalabdhaṁ tu tat pariniṣpannalakṣaṇam||26||

etāḥ prakṛtayaḥ sūkṣmāḥ śataṁ ṣaṣṭyuttaraṁ divā|
rātrau cāpi pravartante vāyuvāhanahetunā||27||

kṣaṇe lave muhūrtte ca nimeṣe mātrake tathā|
kṣaṇa ityacchaṭāvasthā lavaḥ sarṣapavartanam||28||

āśvāsastu muhūrttaṁ syānnimeṣo'kṣinimeṣaṇam|
mātrā tu hastatālaṁ syāt kṣaṇādīnāṁ tu lakṣaṇam||29||

saṁvittimātrakaṁ jñānamākāśavadalakṣaṇam|
kintu tasya prabhedo'sti sandhyārātridivātmanā||30||

ālokālokābhāsau ca tathālokopalabdhakam|
cittaṁ trividhamityuktam ādhārastasya kathyate||31||

vāyunā sūkṣmarūpeṇa jñānaṁ sammiśratāṁ gatam|
niḥsṛtyendriyamārgemyo viṣayānavalambate||32||

ābhāsena yadā yukto vāyurvāhanatāṁ gataḥ|
tadā tatprakṛtīḥ sarvā astavyastāḥ pravartayet||33||

yatra yatra sthito vāyustāṁ tāṁ prakṛtimudvahet|
yāvat samīraṇotpādo nābhāso niścalo bhavet||34||

ābhāsadvayahetuḥ syādātmabhāvavikalpanā|
ubhayāṁśikameva syād yadālokopalabdhakam||35||

sarvāsāmeva māyānāṁ strīmāyaiva viśiṣyate|
jñānatrayaprabhedo'yaṁ sphuṭamatraiva lakṣyate||36||

rāgaścaiva virāgaśca dvarorantariti trayam|
dvīndriyasya samāpattyā vajrapadmasamāgamāt||37||

jñānadvayasamāyogaḥ samāpattiḥ prakīrtītā|
jñānadvayasamāpattyā yathoktakaraṇena tu||38||

yajjñānaṁ prāpyate yatnāt tadālokopalabdhakam|
yasya vajrābjasaṁyogaḥ saṁvṛtyā tu na vidyate||39||

sidhyate yogasāmarthyāt sakṛdapyanubhūtavān|
yathā prabhedaṁ vijñāya jñānavṛttiṁ svabhāvataḥ||40||

lakṣayet satataṁ yogī tāmeva prakṛtiṁ punaḥ|
payodharā yathā naike nānāsaṁsthānavarṇakāḥ||41||

udbhūtā gaganābhogāllayaṁ gacchanti tatra vai|
evaṁ prakṛtayaḥ sarvā ābhāsatrayahetukāḥ||42||

nirviśya viṣayān kṛtsnān praviśanti prabhāsvaram|
eṣāṁ svabhāvābijñānadajñānapaṭalāvṛtāḥ||43||

kṛtvā śubhāśubhaṁ karma bhramanti gatipañcake|
ānantaryādikaṁ kṛtvā narakeṣu vipacyate||44||

śubhaṁ dānādikaṁ kṛtvā svargādiṣu mahīyate|
anantajanmasāhasraṁ prāpya caivaṁ punaḥ punaḥ||45||

pūrvakarmavipāko'yamiti śocati mohataḥ|
prakṛtyābhāsayogena yena kliśyanti jantavaḥ||46||

jñātvā tameva mucyante jñānino bhavapañjarāt|
prajñāsvabhāva evāyaṁ candramaṇḍalakalpanā||47||

cittameva svayaṁ paśyet svameva śaśibimbavat|
atha candraṁ samālambya vajracinhaṁ prakalpayet||48||

upāyasūcakaṁ hyetad vajrādyutpattiyoginām|
candravajrādisaṁyogaścittacaitasasaṅgamaḥ||49||

prajñopāyasamāyogājjāyate devatākṛtiḥ|
caturmudrābhirāmudrya devatāgarvamudvahan||50||

vicaret tu sadā mantrī utpattikramayogavān|
yathoktaṁ śrīsamājādau tatra tatra suvistaram||51||

yāvat syād bhāvanāyogastāvat syādādikarmikaḥ|
pariniṣpannayogasya sūcana kriyate'dhunā||52||

śūnyatrayaviśuddhiryā prabhāsvaramihocyate|
sarvaśūnyapadaṁ tacca jñānatrayaviśuddhitaḥ||53||

jñānaśuddhipadaṁ tattvaṁ sarvajñatvamanuttaram|
nirvikāraṁ nirābhāsaṁ nirdvandvaṁ paramaṁ śivam||54||

astīti na ca nāstīti na ca vākyagocaram|
ataḥ prabhāsvarāccūddhājjñānatrayasamudbhavaḥ||55||

dvātriṁśallakṣaṇadharo hyaśītivyañcanānvitaḥ|
sarvākāravaropetaḥ sarvajño jāyate tataḥ||56||

tathā coktaṁ mahāyānasūtre lalitavistare|
abhisambodhikāmo'yaṁ śākyasiṁhastathāgataḥ||57||

mahāśūnyena buddhatvaṁ prāpsyāmītyabhimānataḥ|
nairañcanānadītīre nispādyāsphānakaṁ gataḥ||58||

tilabimbīva sampūrṇāḥ khamadhyasthā jināstadā|
ekasvareṇa taṁ prāhuracchaṭena jinaurasam||59||

aviśuddhamidaṁ dhyānaṁ na caitadiṣṭakāvaham|
prabhāsvaraṁ ātu ālambyamākāśatalavat param||60||

prabhāsvarapade prāpte svecchārūpastu jāyase|
savaiśvaryaṁ tathā prāpya vajrakāye pramodase||61||

evaṁ śrutvā tu taṁ śbdaṁ visarjyāsphānakaṁ tataḥ|
niśārdhasamaye tattvamālambyaiva jinaurasaḥ||62||

ṛjukenaiva kāyena vācāya ṛjureva ca|
sāśano nāśano naiva na maunī nāpyamaunavān||63||

nonmīlitasunetrastu na ca mīlitalocanaḥ|
svacchaṁ vyaktaṁ mahājñānaṁ sarvaśūnyaṁ mahādbhutam||64||

atha paśyati tadvayaktaṁ gurupādaprasādataḥ|
anāgatamatītaṁ ca vartamānaṁ bhavatrayam||65||

tatkṣaṇānnikhilaṁ paśyet prabhāsvaraviśuddhadhṛk|
jalacandramarīcyādimāyāguṇavibhūṣitaḥ||66||

aruṇodgamakāle tu vajropamasamādhinā|
niṣadya bodhimūle tu so'karonmārabhañcanam||67||

samprāpya śākyanāthena tattvajñānamanuttaram|
jagattrayahitārthāya tadeveha pradarśitam||68||

tattvajñānamiti proktamabhisambodhidarśanam|
pañcānantaryakarmā ca mandapuṇyo'pi yo naraḥ||69||

guruprasādādāpnoti cintāmaṇirivāparam|
yatheṣṭaṁ kurute caryāṁ saṁbuddho'yamanāgataḥ||70||

na rāgo na virāgaśca madhyamā nopalabhyate|
na śūnyaṁ nāpi cāśūnyaṁ madhyamā nopalabhyate||71||

sarvabuddhasamāyoga idameva pradarśitam|
trijñānād vyatiriktaṁ yat tattvaṁ sandhyāya bhāṣayā||72||

abhāvetyādigāthābhiḥ paṭale bodhicittake|
śrīsamāje'pi tat proktamabhisambodhilakṣaṇam||73||

rāgādīnāṁ viśuddhiryā paramādye pradarśitā|
sarvaśūnyaṁ samuddiśya sā'pi proktā tathāgataiḥ||74||

nānāsūtreṣu tantreṣu yat tattvamupadarśitam|
sarvaśūnyapadaṁ hyetannānyat tatrābhidhīyate||75||

caturaśītisāhasre dharmaskandhe mahāmuneḥ|
sārāt sārataraṁ proktam abhisambodhilakṣaṇam||76||

jaṭī nagnaśca muṇḍī vā śikhiniḥsaṅgavṛttayaḥ|
taistaiśca vividhairliṅgairabhisambodhikāminaḥ||77||

teṣāṁ tattvavihīnānāṁ vratacaryādikaḥ kramaḥ|
tattvajñānavihīnatvāt tena muktirna labhyate||78||

ādikarmikayogena cāṣṭamīṁ bhūmimāpnuyāt|
ālokatrayadarśī ca daśabhūmyāṁ pratiṣṭhitaḥ||79||

samprāpya hyabhisambodhiṁ śuddhāvāsamupāgataḥ|
buddhakṣetresvavaivartī sarvajña iha janmani||80||

dharmodayābhisambodhiḥ krīḍārāgādivistaraiḥ|
dharmadhātvābhisamabodhiryathālābhaviceṣṭitaiḥ||81||

anutarābhisambodhirabhisambodhiyogataḥ|
prapañcākārādicaryābhirabhyasyantīha yoginaḥ||82||

āḥ kimabhyāsayogena ādiśuddhiḥ svabhāvikā|
prakṛtyaiva hi sā siddhā tathatā na vikalpajā||83||

ya evaṁ kalpayantīha jñānakramamapāsya vai|
tatprabhedamajānānāḥ punaḥ śaikṣā bhavanti te||84||

prakṛtyābhāsabhedajñā caturthaṁ tattvamāśritāḥ|
tridhā nābhyasyate yastu na śīghramāpnuyāt phalam||85||

yathāgnirdārugarbhastho nottiṣṭhenmathanād vinā|
tathābhyāsād binā bodhirjāyate neha janmani||86||

yaḥ śāṭhyabuddhiralaso gurunindakaśca
prāptābhiṣeka iti garvitamānasaḥ syāt|
sarvajñatā na sulabheti vihīnacitto
doṣān sa paśyati gurorna guṇān varākaḥ||87||

sūśrūṣayā virahito laghu tattvamicchen
neti praśstavacanaṁ calayet saroṣaḥ|
dṛṣṭvā sabhāsu gurumasya parāṅmukhastu
kuryāt praṇāmamatha tasya rahogatasya||88||

evaṁ ca daurātmyagataṁ kuśiṣyam
svaputramapyaurasamāryagarhyam|
vaiśyaṁ tathā pārthivamagrabodhiṁ
kuryāt samīpe na hi jātu dhīraḥ||89||

śubhaguṇasusameto jñānavān vīryayukto
gurujanamatha bhaktyā vīkṣate buddhatulyam|
adhigatajinadharmaḥ śāsaneṣu prasannaḥ
sa iha bhavati pātraṁ tasya kuryāt prasādam||90||

śrutabahutaratantro'uyāgameṣu pravīṇo
gurujanaparicaryāhānyalabdhopadeśaḥ|
svahitamapi sa kartuṁ na prabhuḥ śāstracañcu-
rbhavati tadapi śāstraṁ kevalaṁ khedahetuḥ||91||

atha bhavati sabhāgyaḥ prāptatattvopadeśo
jaḍamatirasamartho mīlane'rthasya yastu|
parahitakṛtabuddhirdeśanāyāṁ pravṛtto
vacanaguṇavihīnaḥ so'pyavajñāmupaiti||92||

śrutabahutaratantro jñānavān ṣaṭpadajñaḥ
smṛtimatidhṛtimedhāvīryasampatsametaḥ|
gurucaṇasaparyāprāptatattvopadeśaḥ
prabhavati sa hi vaktuṁ tantrarājopadeśam||93||

śrutabahutaratantreṇāyavajriprasādāt
sphuṭaviracitavācā bodhimārgaṁ vibhajya|
kuśalamupacittaṁ yacchākyamitreṇa tena
prakaṭapaṭuvipākād bodhibhājo bhavantu||iti|94||

anuttarasandhirityaparanāmā

||sarvaśuddhiviśuddhikramaḥ samāptaḥ||
kṛtiriyaṁ śākyamitrapādānām| granthapramāṇamasya śatamekam| dvitīyaḥ kramaḥ|

svādhiṣṭhānakramaḥ tṛtīyaḥ

[3]

svādhiṣṭhānakramaḥ tṛtīyaḥ

namaḥ śrīvajragurave

praṇipatya varaṁ vajraṁ vajrasattvādināyakam|
svādhiṣṭhānakramaścaiva vakṣyate kṛpayā mayā||1||

prathamataraṁ tāvad utpattikramānusāreṇa prāptābhiṣekaścaturvidhatantrābhiprāyajñaḥ prāptakāyavākcittavivekaḥ śrutidharaḥ satyadvayādhimokṣo vajraguruṁ samyag ārādhya, tataḥ prasannāya gurave mahatīṁ gaṇapūjāṁ kṛtvā ṣoḍaśābdikāṁ mudrāṁ mahāvajragurave datvā, tadanantaraṁ guruvaktrād āptasvādhiṣṭhānakramopadeśaḥ, tato mālodakasambuddhavajraghaṇṭādānadarpaṇanāmācāryānujñā ityebhiḥ saha guhyābhiṣekaṁ labdhvā ebhiḥ śāstāraṁ guruṁ stūyātḥ|

śauṣīryaṁ nāsti te kāye māṁsāsthirudhiraṁ na ca|
indrāyudhamivākāśe kāyaṁ darśitavānasi||2||

nāmayā nāśuciḥ kāye kṣuttṛṣṇāsambhavo na ca|
tvayā lokānuvṛttyarthaṁ darśitā laukikī kriyā||3||

dakacandravadagrāhya sarvadharmeṣvaniśrita|
anahaṅkāra nirmoha nirālamba namo'stu te||4||

sadā samāhitaścāsi gacchaṁstiṣṭhan svapaṁstathā|
īrṣyāpatheṣu sarveṣu nirālamba namo'stu te||5||

vikurvasi mahāṛddhyā māyopamasamādhinā|
nirnānātvaṁ samāpanna nirālamba namostu te||6||

evaṁ vajraguraṁ sadbhūtaguṇena saṁstutya śravaṇārtham adhyeṣayed anayā gāthayāḥ

sarvajña jñānasandoha bhavacakraviśodhaka|
adya vyākhyānaratnena prasādaṁ kuru me vibho||7||

tvatpādapaṅkajaṁ muktvā nāstyanyaccharaṇaṁ vibho|
tasmāt prasīda buddhāgra jagadvīra mahāmune||8||

evaṁ śrutvā tu tad vākyam adhyeṣaṇaviśāradam|
śiṣyakāruṇyamutpādya svādhiṣṭhānamathārabhet||9||

svādhiṣṭhānakramo nāma saṁvṛteḥ satyadarśanam|
gurupādaprasādena labhyate tacca nānyathā||10||

svādhiṣṭhānakramo yena sādhakena na labhyate|
sūtrāntatantrakalpeṣu vṛthā tasya pariśramaḥ||11||

svādhiṣṭhānakramaṁ labdhvā sarvabuddhāmayaḥ prabhuḥ|
janmanīhaiva buddhatvaṁ niḥsandehaṁ prapadyate||12||

svādhiṣṭhānasamādhiśca prabhāsvarapadaṁ tathā|
satyadvayamiti khyātaṁ phalahetuviśeṣataḥ||13||

svādhiṣṭhānānupūrveṇa prāpyate hi prabhāsvaram|
tasmād vajraguruḥ pūrvaṁ svādhiṣṭhānaṁ pradarśayet||14||

asvatantraṁ jagat sarvaṁ svatantraṁ naiva jāyate|
hetuḥ prabhāsvaraṁ tasya sarvaśūnyaṁ prabhāsvaram||15||

yena cittena bālāśca saṁsāre bandhanaṁ gatāḥ|
yoginastena cittena sugatānāṁ gatiṁ gatāḥ||16||

na cātrotpadyate kaścin maraṇaṁ nāpi kasyacit|
saṁsāra eva jñātavyaścittarūpākṛtiṣṭhitaḥ||17||

vāyuyogād vinā cittasvarūpaṁ naiva gṛhyate|
cittāt prakṛtihetutvāt karmajanmasamudbhavaḥ||18||

tadeva vāyusaṁyuktaṁ vijñānatritayaṁ punaḥ|
jāyate yogināṁ mūrttirmāyādehastaducyate ||19||

tasmādeva jagat sarvaṁ māyopama ihocyate|
māyopamasamādhiṣṭhaḥ sarvaṁ paśyati tādṛśam||20||

rūpaṁ ca vedanā caiva saṁjñā saṁskāra eva ca|
vijñānaṁ pañcamaṁ caiva catvāro dhātavastathā||21||

akṣāṇi viṣayāścaiva jñānapañcakameva ca|
adhyātmabāhyato bhinnaṁ sarvaṁ māyaiva nānyathā||22||

darpaṇapratibimbena māyādehaṁ ca lakṣayet|
varṇān indrāyudheneva vyāpitvamudakendunā||23||

darpaṇe vimale vyaktaṁ dṛśyate pratibimbavat|
bhāvābhāvāvinirmukto vajrasattvaḥ sucitritaḥ||24||

sarvākāravaropeto asecanakavigrahaḥ|
darśayet taṁ suśiṣyāya svādhiṣṭhānaṁ taducyate||25||

iyameva hi saṁlakṣyā māyā nirdoṣalakṣaṇā|
māyaiva saṁvṛteḥ satyaṁ kāyaḥ sāmbhogikaśca saḥ||26||

saiva gandharvasattvaḥ syād vajrakāyaḥ sa eva hi|
vajrasattvaḥ svayaṁ tasmāt svasya pūjāṁ pravartayet||27||

ātmā vai sarvabuddhatvaṁ sarvasauritvameva ca|
tasmāt sarvaprayatnena hyātmānaṁ pūjayet sadā||28||

mantramudrāprayogaṁ ca maṇḍalādivikalpanam|
balihomakriryāṁ sarvāṁ kuryān māyopamāṁ sadā||29||

śāntikaṁ pauṣṭikaṁ cāpi tathā vaśyābhicārikam|
ākarṣaṇādi yat sarvaṁ kuryād indrāyudhopamam||30||

śṛṅgārādyupabhogaṁ ca gītavādyādisevanam|
kalāsu ca pravṛttiṁ ca kuryād udakacandravat||31||

rūpe śabde tathā gandhe rase spraṣṭavya eva ca|
cakṣurādipravṛttiṁ ca māyāvad upalakṣayet||32||

bahunā'tra kimuktena vajrayāne tu tattvataḥ|
yad yad ālambayed yogī tad tad māyaiva kalpayet||33||

darpaṇe pratibimbaṁ ca svapnaṁ māyāṁ ca budbudam|
indrajālaṁ ca sādṛśyaṁ yaḥ paśyed sa prabhuḥ smṛtaḥ||34||

dṛśyate spṛśyate caiva yathā māyā jagat sadā|
na copalambhaḥ saṁvṛtyā māyāvat parikīrtitaḥ||iti||35||

yad yad indriyamārgatvaṁ māyā tattat svabhāvataḥ|
asamāhitayogena sarvaṁ buddhamayaṁ vahet||36||

sarvatra sarvataḥ sarvaṁ sarvathā sarvadā svayam|
sarvabuddhamayaṁ siddhaṁ svamātmānaṁ sa paśyati||37||

gacchaṁstiṣṭhan mahāsattvaḥ sarvasaukhamayaḥ prabhuḥ|
vihārāhārapānādīnākāśāllabhate kṣaṇāt||38||

bhaveyurbhavacchettāraḥ śāstāraḥ pravare jane|
pūjyante sasuraiḥ sarvaiḥ praṇipatya muhurmuhuḥ||39||

yathā śāstari sambaddhe lokayātrāhitaiṣiṇi|
evameva mahāyogī viśvajñānārthasaṅgrahād||40||

nāsti kiñcid asādhyaṁ vai vajrasattvena lakṣitam|
svayaṁ pratyusidhyanti sarvamudrā mahāsukhāḥ||41||

kleśāḥ karmapathā dehaḥ kartāraśca phalaṁ ca vai|
marīcisvapnasaṅkāśā gandharvanagaropamāḥ||42||

imaṁ samādhimajñātvā saṁvṛtāvupalambhataḥ|
jāyante vividhā rogāsteṣāṁ māyā bhiṣagjitam||43||

svādhiṣṭhānopadeśastu yena nāsādyate guroḥ|
śāśvatocchedamālambya sa vaivartī bhavet punaḥ||44||

sarvapūjāṁ parityajya gurupūjāṁ samārabhet|
tena tuṣṭena tallabhyaṁ sarvajñajñānamuttamam||45||

kiṁ tena na kṛtaṁ puṇyaṁ kiṁ vā nopāsitaṁ tapaḥ|
anuttarakṛdācāryavajrasattvaprapūjanāt||46||

yad yadiṣṭataraṁ kiñcid viśiṣṭatarameva ca|
tat taddhi gurave deyaṁ tadevākṣayamicchatā||47||

ācāryo harate pāpam ācāryo harate bhayam|
ācāryastārayet pāraṁ duḥkhārṇavamahābhayāt||48||

yo'haṅkāra[ma]-lāliptaḥ sadbhūtakramadharṣakaḥ|
sāvajñastattvadharmeṣu tasya tattvaṁ na darśayet||49||

satyavāggurubhaktaśca viviktaścaikasandhiokaḥ|
samayācārarakṣī ca kramaṁ tasya pradarśayet||50||

|| svādhiṣṭhānakramastṛtīyaḥ samāptaḥ||
kṛtiriyamācāryanāgārjunapādānām| granthapramāṇamasya ṣaṭpañcāśat|

abhisambodhikramaḥ caturthaḥ

[4]

abhisambodhikramaḥ caturthaḥ

namaḥ śrīvajrasattvāya

vajrasattvaṁ namaskṛtya sarvaśūnyopadeśakam|
caturtho hyābhisambodhikramo'yaṁ vakṣyate mayā||1||

asau svayambhūrbhagavān eka evādhidaivataḥ|
upadeśapradānāt tu vajrācāryo'dhikastataḥ||2||

tatsamārādhanaṁ kṛtvā varṣaṁ māsamathāpi vā|
tasmai tuṣṭāya gurave pūjāṁ kuryāt tu śaktitaḥ||3||

yathāsvabhāvato mudrāṁ nivedyāsmai suśikṣitām|
gaṇamaṇḍalamadhye tu kuryāt pūjāṁ yathāvidhi||4||

tatastuṣṭo mahāyogī pañcakāmopabhogataḥ|
ālokasyodayaṁ kuryāt samāpattividhānataḥ||5||

kalaśādau susaṁsthāpya bodhicittaṁ prayatnataḥ|
ardharātre cābhisiñcet suśiṣyaṁ kṛpayā guruḥ||6||

abhiṣekaṁ tu samprāpya pratyūṣamaye punaḥ|
sampūjyārādhayet stotrairguruṁ śiṣyaṁ kṛtāñjaliḥ||7||

traidhātukavinirmukta ākāśasamatāṁ gataḥ|
nopariṣyasi kāmeṣu nirālamba namo'stu te||8||

aniḥśrito'si skandheṣu dhātuṣvāyataneṣu ca|
viparyāsavinirmukta nirālamba namo'stu te||9||

avikalpitasaṅkalpa apratiṣṭhitamānasa|
acintyamanasikāra nirālamba namo'stu te||10||

anālayaṁ yathākāśaṁ niṣprapañcaṁ nirañcanam|
ākāśasamacitto'si nirālamba namo'stu te||11||

draṣṭukāmo'bhisambodhiṁ sarvaśūnyasvabhāvikām|
stutvā kṛtāñjaliḥ śiṣyo guraṁ sañcodayet punaḥ||12||

prayaccha me mahānātha abhisambodhidarśanam|
karmajanmavinirmuktam ābhāsatrayavarjitam||13||

prayaccha me mahācārya vajrajñānamanuttaram|
sarvabuddhamahājñānaṁ sarvatāthāgatālayam||14||

prayaccha me mahāvajra kāyavākcittaśodhanam|
anādinidhanaṁ śāntaṁ sarvakleśaviśodhanam||15||

evamārādhito yogī sadbhūtaguṇakīrtanaiḥ|
śiṣye kāruṇyamutpādya kramamevamathārabhet||16||

āloko rātribhāgaḥ sphuṭaravikiraṇaḥ syād divālokabhāsaḥ|
sandhyālokopalabdhaḥ prakṛtibhirasakṛd yujyate svābhiretat|

no rātrirnāpi sandhyā na ca bhavati divā yaḥ prakṛtyā vimuktaḥ
sa syād bodhikṣaṇo'yaṁ varagurukathito yogināmeva gamyaḥ||17||

naiśaṁ dhvāntaṁ vinaṣṭaṁ vyapagatamakhilaṁ sāndhyatejastu yasmin
bhāsvānnodeti yāvat kṣaṇa iha vimale darśayed bhūtakoṭim|

śiṣyāyācāryamukhyo vinihatatimiro bāhyasambodhidṛṣṭyā
prāpnotyadhyātmasaukhyaṁ vyapagatakaluṣaṁ buddhabodhiṁ kṣaṇena||18||

anādibhūtaṁ tvathavādibhūtaṁ
amadhyabhūtaṁ tvatha madhyabhūtam|
anantabhūtaṁ tvathavāntabhūtaṁ
tat sarvaśūnyaṁ pravadanti santaḥ||19||

gamanāgamanaṁ ca yatra nāsti
kṣayavṛddhī na cāpyabhāvabhāvau|
ativismayarūpam arūpyavismayaṁ
sthitimannāpi na cāpi gatvaram||20||

yadasti-nāstivyavahāramuktaṁ
na puṇyarūpaṁ na ca pāparūpam|
na puṇyapāpātmakamagrabhūtaṁ
tat sarvaśūnyaṁ pravadanti buddhāḥ||21||

evaṁvidhaṁ tattvamavāpya yogī
carācarātmā jagadekabandhuḥ|
yaḥ paryaṭejjñānamayo nṛsiṁhaḥ
kṛtsnaṁ jagat so'vyayakāyalābhī||22||

sa jihyakāyo'pyavijihyakāyaḥ
so'nāsano'pyāsanabandhadhīraḥ|
samīlitākṣo'pi vibuddhanetraḥ
samāhitaḥ sanna samāhitau'sau||23||

sa vāgyuto vāgasamanvito'pi
bhogānvitaḥ so'pi virupavṛttiḥ|
sa lokanāthaḥ parabhṛtyabhūto
yastattvavit kṣīṇasamastadoṣaḥ||24||

prāptopadeśakaḥ śiṣyo dvidhā yogamathābhyaset|
piṇḍagrāhakrameṇaiva tathā caivānubhedataḥ||25||

śirasaḥ pādato cāpi yāvaddhṛdayamāgataḥ|
bhūtakoṭiṁ viśed yogī piṇḍagrāha iti smṛtaḥ||26||

sthāvaraṁ jaṅgamaṁ caiva pūrvaṁ kṛtvā prabhāsvaram|
paścāt kuryāt tathā''tmānam anubhedakramo hyayam||27||

śvāsavāto yathā''darśe layaṁ gacchati sarvataḥ|
bhūtakoṭiṁ tathā yogī praviśocca muhurmuhuḥ||28||

gacchaṁstiṣṭhan svapan bhuñjannunmiṣan nimiṣan hasan|
anena dhyānayogena sadā tiṣṭhati tattvavit||29||

sattvārtho'pi kadācit syāt tattatsārūpyaraśminā|
vāyuvijñānayuktena svādhiṣṭhānakrameṇa tu||30||

yathā nadījalāt svacchānmīnamuttiṣṭhate drutam|
sarvaśūnyāt tathā svacchānmāyājālamudīryate||31||

pañcabuddhakulāyattā mahāmudrādikalpanā|
pañcaraśmisamucchreyā gagane śakracāpavat||32||

mudrābandhaṁ prakuryād vā mantraṁ cāpi japed yadi|
sarvamanyat prakuryācca sarvaśūnyapade sthitaḥ||33||

sarvabhuk sarvapaścaiva sarvavandī ca sarvagaḥ|
sarvakṛt sarvaliṅgī ca sarvaśūnyena sidhyati||34||

prāptopadeśaḥ subhagaḥ suśiṣyo
baudhau hi cittaṁ paramārthanāma|
guroḥ sakāśāt punarādadīta
kṛtāñjalirdhāritapuṣpahastaḥ||35||

sarvabhāvavigataṁ skandhadhātvāyatanagrāhyagrāhakavarjitaṁ dharmanairātmyasamatayā svacittam ādyanutpannaṁ śūnyatāsvabhāvamiti|

tatastu gurave dadyād dakṣiṇāṁ tvanurūpataḥ|
ratnaṁ gṛhaṁ vā hastyaśvaṁ grāmaṁ vā śayanāsanam||36||

dāsaṁ dāsīṁ priyāṁ bhāryāṁ putrīṁ cāpyativarṇabhām|
ātmānaṁ cāpi yaddadyāt kimanyadavaśiṣyate||37||

prāptācāryaprasādo vimaladṛḍhamatiḥ sarvabhāvasvabhāvaḥ
svacchaṁ śuddhaṁ susūkṣmaṁ paramaśivamayaṁ buddhanirvāṇadhātum|
nirdvandvaṁ nirvikalpaṁ satatasukhamayaṁ bhāvayet tattvayogī
puṇyāpuṇyād vimuktaḥ svayamiha bhagavān jāyate vajrasattvaḥ||38||

|paramarahasyasukhābhisambodhikramaścaturthaḥ samāptaḥ||

kṛtiriyam ācāryanāgārjunapādānām| granthapramāṇamasya ślokāścatvāriṁśat|

yuganaddhakramaḥ pañcamaḥ

[5]

yuganaddhakramaḥ pañcamaḥ

namaḥ śrīvajradharāya

phalahetvātmakaṁ nāthaṁ sarvadvandvavivarjitam|
praṇamya likhyate samyag yuganaddhakramottamaḥ||1||

saṁsāro nirvṛtiśceti kalpanādvayavarjanāt|
ekībhāvo bhaved yatra yuganaddhaṁ taducyate||2||

saṅkleśaṁ vyavadānaṁ ca jñātvā tu paramārthataḥ|
ekībhāvaṁ tu yo vettiṁ sa vetti yuganaddhakam||3||

sākārabhāvasaṅkalpaṁ nirākāratvakalpanām|
ekīkṛtya cerad yogī sa vetti yuganaddhakam||4||

grāhyaṁ ca grāhakaṁ caiva dvidhā buddhirna vidyate|
abhinnatā bhaved yatra tadāha yuganaddhakam||5||

śāśvatocchedabuddhī tu yaḥ prahāya pravartate|
yuganaddhakramākhyaṁ vai tattvaṁ vetti sa paṇḍitaḥ||6||

prajñākaruṇayoraikyaṁ jñātvā yatra pravartate|
yuganaddha iti khyātaḥ kramo'yaṁ buddhagocaraḥ||7||

prajñopāyasamāpattyā jñātvā sarvaṁ samāsataḥ|
yatra sthito mahāyogī tad bhaved yuganaddhakam||8||

yatra sopadhiśeṣaṁ ca tathā'nupadhiśeṣakam|
ityevaṁ kalpanā nāsti tat taddhi yuganaddhakam||9||

yatra pudgalanairātmyaṁ dharmanairātmyamityapi|
kalpanāyā viviktatvaṁ yuganaddhasya lakṣaṇam||10||

jñātvā krameṇa tattvajñaḥ svādhiṣṭhānaprabhāsvaram|
tayoreva samājaṁ yad yuganaddhakramo hyayam||11||

piṇḍagrāhanubhedābhyāṁ praveśastathatālaye|
utthānaṁ ca tato yatra samantād yuganaddhakam||12||

saṁvṛtiṁ paramārthaṁ ca pṛthag jñātvā vibhāgataḥ|
sammīlanaṁ bhaved yatra yuganaddhaṁ taducyate||13||

tathātalambanaṁ naiva vyutthānaṁ yatra naiva hi|
yuganaddhaṁ bhavet tacca yogināṁ padamavyayam||14||

suptaḥ prabuddha ityetadavasthādvayavarjitam|
yuganaddhaṁ vadecchāstā svāpabodhavivarjitam||15||

samādhānāsamādhānaṁ yasya nāstyeva sarvathā|
yuganaddhe sthito yogī bhāvābhāvavivarjitaḥ||16||

asmṛtismṛtinirmuktaḥ satatodayalakṣaṇaḥ|
vicaredicchayā yogī yuganaddhakrame sthitaḥ||17||

rāgārāgavinirmuktaḥ paramānandamūrtimān|
āsaṁsāraṁ sthitiṁ kuryād yuganaddhavibhāvakaḥ||18||

kāryaṁ ca kāraṇaṁ caiva kṛtvā'bhinnaṁsvabhāvataḥ|
yā sthitiryogināṁ buddhā yuganaddhaṁ vadanti tat||19||

utpattikrama eko'yam utpannakrama ityapi|
ekatvaṁ tu dvayoryatra yuganaddhastaducyate||20||

devatā pariśuddheyam aśuddheyaṁ bhavediti|
iti yā kalpanā'bhinnā yatra tad yuganaddhakam||21||

rūpīti cāpyarūpīti kalpanādvayavarjanāt|
yaḥśāntiṁ vetti yogīndraḥ sa prāpto yuganaddhakam||22||

evaṁ vai yaḥ sthito yogī yuganaddhakrame sthitaḥ|
ucyate sa hi sarvajñaḥ tattvadarśī ca viśvadhṛk||23||

māyājālābhisambuddhaḥ saṁsārārṇavapāragaḥ|
kṛtakṛtyo mahāyogī satyadvayanaye sthitaḥ||24||

etadevādvayaṁ jñānam apratiṣṭhitanirvṛtiḥ|
buddhatvaṁ vajrasattvatvaṁ sarvaiśvaryaṁ tathaiva ca||25|

vajropamasamādhistu niṣpannakrama eva ca|
vajropamasamādhiścāpyadvayaṁ tacca kathyate||26||

anutpādādayaḥ śabdā advayajñānasūcakāḥ|
asyaiva vācakāḥ sarve nānyat tatrābhidhīyate||27||

mahāmudrātmikāṁ siddhiṁ sadasatpakṣavarjitām|
anenaiva gatā buddhā gaṅgāyāḥ sikatopamāḥ||28||

ghaṭamāno mahāyogī yuganaddhapade sthitaḥ|
bhāvayed yuganaddhaṁ tu caryāṁ cāpi tadanvayām||29||

yathātmani tathā śatrau yathā bhāryā tathātmajā|
yathā mātā tathā vaiśyā yathā ḍombī tathā dvijā||30||

yathā vastraṁ tathā carma yathā ratnaṁ tathā tuṣam|
yathā mūtraṁ tathā madyaṁ yathā bhaktaṁ tathā śakṛt||31||

yathā sugandhi karpūraṁ tathā gandhamamedhyajam|
yathā stutikaraṁ vākyaṁ tathā vākyaṁ jugupsitam||32||

yathā rudrastathā vajrī yathā rātrīstathā divā|
yathā svapnaṁ tathā dṛṣṭaṁ yathā naṣṭaṁ tathā sthitam||33||

yathā saukhyaṁ tathā duḥkhaṁ yathā duṣṭastathā sutaḥ|
yathā'vīcistathā svargastathā puṇyaṁ tu pāpakam||34||

evaṁ jñātvā cared jñānī nirviśaṅkastu sarvakṛt|
pracchannavratamāsādya sidhyante sarvasampadaḥ||35||

prakāśya puṇyaṁ yat prāptaṁ pañcakramamanuttaram|
anena krīḍatāṁ loko yuganaddhasamādhinā|| iti|36||

yuganaddhakramaḥ pañcamaḥ samāptaḥ||

kṛtiriyam ācāryanāgārjunapādānām| granthapramāṇamasya ślokāḥ pañcatriṁśat|
|| pañcakramaḥ samāptaḥ||

prajñākaruṇayoraikyaṁ jñātvā yatra pravartate|
yuganaddha iti khyātaḥ kramo'yaṁ buddhagocaraḥ||
(pañcakramaḥ, 5ḥ7)

atyudgāḍharayasthirākṛtighanadhvānabhramanmandara-
kṣubdhadhīradhivīcisañcayagataprāleyapādopamaḥ|
śrīmatpotalake gabhīravivṛtidhvānapratidhvānite
sāndrasvāṁśucayaśriyā valayito lokeśvaraḥ pātu vaḥ||
(subhāṣitaratnakośe vidyākaraḥ)

na satyā nāsatyā na ca tadubhayī nāpyanubhayī
nirullekhā sarvākṛtivaramayī madhyamakadhīḥ|
jinaḥ śāstā saiva sthira-calajagattattvamapi sā
svasaṁvittirdevī jayati sukhavajrapraṇayinī||
(amṛtakaṇikābhidhāyāṁ nāmasaṁgītiṭikāyām, raviśrīḥ)

ye dharmā hetuprabhavā hetusteṣāṁ tathāgato hyavadat|
teṣāṁ ca yo nirodha evaṁvādī mahāśramaṇaḥ||

śubhamastu