hetutattvopadeśaḥ

hetutattvopadeśaḥ

mañjuśrīkumārabhūtāya namaḥ

1. sādhanaṁ dūṣaṇaṁ caiva sābhāsaṁ parasaṁvide|

pratyakṣamanumānaṁ ca sābhāsaṁ tvātmasaṁvide||

ayaṁ śāstrārtharāṁgrahaḥ||

2. vādinā svayaṁ sādhayitumiṣṭo'rthaḥ sādhyaḥ| yena sādhyate tatsādhanam||

3. hetostrairūpyamucyate| kiṁ punastattrairūpyam| pakṣe sattvameva prathamaṁ rūpam| sapakṣa eva sattvamiti dvitīyaṁ rūpam| vipakṣe [ca] asattvameva niścitamiti tṛtīyaṁ rūpam||

4. tatra pakṣaḥ prasiddho dharmī prasiddhaviśeṣaṇena viśiṣṭaḥ svayaṁ sādhayitumiṣṭaḥ pratyakṣādyaviruddhaḥ| yathā dharmī śabdo'nitya iti viśeṣaṇena viśiṣṭaḥ sādhyaḥ| kṛtakatvāditi heturbhavatīti||

5. kaḥ punaḥ sapakṣaḥ| sādhyadharmasāmānyena samānaḥ sapakṣaḥ| yathā ghaṭādiriti||

6. ko hetorvipakṣaḥ| yatra sādhyābhāvāddhetvabhāvo niścayena pradarśyate| yathākāśādiḥ||

7. trirūpahetupradarśanena parāvagamanimittaṁ kṛtaḥ prayogaḥ parārthānumānabhityucyate| yathā śabdo'nitya iti pakṣavacanam| kṛtakatvāditi hetuvacanam| ghaṭādivaditi sapakṣavacanam| ākāśādivaditi vipakṣavacanam||

8. sa punardvividho dṛśyate| sādharmyeṇa vaidharmyeṇa ca||

9. tatra sādharmyeṇa tāvat| yatkṛtakaṁ tatsarvamanityaṁ dṛṣṭam| yatha ghaṭādiḥ| śabdo'pi kṛtaka iti||

10. vaidharmyeṇāpyanityatvābhāve kṛtakatvābhāvaḥ| yathākāśādiḥ| śabdastu kṛtaka iti||

11. kaḥ punaḥ pakṣābhāsaḥ| pakṣābhāso vastuto na pakṣaḥ| pratyakṣādivirodhādayaṁ pakṣābhāsaḥ||

12. yathā dhūmādirdharmī buddhimaddhetūtpannaḥ sādhya iti pratyakṣaviruddhaḥ pakṣābhāsaḥ| pratyakṣato vahnerdhūmotpattidarśanāt||

13. anumānaviruddho yathā| vedavacanaṁ dharmyapauruṣeyamiti sādhye śabdaḥ prayatnānantarīyaka iti pauruṣeyatvasya siddheḥ||

14. svavacanaviruddho yathā| anumānaṁ na pramāṇamiti| parāvagamāya vākyaprayogaḥ parārthānumānamiti nirdeśāt||

15. lokaviruddho yathā| śuci naraśiraḥ kapālaṁ prāṇyaṅgatvāc chaṅkhaśuktivaditi||

16. pratītiviruddho yathā| yad yāvatkālasthāyi [tat] anityam| yadyāvatkālasthāyi [tat] sarvaṁ nityamiti laukikapratīteḥ||

17. aprasiddhaviśeṣaṇo yathā| vaiśeṣikasya sāṁkhyaṁ prati śabdo vināśīti||

18. aprasiddhaviśeṣyo yathā| sāṁkhyasya bauddhaṁ pratyātmā cetana iti sādhyam||

19. aprasiddhobhayo yathā| vaiśeṣikasya bauddhaṁ prati samavāyikāraṇamātmeti kāyaḥ sthirasvabhāva iti vā||

20. pakṣābhāsā uktāḥ||

21. kīdṛśo hetvābhāsaḥ| yo heturivābhāsate na tu hetutvena sidhyati||

22. hetvābhāsastrividhaḥ| asiddho viruddho'naikāntikaśca||

23. tatra pakṣāsiddherasiddha iti hetvābhāsaḥ||

24. pakṣe sapakṣe cāsan vipakṣe ca san [yaḥ] sa viruddha iti hetvābhāsaḥ sādhyaviparītasiddheḥ||

25. sapakṣavipakṣayorubhayorbhāve'bhāve vā saṁśaye vāsiddhapratibandho yo hetuḥ so'naikāntiko hetvābhāsaḥ| vādiprativādibhyāṁ sādhayitumiṣṭasyaikāntenāsiddheḥ||

26. ubhayāsiddho yathā| śabdasyānityatve sādhye hetuścākṣuṣatvaṁ vādiprativādinorasiddha iti||

27. cetanastaruriti sādhye sarvatvagapaharaṇe maraṇāditi hetuḥ prativādinaṁ bauddhaṁ pratyasiddha iti prativādyasiddhaścittādinirodhasya bauddhasyeṣṭatvāt||

28. acetanāḥ sukhādaya iti sādhye utpattimattvāditi hetuḥ sāṁkhyasya svayaṁ vādino'siddha iti vādyasiddhaḥ||

29. vaiśeṣikeṇa prativādinaṁ bauddhaṁ prati pṛthivyādirdharmī kārya iti sādhya ekaikakṣaṇavadanyānyotpādāditi vādinaḥ svayamasiddhaḥ| siddhe'pyutpāda ekaikakṣaṇavadanyānyotpādāsiddheḥ||

30. pakṣaikadeśāsiddho yathā| cetanāstaravaḥ svāpāditi hetuścandane vādinaḥ svayaṁ pakṣaikadeśe'siddhaḥ| na hi sarve vṛkṣā rātrau patrasaṁkocabhājaḥ||

31. evameva kṣityādirgharmī buddhimajjāta iti sādhye kāryamiti heturbauddhaṁ pratyasiddhaḥ pratyakṣānupalambhābhyāṁ kāryakāraṇasambandhasiddhasvarūpeṇa kṣityādīnāṁ siddheḥ| vāsabhojanādisiddhiriti cettadā pakṣaikadeśāsiddhiḥ||

32. saṁdigdhāsiddho yathā| yadīha dhūmaḥ syādatra vahniḥ syāditi sādhye hetvaniścayāt||

33. saṁdigdhadharmyasiddho yathā| eṣvanekeṣu nikuñjeṣu kasmiṁścin nikuñje mayūra iti sādhye kekāyitāditi heturiti||

34. dharmyasiddhāvapyasiddho yathā| dharmyātmā sarvavyāpīti sādhye sarvatropalabhyamānaguṇatvāditi heturiti||

35. navaite'siddhā hetvābhāsāḥ||

36. kīdṛśaḥ punaranaikāntiko hetvābhāsaḥ| ucyate|

37. yathā śabdasya nityatvādike dharme sādhye prameyatvāditi hetuḥ sapakṣavipakṣayoḥ sarvatra varttamānaḥ sādhāraṇo'naikāntika iti||

38. evaṁ śabdo nitya iti sādhye śrāvaṇatvāditi hetuḥ sapakṣe vipakṣe cāvṛtterasādhāraṇo'naikāntikaḥ||

39. evaṁ śabdasyāprayatnānantarīyakatve sādhye'nityatvāditi hetuḥ sapakṣaikadeśavṛtti rvipakṣavyāpyanaikāntikaḥ| aprayatnānantarīyakasya śabdasya sapakṣaḥ vidyudākāśādiḥ| tatra sapakṣaikadeśe vidyudādāvanityatvaṁ varttate| nākāśādau| vipakṣāḥ prayatnānantarīyakādayaḥ sarve| teṣu sarveṣvasti||

40. evaṁ śabdasya prayatnānantīyakatve sādhye'nityatvāditi hetu rghaṭādau sarvatra [vidyate]| aprayatnānantarīyako vipakṣaḥ puna rvidyudākāśādiḥ| tatraikadeśe vidyudādau varttate nākāśādau| tasmādayaṁ vipakṣaikadeśavṛttiḥ sapakṣavyāpyanaikāntiko hetuḥ||

41. ubhayapakṣaikadeśavṛttiranaikāntiko yathā| dharmī śabdo nitya iti sādhye'mūrttatvāditi hetuḥ| paramāṇvākāśādiḥ sapakṣaḥ| tatra sapakṣaikadeśa ākāśe'mūrttatvaṁ vidyate na paramāṇau paramāṇūnāṁ mūrttatvāt| ghaṭasukhādiranityo vipakṣaḥ| tadekadeśe sukhādau vidyate na ghaṭādāviti||

42. evaṁ saṁdigdhavipakṣavyāvṛttiḥ sapakṣavyāpyanaikāntiko heturyathā| kapilādi rdharmyasarvajña iti sādhye vaktṛtvāditi hetū rathyāpuruṣādau sapakṣe vidyate vipakṣe sarvajñe saṁdigdhaḥ| sarvajñasyātīndriyatvādvaktṛtvamasti na veti saṁdehaḥ||

43. evaṁ saṁdigdhasapakṣavṛttirvipakṣavyāpyanaikāntiko heturyathā| ṛṣabhavardhamānādi rdharmī sarvajña iti sādhye kevalaśāstrakarttṛtvāditi hetuḥ sapakṣe sarvajñe saṁdigdhaḥ| sarvajñasyātīndriyatvāt kevalaśāstrakarttari saṁdehaḥ| vipakṣe...........ādāvasarvajñe'stīti||

44. anvayavyatirekayoḥ saṁdehe'naikāntiko heturyathā| jīvaccharīraṁ sātmakaṁ prāṇādimatvāditi hetuḥ| jīvaccharīrasambandhī prāṇādiḥ sātmake nirātmake vā varttamāno vyāvṛtto vetyaniścayaḥ||

45. tataḥ kevalānvayī heturdṛṣṭāntābhāvāt||

46. evaṁ dvitīyo'pi kevalavyatirekī| jīvaccharīramidaṁ na nirātmakaṁ prāṇādyabhāvaprasaṅgāditi| dṛṣṭāntābhāvādanvayasyāniścayo vyatirekasya ca niścaya ityayaṁ saṁdigdho hetuḥ||

47. ete daśānaikāntikahetvābhāsā udāhṛtāḥ||

48. viruddhā hetvābhāsāḥ kīdṛśāḥ||

49. yathā dharmī śabdo nitya iti sādhyadharmaḥ| kṛtakatvādākāśādivadityayaṁ heturghaṭādau vipakṣa eva vidyate na sapakṣe||

50. evaṁ dharmī śabdo nitya iti sādhye prayatnānantarīyakatvāditi hetuḥ sapakṣa ākāśādau nāsti ghaṭādāvekadeśe'sti vidyudādau nāstīti| imau dvau hetū dharmasvarūpaviparītasādhanau||

51. dharmisvarūpaviparītasādhano dvividho yathā| ete cakṣurādayaḥ parārthā iti sādhyadharmaḥ saṁghātatvāditi hetuḥ śayanāsanādivaditi sapakṣanirdeśaḥ| ayaṁ heturyathā cakṣurādeḥ pārārthyaṁ sādhayati tathā saṁhatatvamapi parasya sādhayati| śayanāsanādeḥ saṁhatadevadattādiparārthatvadarśanāt||

52. dharmisvarūpaviparītasādhano yathā| dharmyādirbuddhimataḥ kāraṇādutpadyata iti sādhye sāśratvāditi hetuḥ| ghaṭādivaditi sapakṣanirdeśaḥ| yathānena hetunā buddhimaddhetuto jātatvaṁ sādhyate tathā buddhimatkarttuḥ sāśrayatvamapi sādhyate||

53. dharmiviśeṣaviparītasādhano yathā| vaiśeṣikeṇa yogācāraṁ prati dharmyātmā cetanā iti sādhye vijñānādhiṣṭhānāditi hetu ryathācetanamātmānaṁ cetanaṁ sādhayati tathāyaṁ heturanityamapi sādhayati vijñānasyānityatvāt||

54. pañcabhiretairviruddhā hetvābhāsāḥ pradarśitāḥ||

55. viruddhāvyabhicārī kutrāpi hetudoṣo na bhavatīti tasyodāharaṇopanyāso na yuktaḥ| udāharaṇamucyate cet| yatsarvadeśāvasthitaiḥ svasambandhibhiryugapadabhisambadhyate tatsarvagatam| yathākāśam| sarvadeśāvasthitaiḥ svasambandhibhiryugapat sāmānyamabhisambaddhamiti pailukasya svabhāvahetuprayogaḥ| dvitīyo'pi prayogaḥ paiṭharasya| yadupalabdhilakṣaṇaprāptaṁ sadyatra nopalabhyate na tat [tatra] asti| tadyathā kasmiṁściddeśe'vidyamāno ghaṭaḥ| nopalabhyate [ca] upalabdhilakṣaṇaprāptaṁ sāmānyaṁ vyaktyantarāleṣviti| ayamanupalambhahetuḥ pūrvoktaśca svabhāvahetuḥ| anayoḥ parasparavirodhena saṁśayajanakatvāt| sapakṣādanyo dṛṣṭānto na kaścidastīti sapakṣa evāyaṁ sādharmyeṇa dṛṣṭānto bhavati|

56. tatra kīdṛśā dṛṣṭāntābhāsāḥ||

57. sādharmyeṇa tāvat||

58. nityaḥ śabdo'mūrttatvātkarmavaditi sādhyavikalaḥ karmaṇo'nityatvāt||

59. nityaḥ śabdo'mūrttatvātparamāṇuvaditi sādhanavikalaḥ paramāṇormūrttatvāt||

60. nityaḥ śabdo'mūrttatvāddhaṭavaditi sādhya[sādhana]vikalaḥ||

61. evaṁ saṁdigdhasādhyadharmo dṛṣṭāntābhāso yathā| dharmī puruṣaḥ kaścidrāgādimān vacanādrathyāpuruṣavaditi| rathyāpuruṣadṛṣṭānte rāgādimattvaṁ saṁdigdham| paracittānumānasya duṣkaratvāt||

62. saṁdigdhasādhanadharmo yathā| maraṇadharmā puruṣa iti sādhye rāgādimattvāditi hetū rathyāpuruṣadṛṣṭānte saṁdigdhaḥ| vītarāgasyāpi sarāgavaccalatvāt||

63. saṁdigdhobhayadharmo dṛṣṭāntābhāso yathā| dharmī kaścit puruṣaḥ [a-]sarvajña iti sādhye rāgādimattvāditi hetuḥ| rathyāpuruṣadṛṣṭānte sādhyaṁ sādhanaṁ ca saṁdigdham||

64. ananvayo'pradarśitānvayo viparītānvayaśca dṛṣṭāntābhāsāḥ||

65. tatrānanvayo yathā| yo vaktā sa rāgādimān rathyāpuruṣavat| vaktṛtvarāgādimattvayoḥ kāryakāraṇabhāvapratiṣedhāt||

66. apradarśitānvayo yathā| anityaḥ śabdaḥ kṛtakatvāditi| atrānvayavyāptirapradarśitā| vaktṛdoṣādayaṁ dṛṣṭāntābhāsaḥ||

67. viparītānvayo yathā| yadanityaṁ tatkṛtakamiti| ghaṭādivaditi| atrānityatvaṁ sādhyam| sādhyena sādhanasya vyāptirdarśanīyā sādhanena tu sādhyasya vyāptirdarśitā| tato viparītānvayo dṛṣṭāntābhāsaḥ||

68. sādharmyeṇaite nava dṛṣṭāntābhāsā uktāḥ||

69. vaidharmyeṇa dṛṣṭāntābhāsā ucyante||

70. sādhyāvyāvṛtto dṛṣṭāntābhāso yathā| nityaḥ śabdo'mūrttatvātparamāṇuvaditi| iha paramāṇurvaidharmyadṛṣṭānta iti sādhanadharmo'mūrttatvaṁ vyāvṛttaṁ mūrttatvātparamāṇunām| sādhyadharmo nityatvaṁ na vyāvṛttaṁ nityatvātparamāṇunāmiti||

71. sādhanāvyāvṛtto yathā| nityaḥ śabdo'mūrttatvāt karmavaditi| iha sādhyadharmo nityatvaṁ vyāvṛttaṁ karmaṇo'nityatvāt sādhanadharmo na vyāvṛtto'mūrttatvātkarmaṇaḥ||

72. ubhayāvyāvṛtto yathā| nityaḥ śabdo'mūrttatvādākāśādivaditi| atrākāśādervaidharmyadṛṣṭāntāt sādhyaṁ sādhanaṁ ca na vyāvṛttam||

73. tathā saṁdigdhasādhyavyatirekaḥ saṁdigdhasādhanavyatirekaḥ saṁdigdhobhayavyatirekaśca||

74. saṁdigdhasādhyavyatireko dṛṣṭāntābhāso yathā| asarvajñāḥ kapilādayo'vidyamānasarvajñatāliṅgabhūtakevalaśāstrakarttṛtvāditi| atra vaidharmyeṇodāharaṇamucyate| yaḥ sarvajñaḥ sa jyotirjñānādikamupadiṣṭavān| tadyathā ṛṣabhavarddhamānādiriti| iha vaidharmyodāharaṇa ukta ṛṣabhavardhamānāderasarvajñatvaṁ vyāvṛttamavyāvṛttaṁ veti saṁdehaḥ||

75. saṁdigdhasādhanavyatireko yathā| iha trayīvidā brāhmaṇena kapilakaṇādādiḥ puruṣo na grāhyavacano rāgādimattvāditi| atra vaidharmyodāharaṇamucyate yo grāhyavacano na sa rāgādimān yathā gotamādayaḥ dharmaśāstrāṇāṁ praṇetāra iti| gotamādibhyo rāgādimatvasya [sādhana]dharmasya vyāvṛttiḥ saṁdigdhā||

76. saṁdigdhobhayavyatireko yathā| avītarāgāḥ kapilādayaḥ parigrahāgrahayogāditi| atra vaidharmyeṇodāharaṇamucyate| yo vītarāgaḥ sa na parigrahāgrahavān yathā ṛṣabhavarddhemānādiriti| ṛṣabhādeḥ [vai]dharmyadṛṣṭāntād vītarāgatvaparigrahāgrahayoḥ sādhyasādhanadharmayorvyatireko'vyatireko veti saṁdehaḥ| prāgalabdhasya vastuno lābhaḥ parigrahaḥ labdhasyāparivarjanamāgrahaḥ| ubhayorapi tayo rṛṣabhe sambhavaḥ| chatracāmaramahādundubhīnāṁ parigrahāgrahaśravaṇāt|

77. avyatireko vaidharmyadṛṣṭāntābhāso'pradarśitavyatireko viparītavyatirekaśceti||

78. avyatireko yathā| kapilādiravītarāgo vaktṛtvāt| yatrāvītarāgatvaṁ nāsti na sa vaktā yathopalakhaṇḍa iti| yadyapīdamupalakhaṇḍādvyāvṛttaṁ tathāpi sarvasmādvītarāgādvaktṛtvaṁ na vyāvṛttaṁ sandehāt||

79. apradarśitavyatireko yathā| anityaḥ śabdaḥ kṛtakatvādākāśādivaditi| paramārthataḥ samyagudāhṛto'pi vakturaparādhāddṛṣṭāntābhāsaḥ| parārthānumāne vakturguṇadoṣayordvayo rvicāraṇīyatvāt| evaṁ yannityaṁ tatsarvaṁ niyatamakṛtakaṁ dṛśyate yathākāśādiriti vāgvibhāgo vaktrā karttavyaḥ| pūrvavarttino vyatirekasyāpradarśanādapradarśitavyatirekaḥ||

80. viparītavyatireko yathā| yadakṛtakaṁ tannityaṁ dṛṣṭamiti| iha tu sādhyaviparīte vyāptirdarśanīyā| tena yadyatsādhyaviparītaṁ tattanniyataṁ sādhanaviparītaṁ bhavet||

81. aṣṭādaśa dṛṣṭāntābhāsā uktāḥ||

82. ebhireva pakṣahetudṛṣṭāntābhāsairvādinā sādhanasyāvyutpatteḥ [prati]vādī dūṣaṇamupanyasyati| tasya dūṣaṇasya pūrvapakṣavādino'bhīṣṭārthasiddhau pratibandhakatvātsādhananyūnatodbhāvanameva dūṣaṇamucyate| tasmātsādhanavaddūṣaṇalakṣaṇavibhagāḥ pṛthag noktaḥ||

83. dūṣaṇābhāso dūṣaṇameveti sa prativādinocyate| yadā pūrvapakṣavādino'bhūtaṁ doṣamudbhāvayati [tadā] sa dūṣaṇābhāso jātiriti| abhūtadoṣodbhāvanaṁ viparītottaraṁ jātirityucyate| yathā pakṣadoṣābhāve pakṣadoṣodbhāvanaṁ hetudoṣābhāve hetudoṣodbhāvanaṁ dṛṣṭāntadoṣābhāve ca dṛṣṭāntadoṣodbhāvanaṁ dūṣaṇābhāsa iti||

84. tatrāhuranye| pratijñā hetuḥ [udāharaṇam] upanayaḥ nigamanaṁ ceti pañcāvayavaṁ sādhanamiti| yathānityaḥ śabdaḥ iti pratijñā| kṛtakatvāditi hetuḥ| yatkṛtakaṁ sarvaṁ tadanityaṁ dṛṣṭaṁ yathā ghaṭādirityudāharaṇam| tathā śabdo'pi kṛtaka iti upanayaḥ| tasmādanitya iti nigamanam| dṛṣṭāntapratītasāmarthyasya hetordharmiṇyupasaṁhāra upanaya iti| pratijñāyā punaḥ śravaṇaṁ nigamanamityucyate| maivamanvayo vyatirekaḥ pakṣadharmaśceti trayeṇaiva sādhyārthasiddheḥ||

85. evaṁ vādakāle vyāptipūrvaka eva prayogaḥ| yatkṛtakaṁ sarvaṁ tadanityaṁ dṛṣṭaṁ yathā ghaṭādiriti dṛṣṭānte sādhyasādhanayorvyāptipratipādanamanvaya ityucyate||

86. vipakṣe punaḥ sādhyavyāvṛttyā sādhanavyāvṛttirvyatireka ityucyate| yathā'nityatvābhāve kṛtakatvābhāvaḥ syādyathākāśādiḥ||

87. śabdo'pi kṛtaka iti pakṣadharma ucyate| pratijñā nigamanaṁ ca sarvathā na vaktavye||

88. tathā sādharmyaprayoge'nvayavacanasāmarthyādvyatirekāvagamādayaṁ pṛthag nocyate| yathā yatkṛtakaṁ sarvaṁ tadanityaṁ dṛṣṭaṁ yathā ghaṭādiḥ śabdo'pi kṛtaka iti sādharmyaprayogaḥ| vaidharmyaprayoge vyatirekavacanasāmarthyādanvayapratītiḥ| atra punaranvayo na vācyaḥ | yannityaṁ tadakṛtakaṁ dṛṣṭaṁ yathākāśādiḥ śabdastu kṛtaka iti vaidharmyaprayogaḥ||

89. sādhanābhāso dūṣaṇābhāsaścoktaḥ||

90. kiṁ nāma pratyakṣamiti| pratyakṣaṁ kalpanāpoḍhamabhrāntam| akṣaṁ pratigatamāśritaṁ yadvijñānaṁ tatpratyakṣam| pañcendriyāśritaṁ jñānamityarthaḥ| atyādayaḥ krāntādyarthe dvitīyayeti samāsenābhidheyaliṅgaḥ pratyakṣaśabdaḥ siddhaḥ| pratyakṣo'vabodhaḥ pratyakṣā buddhiḥ pratyakṣaṁ jñānaṁ ceti yuktaṁ bhavati||

91. cakṣuḥ śrotraṁ nāsikā jihvā kāyaśceti pañcendriyāṇi| tadāśritasya jñānasya pañca grāhyaviṣayā rūpaṁ śabdo gandho rasaḥ spraṣṭavyañceti pañcaiva prameyāṇi||

92. tacca pratyakṣaṁ nāmajātyādikalpanāpoḍhaṁ nirvikalpaṁ vā yadi punarabhrāntaṁ pramāṇamucyate pradarśitārthe'visaṁvādāt|

93. tatra nāmavikalpaḥ devadatto'yamiti jñānam| jātivikalpo'yaṁ gauriti jñānam| viśeṣyaviśeṣaṇavikalpo nīlamutpalamiti| anyo'pi savikalpaḥ pratyakṣābhāsaḥ| vidyamāne'rthe vibhramastaimirikasya dvicandrajñānam| śuktau rajatajñānam| ayaṁ sthāṇurvā puruṣo veti jñānaṁ ca| jñānāntaramapi pratyakṣābhāsaḥ pradarśitārthāprāpakatvāt||

94. tatra pratyakṣaṁ trividham| vyāvahārikamindriyajñānaṁ sarvacittacaittānāmātmasaṁvedanaṁ svasaṁvedanaṁ bhūtārthabhāvanāsphuṭaprakarṣaparyantajaṁ yogijñānaṁ ceti||

95. tasya viṣayaḥ svalakṣaṇam| arthakriyāsamarthaṁ svalakṣaṇam| na sāmānyamarthakriyāsamartham|

96. tadeva ca pratyakṣaṁ pramāṇamarthapratītirūpatvāt phalamapi| tathātvena ca pramāṇaphalayorna manāgapi bhedaḥ||

97. dvividhamanumānaṁ svārthaṁ parārthaṁ ca||

98. tatra svārthaṁ tāvat pakṣadharmagrahaṇāt sādhyasādhanasambandhasmṛteḥ paścāt pratipatturarthasya yathāvadyā pratītistadeva svārthānumānam||

99. pakṣadharmastriprakāra eva kāryaṁ svabhāvo'nupalabdhiśca||

100. kāryakāraṇasiddhau kāryaṁ heturiti| yathā yatna dhūmaḥ [tatra] agniryathā mahānasādau| atrapi dhūmasadbhāvāditi| agnyabhāve dhūmābhāvo yathā sajale deśa iti atra tu dhūmāditi||

101. svabhāvo hetuḥ| vṛkṣo'yaṁ śiṁśapātvāt pūrvavyavahārāpannaśiṁśapāvat| vṛkṣābhāve śiṁśapābhāvo yathā vṛkṣarahite pradeśe| iha punastena vyāpakena rūpeṇa vyāpyo hetuḥ||

102. anupalabdhihetuḥ| atra ghaṭo nāstupalabdhilakṣaṇaprāptasyānupalabdheḥ śaśaviṣāṇādivat| atrāpi yadopalabdhiyogyānupalabdhāvupalabdhiyogyābhāvavyāptirniścīyate tadāyaṁ hetustatpratipādako bhavati||

103. kīdṛśā anumānābhāsāḥ| pūrvavaccheṣavatsāmānyatodṛṣṭañca parakalpitāni sarvāṇi anumānānyanumānābhāsāḥ| teṣāṁ tādātmyadutpattilakṣaṇena pratibandhābhāvāt| hetuphalasambandhe vyāpyavyāpakasambandhe ca siddhe sādhyasādhanasambandho bhavati nānyathā visaṁvādakatvāt||

104. yathā megho'yaṁ vṛṣṭimān dṛśyate| gambhīranirghoṣavattvādityatra gambhīraghoṣavato meghādvṛṣṭyanudbhavasambhavāt|

105. yathopariṣṭādvṛṣṭaṁ nadīvṛddhidarśanāditi| nadīnirodhādapi nadīvṛddhidarśanāt||

106. evamime taṇḍulāḥ siddhā ekapātramadhyavartitvād dṛṣṭataṇḍulavat||

107. imāni phalāni pakvānyekaśākhāto jātatvādbhuktaphalavadityatra prāyeṇaivaṁ dṛṣṭe'pi sādhyasādhanayorvisaṁvāda eva||

108. yatpārthivaṁ tatsarvaṁ lohalekhyaṁ dṛśyate yathā vṛkṣādaya iti| atra vajro'pi pārthivaḥ||

109. ye prāṇinaste sarve sakandharā yathoṣṭrādaya iti| atra kulīro'pi prāṇī||

110. yaddravadravyaṁ tadārdraṁ dṛśyate yathā jalamiti| atra raso'pi dravadravyam||

111. evamanye'pyanumānābhāsā dṛśyante||

[iti] paṇḍitapravarajitāripādakṛto

hetutattvopadeśaḥ sampūrṇaḥ|

bhāratīyopādhyāyena paṇḍitena kumārakalasena bhāṣāntarakārakeṇa

bhikṣuṇā śākyaprabheṇa ca bhoṭabhāṣāyāṁ vipariṇamayya

saṁśodhya ca vinyastaḥ||