bhaktiśatakam

bhaktiśatakam

mahāpaṇḍita-rāmacandrabhāratīviracitam

namastasmai bhagavate'rhate samyaksaṁbuddhāya

jñānaṁ yasya samastavastuviṣayaṁ yasyānavadyaṁ vaco

yasmin rāgalavo'pi naiva na punardveṣo na mohastathā |

yasyāheturanantasattvasukhadā'nalpā kṛpāmādhurī |

buddho vā giriśo'thavā sa bhagavān tasmai namaskurmahe || 1 ||

devaḥ śambhurna vairī harirapi na ripuḥ kevalī no sapatno

nodāsīnaḥ svayambhurna ca punarapare te pare vāsavādyāḥ |

śāstā buddho na bandhurjagati na janako naikagotraikajātiḥ

kintveṣāṁ vītarāgo bhavati sakalavid yaḥ sudhībhiḥ sa sevyaḥ || 2 ||

brahmā vidyābhibhūto duradhigamamahāmāyayāliṅgito'sau

viṣṇū rāgātirekānnijavapuṣi dhṛtā pārvatau śaṅkareṇa |

vītāvidyo vimāyo jagati sa bhagavān vītarāgo munīndraḥ

kaḥ sevyo buddhimadbhirvadata vadata me bhrātarasteṣu muktyai || 3 ||

brāhmaṁ vaiṣṇavamaiśvarañca bahudhā labdhvā padaṁ hetutaiḥ (taḥ)

saṁsāre vata saṁsaranti punarapyekāntaduḥkhāspade |

kintairdehabhṛtāmapāyabahalairādyantavadbhiḥ padai-

stasmānnityamanādimadhyanidhanaṁ bauddhaṁ padaṁ prārthyatām || 4 ||

cidākāraṁ sūkṣmaṁ vibhuviśadamākārarahitaṁ

nirīhaṁ nīrūpaṁ niravadhikṛpābījamajaram |

samastajñaṁ sarvopadhirahitamaiśyādamṛtadaṁ

jitānaṅgaiḥ sevyaṁ bhavatu mama tadvastu śaraṇam || 5 ||

aṇīyo'ṇoḥ kleśāpratihatamanantaṁ ca mahato

mahīyo māhātmyapravijitajagadbhūrikaruṇam |

dvibāhuṁ nirbāhuṁ dvipadamapadaṁ satrivadānam

dvinetraṁ nirnetraṁ saguṇamaguṇaṁ tattu śaraṇam || 6 ||

sadānandaṁ tathyaṁ sarasahṛdayaṁ sūktisadanaṁ

satāṁ sevyaṁ samyaksamadhigatatattvaṁ samamanaḥ |

svataḥ siddhaṁ sādhyaṁ sakalaphaladaṁ saumyavadanaṁ

sadīyaṁ sarvīyaṁ bhavatu mama tad vastu śaraṇam || 7 ||

svayambhūtābhijñaṁ bhavabhayaharaṁ bhītirahitaṁ

sphuradbhāgyo bhogojjhitamahatavīryaṁ madanajit |

caturmārgaṁ śuddhaprakṛti ca tathākartṛkamidaṁ

mudaṁ lokotkṛṣṭāmatanu tanutāṁ vastu jagatām || 8 ||

kvacinnīlaṁ pītaṁ kvacidapi ca raktaṁ kvacidapi

kvaciccandracchāyaṁ kvacidapi ca māñjiṣṭharuciram |

kvacit prābhāsvaryyaṁ yadayati ca varṇavyatikarā-

cchikhāṣaṭkaṁ taistairdadhadupari tadvastu śaraṇam || 9 ||

parābhedyaṁ jāmbūnadarūciravarṇaṁ triśaraṇaṁ

triyānaṁ triprajñaṁ tribhuvanaśaraṇyaṁ trivacanam |

kṛpāpātraṁ mandasmitamaruṇasaccīvaradharaṁ

kṛtadhyānaṁ siddhāsanaghaṭitapād vastu śaraṇam || 10 ||

prasannaṁ phullendīvaranayanayugmaṁ tripiṭakaṁ

muhurvyākurvāṇaṁ suranaragaṇebhyaḥ karuṇayā |

paraṁ śāntaṁ svarṇopalarajataloṣṭreṣu ca samaṁ

dṛśāṁ navyātithyaṁ bhavatu mama tad vastu śaraṇam || 11 ||

śaraṇamiti sadagraṁ sādhu gacchāmi buddhaṁ

śaraṇamiti virāgāgrīyamanvemi dharmam |

śaraṇamiti gaṇānāmagriyaṁ yāmi saṁghaṁ

śaraṇamiti punastriṁ dvitrivāraṁ vrajāmi || 12 ||

punarapi śaraṇaṁ vrajāmi buddhaṁ

punarapi lokaguruṁ guruṁ karomi |

punarapi kathayāmi naumi vande,

tvayi mama gautama naiva tṛptirāste || 13 ||

tribhuvanamasakṛnnirūpya yuṣmat-

padasarasīruhareṇumāśrito'ham |

śaraṇamayamayañca daivatamme

gatiraparā mama nāsti nāsti nāsti || 14 ||

anityamakhilaṁ duḥkhamanātmeti pravādine |

namo buddhāya dharmāya saṅghāya ca namo namaḥ || 15 ||

bho vītarāga bhagavaṁstava pādameva

vande munīndra muhurevamimaṁ pravande |

bhūyaḥ punaḥ punarimaṁ parataḥ parastāt

pārśvadvayorupari dikṣu vidikṣu vande || 16 ||

gatamiha bhavatā pathā ca yena

sthitamapi yatra ca yatra vā niṣaṇṇam |

śayitamapi munīndra yatra yogāt

tadapi śataṁ praṇamāmi puṇyatīrtham || 17 ||

samajani bhagavān svayaṁ sma yasmin

sakalamabodhi ca yatra dharmacakram |

viśadataramadīpi yatra yasmi-

nnamṛtamapūri tadapyahaṁ namāmi || 18 ||

sarvajñacakrasarasīruharājahaṁsa

kundendusundararuciṁ suravṛndavandyam |

saddharmacakrasahajaṁ janapārijātaṁ

śrīdantadhātumamalaṁ praṇamāmi bhaktyā || 19 ||

nāgālayopari dharālayacakravāla-

mūrdhni trikūṭagatakāñcanaśailaśṛṅge |

bodhidrumūlanihitākṣayadhātubimbaṁ

vibhrannamāmi śirasā jinacaityamagram || 20 ||

haimālavālavalayāntaratnavedhī

vajrāsanollasitamūlamagendrabodham |

yaṁ prāpya māravijayānupadaṁ prapede

sarvajñatāṁ sa bhagavān tamahaṁ namāmi || 21 ||

mūrddhan buddhaṁ nama tvaṁ śravaṇa śṛṇu sadā dharmamadvaidhavādi

proktaṁ sarvatra rūpaṁ nayana nirupamaṁ paśya jighrāṅaghripadmam |

ghrāṇa tvaṁ cārkabandhoḥ stuhi sakhi rasane śrīghanaṁ pūjayethāḥ

siddhaṁ pāṇe vrajāṅghre jinasadanamadasmadguṇaṁ citta cintya || 22 ||

buddho dharmaśca saṁghastritayamiti mahānargharatnaṁ mumukṣo-

radyārabhyāhamasmai tribhavabhayabhide sandadāmyātmabhājam |

eṣo'haṁ tatparaḥ syāmparamayanamito nāsti me satyametat

syāmasyāhantu śiṣyastridaśanutamidaṁ koṭikṛtvo namāmi || 23 ||

nāhaṁ lābhārcanārthī na ca bhayacakito nāpi satkīrtikāmo

na tvaṁ dharmāṁśuvaṁśaprabhava iti mune nāpi vidyāśayā te |

pāramparyānnaca tvāṁ śaraṇamupagataḥ kintu te sārvajanyaṁ

samyagjñānaṁ samīkṣya tvayi bhavajaladhiṁ santarītuṁ pravṛttaḥ || 24 ||

tvadvairāgyasamastabhūtakaruṇā prajñādinānāguṇa-

sphūrjjaccandanapaṅkasindhupatito gantuṁ kṣamo nānyataḥ |

bhūpā vā yadi daṇḍayanti vibudhā nindanti vā bāndhavā

muñcanti kṣaṇamapyahaṁ jina pitarjīvāmi na tvāṁ vinā || 25 ||

svarge vā vasatirmamāstu niraye tiryakṣu kiṁ vā''sure

pretānāṁ nagare'thavā narapure kvāpyanyataḥ karmaṇā |

bho sarvajña tatastatastava guṇān karṇāmṛtasyandino

niṣpāpānavalambatāṁ mama mano nānyā sukhaprārthanā || 26 ||

tavaivāhaṁ dāso guṇapaṇagṛhīto'smi bhavatā

tavaivāhaṁ śiṣyaḥ svavacanavinīto'smi bhavatā |

tavaivāhaṁ putraḥ smṛtikṛtasukhastadgatigato

guro buddhasvāmin mama janaka māṁ pāhi bhavataḥ || 27 ||

pitā mātā bhrātā tvamasi bhaginī tvaṁ ca vipadi

sthiraṁ mitraṁ bandhuḥ prabhuramṛtadīkṣāgurutamaḥ |

tvamaiśvaryyaṁ bhogo tvamasi dhanadhānyaṁ ca mahimā

yaśo vidyā prāṇastvamasi mama sarvajña sakalam || 28 ||

vītarāja munīndra dayāmbudhe

sugata bhagnabṛhadbhavapañjara |

adhigatāmṛta buddha mano'mbujaṁ

mama tavānagha gandhakuṭīyatām || 29 ||

anātmanyanitye'śubhe duḥkhaduḥkhe

durante'tra saṁsāracakre bhramantam |

tvamekosi māṁ trātumīśo dayābdhe

prabho'taḥ prasīda prasīda prasīda || 30 ||

prasīdeśa deveśa lokeśa jiṣṇo

jagadvandya madvandya sadvandya buddha |

aghore bhavāre smarāre tamore

tavaivāsmi bhakto vapurvāṅmanobhiḥ || 31 ||

sa tava kulasutaḥ sa eva bhaktaḥ

sa bhavati śāsanadhūrvahaḥ sa śiṣyaḥ |

sa ca śaraṇagataḥ sa eva dāsaḥ

kathamapi yo na vilaṅghayet tavājñām || 32 ||

jagadupakṛtireva buddha ! pūjā

tadapakṛtistava lokanātha ! pīḍā |

jina jagadapakṛt kathaṁ na lajje

gaditumahaṁ tava pādapadmabhaktaḥ || 33 ||

dhanajanavibhavāsudeharājyaṁ

yadupakṛte śatadhā tvayā pradattam |

tamahitamapakartturasya lokaṁ

kva mama kṛpā muditā kva vā ca maitrī || 34 ||

upapatimasatīva cittavṛtti-

rvrajati bhavantamapāsya pañcakāmam |

api ca viṣayiṇo na mokṣasiddhiḥ

kimu karavāṇi munīndra dehi dāsyam || 35 ||

priyatama puruṣottamāgrabuddha

śramahara siddha jagatprasiddhakīrte |

bhava śaraṇamanuttaraprasādin

pratipadamasmi tavaiva dāsadāsaḥ || 36 ||

daśabala kalikāladurbalo'haṁ

ciraduritārṇavatuṅgabhaṅgamagnaḥ |

tava kathamanuyāmi dharmanāvaṁ

jina mama dehi kṛpākarāvalambam || 37 ||

praṇatiriyamanekaśastavāhaṁ

bahu bhavaduḥkhamavekṣya bhītibhītaḥ |

dhara gurutaratṛṣṇayā patantaṁ

jina mama dehi kṛpākarāvalambam || 38 ||

jagati tava kṛpā hi nirviśeṣā

prapavatayā jina māṁ ca doṣaduṣṭam |

alamahamiaha no sukhī bhavendu-

rna samakaraścaratīva sādhvasādhve (dhvoḥ) || 39 ||

upacitabahumohajātamandhaṁ

vigatadayaṁ vigatātmabandhugandham |

apagataguṇavidyamudgatāghaṁ

janamavivekamavāśu dīnabandho || 40 ||

akaravamuruduṣkṛtaṁ purā yad

mama vapuṣā manasā ca cetasā ca |

anukalamakhilaṁ pralīyatāṁ tat

tava caraṇasmaraṇena sarvavedin || 41 ||

sugata tava puraḥ puraḥ pṛthivyāṁ

madhuramate patito'smi daṇḍanatyā |

akuśalamakhilaṁ tavānubhāvāt

prapatatu notpatatāt punaḥ sahaiva || 42 ||

tava caraṇasarojameva vande

tava padapaṅkajameva pūjayāmi |

tava padayugameva bhāvaye'haṁ

tava padameva sadaiva daivataṁ me || 43 ||

kamapi na kathayāmi nārcayāmi

kamapi na naumi na cintayāmi nehe |

kamapi na śaraṇaṁ vrajāmi hitvā

tava caraṇaṁ pitarasmi kiṅkaraste || 44 ||

sadasi sadasi vāci siddhaṁ

pathi pathi sadmani sadmanīha buddham |

bhuvi bhuvi mama vāri vāri cetaḥ

kalayatu nityamimaṁ hi lokanātham || 45 ||

aviratamavalokayāmi buddhaṁ

gatarajasā manasāpi cakṣuṣeva |

svapimi niśi nidhāya yaddhṛdi tvāṁ

na mama samaṁ virahastvayā ta eva || 46 ||

mama tadiha dinaṁ hi durdinaṁ syād

aśitaghanasthagitaṁ na durdinaṁ me |

yadamṛtasamabuddharatnanāma

smṛtirahitaṁ dinamasya mā tadastu || 47 ||

amṛtada ṣaḍabhijña dharmarāja

tribhuvanavandya munīndra gotameti |

aharaharanukīrttyate nṛbhiryai-

rahamahitānapi tānnamāmi dhanyān || 48 ||

daśabala jina siddha vajrabuddhe

sugata tathāgata buddha śākyasiṁha |

iti nigadati yaḥ kvacit kadācit

tamabhinamāmyapi dāsavaṁśajātam || 49 ||

madanajita parājitebhya śāsta-

rvibhava vināyaka viśvavidvareṇya |

kavivara vadatāṁvareśa śuddho-

danasuta śākyamune mune prasīda || 50 ||

amṛtamapi nipīya nirjarendra

punarapi te'pi śunīstanaṁ dhayanti |

sakṛdapi tava vāksudhārasajño

na viśati jātu sa mātureva garbham || 51 ||

ahamiha bhagavannalaṁ na soḍhuṁ

jananajarāmaraṇā(ma)yādibādhām |

kuru mama karuṇaṁ diśo na jāne

guru tadavekṣya ca tiryagādiduḥkham || 52 ||

tadupari paricintya vṛddhakāle

karacaraṇādidṛgādipāravaśyam |

agatikamativepate mano me

jina kimahaṁ karavai prabho prasīda || 53 ||

śravaṇapathagate'pyadṛṣṭapūrve

sukhakṛti vastuni yattanomi tṛṣṇām |

aviratamata eva śāntibīje

tvayi valate ramate mamātra cetaḥ || 54 ||

savipadi ramate na me mano'taḥ

suranaraśarmaṇi pūrvapūrvabhukte |

anudinamanubhūya śarkarāyā-

mapi viratiṁ kurute hi dṛṣṭadoṣaḥ || 55 ||

karatalagatamapyamūlyacintāmaṇi-

mavadhīrayatīṅgitena mūrkhaḥ |

kathamahamapahāya buddharatnaṁ

jagati dhanī guṇavāṁśca paṇḍitaśca || 56 ||

sa bhavati matimān sa nākulīnaḥ

sa ca guṇavān sa ca kīrtimān sa śūraḥ |

sa jagati mahitaḥ sukhī sa eva

tvayi jina yasya suniścalāsti bhaktiḥ || 57 ||

api sakalamadhītamatra tena

śrutamapi sarvamanuṣṭhitaṁ ca tena |

api jitamajitena tena viśvaṁ

tvayi jina yasya suniścalāsti bhaktiḥ || 58 ||

tyajati nijaparamparādareṇe-

tarasamayasya jano na dṛṣṭa dṛṣṭim |

asuharamapi gauraveṇa mātu-

rna khalu śiśurviṣamodakaṁ tu muñcet || 59 ||

kavivaramahamasmi paṇḍitaste

jina na jahāmi kathannu kurgṛhītam |

nudati hi tamasantatiṁ pravṛttāṁ

mihiramarīcisahāyinī sudṛṣṭiḥ || 60 ||

sugatapadaparāṅmukhasya puṁsaḥ

kimu tapasā yaśasā ca kiṁ kimanyaiḥ |

sugatapadaparāṅnukhasya puṁsaḥ

kimu tapasā yaśasā ca kiṁ kimanyaiḥ || 61 ||

sugatapadi na bhaktirasti yeṣā-

majananireva mahītale'stu teṣām |

kathitamiha kṛtāgasāṁ narāṇāṁ

nirayagatirniyataṁ na cānyato yat || 62 ||

viditasakalaśāstramunnatānāṁ

kulabhavamuttamarupayauvanādyam |

jina bhavadanupāsakaṁ nṛpāsaṁ

tyajatu mano mala nīcavattu jātyā || 63 ||

parihṛtamadamānamatsarādiḥ

sakaruṇaśīlasamādhimān vivekī |

tava padadṛḍhabhaktirantyajo'pi

pratibhavamastu narottamaḥ sakhā me || 64 ||

vihitajinapadārcanasya bhaktu-

rdaśadivasānapi jīvitaṁ praśastam |

na tu niyutasahasrakalpakoṭī-

rakṛtamunīndrapadābjapūjanasya || 65 ||

sa bhavati surasundarīsakho'nyaiḥ

kṛtamabhinandati vārcanaṁ ca bhaktyā |

tridaśanaraguro tvadīyapūjā-

magatitayā yadi kartumakṣamaḥ syāt || 66 ||

suruciramaticitracitrarūpaṁ

nayanapathaṁ nayatīha yastavārcām |

rahayati puruṣaṁ tamapyudāraṁ

ciratarasañcitaduṣkṛtaṁ kavīndra || 67 ||

maṇikanakaśilādinirmitāṁ yaḥ

praṇamati te pratimāṁ tayośca tulyam |

phalamiha manasaśca samprasādā-

danuparataṁ jina yo'grato namet tvām || 68 ||

sakṛdapi tava pādapadmapūjā

vanakusumairapi yaḥ karoti dhīmān |

avanatasurasaṁghamaulimālo-

jjvalamamalaṁ śrayate tamādhipatyam || 69 ||

yadi bhavati sarūpamekacitta-

kṣaṇaśaraṇodbhavapuṇyavṛndamuccaiḥ |

gaṇaśaraṇa samantabhadrasādho'khila-

nabhaso'pyatiricyate tadā tat || 70 ||

tava guṇakathane tu yaḥ prasanna-

stamanuviśanti mune guṇāstvadīyāḥ |

udayati śaśini prasannamindū-

palamiva tatkiraṇāvalītuṣāraḥ || 71 ||

sakṛdapi samadāyi deva kiñcid

bhavaratimutsṛjatā janena tubhyam |

sugata tadakhilān lunāti dhārā-

vadasiriva drumamāśravādidoṣān || 72 ||

kṛtamiha sukṛtaṁ mṛṣādṛśā yajja-

nayati tat kila tasya durvipākam |

kṣitisalilarasaṁ svatiktabhāvaṁ

nayati yathā picumardabījamuptam || 73 ||

tava padanaline nipatya bhūyo

nipatati naiva caturṣvapāyakeṣu |

nahi kuśalakaro naraḥ kadāpi

kvacidapi durgatimeti nātha kaścit || 74 ||

iti bhavadupadeśato viditvā

tava padapaṅkajapūjane rato'smi |

dṛḍhayatu bhagavān yuge yuge me

kumatimudasya bhave bhave'ryabhaktim || 75 ||

sthiramapi bhagavan kṣaṇaṁ tavoktau

karacaraṇāni dṛgādi vairivargaḥ |

vyathayati hṛdayaṁ balādvicālya

tvamidamanāthamanīśa pāhi pāhi || 76 ||

yadi nayanamayaṁ vaśe vidhātuṁ

yatati tadā dravati śravo yadā tat |

tadanu rasana-nāsikāśarīrā-

ṇyahaha parasparadurgrahāṇi caivam || 77 ||

gatiraticapalasya cetasaḥ syā-

diha nabhasīva nabhasvato'surodhā |

kabhamapi bhajate krameṇa dhairyaṁ

ciaramidamabhyasanena saṁviraktyā || 78 ||

viśadamapi manaḥ svabhāvato me

cirakṛtakilviṣakālimāhṛtaṁ syāt |

kuśalajalalavaiḥ kathannu dhautaṁ

bhavati mayedṛśacetasārjitaistaiḥ || 79 ||

śucitaravacanāmṛtapravāhaiḥ

raghamalinīkṛtacittasantatiṁ mām |

anadhivara nitāntamādhitaptaṁ

sapadi viśodhaya daṇḍavannamāmi || 80 ||

sati sakalaguro mune prasanne

kimiha durāpamamutra kiṁ durāpam |

yadamalamanasastvadīyadāsāḥ

surapatitāṁ manasāpi nādriyante || 81 ||

vidadhati bhayamindriyāṇi bhūmnā

viṣayaviṣagrahaṇeṣu doṣadṛṣṭyā |

nahi suviditabhāvidāhadoṣaḥ

śiśurapi dīpaśikhāgrasaṅgṛhī syāt || 82 ||

na bhavati jina yāvadeṣa jīrṇo

viṣayapiśācaniṣevaṇena tāvat |

jhaṭiti sukṛtakarmaṇi prayojya

svava śaraṇāgatavatsalāgataṁ mām || 83 ||

iadamapi yadi vedmi putradāra-

svatanugṛhādi marīcikāmbutulyam |

sthagayati mamatā ca māmahantā

tadapi hi mohavijṛmbhitaṁ garīyaḥ || 84 ||

ajani ca nijakāraṇena sarvaṁ

nirasati jīryati naśyati svahetoḥ |

ahamapi hi tathaiva dhātupuñjaḥ

kathamahamasya kathaṁ mune mamedam || 85 ||

ātmabuddhiriha yasya jāyate

sā ca tasya janayedahaṅkṛtim |

sā tanoti sutarāṁ bhavaspṛhāṁ

saiva mohajananī muhurmuhuḥ || 86 ||

tena karma kurute śubhāśubhaṁ

taddhi duḥkhajanakaṁ bhavatraye |

duḥkhamūlamata eva sātmadhīḥ

tāṁ lunīhi jina me vaco'sinā || 87 ||

atha sakalavidaṁ dayāsamudraṁ

tribhuvanakāraṇakāraṇaṁ kulīnam |

nikhilagatamanantamastiśāntiṁ

munijanamānasahaṁsamīśamīḍe || 88 ||

snāne karmaṇi bhojane vitaraṇe ghrāṇe tathā''karṇane

dhyānasparśanadarśanādiṣu tathā sambhāṣaṇādāvapi |

prātaḥ sāyamatho divā ca niśi ca tvatpādapadme vibho

cittaṁ me ramatāṁ munīndra satataṁ yūnāṁ yuvatyāmiva || 89 ||

matsvāmin madabhīṣṭakalpaviṭapin maddevate madguro

manmātarmadupāsya matpriyasakhe matsadgate matpitaḥ |

madvidye madaśeṣaduḥkhaśamakṛd madbhāvane mannidhe

manmukte madudārabhāgya madaso madbuddha māṁ pālaya || 90 ||

brahmā jihmānano'bhūd gururagururaharṇāyako'nāyako'sau

viṣṇustṛṣṇāṁ prapede kavirakavirabhūdīśvaro'nīśvaro'pi |

śeṣaḥ śeṣānubhāvastava sugata nutau khaṇḍitākhaṇḍaloktiḥ

ko'haṁ mūḍho varākastridaśanarapate kīrttane te guṇānām || 91 ||

daśadvayadhikaviṁśatisphuradaśītyanuvyañjanaiḥ

mahāpuruṣalakṣaṇaṁ vapuṣi yasya dedīpyate |

kalāmapi na ṣoḍaśīṁ bhajati tasya puṇyātmana-

ścaturmukhamukho gaṇo diviṣadāṁ nṛṇāṁ kā kathā || 92 ||

mahendranavacāpavat kanakaparvate sarvataḥ

sadā tava manoharaṁ sphurati suprabhāmaṇḍalam |

dṛśo bhavati gocaraṁ tadiha yasya tasya tvarān

tamastatimanuttamāṁ harati dūramantarbahiḥ || 93 ||

rūpaṁ locanalobhanaṁ śravaṇayorānandasandohadā

vāṇī viśvavimohakṛt tava kṛpāveśo'tiśāntastava |

pāṇḍityaṁ prathitaṁ jagatsu bhagavan sarvajñanāmnaiva te

sāmrājyasya ca yauvane nirasanaṁ vairāgyasīmā sphuṭam || 94 ||

śauryaṁ tvadviṣameṣu darpadalanādaṅgīkṛtaṁ daivataiḥ

yadvāṇaiḥ sa surāsuraḥ pravijito loko'yamośatkaram |

vīryaṁ te prakaṭīcakāra nitarāṁ nirvāṇasākṣātkṛtiḥ

kiṁ brūmo balavaibhavaṁ bhagavatastatte jagaddurvaham || 95 ||

yatra cchāgaturaṅgamāraṇavidhirvede'pi taṁ nindasi

premṇā prāṇabhṛtāmataḥ sakaruṇastvatto mahānnāparaḥ |

evaṁ te guṇasampado na viṣayā buddherasūyātmanāṁ

te mūḍhāḥ pralapanti hanta sugato madvedanindītyayam || 96 ||

nirmajjatsurasundarīkucacalannirmandamandākinī-

pheṇakṣīrasamudrakairavasakhī satkīrtilakṣmīstava |

yannāliṅgati mandabhāgyamadhunā bhūyānna tenāpi me

saṅgaḥ saṅgagadādivaidya bhagavanneṣāpi me prārthanā || 97 ||

ye tvāṁ gacchanti buddhaṁ śaraṇamiti na te durgatiṁ yānti santa-

styaktvā kāyānmanuṣyānniratiśayasukhān te labhante'tha divyān |

duḥsvapno durnimittaṁ durahidurahitā durgrahā duṣṭasattvā

duḥkhaṁ durvyādhayo'pi kvacidiha kuśalān nopasarpanti caivam || 98 ||

chatraṁ brahmā vyadhātte maṇimayamamalaṁ cāmaraṁ cakrapāṇi-

stotāro gadyapadyairharaguru-phaṇinaḥ śāṅkhiko'bhūnmahendraḥ |

anye dīpodakumbhadhvajakusumalasatpāṇayo bhaktinamrā-

stasthurvyākhyāya dharmaṁ bhuvamavaruhataḥ svargataste munīndra || 99 ||

mātevāsīt parastrī bhavati paradhane na spṛhā yasya puṁso

mithyāvādī na yaḥ syānna pibati madirāṁ prāṇino yo na hanyāt |

maryādābhaṅgabhīruḥ sakaruṇahṛdayastyaktasarvābhimāno

dharmātmā te sa eva prabhavati bhagavan pādapūjāṁ vidhātum || 100 ||

sarvaprāṇātipātāt paradhanaharaṇāt saṅgamādaṅganāyā

mithyāvādācca madyādbhavati jagati yo'kālabhutkternivṛttaḥ |

saṅgītasraksugandhābharaṇavilasitāduccaśayyāsanāda-

pyāsīddhīmān sa eva tridaśanaraguro tvatsuto nātra śaṅkā || 101 ||

śrotāpattyādimārgāḥ sadavayavayutā ghnanti rāgādidoṣān

doṣāste chinnamūlā hatabhavagatayastatphalairyānti śāntim |

mārgāṇāṁ kleśahāniḥ sadamṛtamajaraṁ kāraṇaṁ syānnavānāṁ

dharmāṇāṁ hetureṣāṁ tava jina vacanaṁ tasya hetustvameva || 102 ||

viṁśatsatkāyadṛṣṭikṣitidharamamalajñānavajreṇa bhittvā

rāgadveṣādipāpāntaduditamakhilaṁ karma conmūlayantaḥ |

catvāro labdhamārgāstadanuguṇaphalāste'pi catvāra evaṁ

tvataścāṣṭāryasaṅghaḥ pṛthagiti na punaścintayāmo munīndra || 103 ||

api gagaṇamanantaṁ sarvasattvo'pyanantaḥ

sakalamidamanantaṁ cakravālaṁ viśālam |

vadasi jina viditvānantayā jñānagatyā

tava ca guṇamanantaṁ vedasī buddha caivam || 104 ||

bhagavati bhavatīti dhvaṁsakāriṇyamoghe

bhavatu bhavatu bhaktirjanmajanmāntare'pi |

bhavatu bhavatu dharmaḥ sarvathā me'nuśāstā

bhavatu bhavatu saṁgho'nuttarā puṇyabhūmiḥ || 105 ||

tribhuvanamahanīyaṁ tvāmabhiṣṭutya buddhaṁ

viśadataramadabhraṁ puṇyamatrārjitaṁ yat |

jagati sakalasattvāstena sambuddhabodhiṁ

vidhutavividhapāpā bhāvanābhirvrajantu || 106 ||

bhāsvadbhānukulāmbujanmamihire rājādhirājeśvare

śrīlaṅkādhipatau parākramabhuje nītyā mahīṁ śāsati |

sadgauḍaḥ kavibhāratikṣitisuraḥ śrīrāmacandraḥ sudhīḥ

śrītṛṇāmakarot sa bhaktiśatakaṁ dharmārthamokṣapradam || 107 ||

śrīśākyamunerbhagavataḥ sarvajñasya paramopāsakena gauḍadeśīya-

śrībauddhāgamacakravarttinā bhūsureṇācāryeṇa mahāpaṇḍitena

viracitaṁ bhaktiśatakaṁ samāptam |

nṛpaḥ parākrāntibhujo mahībhujo śiromaṇiḥ paṇḍitamaṇḍalīsakhaḥ |

sa rāmacandraṁ kavibhāratidvijaṁ cakāra bauddhāgamacakravartinam || 1 ||

buddho me jayatāṁ jinaḥ sa bhagavān taddeśanā nirmalā

stheyāt sattvahitāya bhātu bhaṇitā saṅghastadādhārakaḥ |

laṅkeśapramukhāściaraṁ vasumatīṁ rakṣantu nityaṁ nṛpā

varṣantu stanayitnavaśca samaye maitrīṁ labhantāṁ prajāḥ || 2 ||

tīrthagrāmapateryatestripiṭakācāryasya bhūpānvayā-

cāryaśreṣṭhamunīśvarasya sugiraḥ śrīrāhulasvāminaḥ |

śiṣyo yo'varajaḥ sumaṅgalamunirdhīmān svayā bhāṣayā

kāruṇyena munīndrabhaktiśatakavyākhyānamākhyātavān || 3 ||

namo buddhāya gurave namo dharmāya śāsine |

namaḥ saṅghāya mahate tribhyo'pi satataṁ namaḥ || 4 ||

siddhiḥ |

Technical Details

Text Version: 

Romanized

Input Personnel: 

DSBC Staff

Input Date: 

2004

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0