ajitasenavyākaraṇam

ajitasenavyākaraṇam

om namaḥ sarvajñāya ||

evaṁ mayā śrutamekasmin samaye bhagavān śrāvastyāṁ viharati sma jetavane anāthapiṇḍadasyārāme mahatā bhikṣusaṅghena sārdhamardhatrayodaśabhibhikṣusahasraiḥ| tadyathā āyuṣmatā cājñātakauṇḍinyena āyuṣmatā ca mahānāmnā āyuṣmatā ca revatena āyuṣmatā ca vakkulena āyuṣmatā ca śāripu[treṇā āyuṣmatā ca] pūrṇena maitrāyaṇī[putreṇa] ca śrāvakaniyutaiḥ| te sarve yena bhagavān yena ca jetavanaṁ vihāraṁ tenopasaṁkrāntā bhagavataḥ pādau śirasābhivandya bhagavataḥ puratastasthurdvātriṁśatā bodhisattvasahasraiḥ| tadyathā sahacittotpādadharmacakrapravartanena ca bodhisattvena mahāsattvena anikṣiptadhureṇa ca bodhisattvena mahāsattvena maitreyeṇa ca bodhisattvena mahāsattvena avalokiteśvareṇa ca bodhisattvena mahāsattvena mahāsthāmaprāptena ca bodhisattvena mahāsattvena| evaṁpramukhāirdvātriṁśatā bodhisattvasahasraiḥ| te sarve yena bhagavān yena ca jetavanaṁ vihāraṁ tenopasaṁkrāntā bhagavataḥ pādau śirasābhivandya bhagavataḥ puratastasthuḥ| atha khalu bhagavān pūrvāṇhakālasamaye nivāsya pātracīvaramā[traḥ] śrāvastīṁ mahānagarīṁ piṇḍāya prāviśat| atha bhagavānāyuṣmantamā nandamāmantrayate sma| gacchānanda pātraṁ cakrikaṁ śikyamānaya| athāyuṣmānānando bhagavataḥ śrutamātreṇa pātraṁ cakrikaṁ śikyaṁ bhagavate upanāmayāmāsa| athāyuṣmānāndo bhagavataḥ kṛtāñjalipuṭo bhagavantaṁ gāthābhiradhyabhāṣata|

yadā tvaṁ praviśasi piṇḍapātika

vimocaye tvaṁ bahavaṁ hi prāṇinām|

uttāraye tvaṁ bahavaṁ hi sattvā

narakabhayājjātijarāmahābhayā||

saṁsāraduḥkhakalilā mahābhayā–

dvimocaye tvaṁ nara lokanāyaka|

mahānubhāvo varadakṣiṇīyo

vimocayitvā punaraṁ hi āgamī||

athāyuṣmānāndo bhagavata imā gāthā bhāṣitva tūṣṇīṁ sthito'bhūt| atha bhagavān śrāvasyāṁ mahānagaryāṁ nātidūre sthito'bhūt| atha te sarve gavākṣatoraṇaniryūhakā [hiraṇya]mayāḥ sphaṭikamayā rūpyamayāḥ prādurbhūvan| tathā śrāvastyāṁ ma[hānagaryāṁ] mahāntaṁ janakāyaṁ saṁsthito'bhūvan| atha sa janakāyaḥ saṁśayajāto babhūva ko hetuḥ kaḥ pratyayaḥ nagarasya śubhanimittaṁ prādurabhūt| mā cedaṁ nagaraṁ bhasmapralayaṁ syāt| atha tatra janakāye anekavarṣaśata sahastrakoṭiko vṛddhamahallakaḥ puruṣaḥ saṁsthito'bhūt| atha sa puruṣastaṁ janakāyaṁ samāśvāsayannevamāha| mā bhaiṣurbhoḥ kulaputrāḥ asminneva pṛthivīpradeśe jetavanaṁ nāma vihāraḥ| tatra śākyamunirnām tathāgato'rhan samyaksaṁbuddho vidyācaraṇasampannaḥ sugato lokavidanuttaraḥ puruṣadamyasārathiḥ śāstā devānāṁ ca manuṣyāṇāṁ ca buddho bhagavān| so'yaṁ śrāvastīṁ mahānagarīṁ piṇḍāya prāviśat| tasyāgamanakālasamaye idaṁ śubhanimittamabhūt| atha sa janakāyastaṁ jīrṇakaṁ puruṣaṁ kṛtāñjalirevamāha|

yattasya bhagavatastathāgatasyārhataḥ samyaksaṁbuddhasya gu[ṇavarṇasamudīraṇa]samaye idaṁ śubhanimittamabhūt| dṛṣṭamātrasya tasya tathāgatasyārhataḥ samyaksaṁbuddhasya kiddaśaḥ puṇyābhisaṁskāro bhaviṣyati| atha sa jīrṇakapuruṣastaṁ janakāyaṁ bhagavato guṇavarṇasamudīraṇatayā gāthābhiradhyabhāṣata|

yo lokanāthasya hi nāmu yaḥ śruṇe

saṁsāraduḥkhā vinimuktu so naro |

apāyagāmī na kadāci bheṣyate

svargaṁ ca so yāsyati śīrghamevam||

yo lokanāthasya hi nāmu yaḥ śruṇe

dṛḍhapratijño bahukalpakoṭibhiḥ|

mahānubhāvo sugato mahātmanaḥ

kalpānakoṭinayutānacintiyān||

so bodhisattvo sthita gaṅgavālukān

kadāci so gacchati durgatī bhayam|

yo lokanāthasya hi nāmu yaḥ śruṇe

apāyagāmī na kadāci bheṣyate||

kalpānakoṭīnayutānacintiyā

rājā sa bhotī sada cakravartī|

yo lokanāthasya hi nāmu dhārayet||

yat kiṁci pūrvaṁ sada pāpu yat kṛtaṁ

sarvaṁ kṣayaṁ yāsyati śīrghametat|

śakropi devendramahānubhāvo

kalpānakoṭinayutānacintiyā||

sukhāvatīṁ gacchati buddhakṣetraṁ

paryaṅkabaddho sa ca bodhisattvo|

brahmasvaro susvaru maṁjughoṣa

bhavanti varṣānasahastrakoṭibhiḥ||

apāyagāmī na kadāci bheṣyate

yo lokanāthasya hi nāmu dhārayet|

atha sa jīrṇakaḥ purūṣo janakāyaṁ bhagavato guṇavarṇamudīrayitvā tūṣṇīṁ sthito'bhūt| atha bhagavān pūrveṇa nagaradvāreṇa śrāvastīṁ mahānagarīṁ praviṣṭo'bhut| tatra ca nagaradvāre dvādaśakoṭyaḥ padmānāṁ prādurabhūvan| teṣu ca padmeṣu dvādaśakoṭyo bodhisattvānāṁ paryaṅkaniṣaṇṇāḥ prādurbhuvan prāñjalayaḥ| atha bhagavataḥ praviṣṭamātreṇa śrāvastyāṁ mahānagaryāṁ navanavatikoṭīniyutaśatasahastrāṇi sattvānāṁ sukhāvatyām lokadhātau pratiṣṭhāpitāni caturaśītisattvakoṭīniyutaśatasahastrāṇyābhiratyā lo[kadhāto]rakṣobhyatathāgatasya buddhakṣetre pratiṣṭhāpitāni |

atha bhagavān ā[nandena saha nagara]valambikāyā dārikāyā gṛhe samāgato'bhūta| atha bhagavān nagaravalambikāyā dārikāyā gṛhe cakrikaṁ kaṭakaṭāpayāmāsa| atha sā dārikā taṁ cakrīśabdaṁ śrutva saṁśayajātābhūt| ko hetuḥ kaḥ pratyayaḥ| mama gṛhe na kadācit piṇḍapātika āgato'bhūt| atha sa nagaravalambikā dāikā śūnyākāragṛhe niṣaṇṇā aśrukaṇṭhī rudantī paridevantī sthitābhūt tīkṣṇadhāramasīṁ gaveṣantī paridevantī rudantī sthitābhūt| atha [sā] dārikā śūnyākāragṛhe niṣaṇṇā paridevantī aśru[kaṇṭhī] rudantī gāthābhiradhyabhāṣata|

aho bata duḥkhu daridrake gṛhe

varaṁ mama maraṇu na cāpi jīvitam|

kiṁ cāpi me kāryuṣu jīvitena

yadyaivāhaṁ duḥkhu śarīra pīḍitam||

kana.......................hyatrāṇaṁ bhavate parāyaṇam|

anāthabhūtā ahamadyameva yadyaivāhaṁ jāta daridrake gṛhe||

atha sa nagaravalaṁbikā dārikā śūnyākāragṛhe [niṣaṇṇā] imā gāthā bhāṣitvā tūṣṇīṁ sthitābhūt|

atha śuddhavāsakāyiko devaputro'ntarīkṣagataḥ sthitaścintayati sma| paśyeccedimāṁ bhagavān| anekaduṣkarakoṭiniyutaśatasahastracīrṇacaritaḥ sa śākyamunistathāgato nagaravalaṁbikāyā dārikāyā gṛhe sthito'bhūt| atha śuddhavāsakāyiko devaputraḥ śatasahastramūlyaṁ muktāhāraṁ gṛhītvā śatarasabhojanapiṭakaṁ gṛhītvā kāśikāni vastrāṇi gṛhītvā yena nagaravalambikāyā dārikāyā gṛhaṁ tenopasaṁkrānto'bhūt| atha śuddhavāsakāyiko devaputro nagaravalambikāṁ dārikāmevamāha| prāvara dārike imāni kāśikāni vastrāṇi imānyanekaśatasahastrmūlyānyābharaṇāni| prāvṛtya cedaṁ śatasahastramūlyaṁ muktāhāraṁ gṛhītvā imaṁ śatarasabhojanapiṭakaṁ gṛhītvā bhagavantamupanāmaya| atha sā dārīkā tāni kāśikāni vastrāṇi pravṛtya śatasahasramūlyaṁ muktāhāram gṛhītva taṁ śatarasabhojanapiṭakaṁ gṛhītvā yena bhagavāṁstenopasaṁkrāntā| upasaṁkramya bhagavantamupanāmayati sma| atha bhagavān tāṁ nagaravalaṁbikāmevamāha| pariṇāmaya tvaṁ dārike yathā pariṇāmitaṁ vipaśyiśikhiviśvabhūkkakutasundakanakamunikāśyapaprabhṛtibhiḥ sadbhistathāgatairarhabhdiḥ samyaksambuddhaiḥ| anto bhaviṣyati stribhāvādanto bhaviṣyati daridragṛhāt| atha sā dārikā taṁ piṇḍapātaṁ pariṇāmayitvā bhagavantamupanāmayāmāsa| anena piṇḍapātakuśalamūlena mā kaśmiṁścida daridragṛhe upapadyeya|

atha sā nagaravalambikā dārikā taṁ piṇḍapātaṁ pariṇāmayitvā bhagavate dattvā svagṛhagamanamārabdhā| atha bhagavān tāṁ nagaravalambikāṁ dārikāmevamāha| pratinivartasva dārike| pūrvejātinidānaṁ samanusmarāmi| tadahaṁ pa[rikīrta]yiṣyāmi| atha sā dārikā pratinivṛtya sarvāṅgapraṇi[pātena] bhagavantaṁ prapatitā| atha sā nagaravalambikā dārikā bhagava[ntaṁ gā]thābhiradhyabhāṣata|

avaśyaṁ me pūrvakṛtena karmaṇā

yenāhaṁ [jāta] daridrake gṛhe|

karohi kāruṇya mamaṁ hi duḥkhita

[vinivartayasva] narakā hi pālān||

karohi kāruṇya mama duḥkhitāyā

istribhāvā upapannu nāyaka|

tvaṁ lokanātha jaravyādhiśoka

vimocaye maṁ mama duḥkhitāyāḥ||

trāṇaṁ bhavāhī śaraṇaṁ parāyaṇaṁ

vimocayāhī mama duḥkhitāyāḥ|

kṛtaṁ hi nātha praṇidhiṁ tvayā hi

ye keci sattvā iha jambudvīpe||

tiṣṭhanti ye vai daśasu diśāsu

sattvā hi sarve sukhitā [kari]ṣye |

sarve ca haṁ mocayi duḥkhasāgarāt

trāṇaṁ bhavāhī śa[raṇaṁ parāya]ṇam||

tvayaṁ hi nātha mayi mocayī jagat

avaśyaṁ me pūrvakṛ[tena] karmaṇā|

yenāhaṁ jātu daridrake gṛhe

trāṇāṁ bhavāhī mama [duḥkhītāyāḥ] ||

[bhavaṁ] tu nātha jaravyādhimocakaṁ

trāṇaṁ bhavāhī guṇa saṁci[tāgra] |

na cā kariṣye punareva pāpaṁ

yadvedayāmī imi vedanāni ||

kṛpaṁ jani...............magra sattvā

trāṇaṁ bhavāhī śaraṇaṁ parāyaṇam |

ye keci sattvā iha jambudvīpe

nāmaṁ ca vai dhāraya paśca kāle ||

parinirvṛtasya tata paścakāle

bhaviṣyati śāsanavipralopam|

yatkiṁci pāpaṁ tadapūrva yat kṛtaṁ

sarvaṁ kṣayaṁ yāsyati śīghrame[ta]t||

atha sā nagaravalambikā dārikā bhagavantaṁ gāthā bhāṣitvā pu[narapi] gṛhagamanamārabdhā| atha bhagavān tāṁ nagaravalambikāṁ [dārikāṁ kala] viṅkarutasvaranirghoṣeṇaivamāha| pratinivartasva [dārike pūrvajātinidānaṁ sa]manusmarāmi tadahaṁ parikīrtayiṣyāmi| [atha sā dārikā] pratinivṛtyaivamāha|

parikīrtaya lokavināyakādya

ya[dyat kṛtaṁ] pāpa sadā sudāruṇam|

avaśya me pāpu kṛtaṁ sudāruṇaṁ

yenā[haṁ jātu] daridrake gṛhe||

tvaṁ sārthavāhu iha sarvaloke

vimocaye maṁ iha istribhāvā|

trāṇaṁ bhavāhī śaraṇaṁ parāyaṇaṁ

kṛtajñahaṁ nitya bhavāmi nāyake||

saṁśrāvaye maṁ imu dharmanetrī

nāsau kadācittajate apāyam|

saṁśodhayī karma yathākṛtaṁ mayā

trāṇaṁ bhavāhī śaraṇaṁ parāyaṇam||

asaṅgajñānī varalokanāyaka

vandāmi nātha śaraṇaṁ kṛtāñjalī||

atha bhagavān tāṁ dārikāmevamāha| bhūtapūrvo dārike atīte'dhvani asaṁkhyeyaiḥ kalpai ratnaśikhī nāma tathāgato'rhan samyaksambuddho vidyācaraṇasampannaḥ sugato lokavidanuttaraḥ puruṣadamyasārathiḥ śāstā devānāṁ ca manuṣyāṇāṁ ca buddho bhagavān| tena khalu punaḥ samayena padmāvatī nāma rājadhānyabhūt| tena khalu punaḥ samayena padmāvatyāṁ rājadhānyāṁ padmaprabho nāma gṛhapatirabhūt| tasya padmaprabhasya gṛhapatestvaṁ [duhi]tā'bhūḥ| tena khalu punaḥ samayena grāmanagaranigamajanapadeṣu piṇḍapātiko bhikṣūḥ piṇḍapātāyāvatarati| yadā tvadgṛhamāgato'bhūta tadā tvaṁ dārike piṇḍapātaṁ gṛhītvā gṛhānniṣkrāntā punareva praviṣṭā'bhūḥ| na cāhaṁ muṇḍitaśiraso'dhanyasya piṇḍapātaṁ dāsyāmi| tena karmopacayena tvayā dārike dvādaśakalpasahasrāṇi punaḥ punardaridragṛhe duḥkhānyanubhūtāni| ekena tvayā dārike kuśalamūlena bodhivyākaraṇaṁ pratilapsyase| yattvayā tasya bhikṣo rūpaliṅgasaṁsthā na dṝṣṭā bhaviṣyasi tvaṁ dārike anāgate'dhvani acintyairaparimāṇaiḥ kalpairnagaradhvajo nāma tathāgato'rhan samyaksaṁbuddho vidyācaraṇasaṁpannaḥ sugato lokavidanuttaraḥ puruṣadamyasārathiḥ śāstā devānāṁ ca manuṣyāṇāṁ ca buddho bhagavān loke| atha sā dārikā bhagavantaṁ triḥ pradakṣīṇaṁ kṛtvaivamāha| kidṛśaṁ bhagavan mama buddhakṣetraṁ bhaviṣyati yatraivāhaṁ buddho bhaviṣyāmi | bhagavānāha| aparimitaguṇasaṁcayā nāma sā buddhakṣetraṁ bhaviṣyati| yādṛśī ca sā sukhāvatī lokadhātuḥ tādṛśaṁ tadabuddhakṣetraṁ bhaviṣyati| paryaṅkaniṣaṇṇā āryopapādukā bodhisattvā bhaviṣyanti| īdṛśaṁ tadbuddhakṣetram|

atha ca sā dārikā tuṣṭā udagrā āttamanāḥ pramuditā prītisaumanasyajātā svagṛhagamanamārabdhā| atha bhagavāṁstāṁ dārikāmevamāha| tvaṁ dārike saptame divase kālaṁ kariṣyasi| kālaṁ kṛtvā| pūrvasyāndiśi magadhaviṣaye rājā ajitaseno nāma| tasya rājño'jitasenasya antaḥpurasahasramasti| tasya khalu puna rājñao'jitasenasya putro janiṣyase| eṣa eva tava paścimo garbhavāso bhaviṣyati|

atha bhagavān paścimakena nagaradvāreṇa śrāvastyā mahānagaryā niṣkrānto yena jetavanaṁ vihārastenopasaṁkrāntaḥ | athāyuṣmānāndo bhagavantaṁ dūrat evāgacchantaṁ dṛṣṭvā pādau śirasābhivandya triḥpradakṣīṇīkṛtya bhagavantaṁ gāthābhiradhyabhāṣata|

suvarṇavarṇaṁ varalakṣaṇārcitaṁ

dvāviṁśatilakṣaṇarūpadhāriṇam|

yadā tvayā āgatu piṇḍapātikā

vimocayitvā iha sarvasattvā||

sukhena saṁsthāpayi sarvasattvā

maitrībalaṁ sarvajagattvayā kṛtam|

sa piṇḍapātaṁ varamāṇḍanāyaka

vimocitaste jagatī bhayā ca||

ye bodhisattvā iha jambudvipe

sarve ca mārgaṁ tava darśayanti|

parinirvṛtasya sada paścakāle

dhāretu sūtraṁ imu buddhavarṇitam||

parinirvṛtasya tava paścakāle

bhaviṣyati śāsanavipralopam|

imaṁ nayaṁ dhārayi sūtraratnam||

athāyuṣmānānanda imā gāthā bhāṣitva bhagavantaṁ triḥ pradakṣīṇīkṛtya bhagavataḥ puratastasthau| atha bhagavānāyusmantamānandamāmantrayate sma| gacchananda gaṇḍīmākoṭaya| te śrāvakāḥ paribhokṣyanti piṇḍapātam| athāyuṣmānānando bhagavantamāmantrayate sma| kīdṛśaṁ bhagavan gaṇḍīśabdasya kuśalamūlaṁ bhaviṣyati| bhagavānāha| śruṇu ānanda gaṇḍīśabdasya kuśalamūlaṁ parikīrtayāmi| ye kecidānanda gaṇḍīśabdaṁ śroṣyanti teṣāṁ pacānantaryāṇi kṛtyāni parikṣayaṁ yāsyanti| avaivartikāste bhaviṣyanti kṣipraṁ cānuttarāṁ samyaksaṁbodhisambhisaṁbhotsyante| ānanda āha| kīdṛśaṁ bhagavaṁstaiḥ sattvaiḥ kuśalamūlamavaropim| bhagavānāha| śruṇu ānanda ye sattvāḥ paścime kāle paścime samaye mama parinirvṛtasya saddharmavipralope vartamāne saddharmasyāntardhānakālasamaye grāmanagaranigamajanapadarāṣṭrārājadhānīṣu ye sattvā [vā] araṇyāyatane gaṇḍayākoṭanaśabdaṁ śroṣyanti namo buddhāyeti kariṣyanti teṣāṁ pacānantaryāṇi karmāṇi parikṣayaṁ yāsyanti| īdṛśānyānanda gaṇḍīśabdasya kuśalamūlāni| athāyuṣmānānandaḥ śāntapraśāntena gaṇḍīmākoṭayate sma| atha tena gaṇḍīśabdena sarve te mahāśrāvakāḥ sannipatitā abhūvan| yathā yathā āsane niṣaṇṇāḥ piṇḍapātaṁ paribhūñjante sma| atha tatraiva śrāvakamadhye nandimitro nāma mahāśrāvakaḥ sannipatito'bhūt sanniṣaṇṇaḥ| atha bhagavānāyuṣmantaṁ nandimitram mahāśrāvakamāmantrayate sma| gaccha tvaṁ nandimitra mahāśrāvaka pūrvasyāndiśi magadhaviṣaye rājño'jitasenasya kalyāṇamitraparicaryā kuru| atha nandimitro mahāśrāvako bhagavantamevamāha| na bhagavan śakṣyāmastaṁ pṛthivīpradeśaṁ gantum| durāsadāste sattvāḥ| te māṁ jīvitādvyavaropayiṣyanti| atha bhagavānāyuṣmantaṁ taṁ nandimitram mahāśrāvakamevamāha| na te sattvāste śakṣyante bālāgramapi kampayituṁ prāgeva jīvitādvyavaropayitum| atha nandimitro mahāśrāvakaḥ pratyūṣakālasamaye suvarṇavarṇaṁ vastraṁ prāvṛtya yena pūrvasyāndiśi magadhaviṣaye rājño'jitasenasya rājadhāṇi tenānukrānto'bhūt| atha rājā ajitasenastaṁ nandimitraṁ mahāśrāvakaṁ dṛṣṭvā tuṣṭa udagra āttamanāḥ pramuditaḥ prītisaumanasyajāto'bhūt| atha rājñājitasenena amātyaḥ preṣito'bhūt| gacchainaṁ bhikṣumānaya| tadā so'mātyo yena nandimitro mahāśrāvakastenopasaṁkrāntaḥ | atha so'mātyo nandimitraṁ mahāśrāvakamevamāha|

āgaccha mahāśrāvaka bhikṣo rājā te ājñāpayati| atha nandimitro mahāśrāvako'mātyamevamāha| mama rājña kiṁ kārya mama rājā kiṁ kariṣyati| athāmātyo yena rājājitasenastenopasaṁkrāntaḥ| taṁ rājānamajitasenamevamāha| na ca sa bhikṣustava pārśve āgacchati| atha rājñājitasenena pañcāmātyaśatāni preṣitāni| na ca sa bhikṣūrājño'jitasenasya pārśvamāgacchati| atha sa rājā svakenaivātmabhāvena yena sa nandimitramahāśrāvakastenopasaṁkrāntaḥ| upasaṁkramya kṛtājalirevamāha| āgaccha bho bhikṣo mama rājadhānīṁ praviśa| atha rājā ajitaseno dakṣiṇahaste taṁ bhikṣūṁ gṛhītvā svakāṁ rājadhānīṁ praviṣṭo'bhūt| atha rājñājitasenena nandimitrasya bhikṣoḥ siṁhāsanaṁ dattamabhūt| atha rājājitaseno bhadrapīṭhake niṣadya taṁ nandimitraṁ mahāśrāvakamevamāha| kutra tvaṁ bhikṣo gacchasi| ko hetuḥ kaḥ pratyayaḥ| atha nandimitro mahāśrāvako rājānamajitasenamevamāha| ye kecid bhikṣupravrajitāste sarve bhikṣāhārāḥ piṇḍapātamavacarantaḥ paribhuñjanti| atha rājā ajitasenastaṁ nandimitraṁ mahāśrāvakamevamāha| paribhuṅkṣva mama gṛhe piṇḍapātam| yāvajjīvaṁ piṇḍapātaṁ pradāsyāmi| yadi te bhikṣo mama svamāṁsena kāryaṁ svamāṁsaṁ dāsyāmi| atha nandamitro mahāśrāvako rājānamajitasenaāṁ gāthābhiradhyabhāsāta|

bhuṁjāmi tadbhojanu yad dadāhi

mṛṣṭānnapānaṁ rasapānamuktamam|

kledhā hi nirmukta tvayā bhaviṣyasi

sudurlabhaṁ labdha manuṣyalābham||

sudurlabhaṁ śāsanu nāyakasya

śradvāprasādaṁ paramaṁ sudurlabham|

ye śāsane pra[vra]jitā ca bhikṣavā

sudurlabhaṁ śāsanu nāyakānām||

sudurlabhaṁ sugatavarasya darśanaṁ

namo'stu te buddha mahānubhāvo |

namo'stu te dharmamayaṁ mahāmune

namo'stu te kleśavicakṣaṇāryam|

namo'stu te sarvajarapramokṣaṇāt

namo'stu te mārganidarśanāryam

namo'stu te mārgapathasya darśakaṁ

namo'stu te bodhisapathasya darśakam|

atha nandimitro mahāśrāvako rājānamajitasenaṁ bhagavato guṇavarṇamudīrayitvā tūṣṇīṁ sthito'bhūt| atha rājānamajitasenaṁ taṁ nandimitro mahāśrāvako gāthābhiradhyabhāṣata|

sudurlabhaṁ bhikṣu tathaiva darśanaṁ

sudurlabhaṁ tasya bhaveya darśanam

ye bhikṣu saṁghasya dadeya dānaṁ

na tasya yakṣā na ca rākṣasāśca||

na pretakuṣmāṇḍamahoragāśca

vighnaṁ na kurvanti kadāci teṣāṁ|

ye bhikṣusaṁghāya dadanti dānaṁ

sudurlabhaṁ tasya manuṣyalābham||

yo durlabhaṁ darśanu bhikṣubhāvaṁ

sudurlabhaṁ kalpaśatairacintiyaiḥ|

yo lokanāthasya hi nāmu dhāraye

kalpāna koṭinayutānacintiyā ||

na jātu gacche vinipātadurgatiṁ

yo īdṛśaṁ paśyati bhikṣurājam|

na tasya bhotī vinipātadurgatiṁ

yo īdṛśaṁ paśyati bhikṣurājam||

kalyāṇamitraṁ mama mārgadarśako

(yaṁ) sa āgatāye mama piṇḍapātikā |

yo dāsyate asya hi piṇḍapātaṁ

muktā na bheṣyaṁti jarārtavyādhayā ||

kleśā vinirmukta sadā tu bheṣyati

ye tasya dāsyantiha piṇḍapātam||

atha sa rājā ajitaseno nandimitraṁ mahāśrāvakaṁ guṇavarṇamudīrayitvā tūṣṇīṁ sthito'bhūt| atha nandimitro mahāśrāvako rājānamajitasenamevamāha| evamastu mahārāja bhuñje piṇḍapāta tava gṛhe | atha rājā ajitasenaṁ khādanīyena bhojanīyena taṁ nandimitramahāśrāvakaṁ santarpayati sma|

atha nandimitramahāśrāvako rājānamajitasenamevamāha| kiṁ tava mahārāja asmin pṛthivīpradeśe udyānabhūmirasti| rājā āha| asti mahāśrāvaka udyānabhūmirmama ramaṇīyā suśobhanā| nandimitra āha| gacchāmyahaṁ mahārāja| tāmudyānabhūmiṁ prekṣe| rājā āha| gaccha nandimitra| udyānabhūmiṁ prekṣasva| atha nandimitramahāśrāvako yena rājño'jitasenasyodyānabhūmistenopasaṁkrāntaḥ| atha tatrodyānabhūmau ye udyānaguṇāste sarve santītī | yā graiṣmikyaḥ puṣkariṇyastāḥ śītalajalaparipūrṇā yā vārṣikyastā nātyuṣṇā nātiśītalajalaparipūrṇāḥ| tāśca puṣkariṇyaḥ suvarṇasopānasaṁcchannā divyā ramaṇīyāḥ| ye ca jāṁbūpakaparibhogaguṇāste sarve santīti| adhimuktakacampakāśokamucilindapāṭalasumanāsaugandhikapuṣpāṇi santīti| ye tiryagyonigatāḥ pakṣiṇaḥ śukaśārikācakravākamayūrakokilā dayaste nānārutāni kurvanti sma| atha tatraiva udyānabhūmau suvarṇavarṇāḥ suvarṇatuṇḍāḥ suvarṇapakṣāḥ suvarṇapādāḥ pakṣīṇaḥ prādurbhūtāḥ| te sarve buddhaśabdaṁ niścārayanti| atha nandimitramahāśrāvako yena rājño'jitasenasya rājadhāṇī tenopasaṁkrāntaḥ| atha rājā ajitasenastaṁ nandimitraṁ mahāśrāvakamevamāha| āgatastvaṁ mahāśrāvaka| dṛṣṭodyānabhūmiḥ| nandimitra āha| dṛṣṭā mayodyānabhūmi ramaṇīyā suśobhanā| atha nandimitram mahāśrāvakaṁ rāja ajitaseno gāthābhiradhyabhāṣata|

ye jaṁbudvīpe paribhogamāsī

adhimuktakacampakadhānuṣkārikā |

aśokamucilinda tathaiva pāṭalā

saugandhikāśca sumanā ca vārṣikā ||

tadā pariyātrā nadītīranirmitā

suvarṇavarṇā sada pakṣīṇā abhūt|

mārgaṁ ca te darśayi agrabodhaye

divyā manojña madhurasvarāṁśca

saṁśrāvayiṣyanti ca nityakālam||

atha nandimitramahāśrāvako rājño'jitasenasya gāthā bhāṣitvā tūṣṇī sthito'bhūt| atha rājā ajitaseno bherīṁ parāhante sma| atha tena bherīśabdena sametyāmātyagaṇastaṁ rājānamajitasenamevamāha| kasyārthe mahārāja bherī parāhatā| atha sa rājā āha| hastirathaṁ ca aśvarathaṁ ca sajjaṁ kṛtaṁ syāt| ahamudyānabhūmiṁ gamisyāmi krīḍanārthāya| atha tā amātyakoṭyo vacanaṁ śrutva śīghrameva tada hastirathamaśvarathaṁ sajjaṁ kṛtavatyaḥ| atha tena kṣaṇalavamuhūrtamātreṇa rājājitaseno yena sodyānabhūmistenopasaṁkrāntaḥ| sa ca nandimitramahāśrāvakastenaivopasaṁkrānto rājānamajitasenamevamāha| asmin pṛthivīpradeśe mahārāja mama kuṭikaṁ kārayitavyam yatrāhaṁ sanniṣaṇṇastava gṛhe piṇḍapātaṁ paribhokṣyāmi| atha rājā ajitaseno nandimitramahāśrāvakamevamāha| kīdṛśaṁ tavakuṭikaṁ kārayitavyam| nandimitra āha| yādṛśāstava mahārāja mahācittotpādaśraddhāprasādāstādṛśaṁ kuṭikaṁ kāraya| atha rāhā ajitaseno jyeṣṭhāmātyamevamāha'sminneva pṛthavīpradeśe kuṭikaṁ kāraya|

atha jyeṣṭhāmātyo rājānamevamāha| kīdṛśaṁ mahārāja kuṭikaṁ kārayāmi| rājā ajitasena evamāha| triṁśadyojanāni dīrgheṇa ṣaḍyojanānyūrdhvāyāṁ saptaratnamayaṁ maṇimuktisamcchāditaṁ kuṭikaṁ kāraya| atha so'mātyaḥ kuṭikaṁ kāryati| saptaratnamayaṁ maṇimuktisaṁcchāditaṁ kārayitvā yena rājā ajitasenastenopasaṁkrānto rājānamajitasenamevamāha| kṛtaṁ mahārāja mayā kuṭikaṁ yādṛśamājñaptam| rājā āhā| tatraiva pṛthivīpradeśe caṁkramaḥ kārayitavyaścaturyojanāni dīrgheṇa dve yojane vistāreṇa | atha so'mātyastaṁ caṁkramaṁ kāayitvā yena rājā ajitasenastenopasaṁkrānto rājānaṁ gāthābhiradhyabhāṣata|

kṛtaṁ mayā camkramu suṣṭhu śobhanaṁ

ājñā tvayā yat kṛtapūrvameva ca |

sattvān moceti prakṛtiṁ śubhāśubhaṁ

vimocaye prāṇina sarvametat||

aho sulabdhā praṇidhīkṛtaṁ tvayā

vimocayī sarvajagat sadevakam|

praṇidhiṁ kṛtaṁ yattvayamīdṛśaṁ bhave

dharmaṁ prakāśeti me dharmabhāṇako |

niṣaṇṇa sthitvā kuṭikā ca caṁkrame

ājñā kṛtaṁ yat tvaya yādṛśī kṛtā |

sa caṁkramaṁ caiva kṛtaṁ suśobhanaṁ

maṇiratnasaṁcchādita taṁ ca bhūmim||

atha rājā ajitaseno yena svakā rājadhāgī tenopasaṁkrāntaḥ| atha nandimitramahāśrāvakaḥ pratinivṛtya tatraiva kuṭike niṣaṇṇo vikiraṇaṁ nāma bodhisattvasamādhiṁ samāpanno'bhūt| anyena keśānanyena nayanānyanyena dantānanyena grīvā anyena bāhū anyena hṛdayamanyenodaramanyenorū anyena jaṅgaghe anyena pādau samāpanno'bhūt| atha sa rājā ajitasenaḥ saptāhasyātyayena taṁ bhikṣūṁ na paśyati||

atha rājā jyeṣṭhakumāramevamāha| āgaccha kulaputra gamiṣyāmi tāṁ kuṭikām| yena sa bhikṣustenopasaṁkramiṣyāmi| atha sa rājā saputro yena sā kuṭikā tenopasaṁkrānto'bhūt| atha sa rājā ajitasenastaṁ bhikṣumātmabhāvam khaṇḍaṁ khāṇḍaṁ kṛtaṁ dṛstvā saṁśayajāto'bhūt| saṁtrastaromakūpajāto vastrāṇi pāṭayan paridevan rudan aśrukaṇṭhaḥ putramevamāha| ānaya putra tīkṣṇādhāramasim| ātmānaṁ jivitād vyavaropayiṣyāmi| atha sa rājakumāraḥ prāñjaliṁ kṛtvā rājānaṁ gāthābhiradhyabhāṣata|

mā śokacittasya bhave nṛpendra

mā vedayī vedanamīdṛśāni |

ātmaghātaṁ karitvā tu niraye tvaṁ gamiṣyasi|

rauravaṁ narakaṁ cāpi gamiṣyasi sudāruṇam|

dakṣiṇīyo ayaṁ loke jaravyādhipramocakaḥ|

na cāyaṁ ghātito yakṣairna bhūtairna ca rākṣasaiḥ|

bodhisattvo'pyayaṁ loke jaravyādhipramocakaḥ||

dakṣiṇiyo ayaṁ loke jaravyādhipramocakaḥ|

durlabho darśanaṁ asya bodhimārgasya darśakaḥ||

kalyāṇamitramayaṁ āsī tava kāraṇamāgatam|

dakṣiṇīyo ayaṁ loke sarvasattvasukhāvaham||

sarvajñaṁ pāramiprāptaṁ lokanāthena preṣitam|

dṛḍhavīryaṁ dṛḍhasthāmaṁ lokanāthaṁ maharṣiṇam||

yo nāma tasya dhāreti nāsau gacchati durgatim|

apāyaṁ na gamiṣyanti svargalokopapattaye||

atha sa rājakumārastaṁ pitaraṁ gāthā bhāsitvā tūṣṇīṁ sthito'bhūt| atha rājā ajitasenaḥ svakaṁ putramevamāha| kathaṁ tvaṁ kumāra jānīṣe yadayaṁ bhikṣuḥ samādhiṁ samāpanno'bhūt| atha sa rājakumāra evamāha| paśya mahārāja ayaṁ bhikṣurbodhisattvasamādhiṁ samāpannaḥ sarvakleśavinirmukto bhavasāgarapāraṁgataḥ sarvasattvahitārthaṁ ca mārgaṁ darśayate śubham| atha sa rājakumāro rājānamevamāha| āgaccha tāta caṁkramaṁ gamiṣyāmaḥ| atha sa rājā sa ca rājakumāro bahubhirdārakaśataiḥ sārdha yena sa caṁkramastenopasaṁkrāntau| atha sa bhikṣustataḥ samādhervyutthito rājānamajitasenamevamāha| āgaccha mahārāja kiṁ karoṣyasmin sthāne|

atha rājā taṁ bhikṣū dṛṣṭvā maulipattaṁ rājakumārasya dadāti| tava rājyaṁ bhavatu| dharmeṇa pālaye nādharmeṇa| rājakumāra āha| bahūnyasaṁkhyeyāni rājakāryāṇi mayā kṛtāni| na ca kadācittṛptirāsīt| tava tāta rājyaṁ bhavatu| na mama rājyena kāryaṁ na bhogena naiśvaryādhipatyena kāryam| tava rājyaṁ bhavatu tāta| dharmeṇa pālayeṁ nādharmeṇeti|

atha rājā yena sa bhikṣustenopasaṁkrāntaḥ prāñjalirevamāha|

sudurlabhaṁ [darśana]tubhyamārṣāḥ

kṛtājaliḥ [samabhimukhī] nāyakānām|

mokṣāgamaṁ darśanu tubhyamārṣāḥ

sudurlabhaṁ karmaśatairacintiyaiḥ||

ye darśanaṁ dāsyati tubhyamārṣā

muktā ca so bheṣyati kalpakoṭibhiḥ|

na jātu gacche vinipātadurgatiṁ

yo nāmadheyaṁ śṛṇute muhūrtam||

rājā āha|

niṣadya yugye ratanāmaye śubhe

vrajāmyahaṁ yena sa rājadhānīm|

dadāmyahaṁ bhojanu suprabhūtaṁ

dadāmyahaṁ kāśikavastrametat|

sūkṣmāṇi jālāni ca saṁhitāni

yāṁ cīvarāṁ tubhya dadāmi adya||

atha sa bhikṣū ratnamaye yugye gṛhītvā yena rājadhānī tenopasaṁkrāntaḥ| santarpito bhojanena| atha nandimitramahāśrāvako rājānamajitasenaṁ gāthābhiradhyabhāṣata|

saṁtarpito bhojana suprabhūtaṁ

mṛṣṭānnapānarasamukttamaṁ śubham|

ye bhikṣusaṁghāya dadaṁti dānaṁ

te bodhimaṇḍena cireṇa gacchata||

sudurlabhaṁ darśana nāyakasya na

cireṇa so gacchati buddhakṣetram|

amitāyuṣasya varabuddhakṣetre

sukhāvatīṁ gacchati śīgrametat||

atha nandimitramahāśrāvakaḥ ajitasenasya rājño gāthā bhāṣitva tūṣṇīṁ sthito'bhūt| atha rājā ajitaseno bherīṁ parāhanti sma| atha tena bherīśabdena sarvāstā amātyakoṭyo rājānamevamāhuḥ| kasyārthe mahārāja bherī parāhatā| rājā āha| saptame divase hastirathamaśvarathaṁ sajjaṁ kṛtaṁ rayāt| ahaṁ saptame divase jetavanaṁ nāma vihāraṁ gamiṣyāmi śākyamunestathāgatasyārhataḥ samyaksaṁbuddhasya darśanāya vandanāya paryupāsanāya dharmaśravaṇāya| athāmātyakoṭyastaṁ rājānamajitasenamevamāhuḥ| kṛtamasmābhiḥ mahārāja hastirathamaśvarathaṁ sajjam|

atha rājā ajitaseno hastirathe avaruhya taṁ ca nandimitramahāśrāvakaṁ ratnamaye rathe avarohya yena jetavanaṁ vihārastenopasaṁkrāntaḥ| atha bhagavān rājānamajitasenaṁ dūrata evāgacchantaṁ dṛṣṭrā tāna sarvaśrāvakānāmantrayat| sarvairnānāṛddhivikurvitaṁ darśayitavyam| atha te sarve mahāśrāvakā jvālāmālaṁ nāma bodhisattvasamādhiṁ samāpannā abhūvan| atha rājā dūratastaṁ jvālāmālaṁ dṛṣṭvā nandimitramahāśrāvakamevamāha| kasyārthe imaṁ parvataṁ jvālāmalībhūtaṁ paśyāmi| nandimitra āha| atra śākyamunistathāgato'rhan samyaksaṁbuddhaḥ sthitiṁ dhriyate yāpayati dharmaṁ ca deśayati| te ca bodhisattvā jvālāmālaṁ nāma bodhisattvasamādhiṁ samāpannāḥ| atha rājā ajitaseno hastirathādavatīrya pādābhyāṁ putrasahasreṇa sārdhaṁ yena bhagavāṁstenopasaṁkrāntaḥ| atha bhagavān suvarṇavarṇena kāyena vyāmaprabhayā caṁkramate sma| atha rājā ajitaseno bhagavato rūpavarṇaliṁgasaṁsthānaṁ dṛṣṭvā mūrcchitvā dharaṇitale nipatitaḥ| atha bhagavān suvarṇavarṇaṁ bāhuṁ prasārya taṁ rājānamutthāpayati sma| uttiṣṭha mahārāja kasyārthe prapatitaḥ| rājā āha|

bahūni kalpāni acintiyāni

jātīśatākoṭi acintityāni|

na me kadācidiha dṛṣṭarūpaṁ

tvaṁ lokanātho varadakṣiṇīyo||

tvaṁ sārthavāha jaravyādhimocakaṁ

suvarṇavarṇaṁ varalakṣaṇāṁgam|

dvātṛṁśatā lakṣāṇadhārīṇāṁ mune

nāsau kadācid vrajate apāyabhūmim|

yo lokanāthasya hi rūpu paśye

tvaṁ lokanāthā śirasā namasyāmī||

atha rājā ajitasenaḥ kṛtāñjaliḥ bhagavantamevamāha| ahaṁ bhagavan tava śāsane pravrajiṣyāmi| atha bhagavān tuṣṭa udagra āttamanāḥ pramuditaḥ prītisaumanasyajātaḥ| alabdhālābhā ye [tatra] mama śāsanaṁ vaistārikaṁ bhavati| taṁ rājanamajitasenamevamāha| gaccha tvaṁ mahārāja svagṛhe saptame divase āgamiṣyāmi|

atha rājā ajitasenastuṣṭa udagra āttamanāḥ pramuditaḥ prītīsaumanasyajātastaṁ kalyāṇamitraṁ bhikṣu purataḥsthāpya svagṛhaṁ gatvā sarvānamātyānāmantrayate sma| sarvairgrāmanagaranigamajanapadaiḥ pathaṁ śodhayitavyaṁ gṛhe gṛhe dhvajānyucchrāpitavyāni gṛhe gṛhe ratnamayāni kumbhāni paripūrayitavyāni| tadā taiḥ sarvairamātyairājñātam| sarvagrāmanagaranigamajanapadaiḥ pathaṁ śodhitaṁ dhvajānyucchrāpitāni ratnamayāni kumbhāni paripūritāni| yatra rājā ajitasenaḥ prativasati tatra dvādaśakoṭyo dhvajānāmucchrāpitā dvādaśakoṭyo ratnamayānāṁ kumbhānāṁ paripūritāḥ| yāvat saptame divase tathāgato'rhan samyaksaṁbuddhaḥ śāriputramaudgalyāyanāndapūrṇamaitrāyaṇīputrapramukhairmahāśrāvakasaṁghaiḥ parivṛtaḥ puraskṛtaḥ ajitasenasya rājño rājadhānīmanuprāptaḥ|

atha rājā ajitasenaḥ puṣpapiṭakaṁ gṛhītvā kalyāṇamitraṁ purataḥsthāpya bhagavantaṁ puṣpairavakiran bhagavantamevamāha| anena kuśalamūlena sarvasattvā anuttarāṁ samyaksaṁbodhimabhisampadyante| atha rājñā ajitasenena āsanāni prajñaptāni| tasya bhagavataḥ siṁhāsanaṁ pradattam| atha bhagavān siṁhāsane niṣaṇṇo rājño'jitasenasya dharmān deśitavāg| atha rājñā ajitasenena prabhūtenāhāreṇa khādanīyena bhojanīyena santarpitaḥ| atha rājā ajitaseno jyeṣṭhakaṁ rājakumāraṁ dadāti| imaṁ rājakumāraṁ pravrājaya| tadahaṁ paścāt pravrajiṣyāmi| atha bhagavānāyuṣmantamānandamāmantrayate sma| gacchānanda imaṁ rājakumāraṁ pravrājaya| athāyuṣmatānandena sa rājakumāraḥ pravrājitaḥ| saha pravrajitamātreṇa arhatphalaṁ prāptamabhūt| sarvabuddhakṣetrāṇi paśyati sma| atha sa rājakumāro'ntarīkṣagatastaṁ pitaraṁ gāthābhiradhyabhāṣata|

mā vilaṁba kurute tāta

mā khedaṁ kiṁci yāsyasi|

aho sulabdhaṁ sugatān darśanaṁ

aho sulabdhaṁ sugatān lābham||

aho sulabdhaṁ paramaṁ hi lābhaṁ

pravrajyalābhaṁ sugatena varṇitam|

saṁsāramokṣo sugatena varṇitaṁ

pravrajya śīghraṁ ma vilaṁba tāta||

mā khedayī lokavināyakendraṁ

sudurlabhaṁ labdha manuṣyalābhaṁ

sudurlabhaṁ darśanu nāyakānām|

śīghraṁ ca pravrajya mayā hi labdhaṁ

prāptaṁ mayā uttamamagrabodhim|

śrutvā na rājā tada putravākyaṁ

sa pravrajī śāsani nāyakasya||

atha rājakumāro'ntarīkṣagato gāthāṁ bhāṣitvā tūṣṇīṁ sthito'bhūt| atha rājā ajitasenaḥ putrasya vākyaṁ śrutvā tuṣṭa udagra ātta[ma]nāḥ pramuditaḥ [prīti]saumanasyajāto bhagavantamuddiśya vihāraṁ kārayati sma| tūryakoṭyo'nupradattāḥ| antaḥpurasahasramasyāstrīndriyamantarhitapuruṣendriyaṁ prādurabhūt| atha rājā ajitaseno bhagavataḥ śāsane pravrajito'bhūt| tāścāmātyakoṭyo bhagavataḥ śāsane pravrajitā abhūvan| taccāntaḥpurapuruṣasahasraṁ pravrajitamabhūt| bhagavān rājānamajitasenaṁ pravrājya yena jetavanaṁ vihārastena gamanamārabdhavān|

athāyuṣmānānando bhagavantamevamāha| ayaṁ rājā ajitaseno rājyaṁ parityajya vihāraṁ kārayitvā bhagavataḥ śāsane pravrajito'bhūt| asya kīdṛśaṁ kuśalamūlaṁ bhaviṣyati| bhagavānāha| sādhu sādhu ānanda yattvayā parikīrtitam| ayaṁ rājā ajitaseno mama śāsane pravrajito bhaviṣyati| anāgate'dhvanyaparimitaiḥ kalpairacintyairaparimāṇairajitaprabho nāma tathāgato'rhan samyak saṁbuddho loke bhaviṣyati vidyācaraṇasaṁpannaḥ sugato lokavidanuttaraḥ puruṣadamyasārathiḥ śāstā devānāṁ ca manuṣyāṇāṁ ca buddho bhagavān| ānanda āha| ayaṁ nandimitramahāśrāvako rājñaḥ kalyāṇa mitramabhūt| kidṛśaṁ vāsya kuśalamūlaṁ bhaviṣyati|

bhagavānāha| ayamānanda nandimitramahāśrāvakastatraiva kālasamaye nandiprabho nāma tathāgato'rhan samyaksaṁbuddho loke bhaviṣyati| ānanda āha| kīdṛśaṁ bhagavan teṣāṁ tathāġatānāṁ buddhakṣetraṁ bhaviṣyati| bhagavānāha| aparimitaguṇasaṁcayā nāma sā buddhakṣetraṁ bhaviṣyati yatreme tathāġatā bhaviṣyanti| ānanda āha| ya imaṁ dharmaparyāyaṁ sakalaṁ samāptaṁ paścime kāle paścime samaye saṁprakāśayiṣyati tasya kīdṛśaḥ puṇyaskandho bhaviṣyati| bhagavānāha|

yadā mayānanda duṣkarakoṭiniyutaśatasahasrāṇi caritvā bodhirabhisaṁbuddhā tadā te sattvā bodhimabhisaṁbhotsyante| ya etaddharmaparyāyāt catuṣpadikāmapi gāthāṁ śroṣyanti avaivartikāśca te sattvā bhaviṣyantyanuttarāyāṁ samyaksaṁbodhau| ānanda āha| ya imaṁ dharmaparyāyaṁ dharmabhāṇakāḥ saṁprakāśayiṣyanti teṣāṁ kidṛśaṁ kuśalamūlaṁ bhaviṣyati| bhagavānāha| śṛṇu ānanda rājā bhaviṣyati cakravartī caturdvīpeśvara| ya imaṁ dhamaparyāyaṁ sakalaṁ samāptaṁ saṁprakāśayiṣyanti muktāśca bhaviṣyanti jātijarāvyādhiparidevaduḥkhadaurmanasyopāyāsebhyaḥ parimuktā bhaviṣyanti| ānanda āha| ye paścime kāle paścime samaye sattvā imaṁ dharmaparyāyaṁ pratikṣepsyanti na pattīyiṣyanti teṣāṁ kā gatirbhaviṣyati kaḥ parāyaṇam|

bhagavānāha| alamalamānanda| mā me pāpakaṁ karmaskandhaṁ paripṛccha| na mayā śakyaṁ parikīrtayitum| anyatra buddhakoṭibhirnaśakyaṁ parikīrtayitum| ānanda āha| parikīrtaya bhagavan parikīrtaya| sugato bhagavānāha| śruṇu ānanda saddharmapratikṣepakasya gatiṁ parikīrtayiṣyāmi| raurave mahānarake hāhahe mahānarake avīcau mahānarake tiryagyonau yamaloke ca pretaviṣaye bahūni kalpasahasrāṇi duḥkhamanubhavitavyam| yadi kadācinmannuṣyaloke upapatsyate dīrghaśuṣkatālukaṇṭho bhaviṣyati| dvādaśayojanāni tasya jivhā bhaviṣyati| dvādaśahalyāni pravahiṣyanti ye evaṁ vāgbhāṣiṣyante|

mā bhoḥ kulaputrā bhoḥ kvacit saddharmaṁ pratikṣepṣyatha| saddharmapratikṣepakasya evaṁ gatirbhavati| ānanda āha| kena hetunā bhagavan saddharmaḥ pratikṣipto bhavati| bhagavānāha| ye sattvāḥ paścime kāle paścime samaye eteṣāṁ sūtrānudhārakāṇāṁ dharmabhāṇākānāmakrośiṣyanti paribhāṣiṣyante kutsayiṣyanti paṁsayiṣyanti tasya dharmabhāṇakasya duṣṭacittamutpādyiṣyanti tebhyaḥ saddharmaḥ pratikṣipto bhaviṣyati| yaḥ sattvaḥ trisāhasramahāsāhasryāṁ lokadhātau sattvānāmakṣīṇyutpāṭayet ayaṁ tato bahutaramapuṇyaskandho bhavet| evameva ya eteṣāṁ sūtra dhārakāṇāṁ dharmabhāṇākāṇāṁ duṣṭacittaprekṣitā ayaṁ tato bahutaramapuṇyaskandhaṁ prasaviṣyate|

atha ānando bhagavato gāthāḥ pratyabhāṣata|

bahusūtrasahasrāṇi śrutaṁ me śāstusaṁukhāt|

na [ca]me īdṛśaṁ sūtraṁ śrutapūrvaṁ kadācana||

parinirvṛtasya śāstusya paścātkāle subhairave|

idaṁ sūtraṁ prakāśiṣye dhārayiṣye imaṁ nayam||

yatra sūtraratne asmiṁ paścātkā[le] bhaviṣyati|

rakṣāṁ kariṣyāmi teṣāṁ paścātkāle subhairave||

pratikṣipiṣyāmi nedaṁ gaṁbhīraṁ buddhabhāṣitam||

athāyuṣmānando bhagavato gāthā bhāṣitvā tūṣṇīṁ sthito'bhūt| atha kāśyapo mahāśrāvako bhagavantaṁ gāthābhiradhyabhāṣata|

suvarṇavarṇaṁ varalakṣaṇāṁgaṁ

dvātriṁśatā lakṣaṇadhārīṇaṁ jinam|

subhāṣitaṁ sūtra mahānubhāvagaṁ

gaṁbhīradharma nipuṇaṁ sudurdṛśam||

prakāśitaṁ sūtramidaṁ niruttaraṁ

mā paścakāle parinirvṛte jine|

dhāriṣye maṁ sūtranayaṁ niruttaraṁ|

athāyuṣmān śāradvatīputro bhagavantaṁ gāthābhiradhyabhāṣata|

namo'stu te buddha mahānubhāva

prakāśitaṁ sūtramidaṁ niruttaram|

parinirvṛtasya tava lokanāyakā

likhiṣyati sūtrametaṁ niruttaram||

na cāpi so gacchati durgatībhayaṁ

svargaṁ ca so gacchati kṣiprametat||

athāyuṣmān pūrṇo maitrāyaṇīputro bhagavantaṁ gāthābhiradhyabhāṣata|

kṛtajño bahusattvānāṁ mocako durgatībhayāt|

prakāśitaṁ tvayā sūtraṁ gambhīraṁ buddhadakṣiṇam||

ahaṁ hi paścime kāle nirvṛte tvayi nāyake|

idaṁ sūtraṁ prakāśiṣye hitāya sarvaprāṇinām||

iti|

atha brahmā sahāṁpatirbhagavantaṁ gāthābhiradhyabhāṣata|

namo'stu te buddha mahānubhāvā

prakāśitaṁ sūtramidaṁ tvayā śubham|

parinivṛtasya tava lokanāyaka

rakṣāṁ kariṣyāmi ha sūtraratne||

atha cattvāro mahārājā bhagavantaṁ gāthābhiradhyabhāṣanta|

aho [suramyaṁ] varasūtraratnaṁ

prakāśitaṁ īdṛśa paścakāle|

..................sūtraratnaṁ

prakāśitaṁ paśyati paścakāle||

sugatāna vai lokavināyakānāṁ

ahaṁ hi dhāriṣyama sūtraratnam|

rakṣāṁ kariṣyāmyahaṁ sūtraratnaṁ

imavocadbhagavānāttamanā||

sā ca sarvāvatī parṣadbhagavato bhāṣitamabhyanandat|

ajitasenavyākaraṇanirdeśo nāma mahāyānasūtraṁ samāptam||

deyadharmoyaṁ bālosiṁhena sārdha bhāryājājatitrana sārdhaṁ mātāpitroḥ paramaduṣkartroḥ sādha kṣīṇī ena akhiloṭi ena diśoṭajāja maṁgali.......utrayannagarvidoṭiena vaṭrari–khuśoṭi–khūśogoṭi ena sārdha sarvasattvaiḥ sarva......bhiryatra puṇya tadbha......sarvasattvānāmanuttaraḥ......sārdha paramakalyāṇamitrasthirabandhu ena| likhitamidaṁ puṣṭakaṁ dharmabhāṇakanarendradattena|

Technical Details

Text Version: 

Romanized

Input Personnel: 

DSBC Staff

Input Date: 

2004

Proof Reader: 

Milan Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0