Prathamo binduḥ

bhadantaghoṣakapraṇītam

abhidharmāmṛtaśāstram

prathamo binduḥ

dānaṁ śīlaṁ ca

1 | katamad dānaṁ | svasvāmikānāṁ dhanavastūnāṁ vitaraṇaṁ dānaṁ | tat trividhaheto rbhavati | ātmahetoḥ parahetoḥ parātmahetośca | caityamaṁdirāṇāṁ buddhapratyekabuddhārhatāṁ copasthānamātmahetoḥ | sattvebhyo dānaṁ parahetoḥ | janebhyo dānaṁ parātmahetoḥ ||

2 | cittakṣetravastukuśalaiḥ kuśalaphalaprāptiḥ | katamaccittakuśalaṁ | pariśuddhā śraddhā pūjā ca || katamat kṣetrakuśalaṁ | mahāpuṇyāḥ duḥkhitāḥ mahāpuṇyāśca duḥkhitāśca | ke mahāpuṇyāḥ | buddhā bodhisattvāḥ pratyekabuddhā arhanto'nāgāminaḥ sakṛdāgāminaḥ srota āpannāśca | ke duḥkhitāḥ | tiryaṁco vṛddhā rogiṇo badhirā andhā mūkāstathāvidhā anye ca duḥkhitāḥ | ke mahāpuṇyāśca duḥkhitāśca | buddhā bodhisattvāḥ pratyekabuddhā arhanto'nāgāminaḥ sakṛdāgāminaḥ srota āpannāśca (yadā)vṛddhā rogiṇo badhirā andhā mūkā duḥkhitāḥ | mahāpuṇyakṣetre gauravacittena mahāphalaprāptiḥ | duḥkhitakṣetre karuṇācittena mahāphalaprāptiḥ | mahāpuṇye duḥkhite ca kṣetre gauravakaruṇācittena mahāphalaprāptiḥ | iti kuśalaṁ puṇyakṣetraṁ | katamad vastukuśalaṁ | aprāṇātipātenādattādānena balāpahāraviratyā'bandhanenātāḍanenāvaṁcanenāsaṁbhinnapralāpena (arjitatayā)pariśuddhaṁ yathākālaṁ (yatkiṁcid)alpaṁ bahu dīyamānaṁ vastukuśalaṁ ||

3| śraddhā katamā | āmuṣmike phale yathā nirvāṇe jñānamacalaikacittamucyate pariśuddhā śraddhā || katamā pūjā | mātsaryeṇābhidhyayā ca viviktātmano janamānanamucyate pariśuddhā pūjā | yadidamupasthānaṁ vaṁdanaṁ svahastena dānamityeva mādya cyate pūjā || katamaḥ kṣetravibhaṁgaḥ | kuśalacaryāśīlagrahaṇadhyānaprajñāvimokṣeṣu satsu bhavati puṇyānāṁ phalānāṁ prāptiriti kṣetravibhaṁgaḥ ||

4 | bhayatrāṇaṁ (hi dānaṁ)| hetupratyayavibhāgādduḥkhaprāptiḥ | (dāna)prasthitacittasya pūjayā dānena satphalaprāptiḥ | buddhāya dānena dānasamakālameva sarvapuṇyaprāptiḥ | saṁghāya dānena (saṁghena)anumatenopabhuktenākhilapuṇyaprāptiḥ | nānumatena nopabhukta na nākhilapuṇyaprāptiḥ | dharmāya pūjayā mahāphalaprāptiḥ | śaikṣāṇāṁ caturāṇāṁ prajñāvatāṁ pūjā dharmāyocyate pūjā | dharmadānena samṛddhilābhaḥ | (sva)parigṛhīta vastu dānena sukhabalāyuṣyādiśubhaprāptiḥ | kleśānāṁ kṣayeṇa vijayena mahāphalaprāptiḥ | tiryagbhyo dānasya śatajanmāni yāvatphalaprāptiḥ | pāpebhyo dānasya sahasrajanmāni yāvatphalaprāptiḥ | puṇyebhyo dānasya śatasahasrajanmāni yāvatphalaprāptiḥ | vītarāgapudgalebhyo dānasya koṭiśatasahasrajanmāni yāvatphalaprāptiḥ | buddhebhyo dānasya yāvannirvāṇaṁ phalaprāptiḥ ||

5 | ṣaḍ dānāntarāyāḥ | prathamo mānena dānaṁ | dvitīyo yaśase dānaṁ | tṛtīyo balāya dānaṁ | caturtho'nicchayā dānaṁ | paṁcamo nimittena dānaṁ | ṣaṣṭhaḥ phalāya dānaṁ saṁghānnirdhārya dānaṁ ||

6 | katamacchīlaṁ | dvividhaḥ saṁvaraḥ | kuśalasaṁvaro'kuśalasaṁvaraśca | katamo'kuśalasaṁvaraḥ | prāṇātipātaḥ adattādānaṁ kāmamithyācāraśceti trīṇi kāyaduścaritāni nāma | paiśunyaṁ pāruṣyaṁ mṛṣāvādaḥ saṁbhinnapralāpaśceti catvāri vāgduścaritāni nāma | abhidhyā vyāpādaḥ mithyādṛṣṭiśceti trīṇi manoduścaritāni nāma ||

7 | (katamaḥ prāṇātipātaḥ |)asti jīvo jñāyate yadayaṁ jīvastasya prāṇāpahāro nāma prāṇātipātaḥ | (katamadadattādānaṁ |)asti parāyattaṁ vastu jñāyate yadidaṁ parāyattaṁ vastu tasya steyaṁ nāmādattādānaṁ | (katamaḥ kāmamithyācāraḥ |)asti paradārā jñāyate yadiyaṁ paradārāstāṁ rāgānmārgeṇāmārgeṇa vā samāpadyate'styātmano dārāstāmamārgeṇa maithunāya sevate tadetādṛśaḥ kāmamithyācāro nāma ||

8 | (katamo mṛṣāvādaḥ |)yadi jñātaṁ na jñātamiti vadati | ajñātaṁ jñātamiti vadati | saṁdigdhamasaṁdigdhamiti vadati | asaṁdigdhaṁ saṁdigdhamiti vadati | tadetādṛśo mṛṣāvādo nāma | (katamatpaiśunyaṁ |)yadi satyabhūtaṁ yathākāmaṁ bhaṁktvā prayojanavaśādvadati tadetādṛśaṁ paiśunyaṁ nāma | (katamatpāruṣyaṁ |)kliṣṭena cittena pareṣāmahṛdyaṁ vadati tadetādṛśaṁ pāruṣyaṁ nāma | (katamaḥ saṁbhinnapralāpaḥ |)kālavivekaṁ vinā vadatyapārthaṁ tadetādṛśaḥ saṁbhinnapralāpo nāma ||

9 | (katamābhidhyā |)pareṣāṁ dhanavastujātaṁ madīyaṁ bhavatvityabhidhyāyati tadetādṛśyabhidhyā nāma | (katamo vyāpādaḥ |)aparān dṛṣṭvā na prasīdati duḥkhābādhāṁ prayoktukāmo bhavati tadetādṛśo vyāpādo nāma | (katamā mithyādṛṣṭiḥ |)mithyādṛṣṭirdvividhā | sadvastunyasaduktirviparītaṁ darśanaśrutaṁ ca | katamā sadavastunyasaduktiḥ | nāstiṁ pāpaṁ nāsti puṇyavipākaḥ | nāstyayaṁ loko nāsti paralokaḥ | na sto mātāpitarau | na santi buddhāḥ pratyekabuddhā arhanto'nye ca mārgapratipannāḥ | tadetādṛśī nāma sadvastunyasaduktiḥ | katamadviparītaṁ darśanaśrutaṁ | vidhikṛte kuśalākuśale | na karmāṇyupādāya phalavipākaḥ | ityetādṛśaṁ viparītaṁ darśanaśrutaṁ | ityevameṣā mithyādṛṣṭiḥ | iti trividhānyakuśalakarmāṇi ||

10 | anuśocatastrividhānāṁ duścaritānāmucchedo'nācaraṇaṁ nāma trividhāni kuśalakarmāṇi | trividhaduścaritaprahāṇaṁ trividhakuśala(karma)caraṇaṁ nāma dhruvaśīlasamādānaṁ | dānena śīlena dhyānabhāvanayā ca labhyānyeva trīṇi phalāni dhanaṁ devalokopapattirmokṣaśca ||

11 | asmin loke triṁśadvidhaṁ puṇyakṣetraṁ | mātā pitā vṛddho rogo satpuruṣo vītarāgapudgalaḥ sāsravāḥ sapta pudgalāścatvāro mārgapratipannāścatvāraḥ phalapratipannāḥ pratyekabuddhā buddhā bodhisattvā bhikṣusaṁgho'dhvagāḥ kṣuttṛṭśramāturāśca ||

[ityabhidharmāmṛtaśāstre dānaśīlanirdeśo nāma prathamo binduḥ ||]

Dvitīyo binduḥ

dvitīyo binduḥ

lokadhātavo gatayaśca

1 | trayo dhātavaḥ | kāmadhātuḥ rūpadhātuḥ arūpadhātuḥ || triṣu dhātuṣu santi paṁcavidhā gatayaḥ | narakagatiḥ tiryaggatiḥ pretagatiḥ manuṣyagatiḥ devagatiḥ || antarābhavagatiścāpi ||

2 | katame narakāḥ | mahānarakā aṣṭavidhāḥ | prathamaḥ saṁjīvaḥ | dvitīyaḥ kālasūtraṁ | tṛtīyaḥ saṁghātaḥ | caturtho rauravaḥ | paṁcamo mahārauravaḥ | ṣaṣṭhastapanaḥ | saptamaḥ pratāpanaḥ | aṣṭamo'vīciḥ || pratimahānarakaṁ bhavaṁti ṣoḍaśabhūmayaḥ | te hyupanarakāḥ || katame tiryaṁcaḥ | apadāḥ dvipadāḥ catuṣpadāḥ bahupadāḥ jalacarāḥ sthalacarāḥ khecarāḥ || katamā pretagatiḥ | vividhakāyā || kāmadhātāvakuśalagatistridhā | ghorā madhyamā adhamā | ghoravipākā narakāḥ madhyamavipākāstiryaṁcaḥ adhamavipākāḥ pretāḥ ||

3 | katamā manuṣyagatiḥ | caturvidhā manuṣyāḥ | pūrvavidehamanuṣyāḥ | aparagodānīyamanuṣyāḥ | jaṁbūdvīpamanuṣyāḥ | uttarakurumanuṣyāḥ | iti kāmadhātau caturvidhā kuśalakarmavipākopapattiḥ || katamā devagatiḥ | kāmadhātau ṣoḍhā | cāturmahārājikadevā ityekā | trayastriṁśaddevā iti dvitīyā | yāmadevā iti tṛtīyā | tuṣitadevā iti caturthī | nirmāṇaratidevā iti paṁcamī | paranirmitavaśavartidevā iti ṣaṣṭhī | iti kāmadhātau poḍhā kuśalakarmavipākopapattiḥ ||

4 | rūpadhātau saptadaśabhūmayaḥ | brahmakāyika-brahmapurohita-mahābrahmāṇaḥ | parittābhā'pramāṇābhā''bhāsvarāḥ | parittaśubhā'pramāṇaśubha-śubhakṛtsnāḥ | anabhrakapuṇyaprasava-vṛhatphalā'vṛhā'tapasudṛśa-sudarśanā'kaniṣṭhāḥ || catvāri dhyānāni trividhānyuttamamadhyamahīnaphalavipākāni || dvādaśāyatanotpādaḥ || catvāri dhyānāni sāsravānāsravamiśravipākāni || paṁcaśuddhādhivāsāryapudgalopapattistryāyatanā || āryapudgalapṛthagjanānāṁ bṛhatphale sahotpādaḥ || pṛthagjanānāmāsaṁjñikasamādhilābhenāsaṁjñikadevalokopapattiḥ ||

5 | arūpadhātāvākāśānantyāyatanaṁ vijñānānantyāyatanamākiṁcanyāyatanaṁ naiva saṁjñānāsaṁjñāyatanaṁ (ceti cattvāri bhavantyāyatanāni)| yathākramamarūpasamādhilābhādarūpāyataneṣūpapattiḥ | yathāsamādhibalaṁ janmāyatanalābhaḥ | iti devagatiḥ ||

6 | kāmānāṁ bhavatyādānamupabhogaḥ saṁgraha itihetorucyate kāmadhātuḥ | kāmābhāvādra pabhāvāccocyate rūpadhātuḥ | arūpadhātuścatuḥskandha iti (rūpābhāvād)ucyate'rūpadhātuḥ ||

7 | paṁcāśanmānupavarṣāṇi cāturmahārājikadevānāmahorātraṁ bhavati | evaṁ triṁśaddinānyeko māso dvādaśamāsā ekaṁ varṣaṁ | divyāni paṁcavarṣaśatāni cāturmahārājikadevānāmāyuḥ | tadetadgaṇanayā mānupāṇi navativarṣaśatasahasrāṇi || etatsaṁjīvanarakasyāhorātraṁ | evaṁ triṁśaddinānyeko māso dvādaśamāsā ekaṁ varṣaṁ | paṁcavarṣaśatāni saṁjīvanarakasyāyuḥ ||

8 | punaḥ khalu mānupavarpaśataṁ trayastriṁśaddevānāmahorātraṁ | evaṁ triṁśaddinānyeko māso dvādaśamāsā ekaṁ varṣaṁ | divyaṁ varṣasahasraṁ trayastriṁśaddevānāmāyuḥ | tadetadgaṇanayā mānuṣāṇāṁ tisro varṣakoṭayaḥ ṣaṣṭivarṣaśatasahasrāṇi || etatkālasūtranarakasyāhorātraṁ | evaṁ triṁśaddinānyeko māsaḥ | dvādaśamāsā ekaṁ varṣaṁ | varṣāṇāṁ sahasraṁ kālasūtranarakasyāyuḥ ||

9 | punaḥ khalu dva mānuṣavarṣaśate yāmadevānāmahorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | dve divyavarṣasahasre yāmadevānāmāyuḥ | tadetad gaṇanayā mānuṣāṇāṁ caturdaśavarṣakoṭayaścatvāriṁśadvarṣaśatasahasrāṇi || etatsaṁghātanarakasyāhorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | dve varṣasahasre saṁghātanarakasyāyuḥ ||

10 | punaḥ khalu catvāri mānuṣavarṣaśatāni tuṣitadevānāmahorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | catvāri divyavarṣasahasrāṇi tuṣitadevānāmāyuḥ | tadetad gaṇanayā mānuṣāṇāṁ saptapaṁcāśad varṣakoṭayaḥ ṣaṣṭivarṣasahasrāṇi || etad rauravanarakasyāhorātram | evaṁ triṁśad dinānyeko māsaḥ | dvādaśamāsā ekaṁ varṣaṁ | catvāri varṣasahasrāṇi rauravanarakasyāyuḥ ||

11 | punaḥ khalvaṣṭau mānupavarṣaśatāni nirmāṇaratidevānāmahorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | aṣṭau divyavarṣasahasrāṇi nirmāṇaratidevānāmāyuḥ | tadetad gaṇanayā mānuṣāṇāṁ triṁśadadhikadve varṣakoṭiśate catvāriṁśad varṣaśatasahasrāṇi || etad mahārauravanarakasyāhorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | aṣṭau varṣasahasrāṇi mahārauravanarakasyāyuḥ ||

12 | punaḥ khalu mānuṣāṇāṁ varṣasahasraṁ ṣaṭ ca varṣaśatāni paranirmitavaśavartidevānāmahorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | ṣoḍaśadivyavarṣasahasrāṇi paranirmitavaśavartidevānāmāyuḥ | tadetad gaṇanayā ekaviṁśatyadhikanavavarṣakoṭiśatāni ṣaṣṭi ca varṣaśatasahrāṇi || etat tapananarakasyāhorātraṁ | evaṁ triṁśad dinānyeko māsaḥ | dvādaśamāsā ekaṁ varṣaṁ | ṣoḍaśa varṣasahasrāṇi tapananarakasyāyuḥ ||

13 | pratāpananarakasyāyuḥ kalpārdhaṁ | avīci narakasyāyuḥ pūrṇaḥ kalpaḥ || tiraścāmāyurnimeṣamārabhya dinārghaṁ dinaṁ māso varṣaṁ daśa varṣāṇi varṣāṇāṁ śataṁ sahasraṁ śatasahasraṁ koṭiryāvat kalpaḥ || durgatānāṁ pretānāmāyu ryāvat saptativarṣasahasrāṇi ||

14 | jaṁbūdvīpe manuṣyāṇāmāyuḥ (kalpādau)asaṁkhyeyavarṣāṇi vā (kalpānte)daśa varṣāṇi vā | adyatve punarāyurvarṣaśataṁ prāyaśaḥ | aparagodānīyajanānāmāyuḥ sārddhadve varṣaśate | pūrvavidehajanānāmāyuḥ paṁcavarṣaśatāni | uttarakurujanānāmāyuranyūnānatiriktaṁ varṣasahasraṁ | anyatra sattvānāmāyuṣo vṛddhihrāsau | iti kāmadhātusattvānāmāyuḥ ||

15 | katamadra padhātāvāyuḥ | brahmakāyikānāṁ devānāmardhakalpaḥ | brahmapurohitānāṁ devānāṁ kalpaḥ | mahābrahmaṇāṁ devānāṁ sārdhakalpaḥ | iti prathamadhyāna (bhūmiṣu)āyuḥ || parittābhānāṁ devānāmāyu rdvau kalpau | apramāṇābhānāṁ devānāmāyuścatvāraḥ kalpāḥ |  ābhāsvarāṇāṁ devānāmāyuraṣṭau kalpāḥ | iti dvitīyadhyāna (bhūmiṣu)āyuḥ || parittaśubhānāṁ devānāmāyuḥ ṣoḍaśakalpāḥ | apramāṇaśubhānāṁ devānāmāyurdvātriṁśatkalpāḥ | śubhakṛtsnānāmāyuścatuḥṣaṣṭikalpāḥ | iti tṛtīyadhyāna(bhūmiṣu)āyuḥ || anabhrakāṇāṁ devānāmāyuḥ kalpasapādaśataṁ | puṇyaprasavānāṁ devānāmāyuḥ sārdhadve kalpaśate | vṛhatphalānāṁ devānāmāyuḥ paṁca kalpaśatāni | avṛhāṇāṁ devānāmāyuḥ kalpasahasraṁ | atapānāṁ devānāmāyuḥ dve kalpasahasre | sudṛśānāṁ devānāmāyuścatvāri kalpasahasrāṇi | sudarśanānāṁ devānāmāyuraṣṭau kalpasahasrāṇi | akaniṣṭhānāṁ devānāmāyuḥ ṣoḍaśa kalpasahasrāṇi | iti (rūpadhātau)caturdhyāna(bhūmīnāṁ)āyuḥ ||

16 | ākāśānantyāyatana āyu rviṁśatiḥ kalpasahasrāṇi | vijñānānantyāyatana āyuścatvāriṁśat kalpasahasrāṇi | ākiṁcanyāyatana āyuḥ ṣaṣṭiḥ kalpa sahasrāṇi | naivasaṁjñānāsaṁjñāyatana āyuraśītiḥ kalpasahasrāṇi | ityarūpadhātāvāyuḥ || evam (idaṁ)tridhātusattvānāmāyuḥ ||

[ityabhidharmāmṛtaśāstre lokadhātugatinirdeśo nāma dvitīyo binduḥ ||]

Tṛtīyo binduḥ

tṛtīyo binduḥ

sthityāhārabhavāḥ

1 | catasro vijñānasthitayaḥ | katamāścatasraḥ | rūpa (vijñānasthitiḥ)vedanā (vijñānasthitiḥ)saṁjñā (vijñānasthitiḥ)saṁskāra(vijñānasthitiśca)| kāmadhātau rūpadhātau ca bhūyo rūpālambanā vijñānasthitiḥ | ākāśānantyāyatane vijñānānantyāyatane ca bhūyo vedanālambanā vijñānasthitiḥ | ākiṁcanyāyatane bhūyaḥ saṁjñālambanā vijñānasthitiḥ | naiva saṁjñānāsaṁjñāyatane bhūyaḥ saṁskārālambanā vijñānasthitiḥ ||

2 | sattvasthitivṛddhihetava āhārāścaturvidhāḥ | āhārāścatvāraḥ katame | kavalīkāra āhāraḥ prathamaḥ | sparśāhāro dvitīyaḥ | manaḥsaṁcetanikāhārastṛtīyaḥ | vijñānāhāraścaturthaḥ ||

3 | kavalīkārāhārasya triṣu gaṁdharasasparśāyataneṣu saṁgrahaḥ | kasmādrūpāyatane na saṁgrahaḥ | yasmāccakṣurdarśanāhāreṇa sattvanikāyasya mahābhūtānāṁ nopacayastasmāt ||

4 | kavalīkārāhāro dvividhaḥ | kharo mṛduśca | katamaḥ kharaḥ | sarvo hi bhaktāpūpādiḥ | katamo mṛduḥ | peyaṁ surabhikāyānuvilepanādi ||

5 | katamaḥ sparśāhāraḥ | cakṣuḥ sparśāhāraḥ śrotra ghrāṇa jihvā kāyasparśāhāraḥ | sāsravamanaḥsparśāhāraśca | (ta ime)santānānucchedena pare'pi loke pravartante ||

6 | pakṣiṇāṁ haṁsādīnāṁ bhūyaḥ sparśāhāraḥ | jalakīṭāṇḍajamatsyādīnāṁ bhūyo manaḥsaṁcetanikāhāraḥ | naivasaṁjñānāsaṁjñāyatanāntarābhavasattvānāṁ bhūyo vijñānāhāraḥ ||

7 | kāmadhātau bhūyaḥ kavalokārāhāraḥ | (anye)traya āhārā bhūyasā rūpārūpadhātvoḥ ||

8 | ādyaḥ kavalīkārāhāraḥ kharaḥ | sparśāhāro mṛduḥ | manaḥsaṁcetanikāhāro mṛdutaraḥ | vijñānāhāro mṛdutamaḥ ||

9 | caturvidhāḥ sattvāḥ | aṁḍajā jarāyujāḥ saṁsvedajā aupapādukāḥ | narakā devā antarābhavāśceti sarva aupapādukāḥ | pretānāmasurāṇāṁ ca dvividhaṁ janma jarāyujamaupapādukaṁ ca | anyeṣāṁ sattvānāṁ caturvidha janma || aupapādukāḥ sattvā yugapallabhante ṣaḍindriyāṇi | anyāsu tisṛṣūpapattiṣu kāyendriyajīvendriyayoḥ prathamaṁ lābhaḥ | anyeṣāmindriyāṇāṁ krameṇa lābhaḥ ||

10 | catvāro bhavāḥ | upapattibhavaḥ | mṛtyubhavaḥ | mūlabhavaḥ | antarābhavaḥ ||

11 | mṛtyupapattyorantare (vartamānāḥ)sūkṣmāḥ paṁcaskandhā antarābhavo nāma | antarābhava upapattibhavaśca tulyamudrāvarṇau tathāhi pitā putraśca ||

12 | arūpadhātuṁ vihāyānyadhātusattvā labhante'ntarābhavaṁ || arūpadhātusattvāścyavantaḥ kāmadhātāvutpatsyamānā labhante'ntarābhavaṁ || tathā hyanāgāmibhave'ntarābhavaḥ | anyāsūpapattiṣvapyevamantarābhavopapattibhavau ||

[ityabhidharmāmṛtaśāstre sthityāhārabhavanirdeśo nāma tṛtīyo binduḥ ||]

Caturthā binduḥ

caturthā binduḥ

karma

1 | saṁkliṣṭe citte kleśānālambya bhavati saṁkliṣṭakarmotpādaḥ | saṁkliṣṭa karmaṇi satyanubhūyate saṁkliṣṭo vipākaḥ || katamat saṁkliṣṭaṁ karma | bhavati (saṁkliṣṭakarmaṇāṁ)trikairvibhāgaḥ || (tathāhi)| kāyakarma | vākkarma | manaḥ karma || kuśalakarma | akuśalakarma | avyākṛtakarma || śaikṣakarma | aśaikṣakarma | naśaikṣanāśaikṣakarma || satyadarśanaheyakarma || bhāvanāheyakarma | aheyakarma ||

2 | (vipākaḥ katamaḥ)| aihikavipākaḥ (=dṛṣṭadharmavipākaḥ)| jātivipākaḥ(=upapadyavedanīyavipākaḥ)| sāṁparāyikavipākaḥ(=aparaparyāyavedanīyavipākaḥ )| sukhavipākaḥ | duḥkhavipākaḥ | asukhāduḥkhavipākaḥ | kṛṣṇavipākaḥ | śuklavipākaḥ | saṁkliṣṭa(=kṛṣṇaśukla)vipākaḥ ||

3 | akṛṣṇāśuklāvipākaṁ karmakṣayakarma | niyatavedyavipākaṁ karma | aniyatavedyavipākaṁ karma ||

4 | katamat kāyakarma | kāyaceṣṭā kāyavyāpāraḥ || katamad vākkarma | vākceṣṭā vāgvyāpāraḥ || katamanmanaḥ karma | manaśceṣṭā manaścetanā || katamat kuśalakarma | kuśalakāyavyāpāraḥ | kuśalavāgvyāpāraḥ | kuśalā mānasī cetanā || katamad akuśalakarma | akuśalakāyavyāpāraḥ | akuśalavāgvyāpāraḥ | akuśalā mānasī cetanā || katamad avyākṛtakarma | avyākṛtā kāyaceṣṭā | avyākṛtā vākceṣṭā | avyākṛtā mānasī cetanā || katamat śaikṣakarma | śaikṣasya kāyāvijñaptiḥ | śaikṣasya vāgavijñaptiḥ | śaikṣasya mānasī cetanā || katamad aśaikṣakarma | aśaikṣasya kāyāvijñaptiḥ | aśaikṣasya vāgavijñaptiḥ | aśaikṣasya mānasī cetanā || katamannaśaikṣanāśaikṣakarma | sāsravā kāyaceṣṭā vākceṣṭā mānasī cetanā || katamat satyadarśanaheyakarma | śraddhānusāriṇo dharmānusāriṇaḥ kṣāntidṛṣṭyā heyā aṣṭāśītiranuśayāścittasaṁprayuktāḥ || katamad bhāvanāheyakarma | śraddhāvimokṣadarśanopalabdhabhāvanayā heyā daśānuśayāścittasaṁprayuktāḥ | kliṣṭe kāyavākkarmaṇī | kuśalasāsravakarma | avyākṛtakarma || katamadaheyakarma | sarvamanāsravaṁ karma ||

5 | katama aihikavipākaḥ | kuśalākuśalānāṁ kṛtakamaṇāṁ ya ihaloke (phala-)lābho na paraloke || katamo jātivipākaḥ | kuśalākuśalakarmānusāraṁ pretya prathamāyāṁ jātau yo vipākalābho na tadanyajātau || katamaḥ sāṁparāyikavipākaḥ | kuśalākuśalakarmānusāraṁ pretya dvitīya (=prathametara)jātau yo (vipāka-)lābhaḥ | tṛtīyacaturthyādiṣu ca jātiṣu yo vipākalābhaḥ || katamaḥ sukhavipākaḥ | kāmāvacarakuśalakarmaṇā yāvattṛtīyadhyānaṁ rūpāvacarakuśalakarmaṇā ca vedanīyaḥ sukho vipākaḥ || katamo duḥkhavipākaḥ | akuśalakarmaṇā vedanīyo vipākaḥ || katamo'duḥkhāsukhavipākaḥ | caturthadhyānasāsravakuśalakarmaṇā arūpāvacarasāsravakuśalakarmaṇā ca (vedanīyo vipākaḥ)|| katamaḥ kṛṣṇakṛṣṇavipākaḥ | akuśalakarmaṇā kṛṣṇakṛṣṇavipākaḥ || katamaḥ śuklaśuklavipākaḥ | sāsravakuśalakarmaṇā śuklaśuklavipākaḥ || katamaḥ saṁkliṣṭavipākaḥ (=miśravipākaḥ)| kāmāvacarakuśalākuśalasaṁkliṣṭa-(=miśra)karmaṇā vedanīyaḥ saṁkliṣṭaḥ(=miśraḥ)vipākaḥ ||

6 | katamadakṛṣṇāśuklāvipākaṁ karma | traidhātukānāmāsravāṇāṁ parikṣayakāle karmaṇāṁ kṣaye (nimittaṁ)ānantaryamārgasaṁgṛhītaṁ (karma)anāsravā ca bhāvanā || katamad niyatavipākaṁ karma | paṁcānantaryakarmāṇi bhavanti niyatākuśalavipākāni | (tāni)dṛṣṭadharmavipākāni jātivipākāni aparaparyāyavedanīyavipākāni vā bhavanti || sati hetupratyaye sati ca pudgale niyatavedanīyo bhavati vipākaḥ | asati hetupratyaye asati ca pudgale na bhavati niyatavedanīyo vipākaḥ | sarvasāsravakarmaṇāṁ hetukṛtānāṁ paripāke bhavati vipākalābhaḥ | ahetukṛtānāmaparipāke na bhavati vipākalābhaḥ ||

7 | trividhāni karmāṇi | kāyakarma (dvidhā)vijñaptiravijñaptiśca | vākkarma (dvidhā)vijñaptiravijñaptiśca | manaḥ karma vijñaptir (eva)||

8 | katamad vijñaptikarma | kāyavāgamanaḥkṛtaṁ (karma)| katamadavijñaptikarma | kāyavākkṛtaṁ (karma)|| (pūrvacitta)paryavasāne jāyamāne cittāntare'paricyutaṁ tiṣṭhatyavijñaptirūpaṁ | kuśalākuśalacittajaṁ bhavatyavijñaptirūpaṁ natvavyākṛtacittajaṁ | tatkasya hetoḥ | avyākṛta cittasyātidurbalatvāt ||

9 | avyākṛtabhāvo dvividhaḥ | sanivṛtaḥ anivṛtaśca | saṁyojanāvṛtaḥ sanivṛtaḥ | anāvṛto'nivṛtaḥ ||

10 | katame sanivṛtāvyākṛtā dharmāḥ | kāmadhātau satkāyadṛṣṭiḥ antagrāhadṛṣṭiḥ tatsaṁprayuktā avidyāsahabhuvo dharmāḥ | rūpārūpyadhātvoḥ sarvasaṁyojanāni rūpadhātukāyavākkarmāṇi | iti sanivṛtāvyākṛtā dharmāḥ ||

11 | katame anivṛtāvyākṛtādharmāḥ | āsanaṁ śayanaṁ sthānaṁ caṁkramaṇaṁ śilpaṁ vipākadharmāḥ nairmāṇikacittaṁ ākāśaṁ ajñānaṁ pratyayocchedaḥ | ityanivṛtāvyākṛtā dharmāḥ ||

12 | avijñaptistrividhā | anāsravā prathamā | samādhisaha (-jātā)dvitīyā | śīlasaṁvarastṛtīyā || katamadanāsravaśīlaṁ | samyagvāk samyakkarmāntaḥ samyagājīvaḥ || katamatsamādhisaha(jātaṁ)śīlaṁ | dhyānalābhaḥ kāmākuśaladharmaparityāgaḥ || katamaḥ śīlasaṁvaraḥ | śīlasamādānakāle sāsravakuśalakāyavākkarmāvāptiḥ || katamastrividhasaṁvaralābhaḥ | sarvamārgānāsravasaṁvarasiddhiḥ sarvasamādhisaha(bhū)saṁvarasiddhiḥ samādattaśīlasya kāmadhātupudgalasya śīlasaṁvarasiddhiḥ ||

13 | gṛhītasaṁvarasya pudgalasya prathama jñaptikaraṇasamaye pratyutpannāvijñaptiśīlasiddhiḥ | yāvadantaṁ na parihīyate tāvadasya atītāvijñapti siddhiḥ | dhyānāptapudgalasya sarvātītānāgatapratyutpannadhyānasaṁvara(jāvijñapti)siddhiḥ | anāsravasaṁvarasyānāgatasarvāvijñaptisiddhiḥ | mārgāpannasya pratyutpannāvijñaptisiddhiḥ | yāvadantaṁ na parihīyate tāvatsa pudgalo'tītasaṁvara(jāvijñapti)mān bhavati ||

14 | gurupāpakaṁ kurvataḥ prāptirakuśalasya akuśalavijñaptyavijñaptyoḥ | agurupāpake prāptirakuśalāyā vijñapternatvavijñapteḥ | akuśalacittanirodhe na prāptirvijñaptyavijñaptyoḥ | asaṁvarapudgalasya pratyutpannākuśalāvijñaptiprāptiḥ | yāvadantaṁ na parihīyate tāvadasyātītākuśalāvijñaptiprāptiḥ | gurukuśalaṁ kurvato vijñaptyavijñaptiprāptiḥ | agurukuśale vijñaptiprāptirna tvavijñaptiprāptiḥ | kuśalacittanirodhe vijñaptyavijñaptyaprāptiḥ | madhyamapudgalasya kṛte gurukuśale'kuśale ca kuśalākuśalavijñaptyavijñaptiprāptiḥ | agurukuśalākuśalaṁ kurvato'sya prāptirvijñapternatvavijñapteḥ | kuśalākuśalacittanirodhe na prāptirvijñaptyavijñaptyoḥ ||

15 | rūpadhātukuśalacittalābhe dhyānasaṁvarasiddhiḥ | pratyudāvṛttacittasya na bhavati dhyānasaṁvarasiddhiḥ | rūpadhātu kuśalacitteṣu saṁvaracittasaṁprayogaḥ vinā cakṣurvijñānaṁ śrotra (vijñānaṁ)kāyavijñānaṁ śrutamayīprajñāṁ cyutikālikacittaṁ ca ||

16 | ṣaḍbhūmikānāsravacittabalenānāsravasaṁvarasiddhiḥ | katamāḥ ṣaḍbhūmayaḥ | asamāpattidhyānabhūmiḥ prathamadhyānaṁ madhyamadhyānaṁ dvitīyadhyānaṁ tṛtīyadhyānaṁ caturthadhyānaṁ ca | ṣaḍbhūmipratyudāvṛttacittasya nānāsravasaṁvarasiddhiḥ ||

17 | dvābhyāṁ vastubhyāmanāsravasaṁvarāt parihāṇirbhavati | pratyudāvṛtteśca (ṣaḍbhūmibhyaḥ)saṁprāpteśca mārgaphalasya || dvābhyāṁ vastubhyāṁ parihīyate dhyānasaṁvarāt | pratyudāvartanācca jīvitoparamācca || tribhirvastubhiḥ parihīṇo bhavati śīlasaṁvarāt | (tatra)prathamaṁ (vastu)śīlabhaṁgaḥ | dvitīyaṁ śīlaparityāgaḥ | tṛtīyamakuśalamithyā (dṛṣṭy)utpādaḥ || dharmanirodhakāle bhavati śīlasaṁvaracyutiriti kecidāhuḥ | na bhavati cyutirityāhurapare | vastutastu na cyuti (riti naḥ siddhāntaḥ)|| catvāri vastūni yairasaṁvarāt parihāṇiḥ | prathamaṁ śīlasamādānaṁ | dvitīyaṁ punarakaraṇaṁ | tṛtīyamekacittena tṛṣṇoparamaḥ | caturthaṁ kuśalarūpa (dhātugatadhyāna)mārgaprāptiḥ | kathaṁ parihāṇiḥ (kuśalasaṁvarāt)| bhavati cetkuśalamūlocchedaḥ | uparamaścedāyuṣaḥ | avaśeṣaścet kliṣṭacaitasikadharmāṇām ||

18 | kleśocchedakāle ucchedasya bhavati paṁcavidhaṁ phalaṁ | prathamaṁ vipākaphalaṁ | dvitīyamāśrayaphalaṁ | tṛtīyamadhipatiphalaṁ | caturthaṁ kāyabalaphalaṁ | paṁcamaṁ vimokṣaphalaṁ || kuśalānāṁ sāsravānāṁ dharmāṇāṁ catvāri vā phalāni bhavanti paṁca vā phalāni | prabhavanti kleśocchedāyeti paṁca phalāni | na prabhavanti kleśocchedāyeti catvāri phalāni vinā vimokṣaphalaṁ || akuśaladharmāṇāṁ bhavanti catvāri phalāni | sthāpayitvā vimokṣaphalaṁ | anāsravadharmāṇāṁ catvāri vā phalāni bhavanti trīṇi vā phalāni | kleśocchede tu catvāri phalāni vihāya vipākaphalaṁ | klaśocchedābhāve tu trīṇyeva phalāni vyapahāya vipākaphalaṁ vimokṣaphalaṁ ca || avyākṛtadharmāṇāṁ trīṇi phalāni vipākaphalaṁ varjayitvā vimokṣaphalaṁ ca ||

19 | katamadvipākaphalaṁ | akuśaladharmeṇa kuśalasāsravadharmeṇa ca (yat)prāpyate (tad)vipākaphalaṁ | katamadāśrayaphalaṁ | kuśalākuśalāvyākṛtadharmāṇāṁ nityācaraṇābhivṛddhahitādyāvatprāptirityāśrayaphalaṁ | katamadadhipatiphalaṁ | kuśalānāṁ vā athākuśalānāṁ vā sahavedanīyānāṁ yā bhavatyutkṛṣṭatamā (kuśalā vā akuśalā vā)vedanīyatā socyate'dhipatiphalaṁ | katamatkāyabalaphalaṁ | kāyavyāpārakṛtakarmādikamucyate kāyabalaphalaṁ | katamadvimokṣaphalaṁ | jñānena kleśanirodha ucyate vimokṣaphalam ||

20 | kuśalamūlamakuśalamūlamavyākṛtamūlaṁ ceti mūlaṁ trividhaṁ || kuśalamūlam alobhaḥ adveṣaḥ amohaśca | iti trividhaṁ kuśalamūlaṁ || akuśalamūlaṁ lobhaḥ dveṣaḥ mohaśca || caturvidhamavyākṛtamūlaṁ | avyākṛtaṁ rāgaḥ | avyākṛtā'vidyā | avyākṛtā dṛṣṭiḥ | avyākṛto mānaḥ ||

21 | trividhā dharmāḥ | kuśaladharmāḥ | akuśaladharmāḥ | avyākṛtadharmāśca || katame kuśaladharmāḥ | kuśalāni kāyavākkarmāṇi | kuśalaṁ cittaṁ | (kuśalāḥ)cittasaṁprayuktā dharmāḥ cittaviprayuktāśca saṁskārāḥ | pratisaṁkhyānirodhaḥ | iti kuśaladharmāḥ || katame'kuśalā dharmāḥ | akuśalāni kāyavākkarmāṇi | akuśalaṁ cittaṁ | (akuśalāḥ)cittasaṁprayuktā dharmāḥ cittaviprayuktāśca saṁskārāḥ | ityukuśaladharmāḥ || katame'vyākṛtadharmāḥ | avyākṛtāni kāyavākkarmāṇi | avyākṛtaṁ cittaṁ | (avyākṛtāḥ)cittasaṁprayuktā dharmāḥ cittaviprayuktāśca saṁskārāḥ | apratisaṁkhyānirodhaḥ | ityavyākṛtadharmāḥ ||

22 | madyapānaviratiḥ | dānaṁ | vedanā | gurukāraḥ | ityevamādi | iti kuśalakāyavākkarmasaṁgrahaḥ || madyapānaṁ | tāḍanaṁ | madamānaḥ | (a)gurukāraḥ | ityevamādi | ityakuśalakāyavākkarmasaṁgrahaḥ || iti daśakarma pathāḥ ||

23 | asaṁgṛhītāni kāmadhātukāyavākkarmāṇi kāmadhātucaturmahābhūtakṛtāni || evaṁ rūpadhātu (kāyavākkarmāṇi)|| anāsravāṇi kāyavākkarmāṇi katamaccaturmahābhūtakṛtāni | ṣaḍbhūyyāśrayāṇi tadbhūmicaturmahābhūtavṛtāni | ārūpyadhātūpapattāvevaṁ mūlādhigāni anāsravāṇi kāyavākkarmāṇyapi tadbhūmicaturmahābhūtakṛtāni ||

24 | tridhā jīvitoparamaḥ (=maraṇam)| āyuḥkṣayeṇa na puṇyakṣayeṇa | puṇyakṣayeṇa nāyuḥkṣayeṇa | puṇyakṣayeṇa āyuḥkṣayeṇa ca ||

[ityabhidharmāmṛtaśāstre karmanirdeśo nāma caturtho binduḥ ||]

Paṁcamo binduḥ

paṁcamo binduḥ

skandhāḥ dhātavaḥ āyatanāni ca

1| sarvasāsravadharmāścaturvastuheyāḥ | katamebhyaścatu (rvastubhyaḥ)| anityataḥ | anātmataḥ | duḥkhataḥ | aśucitaśca || kleśā hyāsravāḥ | tatkasya hetoḥ | sarvopapattideśābhigamane cittasya nairantaryeṇa sravatvena saṁsārapatanahetutvāducyante āsravāḥ || triṣu dhātuṣvaṣṭottaraśataṁ kleśāḥ | aṣṭānavatibandhanāni | daśa saṁyojanāni | itīme kleśāḥ kutaḥ sthānātprabhavanti | ucyate | sāsravadharmebhyaḥ | api cocyante upādānaskandhā iti kleśasthānamiti ca | tato'tra dvividhāḥ paṁcaskandhāḥ sāsravā anāsravāśca | upādānaskandhāḥ sarve sāsravāḥ ||

2 | katamo rūpaskandhaḥ | sarvaṁ catumahābhūtakṛtaṁ dvādaśāyataneṣu vyapahāya mana āyatanaṁ sarvāṇyanyānyāyatanāni dharmāyatanasaṁgṛhītamavijñaptirūpaṁ ceti rūpaskandhaḥ || rūpaskandho dvividhaḥ | sanidarśano'nidarśanaśca | katamaḥ sanidarśanaḥ | ekamāyatanaṁ | rūpāyatanaṁ | katamo'nidarśanaḥ | navāyatanāni dharmāyatanasaṁgṛhītamavijñaptirūpaṁ ca || rūpaṁ punastrividhaṁ | sanidarśanaṁ sapratighaṁ | anidarśanaṁ sapratighaṁ ca | rūpāyatanaṁ sanidarśanaṁ sapratighaṁ | anyāni navāyatanānyanidarśanāni sapratighāni | dharmāyatanamavijñaptirūpaṁ cānidarśane apratighe || iti rūpaskandhaḥ ||

3 | katamo vedanāskandhaḥ | vedanā'nubhavaḥ ṣaḍvidhasparśajaḥ || dvividhā vedanā | kāyavedanā manovedanā ca || trividhā vedanā | duḥkhā vedanā sukhāvedanā aduḥkhāsukhāvedanā ca || caturvidhā vedanā | kāyavyākṛtā avyākṛtā manovyākṛtā avyākṛtā ca || paṁcavidhā vedanā | paṁca vedanendriyāṇi | (sukhaṁ duḥkhaṁ saumanasyaṁ daurmanasyamupekṣā ca)|| ṣoḍhā vedanā | cakṣuḥsaṁsparśajā vedanā śrotra ghrāṇa jihvā kāya manaḥsaṁsparśajā vedanā ca || aṣṭādaśavidhā vedanā | cakṣurādyāḥ (ṣaḍvedanāḥ)sasukhasaumanasyāḥ (saduḥkhadaurmanasyāḥ)sopekṣāśca || ṣaṭtriṁśadvidhā vedanā | aṣṭādaśavidhā vedanā kuśalā akuśalāca || aṣṭottaraśatavidhā vedanā | atītānāgatapratyupannaiḥ pravibhaktāḥ ṣaṭtriṁśat || pratisattvaṁ kṣaṇe kṣaṇe samudyantyasaṁkhyeyā vedanāḥ || iti vedanāskandhaḥ ||

4 | katamaḥ saṁjñāskandhaḥ | cittaṁ vividhaṁ pratītya sarvadharmāḥ saṁjñā | sā trividhā | parittā | mahatī | (taditarā ca)| asaṁkhyeyabhedabhinnabāhyāyatanasaṁgrahapratyayena saṁjñāyate iti saṁjñāskandhaḥ ||

5 | katamaḥ saṁskāraskandhaḥ | saṁskṛtadharmeṣu saṁskārāḥ saṁskurvanti vividhān dharmāniti saṁskāraskandhaḥ || sa dvividhaḥ | cittasaṁprayuktaḥ cittaviprayuktaśca || katamaścittasaṁprayuktaḥ | cetanā sparśaḥ smṛtirityādayo dharmā iti cittasaṁprayuktaḥ || katamaścittaviprayuktaḥ | prāptirāsaṁjñikaṁ nirodhasamāpattirityādiścittaviprayuktaḥ || iti saṁskāraskandhaḥ ||

6 | katamo vijñānaskaṁdhaḥ | nīlapītalohitādīndharmān vivinakti vijñānaṁ | vijñānaṁ hi ṣaḍvidhaṁ | cakṣurvijñānaṁ śrotra ghrāṇa jihvā kāya manovijñānaṁ ca | katamaccakṣurvijñānaṁ | cakṣurindriyāśrayā rūpaprajñaptirucyate cakṣurvijñānaṁ | evaṁ śrotraghrāṇajihvākāyendriyāśrayāḥ śabdagandharasaspraṣṭavyaprajñaptayaḥ śrotraghrāṇajihvākāyavijñānāni | manaindriyāśrayā dharmaprajñaptirucyate manovijñānaṁ || iti vijñānaskandhaḥ ||

7 | dvādaśāyatanāni | cakṣurāyatanaṁ śrotra ghrāṇa jihvā kāya mana āyatanaṁ | ityādhyātmikāni ṣaḍāyatanāni | rūpa śabda gandha rasa spraṣṭavya dharmāyatanaṁ | iti bāhyāni ṣaḍāyatanāni || api ca cakṣurvijñānād yāvanmanovijñānaṁ (iti ṣaḍvijñānāni dvādaśāyataneḥ saha)saṁbhūya aṣṭādaśa (dharmā bhavanti aṣṭādaśa dhātavaḥ)||

8 | upādāya catvāri mahābhūtāni (rūpa-)prasādakṛtaṁ rūpavijñānapratyaya ucyate cakṣuḥ | evaṁ catvāri mahābhūtāni upādāya (rūpa)prasādakṛtāḥ śabdagandharasaspraṣṭavyavijñānapratyayāḥ ucyante śrotraghrāṇajihvākāyāḥ ||

9 | sarvasya cakṣurvijñānasya viṣayo rūpaṁ dvādaśavidhaṁ | dīrghaṁ | hrasvaṁ | ālokaḥ | andhakāraḥ | nīlaṁ | pītaṁ | lohitaṁ | avadātaṁ | sthūlasūkṣmarūpaṁ | nabhorūpaṁ | kāyavijñaptirūpaṁ (=saṁsthānarūpaṁ)|| sarvasya śrotravijñānasya viṣayaḥ śabdaḥ | sattvasaṁkhyātaḥ śabdaḥ asattvasaṁkhyātaḥ śabdaśca || sarvasya ghrāṇavijñānasya viṣayo gandhaḥ | surabhirasurabhiścetyādirgandhaḥ || sarvasya jihvāvijñānasya viṣayo rasaḥ | kaṣāyāmlalavaṇatiktamadhurādistrayaḥṣaṣṭividho rasaḥ || sarvasya kāyavijñānasya viṣayaḥ spraṣṭavyaṁ | ślakṣṇalaghugurukharamṛduśītoṣṇavubhukṣāpipāsācaturmahābhūtādiḥ || sarvamanovijñānasya viṣayo dharmaḥ | tathāhi sarvadharmāḥ ||

10 | paṁca vijñānāni na śaknuvanti vivektaṁ | manovijñānaṁ śaknoti vivektaṁ | cittaṁ mano vijñānamityanarthāntaraṁ | niruktāvevāntaram ||

11 | indriyaviṣayavijñānasaṁnipātajaḥ sparśaḥ | sparśasahajā vedanādyāḥ | daśa mahābhūmikāḥ daśakleśamahābhūmikāḥ daśa parittakleśabhūmikāḥ - ityete dharmā ekacittajā ekālaṁbanā ekakṣayā ekotpādā ekanirodhāḥ | tathāhi | pradīpaprakāśoṣmāṇa ekotpādā ekāśrayā ekanirodhāḥ ||

12 | aṣṭādaśasu kati kuśalāḥ katyakuśalāḥ katyavyākṛtāḥ | aṣṭāvavyākṛtāḥ | daśa vyākhyāsyāmaḥ | rūpaṁ śabdaḥ saptavijñānāni dharmaśca (iti daśa dhātavaḥ)kuśalā akuśalā avyākṛtāśca |

13 | katamat kuśalarūpaṁ | kuśala kāyavijñaptiḥ | katamadakuśalarūpaṁ | akuśalā kāyavijñaptiḥ | katamadavyākṛtaṁ rūpaṁ | payitvā kuśalākuśalakāyavijñaptī sarvamanyadrūpamavyākṛtaṁ || evaṁ gocaraḥ śabdaḥ ||

14 | cakṣurvijñānaṁ bhavati kuśalamakuśalamavyākṛtaṁ | katamatkuśalaṁ | kuśalacittasaṁprayuktaṁ cakṣurvijñānaṁ | katamadakuśalaṁ | akuśalacittasaṁprayuktaṁ cakṣurvijñānaṁ | katamadavyākṛtaṁ | avyākṛtacittasaṁprayuktaṁ cakṣurvijñānaṁ || evaṁ śrotra ghrāṇajihvākāyamanovijñānāni manaśca ||

15 | dharmaḥ kuśalo vā bhavatyakuśalo vā 'vyākṛto vā | katamaḥ kuśalaḥ | kuśalakāyavākkarmāṇi kuśalāḥ vedanāsaṁjñāsaṁskāraskandhāḥ pratisaṁkhyānirodhaśca | katamo'kuśalaḥ | akuśalakāyavākkarmāṇi akuśalā vedanāsaṁjñāsaṁskāraskandhāḥ || katamo'vyākṛtaḥ | avyākṛtavedanāsaṁjñāsaṁskāraskandhāḥ ākāśānāntyāyatanam apratisaṁkhyānirodhaśca ||

16 | aṣṭādaśasu kati sāsravāḥ katyanāsravāḥ | paṁcadaśa sāsravāḥ || trīn vyakhyāsyāmaḥ ||

17 | katame trayaḥ | manaḥ | dharmaḥ | manovijñānaṁ ca | sāsravacittasaṁprayuktaṁ manaḥ sāsravaṁ | anāsravacittasaṁprayuktaṁ mano'nāsravaṁ || manovijñānamapi tathā ||

18 | sāsravakāyavākkarmāṇi sāsravā vedanāsaṁjñāsaṁskāraskandhā iti sāsravo dharmaḥ | anāsravakāyavākkarmāṇi anāsravā vedanāsaṁjñāsaṁskāraskandhā asaṁskṛtadharmāścetyanāsravo dharmaḥ ||

19 | aṣṭādaśasu kati kāmadhātupratisaṁyuktāḥ | kati rūpadhātupratisaṁyuktāḥ | katyārūpyadhātupratisaṁyuktāḥ | katyapratisaṁyuktāḥ | catvāraḥ kāmadhātupratisaṁyuktāḥ | gandhaḥ | rasaḥ | ghrāṇavijñānaṁ | jihvāvijñānaṁ | kavalīkārāhārasthānatvāt || caturdaśa vyākhyāsyāmaḥ || cakṣuḥ kāmadhātupratisaṁyuktaṁ | katamatkāmadhātupratisaṁyuktaṁ | kāmadhātupratisaṁyuktacaturmahābhūtakṛtaṁ || evaṁ śrotraghrāṇajihvākāyarūpaśabdaspraṣṭavyāni kāmadhātupratisaṁyuktāni kāmadhātupratisaṁyuktacaturmahābhūtakṛtāni ||

20 | katame rūpadhātupratisaṁyuktāḥ | cakṣuḥ rūpadhātupratisaṁyuktaṁ rūpadhātupratisaṁyuktacaturmahābhūtakṛtaṁ || evaṁ śrotraghrāṇajihvākāyarūpaśabdaspraṣṭavyāni rūpadhātupratisaṁyuktāni rūpadhātupratisaṁyuktacaturmahābhūtakṛtāni ||

21 | cakṣurvijñānaṁ kāmadhātupratisaṁyuktaṁ | katamatkāmadhātupratisaṁyuktaṁ | kāmadhātucittasaṁyuktaṁ cakṣurvijñānaṁ || śrotrakāyavijñāne api tathā || katamadrūpadhātu pratisaṁyuktaṁ | rūpadhātucittasaṁprayuktaṁ cakṣurvijñānaṁ || śrotrakāy(avijñāne)api tathā ||

22 | manaḥ kāmadhātupratisaṁyuktaṁ | rūpārūpyadhātupratisaṁyuktaṁ | apratisaṁyuktaṁ vā bhavati | katamatkāmadhātupratisaṁyuktaṁ | kāmadhātucittasaṁprayuktaṁ manaḥ | katamadrūpadhātupratisaṁyuktaṁ | rūpadhātucittasaṁprayuktaṁ manaḥ | katamadārūpyadhātupratisaṁyuktaṁ | ārūpyadhātucittasaṁprayuktaṁ manaḥ | katamadapratisaṁyuktaṁ | anāsravacittasaṁprayuktaṁ manaḥ | manovijñānamapi tathā ||

23 | dharmaḥ kāmadhātupratisaṁyuktaḥ | rūpārūpyadhātupratisaṁyuktaḥ | apratisaṁyukto vā bhavati | (katamaḥ kāmadhātupratisaṁyuktaḥ)| kāmadhātupratisaṁyuktakāyavākkarmāṇi (kāmadhātupratisaṁyuktāḥ)vedanāsaṁjñāsaṁskāraskandhāśceti kāmadhātupratisaṁyukto dharmaḥ || katamo rūpadhātupratisaṁyukto (dharmaḥ)| rūpadhātupratisaṁyuktakāyavākkarmāṇi (rūpadhātupratisaṁyuktāḥ)vedanāsaṁjñāsaṁskāraskandhāśceti rūpadhātupratisaṁyukto dharmaḥ || katama ārūpyadhātupratisaṁyuktaḥ | ārūpyadhātu (pratisaṁyukta)- vedanāsaṁjñāsaṁskāraskandhāḥ - ityārūpyadhātupratisaṁyukto dharmaḥ || katamo'pratisaṁyuktaḥ | anāsravakāyavākkarmāṇi anāsravā vedanāsaṁjñāsaṁskāraskandhāḥ - ityapratisaṁyukto dharmaḥ ||

24 | aṣṭādaśasu katyadhyātmāyatanasaṁgṛhītāni | kati bāhyāyatanasaṁgṛhītāni || dvādaśādhyātmāyatanasaṁgṛhītāni | cakṣuḥ śrotraṁ ghrāṇaṁ jihvā kāyaḥ manaḥ cakṣurvijñānaṁ śrotra ghrāṇa jihvā kāya manovijñānaṁ || ṣaḍ bāhyāyatanasaṁgṛhītāni | rūpaṁ śabdaḥ gandhaḥ rasaḥ spraṣṭavyaṁ dharmāḥ ||

25 | (aṣṭādaśasu)kati savitarkāḥ savicārāḥ | kati savitarkā avicārāḥ | katyavitarkā avicārāḥ || daśa avitarkā avicārāḥ | paṁcendriyāṇi paṁca viṣayāśca || paṁca vijñānāni savitarka(sa)vicārāṇi || trīn vyākhyāsyāmaḥ || manaḥ savitarkaṁ savicāraṁ vā savitarkamavicāraṁ vā avitarkamavicāraṁ vā | katamatsavitarkaṁ savicāraṁ | kāmadhātu (-cittaṁ)ādidhyāna (-cittaṁ)bhavati savitarkaṁ savicāraṁ | madhyamadhyāna (cittaṁ)bhavati savitarkamavicāraṁ | caramabhūmikaṁ bhavatyavitarkamavicāraṁ || manobijñānamapi tathā || kāyavākkarmāṇi sarve viprayuktāḥ saṁskārāḥ asaṁskṛtaṁ cetyete dharmā avitarkā avicārāḥ | anye'vaśiṣṭā manovat ||

26 | (aṣṭādaśasu)kati sālaṁbanāḥ | katyanālaṁbanāḥ || sapta cittāni sālaṁbanāni | tatkasya hetoḥ | svaviṣayālaṁbanatvāt || daśa anālaṁbanāḥ | paṁcendriyāṇi paṁca viṣayāśca || dharmaṁ vyākhyāsyāmaḥ || kāyavākkarmāṇi sarve cittaviprayuktāḥ saṁskārāḥ asaṁskṛtaṁ ceti anālaṁbanā dharmāḥ | tadanye sālaṁbanāḥ ||

27 | aṣṭādaśasu katyupāttāḥ | kati niranupāttāḥ || nava (upattānupāttabhedena dvividhāḥ)| indriyeṇa saha pratyutpannā upāttāḥ | cittacaitasikadharmāṇāṁ sahabhāvāt | atītā anāgatā niranupāttāḥ | cittacaitasikadharmāṇāmasahabhāvāt || śabda saptavijñānāni dharmaśceti nava anupāttāḥ | cittacaitasikadharmāṇāmasahabhāvāt ||

28 | aṣṭādaśasu kati saṁskṛtāḥ | katyasaṁskṛtāḥ || saptadaśa saṁskṛtāḥ | dharmā vyākhyāsyamānāḥ saṁskṛtā va bhavanti | asaṁkṛtā vā || katame saṁskṛtāḥ | kāyavākkarmāṇi vedanāsaṁjñāsaṁskāraskandhā iti saṁskṛta(dharmāḥ)|| pratisaṁkhyānirodhaḥ apratisaṁkhyānirodhaḥ ākāśaṁ cetyasaṁskṛta (dharmāḥ)||

[ityabhidharmāmṛtaśāstre skandhāyatanadhātunirdeśo nāma paṁcamo binduḥ ||]

Ṣaṣṭho binduḥ

ṣaṣṭho binduḥ

saṁskārāḥ

1 | sarvasaṁskṛtadharmāḥ utpādavalahīnā anyapratyayabalena sahotpadyante | caturlakṣaṇā hi sarvadharmāḥ | (katamāni catvāri lakṣaṇāni)| jātiḥ sthitiḥ jarā anityatā ||

2 | caturlakṣaṇā ścedanyalakṣaṇā api bhavitavyāḥ | santi punar (anyāni)catvāri (anu-)lakṣaṇāni | teṣu lakṣaṇeṣu anyacaturlakṣaṇānāṁ sahotpādaḥ | (katamāni tāni)| jātijātiḥ sthitisthitiḥ jarājarā anityatā'nityatā || yadyevamanavasthā (-prasaṁgaḥ)| (na)| viparivartamānāḥ (saṁskṛtadharmāḥ)svalakṣaṇā (eva)bhavanti ||

3 | sarvasaṁskāradharmā dvividhāḥ | cittasaṁprayuktā ścittaviprayuktāḥ || katame cittasaṁprayuktāḥ | vedanā saṁjñā cetanā sparśaḥ manaskāraḥ chandaḥ adhimuktiḥ śraddhā vīryaṁ smṛtiḥ samādhiḥ matiḥ vitarkaḥ vicāraḥ mithyāsaṁskāraḥ(=mithyākṛtyaṁ =mithyākarma)amithyā saṁskāraḥ (=amithyākṛtyaṁ =samyakkarma)kuśalamūlaṁ akuśalamūlaṁ avyākṛtamūlaṁ sarvakleśabandhanasaṁyojanāni sarvaprajñā - ityevaṁ vividhāścittasaṁprayuktā dharmā ucyante cittasaṁprayuktasaṁskārāḥ ||

4 | katame cittaviprayuktāḥ saṁskārāḥ | prāptiḥ jātiḥ sthitiḥ jarā anityatā asaṁjñisamāpattiḥ nirodhasamāpattiḥ āsaṁjñikāyatanaṁ vividhā deśaprāptiḥ vastuprāptiḥ āyatanaprāptiḥ nāmakāyaḥ padakāyaḥ vyaṁjanakāyaḥ pṛthagjanatvam ityevaṁ vividhā dharmā ścittaviprayuktāḥ saṁskārāḥ ||

5 | (catvāraḥ pratyayāḥ)| hetupratyayaḥ samantarapratyayaḥ ālaṁbanapratyayaḥ adhipatipratyayaḥ | caturbhyaḥ pratyayebhyaḥ sarvasaṁskṛtadharmāṇāmutpādaḥ ||

6 | katamo hetupratyayaḥ | paṁca hetavaḥ | saṁprayuktaka(hetuḥ)sahabhū sabhāga sarvatraga vipākahetu ritihetupratyayaḥ || katamaḥ samanantarapratyayaḥ | sarvadharmeṣu cittacaitasikā dharmā niruddhā dharmā utpannā bhavanti samanantarapratyayāḥ || katama ālaṁbanapratyayaḥ | kṣaṇālaṁbano hi cittacaitasikadharmotpādaḥ | ityālaṁbanapratyayaḥ || katamo'dhipatipratyayaḥ | sarvāṇi sahasraśo vastūni parasparamavyābādhakāni | ityadhipatipratyayaḥ ||

7 | ṣaḍ hetavaḥ | saṁprayuktakahetuḥ sahabhū sabhāga sarvatraga vipāka kāraṇahetuḥ || katamaḥ saṁprayuktakahetuḥ | cittaṁ sarvacaitasikadharmahetuḥ sarvacaitasikaṁ dharmā ścittahetavaḥ | iti saṁprayuktakahetuḥ || katamaḥ sahabhūhetuḥ | sarvadharmā anyonyasahāyāḥ | cittaṁ sarvacaitasikadharmahetuḥ | sarvacaitasikadharmā ścittahetavaḥ | sahotpādāni catvāri mahābhūtāni sahabhūhetukāni | (caturmahābhūta)kṛtaṁ rūpaṁ (sahabhūhetukaṁ)| cittasaṁprayuktāḥ saṁskārāḥ cittacaittadharmāḥ cittaviprayuktāḥ saṁskārāḥ (sahabhū-)hetukāḥ || katamaḥ sabhāgahetuḥ | pūrvajātaṁ kuśalaṁ paccājjātasya kuśalasya (sabhāgahetuḥ)| pūrvajātamakuśalaṁ paścājjātasyākuśalasya (sabhāgahetuḥ)| pūrvajātamavyākṛtaṁ paścājjātasyāvyākṛtasya (sabhāgahetuḥ)|| katamaḥ sarvatragahetuḥ | satkāyadṛṣṭiḥ ātmavikalpo nitya ātmeti sarvopādānaskandheṣu asti nitya ātmā asti sukhaṁ asti śucitā - evamādi | iti sarvakleśotpādaḥ || katamo vipākahetuḥ | kuśalā jātiḥ sukho vipākaḥ | akuśalā jātiḥ duḥkho vipākaḥ || katamaḥ kāraṇahetuḥ | sarvadharmā anyonyamapratighātakā na ca sthāpakā na ca sthitikāḥ (pratyuta kṣaṇaṁ kṣaṇaṁ viparivartamānā bhavanti kāraṇahetavaḥ)||

8 | vipākacittarūpa bhavanti paṁca hetavaḥ vinā sarvatragahetuṁ | evaṁ caittāḥ sarvakleśāḥ paṁcahetukā vyapahāya vipākahetuṁ | vipākajarūpasya viprayuktasaṁskārāṇāṁ bhavanti catvāro hetavaḥ | sthāpayitvā saṁprayuktahetu sarvatragahetuṁ | kliṣṭarūpasya viprayuktasaṁskārāṇāṁ catvāro hetavaḥ antareṇa saṁprayuktakahetuṁ vipākahetuṁ | anye'vaśiṣṭā ścittacaitasikadharmā ścaturhetukāḥ vinā vipākahetuṁ sarvatragahetuṁ | avaśiṣṭānāmapareṣāṁ cittaviprayuktasaṁskārāṇāṁ dvau hetu trayo vā hetavaḥ vinā saṁprayuktasarvatraga-vipākahetūn sabhāgāpūrvahetyognyataraṁ vinā vā | anāsravacittasaṁprayuktānāṁ dharmāṇāṁ bhavanti trayo hetavaḥ | vihāya sabhāgahetu vipākahetuṁ sarvatragahetuṁ | anāsravacittasya taccittajarūpasya taccitaviprayuktasaṁskārāṇāṁ dvau hetu sahabhūhetuḥ kāraṇaheścatu ||

9 | cittacaitasikadharmāṇāṁ catubhyaḥ pratyayebhya utpādaḥ | āsaṁjñikasamāpatternirodhasamāpatteśca tribhyaḥ pratyayebhya utpādo'ntareṇālaṁbanapratyayena | cittaviprayuktasaṁskārāṇāṁ sarvarūpidharmāṇāṁ ca dvābhyāṁ pratyayābhyāmutpādaḥ vinā samanantarapratyayamālaṁbanapratyayaṁ ca | na hi kasyaciddharmasya (kevalāt)ekasmāt pratyayād utpādaḥ | anyadharmabalād (hi bhavati)utpādaḥ ||

10 | eko dharmaḥ trikasaṁnipātajaḥ sparśaḥ | (tena)saha jāyate vedanā || saṁjñā cetanā manaskāraḥ chandaḥ adhimuktiḥ śraddhā vīryaṁ smṛtiḥ samādhiḥ prajñā upekṣā ca cittasahotthānāḥ saha cittena saṁsiddhyante | ityete dharmāḥ (sarva)cittasādhāraṇāḥ ||

11 | tridharmasaṁnipātajaḥ sparśaḥ | kāyacittānubhavo vedanā | vijñāna viśeṣālaṁbanā saṁjñā | (mānasaṁ)karma cetanā | cittāvismaraṇaṁ manaskāraḥ | kartukāmyatā cchandaḥ | cittānāvaraṇamadhimuktiḥ | (śraddhānaṁ)śraddhā | vividhakṛtyodyogo vīryam | pratyayadṛḍhatayā'vismaraṇaṁ smṛtiḥ | cittasyācāṁcalyaṁ samādhiḥ | dharmavivekaḥ prajñā | manaso'nāsaṁga upekṣā | (sā hi)vastupratyayotthānā bhavati ||

12 | cittadharmasaṁprayogeṇa bhavati sarvadharmasiddhiḥ | vedanā saṁjñā sparśaḥ cetanā manaskāraḥ chandaḥ adhimuktiḥ smṛtiḥ samādhiḥ prajñā-ityete daśa mahābhūmikā dharmāḥ | tatkasya hetoḥ | sarvacittasahotpādāt ||

13 | katamaḥ saṁprayogaḥ | ekālaṁbane saṁskaraṇaṁ nopacayo nāpacaya iti saṁprayogaḥ ||

14 | daśa kleśamahābhūmikāḥ sarvākuśalacittasahajāḥ - āśraddhyaṁ kausīdyaṁ muṣitasmṛtitā cittavikṣepaḥ mohaḥ mithyāmanaskāraḥ mithyādhimuktiḥ auddhatyaṁ avidyā mithyāsaṁskāraḥ (=mithyākṛtyaṁ =mithyākarma )||

15 | katamadāśraddhyaṁ | citasya dharme'navatāraḥ || katamat kausīdyaṁ | kṛtyeṣu cittapariśrāntiḥ || katamā muṣitasmṛtitā | vismaraṇaṁ || katamaścittavikṣepaḥ | cittasyaikāgratā'bhāvaḥ || katamo mohaḥ | vastuṣvanavabodhaḥ || katamo mithyāmanaskāraḥ | mārgasyāsmaraṇaṁ || katamā mithyādhimuktiḥ | viparyāsāparityāgaḥ || katamadauddhatyaṁ | cittāsthairyaṁ || katamā avidyā | traidhātukamajñānaṁ || katamo mithyāsaṁskāraḥ (=mithyākṛtyaṁ =mithyā karma )| kuśaladharmeṣvanavasthitiḥ ||

16 | daśa parittakleśabhūmikāḥ | dveṣaḥ upanāhaḥ mrakṣaḥ pradāśaḥ māyā śāṭhyaṁ mātsaryaṁ īrṣyāṁ mānaḥ mahāmānaḥ ||

17 | katamo dveṣaḥ | krodhena cittacalatā || katama upanāhaḥ | manaso viṣaktā (=vairānubandhinī)sthitiḥ || katamo mrakṣaḥ | pāpavastugopanaṁ || katamaḥ pradāśaḥ | adharmavastugrahaṇe tvarā na ca parityāgaḥ || katamā māyā kāyavacanābhyāṁ janavaṁcanaṁ || katamat śāṭhyaṁ | cetasaḥ kuṭilāgrahaḥ || katamad mātsaryaṁ | cittasya snehabhayād (dānakarmaṇi)apravṛttiḥ || katamā īrṣyā | parasaṁpaddarśanādasahiṣṇutā || katamo mānaḥ | adhameṣvātmotkarṣaḥ | utkṛṣṭeṣvātmasamatā || katamo mahāmānaḥ  | sameṣu mahānahamiti | mahatsu jyeṣṭho'hamiti || etā daśa kleśabhūmayo manovijñānasaṁprayuktā na tu paṁcavijñāna (-saṁprayuktāḥ)bhavantīti parittabhūmayaḥ ||

18 | eteṣu sapta kleśāḥ kāmadhātupratisaṁyuktāḥ | śāṭhyaṁ kāmadhātu (-pratisaṁyuktaṁ)brahmaloka (-pratisaṁyuktaṁ)ca | mānamahāmānau tridhātupratisaṁyuktau ||

19 | daśa kuśalamahābhūmikāḥ | alobhaḥ adveṣaḥ śraddhā praśrabdhiḥ apramādaḥ vīryaṁ upekṣā avihiṁsā hrīḥ apatrapā ||

20 | katamo'lobhaḥ | svaparakāyasaṁpattāvarāgo'svārthaśca || katamo'dveṣaḥ | sattvapakṣāsattvapakṣayoravyāpādacittotpādaḥ || katamā śraddhā | jñāte yathābhūtavastuni cittasaṁprasādaḥ || katamā praśrabdhiḥ | cittakuśalatā dauṣṭhulya- (=gurutva =styānamiddha)parityāgena (cittasya)laghubhūtatā śītībhūtatā || katamo'pramādaḥ | cittasya kuśaladharmapratisaṁyogaḥ || katamad vīryaṁ | kuśaladharmotsāhaḥ || katamā upekṣā | sarvadharmeṣvapratiṣṭhā || katamā avihiṁsā | sarvasattveṣu kāyavāgmanobhiranapakāraḥ || katamā hrīḥ | ātmakṛtapāpakṛtye lajjā || katamā apatrapā | lokeṣu akaraṇīyakaraṇe (lajjanā)apatrapā || ityete daśadharmāḥ sarvakuśalacittasaṁprayuktā bhavantītyucyante mahābhūmikāḥ ||

21 | trīṇyāyatanāni | rāgāyatanaṁ arāgāyatanaṁ rāgārāgāyatanaṁ ca || rāgāyatane maithunakāmaḥ mātsaryaṁ lobhaḥ tṛṣṇā - ityevamādikleśānāmutpādaḥ | arāgāyatane dveṣakalaherṣyādīnāṁ kleśānāmutpādaḥ | rāgārāgāyatane'vidyāmāhamadamānādayaḥ kleśā utpadyante ||

22 | sarvasaṁyojanakleśānāṁ triṣu viṣeṣu saṁgrahaḥ | tatkasya hetoḥ | teṣāṁ trayāṇāmakuśalamūlatvāt | sarvasaṁyojanakleśānāṁ tribhiretairviṣairutpādaḥ | etāni chindanti trīṇi kuśalamūlāni kleśāya vikṣepāya prabhavanti traidhātukānāṁ sattvānāmiti triviṣa - saṁgrahaḥ ||

[ityabhidharmāmṛtaśāstre saṁskāranirdeśo nāma ṣaṣṭho binduḥ ||]

Saptamo binduḥ

saptamo binduḥ

pratītyasamutpādaḥ

1 | dvādaśa pratyayāḥ | avidyā saṁskārāḥ vijñānaṁ nāmarūpaṁ ṣaḍāyatanaṁ sparśaḥ vedanā tṛṣṇā upādānaṁ bhavaḥ jātiḥ jarāmaraṇaṁ ||

2 | ete dvādaśa pratyayā strividhā bhavanti | kleśaḥ karma duḥkhaṁ ca || kleśa strividhaḥ | avidyā tṛṣṇā upādānaṁ ca || dvividhaṁ karma | saṁskārāḥ bhavaśca || saptavidhaṁ duḥkhaṁ | vijñānaṁ nāmarūpaṁ ṣaḍāyatanaṁ sparśaḥ vedanā jātirjarāmaraṇaṁ ca || dvau (pratyayau)atītasaṁgṛhītau | dvau (pratyayau)anāgatasaṁgṛhītau | aṣṭau (pratyayāḥ)pratyutpannasaṁgṛhītāḥ ||

3 | kleśa karmahetuḥ | karma duḥkhahetuḥ | duḥkhaṁ kleśahetuḥ | kleśaḥ kleśahetuḥ | kleśaḥ karmahetuḥ | karma duḥkhahetuḥ | duḥkhaṁ duḥkhahetuḥ | ityevaṁ krameṇotpādaḥ ||

4 | atītāvidyāsahakṛtasarvakleśasaṁprayuktā bhavatyavidyā || etāṁ pratītya kriyate karma | karmakaraṇād bhavati lokaphalaṁ | ityucyate saṁskāraḥ || etān saṁskārān pratītya saṁkliṣṭaṁ cittaṁ labhate kāyendriyavijñānāni | tathāhi | vatsaḥ vijānāti mātaraṁ | iti vijñānaṁ || etadvijñānasahajāścatvāro'rūpiskaṁdhāḥ (tat-)saṁtānajaṁ cāpi rūpam - iti nāmarūpaṁ || cakṣurādīndriyagocarāśrayaṁ bhavati ṣaḍāyatanaṁ || indriyaviṣayavijñānānāṁ saṁnipātād bhavati sparśaḥ || sparśājjāyate vedanā - iti vedanā || vedanāsaṁgena bhavati tṛṣṇā || tṛṣṇāyāḥ kleśeṇodyama ityupādānaṁ || udyamena karoti karmeti bhavaḥ || anāgataphalamucyate jātiḥ || jātirutpādayati duḥkhamaparimeyamiti jarāmaraṇaṁ ||

5 | punaḥ khalu na jānātyavidyā catvāri satyāni | adhyātmabahirdhā dharmān atītānāgatapratyutpannabuddhadharmān sarvahetupratyayān evaṁbhūtān vividhān satyadharmān na jānātītyucyate'vidyā ||

6 | mūḍhaḥ pudgala ścarati trividhāṁ caryāṁ | śubhacaryāṁ aśubhacaryāṁ akṣobhyacaryāṁ || katamā śubhācaryā | yayā prāpyate kuśalaphalaṁ || katamā aśubhacaryā | yayā prāpyate'kuśalaphalaṁ || katamā akṣobhyacaryā | rūpārūpadhātūpapattiḥ ||

7 | punaḥ khalu dānaṁ śīlaṁ dhyānaṁ (nāma śubhacaryā)|| dānaṁ katamat | dānaṁ dvividhaṁ | prathamamāmiṣadānaṁ dvitīyaṁ dharmadānaṁ || paṁcavidhaṁ śīlagrahaṇaṁ | gṛhṇāti cec chīlaṁ yāvadantaṁ | vyavadānayatyakuśalacittamalam | sarvadā smṛtaḥ,saṁprajanyaḥ,na gaveṣayanti lokaphalam || dhyānaṁ (nāma)aśucibhāvanā ānāpānādismṛtiḥ sarvasāsravakuśalasamādhidharmāḥ || iti śubhacaryā ||

8 | aśubhacaryā (punaḥ)katamā | trīṇyakuśalamūlāni daśakuśalakarmapathādayo vividhāni pāpānītyucyate'śubhacaryā ||

akṣobhyācaryā (punaḥ)katamā | prathamadhyānād yāvat naiva saṁjñānāsaṁjñā(yatana)samādhirityucyate'kṣobhyacaryā ||

9 | traihetukasāsravavijñānamupādāya prathamād yāvat saptamaṁ bhavam - ityucyate vijñānaṁ | vijñānād bhavati nāmarūpaṁ | vedanāsaṁjñāsaṁskāravijñānaskaṁdhā iti nāma | catvāri mahābhūtāni tatkṛtaṁ rūpaṁ ceti rūpaṁ | nāmarūpājjāyate ṣaḍāyatanaṁ | ṣaḍāyatanājjāyate sparśaḥ | sparśaḥ ṣaḍvidhaḥ kāyotthapratigha-mānasotthādhivacana (-bhedena)dviprakāraḥ | ṣaḍvijñānavikalpahetoḥ ṣaḍvidhaḥ sparśaḥ ||

Aṣṭamo binduḥ

aṣṭamo binduḥ

pariśuddhendriyāṇi

1 | rāgadveṣamohaiścittasaṁprayogo nāma kleśaḥ sa ucyate saṁyojanaṁ | (tat-)parihātukāmasya (trividhaṁ bhavati prahāṇaṁ)| viṣkaṁbhaṇa(-prahāṇaṁ)| (tadaṁga-)prahāṇaṁ | prajñayā samuccheda (-prahāṇaṁ)ca || viṣkaṁbhaṇa (-prahāṇaṁ)katamat | aprāpte'nāsravacitte śīlagrahaṇabhāvanabhyāṁ sthāpayati rāgadveṣamohān cittaṁ bhavatyanupādānamiti viṣkaṁbhaṇa (prahāṇaṁ)|| (tadaṁga)prahāṇaṁ katamat | prāpya dhyānasamādhiṁ parityajati kāmaduścaritamakuśaladharmāṁśceti (tadaṁga)prahāṇaṁ || prajñayā samucchedaprahāṇaṁ katamat | prabuddhamate duḥkhamālaṁbya bhāvayataḥ (kleśa)samuccheda iti (prajñayā)samuccheda(prahāṇaṁ)| yathā viṣkaṁbhaṇa(kāle)yathā vā (tadaṁga)prahāṇakale (cittasya)viśuddhirnāpi vā viśuddhiḥ (na tathā samucchedaprahāṇakāle)| anāsravaprajñayā prahāṇaṁ tu viśuddhireva ||

2 | dvāviṁśatirindriyāṇi | (tatra)bāhyāyatanāni (ṣoḍaśa)| puruṣendriyaṁ strī jīvita duḥkha sukha daurmanasya saumanasya upekṣā śraddhā smṛti samādhi prajñā ājñāsyāmi ājñā ājñātāvīndriyaṁ | adhyātmikāni ṣaḍindriyāṇi yathā pūrvamuktāni || puṁlakṣaṇaṁ puruṣavijñānamiti puruṣendriyaṁ | strīlakṣaṇaṁ strīvijñānamiti strīndriyaṁ | traidhātukajīvanalakṣaṇamiti jīvitendriyaṁ | paṁca vijñānasaṁyuktā sukhā vedaneti sukhendriyaṁ | paṁcavijñānasaṁprayuktā duḥkhā vedaneti duḥkhandriyaṁ | manovijñānasaṁprayuktā sukhā vedaneti saumanasyendriyaṁ | manovijñānasaṁprayuktā duḥkhā vedaneti daurmanasyendriyaṁ | ṣaḍvijñānasaṁprayuktā aduḥkhā'sukhā vedanetyupekṣendriyaṁ | sarvakuśaladharmeṣu śraddhānamiti śraddhendriyaṁ | evaṁ vīrya-smṛti-samādhi-prajñendriyāṇi | dṛḍhaśraddhādṛḍhadharmamārgasaṁgrāhakāṇi anāsravāṇi navendriyāṇītyājñāsyāmīndriyaṁ | śraddhāvimokṣadarśanamārgasaṁgrāhakāṇi anāsravāṇi navendriyāṇītyājñendriyaṁ | aśaikṣamārgasaṁgrāhakāṇi anāsravanavendriyāṇi ājñātāvīndriyaṁ ||

3 | indriyārthaḥ katamaḥ | balavattvaṁ paṭutvaṁ ceti indriyārthaḥ | ṣaḍupalabdhipuruṣastrījīvitendriyāṇi nava lokadhātau balavanti paṭūni ca | paṁca vedanendriyāṇi (sukhaṁ saumanasyaṁ duḥkhaṁ daurmanasyamupekṣā ceti)kleśotpāde balavanti paṭūni ca | śraddhādipaṁcendriyāṇi kuśaladharmeṣu balavanti paṭūni ca | trīṇyanāsravāṇīndriyāṇi (ājñāsyāmi-ājñā-ājñātāvī ceti)mārgaprāptihetutvānmārge balavanti paṭūni ca | sarvendriyāṇāṁ pṛthakpṛthak svaṁ balaṁ bhavati pāṭavaṁ ca ||

4 | dvāviṁśatīndriyeṣu kati kāmadhātupratisaṁyuktāni kati rūpārūpyadhātupratisaṁyuktāni katyapratisaṁyuktāni || catvārīndriyāṇi kāmadhātu pratisaṁyuktāni | puruṣastrīduḥkhadaurmanasyendriyāṇi || paṁcendriyāṇi kāmarūpadhātupratisaṁyuktāni | cakṣuḥśrotraghrāṇajihvākāyendriyāṇi || sāsrave sukhasaumanasyendriye kāmarūpadhātupratisaṁyukte || sāsravāṇi upekṣāmanojīvitendriyāṇi śraddhādīni ca paṁcendriyāṇi sakalatridhātupratisaṁyuktāni | anāsravāṇi mana indriyamupekṣendriyaṁ sukhasaumanasyendriye śraddhādīni paṁcendriyāṇi apratisaṁyuktāni | etāni navendriyāṇi tribhiranāsravendriyaiḥ ājñāsyāmīndriyājñendriyājñātāvīndriyaiḥ sahādhiṣṭhānāni ||

5 | dvāviṁśatīndriyeṣu katyupāttāni katyanupāttāni | sukhādipaṁcendriyāṇi śraddhādipaṁcendriyāṇi mana indriyaṁ trīṇyanāsravendriyāṇi ca bhavantyanupāttāni | avaśiṣṭānyanyānīndriyāṇi bhavanti upāttāni vā anupāttāni vā ||

6 | dvāviṁśatīndriyeṣu kati kuśalāni katyakuśalāni katyavyākṛtāni | aṣṭāvindriyāṇi kuśalāni śraddhādīni paṁca trīṇi cānāsravāṇi | aṣṭāvavyākṛtāni cakṣurādipaṁcendriyāṇi puruṣastrījīvitendriyāṇi ca | ṣaṣṭhaṁ (mana indriyaṁ)vivekṣyamāṇaṁ | mana indriyaṁ sukhādīni paṁca vedanendriyāṇi bhavanti kuśalāni vā akuśalāni vā avyākṛtāni vā ||

7 | dvāviṁśatīndriyeṣu kati sāsravāṇi katyanāsravāṇi | śraddhādīni paṁca sukhaṁ saumanasyamupekṣā manaśca bhavanti sāsravāṇi vā anāsravāṇi vā | paścimāni trīṇyekadhānāsravāṇyeva | daśendriyāṇi sāsravāṇi cakṣuḥ śrotraṁ ghrāṇaṁ jihvā kāyaḥ puruṣaḥ strī jīvitaṁ daurmanasyaṁ duḥkhaṁ ceti ||

8 | triyonijātiḥ pratilabhate dve indriye kāyendriyaṁ jīvitendriyaṁ ca | aupapādukajāteḥ ṣaṭ sapta aṣṭau vā (indriyāṇi | tathāhi |)aliṁgānāṁ ṣaṭ | ekaliṁgānāṁ sapta | dviliṁgānāmaṣṭau cakṣurādīni paṁca jīvitastrīpuruṣendriyāṇi ca | avaśiṣṭānāmindriyāṇāṁ krameṇa pratilābhaḥ | rūpadhātau prathamaṁ ṣaḍindriyāṇāṁ pratilābhaḥ paṁcānāṁ vedanendriyāṇāṁ jīvitendriyasya ca | arūpadhātau prathamaṁ kevalasya jīvitendriyasya pratilābhaḥ || kāmadhātau avyākṛtacittasya (pudgalasya)kramamṛtyau (indriyāṇi nirudhyante)catvāri | aṣṭau vā | nava vā | daśa vā || akuśalacittasya mṛtyau nava | trayodaśa vā | caturdaśa vā | paṁcadaśa vā ||

9 | dvāviṁśatīndriyeṣu kati satyadarśanaheyāni kati bhāvanāheyāni katyaheyāni | catvāri indriyāṇi satyadarśanaheyāni vā bhāvanāheyāni vā aheyāni vā (katamāni catvāri |)manaḥsukhasaumanasyopekṣendriyāṇi | daurmanasyendriyaṁ satyadarśanaheyaṁ vā bhāvanāheyaṁ vā | śraddhādīni paṁcendriyāṇi bhāvanāheyāni vā aheyāni vā | trīṇyanāsravendriyāṇi aheyāni | avaśiṣṭānīndriyāṇi bhāvanāheyāni ||

[ityabhidharmāmṛtaśāstre pariśuddhendriyanirdeśo nāmāṣṭamo binduḥ ||]

Navamo binduḥ

navamo binduḥ

anuśayāḥ

1 | aṣṭānavatiranuśayāḥ dvidhā prahīyante | satyadarśanena prahīyante bhāvanayā ca prahīyante | aṣṭāviṁśatirduḥkhadarśanena prahīyante | ekonaviṁśatiḥ samudayadarśanena prahīyante | ekonaviṁśatirnirodhadarśanena prahīyante | dvāviṁśatirmārgadarśanena prahīyante | daśa bhāvanayā prahīyante ||

2 | kāmadhātupratisaṁyuktāḥ duḥkhadarśanena prahīyante daśa anuśayāḥ | samudayadarśanena prahīyante sapta anuśayāḥ | nirodhadarśanena prahīyante sapta anuśayāḥ | mārgadaśanena prahīyante aṣṭau anuśayāḥ | bhāvanayā prahīyante catvāraḥ anuśayāḥ | iti ṣaṭtriṁśatkāmadhātupratisaṁyuktāḥ ||

3 | pratighavarjitā anye'nuśayāḥ rūpārūpyadhātvoḥ pṛthakpṛthag heyāḥ ekatriṁśat ||

4 | saṁkṣepād vastuto daśānuśayāḥ | satkāyadṛṣṭiḥ antagrāhadṛṣṭiḥ mithyādṛṣṭiḥ dṛṣṭiparāmarśaḥ śīlavrataparāmarśaḥ vicikitsā pratighaḥ mānaḥ avidyā ||

5 | satkāyadṛṣṭiḥ katamā | paṁcaskandheṣu vikalpayatyātmānamityevaṁ dṛṣṭirucyate satkāyadṛṣṭiḥ | lokasyāsti antaḥ nāsti antaḥ - ityevaṁ dṛṣṭirucyate antagrāhadṛṣṭiḥ |

nāsti catuḥsatyāni hetupratyayāḥ phalavipāka ityevaṁ dṛṣṭirucyate mithyādṛṣṭiḥ | sāsravadharmeṣu vikalpayati satatamagratām ityevaṁ dṛṣṭirucyate dṛṣṭiparāmarśaḥ | aśucihetupratyayeṣu gaveṣayati pariśuddhamārgamityevaṁ dṛṣṭirucyate śīlavrataparāmarśaḥ ||

6 | aprāptamārgasya mūḍhacittasya yadanavabodhaḥ 'asti-nāsti''bhavati-nabhavati'- iti vicikitsā | mūḍhacittasya sarvadharmeṣu kāmāsaṁgo rāgaḥ | mūḍhacitte'niṣṭamāgataṁ prati cittakrodhena saṁkṣobhaḥ pratighaḥ | ahaṁ mahāniti cittasyonnatirmānaḥ | sarvadharmāḥ satyalakṣaṇā ityajñānam avidyā ||

7 | etāni saṁyojanāni kāmadhātau duḥkhasatyena (heyāni)sarvāṇi | samudayasatyena sapta | nirodhasatyenāpi tathā | mārgasatyenāṣṭau | (iti)sarvāṇi saṁyojanāni satyadarśaheyāni ||

8 | kāmadhātau catvāri bhāvanāheyāni | rūpārūpyadhātoḥ ṣaḍ bhāvanāheyāni | rāgo dveṣaḥ māno'vidyā ca paṁcākāraheyāḥ | vicikitsā mithyādṛṣṭiḥ dṛṣṭiparāmarśaśca catuḥsatyaheyāḥ | satkāyadṛṣṭyantagrāhadṛṣṭī duḥkhasatyaheye | śīlavrataparāmarśaḥ duḥkhasatyamārgasatyaheyaḥ ||

9 | kāmadhātau duḥkhasatyaheyāni ṣaḍ paṁca vā saṁyojanāni | samudayasatyaheyāni trīṇi dve vā saṁyojane ||

10 | avidyā dvividyā duḥkhasatyaheyā ||

11 | avidyā sarvatragā vā bhavati asarvatragā vā | savatragā katamā | ṣaṭsaṁyojanasaṁprayuktā āveṇikī cāvidyocyate sarvatragā | asarvatragā katamā | trisaṁyojanasaṁprayuktā avidyā ucyate asarvatragā || evaṁ samudaye trisaṁyojanasaṁprayuktā āveṇikī cāvidyā ucyate sarvatragā ||

12 | śiṣṭānyanyāni saṁyojanāni na sarvatragāṇi (eva)| sarvasaṁyojaneṣu rāgadveṣamānetarāṇi sarvatragāṇi | tatkasya hetoḥ | teṣāṁ paṁcālaṁbana(heya)tvāt | sarvatrageṣu saṁyojaneṣu dve dṛṣṭī tatsaṁprayuktā cāvidyā svadhātau sarvatragāḥ nānyadhātau | rūpadhātāvapyevaṁ | ārūpyadhātau sarvatragāṇi saṁyojanāni svadhātau sarvatragāṇi | śiṣṭasarvatragasaṁyojanāni svadhātau sarvatragāṇyapi paradhātugocarāṇi bhavanti | avidyā sarvasaṁyojanasaṁprayuktā hetuḥ āveṇikī cāvidyā ||

13 | triṣu dhātuṣu nirodhasatyamārgasatyābhyāṁ praheyāḥ (anuśayāḥ)mithyā dṛṣṭiḥ vicikitsā avidyā ceti aṣṭādaśasaṁyojanāni anāsravagocarāṇi | anyāni sāsravagocarāṇi | sarvasāsravagocarāṇi saṁyojanāni tatsaṁprayuktā cāvidyā sāsravagocarāṇi | śiṣṭāni (saṁyojanāni tatsaṁprayuktā ca)avidyā anāsravagocarāṇi ||

14 | sarvāṇi tridhātusaṁyojanāni upekṣendriyasaṁprayuktāni | brahmalokābhāsvaralokeṣu sarvasaṁyojanāni upekṣendriyeṇa saṁprayuktāni saumanasyendriyeṇa ca | śubhakṛtsnaloke sarvasaṁyojanāni upekṣendriyeṇa sukhendriyeṇa ca saṁprayuktāni | kāmadhātupratisaṁyukte mithyādṛṣṭiravidyā ca tribhirindriyaiḥ saṁprayukte saumanasyendriyeṇa daurmanasyendriyeṇa upekṣendriyeṇa ca | vicikitsā dvābhyāmindriyābhyāṁ saṁprayuktā daurmanasyendriyeṇa upekṣendriyeṇa ca | pratighaḥ tribhirindriyaiḥ saṁprayuktaḥ daurmanasyendriyeṇa duḥkhendriyeṇa upekṣendriyeṇa ca | śiṣṭāni kāmadhātau satyadarśanaheyāni (saṁyojanāni)dvābhyāmindriyābhyāṁ saṁprayuktāni saumanasyendriyeṇa upekṣendriyeṇa ca ||

15 | kāmadhātau bhāvanāheyāni ṣaḍvijñānasaṁprayuktāni bhavanti sthāpayitvā mānaṁ manovijñānasaṁprayuktaṁ | sarvāṇi satyadarśanaheyāni manovijñānasaṁprayuktāni ||

16 | daśopakleśā ucyante bandhanāni | krodhaḥ | mrakṣaḥ | styānaṁ | middhaṁ | auddhatyaṁ | kaukṛtyaṁ | mātsaryaṁ | īrṣyā | āhrīkyaṁ | anapatrāpyaṁ ||

17 | krodhaḥ katamaḥ | cittadoṣo bhṛśaṁ kṣobhaḥ | mrakṣaḥ katamaḥ | bhayaṁ lokaḥ paśyet śrṛṇuyād (veti)|| styānaṁ katamat | cittalīnatā cittagurutā kāyagurutā | (idaṁ bhavati)sarvasaṁyojanasaṁprayuktaṁ || middhaṁ katamat | manaso nidrāyoge bahirdhā (vṛttiḥ)tandrayānīśvaratā | (idaṁ bhavati)kāmadhātupratisaṁyuktaṁ manovijñānasaṁprayuktaṁ || auddhatyaṁ katamat | cittamakuśalamaviśrāntaṁ | (idaṁ bhavati)sarvasaṁyojanasaṁprayuktaṁ || kaukṛtyaṁ katamat | kṛtakuśalākuśalayoranuśocanaṁ | (idaṁ bhavati)daumanasyendriyeṇa saṁprayuktaṁ || mātsaryaṁ katamat | premṇātiśayena cittakārpaṇyaṁ || īrṣyā katamā | paraṁ sadvastulābhinaṁ dṛṣṭvā aprasādaḥ duḥkhasya prāpayitukāmatā || ete dve (īrṣyāmātsarya-)bandhane kāmadhātupratisaṁyukte bhāvanāheye || āhrīkyaṁ katamat | duṣkṛte nātmani lajjā || anapatrāpyaṁ katamat | duṣkṛte na parato lajjā || ete sarvākuśaladharmasaṁprayukte ||

18 | trīṇi bandhanāni | rāgo dveṣomohaśca | (kāmadhātau)ṣaḍvijñānasaṁprayuktāni | rūpadhātau dve | rāgo mohaśca | caturvijñānasaṁprayukte | avaśiṣṭaṁ bandhanaṁ manovijñānasaṁprayuktaṁ ||

19 | yugapadānantaryamārgeṇa saṁyojanaprahāṇakṛtābhisamayakāle gurukṛtābhisamayena prahāṇāt kāmadhātusaṁyojanānāṁ trividhakṣayaparijñālābhaḥ ||

20 | kāmadhātau duḥkhasatyasamudayasatyapraheyānāṁ (kleśānāṁ prahāṇaṁ)prathamā kṣayaparijñā | nirodhasatyapraheyānāṁ dvitīyā kṣayaparijñā | mārgasatyapraheyānāṁ tṛtīyā kṣayaparijñā | (evaṁ)rūpārūpyadhātvoḥ catuḥsatyapraheyānāṁ saṁyojanānāṁ prahāṇe tisraḥ kṣayaparijñāḥ | kāmadhātau paṁcāvarabhāgīyānāṁ saṁyojanānāṁ prahāṇaṁ saptamī kṣayaparijñā | rūpadhātau bhāvanāheyānāṁ (kleśānāṁ prahāṇaṁ)aṣṭamī kṣayaparijñā | sarvakleśasaṁyojanānāṁ prahāṇaṁ navamī parijñā | saṁyojanānāmaśeṣataḥ parikṣayaḥ parijñā ||

21 | astyevaṁ saṁyojanāni cittaviprayuktāni paryavatiṣṭhante cittasaṁprayuktāni (ca)| nāstyevaṁ | sarvāṇi cittasaṁprayuktānyeva (paryavatiṣṭhante)| tatkasya hetoḥ | samutthiteṣu saṁyojanakleśeṣu kuśaladharmāṇāṁ bhavati nāśaḥ | darśanena (niruddheṣu)saṁyojaneṣu kuśaladharmāṇāṁ bhavatyutpāda stasmād jñātavyaṁ sarvāṇi saṁyojanāni cittasaṁprayuktāni (paryavatiṣṭhante iti)||

22 | sarvāṇyetāni saṁyojanāni dvivastuheyāni dhyānasaṁprayuktacitta na prajñāsaṁprayuktacittena ca | dhyānaprahāṇaṁ katamat | ādyaścittopaśamaḥ | prajñāprahāṇaṁ katamat | dharmavicayaḥ | samādhyavatāra ekāgracittatā | sarvadharmā anityāḥ samā iti vipaśyanayā bhāvanā prajñā | dhyānaprajñāsahacarabhāvanayā vimokṣaprāptiḥ ||

23 | trikālaṁ kuśalavīryeṇa dhyānakālānurakṣiṇā yadā cittaṁ mṛdurbhavati vilīnaṁ tadā bhāvanīyaṁ vīryaṁ | yadā cittaṁ samaṁ tadā ekāgracittena bhāvanīyaṁ kuśalaṁ | yadā na vilīnaṁ nāpi samaṁ tadobhayavastuni viśramayitavyā cittagatiḥ ||

24 | tathāhi | suvarṇakāraḥ suvarṇamādāyāgnau mūpayā kadāciddhamati | kadācidādāya jalaṁ siṁcati | kadācidviśramayati | tatkasya hetoḥ | yadi sarvadā dhamet suvarṇaṁ dravet | yadi sarvadā siṁcet śītalaṁ sanna tapet | yadi sarvadā viśramayet na paripākaṁ gacchet | dhyānaniṣṭho'pyevam | mūpayā dhamanaṁ yathā vāryaṁ | jalaseko yathā dhyānaṁ | viśrama yathā upekṣā | tatkasya hetoḥ | sarvadā vīryeṇa cittaṁ samaṁ bhavati | sarvadā samādhinā cittanupaśāntaṁ bhavati | sarvadopekṣayā sarvacittānupādānaṁ bhavati | tena kadācidātāpena vīryavān kadācidekāgraṁ samāhitaḥ kadāciccopekṣamāṇo (viharati)evaṁ (viharataḥ)cittaṁ śāntaṁ samaṁ sarvasaṁyojaneṣu labhate vimokṣam ||

[ityabhidharmāmṛtaśāstre'nuśayanirdeśo nāma navamo vinduḥ ||]

Daśamo binduḥ

daśamo binduḥ

anāsravapudgalāḥ

1 | dhyānavidhiṣu paurviko bhavati cittasyaikāyatanapratisaṁyogaḥ | śīrṣe vā lalāṭe vā bhruvorantare vā nāsāgre vā hṛdaye vā cittamekāśrayaniṣṭhaṁ vidheyaṁ | gacchantī smṛtiḥ pratyāneyā ekāyatane pratyavasthāpyā | yathā vānaraḥ grīvāyāṁ baddhāstaṁbhena vinibaddhaḥ paritaḥ staṁbhaṁ carannapi na labhate gantuṁ gatvā punarantatastiṣṭhati | idaṁ cittaṁ tathā | gacchadapyevaṁ cittaṁ dharmavinibaddhaṁ na punargacchati | gatvā punarantatastiṣṭhati ||

2 | krameṇa pratyavekṣate kāyaṁ vedanāṁ cittaṁ dharmān ityavataran dharmamanaḥsthitau suvinītaikāgracittasya pāramārthikaprajñādhigamaḥ | pratyavekṣate sarve saṁskārāḥ satyalakṣaṇāḥ sotpādanirodhā ityanityāḥ | vipannicaya iti duḥkhāḥ | antarapudgalā iti śūnyāḥ | avaśā ityanātmanaḥ | tato labhate ūṣmadharmaṁ cittotthāpitaṁ | yathā mathanātkāṣṭheṣvanalotpāda stathā buddhadharmeṣu pariśuddhakuśalamūlaśraddhotpādaḥ ||

3 | caturbhiḥ pratyayaiḥ paśyati ṣoḍaśākārān | caturbhikāraiḥ paśyati duḥkhasatyaṁ | hetupratyayotpannamadhruvamityanityaṁ | anityabalaṁ naśvaramiti duḥkhaṁ | apudgalamiti śūnyaṁ | avaśamityanātmakaṁ | caturbhirākāraiḥ paśyati samudayasatyaṁ | sadṛśaphalotpāda iti hetuḥ | jātimaraṇāviccheda iti samudayaḥ | anirodha iti prabhavaḥ | asadṛśānvaya iti pratyayaḥ | caturbhirākāraiḥ paśyati nirodhasatyaṁ | sarvaduḥkhavighāta iti nirodhaḥ | sarvasaṁyojanāgniviraha iti śāntaḥ | sarvadharmātigama iti praṇītaḥ | sarvadharmātikrama iti niḥsaraṇaṁ | caturbhikāraiḥ paśyati mārgasatyaṁ | nirvāṇaprāpaka iti mārgaḥ | aviparyasta iti nyāyaḥ | āryapudgalācarita iti pratipattiḥ | lokakleśahāpaka iti nairyāṇikaḥ | paśyan ṣoḍaśākārakuśaladharmān nityamātāpī viharati vīryavānityūṣmadharmaḥ ||

4 | etasmādūṣmataḥ kuśalamūlaṁ saṁpravṛddhamucyate mūrdhā kuśalamūlaṁ | śraddadhāti triratnaṁ śraddadhāti paṁcopādānaskaṁdhā anityā duḥkhā śūnyā anātmana ityevaṁ pratītya catuḥsatyaṣoḍaśākārānūṣmadharmottaratvāducyate mūrdhā udvṛddha iti |

5 | satyakṣāṁtimanugato mūrdhā nāma kṣāntikuśalamūlaṁ | trividha eṣa (mūrdhā)| adhimātraḥ | madhyaḥ | mṛduśca ||

6 | catuḥsatyavipaśyanāmupādāya paśyati ṣoḍaśākārān satyamanusaran saṁpravardhayati kuśalamūlamityucyate laukikāgradharma iti | ekāgracittakāle cittacaitasikadharmā ucyante laukikāgrakuśalamūlamiti | kaścidāha | laukikāgradharmo hi śraddhādīni paṁcendriyāṇi | paramārthatastu ekāgracittakāle cittacaitasikā dharmā laukikāgrakuśalamūlamiti ||

7 | nirvāṇadvārodghāṭanapratibala iti pṛthagjanadharmeṣvagraḥ pratītya prathamasatyadarśanaṁ caturākāraṁ anityaṁ duḥkhaṁ śūnyaṁ anātmakaṁ | tatkasya hetoḥ | prathamamanāsravacittaṁ pratītya bhavati duḥkhasatyaṁ | laukikāgradharmo'pyevaṁ ||

8 | ṣaḍdhyānabhūmayaḥ | asamāpatti (=ānāgamya)dhyānaṁ antaradhyānaṁ (rūpa-)dhyānacatuṣṭayaṁ kṣāntiḥ (kuśalamūlaṁ)mūrdhā (kuśalamūlaṁ)ūṣmā kuśalamūlaṁ ca ||

9 | ṣaḍmūmiṣu laukikāgradharmā krameṇa jāyate'nāsravapudgalaḥ - ityucyate duḥkhadharmakṣāntiḥ | adṛṣṭapūrvasya prathamadarśane kṣamatvāducyate kṣāntiḥ | eṣā ādikṣāntirucyate ānantaryamārgaḥ | krameṇa duḥkhadharmajñānaṁ jāyate satyato jñāyate duḥkhalakṣaṇaṁ | duḥkhadharmajñānaṁ vimokṣamārgaḥ ||

10 | ete dve citte kāmadhātupratisaṁyuktaduḥkhālaṁbane | ānantaryamārgo'nvayakṣāntiḥ vimuktimārgo'nvaya(kṣānti)jñānaṁ ceti dve citte rūpārūpyadhātupratisaṁyuktaduḥkhālaṁbane | nirodhamārgasatyānyapyevaṁ || etatsamyagdharmadarśanam ||

11 | ṣoḍaśapariśuddhacittebhyaḥ paṁcadaśacitteṣu tīkṣṇendriya ucyate dharmānusārī | mṛdvindriya ucyate śraddhānusārī | etau dvau pudgalau aparikṣīṇe kāmadhātusaṁyojane prathamaphalapratipannakau | ṣaḍvidhakāmadhātusaṁyojanaprahāṇe dvitīyaphalapratipannakau | navavidhasaṁyojanaprahāṇe tu tṛtīyaphalapratipannakau || phalapratipannako (nāma)chandopalabdhapaṁcadaśacitta(kṣaṇa)cārī pudgalaḥ phalāntaścārī pudgalaśca || etau dvau dharmānusāriśraddhānusāripudgalau prāptaṣoḍaśacittakṣaṇau phalasthau bhavataḥ ||

12 | etau dvau pudgalau pūrvamaprahīṇasaṁyojanau paripūrṇa ṣoḍaśacittakṣaṇau srotaāpannau | prahīṇeṣu ṣaḍvidhasaṁyojaneṣu paripūrṇaṣoḍaśacittakṣaṇau sakṛdāgāminau | prahīṇeṣu navavidhasaṁyojaneṣu anāgāminau prāptatṛtīyaphalau ||

13 | aṣṭāśītisaṁyojanaprahāṇe pudgalaḥ anāsravaśīlakuśalamūlasiddha ityucyate srotaāpannaḥ | tīkṣṇendriya prāptaphalo nāma dṛṣṭiprāptaḥ | mṛdvidriyaḥ prāptaphalo nāma śraddhādhimuktaḥ | etau dvau pudgalau kāmadhātupratisaṁyuktabhāvanāheyasaṁyojanānāmaprahāṇe saptakṛdbhavaparamau | prahīṇa trividha(bhāvanāheyasaṁyojanaḥ)kulaṁkulo nāma trijātimaraṇaḥ | aṣṭāṁgikamārgajalasrotasi nirvāṇābhimukhe madhyacārīti srotaāpannaḥ |

14 | prahīṇaṣaḍvidhasaṁyojana ucyate sakṛdāgāmī | prahīṇāṣṭavidhasaṁyojana ucyate ekavīciḥ | kāmadevalokād manuṣyeṣūpapadya tataḥ parinirvātītyucyate ekavīciśca sakṛdāgāmī ca ||

15 | paṁcānāgāminaḥ | antarāparinirvāyī upapadyaparinirvāyī sābhisaṁskāraparinirvāyī anabhisaṁskāraparinirvāyī ūrdhvaṁsrotāḥ | akaniṣṭhago (bhavati)anāgāmī | api ca rūpārūpyadhātūpapanno (bhavati)anāgāmī | rūpārūpyadhātuduḥkhaprahāṇāt (tat eva)labhate parinirvāṇaṁ na copapadyate'dholoke ityucyate'nāgāmī ||

16 | kāmadhātau saṁyojanāni navavidhāni | rūpārūpyadhātvorapi tathā | etāni sarvāṇi saṁyojanāni dvābhyāṁ mārgābhyāṁ heyāni | ānantaryamārgeṇa ca vimuktimārgeṇa ca | pūrvamānantaryeṇa hānaṁ vimokṣeṇa niṣpādanaṁ | tathāhi | viṣanāgasya nālikāyāṁ (pūrvaṁ)grahaṇaṁ tato mukhapidhānaṁ ||

17 | (mārgo dvividhaḥ)| laukikamārgaḥ lokottaramārgaśca | lokottaramārgeṇa prahīyante kāmadhāturūpārūpyadhātupratisaṁyuktasarvasaṁyojanāni | laukikamārgeṇāpi hātuṁ śakyante ūrdhvadhātupratisaṁyuktāni saṁyojanāni ||

18 | aṣṭabhūmiṣu vairāgyāllabhate nirodhasamāpattimityucyate kāyasākṣī anāgāmī | vimuktaścedarhaddharmamiva nirvāṇaṁ kāyena spṛśati paṁcāvarabhāgīyānāṁ saṁyojanānāṁ prahāṇe prāpnotyanāgāmitvaṁ | paṁcordhvabhāgīyānāṁ saṁyojanānāṁ prahāṇe prāpnotyarhattvaṁ ||

19 | etadrūpārūpyadhātvoḥ saṁyojanabandhanānāṁ niravaśeṣahānamucyate cittasamatā vajropamasamādhiḥ | krameṇa kṣayajñānaṁ jāyate ||

20 || etasmin kāle arhatphalaṁ bhavatyanuttaraṁ | api sarvarāgyānantaryamārgaṁ paścimaśaikṣacittaṁ | iti vajropamasamādhikrameṇa prathamamaśaikṣasya kṣayajñānaṁ jāyate prahīṇā me jātiḥ prāptaṁ mayārhatvaṁ kṣīṇā me sarvasaṁyojanakleśopakleśāḥ | ityucyate arhan | sarvadevamanuṣyeṣu pūjārha ityucyate arhan ||

21 | aśaṁkṣo navavidhaḥ | parihāṇidharmā aparihāṇidharmā cetanādharmā anurakṣaṇadharmā sthitadharmā prativedhanadharmā akopyadharmā prajñāvimuktaḥ sarvavimuktaḥ || parihāṇidharmā katamaḥ | mṛduprajñaḥ mṛduvīryaḥ paṁcasu parihāṇipūttaptaḥ jahāti mārgaphalamityucyate parihāṇidharmā || aparihāṇidharmā katamaḥ | adhimātraprajñaḥ adhimātravīryaḥ paṁcasu parihāṇipvanuttaptaḥ na jahāti mārgaphalamityucyate aparihāṇidharmā || cetanādharmā katamaḥ mṛduprajñaḥ mṛduvīryaḥ sodyogaṁ paśyati kāyamaśucidūpitaṁ bhāvayati svayaṁ kāyanirodhamiti cetanadharmā || anurakṣaṇadharmā katamaḥ | mṛduprajñaḥ mṛduvīryaḥ svayamanurakṣati kāyamiti anurakṣaṇadharmā || sthitadharmā katamaḥ | madhyaprajñaḥ madhyavīryaḥ madhyamapratipadāyāmuttaptaḥ nopacayāpacayavāniti sthitadharmā || prativedhana dharmā katamaḥ | mṛdvadhimātraprajñaḥ adhimātravīryaḥ labdhuṁ śaknotyakṣobhyakuśalamiti prativedhanadharmā || akopyadharmā katamaḥ | adhimātrendriyaḥ adhimātrādhimātravīryaḥ āditaḥ prāpnotyakṣobhyakuśalamiti akopyadharmā || prajñāvimuktaḥ katamaḥ | aprāptanirodhasamāpattiḥ prajñāvimuktaḥ || sarvavimuktaḥ katamaḥ | prāptanirodhasamāpattiḥ sarvavimuktaḥ ||

22 | śraddhānusāriṇaḥ paṁcavidhā arhantaḥ kālavimuktā nāma | eteṣāmarhatāṁ dvividhaṁ jñānaṁ bhavati kṣayajñānaṁ aśaikṣaṁ satyadarśanaṁ | dharmānusārī ekavidho'rhan bhavatyadhimātrendriyaḥ | sa evocyate'kālavimuktaḥ | asyārhatastrividhaṁ jñānaṁ bhavati kṣayajñānaṁ anutpādajñānaṁ aśaikṣaṁ satyadarśanaṁ ca | aṣṭāvarhantaḥ kālavimuktipriyāḥ bhavanti akopyadharmāṇaḥ ||

23 | saṁsiddhaḥ śraddhānusārī satyadarśanamārgapaṁcadaśacittakṣaṇeṣu anāsravanavendriyo nāma ājñāsyāmīndriyaḥ | ṣoḍaśacittakṣaṇe labdhārhatphalo'nāsravanavendriyo nāma ājñendriyaḥ | navendriyaḥ aśaikṣadharmā nāma ājñātāvīndriyaḥ ||

24 | phalaprāptikāle nāsti mārgaprāptiḥ | mārge prahīṇasaṁyojanasya dvividhaṁ niṣpadyate (phalaṁ)saṁskṛtamasaṁskṛtaṁ ca | mahāphalaprāptikāle sarvataḥ kṣīyate mūlaṁ dvaitaṁ prāpnotyekāmeva siddhiṁ | navavidhāḥ (arhantaḥ)prahīṇasaṁyojanānivṛtadharmāṇaḥ navame cittakṣaṇe prāpnuvanti sarvakṣayaṁ | prativedhanadharmā arhan labhate'kṣobhyakuśalaṁ nānyaḥ | śraddhādhimuktaḥ śaikṣaḥ adhimātrendriyaḥ ucyate dṛṣṭiprāpto nānyaḥ | satyadarśanamārge pratibhinnāni saṁyojanāni pratibhinnāścānāsravā dharmāḥ | tasmātparyāyeṇa satyadarśanaṁ bhavati na yugapat | ānantaryamārgadarśanabalena phalaprāptiḥ | iti ha dvividhaṁ phalaṁ saṁskṛtaphalamasaṁskṛta phalaṁ ca ||

[ityabhidharmāmṛtaśāstre 'nāsravapudgalanirdeśo nāma daśamo binduḥ ||]

Dvādaśo binduḥ

dvādaśo binduḥ

dhyānam

1 | adhigatadhyānasamāpatta raikāgracittasya viviktaṁ bhavati cittaṁ pariśuddhā ca bhavati prajñā | yathā nivātastho dīpo bhāsvaro bhavati pariśuddhaśca ||

2 | dhyānāni kati | aṣṭau dhyānāni | catvāri (rūpa-)dhyānāni | catvāryārūpyadhyānāni || catvāri dhyānāni (rūpadhātau)prathamadhyānaṁ dvitīyadhyānaṁ tṛtīyadhyānaṁ caturthadhyānaṁ ca | eteṣu dhyāneṣu trīṇi dhyānāni sāsvādasaṁprasādanānāsravāṇi || tṛṣṇāsaṁprayogo nāmāsvādaḥ | kuśalasāsravasamādhirnāma saṁprasādanaṁ || akleśo nāmānāsravaḥ || bhavāgre dhyānaṁ dvividhaṁ | sāsvādaṁ sasaṁprasādanaṁ ca | na (tatra)anāsravadhyānakuśaladharmaḥ ||

3 | śūnye pravivikte pradeśe niṣadyāyāṁ vā sthāne vā śayane vā gamane vā caṁkramaṇe vā samāhitena manasā tīkṣṇayā prajñayā gaṁbhīrā śraddhā (janayitavyā)| evaṁ bhavati cittasya dhyāne'vatāraḥ | dhyānasaṁprayuktāḥ śraddhāvīryasmṛtiprajñāsamādhayo bhavanti | etebhyaḥ kuśaladharmebhyaḥ prathamadhyānādhigamo bhavati | vivicya kāmairvivicyākuśaladharmaiḥ savicāraṁ savitarkaṁ kāmavivekajaṁ pratīsukhaṁ prāpnotītyucyate prathamaṁ dhyānaṁ || bahirdhāyataneṣvāsaṁgaḥ tathāhi kāmachando vyāpādaḥ styānamiddhamauddhatyakaukṛtyaṁ vicikitsā | etāni paṁca nīvaraṇānyucyante'kuśaladharmāḥ | dvividhānāmadhyātmikabāhyānāmakuśaladharmāṇāṁ prahāṇamucyate vivekaḥ | ālaṁbane cetaḥpravṛttirucyate vitarkaḥ | cittasyodgṛhītasaṁskārānucintanamucyate vicāraḥ | akuśaladharmaprahāṇabalaprāptaḥ samādhirucyate kāmavivekaḥ | manojātaṁ saumanasyamucyate prītiḥ | kāyacittayoravikṣepa ucyate sukhaṁ | cittasyālāṁbanayoga ucyate samādhiḥ | etaiḥ prathamadhyānasya paṁcāṁgairvivikto bhavati rāgo mahāduḥkhaḥ pāpo'sukhaḥ samunmajjati balaṁ | evaṁ śraddhādīnbhāvayataścitte kuśalacittadharmotpādaḥ | iti prathamadhyānamārgaprāptiḥ || eṣa tribhirvedanendriyaiḥ saṁprayukto bhavati prītisukhopekṣendriyaiḥ | sukhendriyaṁ tribhirvijñānaiḥ saṁprayuktaṁ bhavati cakṣuḥśrotrakāyavijñānaiḥ | prītīndriyaṁ manovijñānasaṁprayuktaṁ bhavati | upekṣendriyaṁ caturvijñānasaṁprayuktaṁ bhavati | prathamadhyānikāḥ nānākāyanānāsaṁjñino nānākāyaikasaṁjñino bhavanti | prathamadhyāne catvāri vijñānāni bhavanti | cakṣuḥśrotrakāyamano (vijñānāni)| iti prathamaṁ dhyānaṁ ||

4 | vitarkavicāropaśamāt adhyātmaṁ saṁprasādanaḥ ekāgrasamāhitaḥ avitarko'vicāraḥ samādhirupajāyate prītisukhasaṁprayuktaḥ | iti dvitīyaṁ dhyānaṁ | vitarkavicārau uktapūrvau | tayoḥ prahāṇamucyate upaśamaḥ | sarvabhūmiṣu śraddhā vyapagatamalocyate'dhyātmaṁ saṁprasādanaṁ | manovijñānasyālaṁbanayogenābarhimukhatocyate ekāgrasamādhiḥ | prītisukhāṁge uktapūrve | idaṁ (dvitīyadhyānaṁ)dvābhyāmindriyābhyāṁ saṁprayuktaṁ bhavati prītīndriyeṇopekṣendriyeṇa ca | (etaddhayānikāḥ)bhavanti nānākāyaikasaṁjñinaḥ prītisaṁprayuktāḥ | maulabhūmayo bhavantyupekṣendriyasaṁprayuktāḥ | kṣapayitvā vitarkavicāramalaṁ kṣapayitvā puṇyavāsanāṁ sa eṣa mārgo dvitīyadhyānonmukhaḥ ||

5 | prītyā virāgād upekṣako viharati pratisaṁvedayati kāyena sukhaṁ bhavatyanāsravaḥ pudgalaḥ sa ucyate upekṣakaḥ smṛtimān sukhavihārī tṛtīyaṁ dhyānamavatīrṇaḥ | prītivirāgo yathoktapūrvaḥ | upekṣācittasyopekṣāsukhe iti dvidhā vedanā | sukhamakliṣṭaṁ | tadetatsukhaṁ kāyenānubhūyate sākṣātkriyate | etatsukhaṁ duradhigamo bhūtadharma ityanāsravamucyate sukhaṁ | atrāpyupekṣāśraddhādisarvakuśaladharmabhāvanā | ityeṣa mārgo bhavati tṛtīyadhyānonmukhaḥ | paśyan prītimakuśalāṁ niṣprītikaṁ sukhaṁ sākṣātkurvan dhyāyati | sthāpayitvā (anyāṁgānyatra)sukhamupekṣā smṛtiḥ saṁprajñānaṁ samādhiśceti paṁcāṁgāni bhavanti yathoktapūrvāṇi | iti tṛtīya dhyānaṁ ||

6 | sukhasya prahāṇāt pūrvameva duḥkhasya prahāṇāt saumanasyadaurmanasyayorastaṁgamādupekṣāsmṛtipariśuddhamupasaṁpādayati caturthaṁ dhyānaṁ | śraddhādisarvakuśaladharmāṇām (atrāpi bhāvanā)| api ca paśyan sukhaduḥkhadopamaduḥkhāsukho bhavati supratiṣṭhitaḥ | ityeṣa mārgo'vatarati caturthadhyānaṁ | (atra bhavanti)catvāryaṁgāni upekṣā smṛtiḥ saṁprajñānaṁ samādhiśceti |

7 | sarvadhyānāṁgāni bhavanti kuśalāni | asamāpattidhyānabhūmiḥ savitarkā bhavati savicārā | madhyamadhyānabhūmiravitarkā bhavati savicārā | ete dve dhyānabhūmī upekṣendriyasaṁprayukte | asamāpattidhyānabhūmirdvividhā saṁprasādanānāsravā'nāsvādā ceti | catvāri dhyānāni trividhāni sāsvādāni saṁprasādanāni anāsravāṇi ca | iti dhyānadharmāḥ ||

8 | rūpasaṁjñānāṁ samatikramāt paśyatyanantamavakāśamityākāśānantyāyatanasamāpattimavatarati ākāśānantyāyatanasupratiṣṭhitaḥ sākṣātkurvannimaṁ mārgamupasaṁpādayati ākāśānantyātanasamādhiṁ | anantaṁ vijñānamiti bhāvayan vijñānānantyāyatanamavatīrya paśyannākāśānantyāyatanadoṣaṁ vijñānānantyāyatanasupratiṣṭhitaḥ sākṣātkurvannimaṁ mārgamupasaṁpādayati vijñānānantyāyatanasamādhiṁ | vijñānanantyāyatanagatirduḥkheti bhāvayati ākiṁcanyāyatanagatimavataratyākiṁcanyāyatanasamāpattiṁ paśyan vijñānānantyāyatanadoṣamākiṁcanyāyatanasupratiṣṭhitaḥ  sākṣātkurvannimaṁ mārgamupasaṁpādayatyākiṁcanyāyatanasamādhiṁ | saṁjñāyatanaṁ roga iti asaṁjñāyatanaṁ moha ityevaṁ bhāvayan naivasaṁjñānāsaṁjñāyatanasamāpattimavatīrya paśyannākiṁcanyāyatanadoṣaṁ naivasaṁjñānāsaṁjñāyatanasupratiṣṭhitaḥ sākṣātkurvannimaṁ mārgamupasaṁpādayati naivasaṁjñānāsaṁjñāyatanasamādhimiti naiva saṁjñānāsaṁjñāyatana dhyānaṁ ||

9 | nirvāṇagāminī pratipad dvividhā | prathamā kāyāśucyanupaśyanā dvitīyā ānapānasmṛtiḥ | kāyasmṛtyupasthāne prathamadvitīyavimokṣau | caturṣu abhibhvāyataneṣu aśucidharmāḥ | samāhitaḥ saṁkhyātyānāpānaṁ ekaṁ dve yāvat daśa kṣaṇān ānāpānapraveśanirgamamavaṣṭabhya yathā dvārapālakaḥ paśyati sarvadharmā udayavyayā iti | dvayo lakṣaṇayoḥ svalakṣaṇaṁ ṣaḍbhedabhinnaṁ | paśyati kāyaḥ anityaḥ duḥkhaḥ śūnyaḥ anātmakaḥ - iti paśyannevaṁ sarvadharmān lokasaṁtrastaḥ paryāyeṇa prahāya malaṁ bhāvayan kuśaladharmān nirvāṇābhimukho bhavati ||

10 | asamāpattidhyānabhūmiḥ madhyamadhyānabhūmiḥ caturdhyānabhūmayaḥ tisra ārūpyadhyānabhūmayaśceti dvividhāḥ | sāsravā anāsravāśca | bhavāgraḥ sarvo'pi sāsravaḥ ||

11 | daśasaṁjñāḥ | anitya(saṁjñā)duḥkha duḥkhānātmaka āhārānupaśyanā sarvaloke'sukha aśuci maraṇa prahāṇa virāga nirodhasaṁjñā || bhāvayati sarvasaṁskārā anityā ityanityasaṁjñā | bhāvayati jātyādiduḥkhaparipūrṇo'yaṁ loka iti duḥkhasaṁjñā | bhāvayatyadhyātmaṁ bahirdhā (sarvaṁ)anityaṁ duḥkhaṁ śūnyamanātmakamiti duḥkhānātmasaṁjñā | bhāvayati mahatā kṛchreṇopalabdha āhāro'bhyavahriyamāṇo'śucirbhavatītyāhārānupaśyanāsaṁjñā | bhāvayati jātijarārogamaraṇādibhayaiḥ vividhakleśaiḥ paripūrṇo'yaṁ lokaḥ sarva ityasukhasaṁjñā | svakāyābhyantare bhūtato'nupaśyanocyate'śucisaṁjñā | bhāvayati sarvā jātirniyatamaraṇeti maraṇasaṁjñā | bhāvayatyanityevirāgitāmiti virāgasaṁjñā | bhāvayati paṁcopādānaskaṁdhānāmapunarbhave nirodhe sthāpane saṁparityāge nirvāṇamiti nirodhasaṁjñā | etā daśa saṁjñā nityaṁ bhāvayatā bhavati duḥkhanirodhaprāptiḥ ||

[ityabhidharmāmṛtaśāstra dhyānanirdeśo nāma dvādaśo binduḥ ||]

Trayodaśo binduḥ

trayodaśo binduḥ

saṁkīrṇasamādhayaḥ

1 | samādhiḥ apramāṇāni abhijñāḥ kṛtsnāyatanāni abhibhvāyatanāni vimokṣāś(ceti)dhyānāni ||

2 | samādhistrividhaḥ | śūnyatāsamādhiḥ apraṇihitasamādhiḥ animittasamādhiḥ | cittasyānāsravālaṁbanapratisaṁyuktatvāducyate samādhiḥ | samāhitaḥ paśyati paṁcopādānaskaṁdhāḥ śūnyāḥ anātmānaḥ anātmīyā iti | ityucyate śūnyatāsamādhiḥ | samādhimimamavatīrṇo na praṇidadhāti rāgadveṣamohān punarutpattimata ityapraṇihitasamādhiḥ | (yaḥ)samādhirvītadaśanimittadharmālaṁbanaḥ (so'nimitta samādhiḥ)| daśa nimittāni katamāni | rūpādayaḥ paṁca viṣayāḥ puruṣaḥ strī jātirjarā'nityatā | ityanimittasamādhiḥ | śūnyatāsamādhirdvayākāraḥ | śūnyākāraḥ anātmākāraḥ | apraṇihitasamādhirdaśākāraḥ | anityaduḥkhākāraḥ samudayamārgākāraśca | animittasamādhirnirodhacaturākāraḥ ||

3 | apramāṇāni catvāri | maitrī karuṇā muditā upekṣā || svādhigatasyābhīṣṭavastunaḥ sarvasattvebhyo dānāya cittopasthāpanaṁ | tadidaṁ cittaṁ trividhaṁ bhavati | ādyaṁ svajanebhyo madhyamaṁ parebhyaścaramaṁ śatrutaskārādibhyaḥ (yaddānāyacittaṁ)| samāhito bhāvayati sarve tridhātusattvāḥ vayaṁ śātrvādyāśca na bhinnā iti | vijahātyāntarikadveṣamiti maitrī nāmāpramāṇaṁ vedanāsaṁjñāsaṁskāravijñānasaṁprayuktaṁ samyagvācaḥ samyakkarmāntasyotthāpakamapi na sarvasaṁskārasaṁprayuktamiti maitryapramāṇaṁ || samāhito bhāvayati tridhātusattvā vividhakāyacittaduḥkhabhāja iti (tān)uddhartukāma evaṁ bhāvayan (teṣāṁ)vāhyakleśān vyapanetuṁ pratibalo bhavatīti karuṇā nāmāpramāṇaṁ vedanāsaṁjñāsaṁskāravijñānasaṁprayuktaṁ samyagvācaḥ samyakkarmāntasyotthāpakamapi na sarva saṁskārasaṁprayuktamiti karuṇāpramāṇaṁ || samāhito bhāvayati (aho)muditāstridhātusatvāḥ | iti prāptasukhasaumanasyo duḥkhadaurmanasyāpanayanapratibalo bhavatīti muditā nāmāpramāṇaṁ vedanāsaṁjñāsaṁskāravijñānasaṁprayuktaṁsamyagvācaḥ samyakkarmāntasyotthāpakamapi na sarvasaṁskārasaṁprayuktamiti muditāpramāṇaṁ || samāhito bhāvayati tridhātusattvāḥ sukhaduḥkhamodaudāsīnyabhāja iti rāgadveṣāpanayanāya pratibalo bhavatītyupekṣānāmāpramāṇaṁ vedanasaṁjñāsaṁskāravijñānasaṁprayuktaṁ samyagvācaḥ samyakkarmāntasyotthāpakamapi na sarvasaṁskārasaṁprayuktaṁ ||

4 | ṣaḍabhijñāḥ | ṛddhipādaḥ divyacakṣuḥ divyaśrotraṁ pūrvanivāsavijñānaṁ paracittajñānaṁ āsravakṣayajñānaṁ ca | vihāya ṣaṣṭhīmabhijñāmitarāḥ pṛthagjanā api prāpnuvanti || ṛddhipādābhijñā katamā | eṣā trividhā | prathamā utpatanakarma | dvitīyā nirmāṇaṁ | tṛtīyā āryapudgalābhijñā || (tatra)bhavati trividhamutpatanakarma | prathamaṁ svakāyena gamanaṁ | tathāhi | pakṣiṇāmutpatanaṁ | dvitīyaṁ bhūmeretasyā akasmādantarhitasya deśāntaragamanaṁ | tṛtīyaṁ cetobalavaśitā | yathā bāhusamiñjitaprasāraṇaṁ | eṣā sarvabuddhābhijñā nānyatīrthikānāṁ || nityaṁ paśyati kāyaṁ śūnyaṁ śikṣate laghūtthānamityetena mārgeṇa (utpatanarūpāṁ)ṛddhi pādā'bhijñāmupaiti | pratibalo bhavituṁ mahān | pratibalo bhavituṁ kṣudraḥ | pratibalaḥ prabhūtaṁ kartumalpaṁ | pratibalo'lpaṁ kartuṁ prabhūtaṁ | pratibalaḥ parivartayituṁ vividhavastūni | iti nirmāṇarddhyabhijñā | pṛthagjanānāṁ nirmāṇaṁ bhavati saptadināni yāvat anatikramya saptadināni niruddhyati | buddhānāṁ buddhātmajānāṁ vaśe vartate nirmāṇaṁ nirmāṇakālaśca | paśyan lokaṁ śucimaśucimivāśuciṁ śucimiva vihāya śucyaśucyanusmṛtimupekṣāsmṛticitto bhavatītyāryapudgalābhijñā | etāstrividhā abhijñāścaturṇāmṛddhipādānāṁ balena jāyante | (apare)sarvarūpālaṁbanāḥ krameṇa prāpnuvanti laghūtthānaṁ buddhāstu yugapatprātnuvanti || divyacakṣurabhijñā svacakṣurniṣṭhā bhavati | rūpadhātucaturmahābhūtapariśuddhijo bhavati divyacakṣurlābhaḥ | svabhūmyāmadhobhūmyāṁ ca spaṣṭaṁ paśyati (yadbhavati)dūre (yacca bhavati)antike paśyati sarvaṁ sūkṣmarūpaṁ sūryācandramasau tārā agniṁ maṇimityeṣa mārgo (yena)divyacakṣurabhijñālābhaḥ || divyaśrotrābhijñā svaśrotraniṣṭhā | rūpadhātucaturmahābhūtapariśuddhijo bhavati divyaśrotralābhaḥ | śrṛṇoti vijānāti buddhyati ca vividhān divyān mānuṣān nārakān pretatiryagjān śabdānityeṣa mārgo (yena)divyaśrotrābhijñālābhaḥ || pūrvanivāsavijñānābhijñā | smarati pūrvalokavṛttaṁ yasmādagato yasmiṁśca deśe samutpannaḥ - ityeṣa mārgo (yena)pūrvanivāsābhijñāmupaiti || paracittajñānābhijñā | nityamanusmarati pareṣāṁ kliṣṭacittaṁ pareṣāṁ paryavadātacittaṁ sarvaṁ jānāti svacittotpādanirodhaṁ pratibalo bhavati vivicya parijñātumityeṣa mārgo (yena)paracittābhijñāmupaiti || traidhātukāsravāṇāṁ sarvasyā ātma(dṛṣṭaḥ)nirodhenaivaṁ jānāti paṁcopādanaskandhāḥ anityāḥ ityevamādi | ityanusmarata etena mārgeṇa āsravakṣayābhijñālābhaḥ ||

5 | pūrvanivāsābhijñā divyacakṣuḥ āsravakṣayaśceti tisro vidyāḥ | pūrvanivāsābhijñā saṁsārakramahetupratyayān vettītyucyate vidyā | divyaśrotrābhijñā yathākṛtakarmaphalaprāpte hetupratyayān vettītyucyate vidyā | (āsravakṣayābhijñā)kāmadhāturūpārūpadhātvāśrayakṣayaṁ ātma(dṛṣṭi)kṣayaṁ sarvāsrava(kṣayaṁ vettīti)ucyate vidyā ||

6 | daśa kṛtsnāyatanāni | manasi karoti kṛtsnāṁ pṛthivīṁ nānyat manasi karoti | iti pṛthivīkṛtsnāyatanaṁ | yāvad vijñānakṛtsnāyatanamapyemeva ||

7 | aṣṭau vimokṣāḥ | adhyātmaṁ rūpasaṁjñī bahirdhā paśyati rūpāṇi | adhyātmamarūpasaṁjñī bahirdhā paśyati rūpāṇi | śubhaṁ vimokṣaṁ sākṣātkaroti | catvāryarūpadhyānāni | nirodhasamāpattiśca | ityaṣṭau vimokṣāḥ || ālaṁbanaṁpaśyan parivartayati cittaṁ prāpnoti vimuktimiti vimokṣaḥ | paśyatyadhyātmarūpamaśuci,paśyati ca bahirdhārūpaṁ (na tathā)iti prathamo vimokṣaḥ | na paśyatyadhyātmarūpaṁ,paśyati bahirdhārūpamaśuci - iti dvitīyo vimokṣaḥ | vibhajya paśyatyadhyātmaṁbahirdhā ca rūpaṁ sarvaṁ śucirūpamiti tṛtīyo vimokṣaḥ | catvāryarūpadhyānāni catvāro vimokṣāḥ | nirodhaḥ (aṣṭamo)vimokṣaḥ ||

8 | adhyātmaṁ rūpasaṁjñī bahirdhā paśyati rūpāṇi parittāni suvarṇāni durvarṇāni | ityālaṁbanamabhibhūya jānāti paśyatīti prathamamabhibhvāyatanaṁ | adhyātmaṁ rūpasaṁjñī bahirdhā paśyati rūpāṇi apramāṇāni suvarṇāni durvarṇāni | ityālaṁbanamabhibhūmaya jānāti paśyatīti dvitīyamabhibhvāyatanaṁ | adhyātmamarūpasaṁjñī bahirdhā paśyati rūpāṇi parittāni suvarṇāni durvarṇāni | ityālaṁbanamabhibhūmaya jānāti paśyatīti tṛtīyamabhibhvāyatanaṁ | adhyātmamarūpasaṁjñī bahirdhāpaśyati rūpāṇi apramāṇāni suvarṇāni durvarṇāni | ityālaṁbanamabhibhūya jānāti paśyatīti caturthamamabhibhvāyatanaṁ | adhyātmamarūpasaṁjñī bahirdhā paśyati rūpāṇi nīlāni | ityālaṁbanamabhibhūya jānāti paśyatīti paṁcamamabhibhvāyatanaṁ | pīta-lohitā-'vadātānyapyevaṁ ||

9 | (apramāṇāyatanānyaṣṭau)| adhyātmamanabhibhūtarūpasaṁjñī bahirdhā śuddhāni parittāni rūpāṇi paśyatīti prathamamapramāṇāyatanaṁ dvitīyaṁ | adhyātmamabhibhūtarūpasaṁjñī bahirdhā śuddhāni parittāni rūpāṇi paśyatīti tṛtīyamapramāṇāyatanaṁ | caturtham | (evam)anyāni nīla-pīta-lohitā-'vadātāni draṣṭavyāni catvāri || abhibhavatyālaṁbanaṁ pariśuddhamityucyate'bhibhvāyatanaṁ | samyagrūpākāravaiśiṣṭyanirmalatvādvimocayatītyabhibhvāyatanasya nāmāntaraṁ trayo vimokṣāḥ | catvāryabhibhvāyatanāni aṣṭau kṛtsnāyatanāni śubhavimokṣasaṁgṛhītāni ||

10 | daśa jñānānyuktapūrvāṇi | maitrī karuṇā muditā ceti tisraḥ paṁcābhijñāśca mauleṣu caturṣu dhyāneṣu vidyante | ṣaḍbhūmiṣu dharmajñānaṁ vidyate asamāpattidhyāneṣu madhyamadhyāneṣu maulacaturdhyāneṣu | muditā prathamā dvitīyā ca vimuktiḥ ādyāni catvāryabhibhvāyatanāni prathamadhyāne dvitīyadhyāne ca vidyante | aparāṇyabhibhvāyatanāni śubhavimokṣaśca aṣṭau kṛtsnāyatanāni ca caturthadhyāne vidyante | aparau vimokṣau dve kṛtsnāyatane ca svanāmasaṁgṛhītāni | nirodhavimokṣo bhavāgrasaṁgṛhītaḥ | trayaḥ samādhayaḥ saptajñānāni anāsravābhijñā ca navabhūmisaṁgṛhītāni | sthāpayitvā bhavāgre'nvayajñānaṁ ||

11 | daśabhūmiṣvarūpadhātostrayo vimokṣāḥ sāsravā vā bhavanti | anāsravā vā | anya(dhātukāḥ)trayo vimokṣāḥ aṣṭāvabhibhvāyatanāni daśa kṛtsnāyatanāni sāsravāṇi | bhavāgre sarvaṁ sāsravaṁ mandaṁ na tīkṣṇamiti sa (bhavāgraḥ)sāsravaḥ | nirodhasamāpattau na prajñeti sā sāsravā | paṁcābhijñāsu bāhulyenāvyākṛtacittaṁ | caturapramāṇāni sattvālaṁbanatayā sāsravāṇi ||

12 | kāmarāgasyāparikṣaye traidhātukasaṁyojanāni bhavanti | parīkṣīṇe kāmarāge bhavanti rūpārūpyadhātusaṁyojanāni | rūpa(dhātu)rāgakṣaye bhavantyārūpyadhātusaṁyojanāni | arūpadhāturāgakṣaye na bhavanti traidhātukāni saṁyojanāni || kāmadhāturāgakṣaye pariśuddhasyānāsravasya prathamadhyānasya siddhiḥ | evaṁ sarvāsu bhūmiṣu āryapudgalasyānāsravatvasiddhiḥ || āryapudgala ūrdhvādhobhūmiko bhavanyanāsravaḥ | paṁcābhijñācaturapramāṇavato na bhavantyadhobhūmisaṁyojanamalāni || laukikamārgamāśrittya asamāpattidhyānabhūmiko jahātyadhobhūmirāgaṁ | evaṁ sarvabhūmikaḥ || anāsravamārgamāśritya mauladhyānabhūmikaḥ svabhūmikamūrdhvabhūmikaṁ cāpi jahāti rāgaṁ | evaṁ sarvabhūmikaḥ || tena pṛthagjano bhavāgre na rāgaprahāṇapratibalo bhavati | ūṣmadharmā mūrdhadharmā kṣāntidharmā laukikāgradharmā (hi)prahīṇarāgapudgalaḥ ||

13 | sāsravadhyānabhāvanāyā dvāvadhvānau pratyutpanno'nāgataśca | satyadarśanamārge duḥkhasamudayanirodhānvayajñāne pratyutpannādhvabhāvanayā'nāsravaṁ jñānaṁ | anāgataṁ dvividhaṁ sāsravamanāsravaṁ jñānaṁ | avaśiṣṭacittāntare pratyutpannamanāsravaṁ anāgatamanāsravaṁ || buddhātmajo jahāti cetkāmarāgaṁ āśrayati cāsamāpattidhyānabhūmiṁ pratyutpannādhvani bhāvayati sāsravamārgaṁ anāgate bhāvayati sāsravānāsravamārge navamavimokṣamārge pratyutpanne bhāvayati sāsravamārgaṁ anāgate bhāvayati sāsravānāsravaṁ || prathamadhyānikaḥ bhāvitānāsravāsamāpattidhyānikaḥ āsrayati ced asamāpattidhyānaṁ pratyutpanne bhāvayatyanāsravamārgaṁ anāgate bhāvayati sāsravānāsravamārgaṁ navamavimokṣamārge pratyutpannādhvani bhāvayatyanāsravamārgaṁ anāgate bhāvayati sāsravānānāsravamārgaṁ || prathamadhyāniko buddhātmajo jahāti cetprathamadhyānarāgaṁ āśrayati asamāpatti (=anāgamya)dvitīyadhyānabhūmiṁ pratyutpannādhvani bhāvayati sāsravamārgaṁ anāgate bhāvayati sāsravānāsravamārgaṁ navamavimokṣamārge pratyutpannādhvani bhāvayati sāsravamārgaṁ anāgate bhāvayati anāsravaṁ ||

14 | tribhūmikaprathamadhyāniko bhāvayaṁśca śuddhaṁ (=śubhaṁ)anāsravaṁ dvitīyadhyānaṁ jahāti cet prathamadhyānarāgaṁ (tarhi)āśrityānāsravamārgaṁ dvitīyadhyānamupasaṁpādayati | svabhūmau bhāvayatyanāsravaṁ anyabhūmau bhāvayati sāsravānāsravamārgaṁ | navamavimokṣamārge pratyutpannādhvani bhāvayatyanāsravamārgaṁ anāgate bhāvayatyanāsravaṁ | tribhūmikaprathamadhyāne śuddhe (=śubhe)'nāsrave dvitīyadhyāne ca yāvat ākiṁcanyāyatane rāgaprahāṇamapyevameva ||

15 | bhavāgre rāgaprahāṇakāle bhāvayati sarvānāsravadhyānāni navamavimokṣamārge pratyupannādhvani bhāvayatyanāsravamārgaṁ anāgate bhāvayatyanāsravaṁ bhāvayati ca tridhātupratisaṁyuktakuśalamūlāni trayoviṁśatividhān samādhīn sāsvādānaṣṭau śuddhānaṣṭau anāsravān sapta (ceti)|| 

16 | sarvānāsravasaptabhūmayo'nāsravasvabhāvahetukāḥ | svabhūmiranāsravā | anāsravā svabhūmistrividhahetukā saṁprayuktakahetukā sahabhūhetukā svabhāvahetukā | prathamaḥ sāsvādasamādhiḥ prathamasāsvādasamādhihetukaḥ nānyahetukaḥ | prathamo'nāsravasamādhiḥ krameṇa janayati ṣaḍvidhān samādhīn | (tadyathā)| dvividhaṁ prathamaṁ dhyānaṁ śuddhaṁ (=śubhaṁ )anāsravaṁ ca | evaṁ dvitīyadhyānaṁ tṛtīyadhyānaṁ ca ||

17 | anāsravaṁ dvitīyadhyānaṁ krameṇa janayatyaṣṭau bhūmīḥ | svabhūmi rdvidhā | ūrdhvabhūmi ścaturdhā | adho bhūmi rdvidhā (ceti)|| anāsravaṁ tṛtīyadhyānaṁ caturthadhyānaṁ ākāśānantyāyatanasamādhiśca krameṇa janayanti daśa bhūmīḥ | ūrdhvabhūmayaścatasraḥ | adhobhūmayaścatasraḥ | svabhūmī dve || anāsravaṁ vijñānānantyāyatanaṁ krameṇa janayati nava bhūmīḥ | ūrdhvabhūmayastisraḥ | adhobhūmayaścatasraḥ | svabhūmī dve || anāsravaḥ ākiṁcanyāyatanasamādhiḥ krameṇa janayati saptabhūmīḥ | ūrdhvabhūmirekā | adhobhūmayaścatasraḥ | svabhūmī dve || śuddha (=śubha)dhyānānyapi tathā ||

18 | āsvādaḥ krameṇa jāyate dvividhaḥ svabhūmikaḥ āsvādaḥ atho'pi śuddhaḥ (=śubhaḥ)| evaṁ sarvabhūmayaḥ sarvasamāpattayaśca śuddhāḥ(=śubhāḥ)anāsravāḥ sarvālaṁbanāḥ sarvadharmālaṁbanāḥ | āsvādaḥ svabhūmikaḥ svabhūmikāsvādālaṁbanaḥ atho'pi śuddhālaṁbanaḥ | āsvādo na bhavitavyo'nāsravālaṁbanaḥ śuddhaḥ (=śubhaḥ)| anāsravaḥ ārūpyasamādhiḥ na sāsravabhūmyālaṁbanaḥ | sāsvādaḥ ārūpyasamādhiḥ svabhūmyāsvādālaṁbanaḥ śuddha śubhālaṁbanaśca nānāsravālaṁbanaḥ ||

19 | catvāryapramāṇāni aṣṭau abhibhvāyatanāni trayo vimokṣāḥ aṣṭau kṛtsnāyatanāni (ceti)dharmāḥ sarve kāmadhātvālaṁbanāḥ | paṁcābhijñāḥ kāmarūpadhātvālaṁbanāḥ ||

20 | sarvādhivāsanādhyāneṣu anāsravadhyānamadhivāsayati sāsravadhyānaṁ | caturthadhyānikaḥ pudgalaḥ prathamamadhivāsayati caturthadhyānaṁ tato'dhivāsayatyadharāṇi trīṇi dhyānāni | prāpnoti paṁcaśuddhādhivāsaphalaṁ | akṣobhyadharmā'rhan prāpnoti sarvadhyānasamādhīn | sa pratibalo labdhumagradhyānaṁ pratibalo dhartumāyuḥ pratibalo hātumāyuḥ praṇidhijñānaḥ cittena yathākāmamakhilaṁ jānātyatītāgatapratyutpannasarvadharmān bhūyo jānātyanāgatadharmān ||

21 | catasraḥ pratisaṁvidaḥ | dharmapratisaṁvit niruktipratisaṁvit pratibhānapratisaṁvit arthapratisaṁvit || paracitte nodbhāvayati dveṣamityakopyaṁ caturdhyāneṣu saṁgṛhītaṁ kāmadhātunāpi ca (saṁgṛhyate)|| dharmapratisaṁvit niruktipratisaṁvicca kāmadhātusaṁgṛhīte brahmalokeṣvapi (saṁgṛhyete)| anye dve pratisaṁvidau navabhūmisaṁgṛhīte ||

22 | kāmadhātau caturṣu (rūpadhātu)dhyāneṣu caturṣvārūpyeṣu śuddhasya (=śubhasya )dhyānasya dvivāraṁ lābhaḥ | rāgaprahāṇakāle (lābhaḥ)janmakāle lābhaḥ | sāsvādadhyānasya dvivāraṁ lābhaḥ | vyutthānakāle lābhaḥ janmakāle lābhaḥ | anāsravaṁ dhyānaṁ dviḥkṛtvo labhyate | vyutthānakāle labhyate | rāgaprahāṇa(kāle)labhyate | navabhūmisaṁgṛhītamanāsravaṁ saṁyojanaprahāṇāya samarthaṁ ||

23 | nirmāṇacittāni caturdaśa | rūpadhātau daśa cittāni | kāmadhātau catvāri cittāni | prathamadhyāne dve nirmāṇacitte | prathamadhyānikamekaṁ kāmadhātukaṁ caikaṁ | dvitīyadhyāne trīṇi nirmāṇacittāni | dvitīyadhyānikamekaṁ prathamadhyānikamekaṁ kāmadhātukamekaṁ | tṛtīyadhyāne catvāri nirmāṇacittāni | tṛtīyadhyānikamekaṁ dvitīyadhyānikamekaṁ prathamadhyānikamekaṁ kāmadhātukamekaṁ | caturthadhyāne paṁca (nirmāṇacittāni)| (caturthadhyānikamekaṁ tṛtīyadhyānikamekaṁ dvitīyadhyānikamekaṁ prathamadhyānikamekaṁ kāmadhātukamekaṁ)||

24 | katamaddhayānaṁ paripūritaṁ (=siddhaṁ)bhavati | (yadā)phalabhūtamadhobhūmikaṁ nirmāṇacittaṁ niṣpādayati tridhyānabhūmikāṁ sthitiṁ brahmalokavijñānaṁ (cāsya)purato vartate samartho (bhavati)draṣṭuṁ śrotuṁ tadā paripūritaṁ bhavati (dhyānaṁ)| atha (yadā)nirodhastadā'paripūritaṁ (=asiddhaṁ)bhavati |

[ityabhidharmāmṛtaśāstre saṁkīrṇasamādhinirdeśo nāma trayodaśo binduḥ ||]

Caturdaśo binduḥ

caturdaśo binduḥ

bodhipākṣikadharmāḥ

1 | smṛtyupasthānāni samyakprahāṇāni ṛddhipādā indriyāṇi balāni bodhyaṁgāni (aṣṭāṁgika ārya-)mārgaśceti sapta dharmā nirvāṇopagāḥ | tatra sapta bodhyaṁgānyanāsravāṇi | ṣaḍ vibhājyāḥ | (te)sāsravā vā anāsravā vā | apara āha | sapta bodhyaṁgāni aṣṭāṁgikaḥ (ārya-)mārgaśceti sākalyena anāsravāṇi | anye śiṣṭāḥ (dvidhā)vibhājyāḥ ||

2 | catvāri smṛtyupasthānāni | caturvidhāni (api)sarvabhūmidhyāneṣu saṁgṛhītāni bhavanti | nityaṁ smṛtirakṣiṇī prajñocyate smṛtyupasthānaṁ | tridhā kāyasmṛtau bhāvitā prajñocyate kāyasmṛtyupasthānaṁ | evaṁ vedanā-citta-dharmasmṛtyupasthānāni | iti catvāri smṛtyupasthānāni ||

3 | kimupādāya nocyante trīṇi smṛtyupasthānāni | paṁca vā smṛtyupasthānāni | yasmāccaturo viparyāsān bhindanti tasmāccatvāryevocyante smṛtyupasthānāni (na nyūnādhikāni)||

4 | kāyasmṛtyupasthānaṁ katamat | yasmāt śucisaṁjñāviparyāsaṁ vyantīkaroti tasmāt kāyasatyalakṣaṇaṁ pratyavekṣate (yadidaṁ)ṣaṭtriṁśadaśucayaḥ | tathāhi | mṛte kṛmijanma pūtigandhaḥ asthikānāṁ sthitirityādi | evaṁ paśyan kāyaṁ śucisaṁjñāviparyāsaṁ kṣapayati ||

5 | vedanāsmṛtyupasthānaṁ katamat | paśyati sarvāsāṁ vedanānāṁ utpādaṁ sthitiṁ nirodhaṁ duḥkhatāṁ | sukhāyāṁ vedanāyāṁ rāgasaṁyojanaṁ duḥkhāyāṁ vedanāyāṁ dveṣa (=pratigha)saṁyojanaṁ aduḥkhāsukhāyāṁ vedanāyāmavidyāsaṁyojanaṁ | paśyati (sarvamidaṁ)anityaṁ duḥkhaṁ śūnyaṁ anātmakaṁ | iti vedanāsmṛtyupasthānaṁ ||

6 | cittasmṛtyupasthānaṁ katamat | paśyati kliṣṭaṁ cittaṁ akliṣṭaṁ cittaṁ samāhitaṁ cittaṁ asamāhitaṁ cittaṁ | paśyatyanityādikaṁ | iti cittasmṛtyupasthānaṁ ||

7 | dharmasmṛtyupasthānaṁ katamat | paśyatyadhyātmadharmān | paśyati bahirdhādharmān | paśyatyadhyātmabahirdhādharmān | paśyati yo'tīto dharmo yaścāgataḥ | paśyati saṁyojanāni kati hīnāni katyahīnāni | paśyati duḥkhaṁ (yad)anityaṁ | paśyati samudayahetūn | paśyati nirodhaṁ | iti dharmasmṛtyupasthānaṁ ||

8 | catvāri samyakprahāṇāni katamāni | utpannānāmakuśalānāṁ dharmāṇāṁ prahāṇāya cchandaṁ janayati vyāyāmacchaṁdo vīryamārabhate cittaṁ pragṛhṇāti kuśaladharmasthitaye | anutpannānāmakuśalānāṁ dharmāṇāṁ anutpādāya vīryamārabhate citaṁ pragṛhṇāti kuśaladharmasthitaye | anutpannānāṁ kuśalānāṁ dharmāṇāmutpādāya cchandaṁ janayati vīryamārabhate kuśaladharmasthitaye | utpannānāṁ kuśaladharmāṇāṁ smṛtaye sthitaye asaṁpramoṣāya bhūyobhāvāya vaipulyāya (cchandaṁ janayati)vīryamārabhate kuśaladharmasthitaye ||

9 | catvāraḥ ṛddhipādāḥ katame | chaṁdasamādhiḥ vīryasamādhiḥ cittasamādhiḥ mīmāṁsāsamādhiḥ | etebhyaḥ sarvapuṇyaguṇaprāptirityucyante ṛddhipādāḥ | chandasamādhiprahāṇasaṁskārasamanvāgataḥ prathama ṛddhipādaḥ | icchākaraṇāducyate cchandaḥ | cittaṁ na vikṣiptaṁ bhavatītyucyate samādhiḥ | chandaḥ vīryaṁ smṛtiḥ prajñā prītiḥ prasrabdhiḥ - ityete sarvasaṁskārāḥ chandasamādhisahagatāḥ | evaṁ vīryacittamīmāṁsācchaṁdādhimātracchandataḥ samādhilābha ityucyate cchandasamādhiḥ | evaṁ vīryacittamīmāṁsā (samādhayaḥ)| iti catvāraḥ ṛddhipādāḥ ||

10 | śraddhā vīryaṁ smṛtiḥ samādhiḥ prajñā cetyucyante paṁcendriyāṇi | caturṣu (=triṣu ratneṣu śīle ca )akṣobhyaśraddheṣu yā śraddhā socyate śraddhendriyaṁ | caturṣu samyakprahāṇeṣu vīryamucyate vīryendriyaṁ | caturṣu smṛtyupasthāneṣu smṛtyasaṁpramoṣa ucyate smṛtīndriyaṁ | caturṣu dhyāneṣu samādhirucyate samādhīndriyaṁ | catuḥsatyeṣu prajñocyate prajñendriyaṁ | indriyaṁ (indateḥ)dakṣatvāt kṣipratvāt agriyatvāt | itīndriyārthaḥ ||

11 | śraddhādīni paṁca balāni | pāpakākuśaladharmairaparikṣeyamiti balaṁ | parittāni bhavantīndriyāṇi mahānti bhavanti balāni ||

12 | smṛtiḥ dharmavicayaḥ vīryaṁ prītiḥ prasrabdhiḥ samādhiḥ upekṣā ceti sapta bodhyaṁgāni | smṛtiḥ katamā | smarati saṁskṛti dharmāḥ sotpādanirodhā vividhadoṣāḥ | nirvāṇaṁ praṇītataraṁ | ityucyate smṛtiḥ saṁbodhyaṁgaṁ | tatra vivicya (=vibhajya )bhāvayatīti dharmavijayaḥ saṁbodhyaṁgaṁ | tatra bhāvayan vīryamārabhate iti vīryaṁ saṁbodhyaṁgaṁ | tatra prāptaṁ kuśaladharmarasaṁ sākṣātkurvan tṛpyatīti prītiḥ saṁbodhyaṁgaṁ | tatra bhāvayataḥ kāyacittayoḥ laghutā mṛdutā viśramaḥ samādhyanuvṛttirityucyate prasrabdhiḥ saṁbodhyaṁgaṁ | tatra ālaṁbanasthitikaṁ cittaṁ,na bhavati vikṣiptamiti samādhiḥ saṁbodhyaṁgaṁ | tatrāhitaṁ cittaṁ viramati na smarati na ca cchandaṁ janayati - ityupekṣāsaṁbodhyaṁgaṁ | vividhaprajñābhiḥ (=saṁbodhyaṁgarūpābhiḥ)dhyānasamāpattibalaprāptiḥ | sarvakleśahāniḥ | iti saptānāṁ saṁbodhyaṁgānāṁ phalaṁ ||

13 | samyagdṛṣṭiḥ samyaksaṁkalpaḥ samyagvāk samyakkarma samyagājīvaḥ samyagvyāyāmaḥ samyaksmṛtiḥ samyaksamādhiḥ | ityaṣṭāṁgikaḥ āryamārgaḥ | catuḥsatyeṣu satyato dhīrucyate samyagdarśanaṁ | tatra kuśalena adveṣeṇa akleśena (ceti)triprakāreṇa vipaśyanocyate samyaksaṁkalpaḥ | caturvidhamithyāvākprahāṇamucyate samyagvāk | trividhamithyākarmaprahāṇamucyate samyakkarma | akuśalamithyājīvaprahāṇamucyate samyagājīvaḥ | tatra bhāvayan vīryamārabhate iti samyagvyāyāmaḥ | tatra bhāvayataḥ smṛtyasaṁpramoṣa ucyate samyaksmṛtiḥ | tatra samāhitā sthitirucyate samyaksamādhiḥ | ityaṣṭāṁgiko nirvāṇagāmī mārgaḥ ||

14 | śraddhā vīryaṁ smṛtiḥ samādhiḥ prajñā prītiḥ prasrabdhiḥ upekṣā saṁkalpaḥ śīlaṁ | iti daśadharmāṇām (eva)saptatriṁśadvibhāgāḥ | (tadyathā)| śraddhā dharma ucyate śraddhendriyaṁ śraddhā balaṁ | vīryamucyate vīryendriyaṁ vīryabalaṁ catuḥsamyakprahāṇāni vīryasaṁbodhyaṁgaṁ (mārgāgaṁ)samyagvyāyāmaḥ | (smṛtirucyate)smṛtīndriyaṁ smṛtibalaṁ smṛtisaṁbodhyaṁgaṁ (mārgāgaṁ)samyaksmṛtiḥ | prītiḥ prītisaṁbodhyaṁgaṁ | prajñā prajñendriyaṁ prajñābalaṁ catuḥsmṛtyupasthānāni dharmavicayasaṁbodhyaṁgaṁ samyagdṛṣṭiḥ | prasrabdhiḥ prasrabdhibodhyaṁgaṁ | samādhiḥ samādhīndriyaṁ samādhibalaṁ catvāraḥ ṛddhipādāḥ samādhisaṁbodhyaṁgaṁ (mārgāgaṁ)samyaksamādhiḥ | upekṣā upekṣāsaṁbodhyaṁgaṁ | saṁkalpaḥ (mārgāgaṁ)samyaksaṁkalpaḥ | śīlaṁ samyagvāk samyakkarma samyagājīvaḥ || samyaghetupratyayaiścaturvidhaprajñopasthitirucyate smṛtyupasthānaṁ | samyagvīryamucyate samyakprahāṇaṁ | ālaṁbane samāhitā sthitiravikṣepa ucyate catvāraḥ ṛddhipādā iti | mṛdvindriyapudgalasya citta jātāni (śraddhādīni)ucyate paṁcendriyāṇi | adhimātrendriyapudgalasya citte jātāni (śraddhādīni)ucyaṁte paṁca balāni | satyadarśanamārge (samyagdṛṣṭyādiḥ)ucyate aṣṭāṁgikaḥ āryamārgaḥ | bhāvanāmārge (smṛtyādīni)ucyaṁte sapta bodhyaṁgāni || daśabhireteḥ pūrvokteḥ dharmaiḥ saptatriṁśad (bodhi)pākṣikāṇāṁ saṁgrahaḥ ||

15 | asamāpattidhyānabhūmau ṣaṭtriṁśad varjayitvā prītisaṁbodhyaṁgaṁ | dvitīyadhyānabhmāvapi ṣaṭtriṁśad varjayitvā samyaksaṁkalpaṁ | tṛtīyadhyānacaturthadhyānamadhyamadhyāneṣu ca paṁcatriṁśad varjayitvā prītisaṁbodhyaṁgaṁ samyaksaṁkalpaṁ | prathamadhyāne saptatriṁśat | triṣu śūnya (=ārūpya)samāpattiṣu dvātriṁśad varjayitvā prītisaṁbodhyaṁgaṁ samyaksaṁkalpaṁ samyagvācaṁ samyakkarma samyagājīvaṁ | bhavāgre dvāviṁśatiraṁgāni varjayitvā sapta bodhyaṁgāni aṣṭau mārgāṁgāni | kāmadhātāvapi dvāviṁśatiḥ varjayitvā saptabodhyaṁgāni aṣṭau mārgāṁgāni ||

[ityabhidharmāmṛtaśāstre bodhipākṣikadharmanirdeśo nāma caturdaśo vinduḥ ||]

Paṁcadaśo binduḥ

paṁcadaśo binduḥ

catvāri satyāni

1 | catvāri (ārya-)satyāni | duḥkhasatyaṁ samudaya nirodha mārgasatyaṁ || duḥkhasatyaṁ katamat | ekavidhaṁ kleśalakṣaṇaṁ duḥkhaṁ | dvividhaṁ kāyaduḥkhaṁ cittaduḥkhaṁ | trividhaṁ duḥkhaduḥkhaṁ vipariṇāmaduḥkhaṁ saṁskārānityatāduḥkhaṁ | kāyikamadhyātmaduḥkhaṁ bahirdhāduḥkhaṁ mānasikamadhyātmaduḥkhaṁ bahirdhāduḥkhaṁ | paṁcavidhaṁ paṁcopādānaskaṁdhāḥ duḥkhaṁ | ṣaḍvidhaṁ tridhātu (=kāmarūpārūpya )duḥkhaṁ triviṣa (=rāgadveṣamoha)duḥkhaṁ | saptavidhaṁ saptavijñānasthitiduḥkhaṁ | aṣṭavidhaṁ duḥkhaṁ (tadyathā)jātiḥjarā vyādhiḥ maraṇaṁ apriyasaṁyogaḥ priyaviprayogaḥ yatparyeṣamāṇo na labhate tat sarvaṁ vividhaṁ (=paṁcopādānaskaṁdharūpaṁ)duḥkhaṁ | iti duḥkhasatyaṁ || (samudaya satyaṁ katamat)| vividhaduḥkhahetavaḥ paṁcopādānaskaṁdhāḥ | iti samudaya satyaṁ | nirodhasatyaṁ katamat | duḥkhasamudayānāmaśeṣato nirodhe nirodhālaṁbanā prajñocyate nirodhasatyaṁ || (mārgasatyaṁ katamat)| āryāṣṭāṁgikamārgabhāvanocyate mārgasatyaṁ ||

2 | catuḥsatyakramo hānādhigamato jñātavyaḥ | svayaṁ bhāvayataḥ satyalakṣaṇaṁ satyataḥ phalaprāptiḥ bhāvayituḥ pudgalasya na vaṁcanetyucyate satyaṁ | sthūlāvabodhataḥ kramaḥ | audarikaṁ duḥkhasatyaṁ sahajaṁ budhyate iti prathamaṁ duḥkhasatyaṁ | duḥkhāvabodhād duḥkhahetoranumānaṁ | tataḥ samudeti tatrotpadyata iti samudayasatyaṁ dvitīyaṁ | asya duḥkhasatyasya yatrāyatane nirodhastatra prāptirvimokṣabhāvanāyā nirvāṇe | iti nirodhasatyaṁ tṛtīyaṁ | etasya nirodhasatyasya prāptiḥ katamā | bhāvayataḥ āryāṣṭāṁgikamārgaṁ prahīṇe saṁyojane nirodhasatyaprāptiḥ | iti mārgasatyaṁ caturthaṁ ||

3 | paṁcopādānaskaṁdhā nāma phalakāle duḥkhasatyaṁ | hetukāle paṁcopādānaskaṁdhā nāma samudayasatyamatho duḥkha satyamapi | tathāhi | puruṣaḥ putro'pi nāma pitāpi ||

4 | samudayasatyaṁ bhūyaḥsaṁyojanaṁ | saṁyojanāni katamāni | nava saṁyojanāni | rāgasaṁyojanaṁ pratigha māna avidyā dṛṣṭi parāmarśa mātsarya īrṣyāsaṁyojanaṁ | traidhātuko rāgaḥ rāgasaṁyojanaṁ | sattveṣu cittasya prakopo doṣaścaṁḍatā nāma pratighasaṁyojanaṁ | saptavidho māno mānasaṁyojanaṁ | tridhātupratisaṁyuktaḥ saṁmoho'vidyāsaṁyojanaṁ | trividhā dṛṣṭiḥ [satkāya-antagrāha-mithyādṛṣṭitrayaṁ]dṛṣṭisaṁyojanaṁ | dve dṛṣṭī [dṛṣṭiparāmarśaśīlavrataparāmarśadvayaṁ]parāmarśasaṁyojanaṁ | catuḥsatyeṣvaniścayo vicikitsā saṁyojanaṁ | cittasya kṛpaṇatā snehādanutsargo mātsaryaṁsaṁyojanaṁ | dveṣeṇa pareṣvasūyā īrṣyāsaṁyojanaṁ ||

5 | nirodhasatyaṁ dvividhaṁ | sāsravaḥ (=sopādiḥ)saṁyojanakṣayo (nāma)nirodhaḥ prathamavidhaḥ | anāsravaḥ(=nirupādiḥ)pratipadā (nirodhagāminyā)saṁyojanakṣayo (nāma)nirodho dvitīyavidhaḥ ||

6 | vividhāḥ pariśuddhadharmāḥ | tadyathā | catasraḥ pratisaṁvidaḥ | dharmaḥ niruktiḥ pratibhānaṁ arthaḥ | sarveṣu nāmapadeṣu satyalakṣaṇato jñānaṁ dharmapratisaṁvit | sarvavacaneṣu śāstreṣu prajñocyate nirukti pratisaṁvit | sarvadharmeṣu satyalakṣaṇato jñānaṁ pratibhānapratisaṁvit | sarvā prajñā vacanaṁ dhyānaṁ abhijñāḥ jñānaṁ nāma arthapratisaṁvit ||

7 | srota āpannasya catasro'kṣayāḥ śraddhāḥ | buddhe'kṣayā śraddhā dharme'kṣayā śraddhā saṁghe'kṣayā śraddhā pariśuddhaśīle'kṣayā śraddhā | arhatphalasaṁgṛhīteṣu sarvāśaikṣadharmeṣu vividheṣu buddhādhimātrapuṇyaguṇeṣu anāsravā śraddhocyate buddha'kṣayā śraddhā | nirvāṇe'nāsrave ca anāsravasatye ca śaikṣāśaikṣadharmeṣu ca bodhisattvasatyapuṇyaguṇeṣu ca anāsravā śraddhā pariśuddhocyate dharme'kṣayā śraddhā | anāsravamārgaphalaprāptau śraddhā caturṣu puruṣayugeṣu aṣṭapuruṣapudgaleṣu sarvapuṇyaguṇeṣu buddhaśrāvakasaṁgheṣu | aśraddhānyatīrthikeṣu | ityucyate saṁghe'kṣayā śraddhā | avijñaptyanāsravaśīlayoranāsravā śraddhocyate śīle'kṣayā śraddhā | pariśuddhasatyaprajñāsahagatā śraddhā tasmādavijeyetyanāsravaśīlaṁ | tasmādeva akṣayā śraddhā | iti catasro'kṣayāḥ śraddhāḥ ||

8 | catvāri vastūni bhavanti samādhiṁ bhāvayataḥ | samādhiṁ bhāvayato dṛṣṭe dharme sukhavihāralābhaḥ | samādhiṁ bhāvayato jñānadarśanalābhaḥ | samādhiṁ bhāvayato bhavati prajñāvivekaḥ | samādhiṁ bhāvayataḥ āsravāṇāṁ nirodhasya lābhaḥ sarvasya ca kuśalasya | prathame dhyāne dṛṣṭasukhavihārasya cyutyutpādajñānābhijñāyāḥ lābhaḥ | ityucyate jñānadarśanaṁ | upāyena paryeṣayate puṇyaguṇān kāmadhātāvavijñaptiśīlaṁ śrutacintābhāvanānuśaṁsān sarvarūpārūpyadhātudharmān sarvān anāsravān saṁskṛtān dharmān ityucyate prajñāvivekaḥ | vajropama caturthadhyānena caramaśaikṣacittasahasaṁprayuktena āsravanirodhaḥ | ityucyate bhāvitaḥ samādhiḥ | āsravāṇāṁ nirodhalābhaścaturthadhyānasaṁgṛhītaḥ ||

9 | catasraḥ pratipadaḥ | duḥkhāpratipaddhaṁdhābhijñā duḥkhāpratipatkṣiprābhijñā sukhāpratiddhaṁdhābhijñā sukhāpratipatkṣiprābhijñā | śraddhānusāriṇo'nāsravadharmaṇo mṛdvindriyasya duḥkhāpratipaddhaṁdhābhijñā | dharmānusāriṇo'nāsravadharmaṇo'dhimātrendriyasya duḥkhāpratitkṣiprābhijñā | maulacaturdhyāneṣvadhimātrendriyasya mṛdvindriyasya ca dharmābhidhā sukhāpratipat | tatra ko hetuḥ | śamathavipaśyanāmārgaḥ samaḥ (tatra)iti hetuḥ | anyabhūmiṣu śamathavipaśyanayoruccāvacatvād duḥkhā (pratipad)| dvayoḥ sthānayo rasamāpatyanantaradhyānayoḥ śamathamārgo'lpīyān vipaśyanāmārgo bhūyān | ārūpyadhātau vipaśyanāmārgo'lpīyān śamathamārgo bhūyān | iti duḥkhādhigamatvād duḥkhā pratipat ||

10 | sapta vijñānasthitayaḥ | kāmadhātau sarvadevamanuṣyāḥ rūpadhātau sthāpayitvā prathamopapannadevān brahmakāyikā devāḥ nānākāyanānāsaṁjñāḥ |1| brahmalokopapannāḥ nānākāyaikasaṁjñāḥ |2| dvitīyadhyānopapannadevāḥ ekakāyanānāsaṁjñāḥ |3| tṛtīyadhyānopapannadevāḥ ekakāyaikasaṁjñāḥ |4| ākāśānantyāyatanopapannadevāḥ |5| vijñānānantyāyatanopapannadevāḥ |6| ākiṁcanyāyatanopapannadevāḥ |7| iti saptavijñānasthitayaḥ ||

11 | durgatau duḥkhā vedanā nihanti vijñānamiti na ṣaḍvijñānasthitiḥ | caturthadhyāne'saṁjñisamāpattau (ca)vijñānasya nihatatvād naivāsti ṣaḍvijñāna sthitiprāptiḥ ||

12 | nava sattvāvāsāḥ | etāḥ saptavijñānasthitayaḥ asaṁjñisattvāḥ naivasaṁjñānāsaṁjñāyatanaṁ ceti nava sattvāvāsāḥ | eteṣvāvāseṣu (sattvānāṁ)sthitatvāt ||

13 | vastrācchādana-peyakhādya-śayanāsana (saṁtoṣeṇa)prītyā (ca)kleśakṣayo bhāvanālaṁbanabalena mārgaprāptiḥ | ityucyaṁte catvāryāryabījāni | praṇīte vā hīne vā vastrācchādane peyakhādye śayanāsane saṁtoṣa iti trīṇyāryabījāni | arjane (duḥkhaṁ)rakṣaṇe (duḥkhaṁ)kṣaye duḥkhaṁ | tribhiraterduḥkhaiḥ kuśalamārgahāniḥ | nirāhārasya prāṇino na sthitiḥ | ityadhigantavyaḥ saṁtoṣaḥ | [(tataḥ)]triduḥkhakṣayaḥ |]vairāgyacitte sukhaprītilābhaḥ | iti caturthaṁ (āryabījaṁ)||

14 | aṣṭottaraśataṁ vedanāḥ cakṣuśrotraghrāṇajihvākāyamanaḥsparśairjāyante | ityucyaṁte ṣaṭ sparśāḥ | (tāḥ sparśajā vedanāḥ)bhavanti trividhāḥ | cakṣuṣā rūpadarśane saumanasyaṁ daurmanasyaṁ upekṣā yāvat manasā dharmasmaraṇe saumanasyaṁ daurmanasyaṁ upekṣā | tatra (ekaikā)kuśalā (vā bhavati)akuśalā (vā)| (evaṁ)kuśalā aṣṭādaśa akuśalā aṣṭādaśa | iti ṣaṭtriṁśat (punaḥ)tridhā bhinnā bhavantyaṣṭottaraśataṁ | (tathāhi |)ṣaṭtriṁśadatītāḥ ṣaṭtriṁśadanāgatāḥ ṣaṭtriṁśat pratyutpannāḥ || paṁca vijñānāni na śaknuvanti vivektaṁ tasmānna teṣu saumanasyaṁ (vā bhavati)daurmanasyaṁ (vā)||

15 | cittasaṁskāre caitasikadharmasaṁtānasya satatamavicchinnaṁ cintanaṁ nāma smṛtiḥ | ciṁtanahetupratyayā anusaranti tān dharmān iti hetorāvṛttā bhavati cintā | vijñānasmṛtibalaṁ dṛḍhaṁ bhavati | iti nātītadharmapramoṣaḥ ||

16 | suptaḥ puruṣaḥ cittacaitasikadharmān pratītya svapnaṁ paśyati | ahetukamapratyayaṁ cāpi paśyati svapnaṁ | eṣa svapno'tītādhvako vā bhavati anāgatādhvako vā | cet svapne jātaśṛṁgapuruṣadarśanaṁ tarhi (jāgarasya)pūrvaṁ gośṛṁgadarśanaṁ tato manuṣyasya kimupādāya na śṛṁgotpāda iti bhṛśaṁ cintanaṁ tata evaṁ smarataḥ prasuptasya bhavati jātaśṛṁgapuruṣadarśanaṁ ||

17 | cittavikṣepaścittabhrāntirucyate saṁmohaḥ | glāne śarīre bhavati saṁmohaḥ | bhūtāveśena bhavati saṁmohaḥ | pūrvajanmapratyayena bhavati saṁmohaḥ ||

18 | trayaḥ skaṁdhāḥ | śīlaskaṁdhaḥ | samādhiskaṁdhaḥ | prajñāskaṁdhaḥ || śīlaskaṁdhaḥ katamaḥ | kāmadhātau vijñapti (śīlaṁ)avijñaptiśīlaṁ | rūpadhātāvavijñaptiśīlaṁ || samādhiskaṁdhaḥ katamaḥ | caturdaśa samādhibhāvanā || prajñāskandhaḥ katamaḥ | trividhā prajñā | śrutamayī cintāmayī bhāvanāmayī | kāmadhātau dvividhā śrutamayī bhāvanāmayī | ārūpyadhātāvekadhā bhāvanāmayī ||

19 | dvividhaḥ saṁvaraḥ | prathama indriyasaṁvaraḥ dvitīyaḥ śīlasaṁvaraḥ | indriyasaṁvaraḥ katamaḥ | nopagantuṁ prāpya cintayati mātṛgrāmaṁ | agrajānujātanujāsaṁjñayā paśyan striyaṁ na cintayati na strīndriyasaṁjñāsmṛtiṁ janayati yato bhavanti bhūyaḥkleśāḥ | pratyavekṣate kāyacittavivekaṁ | itīndriyasaṁvaraḥ || (śīlasaṁvaraḥ katamaḥ |)pariharati rāgaṁ vividhānakuśalān dharmān | akliṣṭo'nāpattikacittaḥ pūrṇaṁ pariharati sapta rāgān | iti śīlasaṁvaraḥ ||

20 | kleśaḥ akuśalakarma akuśalakarmavipākaḥ | iti trīṇyāvaraṇāni | (paṁca)ānantaryakarmāṇi atyantagurukleśebhyastridurgativipākebhyo bhavanti | triṣu vastuṣu cedekamapi vastu na bhavatyāryadharmalābhaḥ | ityucyate āvaraṇaṁ ||

21 | akuśalavitarkavicārastrividhaḥ | rāgo dveṣo mohaḥ | ete nighnanti trividhaṁ kuśalavitarkavicāraṁ arāgaṁ adveṣaṁ amohaṁ | trividho vyādhiḥ | rāgo dvaṣo mohaḥ | eṣāṁ trividhavyādhīnāṁ trividhaṁ bhaiṣajyaṁ kāye aśucyanupaśyanā satveṣu maitrībhāvanā dvādaśāṁgaḥ pratītyasamutpādaḥ | iti trividhaṁ bhaiṣajyaṁ ||

22 | kāyabhāvanā śīlabhāvanā cittabhāvanā prajñābhāvanā | ete dharmāḥ sarvān (eva)akuśalavipākān na pratilabhate | labhate vā'lpataravipākaṁ | pratyutpanne'dhvani vā anāgate'dhvani vā labhate vipākaṁ | kāyabhāvanā katamā | vividhaṁ paśyatyanityādikaṁ | śīlabhāvanā katamā | gṛhītvā śīlaṁ nāpattiko bhavati satatamanurakṣati | cittabhāvanā katamā | akuśalavitarkaparihāreṇa bhāvayati kuśalavitarkān | prajñābhāvanā katamā | vividhaṁ vivinakti kuśaladharmān vardhayati prajñāṁ ||

23 | kuśalacārī pudgalaḥ kṣipraṁ labhate sugatiṁ | akuśalacārī kṣipraṁ labhate durgatiṁ | kuśalo vā pudgalaḥ patati durgatau | akuśalo vā pudgalo jāyate sugatau | pūrvajanmaprabalahetupratyayaiḥ vipākaśeṣasyāparisamāptau cyutikāle caramacittasya kuśalākuśalahetoḥ kuśalo'pi patati durgatau akuśalo'pi jāyate sugatau ||

[ityabhidharmāmṛtaśāstre catuḥsatyanirdeśo nāma paṁcadaśo binduḥ ||]

Ṣoḍaśo binduḥ

ṣoḍaśo binduḥ

miśrakasaṁgrahaḥ

1 | catvāri śrāmaṇyaphalāni ṣaḍ dharmāḥ paṁcaskaṁdhāḥ pratisaṁkhyānirodhaḥ | iti catuḥphalavibhāgaḥ ||

2 | ahaṁtphalaṁ navabhūmisaṁgṛhītaṁ varjayitvā bhavāgraṁ | tṛtīyaphalaṁ ṣaḍbhūmisaṁgṛhītaṁ varjayitvā catura ārūpyān dharmajñānābhāvāt | srotaāpannasakṛdāgāmināvasamāpattidhyānabhūmisaṁgṛhītau avītakāyarāgapudgalau ||

3 | catvāro viparyāsāḥ | anitye nityasaṁjñā - iti cittaviparyāsaḥ saṁjñāviparyāsaḥ dṛṣṭiviparyāsaḥ | duḥkhe sukhasaṁjñā | aśucau śucisaṁjñā | anātmanyātmasaṁjñā - iti cittaviparyāsaḥ saṁjñāviparyāsaḥ dṛṣṭiviparyāsaḥ ||

4 | sarveṣāṁ viparyāsānāṁ duḥkhasatyadarśanena prahāṇaṁ | tatkasya hetoḥ | yasmāt (sarva-)saṁskārān pratītya duḥkhasthānaṁ tisṛbhirdṛṣṭibhiḥ saṁgṛhītaṁ kāyaviparyāsadṛṣṭayā (=satkāyadṛṣṭayā)antagrāhadṛṣṭayā dṛṣṭiparāmarśana | sarvā dvāṣaṣṭhidṛṣṭayaḥ paṁcamithyādṛṣṭisaṁgṛhītāḥ ||

5 | paṁcaskaṁdheṣu asadbhūtātmasu satyātmadṛṣṭiḥ satkāyadṛṣṭiḥ | śāśvatocchedamāśritya hetupratyayaphalavipakānāmajñānamantagrāhadṛṣṭiḥ | na satya na satyadharmāḥ nāyaṁ loko na paro lokaḥ na nirvāṇaṁ na ca catuḥsatyāni - iti mithyā dṛṣṭiḥ | aparamārthamabhūtamasukhamaśuciṁ paśyati sukhaṁ śuciṁ | tathāhi | chinnatageḥ sthāṇau sthite rātrau dūrād darśane puruṣa iti | iti dṛṣṭiparāmarśaḥ | ahetau hetu dṛṣṭiḥ amārge mārgadṛṣṭiḥ - iti śīlavrataparāmarśaḥ ||

6 | satkāyadṛṣṭirduḥkhasatyaheyā paṁcaskaṁdheṣvātmavikalpanāt | śāśvatocchedasaṁjñā duḥkhasatyaheyā pratyutpannapaṁcaskaṁdhālaṁbanāt | mithyādṛṣṭirduḥkhasatyaduḥkhadarśanaheyā | evaṁ samudayanirodhamārgasatyasamudayanirodhamārgadarśanaheyo dṛṣṭiparāmarśaḥ | duḥkhasatye cet sukhaśucyādivikalpanā duḥkhadarśanaheyā | evaṁ samudayanirodhamārgasatyeṣu sukhaśucyādivikalpanā cet samudayanirodhamārgadarśanaheyā | śīlavrataparāmarśaḥ amārge nirvāṇaparyeṣaṇaṁ ahetau hetudarśanaṁ | śīlavrataparāmarśo duḥkhadarśanamārgadarśanaheyaḥ ||

7 | ṣaḍbhāvanāḥ | prāptibhāvanā saṁskārabhāvanā prahāṇabhāvanā vivarjanabhāvanā vivekabhāvanā saṁvarabhāvanā | prāptibhāvanā katamā | aprāptakuśaladharmapuṇyaguṇānāṁ prāptiḥ prāptau ca sarvānyapuṇyaguṇānāmapi prāptiḥ | saṁskārabhāvanā katamā | prāptasarvapuṇyaguṇānāṁ pratyutpannādhvasaṁskāraḥ | prahāṇabhāvanā katamā | kuśaladharmaiḥ sarvasaṁyojanaprahāṇaṁ | vivarjanabhāvanā katamā | praheyā akuśaladharmāḥ | vivekabhāvanā katamā | vivicya kāyasatyalakṣaṇadarśanaṁ | saṁvarabhāvanā katamā | ṣaḍindriyāṇi samalāni yasmād viṣayamālaṁvya parābhavanti ||

8 | paṁcendriyāṇi | (daurmanasyaṁ saumanasyaṁ sukhaṁ duḥkhaṁ upekṣā)| daurmanasyendriyasya prathamadhyāne nirodhaḥ | akhilasya duḥkhendriyasya dvitīyadhyāne nirodhaḥ | akhilasya saumanasyendriyasya tṛtīyadhyāne nirodhaḥ | akhilasya sukhendriyasya caturthadhyāne nirodhaḥ | akhilasya upekṣendriyasya asaṁjñisamāpattau nirodhaḥ ||

9 | trayaḥ sākalyena dhātavaḥ | prahāṇadhātuḥ vairāgyadhātuḥ nirodhadhātuḥ | jahāti rāgasaṁyojanaṁ sarvānanyakleśāniti prahāṇadhātuḥ | rāgasaṁyojanaprahāṇamucyate vairāgyadhātuḥ | sarvānyadharmaprahāṇaṁ nāma nirodha dhātuḥ ||

10 | rāganirodhe prāpnoti cittavimokṣaṁ | mohanirodhe prāpnoti prajñāvimokṣaṁ ||

11 | rāgo'pratisaṁyukte'dhyātmabahirdhāyatane pratisaṁyojayituṁ prabhuḥ | tathāhi | yugaṁ pratisaṁyojayituṁ vṛṣabhau | tasmāt rāgārāgaviṣayeṣu rāgadveṣāsaṁprayuktaṁ bhavati upekṣācittaṁ ||

12 | daśa dharmāḥ | kāmadhātuḥ rūpadhātuḥ ārūpyadhātuḥ anāsravaḥ saṁprayuktaḥ viprayuktaḥ kuśalaḥ akuśalaḥ avyākṛtaḥ asaṁskṛtaḥ | iti daśa dharmāḥ ||

13 | paṁca dharmā dharmājñānālaṁbanāḥ | katame paṁca | kāmadhātupratisaṁyuktāḥ saṁprayukta-viprayuktadharmāḥ | anāsravāḥ saṁprayukta-viprayuktadharmāḥ | kuśalāḥ asaṁskṛtadharmāśceti paṁca dharmāḥ ||

14 | anvayajñānālaṁbanāḥ sapta dharmāḥ | katame sapta | kāmadhātupratisaṁyuktāḥ saṁprayuktaviprayuktadharmāḥ | ārūpyadhātupratisaṁyuktāḥ saṁprayuktaviprayuktadharmāḥ | anāsravāḥ saṁprayuktaviprayuktadharmāḥ | kuśalāḥ asaṁskṛtadharmāśca ||

15 | paracittajñānālaṁbanāstrayo dharmāḥ | kāmadhātu pratisaṁyuktāḥ saṁprayuktadharmāḥ | rupadhātupratisaṁyuktāḥ saṁprayuktadharmāḥ | anāsravāḥ saṁprayuktadharmāḥ ||

16 | saṁvṛtajñānālaṁbanā daśa dharmāḥ | kāmadhātupratisaṁyuktāḥ saṁprayuktaviprayuktadharmāḥ | rūpadhātupratisaṁyuktāḥ saṁprayuktaviprayuktadharmāḥ | ārūpyadhātupratisaṁyuktāḥ saṁprayuktaviprayuktadharmāḥ | anāsravāḥ saṁprayuktaviprayuktadharmāḥ | kuśalāḥ asaṁskṛtadharmāḥ | avyākṛtāḥ asaṁskṛtadharmāśca ||

17 | duḥkhajñānaṁ samudayajñānaṁ pratyekaṁ ṣaḍdharmālaṁbanaṁ | tridhātupratisaṁyuktāḥ saṁprayuktaviprayukta dharmāḥ | iti ṣaḍ dharmāḥ | nirodhajñānamekadharmālaṁbanaṁ | kuśalāḥ saṁskṛtadharmāḥ (iti sa eko dharmaḥ)| mārgajñānaṁ dvidharmālaṁbanaṁ | anāsravāḥ saṁprayuktaviprayukta dharmāḥ ||

18 | kṣayajñānamanutpādajñānaṁ ca navadharmālaṁbane | varjayitvā 'vyākṛtānasaṁskṛtadharmān ||

19 | svabhūmikaḥ kleśaḥ svabhūmikasaṁyojanānusaṁyojitāni sarvatragāṇi saṁyojanāni svabhūmau parabhūmau sarvatragāṇi | pratyekamanyat saṁyojanaṁ svabhūmika saṁyojanānusaṁyojitaṁ ||

20 | dvividhā dharmāḥ | saṁprayuktā viprayuktāśca | saṁprayuktā dharmākatame | sarvacittacaitasikā dharmāḥ | katame viprayuktā dharmāḥ | prāptyādayaḥ saptadaśa dharmāḥ | prāptiḥ |1| āsaṁjñikasamāpattiḥ |2| nirodhasamāpattiḥ |3| asaṁjñi āyatanaṁ |4| jīvitendriyaṁ |5| nikāyasabhāgatā |6| sthānaprāptiḥ |7| vastuprāptiḥ |8| āyatanaprāptiḥ |9| jātiḥ |10| jarā |11| sthitiḥ |12| anityatā |13| nāmakāyaḥ |14| padakāyaḥ |15| vyaṁjanakāyaḥ |16| pṛthagjanatvaṁ |17| sarvadharmaprāptikāle cittaviprayuktadharmāṇāṁ sahaprāptirityucyate prāptiḥ | janmamaraṇanirviṇṇasya nirvāṇasaṁjñasya caturthadhyānabale bhūyo'lpaśaśūcittacaitasikadharmanirodhaḥ ucyate āsaṁjñikasamāpattiḥ | prayatnasvedaparinirviṇṇasya viśrāmasaṁjñasya naivasaṁjñānāsaṁjñāyanasamāpattibale bhūyolpaśaścittacaittasikadharmanirodhaḥ ucyate nirodhasamāpattiḥ | asaṁjñidevalokopapannasya cittacaitasikadharmāḥ akiṁcitkarāḥ ucchinnāḥ - ityasaṁjñi āyatanaṁ | caturmahābhūtendriyādīnāṁ saṁtāno'nucchinna ucyate jīvitendriyaṁ | vividhajanmasthāneṣu sattvānāṁ jātikāyacittavacanāni sadṛśāni bhavantītyucyate sattvānāṁ nikāyasabhāgatā | deśāntaraprāptirucyate sthānaprāptiḥ | sarvasaṁskṛtasaṁmiśravastūni vastuprāptiḥ | sarvāṇi adhyātmabahirdhāyatanāni āyatanaprāptiḥ | sarvasaṁskārodayo jātiḥ | saṁskāraparipāko jarā | saṁskārānirodhaḥ sthitiḥ | saṁskāranirodho'nityatā | sārthakākṣarāṇi nāmakāyaḥ | padasamuccayena vastvabhidhānaṁ (=vākyaṁ)padakāyaḥ | vipulasamuccayaḥ (=varṇasamāmnāyaḥ)vyaṁjanakāyaḥ | āryānāsravamārgāprāptiḥ pṛthagjanatvaṁ | iti saptadaśa |

21 | cittaviprayuktadharmeṣu katikuśalāḥ katyakuśalāḥ katyavyākṛtāḥ | dvau kuśalau saptāvyākṛtāḥ aṣṭau vivecanīyāḥ | āsaṁjñikasamāpattirnirodhasamāpattiśca kuśalau | asaṁjñi āyatanaṁ nikāyasabhāgatā nāmakāyaḥ padakāyaḥ vyaṁjanakāyaḥ jīvitendriyaṁ pṛthagjanatvaṁ ca avyākṛtāḥ | prāptiḥ jātiḥ jarā sthitiḥ anityatā ca kuśaleṣu kuśalāḥ akuśaleṣvakuśalāḥ avyākṛteṣvavyākṛtāḥ | sthānaprāptiḥ vastuprāptiḥ āyatanaprāptiśca kuśalākuśalāvyākṛtāḥ ||

22 | kati kāmadhātupratisaṁyuktāḥ kati rūpadhātupratisaṁyuktāḥ katyarūpadhātupratisaṁyuktāḥ | trayaḥ kāmadhātupratisaṁyuktāḥ | dvau rūpadhātupratisaṁyuktau | eko'rūpadhātupratisaṁyuktaḥ | ekādaśa vivecanīyāḥ kāmadhātupratisaṁyuktā vā rūpadhātupratisaṁyuktā vā arūpadhātupratisaṁyuktā veti | nāmakāyapadakāyavyaṁjanakāyāḥ kāmadhātupratisaṁyuktāḥ | asaṁjñisamāpattyasaṁjñyāyatane rūpadhātupratisaṁyukte | nirodhasamāpattirarūpadhātupratisaṁyuktā | prāptiḥ jīvitendriyaṁ nikāyasabhāgatā sthānaprāptiḥ vastuprāptiḥ āyatanaprāptiḥ pṛthagjanatvaṁ ca tridhātupratisaṁyuktāni | jātiḥ jarā sthitiḥ anityatā ca kāmadhātupratisaṁyukteṣu dharmeṣu kāmadhātupratisaṁyuktāḥ rūpadhātu pratisaṁyukteṣu dharmeṣu rūpadhātupratisaṁyuktāḥ | arūpadhātupratisaṁyukteṣu dharmeṣu arūpadhātupratisaṁyuktāḥ | apratisaṁyukteṣu dharmeṣu apratisaṁyuktāḥ ||

23 | tatra kati sāsravāḥ katyanāsravāḥ | trayodaśa sāsravāḥ | catvāro vivecanīyāḥ | jātiḥ jarā sthitiḥ anityatā ca sāsraveṣu sāsravāḥ anāsraveṣu anāsravāḥ | prathamānāsravacittaprāptikāle jahāti pṛthagjanatvaṁ | dhātvantaropapattikāle'pi pṛthagjanatvaṁ prahāya (tatraiva punaḥ)dhātvantare labhate pṛthagjanatvaṁ | vairāgyakāle navamavimokṣamārge (pṛthagjanatva-)prahāṇaṁ ||

24 | trayaḥ asaṁskṛtāḥ | pratisaṁkhyānirodhaḥ apratisaṁkhyānirodhaḥ ākāśaṁ | pratisaṁkhyānirodhaḥ katamaḥ | sāsravānāsravaprajñābalena sarvasaṁyojanaprahāṇe vimokṣa prāptirucyate pratisaṁkhyānirodhaḥ | apratisaṁkhyānirodhaḥ katamaḥ | anāgatasya hetubhirutpādyasyānutpattirapratisaṁkhyānirodhaḥ | ākāśaṁ katamat | arūpāyatanaṁ apratighātaḥ darśanānarhatocyate ākāśaṁ ||

25 | sabhāgahetuḥ | saṁprayuktahetuḥ | sahabhūhetuḥ | pūrvotpannasvasadṛśahetuḥ ajātapaścājjātasarvadharmāṇāṁ kāraṇahetuḥ | evaṁ sarvatragaheturapi samanantarapratyayaḥ | sattveṣu vipākahetuḥ sarve saṁskṛtadharmāḥ ||

26 | saṁskṛtadharmaphalamapi nirvāṇaphalaṁ | ko hetuḥ | yataḥ sarvasaṁskṛtadharmān hi pratītya nirvāṇamārgaphalotpattiḥ ||

27 | saṁprayuktakadharmā ekasminnālaṁbane yugapatkāritrāḥ | paralakṣaṇāsvalakṣaṇeṣu cittacaitasikā dharmāḥ sthānadeśarahitāḥ | ko hetuḥ | ālaṁbanasya sarvatragatvāt ||

28 | mārgotpattikāle saṁyojanāni nirudhyamānānīti jāyamānamārgeṇa vimuktimārgaprāptiḥ | mārgānirodhakāle nirudhyamānenāntaryamārgeṇa chinneṣu saṁyojaneṣu jāyamānāyāṁ vimuktau vimuktiprāptiḥ ||

29 | trividho rāgaḥ | kāmarāgaḥ bhavarāgaḥ vibhavarāgaḥ | sarvavastuparyeṣaṇamucyate kāmarāgaḥ | prāptau kārpaṇyamucyate bhavarāgaḥ | ucchedaṁ paśyata ucchedaparyeṣaṇaṁ vibhavarāgaḥ ||

30 | bhāvanayā prahāṇāya saptatriṁśat pakṣāḥ (=bodhipākṣikā dharmāḥ)||

31 | samyaksaṁkalpasamyagvāksamyakkarmasamyagājīvaprasrabdhyupekṣāḥ sthāpayitvā anye bhavaṁti iṁdriyadharmāḥ | catuḥsmṛtyupasthāneṣu ekaikasya bhavati purataḥ pratyupasthitiḥ | tatra ko hetuḥ | vibhajya sarvadharmālaṁvanatvāt ||

32 | sarve dharmāḥ parasaṁprayuktā ātmaviprayuktāḥ ||

33 | sālaṁbanadharmeṣu saṁyojanāni heyānīti bhavaprahāṇamaśeṣaprahāṇaṁ | aśeṣaprahāṇaṁ katamat | prāptaduḥkhajñānasya aprāptasamudayajñānasya samudaya satyena (kleśānāṁ)prahāṇaṁ duḥkhasatyena (kleśānāṁ)prahāṇaṁ ||

34 | trisatyālaṁbaneṣu dvividhākṣayaśraddhāprāptiḥ | duḥkhasatyasamudayasatyanirodhasatyeṣu dharmaśīlākṣayā śraddhā | mārgasatye caturvidhākṣayaśraddhāprāptiḥ ||

35 | sarvacaitasikadharmāḥ cittasaṁskārā (=cetanā)'nuvartinaḥ | ekālaṁbanatvāt | evamavijñaptiśīlaṁ jātiḥ sthitiḥ jarā ca cittasaṁskārānuvartikāḥ ||

36 | sarve sāsravā dharmāḥ prahātavyāḥ | kasya hetoḥ | yataḥ pāpāste samalāḥ ||

37 | sarve sāsravānāsravā dharmā jñātavyāḥ | tatkasya hetoḥ | prajñālaṁbanā hi sarvadharmāḥ (iti hetoḥ)| (tatra)atītānāgatā dharmā dūre | kasmāt | akāritrāt | pratyutpannā dharmā antike | kasmāt | sakāritrāt | asaṁskṛtā api antike | kasmāt | śīghraṁ prāpyatvāt | sarvasāsravā dharmā dṛṣṭisthānīyāḥ paṁcadṛṣṭyālaṁbanatvāt ||

38 | bhūyo'lpaśaḥ prāptiḥ (=siddhiḥ)bhavatyekonaviṁśatīndriyāṇāmakṣayāṇāṁ | asti dve indriye (anye)api dṛṣṭasatyapudgalasyākṣaye indriye aparihīṇarāge | ityekonaviṁśatirindriyāṇi | aṁtato'ṣṭāvindriyāṇi chindanti kuśalamūlāni | krameṇāyuḥkṣaye pariśiṣyate kāyendriyaṁ | punaḥ khalvarūpadhātu pṛthagjanasyāpi (tathā)||

39 | sparśaḥ indriyaviṣayavijñanānāṁ trikasaṁnipātād bhavati | sa paṁcavidhaḥ | sapratighaḥ vikalpabahulaḥ vidyā avidyā navidyānāvidyā | paṁcavijñānasaṁprayuktatvāt sapratighaḥ | manovijñānasaṁprayuktatvādvikalpabahulaḥ | kliṣṭaḥ sparśo'vidyā | anāsravaḥ sparśo vidyā | akliṣṭaḥ sāsravaḥ sparśo na vidyānāvidyā ||

40 | dvābhyāṁ mārgābhyāṁ phalaprāptiḥ | prathamaḥ saṁyojanaprahāṇa (-mārgaḥ)| dvitīyo vimuktiprāpti (-mārgaḥ)| arhadvipākacittaḥ parinirvāti | sarvadharmaparityāgāt ||

41 | catvāro bhavāḥ | jātibhavaḥ maraṇabhavaḥ mūlabhavaḥ antarābhavaḥ | ādyopapattau paṁcaskaṁdhaprāpti rjātibhavaḥ | cyutikālikāḥ paṁcaskaṁdhā maraṇabhavaḥ | jātimaraṇayorantarai tadatiriktapaṁcaskaṁdheṣu mūlabhavaḥ | cyuteranantaraṁ sarvagatiprāpakāḥ paṁcaskaṁdhāḥ antarābhavaḥ ||

42 | duḥkhasamudayasatyakṣāṁtijñānālaṁbano dharmaḥ sarva ucyate nirvedaḥ | nirvedavastvālaṁbanatvāt | cartuṣu satyeṣu kṣāntijñānaṁ virāgo rāganirodhāt ||

43 | trayaḥ āsravāḥ | kāmaḥ bhavaḥ avidyā | kāmadhātāvavidyāṁ vihāyānyakleśāḥ kāmāsravaḥ | rūpārūpyadhātvoḥ vihāyāvidyāmanyakleśāḥ bhavāsravaḥ | tridhātupratisaṁyuktaḥ saṁmoho'vidyāsravaḥ ||

44 | sarvāsravāṇāṁ nirodhakāle sarvaduḥkhanirodhaprāptiḥ sarvaprajñāmṛtarasaprāptiḥ ||

[ityabhidharmāmṛtaśāstre miśrakasaṁgrahanirdeśo nāma ṣoḍaśo binduḥ ||]

||  āryamārgaprāptasya ghoṣakābhidhānasya kṛtiḥ ||

|| abhidharmāmṛtaśāstraṁ [pariniṣṭhitam]||