suhṛllekhaḥ

ācāryanāgārjunaviracitaḥ

suhṛllekhaḥ

prakṛtisukṛtārhaguṇāḍhya sugatavacobhyaḥ samudānītāśca mayā|

śubhamālakṣya kṛtā vai kāścidāryāgītayastvayā ca śravyāḥ||1||

dārumayī hyapi pratimā sampūjyate kā'pi sugatasya vidvadbhiḥ|

tathā'manojñaṁ kāvyaṁ saddharmāśrayācca mamedaṁ na nindyam||2||

mahāmuneratimadhuraṁ manye vacanaṁ bhavatā'vagatameva syāt|

ākalpitaṁ tu sudhayā nanvatidhavalaṁ na dṛśyate candrikayā?||3||

jinairbuddhadharmasaṁghaśīlatyāgadevādiṣaḍanusmṛtayaḥ|

pradarśitāstāstu tadguṇasambhāraiḥ pṛthaganusmaraṇīyāśca||4||

daśakuśalāḥ karmapathāḥ kāyavākcittaiḥ sarvadā'bhyasanīyāḥ|

madyādibhirnivṛte puṇyamayaiścājīvaiḥ suprasannaḥ syāḥ||5||

jñātvā calāmasārāṁ sampattiṁ dvijabhikṣudīnamitrebhyaḥ|

dānaṁ deyaṁ vidhinā janmāntareṣu na dānāt paraṁ mitram||6||

śīlaṁ sevyamamiśraṁ tvayānupahatālaṁghitānupaliptaṁ ca|

carācarapratiṣṭhaṁ tu guṇāśrayaṁ bhūvacca rājate śīlam||7||

ṣaḍimā dānaṁ śīlaṁ kṣāntivīryadhyānaprajñāḥ pāramitāḥ|

aprameyāḥ saṁvardhya bhavecca bhavasāgarapārago jinendraḥ||8||

yatra pūjā pitṝṇāṁ kulaṁ tadācāryabrahmabhiḥ samṛddham|

tatpūjayā ca kīrtistadanantaraṁ cādhigamyate'bhyudayo'pi||9||

hiṁsācaurye madirā kāmāticāramṛṣoktinṛtyagītāni|

tyājyānyakālabhaktaṁ mālāgandhādiviśeṣoccaśayanāni||10||

anukṛtyārhacchīlaṁ kuryādupoṣadhamaṣṭābhiraṅgaiścet|

labhate hi pumān strī vā suramyakāmāvacarādidevakāyam||11||

mātsaryaśāṭhyamāyābhimānāsaktikausīdyarāgadveṣān|

kularūpayauvanaśrutabalādijaṁ madaṁ ripumiva paripaśyecca||12||

apramādo'mṛtapadaṁ pramādo mṛtyupadamiti muninādiṣṭam|

kuśaladharmasya vṛddhaye sadā'pramādo'bhyasanīyastvayā caiva||13||

pūrvapramattaḥ ko'pi meghānnirgatenduriva tato'pramādī|

sa hi nandāṅgulimālodayanājātaśatrusadṛśaḥ suśobheta||14||

kṣāntisamaṁ naiva tapastatastvayā na krodhāvasaro deyaḥ|

buddhenānumataṁ vai padamavaivartikaṁ krodhaprahāṇena||15||

akrośīdavadhīnmāmajaiṣīnmāmahārṣīd vai vittaṁ me|

vairairebhiḥ kalahastyajati ya etad vairaṁ sa sukhaṁ śete||16||

jale'vanau pāṣāṇe citramiva cittaṁ tridhā khalu sattvānām|

kleśavatāṁ hi prathamo dharmābhilāṣiṇāmantimo jyāyān||17||

vācastridhā janebhyaḥ proktā jinena madhurasatyamithyākhyā|

kramaśo madhuḥ puṣpāśucitulyāścaramā ca pariharttavyaitāsu||18||

caturvidhā vai puruṣāḥ prakāśātprakāśe tamasastamasi punaḥ|

tamaḥ prakāśād gacchati tamasastejasi pudgalo varaḥ prathamaḥ||19||

janānāṁ tvāmraphalamiva pakvamapakve pakve'pakvatulyaṁ ca|

apakve'pakvaṁ tathā pakve pakvamiva bhāti cāturvidhyam||20||

paradārānna tu paśyed dṛṣṭe ca jñeyā avasthānurūpyeṇa|

kanyāmbābhaginīvad āsaktāvapyaśucimeva cintayecca||21||

rakṣeccañcalacittaṁ śruti-putra-nidhi-prāṇasadṛśaṁ ca nitarām|

cittaṁ pariharttavyaṁ śatrusarpaviṣāyudhāgnisamāt kāmāt||22||

kāmastvanarthajanakaḥ proktaḥ kimpākaphalasamo jinendreṇa|

pāśaistasya hi baddho bhavacārake lokaḥ sa prahātavyaḥ||23||

calādhruvāṇi ṣaḍakṣāṇi jayanti samare vā śatrūnapi caike|

tayośca sudhiyaḥ prathamaṁ varamindriyavijetāraṁ ca manyante||24||

yuvatiśarīraṁ hi pūti yannavāśucidvāramaśucibhāṇḍasamam|

carmāvṛtaduṣpūraṁ bhūṣitamapi bhūṣaṇaiḥ pṛthag draṣṭavyam||25||

kṛmipīḍito hi kuṣṭhī sukhalipsayā ca yathā vahnimāśrayate|

pīḍā na yāti śāntiṁ tathaiva hi kāmāsaktirapi boddhavyā||26||

paramārthaṁ prativettuṁ sarvabhāveṣu savidhi manasi nidhāyaiva|

sa ca khalu bhāvayitavyo na hi tattulyo'paro guṇayuto dharmaḥ||27||

sukulīno'pi na pūjyo jñānaśīlavimukho śrutirūpavān pumān|

guṇadvayaitadyuktaḥ pūjyate so'nyaguṇairhīno'pi satatam||28||

aṣṭasu lokadharmeṣu lokavit samatayā pravartayeccittam|

hānilābhayaśo'yaśo'nuśaṁsānindāsukhaduḥkheṣvaśocyeṣu||29||

bhavadbhirbrāhmaṇabhikṣudevātithimātāpitṛkulamahiṣībhyaḥ|

pāpaṁ nācaraṇiyaṁ yataḥ katamo'pi na narakaphalasya bhāgī||30||

na ca kṛntati pāpakarma tatkṣaṇamastrapātavat kamapi pāpinam|

mṛtyorhi samaye kintu tatkarmaṇaḥ phalamabhimukhībhavatyeva||31||

saptadhanānyuktāni śraddhāśīlatyāgāmalaśrutadhiyaḥ|

apatrapā hrī muninā mudhaivāparadhanāni hi sādhāraṇāni||32||

dyūtakrīḍā kautukadarśanālasyakumitrasaṅgamadirāśca|

niśāviharaṇaṁ ṣaḍime tyājyā durgatidā yaśovināśakāśca||33||

sanarāmaraśāsakena santoṣaḥ sarvadhanapradhānamuktam|

santoṣo'nuṣṭheyaḥ dhanaṁ vinaiva sa dhanikaḥ sati santoṣe||34||

yathā samṛddhāḥ puruṣā duḥkhino bhavanti naiva tathā'lpecchukāḥ|

yāvatyaḥ santi phaṇā ārya, duḥkhakarāḥ, nāgasya tāvatyaḥ||35||

patnī tyājyā trividhā prakṛtyā ripusambaddhā svaghātikeva|

patyurapamānakartrī svairā laghuvastucauryaratā steyīva||36||

bhaginīsamānukūlā mitravad hṛdayaṅgamā ca sevanīyā|

mātevopakāriṇī pūjyā sevikevājñākṛd devīva||37||

vihāya rāgadveṣau bhojanamauṣadhivadavagatya seveta|

kāyasthityai nitarāṁ na ca saundaryagarvamānārthaṁ sevyam||38||

dinamakhilaṁ śubhakārye yāpayed rātrerādyantau yāmau ca|

dhīman, madhye yāme śayīta yato hi na bhaved viphalā nidrā||39||

maitrīkaruṇopekṣāmuditāśca sadā samyag bhāvayitavyāḥ|

alabdhe'nuttarapade dhruvameva brahmaloke sukhāvāptiḥ||40||

kāmān prītivicārau sukhañca duḥkhañca vihāya caturbhireva|

dhyānairbrahmābhāsvaraśubhakṛtsnabṛhatphalabhāginaśca bhavanti||41||

kuśalākuśalaṁ ca karma sadābhiniveśāpratipakṣavastuguṇaiḥ|

pañcabhiścotpadyate tasmād yatanīyaṁ kuśalacaryāyām||42||

yathālpakṣāranīraṁ parivartayatyalpajalarasaṁ na gāṅgam|

pāpaṁ tathaiva cālpaṁ nāśayatyalpakuśalaṁ na pūrṇakuśalam||43||

auddhatyaṁ kaukṛtyaṁ vyāpādaḥ styānamiddhe ca kāmecchā|

vicikitseti pañcaiva kuśaladhanahārakāṇīmāni jñeyāni||44||

uttamāḥ pañcadharmāḥ śraddhāvīrye smṛtisamādhiprajñāśca|

balendriyāṇi cāgryāṇi kathyante yatanīyameteṣu tasmād||45||

vyādhijarāmaraṇapriyaviyogavacca karmaparāyaṇāḥ sarve|

punaḥ punastu cintayā pratipakṣeṇaivaṁ prahīyate mānaḥ||46||

svargaṁ mokṣaṁ cecchet samyagdṛṣṭistāvad bhāvanīyaiva|

kṛtāni mithyādṛṣṭyā puruṣaiḥ sucaritānyapi viṣamavipākāni||47||

anātmā'śucirduḥkhī pudgalo'nityaśca samyagvijñeyaḥ|

smṛtyupasthānarahitā vinaśyante ca viparyāsaiścaturbhiḥ||48||

uktaṁ rūpaṁ nātmā rūpavāṁśca nātmā rūpe naivātmā|

na cātmanyasti rūpaṁ śūnyamevaṁ skandhacatuṣkamapi jñeyam||49||

skandhā na hi jāyante yadṛcchayā na prakṛtīśvarakālebhyaḥ|

nāhetoḥ svabhāvato jñeyā ajñānena tṛṣṇayā jātāḥ||50||

kālaḥ pacati bhūtāni kālaḥ saṁharate prajāḥ|

kālaḥ supteṣu jāgarti kālo hi duratikramaḥ||

ātmani mithyādṛṣṭiḥ śīlavrataparāmarśo vicikitsā ca|

muktipuradvārāṇāṁ bādhakaṁ saṁyojanatrayamavagacchet||51||

ātmāpekṣo mokṣaḥ parasmānna labhyate kimapi sāhāyyam|

catvāryāryasatyāni vṛttasthaḥ śrutacintābhirabhyasyecca||52||

adhiśīlacittaprajñāstistro'pi śikṣāḥ sadaiva śikṣaṇīyāḥ|

etāsvantarbhūtāni śatamekapañcāśacca śikṣāpadāni||53||

rājan, buddhenoktaḥ kāyagatā smṛtiścaikāyano mārgaḥ|

rakṣedimaṁ sayatnaṁ smṛtināśācca sarvadharmapradhvaṁsaḥ||54||

bahubādhaṁ tu jīvanaṁ vāyūdbhūtajalabudbudavadanityaṁ ca|

āścaryaṁ jāgarteḥ kṣaṇamidaṁ niḥśvāsocchvāsanidrābhyaḥ||55||

viśaraṇagalanaḥ pūtiḥ śoṣāsāraśucisvabhāvaḥ kāyaḥ|

rajaḥsadharmī cānte sadā viyogaśīlo naśvaro jñeyaḥ||56||

pṛthvīmerusamudrāḥ saptārkajvālairnāvaśiṣyante|

dhūlimātraṁ hi mūrtāḥ kā kathā durbalavapuṣāṁ mānavānām||57||

itthaṁ sarvamanityaṁ hyanātmakamaśaraṇamanāthamaniketam|

kadalītaruriva rājan cittamapasārayāsārasaṁsārāt||58||

mahārṇavayugacchidre hi kūrmagrīvārpaṇācca mānuṣaṁ janma|

tiryagādisudurlabhaṁ saphalīkuru saddharmābhyāsānnarendra||59||

kecid ratnālaṅkṛtakanakapātraṁ ca pūrayanti purīṣeṇa|

tato'pyasāvatimūḍho yaśca nṛjanma labdhvāpi pāpamācarati||60||

pratirūpadeśavāsaḥ satpuruṣasamāśrayaḥ śubhapraṇidhānaṁ ca|

svakīyapūrvakuśalaṁ hyetaccakracatuṣkaṁ hi vidyate tvayi||61||

kalyāṇamitrasevā brahmacaryapūrtaye deśitā muninā|

sevyaḥ sadā supuruṣaḥ śamaḥ prāpto yato jinamapekṣya bahubhiḥ||62||

mithyādṛk pratyante narakapretatiryakṣūtpadyamānaḥ|

mleccho jaḍaśca sattvo yo hyutpanno buddhavirahite||63||

dīrghāyuṣi devakule janilabdhaścāṣṭākṣaṇā ime doṣāḥ|

ebhī rahito bhūtvā kṣaṇaṁ labdhvā janmanivṛttau prayateta||64||

iṣṭavighātavyādhimṛtyujarādiduḥkhāvahaḥ saṁsāraḥ|

virajya tataḥ śṛṇu tāvad doṣānetasyāvagacchan naradeva||65||

mitratvena ca śatruḥ putratvena pitā'mbā ca bhāryātvena|

parivartyotpadyante tasmānna niyataṁ kimapīha saṁsāre||66||

catuḥsamudrajalādapi janairadhikaṁ jananyāḥ stanyaṁ pītam|

pṛthagjanānanusṛtya hi punastato'pyadhikañca pāsyanti lokāḥ||67||

ātmanaścāsthipuñjaṁ merusamaṁ tato'dhikamuccairjāyeta|

bhūmimṛdā badarāṇāṁ gulikābhirna gaṇanā sambhavā'mbānām||68||

lokapūjyo'pi śakraḥ patati ca punaḥ karmavaśāddhi saṁsāre|

tadvacca cakravartī rājā'pi punarbhavati hi dāso loke||69||

svarge'psarasāṁ saukhyaṁ kucataṭisparśajaṁ caiva ciramanubhūya|

narake duḥsahaduḥkhaṁ peṣaṇachedanabhedanayantrairbhuṅkte||70||

sukhade sumeruśikhare ciramanubhavaṁścaraṁścaraṇasparśasukham|

cañcalakukkulakuṇapairgāḍhaṁ duḥkhaṁ cintayet sadā manasā||71||

devāṅganāsevite nandane ramye copavane ca vihṛtya|

asipatravane teṣāṁ hastapādakarṇanāsāśca chidyante||72||

suvadanadevasutābhiḥ svarṇotpalairyutāyāṁ mandākinyām|

snātvā punaśca narake kṣāroṣṇodakavaitaraṇyāṁ hi patanti||73||

deveṣu kāmasukhaṁ ca kāmavītarāgasukhaṁ brahmalokeṣu|

prāpyāvīcau satataṁ labhyate'gnerindhanībhūya ca duḥkham||74||

padamavāpya suryendvoḥ svakāyaprabhayā pradīpya hi saṁsāram|

tamasi ca ghane praviṣṭaḥ prasāritamapi ca svīyakaraṁ na paśyati||75||

evaṁ mṛtyuṁ jñātvā grāhyastrividhapuṇyamayadīpālokaḥ|

anyathā ravīndubhyāmamardanīye'ndhatamasi praveṣṭavyam||76||

duṣṭācaraṇe lagnāḥ sattvāḥ saṁjīvakālasūtratapaneṣu|

rauravāvīcyādau hi saṁghāte cāpi narake sadā duḥkham||77||

niṣpīḍyante tilavat kecanānye cūrṇavat peṣyante ca|

chidyante śāṇenānye dīryante tathā tīkṣṇaparaśunā'pi||78||

āsye'nyeṣāṁ tadvat pātyate jvalitaṁ tāvallauhadravam|

āropyante kecana sakaṇṭake taptāyase sadā śūle||79||

śvabhiḥ kecana krūrairlauhadantairvidīryante garjadbhiḥ|

utthāya karau vivaśā luñcyante tīkṣṇanakhatuṇḍaiśca kākaiḥ||80||

kecit kṛmisaṁsparśād māṁsādakṛṣṇamakṣikāyutapātācca|

vṛddhaṁ vraṇantvasahyaṁ bhakṣyamāṇaṁ rudanti cākulā bhūmyām||81||

dahyante'gnikuṇḍeṣu tena tadānanāni ca bhavanti vivṛtāni|

pacyante ca kaṭāhe taṇḍulavallauhamaye'dhaḥśirasaste||82||

śvāsāvarodhasamaye pāpaḥ kālaṁkṛte ca narakaṁ prayāti|

śrutvā'pi narakaduḥkhaṁ sahasraśo vajrasvabhāvātra bibheti||83||

śrutvā dṛṣṭvā smṛtvā paṭhitvā cāpi citrāṅkanaṁ narakasya|

ākṛtirapi bhayajanikā kā kathā tadasahyavipākānubhavasya||84||

yathā samastasukhānāṁ tṛṣṇākṣaya eva sarvottamaṁ sukhamiti|

tadvat sarvaduḥkheṣvavīcinarakaduḥkhamatyasahanīyaṁ tat||85||

ihaikasmiṁśca divase, triśataśūlaghātād bhavati ca yad duḥkham|

nārakīyaduḥkhasya hi tatrāpnoti samatāṁ na laghukalāṁ cāpi||86||

koṭivarṣaparyantaṁ dāruṇātiduḥkheṣvanubhavatsu satsvapi|

yāvattānyakuśalāni na kṣīṇāni tāvatra jīvanānmuktiḥ||87||

aniṣṭaphalabījāni tu kāyavākcittānāṁ hi durācaraṇāni|

bhavataivaṁ yatanīyaṁ śaktyā yena tadaṇumātraṁ na śiṣyeta||88||

tiryagyoniṣu nānā duḥkhāni bhavanti ca badhabandhanādīni|

parasparaṁ bhakṣayanti śamamūlaśubhakarmaparihartāraste||89||

kecid vai hanyante muktorṇāsthimāṁsacarmārthaṁ jīvāḥ|

yojyante khalu vivaśā anye padamuṣṭikaśāṅkuśaiḥ paśavaśca||90||

pretayonau na kṣayaṁ yātīṣṭālābhajanitā duḥkhadhārā ca|

duḥkhamasahyaṁ labhate śītoṣṇakṣuttṛṣāśramabhayajanitaṁ hi||91||

sūcīchidravadāsyaṁ keṣāñcidudaramativiśālaṁ nagavacca|

tacca pīḍitaṁ kṣudhayā kṣiptamaśuci vastu na pratikārakṣamam||92||

kecit pretā nagnāḥ śuṣkatālaśikharavadasthicarmāṇaḥ|

naktamagnimudgiratāṁ mukhe patattaptasikatāśanaṁ teṣām||93||

nimnakoṭikaiḥ kaiścit pūyaraktādyaśucīni na ca labhyante|

ākramyānyamukhopari galanirgatalasikādīni ca khādyante||94||

candro grīṣme taptaḥ śaitye śīto bhānuśca hyetebhyaḥ|

teṣāṁ dṛṣṭi pātācca niṣphalāstaravo nadyaśca śuṣyante||95||

satataṁ duḥkhabhājaste duścaritakarmapāśasudṛḍhabaddhā vai|

na ca mriyante kecit pañca vā daśa sahasravarṣāṇi sattvāḥ||96||

yacca labhante pretā nānāduḥkhāsvādamekavidhamittham|

prītiratra kārpaṇye mātsaryamanāryamuktamato buddhena||97||

svarge cātisukhaṁ yat tato'pyadhikaduḥkhaṁ tataścyuternūnam|

evaṁ vicintya tajjñaiḥ kṣaratsukhāya na tṛṣṇā kāryā svarge||98||

vaivarṇyaṁ dehasya svāsane na ratirmlāyate'pi mālā ca|

vasaneṣvapi daurgandhyaṁ svedaścāpūrvo niryāti dehāttu||99||

lakṣaṇāni hi pañcaiva mṛtyorbhavanti svargasthadeveṣu|

bhūlokīyanarāṇāṁ sadṛśānyapi tāni mṛtyulakṣaṇaiśca||100||

devebhyaścyutasya yadi nāvaśiṣyet kuśalamaṇumātramapi|

vivaśatayoṣitavyaṁ hi tatastiryakpretanarakeṣvekasmin||101||

duḥkhaṁ syānmānasikaṁ devaiśvaryaṁ pratīrṣyayā'sūreṣvapi|

na kurvanti dhīmanto janmāvaraṇācca te satyadarśanāni||102||

saṁsāre'sminnevaṁ devanarakapretatiryagyoniṣu|

janmagrahaṇamayuktaṁ bahubādhaṁ janma tatreti vijñeyam||103||

jvalite śirasi ca vasane tannivṛttyupāyamupekṣya tvaritameva|

apunarbhavāya yateta yatastasmānmahatprayojanaṁ nānyat||104||

śīlasamādhijñānairbhūjalatejovāyuravividhurahitaṁ ca|

ajarāmaraṇamakṣayaṁ prāpyaṁ śāntadāntavimalaṁ nirvāṇam||105||

prasrabdhivīryaprītidharmavicayasmṛtisamādhyupekṣāḥ sapta|

bodhyaṅgānīmāni prāptyai nirvāṇasya kuśalasambhāraḥ||106||

prajñābhāve dhyānaṁ dhyānābhāve'pi na jāyate sā prajñā|

yatrobhe vidyete jñeyastasya bhavasāgaro goṣpadavat||107||

ye'vyākṛtadharmāścādityabandhunā caturdaśopadiṣṭāśca|

loke na cintanīyā yato tairnāpnoti cittameva śāntim||108||

evaṁ proktaṁ muninā'vidyayā karma karmaṇā ca vijñānam|

tasmācca nāmarūpaṁ tataḥ ṣaḍāyatanāni tataḥ sparśā vai||109||

tata utpannā vittirvedanāśrayeṇa jāyate khalu tṛṣṇā|

tasyāścopādānaṁ tato bhavo'pi bhavācca jāyate jātiḥ||110||

satyāṁ jātau duḥkhavyādhijareṣṭa vastvalābhabhayamaraṇāni|

duḥkhaskandho vipulaḥ sati jātiniṣedhe niṣiddhānīmāni||111||

gambhīro'narghakośaḥ priyaḥ pratītyotpādo jinavacanānām|

samyagimaṁ yaḥ paśyati sa ca paśyati tattvadarśinaṁ buddhameva||112||

śamāya bhāvyāḥ samyagdṛṣṭisaṁkalpavākkarmājīvasmṛti-|

samādhivyāyāmetyāryāṣṭāṅgikamārgāścaite cārutayā||113||

jātiriyaṁ duḥkhameva tṛṣṇā ca tasya samudayo mahān jñeyaḥ|

nirvṛtistannirodhastadadhigamāya cāṣṭāṅgiko'yaṁ mārgaḥ||114||

yatnaḥ sadā vidheyaścaturāryasatyaprativedhāyaivam|

kroḍe śriyaśca yeṣāṁ gṛhasthāstaranti kleśanadīṁ jñānāt||115||

ye dṛṣṭāryasatyāśca nāvirbhavanti te'ṅkuravat pṛthivītaḥ|

nāvataranti ca gaganāt te'pi pṛthagjanāḥ kleśavaśā hi pūrvam||116||

cittaṁ hi dharmamūlaṁ bhagavatoktamatastadapi sādhu damayecca|

bho nirbhaya, kiṁ bahunā kathanena yato'yameva hitopadeśaḥ||117||

yanmayopadiṣṭaṁ tatsaprayāsairapi bhikṣubhirduḥsādhyam|

caryāguṇān sevasva śikṣāmācara jīvanaṁ ca kuru sārtham||118||

sarveṣāṁ kuśalāni tu sarvārthamanumodya svacaryātrayīṁ ca|

buddhatvāya pariṇāmya tatastadanena puṇyarāśinā bhavatā||119||

janmasvaprameyeṣu devanaralokayoginaśca vaśīkṛtya|

duḥkhino'nugrāhyāstvasahāyā avalokiteśvaracaryābhiḥ||120||

caramaṁ bhavaṁ gṛhītvā vyādhijarārāgadveṣāṁśca prahāya|

buddhakṣetre bhagavānamitābha iva lokeśo'mitāyurbhava||121||

prajñāśīlatyāgodbhūtavimalakhyātiṁ bhuvi khe svarge ca|

loke prasārya śamayan narān yuvatisukharatadevāṁśca bhūmau||122||

kleśopahatasattvasya jātibhayamaraṇanāśakaṁ jinendrākhyam|

lokottaramakliṣṭaṁ śāntābhayākṣayanāmaiva padamāpnuhi||123||

iti suhṛllekha samāptā||

Technical Details

Text Version: 

Romanized

Input Personnel: 

DSBC Staff

Input Date: 

2004

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0