ratnamālāstotram

ratnamālāstotram

ācāryavanaratnapādaviracitam

lokeśvaraṁ vimalaśūnyakṛpārdracittaṁ

mārgajñatāprathitadeśanayārthavācam |

sarvajñatādiparipūrṇaviśuddhadehaṁ

jñānādhikāralalitaṁ śirasā namāmi || 1 ||

vaineyabhedavaśato bahudhāvabhāsai-

reko'pi pātragajaleṣu śaśīva yasmāt |

saṁlakṣase parahitānugataiva tasmād

buddhistvaho paramavismayanīyarūpā || 2 ||

saṁpūrṇacandravadane lalito lalāṭa-

deśādvinirgatamaheśvaradevaputraḥ |

vaineyaśāmbhavajanapratibodhanārthaṁ

devādhidevapratimānuja īśvarastvam || 3 ||

vaineyakomalabhavapratibodhanāya

kiṁ dhāma saṁbhṛta mahāśubhalakṣaṇaṁ te |

niryāta eva hi pitāmahadevapūjāṁ

lokeśvareśvaraparaṁ śirasā namāmi || 4 ||

vaineyavaiṣṇavajanapratibodhanāya

rājīvapāṇihṛdayāt pratiniḥsṛto'sau |

nārāyaṇo'pi bhuvaneśvara eva tasmāt

puṁsāṁ tvameva paramottama eva nānyaḥ || 5 ||

candrārkasādarabalāhitabhaktibhājāṁ

saṁdarśanārthamibhanīlasulocanābhyām |

yanniḥsṛtau śaśiravī bhuvi locanābhyāṁ

dhvastāntarālatamasaṁ tamahaṁ namāmi || 6 ||

sārasvatīvinayayojitabhaktibhājāṁ

bodhāya vai bhagavatīha sarasvatīyam |

dṛṣṭāgratastava jinātmajapaprasūtā

prajñābhilāṣiphaladaṁ tamahaṁ namāmi || 7 ||

vaineyavāyujanitākṣaramārgasiddhyai

yo lokanātha sugato'tha viniḥsṛto'sau |

devaḥ samīraṇavaro bhuvi janmabhājā-

mīryāpathārthaphaladaṁ tamahaṁ namāmi || 8 ||

vaineyavāruṇaśivāyanamīpsitānāṁ

saṁbodhanārthamudarātsugatātmajānām |

yanniḥsṛto varuṇadevavaro'pyakasmā-

daiśvaryasiddhi phaladaṁ tamahaṁ namāmi || 9 ||

vaineyasaṁmataphalādyabhilāṣiṇo vai

saṁsiddhaye pravaralakṣaṇapādapadme |

yanniḥsṛtā bhagavatī dharaṇī prasiddhā

trailokyanāthamasamaṁ satataṁ namāmi || 10 ||

saṁsāramuktamapi susthitameva tatra

kāruṇyataśca bhavacāriṇi sattvavarge |

bhūyāt sthitirmama sadāsthirasā bhavanta-

mevaṁ mahāśayavaraṁ paramaṁ namāmi || 11 ||

ekena pādatalakena bhavatsvakena

cakrāntasaṁvaramanantaralokadhātau |

kalpāntadagdhabhuvane jvalitogravahni-

rniḥśvāsavāyubalatastava nirvṛtaḥ syāt || 12 ||

svāṁ tarjanīṁ mukhadhṛto'hitatarjanena

saṁcālitāśca bahumerugaṇā nakhasya |

koṣoddhṛtaṁ jaladhitoyamaśeṣataḥ syāt

sāmarthyamīdṛśamaho bhavataḥ kuto'nyat || 13 ||

kvedaṁ ca śaiśavaparaṁ nanu cārurupaṁ

saṁdarśanīyavarakomalabālacandram |

durvāramāramathanaṁ ca mayaikasahyaṁ

vikrāntaduḥsahaparaṁ kva ca ceṣṭitaṁ te || 14 ||

eṣā batāñjananibhorujanāvalī sā

kauṭilyacāruvikaṭā svaśiroruhāgre |

kleśendhane jvalitavisphuritatvavahne-

rdhūmāvalīva vimalā nanu lakṣyate te || 15 ||

tvatkāntileśavimalā daśadikpratānaiḥ

pakṣāsitakṣayakṛśā sakalā suśobhā |

paryanta iṣṭaśaśino bhavaneṣu yatte

manye virāji nikhilaṁ tava kāntileśāt || 16 ||

bandhurhi ko mārgikasaṁmataṁ mataṁ naro narī sā sa ca satpathaṁ patham |

parārthasaṁpāditasaṁvaraṁ varaṁ namāmi bhūmīśvararājinaṁ jinam || 17 ||

anityanirvāṇapade sthitaṁ sthitaṁ prabhāsvarādhiṣṭhitasaṁhitaṁ hitam |

śamīkṛtāśeṣajanaṁ śivaṁ śivaṁ namāmi bhūmīśvararājinaṁ jinam || 18 ||

gabhastimālāmitasaṁkulaṁ kulaṁ tatra svapāṇau dhṛtapaṅkajaṁ kajam |

ratānugāśobhitasaṁrataṁ rataṁ namāmi bhūmīśvararājinaṁ jinam || 19 ||

svadharmadhātuṁ karuṇāparaṁ paraṁ śubhādisaṁbhārasusaṁbhṛtaṁ bhṛtam |

vikalpahīnaṁ dhvanideśakaṁ śakaṁ namāmi bhūmīśvarājinaṁ jinam || 20 ||

tathatātathatādvayaśātaśataṁ sadasatparipūritadharmakatham |

kathanīyavirājitasatyaparaṁ praṇame dharaṇīśvararājavaram || 21 ||

varavārijarūpi jagatprasaraṁ sarasīruhalocanacārutaram |

tarasāpi rasatvaviśuddhiparaṁ praṇame dharaṇīścarājavaram || 22 ||

varanirmitabhogaparārtharataṁ rataśūnyanirañjanadharmadharam |

dharaṇīndravibhūṣitasiddhiparaṁ praṇame dharaṇīśvararājavaram || 23 ||

varasatsahajodadhicandramukhaṁ sukhabhāṣitasattvavimuktipadam |

padabhūṣaṇalakṣaṇatānuparaṁ praṇame dharaṇīśvararājavaram || 24 ||

lokeśvareyaṁ (māṁ) tava ratnamālāmacīkaracchrīvanaratnapādaḥ |

avāpi yattena śubhapraviṣṭaṁ tenaiva loko'stu samantabhadraḥ || 25 ||

śrīmadāryāvalokiteśvarabhaṭṭārakasya

ratnamālāstotraṁ samāptam |