lokeśvaraśatakam

lokeśvaraśatakam

vajradattācāryaviracitam

om namo lokanāthāya |

bhāsvanmāṇikyabhāso mukuṭabhṛti namannākanāthottamāṅge

bhaktiprahve sarojāsanaśirasi hasanmālatīmālikābhaḥ |

maulau mīlanmṛgāṅgāmakṛśakapiśatāṁ śāmbhave śātayantyo

loke lokeśapādāmalanakhaśaśabhṛtkāntayaḥ santu śāntyai || 1 ||

nirdhūtā dhūrjaṭīndorna khalu paṭu jaṭāpiṅgamāsaṅgaśāraiḥ

sārairārānmayūkhairna ca harimukuṭāmandamāṇikyabhābhiḥ |

kālimno nāpi līnā vibudhagaṇalalatkuntalālīnalīnā-

llokeśvaryo'nivāryāścaraṇanakharucaḥ santu vo dhvāntaśāntyai || 2 ||

paryāptodārakoṣasphuṭatarakamalābhogasaṁpattihetu -

rdūrībhūtapriyāṇāmapahṛtaviṣamātaṅkaśaṅkā janānām |

na kṣiptālaṅghanairapyupaśamitatamodurgrahodbhūtabhīti-

rlokeśāṅghryorapūrvā nakhaśiśirarūcāṁ candrikā vaḥ punātu || 3 ||

niḥśeṣaṁ kleśarāśīndhanadahanamahāpāvakoccaiḥ śikhā vo

līlālokāstrilokyāmapahṛtagahanābaddhamohāndhakārāḥ |

vahniskandheṣvabandhyā narakabhuvi sudhāvārivistāradhārāḥ

saṁsārīṁ saṁharantāṁ nakhanivaharucaḥ padmabhṛtpādajātāḥ || 4 ||

svacchandacchedivāñcchāvitaraṇacaturācintyacintāmaṇīnām

udgāḍhātaṅkaśaṅkodgamaśamanamanohāriṇī hārabhāsām |

spaṣṭāvirbhūtanānāguṇanivahadhṛtādarśabimbacchavīnāṁ

chāyā vaḥ pātu lokeśvaracaraṇabhuvāmunmayūukhā nakhānām || 5 ||

nāthasyodañcaduccāmitarucirucibhī rocamānorucūḍā-

rociṣṇoruccakāsaccaraṇanakharucāṁ saṁcayo'sau ciraṁ vaḥ |

atyuccīyāt tadarcācaturasuraśiraścāruratnoccayoccai -

rnānāniścārirociścayaracitaśacīrucyacāpopacāraḥ || 6 ||

śrīmadbhogonnatīnāmabhimataviṣayaprāptidānādahīnāṁ

sevābhājāṁ samantādavicalitarucaḥ prītimutpādayantaḥ |

vaimalyātulyabimbopahasitaśaśinaḥ śātitadhvāntadoṣā -

stoṣaṁ māṇikyadīpā iva dadatu nakhāḥ padmapāṇeḥ padorvaḥ || 7 ||

rājadrājīvapāṇernakhanivaharucāṁ pādapadmodbhavānām

udbhedo bhedako'sau bhavatu bhavabhiyāṁ nirbharāṇāṁ bharaṁ vaḥ |

jātastaddehabhūmecaviratakaruṇāvāridattopakāro

yo'nalpaḥ kalpavṛkṣāṅkuranikara ivopāttavijñānabījaḥ || 8 ||

lokeśasyāṅghripadmaprabhavanakharuco dattamārārisenā-

saṁtrāsāḥ śoṇatūṇonmukhanihitaphalāmoghabāṇāṁśuśobhāḥ |

śaśvatsaṁsāraghorāvaṭapatitajanottāraṇāsajjarajju-

prārohā rohayantāṁ duradhigamamahāsaṁpaduccaiḥ padaṁ vaḥ || 9 ||

bhāsvantaḥ kleśakarmaśramavivaśajagattāpavicchedaśūrāṁ

dūrāddoṣopalabdheḥ paṭubudhaguravastārakā ye janasya |

sāndrānandaṁ dadānāḥ sakalaśaśadharaśrībhṛto niṣkalaṅkā-

ste vaścintāmacintyāḥ kamalakaranakhāḥ pādajātā jayantu || 10 ||

bhāsvatkhaṇḍendukhaṇḍairapacitiracanā kiṁ kṛtā śambhuneyaṁ

nyastā ratnāvalī vā kimu niratiśayotkaṇṭhayā bodhilakṣmyā |

devairdivyādbhutānāmasamasumanasāṁ lambitā mālikā nu

prīyātpaṅktirnakhānāmiti janitamatirlokanāthāṅghrijā vaḥ || 11 ||

kvāyaṁ rājīvajanmā namadamaraśirastuṅgamāṇikyaśayyā -

śaśvatsuptāṅghrireṇuḥ kva ca dharaṇitalālambamaulipraṇāmaḥ |

itthaṁ saṁjātahāsā iva rucinicayairdanturā ye durantā

dhvāntacchedāya lokeśvaracaraṇabhavāste nakhā vo bhavantu || 12 ||

śūrāstāpāpahāre śiśiratarasudhāśīkarāsārakārāḥ

prākārāḥ krūradūraprasaraduruśarāsāramārāpakāre |

saṁsārākārakārāgṛhabṛhadudarodāraduḥkhaprakāraṁ

ghoraṁ vaḥ saṁharantāṁ caraṇanakharucaḥ śrīkarāḥ padmapāṇeḥ || 13 ||

bhāso lokeśapādaprabhavanakhabhuvāṁ dūradurvāramāra-

vyāmuktavyāpibāṇāvaraṇajavanikābhrāntimutpādayantyaḥ |

saṁkleśānīkanāśasphuṭapiśunamahāketusaṁghātakalpā -

strailokyāśakyaśaktitribhavajayabṛhadvaijayantyo jayanti || 14 ||

samyaksaṁbodhicetaḥ śaśina iva samudbhāsibhāsāṁ samūho

nirdagdhakleśabhūtipracaya iva bṛhanmuktimārgānilāstaḥ |

vinyastādabhraśubhropalaphalaka iva krūramārairabhedyaḥ

pāyādutprekṣito vo nakharucinikaraḥ pādajaḥ padmapāṇeḥ || 15 ||

vailakṣyeṇekṣaṇīyāḥ kṣaṇamasamatamaḥkṣepadakṣāḥ kṣapāṇāṁ

nāthenākṣuṇṇapakṣakṣatinijavipadā niṣkalaṅkākṣayā ye |

akṣīṇārātipakṣakṣapaṇapaṭujagadrakṣaṇākṣuṇṇadīkṣā-

rakṣā rakṣantu lokeśvaracaraṇanakhāste'kṣaṇakṣepato vaḥ || 16 ||

satsaṁpatsādhanasya pravarakamalabhṛtpādadurgāśrayasya

trailokyaśrījigīṣornakharucinivahasyātulo'bhyuccayo vaḥ |

mitreṇāptodayena sphuṭamanuvalatālambhitātyantavṛddheḥ

pāyāt sāpāyasarvavyasanaripumahāyānasaṁsiddhihetuḥ || 17 ||

avrīḍaścūḍayā'sau vahati paśupatiḥ kāmamardhendubhūṣāṁ

śaureḥ śobhābhilāṣaḥ kathamapi kṛtinaḥ kaustubhenāstameti |

dṛṣṭe'smin so'pi mogho maghavamaṇimahāmaulirityāptacittai-

ryatkāntyācinti lokaiścaraṇanakhagaṇaḥ padmapāṇeḥ sa jīyāt || 18 ||

ārāduccairudañcatkṛtavitatiradhastārako nārakāṇām |

udyannīhārarociḥ śucirarivadanaśyāmatāpātahetuḥ |

durvijñeyānubhāvo nikhilajagadatispaṣṭadṛṣṭiprakāśaḥ

pādāmbhojāvalambī nakhakiraṇacayaḥ pātu vo buddhamauleḥ || 19 ||

dṛṣṭo hṛṣṭāmareśārcanacaturavadhūmuktakarpūrapāṁśu-

prodbhāso bhaktibhārapravaṇaharajaṭābhūtivibhrāntabhūmiḥ |

pūjāvikṣiptalakṣmīkarakamalagalatkeśarāgrāṇureṇu-

cchāyaḥ pāyādapāyānnakhakaravisaraḥ padmahastāṅghrijo vaḥ || 20 ||

merau niṣpītapītadyutiramarakarisphārasindūradhūlī-

śoṇaśrīśāntaśūro haritaharihayāhīnahārityahārī |

mīlannīlāvabhāso nakharucivisaraḥ padmabhṛtpādapadmād

udyaddugdhābdhivṛddhitrasadamaravadhūvīkṣito rakṣatād vaḥ || 21 ||

śobhā saṁbhāvyate'smin himakaradhavalairnāmaraiścāmarairvā

bhaktyārambheṇa rambhe parikirasi mudhā kiṁ nu karpūradhūlīḥ |

kiṁ te puṣpaiḥ prakīrṇaiḥ śaciśucibhiriti svāminā svarbhuvāṁ vaḥ

pūjāyāmabjapāṇernakharucinivahaḥ pādajo varṇito'vyāt || 22 ||

kailāsodbhāsivindhye kavalitabalijitkāyakālimni kālī-

līlālāvaṇyalepe vihataharitimaśvetapūṣāśvaraśmau |

lokeśāṅghrernakhānāmurukaranikare kiṁ mayetīva śīrṇaṁ

śītāṁśoḥ pātu pūjācaturasurajanākīrṇakuṇḍacchalād vaḥ || 23 ||

pādāḥ pādodbhavānāmativitatibhṛtāṁ buddhamaulernakhānāṁ

pāre saṁsārayādaḥpatigamanamahāsetubandhāyamānāḥ |

udyaddurvāraduḥkhānalaśamanamahāpuṇyasaṁbhāravāri-

svacchandācchacchaṭābhā jhaṭiti vighaṭanaṁ kurvatāṁ vo bhavasya || 24 ||

kālīkāntendukānteḥ paribhavavidhṛtirbhūrikailāsabhūbhṛd-

bhāsāṁ hāsāvagītirhatirapi himavadgauratāgauravasya |

kṣīrākūpārapūraplutirapi kakubhāṁ nākanāgīyadanta-

cchedacchāyākṣatirvo nakharucivitatiḥ pātu lokeśvarāṅghryoḥ || 25 ||

yatpūjāpārijāte valitamalikulaṁ mīlati śrīsaroje

sevāsaktaḥ svayaṁbhūrmukulitanalinād duḥsthito yatra tasthau |

yenāśyāmā dinaśrīḥ śamitasuravadhūklāntidoṣā niśā'bhūt

pādo'sau padmapāṇernakhavidhuvilasaccandrikaḥ pātu yuṣmān || 26 ||

kānto vibhrāntakāntāmarayuvatijanairarcito dṛṣṭipātaiḥ

śubhraṁ vibhrāṇmṛṇālīnikaramiva nakhodyotanodbhūtaśobhaḥ |

kāmīvānalpakāmaprasaraparavaśānekacaryāpravṛttaḥ

pādo vaḥ padmapāṇeravatu surapurīcandanāmandacarcaḥ || 27 ||

ānandāmandabhārollasadamarakaraiḥ pārijāte vikīrṇe

kālīyaḥ kālakūṭotkaṭapaṭala iva prollasadbhṛṅgasārthe |

śreyo vaḥ śrīrvidhattāmalamamalanakhadyotadugdhābdhimadhyād

udyantī padmapāṇeścaraṇasarasijasyācyutaprītihetoḥ || 28 ||

vāñchāvicchittikhedocchaladanalaśikhāchedakacchocchryo vaḥ

padmacchāyānukāracchalitamadhukarācchādanācchāditaśrīḥ |

svacchandānacchamūrchacchucinakhakiraṇocchūnagucchairatuccho

deyāt pādo'bjakānticchuritakararūco'cchinnamicchāmakṛcchrāt || 29 ||

udbhūtodbhāsicakradyutiramalanakhairadvitīyoditaśrī-

rbibhrāṇo lakṣaṇānāṁ gaṇamatulaguṇāgaṇyapuṇyopanītam |

niḥśeṣadvīpadīpaprabhavadatimahadvaibhavo buddhamauleḥ

pāyāt pādo namasyadbhuvanapatiśiraścakravartī ciraṁ vaḥ || 30 ||

kīrṇairākāśagaṅgākanakakamalinīkuḍmalaiḥ ko guṇo'smin

kiṁ gītairgītameva sphuṭasarasirūhabhrāntibhṛṅgāvalībhiḥ |

śakyaṁ māṇikyadāmnāmiha rūciranakhe śobhituṁ netyavādīd

yatpūjāyāṁ sureśaḥ sa jayati caraṇo vārijavyagrapāṇeḥ || 31 ||

yo nāthasyaiva nāsīdapi khalu sugateḥ kāraṇaṁ janmabhājāṁ

yasmin padmābhilāṣī na madhupanivahaḥ pakṣapātī jano'pi |

yenorvī nātigurvī natimatiguruṇā lambhitāpi trilokī

lokaṁ pādaḥ sa pāyāt sugataśaśadharadyotavidyotamauleḥ || 32 ||

yo'līnāṁ pānadānādakṛta dhṛtamudaṁ saṁhatiṁ sevakānāṁ

yasminnālaṁ vihīnaṁ na khalu haritatātyantaśobhopadhānam |

deyādvo laukanāthiściramamaraśiraḥśāyireṇūtkaro'sau

śreyaḥ śrīvāsabhūmirnakhakiraṇahasatkeśaraḥ pādapadmaḥ || 33 ||

dehadrohāvahogrāhitahativihito dehināṁ hetirīhā-

siddherāhūtirāho hṛtiratimahato bṛṁhatāṁhomahimnaḥ |

kleśavyūhāhitehāhutivihitabṛhaddrohiduḥkhāgnidāha-

vyāpohā vāhinī stādvahuvihitahitā padmahastāṅaghribhāvaḥ || 34 ||

buddhālaṁkāramauleravikalakamalabhrāntibhṛdbhṛṅgamālā

vācālā nirvicārā racayatu caraṇotsarpiṇī saṁpadaṁ vaḥ |

sattvatrāṇaikakāryā sthiratarasucirāvasthitisthāpanārthaṁ

vinyastā śṛṅkhaleva pracurakaruṇayā sthūlakālāyasasya || 35 ||

rājīvāntaḥpalāśāvaliruciramṛdurvajrasāro visāro

krudhyadvairipramuktapraharaṇanivahasyodbhavadbhaṅgabhūmiḥ |

rakto rāgopaśānteratiśayabalavatkāraṇaṁ tāraṇāyāṁ

saṁsārāmbhonidhervaḥ sugataśaśibhṛto'pāstakhedo'stu pādaḥ || 36 ||

jambhārerjṛmbhitāmbhoruharuciracaye cāpalenāpyalīnā

nālaṁ lolāpi lolā harakaravihitānandakundotkare'pi |

bhrājiṣṇau viṣṇukīrṇe parimalini puraḥ pārijāte'pyajāta-

prītiryatrālimālā ramati jinabhṛtaḥ so'ṅaghripadmo'vatād vaḥ || 37 ||

bhūyādudbhūtabhūridyutinivahalasatkeśarodbhāsuro vo

raktacchāyānuviddhonmukhanakhadaśanodbhāsikāntyā karālaḥ |

trasyaddurvṛttavairidvipataralacalallocanālokanīyo

lokeśasyāṅaghrisiṁhaḥ kamalabhavajaṭāraṇyaśāyī śivāya || 38 ||

acchīyānapyanaccho laghurapi na laghurlaṅghane diṅmukhānāṁ

trailokyānandano'pi prabalaparapuravyāpisantāpahetuḥ |

lāvaṇyālepalipto'pyatiśayamadhuro vaidhurādherniroddhā

pādoddyotaḥ kriyād vo jinarūcivikasanmālikāśekharasya || 39 ||

rājīvai rājarājo harirapi haritairhāribhiḥ pārijātaiḥ

kundaiḥ sānandamindurbahuvasuvisarairvāsavo bhāsamānaiḥ |

prītaḥ pāśī palāśairiti vibudhajanaḥ prājyapūjāviśeṣaṁ

yatrānuprāsakāvyāyitamatata sa vaḥ pātu pādo'bjapāṇeḥ || 40 ||

bhānurbhāsāṁ vikāśe nutimakṛta nakheṣūnmukho nākanāthaḥ

śarvaḥ śākhāgraparvaṇyavicalanayano'pyantakaḥ prāntakāntau |

yasyāsāmānyaśobhāviṣayamatiśayaṁ draṣṭumāsīdanīśo

niḥśeṣaṁ divyalokaḥ sa jayati caraṇo buddhabimbāṅkamauleḥ || 41 ||

samyaksaṁbuddhabhānusphuṭavikaṭajaṭāpuñjakuñjorumūrteḥ

saṁsārāmbhodhimajjadgurutarajanatāmedinīstambhanasya |

bhūyād bhadrāya pādaḥ kamaladharagireḥ sevitaḥ siddhasārthaiḥ

paryantodvāntakāntisravadaruṇamahādhātumannirjharo vaḥ || 42 ||

saṁsārādhvaprabandhaśramasakalajagatklāntisaṁśāntihetu-

cchāyasyecchāphalasya sphuṭanakhakusumodbhāsiśākhābhṛto vaḥ |

lokeśāṅaghridrumasya praṇatasurajanairmaulimālālavāle

mūle saṁpādito'vyānmaṇikalaśabhṛtaḥ svacchadhāmāmbusekaḥ || 43 ||

saṁmūlakleśajālaprabalaripubalonmūlanasthūlalābhā-

llabdhollāso vilāsī balavijayilasanmaulilīlālayo vaḥ |

pāda pāyādatulyāmalakamalabhṛto'līkaphullābjalobha-

vyālolānalpalāpollasadalipaṭalālluptasaṁgītilolaḥ || 44 ||

trailokyaiśvaryalakṣmīcapalakarivadhūsaṁyamālānadaṇḍaḥ

kaṣṭakleśāhidaṣṭaskhaladakhilajagatpālane dakṣatarkṣaḥ |

durvārāntaḥpraveśākṛśanarakapure dvāragāḍhārgalo vo

bhūtyai lokeśapādo bhavajaladhisamullaṅghanaikaplavo'stu || 45 ||

iti pādukādeśanā

vṛtto nṛttaprakāraḥ sapadi vighaṭitā vādyavidyānavadyā

no gītaṁ nāvagītaṁ kṛtarasaracanairnaiva bhāvairabhāvi |

ityantaḥ smeraśākre sadasi na śakitā yatra pūjāpsarobhiḥ

kartuṁ bhāvāturābhiḥ sa jayati janitātṛptirūpaḥ sarojī || 46 ||

uddāmasthāmavāmakramaviṣamamilanmāramānapramāthī

madhyādunmāthimohodgamamamitamahomaulirāyāmabhīmam |

śrīmanniḥsīmabhūmāsamamahimamahākāmadhāmātibhūmau

sattvapremaprakāmaprathitamṛdumanā nirvirāmāśrayo vaḥ || 47 ||

sāraprākāraghorāvaraṇanivaraṇo bandhanakrūradūra-

sphārāvārātiraudre narakanagarikākāradhāriṇyarīṇām |

kārāgārodare yaḥ smaraṇaśaraṇatāṁ kāraṇākātarāṇāṁ

yātaḥ satkārakārī gurutarakaruṇaḥ pātu lokeśvaro vaḥ || 48 ||

kalpāntollāsihelācaladanilacalollolakallolamālā-

vācāle nakrajālākulakalilajale vāridhāvullalantaḥ |

ālambe yasya nīlotpalavimalamahākuṭṭimālīnalīlām

ālīyante ladhīyaḥ sa jagati kamalī pālanāyāla mastu || 49 ||

dhūmaughobandhabandhīkṛtavidhuravidhubradhnanirbandhadhāmā

nīrodhodbhedabādhābudhavibudhavadhūdhīratoddhāradhuryaḥ |

yannāmādhītidhārādharavidhṛtikṛtāmeti dhūmadhvajo'pi

pradhvaṁsaṁ sādhu dheyānniravadhi sa vidhiṁ buddhadhāro dhṛtervaḥ || 50 ||

krodhādutkṣiptakālāyudhakaranikaraḥ krūrasūtkārakārī

dānaklidyatkapolākulamadhupakulākāṇḍakālorukāyaḥ |

krānto yannāmakaṣṭāṅkuśahatikṛpaṇaḥ kātareṇa karīndro

lokeśaḥ sa prakāmopakaraṇakaruṇaḥ kāmakṛtyaṁ kriyād vaḥ || 51 ||

sūtkāriśvāsapoṣākṛśaviṣavamathuploṣiroṣāśrayāśā

daṁśāśādarśitāsyā bhṛśatataśiraso nāśane dandaśūkāḥ |

yannāmāśīviṣeśadviṣi viśati viṣāṁ dhīṣu naśyantyanīśā

lokeśaḥ so'stu viśvaśrayadativiṣamakleśarāśeḥ śamāya || 52 ||

gandhodgārorugarvagrahaṇagajagaṇagrāsagītogravegaḥ

sāvegodagragāmī galagahanaguhāgāḍhagambhīragarjaḥ |

yogairyugyopayogānagami mṛgapatiryadgaṇodgītiyogād

duryogaṁ vaḥ sa yogī sthagayatu sugatāsaṅgituṅgottamāṅgaḥ || 53 ||

bhūyo'pāyānumeyaḥ kṣatadayahṛdayo bhīvidhāyī vihāya

stheyān śailopameyaḥ śrayadaligavayacchāyakāyo nikāyaḥ |

sadyogopāyamāyāmaya iva vilayaṁ yātavān yātavīryo

yatpādadhyāyineyaḥ sa sugatanilayo jāyatāṁ vo jayāya || 54 ||

saṁtrāsāvāsabhūmiṁ kalivisarasaradyādasaṁ bhāsvarāsi-

prāsaprollāsibhaṅgaṁ prasṛtasitalasatketusatphenahāsyām |

yatsevāsādhunāvā dviṣadasamasamitsārasenāsravantīṁ

sotsāhāḥ saṁcarante sukhamasukhamasau saṁhriyād vaḥ sarojī || 55 ||

bhūbhṛtsaṁbhārabhedaprabhukaravibhavo bhūribhūbhogabhīmaṁ

bibhrāṇaścitrabhānuṁ bhavadatibharabhīsaṁbhramodbhrāntibhūtaḥ |

dambholirbhītibhājāmabhavadabhipatannāśunābhāvabhūmi-

rbhakteryasya prabhāvāt sa bhavatu bhavabhidvo bhṛtāmbhojaśobhī || 56 ||

ābādhādhūtadhairyaścyutividhisavidho durvidhakrodhavedho

bādhāduḥsādharodhoddhurabahuvividhavyādhisaṁbādhadehaḥ |

yasya dhyānāvadhānādadhikadhṛtisudhādhānasaṁdhāritāsu-

rdhīmānnādhervidheyo dhiyamavatu sa vo bodhaye buddhamūrdhā || 57 ||

ārādāhūtiyātṛkṣitipatiratulārātiśātipratāpa-

prodgītirdaṇḍanītiprathitapitṛpatikhyātijiddaṇḍanītiḥ |

yatpādādhītiśakteḥ kupitamatiratiprītimāyāti bhūte-

rvyāghātodbhūtiheturjinavṛṣavasatiḥ saṁhriyād vaḥ sa bhītim || 58 ||

brahmā jihmāyito'bhūdagururapi guruḥ khaṇḍitākhaṇḍalokti-

rviṣṇustūṣṇīmadhṛṣṭo vacanaviracane vītagarvo'pi śarvaḥ |

tuṣṭāstuṣṭūṣavo'pi sphuṭamiti vibudhā no budhā yadguṇoktau

sa śrīmānabjapāṇirjayati jinamanogocarāntarguṇaughaḥ || 59 ||

dhātrā citraṁ caritraṁ suraripuripuṇā satrinetreṇa netre

gotrāmitreṇa gotraṁ gatirapi guruṇā rātripeṇāpi gātram |

maitraṁ mitreṇa putrīyitasakalajagatprema putreṇa cātre-

ryatredaṁ stotrapātraṁ stutamavatu sa vo'mātrasatto'bjapāṇiḥ || 60 ||

yasmin brahmā bahutvaṁ bahubahumatavānānanānāṁ nijānāṁ

skando'pyānandagarbhaṁ nutiṣu natikṛtau nāganātho'pi mūrdhnaḥ |

śakraḥ ślāghyāmanaiṣīnnayanadaśaśatāṁ yaṁ vilokya trilokī-

lokeśo nirvirāmānatinayanaratistotrapātraṁ sa pāyāt || 61 ||

khedī khe dīptaraśmiḥ kila viphalamasāvadhvanīnodhvanīno

lokālokārthamāste nanu kamalabhṛto dīptatāpaḥ pratāpaḥ |

dhīrairdhīrairakāri stutiriti vihitollāsabhāsāṁ sabhāsāṁ

yasyāryasyāstu tasmājjagati kṛtaripukṣiprasādaḥ prasādaḥ || 62 ||

nyastā yasminnamasye natirapi nitarāmunnatiḥ puṇyadhāmnāṁ

niḥsāmānyaikamānye'pacitirupacitirbhūyasī bhaktibhājām |

dhyānasthānasya yasya smṛtirapi sahasā vismṛtirbhūtabhīteḥ

so'nantācintyaloke vihitahitapatho lokanātho'vatādvaḥ || 63 ||

dambho dambholiraindraḥ kvacidakṛta surārātiśāto'tiśāto

hārī hārīraṇāsau balavati viphalābhīṣu rājīṣu rājī |

cakre cakreṇa nārthaṁ haririti janatā nūnamāheti heti-

vyāsavyāsaktimuktān jayati ripujanollāsarojī sarojī || 64 ||

lokātotaṁ dadhānaḥ sukhamapi jagatāṁ tīvraduḥkhena duḥkhī

nityaṁ nityānurakto'pyaśaraṇakṛpaṇaprāṇabhṛdyogayuktaḥ |

trailokyasyaikanātho'pyasamarucijanārādhanābandhuro yaḥ

so'vyāt saṁbuddhamaulirvihitavisadṛśācintyacaryaściraṁ vaḥ || 65 ||

nirvicchedatrilokīnihitanirupamasnehayogānuyogā-

nnirvāṇo na prakampyo balavadalaghubhistīrthikonmattavātaiḥ |

jīyāllokeśadīpaḥ sa bhuvanabhavanodbhūtamohāndhakāra-

dhvaṁso'vidhvaṁsadhāmā parahitakaraṇodyogasaṁvṛttavarttiḥ || 66 ||

kvāsau sarvatra maitrī kva viṣamabahalakleśavidveṣidāhaḥ

kva prauḍhā muktiśaktiḥ kva ca dṛḍhakaruṇāpāśaniṣpandabandhaḥ |

kvopekṣāpakṣapātaḥ kvaparahitakṛtivyagratā tadvicitraṁ

citraṁ rājīvapāṇeścaritamatijagajjāyatāṁ jyotijidvaḥ || 67 ||

sarvāgraḥ sarvarūpaprathanapṛthunayaḥ sarvadā sarvanāthaḥ

sarveṣāṁ sarvathā yo vinayavidhimahāsarvagurvarthasiddhyai |

sarvaiḥ sātotagarvairgurumahimaguṇaiḥ kharvayan sarvagarvān

sarvaḥ sarvaprado vaḥ saphalayatu rūcīḥ sarvavinmaulirurvīḥ || 68 ||

īśaḥ svāmī prajānāṁ patiramaragururlokapālo mahendro

bhāsvān dattāridaṇḍaḥ parajayabalijid vittado jaitrapāśaḥ |

ityantarhāsagarbhaṁ bhaṇati parijane'nvarthanāmnāṁ nijānāṁ

pātre yatrānulajjairnatamamaragaṇairabjapāṇiḥ sa jīyāt || 69 ||

varyāryāṇāṁ vareṇyo varaparavidhurotsāraṇā saṁvaro vo

durvāraiḥ sāramārairamitakaradharo durdharo vairivīraiḥ |

vīro vīrārivārī pracurataravarodārasaṁbhāravāri-

sphārāsārorudhārāvisaravitaraṇādhīradhārādharaḥ syāt || 70 ||

nityodyukte'tiśakte prabhavati nalinodbhāsi haste samasto

nāthī saṁsārayādaḥpatipathapathako loka ityākalayya |

yasmin vinyasya bhāraṁ laghuralaghukṛpo viśvadīpaṁ prapede

buddho'vandhyapratijñākṛtadhṛtividhṛtirnirvṛtiṁ so'vatādvaḥ || 71 ||

uccairūḍho garīyān sugata iva jagatkāryasaṁbhārabhāro

nyastā haste praśastā nija iva kamalālaṁkṛtirbhaktibhājām |

nirvāṇaṁ nārakāgnernicaya iva ciraṁ prāpitaḥ sattvasārthaḥ

tīvrakleśaprabandho jana iva śamito yena pāyāt sa yuṣmān || 72 ||

yo nānānantarūpaprakaṭanapaṭimakhyātamāyo'pyamāyaḥ

saṁśāntāśeṣabhīrapyatikaruṇatayā kātarācārakārī |

vītakrodho'pi duṣṭāśayadamanabudhakrodhanityānubandhaḥ

saṁbuddhodbhāsimauliḥ sa jayati mahatāṁ cintanīyo'pyacintyaḥ || 73 ||

dhatte naivottamāṅgaṁ paramapitu vapuryo'mitābhābhirāmaṁ

sannālaṁ nāravindaṁ gurubhayavidhurā vairisenāpi yasya |

yenābaddhā jaṭā no jagadahitahativyāpṛtenāpi kakṣā

dakṣo'sau rakṣatādvaḥ kupitayamamukhālokanāllokanāthaḥ || 74 ||

śeṣāśaṅkī cakampe bhavasalilanidhiḥ kleśasārthaiḥ pralīnaṁ

viśrāntaṁ bodhisattvairmunirapi śuśubhe ślāghyanirvāṇalīlaḥ |

yasminnābaddhakakṣe prasarati parito'śeṣasattvārthakārya-

vyāyāme sa prakāmaṁ śamayatu sugatāvāsamaulirmalaṁ vaḥ || 75 ||

iti bhagavadvarṇanā |

pratyūhavyūhabādhāvighaṭanaviṣame mānasasyāpyabhūmau

karmaṇyekāntaśarmacchidi jagadahitocchittaye padmapāṇiḥ |

nighnaḥ krīto'tha bhīto balavadiva yayā nirvikāro niyuktaḥ

sā nāthasyātigurvī prabhuravatu kṛpā niṣkṛpādantakādvaḥ || 76 ||

bhūmirnaivābhibhūtermṛdutaramapi yallokadhātūnanantān

atyantāvīryavīryaṁ yugapadapi bhṛśaṁ bhāsayaṁstrāsaśāntyai |

khadyotodyotaleśānukṛtivilisitāśeṣatejasviteja-

stejo lokeśvaraṁ vo haratu hṛdi bhavadbhūrimohāndhakāram || 77 ||

niḥśeṣākāśadhāturjana iva janitāpūritāśaḥ samantāt

prārabdhaḥ sarvabhāsāmiva niratiśayāpāyarāśervilopaḥ |

sārdhaṁ sāndrāndhakāraiḥ śamamagami mahānṛddhimānmānimāro

yenodbhāsaḥ sa bhūyāt sarasirūhabhṛto bhūtaye jāyatāṁ vaḥ || 78 ||

īśo'nyadyotanāśo balabhiditarabhāduḥśamadhvāntarāśeḥ

sattvadrohāśayānāmanupamatapano yo'cyutaścitrabhānuḥ |

nānānantācalādivyavahitaviṣayodbhāsane śaktidhārī

lokeśodbhāsa ekopyamaragaṇanibho bhībhide vaḥ sa bhūyāt || 79 ||

saṁpannāśeṣasattvapracurajalacarecchāsukhaṁ yatra dūraṁ

durlaṅghaye yāntyadhastād giraya iva janānarthadustīrthyasārthāḥ |

durvāro'sau samantāt pṛthubhavabhuvanābhāvasaṁrambhajṛmbhī

bhīdāvāgnipraśāntyai karakamalavibhāmbhonidhirjṛmbhatādvaḥ || 80 ||

nirvāṇo nārakāgniḥ kimiti yadi vineyeṣu dharmāmṛtaugho-

rāśirbaddho jaṭānāṁ yadi gatirahitaḥ kiṁ samaho ripūṇām |

mardhāgāre garīyān yadi vasati jino bandhurā kiṁ trilokī

nāthasyetthaṁ vicitrā vyavahṛtirahitaṁ hantu vo lokabandhoḥ || 81 ||

mūrcchatyekāpi sattvāśayavaśavihitākārabhedābhirāmā

durbhedābhūtakalpā caladacalamahārambhadambholikoṭiḥ |

laukeśī sanmanīṣākumudaśaśirucistīrthikānarthakoṭi-

dhvāntāntardhānabhānurbhavatu bhavabhide deśanā śāsanī vaḥ || 82 ||

durvādonmādanādipracuramadakaṇādākṣapādādivādi-

prodyannānāvivādāspadamadasadasāṁ sāpavādo vivādaḥ |

utsādaḥ sapramādonmadajanavipadāṁ kovidānāṁ prasādo

bhāvānutpādavādo jayati jinavapuḥ pādasaṁpādamauleḥ || 83 ||

trastavyastāriśastraṁ trayi jagati cakāsti stuto yadgabhasti-

stomo vistīrṇatoyaṁ marunilayasadāṁ vistaradhvastatāpaḥ

sa stādastāhitāstro balivalikuliśaḥ padmahastasya hasto -

'nāpāstyaiḥ vaṁ samastatribhuvanavikasatsādhvasāpāstiśastaḥ || 84 ||

saṁvartodvṛttavātavyatikaraviṣayottuṅgaśailadrumālī-

nirmūlonmūlanāya prabhurarikariṇāṁ śātitānalpadarpaḥ |

bhadro lokeśvarasya praṇayimadhukarākarṣadānaughavarṣī

hastastamberamo vo bhavaripunagarībhañjanāyālamastu || 85 ||

satkoṣaṁ sannidhānaṁ ghanarucijinatāvāñchitācchedasiddhau

yadyātaṁ śātakoṭimanukṛtimahitatrāsisatpatrakoṭi |

samyaksaṁbodhilakṣmīkṛtavasatiguṇaślāghayaivāvimuktaṁ

muktestatkāraṇaṁ vaḥ karakamalamalaṁ lokanāthasya bhūyāt || 86 ||

śaśvadvardhiṣṇutṛṣṇāvikalagaladarīvihvalapretarāśe-

rāhlādotpādi satyaṁ kamalamadhivasadbodhilakṣmīkamabjam |

satpadmaṁ bhūtivāñcchāvinihitamanasāṁ sādhusevāpadaṁ yat

tallokeśasya yuṣmān paṭurucipaṭalīrājirājīvamavyāt || 87 ||

nānāduḥkhapratānāṁ tanukiraṇaghanottāpanakleśabhānu-

mlānaṁ dīnānanaṁ yajjanamanujanayatyātapatropamānam |

glāniṁ mā gādahīnaṁ tadakhilabhuvanānyūnabhānūdvitānaṁ

līnaṁ lokeśapāṇau nalinamamalinaṁ mlānimeno nayedvaḥ || 88 ||

sthāmnaḥ sthānaṁ mahimno mahadudayapadaṁ dhāmadhāmnāṁ prathimna-

strāsāvāso ripūṇāṁ durabhibhavabhavādbhībhidodbhūtibhūmiḥ |

kāntaṁ śobhāniśāntaṁ vasatiratijagadvīryavistārirāśe-

rlokeśasyāstu bāhurbahujagadahitocchedanācaṇḍadaṇḍaḥ || 89 ||

yallāvaṇyāmṛtaughaṁ kṣaradapi janitātaṅkamevāhitānāṁ

tṛptiṁ naiva prayacchatyatha punaratanuprīṇanaṁ locanānām |

śobhāgāraṁ viśobhīkṛtasakalajagadbhūṣaṇaṁ bhūṣaṇānāṁ

tadbhuyādekacīraṁ sukhamasukhanude bhāsvadambhojino vaḥ || 90 ||

mlānaṁ rūpābhimānairjagati saphalatāṁ locanaiḥ puṇyabhājāṁ

yātaṁ ghātaṁ tu tṛṣṇātatitaralatarairyatra lāvaṇyasindhau |

manye'saṁkhyaiḥ śaśāṅkaprabhṛtibhiratulaṁ kāntimadbhiḥ kṛtaṁ syād

ekaṁ yadyāsyamasyāpyatijayi jayatāṁ tanmukhaṁ padmapāṇeḥ || 91 ||

yasmin vidveṣabhājāmaviratavilasatkāntitoyaughameghaiḥ

saṁvṛttaṁ dāhadāyi sphuṭataramasakṛddurdinaṁ dehināṁ tu |

dhautā dhvastānubandhā bahulamalamaṣīpaṅkalepaprabandhāḥ

tadbuddhāgāramūrddhāmukhamatisukhadaṁ stādvicitrakriyaṁ vaṁ || 92 ||

iṣṭābjākliṣṭapāṇeḥ sphuṭavikaṭakuṭīkuṭṭimāntopaviṣṭa-

spaṣṭaśliṣṭāmitābhadyutipaṭupaṭalāpāṭalābhāpaṭimnaḥ |

śobhāviṣṭairadṛṣṭoparighanaghaṭanasyotkaṭāṭopabandhaḥ

kūṭasyāvyājjaṭānāṁ kaṭurakaṭasuhṛtsaṁkaṭātkaṅkaṭo vaḥ || 93 ||

atyantāhlādahetoraviratavistṛtasyāmitābhaprabhāmbhaḥ

saṁbhārasyaiva sekān niratiśayamṛjāsundaro labdhavṛddhiḥ |

uddāmāmodidivyādbhutakusumacayairarcitaścintitārtha-

prāpteḥ saṁpattaye stānnalinadharajaṭākalpavallīcayo vaḥ || 94 ||

yāsāṁ baddho vimuktiṁ gamayati niyatāmujjhitānyādhivāso

niḥsāmānyāṁ vibhūṣāṁ janayati vapuṣā yāsu nātho'mitābhaḥ |

sarvāmodacchido yā nirupamavahalāmodaliptākhilāśā

laukeśyo'vaśyalabhyāṁ mṛtimativikaṭāstā jaṭā vo harantu || 95 ||

saṁghāto no jaṭānāmakhilajanamanobandhane pāśarāśi-

rlāvaṇyaṁ nāpi duḥkhānalavikalajagajjīvanīyo'mṛtaughaḥ |

nāmbhojaṁ duṣṭadamyāntakaturagakaśākleśadoṣātimoṣaḥ

pratyāśā poṣasiddhiṁ diśatu jinaśaśiśleṣikeśaḥ śriyo vaḥ || 96 ||

uddāmāpiṅgatejaḥprasaraviracitāśeṣadigdāhamoha-

trastātrāṇātrilokīkavalanarabhasollāsikālāgnikalpam |

daṣṭauṣṭhaṁ duṣṭadṛṣṭijvalitamanuhayagrīvamābaddhalakṣmyā

jātā lokeśvarī vaḥ kṣaṇamatulakṛpākātarā dṛṣṭiravyāt || 97 ||

lopaṁ lokaḥ prayāti sphuṭamakhilamahābhūbhṛtāmadya tūrṇaṁ

cūrṇībhāvo dharāṇāmapi jalanidhayaḥ śoṣamāyāntyanantāḥ |

itthaṁ yasyāntakopabhrukuṭibharabhavadbhaṅgabhīmāllalāṭā-

nniryāntīṁ vīkṣya devīmatulabhujabalaistrastamabjī sa jīyāt || 98 ||

stutyaiḥ stutyā gurūṇāmapi jagati gururvanditā vandanīyai-

rmūrtevānalpakalpārjitasakalajagattrāṇanirvyājaśaktiḥ |

lokasyārticchidā yaiḥ svayamatulakṛpaivābjino nirgatā stāt

tārā saṁsārakārodaraguruvilasatkāraṇāhāriṇī vaḥ || 99 ||

gīrvāṇagrāmagīto gurugaṇanaguṇo gīṣpateragragābhi-

rgrāhyonudgāḍhavargasphuṭagatigahano haṁsagāmyugragābhiḥ |

gambhīrodgāriṇībhirnigaditagarimāgeyapūgālpabhāgaḥ

samyaggamyaḥ samagro'vatu sugatagirāmabjino vo guṇaughaḥ || 100 ||

kavirapi janmani janmani bhaktaścaraṇe'valokiteśvarasya |

prakṛtiśaraṇagottaradhīḥ parahitagurukāryakāryaḥ syām || 101 ||

mahākṣapaṭalikaśrīvajradattakaviviracitaṁ

śrīlokeśvaraśatakaṁ samāptam |

Technical Details

Text Version: 

Romanized

Input Personnel: 

DSBC Staff

Input Date: 

2004

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0