1. dānapāramitāsamāsaḥ

pāramitāsamāsaḥ

1. dānapāramitāsamāsaḥ

namo buddhāya||

tathāgatānāṁ padam āruru-

kṣurāśritya ratnatrayam ādareṇa|

bodhau nidhāyāvicalaṁ manaśca

kuryāt parātmavyatihāram ādau || 1 ||

tataḥ paraṁ dānavidhau prayogaḥ

kāryastathā lokahitonmukhena|

yathā svagātrāṇyapi yācitasya

na yogasaṁkocavirūpatā syāt || 2 ||

mātsaryadoṣopacayāya yat syān

na tyāgacittaṁ paribṛṁhayed vā|

tattyaktumevārhati bodhisattvaḥ

parigrahacchadmamayaṁ vighātam || 3 ||

tad bodhisattvaḥ katham ādadīta

ratnaṁ dhanaṁ vā divi vāpi rājyam|

yat tyāgacittapratipakṣadakṣaṁ

saṁbodhimārgāvaraṇaṁ karoti || 4 ||

saṁsmṛtya caryātiśayaṁ munīnāṁ

tadunmukhīṁ svāmapi ca pratijñām|

parigrahasnehavinigrahārthaṁ

kuryād imāṁścetasi sadvitarkān || 5 ||

yadā nisṛṣṭo jagate mayāyaṁ

kāyo'pī tattyāgakṛto'pi dharmaḥ|

bāhye tadā vastuni saṅgacittaṁ

na me gajasnānam ivānurūpam || 6 ||

māṁsārthino māṁsamidaṁ harantu

majjānamapyuddharaṇāt tadarthī|

ahaṁ hi lokārthamidaṁ bibharmi

śarīrakaṁ kiṁ bata vastu bāhyam || 7 ||

yathaiva bhaiṣajyamahīruhasya

tvakpattrapuṣpādi janā haranti|

madīyamete'paharanti ceti

naivaṁ vikalpāḥ samudācaranti || 8 ||

tathaiva lokārthasamudyatena

svalpo'pi kāryo na mayā vikalpaḥ|

duḥkhe kṛtaghne satatāśucau ca

dehe parasmāyupayujyamāne || 9 ||

ādhyātmike caiva mahījalādye

bāhye mahābhūtagaṇe ca tulye|

idaṁ mamedaṁ na mameti ko'yam

ajñānapaṅkāṅkavidhirmayāpi || 10 ||

gṛhṇīta gātrāṇyapi me yatheṣṭaṁ

mā kārṣurasmin parakīyabuddhim|

yuṣmākameva svamidaṁ kimarthaṁ

nātmābhimāno mama kaścidatra || 11 ||

ityadbhutā yasya bhavantyabhīkṣṇaṁ

saṁbuddhabhāvānuguṇā vitarkāḥ|

taṁ bodhisattvātiśayaṁ vadanti

buddhā mahāsattvamacintyasattvāḥ || 12 ||

evaṁ sa dānapratipattiśūraḥ

karoti kāye'pi na jātvapekṣām|

tasyāprayatnādupayānti śuddhiṁ

karmāṇi vākkāyamanomayāni || 13 ||

viśuddhakarmā ca hitaṁ pareṣām

āyāsaduḥkhena vinā karoti|

itthaṁ sa sattvārthamabhiprayatno

nayānaye kauśalamabhyupaiti || 14 ||

bhūyastaraṁ prāpya balaṁ sa dānāt

saddharmadānena tataḥ karoti|

bhavāndhakāre bhramatāṁ janānāṁ

sūryodayāt spaṣṭataraṁ prakāśam || 15 ||

sādhāraṇī lokahitārthasiddhiḥ

sarvajñabhāvābhyudayapratiṣṭhā|

ato'sya puṇyākṣayatābhyudeti

prabheva bhānorudayasthitasya || 16 ||

ityadbhutā dānamayā guṇaughā

ye bodhisattvābharaṇībhavanti|

tasmāt tadīyaṁ parikarma cittaṁ

dānasya kāruṇyapuraḥsarasya || 17 ||

āyuḥpratībhānabalādi bauddhaṁ

niṣpādayeyaṁ jagatāmanena|

sattvā mayā cāmiṣasaṁgṛhītāḥ

saddharmapātrāṇyapi me bhaveyuḥ || 18 ||

ityannadānaṁ pradadāti vidvān

na svargasaṁpattiparigrahāya|

pānānyapi kleśatṛṣaḥ śamāya

lokasya lokārthacaro dadāti || 19 ||

bauddhasya caivarddhiviceṣṭitasya

nirvāṇasaukhyasya ca sarvalokaḥ|

lābhī kathaṁ syāditi lokanātho

yānaṁ mahāyānaratirdadāti || 20 ||

saṁbuddhavarṇasya ca hemabhāso

lajjāmayasyaiva ca bhūṣaṇasya|

niṣpattaye vastravidhīnudārān

satkṛtya kālānuguṇaṁ dadāti || 21 ||

saṁbodhimaṇḍāsanam āsanāni

śayyāśca śayyātrayam īkṣamāṇaḥ|

sarvajñacakṣuḥpratilabdhaye ca

caityeṣu rathyāsu ca dīpamālām || 22 ||

vādyāni divyaśrutisaṁgrahārthaṁ

saṁbuddhaśīlāya ca gandhadānam|

sabhāprapārāmavihāragehāñ

śaraṇyabhāvābhimukho dadāti || 23 ||

dānaṁ rasānāṁ tu susaṁskṛtāṇāṁ

rasārasāgratvaparigrahāya|

bhaiṣajyadānānyajarāmaratvaṁ

lokān imān prāpayituṁ dadāti || 24 ||

bhujiṣyatāmātmasamaṁ ninīṣurdāśī-

kṛtān kleśagaṇena lokān|

sa dāsadāsyādi sadā dadāti

dāsānudāsānaparākariṣyan || 25 ||

dadāti putrān duhitṛḥ priyāśca

bodhipriyatvādanavadyadānam|

ekāntasaddharmaratipriyaśca

krīḍāviśeṣān ratihetubhūtān || 26 ||

suvarṇamuktāmaṇividrumādīn

dadāti sallakṣaṇasaṁpadartham|

ratnapradīptāni ca bhūṣaṇāni

citrāṇyanuvyañjanasauṣṭhavāya || 27 ||

dhyānārthamudyānatapovanāni

saddharmakoṣāya ca vittakoṣam|

munīndrarājyāya dadātyakhinno

rājyāni cājñāpanamaṇḍitāni || 28 ||

cakrāṅkitābhyāṁ caraṇottamābhyām

saṁbodhimaṇḍākramaṇotsukatvāt|

sa nirvikāraścaraṇapradānaṁ

lokārthaniṣpattikaro dadāti || 29 ||

duḥkhāpagāyāmatiśīghragāyāṁ

magnasya lokasya kathaṁ na dadyām|

saddharmahastāniti saṁpradatte

hastānvikoṣāmburuhaprakāśān || 30 ||

śraddhendriyādipratipūraṇārthaṁ

sa karṇanāsādi dadātyakhinnaḥ|

cakṣuśca cakṣurvimalīkariṣyaṁ-

llokasya sarvāvaraṇaprahāṇāt || 31 ||

utkṛtya māṁsāni saśoṇitāni

dadāti kāruṇyavaśena nāthaḥ|

bhūmyagnivāyvambuvadeva me syāllo-

kopajīvyaḥ katham eṣa kāyaḥ || 32 ||

lokottamajñānasamāpanārthaṁ

sa uttamāṅgairapi satkaroti|

abhyāgatasyārthijanasya yācñāṁ

prāgeva dehāvayavaistadanyaiḥ || 33 ||

majjānamapyadbhutavīraceṣṭo

dadāti lokasya kathaṁ na kuryām|

tathāgataṁ vigrahamapradhṛṣyaṁ

vṛṣṭyāpi vajrojjvalayā patantyā || 34 ||

ityevamādyaṁ satatānavadyaṁ

tadbodhisattvāmbudharapramuktam|

prahlādya dānāmbu jagatsamagraṁ

sarvajñatāsāgaramabhyupaiti || 35 ||

anviṣya bhogānviṣameṇa nāsau

dadāti notpīḍanayā parasya|

na trāsalajjāpratikārahetorna

dakṣinīyān parimārgamāṇaḥ || 36 ||

na ca praṇīte sati rūkṣadānam

adakṣiṇīyā iti vāvamanya|

vipākakāṅkṣākṛpaṇīkṛtaṁ vā

satkārahīnaṁ vijugupsitaṁ vā || 37 ||

naivonnatiṁ śīlavate prayacchan

viparyayaṁ gacchati netarasmai|

nātmānamutkarṣati naiva nindāṁ

karoti so'nyasya samaprayogaḥ || 38 ||

na cāsya mithyāśayadānamasti

naivāstyanadhyāśayadānamasya|

na krodhadoṣopahataṁ dadāti

naivānutāpaṁ kurute sa dattvā || 39 ||

na ślāghyamāno vipulaṁ dadāti

nāślāghyamāno'nyataraṁ dadāti|

na yācakānāmupaghātadānaṁ

yad vā bhaved vipratipattihetuḥ || 40 ||

nākāladānaṁ sa dadāti kiṁcid

dadāti kāle viṣame'pi naiva|

na devabhāvāya na rājyahetorna

hīnayānaspṛhayālubhāvāt || 41 ||

nāsau mukhollokanayā dadāti

na kīrtiśabdāya na hāsyahetoḥ|

paryāptametacca mameti naivaṁ

yadvā vihiṁsāhasitaṁ pareṣām || 42 ||

sarvajñabhāvāpariṇāmitaṁ vā

sagarhitaṁ vā sa dadāti naiva|

tato'sya tat pāramitābhidhānaṁ

parāṁ viśuddhiṁ samupaiti dānam || 43 ||

dānodbhavaṁ tasya ca puṇyarāśiṁ

lokāt samagrādapi piṇḍitāni|

puṇyāni naivābhibhavanti yasmāllo-

kottamattvaṁ sa tato'bhyupaiti || 44 ||

pañcasvabhijñāsu viniścitātmā

lokāya yadvarṣati dānavarṣam|

samantatastasya kutaḥ pramāṇaṁ

parikṣayo vā satatapravṛtteḥ || 45 ||

yadakṣayāṇāṁ jagatāṁ hitāya

jñānasya hetuśca yadakṣayasya|

traidhātukena kṣayiṇā na tacca

saṁlipyate vyomavadambudena || 46 ||

tacchūnyatākārasamāhitaṁ ca

nimittadoṣaiḥ parivarjitaṁ ca|

akiṁcanakleśaviyogasiddheste-

nākṣayaṁ tatkathitaṁ munīndraiḥ || 47 ||

asmin punaḥ satpuruṣāvadāne

dāne nidāne sukhavistārāṇām|

cikīrṣatā yogamanityasaṁjñā

bhogeṣu kāryā karuṇā ca loke || 48 ||

bhogānanityānabhivīkṣamānaḥ

sātmyaṁ gatāyāṁ ca tataḥ kṛpāyām|

sa niścayaṁ gacchati dīyate yad

etān madīyāṁ na tu yadgṛhe me || 49 ||

yaddattam asmān na bhayaṁ kadā cid

gehe yadasmādbhayamabhyupaiti|

sādhāraṇaṁ rakṣyamatarpakaṁ ca

datte tu naite prabhavantyanarthāḥ || 50 ||

sukhaṁ paratrāpi karoti dattam

ihaiva duḥkhaṁ prakarotyadattam|

ulkāsvabhāvaṁ hi dhanaṁ narāṇām

atyajyamānaṁ vyasanaṁ dadāti || 51 ||

adīyamānaṁ nidhanaṁ prayāti

nidhānatāṁ yāti hi dīyamānam|

dhanasya niḥsāralaghoḥ sa sāro

yaddīyate lokahitonmukhena || 52 ||

yaddattametadviduṣāṁ praśasyaṁ

bālo janastannicayapraśaṁsī|

prāyo viyogo hi parigrahebhyo

dānādbhavatyabhyudayo yaśaśca || 53 ||

dattaṁ na tatkleśaparigrahāya

kleśāya mātsaryamanāryadharmaḥ|

yaddīyate satpatha eṣa tasmād

ato'nyathā kāpathamāhurāryāḥ || 54 ||

abhyāgate yācanake ca tena

saṁbodhisaṁbhāravivṛddhihetau|

tatpreṣyasaṁjñātmani saṁniveśyā

kalyāṇamitrapriyatā ca tasmin || 55 ||

mahātmanāṁ yatpratanūbhavanti

rāgādayo yācanakānniśamya|

tenotsavābhyāgamamapyatītya

teṣāṁ priyaṁ yācanakopayānam || 56 ||

sa cetpunaryācanake'pi labdhe

dātuṁ na śaknotyatidurbalatvāt|

tenānuneyo madhureṇa sāmnā

sa yācakaḥ syānna yathā samanyuḥ || 57 ||

kāryaśca mātsaryavinigrahāya

mohaprahāṇāya ca tena yatnaḥ|

tathā yathā yācanakaḥ kadā cid

vaimukhyadīno na tato vyāpaiti || 58 ||

saṁbodhicittaṁ kuta eva tasya

dravye'pi yo matsaramabhyupaiti|

vāsaḥ sucittasya hi nāsti doṣairambho-

nidhānasya śavairyathaiva || 59 ||

tasmāt tyaktvā sarvataḥ sarvadoṣān

bodhiprārthī sarvadā sarvadaḥ syāt|

trātuṁ lokānekavīraḥ kva cittaṁ

ceṣṭā dainyānūrjiteyaṁ kva caiva || 60 ||

mūlaṁ dānasyāsya saṁbodhicittaṁ

tanna tyājyaṁ ditsatā dānamīdṛk|

taṁ saṁbuddhāstyāgināmagramāhuryo

lokeṣu tyāgamādhitsuragram || 61 ||

|| dānapāramitāsamāsaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

2. śīlapāramitāsamāsaḥ

2. śīlapāramitāsamāsaḥ

saṁbuddhaśīlābharaṇābhirāmān

kartuṁ janānutpatitādareṇa|

svameva śīlaṁ pariśodhyamādau

śīlaṁ hi śakterbalamādadhāti || 1 ||

loke tathā prema niveśayeta

svapne'pi na droharuciryathā syāt|

paropakāraikarasaḥ pareṣāṁ

bhogānahīnāmiva na spṛśecca || 2 ||

dvandvapravṛttervinivṛttabuddhiḥ

prāgeva dārapraṇayāt parasya|

kurvīta lokasya hitārthakartā

kāyena ceṣṭāḥ sujanasya ceṣṭāḥ || 3 ||

mādhuryaramyāmapi kālayuktāṁ

satyānukūlāmavibhedinīṁ ca|

saddharmatattvādhigamāya vāṇīṁ

brūyādvipakṣāduparamya tasyāḥ||4||

kāryaṁ prayatnena mayā yadasmai

tatsādhanena svayameva labdham|

parasya saukhyeṣviti tuṣṭacittaḥ

kuryān manonirviṣayāmabhidhyām || 5 ||

mamaiva daurabalyamidaṁ yadeṣa

kleśāsvatantraḥ svahitaṁ na vetti|

parāparādheṣvapi kārya evaṁ

vyāpādavahnipraśamāya yatnaḥ || 6 ||

kudṛṣṭisaṁjñaṁ ca tamaḥpratānaṁ

jñānaprakāśairmanaso nirasya|

kuryādahāryāṁ naradevavarye

bhaktiṁ guṇābhyāsavirūḍhamūlām || 7 ||

svargasya mokṣasya ca satpathebhyo

naivoccalet karmapathebhya ebhyaḥ|

atra sthitānāṁ hi jagaddhitārthāścintā-

viśeṣāḥ saphalībhavanti || 8 ||

samāsataḥ śīlamidaṁ vadanti

yaḥ saṁvaraḥ kāyavacomanastaḥ|

kārtsnyena cātraiva yataḥ sa tasmād

etānyayatnena viśodhayecca || 9 ||

hiṁsānivṛttapraṇayo dadāti

saumyasvabhāvādabhyaṁ janānām|

yā vāsanā doṣakṛtāsya citte

tāṁ cāprayatnena samucchinatti || 10 ||

maitrīviśeṣānugate ca citte

vairānubandheṣu śamam gateṣu|

sukhaprabodhaḥ sukhameva śete

kṣīṇāśubhasvapnavikāradoṣaḥ || 11 ||

kurvanti rakṣāṁsyapi cāsya rakṣāṁ

na durgatibhyo bhayamabhyupaiti|

prāpnoti cārogyaguṇābhirāmamāyuḥ

prakṛṣṭaṁ sugatipratiṣṭham || 12 ||

ataśca saṁbodhimupāgatānāṁ

tathāgatānāmamitaprayāmam|

nirvartate cittavaśānuvarti

lokasya saukhyopacayāya vāyuḥ || 13 ||

anādadānastu parasya bhogān

āpnoti bhogānmahataḥ paratra|

narendradāyādagaṇairahāryān

girīniva śvāsanavairahāryān || 14 ||

ācāraśuddhyānugatapriyatvaṁ

viśvāsapātratvamihaiva yāti|

ataḥ paropakramanirviśaṅko

gatipratīghātamupaiti naiva || 15 ||

asārabuddhirdhanavistareṣu

bhavatyayatnena viśuddhaśīlaḥ|

tasmādupakleśaviśuddhabuddhira-

nuttarāṁ ca svayameti bodhim || 16 ||

kāmeṣu mithyācaraṇānnivṛtto

jitendriyatvāt praśamābhirāmaḥ|

prāpnoti lokastutibhiḥ samantāt

kīrtiṁ diganteṣu vikīryamāṇam || 17 ||

na cāpi kaṁ citpramadāsu rāgaṁ

karoti mātṛriva vīkṣamāṇaḥ|

asmācca puṇyopacayān munīndraḥ

saṁjāyate vāraṇavastikoṣaḥ || 18 ||

vāco'nṛtāyāstu nivartamānaḥ

prāmodyavāñchāṭhyavimuktacittaḥ|

ādeyasiddhyā vacanasya sattvān

karoti dharmābhimukhān ayatnāt || 19 ||

divaukasāṁ ca priyatāṁ yadeti

satyapriyaścitramidaṁ na tādṛk|

devasvabhāvo guṇapakṣapātī

pratyakṣiṇastaccariteṣu te ca || 20 ||

pramāṇabhūto bhavati priyaśca

yallaukikānāmidamatra citram|

prāyeṇa loko hi guṇairdaridraḥ

svenānumānena parānminoti || 21 ||

tyaktveva nīlotpalinīvanāni

viśeṣadarśī kamalāyamāne|

tasyānane saṁśrayamabhyupaiti

prahlādano gandhavidhirmanojñaḥ || 22 ||

bhrājiṣṇunā durgatitārakeṇa

jñānena paśyaṁśca samāsamāni|

sa ātmasākṣī samupaiti lajjāṁ

yādṛcchikairapyaśubhairvitarkaiḥ || 23 ||

evaṁ sa śuddhaprakṛtiḥ krameṇa

na śaṅkyate'nyairna ca śaṅkate'nyān|

tato'sya satyābhyanuvartanī vāga-

rakṣatāṁ yāti tathāgatatve || 24 ||

kāyaḥ paropakramaṇairabhedyāḥ

parairahāryā parivārasaṁpat|

paiśūnyamuktasya bhavatyabhedyā

śraddhā ca dharme pratipattisārā || 25 ||

maitrīmabhedyāmavisaṁvadantīṁ

kṛpāṁ ca lokārthamasaṁtyajantīm|

prāpnoti cābhedyatamān munitve

janmāntarasthānapi śiṣyasaṁghān || 26 ||

krodhasya sainyāgrarajaḥpratānaṁ

saṁkalpacaṇḍānilaviprakīrṇam|

yaśovapurdhvaṁsanamityapāsyaṁ

maitryambuvāhaiḥ paruṣābhidhānam || 27 ||

asmānnivṛtto madhurairvacobhirlo-

kasya cetāṁsi vaśīkaroti|

lokasya ca premṇi virūḍhamūle

saivāsya vāggrāhyataratvameti || 28 ||

ataśca lokāñchataśo vinīya

teṣāṁ samāvṛtya ca duḥkhamārgam|

na durgatiṁ gacchati puṇyakarmā

dharmo hi rakṣeha paratra caiva || 29 ||

dūrādapi vyaktapadānunādaḥ

śrīmān adūre'pi sukhasvabhāvaḥ|

meghasvanodagratarastato'sya

brahmasvaro vaktram alaṁkaroti || 30 ||

abaddhavākyādvirataḥ priyatvam

ekāntato yāti vicakṣaṇānām|

satyābhidhāne kramate sabuddhiḥ

prāpnoti māhātmyam akṛtrimaṁ ca || 31 ||

asmācca puṇyān munirājabhāve

gāmbhīryagūḍhān paripṛcchamānaḥ|

praśnānanekānapi caikakāle

niḥsaṁśayaṁ vyākurute sa vācā || 32 ||

pretyeha cānarthaphalairavandhyāṁ

vandhyāmabhidhyāṁ samapāsya buddhyā|

anīrṣyabhāvādatikāṅkṣitāṁ sa

prāpnoti vistīrṇatarāṁ samṛddhim || 33 ||

citte viśuddhe ca tadāśrayāṇi

vākkāyakarmāṇi śucībhavanti|

nabhastale kālaguṇābhirāme

tārāgaṇānāmiva maṇḍalāni || 34 ||

puṇyādhipatyātkramate ca buddhista-

syopabhogeṣu sadottameṣu|

prayāti rājñāmapi saṁmatatvam

adhṛṣyatāṁ ca pratigarvitānām || 35 ||

vaikalyamāyānti na cendriyāṇi

satkarmanirvṛttabalāni tasya|

ataśca lokatrayapūjya ekaḥ

śāstā bhavatyaprativartyacakraḥ || 36 ||

vyāpādadāhajvaravipramuktaḥ

sādhusvabhāvābhinayo nayena|

vyaktīkarotīva manaḥprasādaṁ

svasthapraśāntena viceṣṭitena || 37 ||

hiṁsātmake vigrahasaṁhite vā

karmaṇyanāryācarite śaṭhe vā|

na cāsya buddhiḥ kramate kadācin

maitrīsukhāsvādaviśeṣalābhāt || 38 ||

loke vrajatyāryajanena sāmyaṁ

saṁmānyate daivatavajjanena|

na brahmaloko'pi ca durlabho'sya

prasnigdhakarmaṇyamanaḥpathasya || 39 ||

hitābhinandī jagatāmayatnāt

prasādayatyeva ca mānasāni|

ramyaḥ śaratkāla ivāpagānāṁ

toyāni meghāgamadūṣitāni || 40 ||

rūpeṇa sarvapriyadarśanena

jñānāspadenādbhutaceṣṭitena|

ekīkarotīva tato munitve

lokasya vijñānapṛthaktvasiddhim || 41 ||

kudṛṣṭipaṅkakramaṇaṁ lasaṁstu

prāpnoti kalyāṇahṛdaḥ sahāyān|

karmasvako'stīti ca karma pāpaṁ

viśasyamāno'pi karoti naiva || 42 ||

bhavatyakampyā ca jiṇe'sya bhaktirnā-

yasyate kautukamaṅgalaiśca|

ārye ca mārge labhate pratiṣṭhāṁ

viśeṣagāmitvamato'bhyupaiti || 43 ||

satkāyadṛṣṭyuccalitaḥ sa yāti

na durgatiṁ hetuparikṣayeṇa|

jñānena cānāvaraṇena yukto

divaḥpṛthivyorvicaratyasaṅgaḥ || 44 ||

pratyekabuddhairapi cānavāptāḥ

sarve tato'syābhimukhībhavanti|

jagaddhitārtheṣu vijṛmbhamāṇāḥ

sarvajñabhāvāya munīndradharmāḥ || 45 ||

imāṁ vibhūtiṁ guṇaratnacitrāṁ

ślāghyāṁ svayaṁgrāhaguṇābhirāmām|

ko nāma vidvān na samādadīta

viśeṣataḥ sattvahitābhilāṣī || 46 ||

divyābhirāmā manujeṣu saṁpat

prakṛṣṭasaukhyaikarasā ca divyā|

śīlādyadi syāt kimivātra citraṁ

yasmāt prarohantyapi buddhadharmāḥ || 47 ||

śīlacyutastvātmahite'pyaśaktaḥ

kasmin parasyārthavidhau samarthaḥ|

tasmād viśeṣeṇa parārthasādhorna

nyāyyamasmiñchīthilādaratvam || 48 ||

vivarjayedaṇvapi varjanīyaṁ

tasmādbhayaṁ tīvramavekṣamāṇaḥ|

na bodhisattvābhyucitaṁ ca śīlaṁ

vikhaṇḍayedātmasukhodayena || 49 ||

na cchidradoṣaiḥ parijarjaraṁ vā

strīkelisaṁvāhanavīkṣaṇādyaiḥ|

na durjanakleśaparigrahād vā

kurvīta śīlaṁ śabalaprakāram || 50 ||

kalmāṣadoṣāpagataṁ niṣevyam

ekāntaśuklopacayena śīlam|

svecchāgatitvācca bhujiṣyavṛttaṁ

vidvatpraśaṁsābharaṇānavadyam || 51 ||

samagraśikṣāpadapūraṇācca

saṁpūrṇamāmarṣavivarjitaṁ ca|

cetoviśuddhipratibimbabhūtai-

stīvraiḥ parārthaikarasaiḥ prayogaiḥ || 52 ||

smṛtyāśrayāccendriyasaṁvareṇa

śīlasya saṁrakṣaṇatatparaḥ syāt|

lokasya dauḥśīlyamabhipravṛddhaṁ

tamaḥ sahasrāṁśurivāpaneṣyan || 53 ||

duḥkhapratīkāranimittasevyaiḥ

kāyavraṇālepanaveṣṭanādyaiḥ|

nyāyopalabdhaiḥ parituṣṭacitto-

'parānanollokanakātaraḥ syāt || 54 ||

ślāghyeṣu sarveṣvapi vartamānaḥ

śīlānukūleṣu guṇodayeṣu|

avismitatvādaparādhamānī

kīrterbibhīyācca tadudbhavāyāḥ || 55 ||

lābhaprakāro hi guṇaprakāśāccha-

trutvamabhyeti suhṛnmukhena|

saroruhāṇāmiva śītaraśmiḥ

śreyaḥ pramāthī śithilavratānām || 56 ||

śīlaṁ guṇābhyāsavidhiṁ vadanti

saṁbodhicitte ca guṇāḥ samagrāḥ|

abhyasyate tacca kṛpāguṇena

kāruṇyaśīlaḥ satataṁ tataḥ syāt || 57 ||

yanniśritaṁ kāmabhave'pi naiva

saṁtiṣṭhate naiva ca rūpadhātau|

ārūpyadhātau yadasaṁsthitaṁ ca

tattattvataḥ śīlamudāharanti || 58 ||

yo lokadhātuṣvamiteṣu sattvā-

ñchīle pratiṣṭhāpayiṣuḥ samagrān|

niṣevate lokahitāya śīlaṁ

taducyate pāramiteti tajjñaiḥ || 59 ||

śīlaṁ viśeṣādhigamasya mārgo

dāyādyabhūtaṁ karuṇātmakānām|

jñānaprakarṣasya śucisvabhāvo

naṣṭoddhavā maṇḍanajātiragrā || 60 ||

lokatrayavyāpi manojñāgandhaṁ

vilepanaṁ pravrajitāvirodhi|

tulyākṛtibhyo'pi pṛthagjanebhyaḥ

śīlaṁ viśeṣaṁ kurute narāṇām || 61 ||

akatthanānāmapi dhīrabhāvād

vināpi vāgbhedapariśrameṇa|

atrāsanābhyānatasarvalokaṁ

tyaktāvalepoddhavamīśvaratvam || 62 ||

apyaprakāśānvayasaṁstavānām

akurvatāmapyupakārasāram|

niṣkevale śīlavidhau sthitānām

asaṁstutānāmapi yannarāṇām || 63 ||

rajāṁsi pādāśrayapāvitāni

praṇāmalabdhāni samudvahanti|

cūḍāgralagnāni manuṣyadevāḥ

śrīmattaraṁ śīlamataḥ kulebhyaḥ || 64 ||

tasmān na durgatibhayena na rājyahetorna

svargasaṁpadabhilāṣasamudbhavena|

seveta śīlamamalaṁ na hi tattathā syāllo-

kārthasiddhiparamastu bhajeta śīlam || 65 ||

|| śīlapāramitāsamāsaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

3. kṣāntipāramitāsamāsaḥ

3. kṣāntipāramitāsamāsaḥ

saṁmohanīṁ manmathapakṣamāyāṁ

prāhuḥ sukhāṁ caiva vimokṣamāyām|

tasyāṁ na kuryāt kaiva kṣamāyāṁ

prayatnamekāntahitakṣamāyām || 1 ||

parāparādheṣu sadānabhijñā

vyavasthitiḥ sattvavatāṁ manojñā|

guṇābhinirvartitacārusaṁjñā

kṣameti lokārthacarī kṛpājñā || 2 ||

parārthamabhyudyatamānasānāṁ

dīkṣāṁ titikṣāṁ prathamāṁ vadanti|

seturjalānīva hi roṣadoṣaḥ

śreyāṁsi lokasya samāvṛṇoti||3||

alaṁkriyā śaktisamanvitānāṁ

tapodhanānāṁ balasaṁpadagrā|

vyāpādadāvānalavāridhārā

pretyeha ca kṣāntiranarthaśāntiḥ || 4 ||

kṣamāmaye varmaṇi sajjanānāṁ

vikuṇṭhitā durjanavākyabāṇāḥ|

prāyaḥ praśaṁsākusumatvametya

tatkīrtimālāvayavā bhavanti || 5 ||

pratikriyā durjanavāgviṣāṇāṁ

prahlādanī jñānaniśākarābhā|

dhīraprakārā prakṛtiryatīnāṁ

kṣāntirguṇānām adhivāsabhūmiḥ || 6 ||

sattvasya gāmbhīryamayasya sāro

ghanāgamaḥ krodhanidāghaśāntyai|

vyatītavelasya guṇārṇavasya

vyāpī svanaḥ kṣāntimayo'bhyudeti||7||

ā brahmalokādadhirohāṇārthā

sopānapaṅktirgatakhedadoṣā|

karmāntaśālā guṇaśībharasya

rūpasya sallakṣaṇabhūṣaṇasya || 8 ||

unmūlanī vairaphalācitānāṁ

kṣamāsariddoṣamahādrumāṇām|

saṁbodhicittasya vivardhitasya

guṇāmburaśeḥ satatānukūlā || 9 ||

śubhā paratrāpi hite samṛddhirjaga-

ddhitārthasya parā vivṛddhiḥ|

śubhasvabhāvātiśayaprasiddhiḥ

kṣāntirmanaḥkāyavacoviśuddhiḥ || 10 ||

saṁsāradoṣairna ca cchedameti

sattvān kṛpāsnigdhamavekṣamāṇaḥ|

satkarmabhirlokahitaiḥ samantād

yaśomayatvaṁ vrajatīva loke || 11 ||

na spṛśyate vismayavācyadoṣairjñā-

nāvadānena titikṣureva|

anityatākṣāntibalodayācca

praharṣamāyāti sukhe'pi naiva || 12 ||

saṁkocamāyāti na cāyaśobhirvi-

sāriṇā kṣāntibalaśrayeṇa|

ataśca śeṣairapi lokadharmairani-

śritatvānna sa cāpalīti || 13 ||

tīvraprakārairapi viprakārairna

vikriyāṁ yānti satāṁ manāṁsi|

dṛḍhābhilāṣāṇi munīndrabhāve

kṣāntyā balādhānasusaṁskṛtāni || 14 ||

sa kṣāntidhīreṇa ca mānasena

kaṣṭāni saṁdarśayate tapāṁsi|

darponnatiṁ tīrthakṛtāṁ manaḥsu

nīcaiḥ kariṣyan hitakāmyayaiva || 15 ||

loko'yamātmābhiniveśasamūḍhaḥ

śeṣān parānityabhimanyamānaḥ|

tadviprakārairabhibhūtacetā<ḥ>

kṣamāviyogāt parikhedameti || 16 ||

kṛpāsanāthāni satāṁ manāṁsi

kṣāntyā kṛtasvastyayanakriyāṇi|

naṣṭātmadṛṣṭiṇi parāpakārān

na vikriyāṁ yānti guṇānurāgāt || 17 ||

mithyāvikalpo hṛdayajvarasya

krodhasya heturdhṛtidurbalānām|

samyagvikalpastu samādadhāti

kṣāntiprakārāṁ manasaḥ praśāntim || 18 ||

vikalpasanniśrayasaṁśritāyāṁ

kṣāntyāṁ na tu syāccalitāvakāśaḥ|

pratyūṣavātasphurite'mbhasīva

saṁpūrṇacandrapratibimbalakṣayāḥ || 19 ||

vikalpaśāntiṁ paramārthatastu

kṣāntiṁ kṣamātattvavido vadanti|

tasmādvikalpopaśame yateta

svapnopamaṁ lokamavekṣamāṇaḥ || 20 ||

cakṣuḥ kim ākrośati cakṣure-

tacchrotrādi vākrośati kiṁ tadādi|

yaivaṁ kṣamā sāyatanānvavekṣā

na kṣāntireṣā paramārthatastu || 21 ||

vaktā vacaścaitadanityameva

śrutirvikalpo'pi ca yo mamāyam|

anityabhāvapravikalpanaiṣā

na kṣāntimetām paramāṁ vadanti || 22 ||

kartāpakārasya na kaścidasti

naivāsti kaścitkriyāte ca yasya|

nairātmasaṁdarśanasiddhireṣā

na kṣāntireṣāpi gataprakarṣā || 23 ||

tattatpratītya prabhavanti bhāvā

nindāpraśaṁsāsukhaduḥkhasaṁjñāḥ|

pratītyasiddheravatārabhūmirna

kṣāntiratyantasamāhitaiṣā || 24 ||

yadyesā saṁmohamahāgraheṇa

paryastacetā nanu nāhamevam|

ityunnate cāvanate ca citte

kṣāntiprakarṣasya kuto'vakāśaḥ || 25 ||

pradhvaṁsinī varṇalavapratiśru-

dyantrādivaikaikaśa uccarantī|

kuryāṁ kathaṁ kasya ca kāṁ ca pīḍām

eṣāpi na kṣāntiratiprakṛṣṭā || 26 ||

yadyesā matpāpaparikṣayārthaṁ

na vīkṣate svāmapi dharmapīḍām|

asmān na kalyāṇataraṁ hi mitram

asāvapi kṣāntyupacārā eva || 27 ||

karmasvatāṁ eva hi vīkṣamāṇasti-

tikṣate tadguṇadarśanācca|

naivaṁprakārāpi hi naiṣṭhikatvaṁ

kṣāntirvikalpopahatā prayāti || 28 ||

anityaduḥkhāśuciniḥsvabhāvatā

mama kṣamante na tu tadviparyayāḥ|

iyaṁ vipakṣapraśamakṣamā kṣamā

dvayapravṛtterna tu pāramārthikī || 29 ||

ayatnatattvārthavicakṣaṇo janaḥ

paropakāreṣu yataḥ pravartate|

kṣamā na caivaṁ samatāṁ sameti yā

yataḥ kṣamaivaṁ na vikalpanakṣayā || 30 ||

nirodham āyānti yadā tvaśeṣatāḥ

samādhikanyūnavikalpanakramāḥ|

anuttarāṁ kṣāntimamānagocarāṁ

vadanti tāmadvāyamārgacāriṇāḥ || 31 ||

svataḥ parasmādubhayādahetuto

yathā na bhāvāḥ prabhavanti ke cana|

svataḥ parasmād ubhayād ahetutastathā

na bhāvā vibhavanti ke cana || 32 ||

naṣṭād anaṣṭād ubhayāc na nobhayān

na jātu kāryaṁ khalu vidyate kva cit|

tathāpi kāryaṁ samudeti vastuno

yetthaṁ kṣamā sā dvayavarjitā kṣamā || 33 ||

sato'sato vāsti na janma janmanā

vinā nirodho'pi na kasya cit kva cit|

svabhāvaśūnyāmiti bhāvakalpanāṁ

vipaśyataḥ kṣāntirudeti naiṣṭhikī || 34 ||

avāpya yāṁ vyākriyate sahasraśo

jinairasau nāma jino bhaviṣyati|

pravartate lokahitakriyāvidhiḥ

samāhitasyaiva ca tasya sarvadā || 35 ||

yāvacca bhāvābhiniviṣṭabuddhiratra

dvayaṁ tāvadupaiti mohāt|

tathānimittaṁ ca vimokṣaheturdure

bhavatyasya yathā kṣiteḥ kham || 36 ||

upaiti dharmapraṇidhānakarmasu

prabhutvamṛddhāvadhimuktijanmasu|

tathā pariṣkāravidhau svacetasi

prakarṣiṇi jñānabale tathāyuṣi || 37 ||

avāpya caitadvaśitāmayaṁ dhanaṁ

prakṛṣṭaṁ akṣiṣṇu parārthasādhanam|

janasya kṛcchreṣu patiṣyataḥ sataḥ

sa jāyate dhāraṇakāraṇaṁ vibhuḥ || 38 ||

tasmāt parārthamahatīṁ dhuramudvahadbhiḥ

kṣānterupāyavidhireṣa sadānugamyaḥ|

atra sthitasya hi bhavanti parārthacittāḥ

sarvā<ḥ> kriyā guṇaphalābharaṇābhirāmāḥ || 39 ||

asyāṁ hi bhaktirapi yā pravirūḍhamūlā

tāmabhyasanti munayo munirājabhāve|

śraddhānuviddhamanasāṁ na hi dharmamārge

dṛṣṭo manoratharathasya yato'kṣabhaṅgaḥ || 40 ||

|| kṣāntipāramitāsamāsaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

4. vīryapāramitāsamāsaḥ

4. vīryapāramitāsamāsaḥ

sarvaṁsahe kṣāntibale ca rūḍhe

sarvādbhutānyārabhate sa śauryāt|

vīryeṇa kāryāntamahābalena

yasmāt sa devānapi yātyatītya || 1 ||

sudṛśyapārāṇyapi laukikāni

kāryāṇi nirvīryaduruttarāṇi|

aprāpyarūpaṁ tu na kiṁ cid asti

khedānabhijñena parākrameṇa || 2 ||

ārabdham evotsahate na hīna

ārabhya madhyastu viṣādameti|

parārtham aśrāntaparākramāste

nirvāṇamutsṛjya samārabhante || 3 ||

prāyeṇa dainyopahato jano'yaṁ

svādhīnavīryo'pi gurusvakāryaḥ|

ahīnavīryasya tu merusāro'pyakhe-

dasādhyaḥ parakāryabhāraḥ || 4 ||

saṁsārakoṭyorubhayoḥ samānaiḥ

prayāmasārairdivasairyadi syuḥ|

saṁvatsarāstatpracayātidīrghaiḥ

kalpaiḥ samudrodakabindutulyaiḥ || 5 ||

utpādayeyaṁ yadi bodhicittam

ekaikametena parākrameṇa|

saṁbhāraśeṣaṁ cinuyāṁ tathāpi

bhūyaḥsamutsāritakhedadainyaḥ || 6 ||

ekaikamevaṁ yadi bodhicittaṁ

prāpyeta saṁbhāravidhiśca śeṣaḥ|

tathāpi bodhiṁ samudānayeyaṁ

kṛpāsamutsāhitadhairyasāraḥ || 7 ||

saṁsāraduḥkhaṁ svamacintayitvā

saṁnāhadārḍhyaṁ yadacintyamevam|

ādyaṁ samādānamidaṁ vadanti

vīravratānāṁ karuṇātmakānām || 8 ||

padbhyāṁ atikramya kukūlakalpāṁ

kṛtsnāṁ mahīmāyudhasaṁvṛtāṁ vā|

yaddraṣṭum apyutsahate munīndrān

pātuṁ śivaṁ dharmarasāyanaṁ vā || 9 ||

saṁsārapaṅkājjanatā mayeyam

uddhṛtya nirvāṇasukhe niveṣyā|

utkṣepanikṣepavidhau padānāṁ

yaccittamevaṁ ca samādadāti || 10 ||

yad vā hitārthaṁ kramate parasya

puṇyāni vā lokahitāya cittam|

parākramaḥ so'kṣayavikramāṇāṁ

śrīmatsamādānavidhau dvitīyaḥ || 11 ||

puṇyasya cotpādasamānakālaṁ

saṁbuddhabhāve pariṇāmanaṁ yat|

tadakṣayatvaṁ samudāgamāya

śubhaṁ samādānam udāharanti || 12 ||

mahatsu vāmbhaḥsu yathā niṣikto

naivodabinduḥ kṣayamabhyupaiti|

saṁbuddhabhāve pariṇāmitasya

tathaiva puṇyasya na saṁkṣayo'sti || 13 ||

tathā hi kāruṇyaviśuddhabuddhiḥ

sarvajñabhāvāya phalantyamūni|

puṇyāni lokasya carācarasyetyevaṁ

sa tānyārabhate susattvaḥ || 14 ||

mahātrisāhasragataṁ janaughaṁ

nirvāpayedekadine na kaścit|

kalpaṁ tathā naiva ca sattvadhātoste-

nāpi kiṁ cit paripācitaṁ syāt || 15 ||

śrutvāpi sattvākṣayatāṁ imāṁ yaḥ

sattvānaśeṣān vininīṣureva|

viṣādadoṣānavalīḍhavīryaḥ

kastasya dūrastha ihārthasāraḥ || 16 ||

yaḥ puṇyarāśirjagatāṁ samagrastā-

vatpramāṇairdaśabhirjinasya|

nivṛttimāgacchati romakūpa

ekaika ekaikasujātaromā || 17 ||

śatena bhūyo guṇitena tena

puṇyena romāspadasaṁśritena|

bhavatyanuvyañjanamekameva

śeṣāṇi tasya prabhavanti kāye || 18 ||

tāvadguṇādeva ca puṇyarāśesta-

smād anuvyañjanasaṁpraviṣṭāt |

pratyekaśastasya jinatvaśaṁsi

nirvartate lakṣaṇacitrakarma || 19 ||

sallakṣaṇotpattinimittabhūtāt

sahasrasaṁkhyāguṇitācca puṇyāt|

nirvartate tasya manojñavarṇā

saṁpūrṇacandrasphuṭakāntirūrṇā || 20 ||

ūrṇābhinirvṛttikarmaṁ ca puṇyaṁ

śatapramāṇairguṇitaṁ sahasraiḥ|

karoti tasyānavalokanīyaṁ

chattarābhamuṣṇīṣalalāmaśīrṣam || 21 ||

ayaṁ mayā puṇyanidhiḥ parārthaṁ

saṁceya ityuttamabodhicitte|

vīryonmukhe kena mukhena tasmiṁlla-

yapravṛttirlabhatāṁ praveśam || 22 ||

sarve'pi sattvā yadi lokadhātau

pratyekabuddhaiḥ sadṛśā bhaveyuḥ|

jñānena tebhyo'bhyadhikaprabhāvaḥ

kṣāntistha eko'pi hi bodhisattvaḥ || 23 ||

tathaiva ca kṣāntibalasthitebhyo

viśeṣaṁ āyātyavivartanīyaḥ|

aśrāntavīryaḥ kuśalaprayoge

yallaukike caiva taduttare ca || 24 ||

tebhyaḥ puṇaścādhika eva dūraṁ

ya ekajātipratibaddhabodhiḥ|

ka eva vādo dṛḍhavīryavatsu

ye bodhimūle prathamaṁ niṣaṇṇāḥ || 25 ||

tādṛgvidhajñānaviśuddhipūrṇaḥ

syād yadyaśeṣena ca lokadhātuḥ|

yāyāt kalāṁ so'pi na bodhimūle

sthitasya mārātikṛtāntyajāteḥ || 26 ||

tādṛgvidhajñānaviśuddhacittāḥ

syuryadyaśeṣena ca sarvalokāḥ|

balapradeśasya muneratulyāḥ

kalāpradeśairapi te samagrāḥ || 27 ||

ityadbhutajñānasamudramekaḥ

kṛpātmako nistarituṁ prayāti|

avyāhatājñaḥ paracittacāre

prajñāvabhāsaṁ ca nabho viśālam || 28 ||

sarveṣu sattveṣu ca tasya mātrā

samānahārdā karuṇābhyudeti|

saṁbuddhadharmāśca tato'vaśeṣāsta-

syādbhutāḥ saṁprabhavantyaśeṣāḥ || 29 ||

ebhiḥ samādānaguṇairupetaḥ

śuddhaśravaiḥ pelavasattvasattvaiḥ|

aṣṭābhiraṅgairiva tattvamārgo

vīryaprakarṣādadhikaṁ vibhāti || 30 ||

vīryaṁ tridhā yaḥ kuśalaprayogasta-

smācca vākkāyamanoviśeṣāḥ|

prasthānaviṣṭhānasamāhitasya

vīryaprakarṣasya manomayasya || 31 ||

yo bodhicittapraṇayaḥ samaśca

kṛpā ca nairātmagatau kṣamā ca|

caturvikalpo janasaṁgrahaśca

sarveṣu dharmeṣvanavagrahaśca || 32 ||

saṁsārapaṅke yadakhinnatā ca

traidhātukasyaiva ca nopalabdhiḥ|

sarvasvadānaṁ na ca tena mānaḥ

samagraśikṣasya na śikṣayā ca || 33 ||

parāpakārairavikāri dhairyaṁ

cittasya cātyantamavikṣatiryā|

ārambhadārḍhayaṁ kuśalakriyāsu

prītirvivekaikarasā ca citte || 34 ||

caturvidhadhyānasamāpanaṁ ca

cittasya nidhyaptiranātmataśca|

atṛptatā ca śrutavistareṇa

nyāyapraveśastadavekṣaṇācca || 35 ||

yā deśanā caiva yathāśrutānāṁ

jñānaṁ ca dharmānabhilāpyatāyām|

pañcasvabhijñāsu ca yatprabhutvam

abhyāsamātrā ca taduttarāyām || 36 ||

yadṛddhipādeṣvabhinirhṛtatvaṁ

paṭvī na cāyāsamayī kriyā ca|

samyakprahāṇeṣu ca yaḥ prayogaḥ

śubhāśubhādeva ca yā vimuktiḥ || 37 ||

yatkauśalaṁ cendriyanirṇayeṣu

nirindriyān paśyati yacca dharmān|

mārgasya saṁbhāravimārgaṇaṁ ca

na cāsya kiṁ cid gamanaṁ kutaścit || 38 ||

ityevamādyaṁ pṛthucitravīryaṁ

prasthānaviṣṭhānaviśeṣacitram|

asyākṣayatvapratipūraṇārthaṁ

prasthānakarmaiva viśeṣahetuḥ || 39 ||

nimittakarmasvapi na pravartate

vitiṣṭhate jñānamaye ca karmaṇi|

kṛpāguṇādyan na jahāti saṁskṛtaṁ

na coruvīryo'pi patatyasaṁskṛte || 40 ||

apūrvadharmaśrutiralparogatā

durāsadetvaṁ śrutadharmadhāraṇam|

amānuṣebhyo'pi parigrahodayaḥ

samādhigotrapratilambha eva ca || 41 ||

vrajantyavandhyā yadaharniśaṁ kriyā

guṇairna hāniṁ yadutpaiti mauśalīm|

vivṛddha evotpalavacca yadguṇairma-

nuṣyadharmādadhikaprayojanaiḥ || 42 ||

yaśo viśālam ca sukhaṁ sukhodayaṁ

vinītakārpaṇyamanastvamuttamam|

guṇāśca teṣāmiha dṛṣṭadhārmikā

bhavanti vīryāditi ko'tra vismayaḥ || 43 ||

trailokyapūjyamamitoruguṇaṁ

saṁbuddhabhāvamapi yānti yadā|

vīryavyāpāśrayadṛḍhāḥ puruṣā

na syād ataḥ ka iva vīryaparaḥ || 44 ||

|| vīryapāramitāsamāsaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

5. dhyānapāramitāsamāsaḥ

5. dhyānapāramitāsamāsaḥ

atha dhyānavidhau yogaṁ kuryāj jñānavivṛddhaye|

sukhaṁ hi kartuṁ lokānāṁ jñānālokādanugraham || 1 ||

prasīdatyadhikaṁ jñānaṁ dhyānānmanasi nirmale|

śaradutsāritaghane nabhasīvendumaṇḍalam || 2 ||

viśuddhaśīlaḥ kalyāṇaiḥ sahāyaiḥ sahitairhitaiḥ|

alpakṛtyaḥ praśāntātma smṛtyadhiṣṭhānaveṣṭitaḥ || 3 ||

nivasan vṛkṣamūleṣu śādvalāstīrṇabhūmiṣu|

anupaskṛtaramyeṣu vanapuṣpasugandhiṣu || 4 ||

dhyānasācivyadhīreṣu saṁtuṣṭajanaveśmasu|

jananirghoṣamūkatvād gambhīrāvasthiteṣviva || 5 ||

pratyaraṇyaniviṣṭeṣu śūnyeṣvāyataneṣu vā|

kuñjeṣu ca mahīdhrāṇāṁ siṁhanādānunādiṣu || 6 ||

yatra kva cana vā deśe saṁsargakleśavarjite|

paryaṅkena sukhāsīnaḥ śarīram ṛju dhārayan || 7 ||

upasthāpya smṛtimayīṁ rakṣāṁ abhimukhīṁ hṛdi|

kṛpayā kuvitarkāṇāṁ kṛtvevākṣaṇaghoṣaṇām || 8 ||

prajñāparicayasyāyāṁ kālo me na tu nirvṛteḥ|

na hi sattvān anirvāpya svayaṁ nirvātum utsahe || 9 ||

iti lokahitāvekṣī buddhabhāvagataspṛhaḥ|

kuryāt sātatyayogena dhyānārambhasamudyamam || 10 ||

na hi viśramya viśramya mathnannagnimavāpnuyāt|

sa eva yogo yoge'pi viśeṣādhigamādṛte || 11 ||

ekatraiva ca badhnīyād dṛḍham ālambane manaḥ|

anyānyālambanagrāhaḥ kliśnātyevākulaṁ manaḥ || 12 ||

vidarśanād vīryabalāllīyamānaṁ samuddharet|

uddhanyamānaṁ ca manaḥ praśamena nivārayet || 13 ||

samyaggatamupekṣitaṁ samādhibalaniścalam|

tatrāpi vā tanmayaḥ syāt sugatajñānalabdhaye || 14 ||

na ca dhyānasukhāsvādaḥ pāratantryamanukramet|

na hi svasukhamātrārthamayam ārambhavistaraḥ || 15 ||

śarīrajīvitāpekṣī dainyopahatamānasaḥ|

na kuryād vīryaśaithilyamapyādīpte svamūrdhani || 16 ||

lakṣayitvā nimittāni manastasya samādhaye|

bhraśyamānaṁ prayuñjīta smṛtyāvahitayā punaḥ || 17 ||

mano nivaraṇebhyaśca vipakṣairvinivartayet|

svecchāprayātaṁ dviradam aṅkuśākarṣaṇairiva || 18 ||

atha nīvaraṇavyādhināśaprasvasthamānasaḥ|

dāridryādiva nirmukto mahato vyasanādiva || 19 ||

prītiyuktena manasā kāmadoṣān vicārayet|

tadviyogopalabhyāṁ ca parāṁ sukhaparamparām || 20 ||

vidyududdyotacapalāḥ phenāṁśukanibhātmakāḥ|

svapnavat pelavāsvādā vañcanārthamivoditāḥ || 21 ||

pitṛṇāmapi putreṣu putrāṇāṁ ca pitṛṣvapi|

prītisarvasvabhūteṣu suhṛtsu suhṛdāmapi || 22 ||

guṇapracayabaddhasya vyūḍhesu samareṣvapi|

darśitasthairyasārasya snehasetorvidāriṇaḥ || 23 ||

iha paryeṣṭiduḥkhasya paratra narakasya ca|

hetubhūtā yataḥ kāmāḥ kāmayeta na tān ataḥ || 24 ||

yadāśrayo vitarko'pi prajñācakṣurnimīlanaḥ|

ātmano'pi parasyāpi vighātāya pravartate || 25 ||

ātmakāmairapi ca ye sarvathāpi vivarjitāḥ|

parārthakāmastān kāmāṁstyaktvā kathamanusmaret || 26 ||

tṛptireṣāṁ na saṁprāptyā nāhanyahani sevayā|

naiva saṁnicayenāpi ko'nyo vyādhirataḥ paraḥ || 27 ||

yadāsvādahato naiva svārthamapyavabudhyate|

unmattapānapratimān kastān sahṛdayaḥ smaret || 28 ||

ityevaṁ sarvato duṣṭān kāmāṁstasyānupaśyataḥ|

tataḥ saṁkucitaṁ cittaṁ naiṣkramye'bhiprasīdati || 29 ||

vivekajaṁ prītisukhaṁ tataḥ prasrabdhilabdhijam|

prāpnoti cittasyaikāgryaṁ prathamadhyānasaṁjñitam || 30 ||

sa vitarkavicārāṇāṁ kāmānāmiva duṣṭatām|

puṣyāṁstatpraśamānveṣī samādhiprītijaṁ sukham || 31 ||

adhyātmasaṁprasādācca cittaikāgratayā ca tat|

dvitīyaṁ dhyānamityāhuradvitīyā maharṣayaḥ || 32 ||

utplavaṁ manaso dṛṣṭvā prīteratha virajya saḥ|

tṛtīyaṁ dhyānamāpnoti smṛtyupekṣāsamanvitam || 33 ||

sukhabhogamapi tyaktvā sukhaduḥkhanirākṛtam|

viśuddhaṁ smṛtyupekṣābhyāṁ ceturthaṁ dhyānamaśnute || 34 ||

abhijñā labhate pañca sa ca tatrānugāminīḥ|

rājyastha iva dharmātmā hrīkīrtiśrīmatidyutīḥ || 35 ||

pratyekajinalabdhāśca śrāvakīyā vyatītya ca|

tā bhavantyadhikā dūraṁ parārthasamudāgamāt || 36 ||

sa hi matsariṇastyāge śīle tadvikalānapi|

kopanān kṣāntisauratye kusīdān vīryasaṁpadi || 37 ||

vikṣiptacetaso dhyāne prajñāyāṁ tannirākṛtān|

niyojayati kāruṇyādaśrāntācāravikramaḥ || 38 ||

ato'cyutābhirdīptābhirbhābhirlokāvabhāsanam|

marīcibhirivādityāḥ kurute'nantagocaram || 39 ||

atha pāpakṛtaḥ sattvān patato narakādiṣu|

kṣīṇapuṇyāyuṣaścaiva devāñchāśvatamāninaḥ || 40 ||

taistairduḥkhaviśeṣaiśca lokaṁ kāraṇayāhatam|

tatra divyaprabhāveṇa cakṣuṣā sā vilokayan || 41 ||

tīvramāyāti kāruṇyaṁ kāruṇyān na pramādyati|

parārtheṣvapramattaśca yātyacintyaprabhāvatām || 42 ||

athānyalokadhātusthān sampaśyati tathāgatān|

buddhakṣetraguṇavyūhān saṁghasyaiva ca saṁpadaḥ || 43 ||

bodhisattvarṣabhāṇāṁ ca viśuddhācāragocaram|

sarvalokahitodarkaṁ śrīmaccaritamīkṣate || 44 ||

tatra ca praṇidhistasya sukhenaiva samṛdhyati|

parārthapariṇāmācca śīlasyaiva ca saṁpadaḥ || 45 ||

atimānuṣayā śrutyā divyayārthaviśuddhayā|

śṛṇvannuccāvacā vāco vidūre'pyavidūravat || 46 ||

kṛpādūracarairuktāḥ pāruṣyavirasākṣarāḥ|

antardīptasya kopāgnerniścarantīrivārciṣaḥ || 47 ||

apsarogītasacivān bhūṣaṇasvanaśībharān|

divyatūryaninādāṁśca vināśaikarasānapi || 48 ||

niṣevyamāṇān rāgāndhairamitrānmitrārūpiṇaḥ|

vīkṣya vrajati kāruṇyaṁ teṣāṁ vāñcanayā tayā || 49 ||

bhayādduḥkhaviśeṣācca so'vispaṣṭapadākṣaraiḥ|

nārakairārtarasitairhṛdīvābhihatastataḥ || 50 ||

paramālambate vīryaṁ majjāgatamahākṛpaḥ|

tīkṣṇāgreṇa pratodena sadaśva iva coditaḥ || 51 ||

nānālokasthitebhyo'tha jinebhyo dharmadeśanāḥ|

śṛṇoti sarvasattvānāṁ nirvāṇakāṅkṣayākṣayāḥ || 52 ||

tataḥ sa paracitteṣu vijñāyānuśayāśayān|

puṇyāṅkurān ropayati jñānasādhanavānnavān || 53 ||

smṛtvā pūrvanivāsaṁ ca kalpakoṭisahasraśaḥ|

paśyan puṇyāni lokānāṁ tathendriyabalābalam || 54 ||

tadāśrayavaśādṛddhyā so'nekīkṛtavigrahaḥ|

avandhyakathanaṁ yāti yathābhājanadeśanāt || 55 ||

kva cid arkasahasradīptināpya-

visaṁvāditakāntisaṁpadā|

vapuṣā munirājalakṣaṇaḥ

sphuṭacitreṇa samantalakṣmaṇā || 56 ||

janayannayanotsavaṁ nṛṇāṁ

vacasā hlādaviśeṣamācaran|

sa karotyamṛtaprakāśanaṁ

jinabhāvāya jinādhimuktiṣu || 57 ||

praśamottarayā muniśriyā

kva cid atyārthaviśiṣṭaceṣṭayā|

kurute muniśiṣyarūpabhṛdvi-

nayaṁ tadvinayārhacetasām || 58 ||

abhisāritapādapaṅkajaḥ

suracūḍāmaṇibhirmahendravat|

dhanado dhanado yathā kva cit

kuha cidbrahmavadadbhutadyutiḥ || 59 ||

kva cid unmiṣitatrilocanaḥ

śaśīlekhāmalamaulibhūṣaṇaḥ|

amarādhipabhāsuradyutirbu-

jagendraśriyamudvahan kva cit || 60 ||

kuliśānalapiṅgalāṅguliḥ

kuha cid guhyakarājarājavat|

amitājinalakṣmavān kva cid

guṇaraśmirmunicandramā iva || 61 ||

sphuṭakaustubharatnaraśmibhirvi-

puloraḥsthalabhāsuradyutiḥ|

garuḍadhvajarājadṛk kva cit

kuha ciccaiva halāyudhadyutiḥ || 62 ||

sitaśaktiracintyaśaktimān

kuha ciccāruśikhaṇḍivāhanaḥ|

udayāstanagendrabhūṣaṇaḥ

śaśisūryāmalarūpavān kva cit || 63 ||

kuha cid dhutabhuṅmarutvatāṁ

vapuṣānyatra narāśrayāśinām|

vāruṇadyutim udvahan kva cit

kuha cinmanmathacāruvigrahaḥ || 64 ||

lalitāṁ pramadānarākṛtiṁ

naranārīratisaṁgalālasaḥ|

kva cid eva tapodhanaśriyaṁ

vidadhat kāmaviraktamānasaḥ || 65 ||

hṛdayāni harannṛṇāṁ kva cid

guruśiṣyakṣitipālavṛttibhiḥ|

narakeṣvapi ca parabhāvato

vidadhadduḥkhavimokṣaṇakṣaṇam || 66 ||

jagatām adhimuktivistarairatha

so'nekavidhairviceṣṭitaiḥ|

karuṇāguṇasaṁtatastataḥ

kurute lokahitaṁ tatastataḥ || 67 ||

samavāpya viśeṣasaṁpadaṁ

vipulāṁ dhyānaguṇaśrayādimām|

prayateta viśeṣavattaraṁ

nidhicihneṣvavisaṁvadatsviva || 68 ||

kuśale sthitirapyanūrjitā

kim ahāniḥ śithilavratocitā|

prayateta vivṛddhaye tataḥ

parihāṇistu viparyayādataḥ || 69 ||

sulabhaśca samādhirudyamād

anurakṣā punarasya duṣkarā|

sahasā vijigīṣuṇā yathā

vijitasya praśamapratikriyā || 70 ||

manasaḥ parivṛttilāghavaṁ

paramaṁ tatra na viśvasedataḥ|

anavāpya mahīmivācalām

acalāṁ bhūmimabhīradurgamām || 71 ||

abhisaṁskṛta[mārgacāriṇaḥ]

patanāntā hi samādhivistarāḥ|

ata uttamamārgabhāvanām

avalambeta vikalpavarjanāt || 72 ||

sucinityasukhātmakalpanaṁ

kapaṭam saṁskṛtadambhasaṁbhavām|

samavekṣya na bhāvakalpanā-

praṇayavyāpṛtamānaso bhavet || 73 ||

viśade'pyupalambhasaṁbhave

vrajati kleśaśaravyatām ataḥ|

vyatiyāti tu māragocaraṁ

tamanarthaṁ praśamayya sarvathā || 74 ||

na hi niśrayadośaduṣito

bhavati dhyānavidhirviśuddhaye|

calatānugato hi niśrayaḥ

sakhaṭuṅkastata eva kathyate || 75 ||

vyavahāravidhiprasiddhaye

pratipattadbhavatīti kathyate|

na hi kiṁ cid udeti kutra cit

sadasatsaṁbhavayuktyasaṁbhavāt || 76 ||

gaganena samānamānasastri-

bhavādapyu atha vītaniśrayaḥ|

avikalpitadhīraceṣṭito

vacanenāpratiyatnaśobhinā || 77 ||

kurute sa ca laukikīṁ kriyāṁ

jagadekāntahitānuvartinīm|

na samādhibalācca hīyate

vaśavartitvamavāpya cetasaḥ || 78 ||

tataḥ paraṁ parahitatatparodyataiḥ

samādhibhirvidhivihitaprayojanaiḥ|

vivardhate ghanasamaye yathodadhiḥ

saridvadhūsamupahṛtairnavāmbubhiḥ || 79 ||

|| dhyānapāramitāsamāsaḥ ||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0

6. prajñāpāramitāsamāsaḥ

6. prajñāpāramitāsamāsaḥ

puṇyāni dānaprabhṛtīnyamūni

prajñāsanāthānyadhikaṁ vibhānti|

hiraṇmayānīva vibhūṣaṇāni

pratyuptaratnadyutibhāsvarāṇi || 1 ||

kriyāsu sāmarthyaguṇaṁ hi teṣāṁ

prajñaiva vistāriṇamādadhāti|

svārthapravṛttau viśadakramāṇāṁ

yathā manaḥsaṁtatirindriyāṇāṁ || 2 ||

kriyāsvayogyāni śarīrayantrāṇyā-

yurviyuktāni yathā na bhānti|

tathaiva kāryāṇi na bhānti loke

prajñāviyogena jadīkṛtāni || 3 ||

śraddhādikānāmapi cendriyāṇāṁ

prajñāgraṇī buddhirivendriyāṇām|

guṇāguṇān vetti hi tatsanāthaḥ

kleśakṣaye naipuṇametyataśca || 4 ||

prajñāviyogāt phalalālasānāṁ

naiva svatodānaviśuddhirasti|

tyāgaṁ parārthaṁ hi vadanti dānaṁ

śeṣastu vṛddhyārthamiva prayogaḥ || 5 ||

prajñāsamunmīlitacakṣuṣastu

dattvā svamāṁsānyapi bodhisattvāḥ|

naivonnatiṁ nāvanatiṁ prayānti

bhaiṣajyavṛkṣā iva nirviklapāḥ || 6 ||

evaṁ sa bhūmiṁ prathamāmupaiti

lokottarasyārthavidhipratiṣṭhām|

akrodhanaḥ prītisamṛddhacetā

dānairmahadbhirjagadarthacetāḥ || 7 ||

prāyeṇa yasyāṁ balacakravartī

bhavatyasaṁhāryamatiśca bodheḥ|

prajñāguṇādeśitasatpatho'tha

karmeṇa bhūmiṁ vimalāmupaiti || 8 ||

yasyāṁ prakṛtyaiva viśuddhaśīlaśca-

turmahādvīpapatiḥ sa bhūtvā|

narendracūḍāmaṇisatkṛtājñaḥ

sūryārhatāmeti yathā munīndraḥ || 9 ||

tataḥ paraṁ kāmiṣu daivateṣu

loke'pi ca dvitrisahasrasaṁkhye|

aiśvaryamāpnoti tataḥ paraṁ ca

bhūmiṁ viśodhya prabhavāṁ prabhāyāḥ || 10 ||

śīlasya śuddhiḥ kuta eva tasya

yaḥ prajñayā nāpahṛtāndhakāraḥ|

prāyeṇa śīlāni hi tadviyogād

āmarṣadoṣaiḥ kaluṣīkriyante || 11 ||

nātmārthamapyasti tu yasya śīlaṁ

prājñasya tasyāsti kathaṁ parārtham|

yo dṛṣṭadoṣo bhavabandhanānāṁ

lokān samastāṁstata ujjihīrṣuḥ || 12 ||

prajñāvipakṣairhṛdi soparāge

kṣamāguṇaḥ kena dhṛtiṁ labheta|

guṇāguṇāavekṣaṇakātarākṣe

khyāto guṇairvīrā iva kṣitīśe || 13 ||

prajñānvitānāṁ tu parāpakārāḥ

kṣamāguṇāḥ sthairyakarā bhavanti|

bhadrātmakānāmiva vāraṇānāṁ

karamāśrayā naikavidhā viṣeṣāḥ || 14 ||

niṣkevalaṁ vīryamapi śramāya

prajñāsanāthasya tu tasya kārye|

anuttaraḥ siddhiguṇo'bhyudeti

hartā tadutthasya pariśramasya || 15 ||

yasmāt paraṁ sūkṣamataraṁ na kiṁ cid

yannaipuṇānāṁ paramaḥ prakarṣaḥ|

yatkāmadoṣādibhirāvṛtānāṁ

manaḥpathaṁ naiva kadā cideti || 16 ||

tad dhyānamekāntasukhābhirāmaṁ

kathaṁ pravekṣyantyastāṁ manāṁsi|

sthūlāni doṣopacayairmahadbhiḥ

prajñotpathaṁ nyāyamivāśritānī || 17 ||

prajñānirudyogamaterhi dṛṣṭirnā-

yāti śuddhiṁ tadṛte na śīlam|

samyakasmādhis tadṛte na labhyo

duḥkhakṣayastadvirahāttathaiva || 18 ||

prājñastu doṣādbhayamīkṣamāṇaḥ

sukhānubaddhaṁ ca sukhaṁ guṇebhyaḥ|

vihāya doṣāñjagadarthakāmo

guṇābhirāmeṇa pathā prayāti || 19 ||

samudyatastena samādhimetya

prāpnoti vākkāyamanoviśuddhīḥ|

ato'navadyena balena yuktaḥ

pravartate lokahitodayeṣu || 20 ||

dānena cābhīpsitabhūyasaiva

priyairadīnairvacanāmṛtaiśca|

naiṣkāraṇorjasvalayā ca vṛttyā

parārthacaryāsu samaṁ samantāt || 21 ||

sāmānyamartheṣu ca darśayitvā

premṇā vaśīkṛtya manāṁsi teṣām|

karoti nirvāṇasukhe pratiṣṭhāṁ

prajñāguṇāvyāhatadharmacakraḥ || 22 ||

prajñādyarogaiśca balairamībhira-

dhyāsitaṁ nābhyupayātumīsā|

ajīvikādurgatimṛtyunindā-

śāradyadoṣāśrayaṇī bhayārtiḥ || 23 ||

bhayāni sarvāṇi hi doṣajāni

prajñā na doṣaiḥ sahavāsameti|

śaradvyapoḍhābhragavākṣapakṣā

bhā bhāskarasyeva tamaḥpratānaiḥ || 24 ||

sahasraraśmerudaye'pi yāni

tamāṁsi rundhanti jagadgatāni|

nāmaikaśeṣāṇi karoti tāni

prajñāprabhāyāḥ prasaraprabhāvaḥ || 25 ||

na tatra bhūyaḥ karaṇīyam asti

yatra prabhā sā balatāmupaiti|

yugāntakālānalasaṁhṛte hi

loke na dagdhavyakathāḥ prathante || 26 ||

jyotīṁṣi sarvāṇyapi saṁhitāni

prajñāprabhāṁ nālamathopayātum|

atastayā nāsti parātivṛddhirga-

rīyasī vāparihāṇijātiḥ || 27 ||

saṁpūrṇatāṁ yāti sukhena śikṣā

śīlāya cittapraśamāya caiva|

prajñābhiyuktasya yatastato'syāṁ

sarvābhisāreṇa parākrameta || 28 ||

yā skandhadhātvāyatanapravṛttau

satyāśrayā pratyayitā parīkṣā|

kālatraye'pyeṣa samāsayuktyā

prajñāvadātairviṣayapraveśaḥ || 29 ||

kīrtiṁ vitanvanti jinātmajānāṁ

prajñāvadātāścaritapradeśāḥ|

guṇadvīṣāmapyatiduṣkuhāṇāṁ

romāñcitā vismayapāratantryāt || 30 ||

prajñābalaṁ dīptataraprabhāvaṁ

nālaṁ prasoḍhuṁ sabalo'pi māraḥ|

prajñāṁśavo vibhramayānti cakṣurna

draṣṭum īśo hi yataḥ sa eva || 31 ||

kandarpanārācanipātasāhī

prajñāmayaṁ varma vitatya citte|

vyūḍhāni rūpaprabhṛtīnyanekānyeko-

'pi nirbhīrabhibhūya yāti || 32 ||

adhīrasātmyaṁ bhayaviklavaṁ vā

mūḍhocitaṁ śokaparigrahaṁ vā|

svalpātmacitteṣvavagāḍhamūlaṁ

roṣoparāgaṁ parijihmitaṁ vā || 33 ||

dīneṣu kārpaṇyamalīmasatvaṁ

kṛtāspadaṁ rāgiṣu cāpalaṁ vā|

tejovihīneṣvalasatvasattvaṁ

samuddhateṣvapraśamātmakatvam || 34 ||

tāṁstāṁśca līnānapi doṣaleśān

pṛthagvidhiṣvāśrayagahvareṣu|

samudbhavantyeva parākaroti

prajñā pratijñeva jagaddhitārthā || 35 ||

niveśya doṣakṣayadhīrasaumyāṁ

bhavasya tasyopari dṛṣṭilakṣmīm|

svayaṁ munīndrairabhiṣicyate yat

prahlādinā vyākaraṇāmṛtena || 36 ||

ūrṇāprabhābhiśca mahāmunīnāṁ

niśīthacandradyutihāsinībhiḥ|

yadājyadhārābhirivādhvaragnirvi-

bhāti mūrdhanyabhiṣicyamānaḥ || 37 ||

avāpya yasmān muniyauvarājyaṁ

samaṁ samantād visṛtātmabhāvaḥ|

lokasya duḥkhaṁ praśamatyayatnād

rajo mahāmegha iva pravṛṣṭaḥ || 38 ||

prajñāprabhāvopanataḥ sa sarvaḥ

prabhāvisāraḥ sugatātmajānām|

ko vismayo vātra sutapriyāyā

mātuḥ samīyādyadiyaṁ vibhūtiḥ || 39 ||

daśaprakāro'pi yadā munīnāṁ

tadāśrayādeva balaprakarṣaḥ|

udetyasādhāraṇasundaraśca

śeṣo'pyasaṁkhyo guṇaratnarāśiḥ || 40 ||

śāstrāṇi cakṣuḥpratimāni loke

nidhānabhūtāṁśca kalāviśeṣān|

mantrān paritrāṇakṛto vicitrān

dharmavyavasthāśca pṛthagviśeṣāḥ || 41 ||

paryāyacitraṁ ca vimokṣamārgaṁ

tattacca lokasya hitopapādi|

yadbodhisattvāḥ pravidarśayanti

prajñāprabhāvābhyudayaḥ sa sarvaḥ || 42 ||

divyapratispardhibhirindriyārthai-

rnarendrabhāve'pi hi bodhisattvāḥ|

na yadvirūpāṁ prakṛtiṁ vrajanti

prajñā guṇāmātyasanāthatā sā || 43 ||

paropakāraikarasā ca maitrī

rāgoparāgaprativarjitā ca|

parasya duḥkheṣu parā dayā ca

na śokabhārālasatāṁ gatā ca || 44 ||

anuddhātatvaṁ mudite'pi citte

tamonirārambhamupekṣitaṁ ca|

te te guṇā<ś>cābhyadhikaṁ vibhānti

prajñāniruddhapratipakṣamārgāḥ || 45 ||

ko nāma lokasya parārthasādhurduḥkhai-

kahetūni tamāṁsi hanyāt|

avyāhatā jñānaśayāśayeṣu

prajñā na cet syādatisūryādīptiḥ || 46 ||

tatprāptaye śrutam aśītivikalpacitraṁ

saṁceyam āśrayasahaṁ gurumabhyupetya|

dvātriṁśatā tadadhigamya vivardhayeta

samyaṅmanaḥ samavadhānakṛtairviśeṣaiḥ || 47 ||

alpaśruto'ndha iva vetti na bhāvanāyā

mārgaṁ vicintayati kāni ca tadvihīnaḥ|

tasmācchrutaṁ prati yateta tadāśrayā hi

prajñā samudbhavati cintanabhāvanābhyām || 48 ||

praśnairavigrahamukhaiśca kathāviśeṣairmī-

māṁsayārthagativīkṣaṇayā svayaṁ ca|

prajñāvivṛddhimabhitaḥ prayateta nityaṁ

dhyānena tadguṇavivṛddhikareṇa caiva || 49 ||

prajñābhyupāyavidhireṣa samāsatastu

dhyānaṁ tadarthaniyataḥ śrutivistaraśca|

tābhyāṁ samudbhavati hi prabhavo guṇānāṁ

prajñāprabhāsamudayo'gnirivāraṇībhyāṁ || 50 ||

vidvajjanācaritamārgasamāśrayācca

saṁmohahetugahanāni vivarjayeta|

tairāvṛto na hi vibhātyudayasthito'pi

toyāvalambijaladāntaritaḥ śaśīva || 51 ||

ālasyajṛmbhitamatitvam asatsahāyā

nidrānivṛttiraviniścayaśīlatā ca|

jñāne muneriva kutūhalitānivṛttirmithyā-

bhimānaparisaṁkucitāśca pṛcchāḥ || 52 ||

dainyena cātmaparitāpasamudbhavena

vidvajjanābhigamanādarakātaratvam|

mithyāvikalpapaṭutā vitathā ca dṛṣṭirmohāya

tatpraśamanāya tu tadvipakṣāḥ || 53 ||

skandheṣu sāyatanadhātuṣu satyayuktyo

hetudbhaveṣu śucayānavinirṇaye ca|

dharmeṣu kauśalamaśeṣata eva yacca

prajñāprayogaviṣayo'ṣṭavikalpa eṣaḥ || 54 ||

niḥsāraphenanicayairaviśeṣi rūpaṁ

tisro'pi budbudalavā iva vedanāśca|

saṁjñāpi kāmaguṇaviprasṛtān satṛṣṇān

bālān mṛgāniva vilobhayate marīciḥ || 55 ||

saṁskārajātirapi tulyaguṇā kadalyā

vijñānato'pi na ca yuktatarāsti māyā|

yanniśrayādbhramati naikavikalpaceṣṭaṁ

bhūtābhibhūtakuṇapapratimaṁ śarīram || 56 ||

nātmā tadīyamapi cātra na kiṁ cid asti

saṁghāta eṣa vividhāśūcisaṁnidhānaḥ|

bālān pralambhayata eva ca sattvasaṁjñā

svacchandaceṣṭa iva yantravidhau suyukte || 57 ||

ātmā na cakṣurapi ca kṣaṇabhaṅguratvāt

tadvan na cakṣuṣi na cātra yathaiva cakṣuḥ|

ādhyātmikāyatanaśeṣam aśeṣam evam

ātmīyavastuviṣayo'pi ca tadvivekī || 58 ||

bāhyeṣu dhātuṣu śarīrasamāśritānāṁ

nālpo'pi lakṣaṇavirodhakṛto'sti bhedaḥ|

vijñānadhāturapi ca kṣaṇikaḥ sa nātmā

tasmātparo'pi ca nabhaḥkusumaiḥ samānaḥ || 59 ||

ityetadudbhavati kevalameva duḥkhaṁ

tṛṣṇāvimūḍhamanaso vigmāttu tasyāḥ|

śāntiḥ parā bhavati tarṣaharastu mārgaḥ

śīlaṁ samādhipariśuddhatayā ca dṛṣṭiḥ || 60 ||

tattatpratītya bhavatīti viśuddha-

dṛṣṭirnāstyasti veti samupaiti sa naiva kiṁ cit|

māyāmayaṁ jagadidaṁ pratibhāti tasya

tasmāt sukhādiṣu bhavatyavikāradhīraḥ || 61 ||

āsīdbhaviṣyati ca yat tad apīdṛgeva

kaḥ saṁbhavo yadasukhaṁ na bhaved bhavebhyaḥ|

evaṁ vyatītaviṣayeṣvapi vītarāgo

naivābhinandati bhavāṁśca bhaviṣyato'pi || 62 ||

ākārabhedaparuṣe puruṣo'parādhī

ko nāma gūḍhanakharasphuṭadṛṣṭicihne|

tatpraiṣyavṛttikapaṭānyanucintya rajyed

viśvāsameva ca yathocitamatra yāyāt || 63 ||

evaṁ vimuktamatirapyanukampakastu

kleśāntaraṁ jagadanāthamavekṣamāṇaḥ|

hīneṣu niṣpraṇayabuddhirudārabhāvān

nirvātumicchati na buddhaguṇānalabdhvā || 64 ||

lokārthasādhanavidhāvasamartharūpaṁ

yānadvayaṁ samavādhūya sa pūrvameva|

kāruṇyadeśitapatho munirājayānam

ātasthivān parahitaikarasasvabhāvam || 65 ||

hīnociteṣu na matirnamati praṇītā

saṁtiṣṭhate mahati nāmahatī kadā cit|

saṁsyandate śucibhireva śucisvabhāvaṁ

tulyaistathānyadapi śāsvata eṣa yogaḥ || 66 ||

svapnopamāni vigaṇayya sukhāsukhāni

saṁmohadoṣakṛpaṇāṁ janatāṁ ca teṣu|

ātmārtha eva gurutāṁ katham asya yāyād

vyāpārabhāramavadhūya parārtharamyam || 67 ||

yaḥ sarvalokahitakāraṇasarvaceṣṭastya-

ktvātmadṛṣṭiviṣayaṁ vitathābhimānam|

sarvatra śāntamatiradvayamārgacārī

so'tyadbhutaścaritanirvṛta eva loke || 68 ||

prajñāviśuddhikaramuttamayānametat

sarvajñatā tadudayā hi mahāmunīnām|

lokasya yā nayanatāmiva saṁprayāti

dīptāṁśumaṇḍalatalotpatitā prabheva || 69 ||

saṁsāradoṣabharanirmathito'pi naiva

prajñāvivecanatayā parikhīdyate yaḥ|

nātmābhikhedapariviklavatāṁ sa yāti

yānasya buddhaguṇasaṁjananasya loke || 70 ||

paśyanti cābhutamayaṁ sugataprabhāvaṁ

romāñcakañcukitasarvaśarīradeśāḥ|

tadgāminaṁ pariharanti ca yānamārgaṁ

kiṁ nāma kāraṇamṛte śaṭhaceṣṭitebhyaḥ || 71 ||

ko nāma mārakalinānabhibhūtacetāḥ

saṁbuddhadharmaguṇaratnanidhānabhūtam|

sarvajñayānamapayānam anarthapaṅkād

ākroṣṭumarhati na cejjagato'sya vairam || 72 ||

lokārthasādhanapare jinarājavaṁśe

prajñānimīlitanayeṣu pariskhalatsu|

cittaṁ narasya karuṇāmṛdu kasya na syāt

tanmohadoṣaśamanāya dṛḍhaṁ ca vīryam || 73 ||

prajñāyā janayati yaḥ parāṁ viśuddhiṁ

nirmokṣaḥ kathamiva tasya dūrataḥ syāt|

naivāsmātparataramasti śīlam anyat

tattasmād bhajata vimokṣakāṅkṣiṇo hi || 74 ||

|| prajñāpāramitāsa[māsa]ścāyaṁ pāramitāsamāsaḥ ||

viśuddhamaunīndramanastaḍāga-

prasūtasūtrāntasaroruhebhyaḥ|

ādāya śurabhramareṇa samyag

madhūrjitaṁ pāramitāsamāse ||

Technical Details

Text Version: 

Romanized

Input Personnel: 

DSBC Staff

Input Date: 

2006

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0