advayasiddhiḥ

advayasiddhiḥ

om namaḥ śrī vajrasattvāya |
prakṛti-prabhāsvaraṁ nāthaṁ sarvajñaṁ tribhavodbhavam
praṇamya śirasā vajramīṇsitārtha phalapradam |
deśakāla tithivāra nakṣatraimaṇḍalaivinā
vakṣye'haṁ vajrasattvasya saṁkṣepāt sādhanaṁ param ||1||
niyama vratopavāsai - rakṣaroccāraṇa-bhāvanaiḥ
atattva yogīna siddhayet kalpakoṭiśatairapi ||2||
viṇvajrodaka vījādyai rnāsikābhyantarod bhavaiḥ
pūjayet satataṁ mantrī ātmānaṁ tattva bhāvanaiḥ ||3||
jananī bhaginīścaiva duhitṛ bhāgineyikān
prajñopāya vidhānena pūjayet yogavidsadā ||4||
ekāṅga vikalāṁ hīnāṁ śilpinīṁ śvapacikāṁ tathā
yoṣitāṁ pūjayennityaṁ jñānavajraprabhāvanai ||5||
tatvasyemāni mantra vījapadāni bhavanti - om āḥ huṁ
yena yena hi vadhyante jantavo raudra karmaṇā
sopāyena tu tenaiva mucyante bhava vandhanāt ||6||
samayānaharahaḥ kuryāddivyāna pañcakulod bhavān
pūjayecca pradīpādyaiḥ sakṣīrairviśvasambhavaiḥ ||7||
prātphulla nayano mantrī nityaṁ prahasitānanaḥ
cittamāropya saṁvodhau bhāvayeta jñānasāgaraṁ ||8||
yāvantaḥ sthirācalābhāvāḥ saṁtyatra tribhavālaye
sarvete tattvayogena draṣṭavyā vajradhṛk tathā ||9||
paravādinaśca ye kacilliṁga bhedai rvyavasthitā
tepyatra nāvamantavyā vajrasattva vikurvite ||10||
sarvān samarasīkṛtya bhāvānnairātmyaniḥsṛtān
bhāvayet satataṁ mantrī dehaṁ prakṛta nirmalaṁ ||11||
gandhamālyādibhivastrai dhūpanaivedyake stathā
gītavādyaistathā nṛtyai sopāyaibhajate vibhuḥ ||12||
na kaṣṭa kalpanāṁ kūryyānnopavāsaṁ na ca kriyāṁ
snānaṁ śaucaṁ na caivātra grāma dharma vivarjanaṁ ||13||
na cāpi vandayedyevān kāṣṭha pāṣāṇa mṛṇmayān
pūjā masyevakāyasya kūryānnitya samāhitaṁ ||14||
makṣikāchardi sammiśraiḥ viṇmūtrādyaiśca bhāvitai
pañca pradīpa saṁyuktaiḥ pūjayedvajradhāriṇam ||15||
abalā svayaṁbhūkusumaiḥ sakṣīrai viśvasambhavaiḥ
pūjayedyevatāṁ tena dehasthāṁ tatva bhāvanaiḥ ||16||
parasva haraṇaṁ kuryāt paradārā niṣevanaṁ
vaktavyaṁ ca mṛṣāvākyaṁ sarvabuddhāṁścadhātayet ||17||
śaila mṛṇmaya caityādīn na kuryān pustakeratiṁ
na maṇḍalāni svapne'pi kāyavākcittakarmaṇā ||18||
jugupsānaiva kurvīta sarvavastuṣu mantravit
vajrasattvaḥ svayaṁ tatra sākṣādrupeṇa saṁsthitaḥ ||19||
gamyāgamya vikalpaṁ tu bhakṣyā bhakṣyaṁ tathaivaca
peyā peyaṁ tathā mantrī kuryyānaiva samāhitaḥ ||20||
vairocana samudbhūtān sarvaprāṇyeva saṁbhavān |
prāṇavān guhyatatvajño bhokṣayet siddhihetunā ||21||
sarva varṇa samudbhutā jugupsā naiva yoṣitaḥ
saiva bhagavatī prajñā saṁvṛtyā rūpamāśritā ||22||
nā tithirnaca nakṣatraṁ nopavāsovidhiyate
advaya jñāna yuktasya siddhirbhavati saugatī ||23||
vahunātra kimuktena yadbhavadupalabdhikaṁ
tatsarvaṁ tatvayogena draṣṭavyaṁ tatvavedinā ||24||
hastyaśva khara gāvoṣṭra pradīpaṁ śvānasambhavaṁ
mahāpradīpa sammiśra bhokṣayed yogavid sadā ||25||
na cādhyāsaktiṁ kurvīta ekasminnapi yogavit
samatā cittayogena bhāvanīyo bhavārṇṇavaḥ ||26||
utpatti sthiti nirodhañca asaṁpṛkta pṛthag janaiḥ
tasya bhāvetu saṁsāro nānyatra pralayodbhavaḥ ||27||
dinaṁ tu bhagavānvajrī naktaṁ prajñā vidhīyate
evaṁ tu bhāvayed yogī laghusiddhimavāpnuyāt ||28||
yattadvyaktaṁ rūpaṁ tu sarvasattveṣu saṁsthitaṁ
guruvaktrāt paraṁtatvaṁ prāpyate nātra saṁśayaḥ ||29||
apratiṣṭhita nirvāṇaṁ ninirmittaṁ nirālayaṁ
vyāpakaṁ sarvasatveṣu saṁvodhi paramaṁ padaṁ ||30||
evaṁ matvā tu vai yogī yo bhāvayed vuddhimān sadā
sa sidhyati na sandeho mandaṁ puṇyopi mānavaḥ ||31||
ācāryāt parataraṁ nāsti trailokya sacarācarai
yasya prasādāt prāpyante sidhyo'nekadhāvudhaiḥ ||32||
vajrasatvaḥ sarvaijñeyaḥ sarvavuddhai namaskṛtaḥ
ācāryāḥ paramodevaḥ pūjanīyaḥ prayatnata ||33||
sa eva tathatārūpī lokānugraha hetunā
rūpamāśritya saṁvṛtyā saṁsthito yogapīṭhake ||34||
mṛtyureṣa vikalpoyaṁ na bhāvaḥ sarvavastuṣu
hanyate savikalpena pṛthagjana vijṛmbhitaiḥ ||35||

śrī madoḍiyāna vinirgatā mahāyoga -
pīṭhāgatā akhila yogatantra tatvagarbhā śrī lakṣmīmukha kamalād
vinisṛtā svādhiṣṭhān kramodayā sādhanopāyikā ||

|| samāpteti ||