adhyardhaśatakaṁ nāma stotram

Adhyardhaśatakaṁ nāma stotram

ācāryamātṛceṭaviracitam

1 upodghātaḥ

namo buddhāya

sarvadā sarvathā sarve yasya doṣā na santi ha |

sarve sarvābhisāreṇa yatra cāvasthitā guṇāḥ|| 1||

tameva śaraṇaṁ gantuṁ taṁ stotuṁ tamupāsitum |

tasyaiva śāsane sthātuṁ nyāyyaṁ yadyasti cetanā|| 2||

savāsanāśca te doṣā na santyekasya tāyinaḥ|

sarve sarvavidaḥ santi guṇāste cānapāyinaḥ|| 3||

na hi pratiniviṣṭo'pi manovākkāyakarmasu|

saha dharmeṇa labhate kaścidbhagavato'ntaram || 4||

so'haṁ prāpya manuṣyatvaṁ sasaddharmamahotsavam |

mahārṇavayugacchidrakūrmagrīvārpaṇopamam|| 5||

anityatāvyanusṛtāṁ karmacchidrasasaṁśayām|

āttasārāṁ kariṣyāmi kathaṁ nemāṁ sarasvatīm || 6||

ityasaṁkhyeyaviṣayānavetyāpi guṇānmuneḥ|

tadekadeśapraṇayaḥ kriyate svārthagauravāt || 7||

svayambhuve namaste'stu prabhūtādbhutakarmaṇe |

yasya saṁkhyāprabhāvābhyāṁ na guṇeṣvasti niścayaḥ|| 8||

iyanta iti nāstyanta īdṛśā iti kā kathā |

puṇyā ityeva tu guṇānprati te mukharā vayam|| 9||

upodghātastavo nāma prathamaḥ paricchedaḥ|

hetustavaḥ

viṣahyamaviṣahyaṁ vetyavadhūya vicāraṇām|

svayamabhyupapannaṁ te nirākrandamidaṁ jagat || 10||

avyāpāritasādhustvaṁ tvamakāraṇavatsalaḥ|

asaṁstutasakhāśca tvamanavaskṛtabāndhavaḥ|| 11||

svamāṁsānyapi dattāni vastuṣvanyeṣu kā kathā |

prāṇairapi tvayā sādho mānitaḥ praṇayī janaḥ|| 12||

svaiḥ śarīraiḥśarīrāṇi prāṇaiḥprāṇāḥ śarīriṇām |

jighāṁsubhirupāttānāṁ krītāni śataśastvayā || 13||

na durgatibhyāṁ neṣṭā[bhyā] mabhiprārthayatā gatim|

kevalāśayaśuddhayaiva śolaṁ sātmīkṛtaṁ tvayā|| 14||

jihmāanāṁ nityavikṣepādṛjūnāṁ nityasevanāt|

karmaṇāṁ pariśuddhānāṁ tvamekāyanatāṁ gataḥ || 15||

pīḍayamānena bahuśastvayā kalyāṇacetasā |

kleśeṣu vivṛtaṁ tejo janaḥ kliṣṭo'nukampitaḥ || 16||

parārthe tyajataḥ prāṇān yā prītirabhavat tava|

na sā naṣṭopalabdheṣu prāṇeṣu prāṇināṁ bhavet|| 17||

yadrujā nirapekṣasya cchidyamānasya te'sakṛt |

vadhakeṣvapi sattveṣu kāruṇyamabhavat prabho|| 18||

samyaksambodhibījasya cittaratnasya tasya te |

tvameva vīra sārajño dūre tasyetaro janaḥ || 19||

nākṛtvā duṣkaraṁ karma durlabhaṁ labhyate padam |

ityātmanirapekṣeṇa vīryaṁ saṁvardhitaṁ tvayā|| 20||

viśeṣotkarṣaniyamo na kadācidabhūt tava |

atastvayi viśeṣāṇāṁ chinnastaratamakramaḥ || 21||

susukheṣvapi saṅgo'bhūt saphaleṣu samādhiṣu |

na te nityānubaddhasya mahākaruṇayā hṛdi || 22||

tvādṛśān pīḍayatyeva nānugṛhṇāti tat sukham|

praṇītamapi sadvṛtta yadasādhāraṇaṁ paraiḥ || 23||

vimiśrāt sāramādattaṁ sarvaṁ pītamakalmaṣam |

tvayā sūktaṁ duruktaṁ tu viṣavat parivarjitam || 24||

krīṇatā ratnasārajña prāṇairapi subhāṣitam |

parākrāntaṁ tvayā bodhau tāsu tāsūpapattiṣu || 25||

iti tribhirasaṁkhyeyairevamudyacchatā tvayā |

vyavasāyadvitīyena prāptaṁ padamanuttaram || 26||

hetustavo nāma dvitīyaḥ paricchedaḥ |

3 nirupamastavaḥ

akṛtverṣyāṁ viśiṣṭeṣu hīnānanavamatya ca |

agatvā sadṛśaiḥ spardhāṁ tvaṁ loke śreṣṭhatāṁ gataḥ || 27||

hetuṣvabhiniveśo'bhūd guṇānāṁ na phaleṣu te |

tena samyakpratipadā tvayi niṣṭhāṁ guṇā gatāḥ || 28||

tathātmā pracayaṁ nītastvayā sucaritairyathā|

puṇyāyatanatāṁ prāptānyapi pādarajāṁsi te || 29||

karśayitvoddhṛtā doṣā vardhayitvā viśodhitāḥ |

guṇāstena sunītena parāṁ siddhiṁ tvamadhyagāḥ || 30||

tathā sarvābhisāreṇa doṣeṣu prahṛtaṁ tvayā|

yathaiṣāmātmasantāne vāsanāpi na śeṣitā || 31||

tathā saṁbhṛtya saṁbhṛtya tvayātmanyāhitā guaṇāḥ|

pratirupakamapyeṣāṁ yathā nānyatra dṛśyate || 32||

upaghātāvaraṇavanmitakālaṁ pradeśi ca |

sulabhātiśayaṁ sarvamupamāvastu laukikam || 33||

advandvināmagamyānāṁ dhruvāṇāmanivartinām |

anuttarāṇāṁ kā tarhi guṇānāmupamā'stu te|| 34||

goṣpadottānatāṁ yāti gāmbhīryaṁ lavaṇāmbhasaḥ |

yadā te buddhigāmbhīryamagādhāpāramīkṣyate || 35||

śirīṣapakṣmāgralaghu sthairyaṁ bhavati pārthivam |

akampye sarvadharmāṇāṁ tvatsthairye'bhimukhīkṛte || 36||

ajñānatimiraghnasya jñānālokasya te mune |

na ravirviṣaye bhūmiṁ khādyotimapi vindati || 37||

malinatvamivāyānti śaraccandrāmbarāmbhasām |

tava vāgbuddhiceṣṭānāṁ śuddhiṁ prati viśuddhayaḥ || 38||

anena sarvaṁ vyākhyātaṁ yat kiñcitsādhu laukikam |

dūre hi buddhadharmāṇāṁ lokadharmāstapasvinaḥ || 39||

yasyaiva dharmaratnasya prāptyā prāptastvamagratām |

tenaiva kevalaṁ sādho sāmyaṁ te tasya ca tvayā|| 40||

ātmecchācchalamātraṁ tu sāmānyopāṁśu kiṁcana |

yatropakṣipya kathyeta sā vakturatilolatā || 41||

nirupamastavo nāma tṛtīyaḥ paricchedaḥ |

4 adbhutastava ḥ

pratanviva hi paśyāmi dharmatāmanucintayan |

sarvaṁ cāvarjitaṁ māravijayaṁ prati te jagat || 42||

mahato'pi hi saṁrambhāt pratihantuṁ samudyatāḥ |

kṣamāyā nātibhāro'sti pātrasthāyā viśeṣataḥ || 43||

yattu mārajayānvakṣaṁ sumahatkleśavaiśasam |

tasyāmeva kṛtaṁ rātrau tadeva paramādbhutam || 44||

tamovidhamane bhānoryaḥ sahasrāṁśumālinaḥ |

vīra vismayamāgacchet sa tīrthyavijaye tava || 45||

sarāgo vītarāgeṇa jitaroṣeṇa roṣaṇaḥ |

mūḍho vigatamohena tribhirnityaṁ jitāstrayaḥ || 46||

praśaṁsasi ca saddharmānasaddharmān vigarhasi |

anurodhavirodhau ca na staḥ sadasatostava || 47||

naivārhatsu na tīrthyeṣu pratighānunayaṁ prati |

yasya te cetaso'nyatvaṁ tasya te kā stutirbhavet || 48||

guṇeṣvapi na saṁgo'bhūt tṛṣṇā na guṇavatsvapi |

aho te suprasannasya sattvasya pariśuddhatā || 49||

indriyāṇāṁ prasādena nityakālānapāyinā |

mano nityaprasannaṁ te pratyakṣamiva dṛśyate || 50||

ābālebhyaḥ prasiddhāste matismṛtiviśuddhayaḥ |

gamitā bhāvapiśunaiḥ suvyāhṛtasuceṣṭitaiḥ || 51||

adbhutastavo nāma caturthaḥ paricchedaḥ |

5 rupastavaḥ

upaśāntaṁ ca kāntaṁ ca dīptamapratighāti ca |

nibhṛtaṁ corjitaṁ cedaṁ rupaṁ kamiva nākṣipet|| 52||

yenāpi śataśo dṛṣṭaṁ yo'pi tatpūrvamīkṣate |

rupaṁ prīṇāti te cakṣuḥ samaṁ tadubhayorapi || 53||

asecanakabhāvāddhi saumyabhāvācca te vapuḥ|

darśane darśane prītiṁ vidadhāti navāṁ navām || 54||

adhiṣṭhānaguṇairgātramadhiṣṭhātṛguṇairguṇaḥ |

parayā saṁpadopetāstavānyonyānurupayā || 55||

kvānyatra suniviṣṭāḥ syurime tāthāgatā guṇāḥ |

ṛte rupāttavaivāsmāllakṣaṇavyañjanojjvalāt || 56||

dhanyamasmīti te rupaṁ vadatīvāśritān guṇān |

sunikṣiptā vayamiti pratyāhuriva tadguṇāḥ || 57||

rupastavo nāma pañcamaḥ paricchedaḥ |

6 karuṇāstavaḥ

sarvamevāviśeṣeṇa kleśairbaddhamidaṁ jagat|

tvaṁ jagatkleśamokṣārthaṁ baddhaḥ karuṇayā ciram || 58||

kaṁ nu prathamato vande tvāṁ mahākaruṇāmuta |

yayaivamapi doṣajñastvaṁ saṁsāre dhṛtaściram || 59||

vivekasukhasātmyasya yadākīrṇasya te gatāḥ |

kālā labdhaprasarayā tat te karuṇayā kṛtam || 60||

śāntādaraṇyād grāmāntaṁ tvaṁ hi nāga iva hradāt |

vineyārthaṁ karuṇayā vidhayevāvakṛṣyase|| 61||

paramopaśamastho'pi karuṇāparavattayā |

kāritastvaṁ padanyāsaṁ kuśīlavakalāsvapi || 62||

ṛddhiryā siṁhanādā ye svaguṇodbhāvanāśca yāḥ |

vāntecchopavicārasya kāruṇyanikaṣaḥ sa te || 63||

parārthaikāntakalyāṇī kāmaṁ svāśrayaniṣṭhurā |

tvayyeva kevalaṁ nātha karuṇā karuṇābhavat || 64||

tathā hi kṛtvā śatadhā dhīrā balimiva kvacit|

pareṣāmarthasiddhayarthaṁ tvāṁ vikṣiptavatī diśaḥ || 65||

tvadicchayaiva tu vyaktamanukūlā pravartate |

tathā hi bādhamānāpi tvāṁ satī nāparādhyate|| 66||

karuṇāstavo nāma ṣaṣṭhaḥparicchedaḥ |

7 vacanastavaḥ

supadāni mahārthāni tathyāni madhurāṇi ca |

gūḍhottānobhayārthāni samāsavyāsavanti ca|| 67||

kasya na syādupaśrutya vākyānyevaṁvidhāni te |

tvayi pratihatasyāpi sarvajña iti niścayaḥ || 68||

prāyeṇa madhuraṁ sarvamagatyā kiñcidanyathā |

vākyaṁ tavārthasiddhayā tu sarvameva subhāṣitam || 69||

yacchlakṣaṇaṁ yacca paruṣaṁ yadvā tadubhayānvitam |

sarvamaivaikarasatāṁ vimarde yāti te vacaḥ || 70||

aho supariśuddhānāṁ karmaṇāṁ naipuṇaṁ param |

yairidaṁ vākyaratnānāmīdṛśaṁ bhājanaṁ kṛtam || 71||

asmaddhi netrasubhagādidaṁ śrutimanoharam |

mukhāt kṣarati te vākyaṁ candrāddravamivāmṛtam || 72||

rāgareṇuṁ praśamayadvākyaṁ te jaladātaye |

vainateyāyate dveṣabhujaṅgoddharaṇaṁ prati || 73||

divākarāyate bhūyo'pyajñānatimiraṁ nudat |

śakrāyudhāyate mānagirīnabhividārayat|| 74||

dṛṣṭārthatvādavitathaṁ niṣkleśatvādanākulam |

gamakaṁ suprayuktatvāt trikalyāṇaṁ hi te vacaḥ || 75||

manāṁsi tāvacchrotṝṇāṁ harantyādau vacāṁsi te|

tato vimṛśyamānāni rajāṁsi ca tamāṁsi ca || 76||

āśvāsanaṁ vyasanināṁ trāsanaṁ ca pramādinām |

saṁvejanaṁ ca sukhināṁ yogavāhi vacastava || 77||

viduṣāṁ prītijananaṁ madhyānāṁ buddhivardhanam |

timiraghnaṁ ca mandānāṁ sārvajanyamidaṁ vacaḥ || 78||

apakarṣati dṛṣṭibhyo nirvāṇamupakarṣati|

doṣān niṣkarṣati guṇān vākyaṁ te'bhipravarṣati || 79||

sarvatrāvyāhatā buddhiḥ sarvatropasthitā smṛtiḥ |

avandhyaṁ tena sarvatra sarvaṁ vyākaraṇaṁ tava || 80||

yannādeśe na cākāle naivāpātre pravartase |

vīryaṁ samyagivārabdhaṁ tenāmoghaṁ vacastava || 81||

vacanastavo nāma saptamaḥ paricchedaḥ |

8 śāsanastavaḥ

ekāyanaṁ sukhopāyaṁ svanuvandhi niratyayam |

ādimadhyāntakalyāṇaṁ tava nānyasya śāsanam || 82||

evamekāntakāntaṁ te dṛṣṭirāgeṇa bāliśāḥ |

mataṁ yadi vigarhanti nāsti dṛṣṭisamo ripuḥ|| 83||

anavabhuṅkthā yadasyārthe jagato vyasanaṁ bahu|

tat saṁsmṛtya virupe'pi stheyaṁ te śāsane bhavet|| 84||

prāgeva hitakartuśca hitavaktuśca śāsanam |

kathaṁ na nāma kāryaṁ syādādīptaśirasāpi te || 85||

bhujiṣyatā bodhisukhaṁ tvadguṇāpacitiḥ śamaḥ |

prāpyate tvanmatāt sarvamidaṁ bhadracatuṣṭayam || 86||

trāsanaṁ sarvatīrthyānāṁ namucerupatāpanam |

āśvāsanaṁ nṛdevānāṁ tavedaṁ vīra śāsanam || 87||

traidhātukamahābhaumamasaṅgamanavagraham |

śāsanena tavākrāntamantakasyāpi śāsanam || 88||

tvacchāsananayajño hi tiṣṭhet kalpamapīcchayā|

prayāti tatra tu svairī yatra mṛtyoragocaraḥ || 89||

āgamasyārthacintāyā bhāvanopāsanasya ca|

kālatrayavibhāgo'sti nānyatra tava śāsanāt || 90||

evaṁ kalyāṇakalitaṁ tadevamṛṣipuṅgava|

śāsanaṁ nādriyante yat kiṁ vaiśasataraṁ tataḥ || 91||

śāsanastavo nāmāṣṭamaḥ paricchedaḥ |

9 praṇidhistavaḥ

śravaṇaṁ tarpayati te prasādayati darśanam |

vacanaṁ hlādayati te vimocayati śāsanam || 92||

prasūtirharṣayati te vṛddhirnandayati prajñāḥ|

pravṛttiranugṛhṇāti nivṛttirupahanti ca || 93||

kīrtanaṁ kilbiṣaharaṁ smaraṇaṁ te pramodanam|

anveṣaṇaṁ matikaraṁ parijñānaṁ viśodhanam || 94||

śrīkaraṁ te'bhigamanaṁ sevanaṁ dhīkaraṁ param |

bhajanaṁ nirbhayakaraṁ śaṁkaraṁ paryupāsanam || 95||

śīlopasampadā śuddhaḥ prasanno dhyānasampadā |

tvaṁ prajñāsampadā'kṣobhyo hradaḥ puṇyamayo mahān || 96||

rupaṁ draṣṭavyaratnaṁ te śravyaratnaṁ subhāṣitam |

dharmo vicāraṇāratnaṁ guṇaratnākaro hyasi|| 97||

tvamoghairuhyamānānāṁ dvīpastrāṇaṁ kṣatātmanām |

śaraṇaṁ bhavabhīruṇāṁ mumukṣūṇāṁ parāyaṇam || 98||

satpātraṁ śuddhavṛttatvāt satkṣetraṁ phalasampadā |

sanmitraṁ hitakāritvāt sarvaprāṇabhṛtāmasi || 99||

priyastvamupakāritvāt suratatvānmanoharaḥ |

ekāntakāntaḥ saumyatvāt sarvairbahumato guṇaiḥ || 100||

hṛdyo'si niravadyatvādramyo vāgarupasauṣṭhavāt |

dhanyaḥ sarvārthasiddhatvānmāṅgalyo guṇasaṁśrayāt || 101||

praṇidhistavo nāma navamaḥ paricchedaḥ |

10 mārgāvatārastavaḥ

sthāyināṁ tvaṁ parikṣeptā viniyantāpahariṇām |

samādhātā vijihmānāṁ prerako mandagāminām || 102||

niyoktā dhuri dāntānāṁ khaṭuṅkānāmupekṣakaḥ|

ato'si naradamyānāṁ satsārathiranuttaraḥ || 103||

āpanneṣvanukampā te prasvastheṣvarthakāmatā |

vyasanastheṣu kāruṇyaṁ sarveṣu hitakāmatā || 104||

viruddheṣvapi vātsalyaṁ pravṛttiḥ patiteṣvapi |

raudreṣvapi kṛpālutvaṁ kā nāmeyaṁ tavāryatā || 105||

gurutvamupakāritvānmātāpitroryadīṣyate |

kedānīmastu gurutā tvayyatyantopakāriṇi || 106||

svakāryanirapekṣāṇāṁ viruddhānāmivātmanām |

tvaṁ prapātataṭasthānāṁ prākāratvamupāgataḥ || 107||

lokadvayopakārāya lokātikramaṇāya ca |

tamobhūteṣu lokeṣu prajñālokaḥ kṛtastvayā || 108||

bhinnā devamanuṣyāṇāmupabhogeṣu vṛttayaḥ |

dharmasambhogasāmānyāttvayyasambhedamāgatāḥ|| 109||

upapattivayovarṇadeśakālaniratyayam |

tvayā hi bhagavan dharmasarvātithyamidaṁ kṛtam || 110||

avismitān vismitavatspṛhayanto gataspṛhān |

upāsate prāñjalayaḥ śrāvakānapi te surāḥ || 111||

aho saṁsāramaṇḍasya buddhotpādasya dīptatā |

mānuṣyaṁ yatra devānāṁ spṛhaṇīyatvamāgatam || 112||

mārgāvatārastavo nāma daśamaḥ paricchedaḥ|

11 duṣkarastavaḥ

khedaḥ śamasukhajyānirasajjanasamāgamaḥ |

dvandvānyākīrṇatā ceti doṣān guṇavadudvahan || 113||

jagaddhitārthaṁ ghaṭase yadasaṅgeta cetasā |

kā nāmāsau bhagavati buddhānāṁ buddhadharmatā || 114||

kadannānyapi bhuktāni kvacitkṣudadhivāsitā |

panthāno viṣamāḥ kṣuṇṇāḥ suptaṁ gokaṇṭakeṣvapi|| 115||

prāptāḥ kṣepāvṛtāḥ sevā veṣabhāṣāntaraṁ kṛtam |

nātha vaineyavātsalyāt prabhuṇāpi satā tvayā || 116||

prabhūtamapi te nātha sadā nātmani vidyate |

vaktavya iva sarvairhi svairaṁ svārthe niyujyase|| 117||

yena kena cideva tvaṁ yatra tatra yathā tathā |

coditaḥ svāṁ pratipadaṁ kalyāṇīṁ nātivartase|| 118||

nopakārapare'pyevamupakāraparo janaḥ |

apakārapare'pi tvamupakāraparo yathā || 119||

ahitāvahite śatrau tvaṁ hitāvahitaḥ suhṛt|

doṣānveṣaṇanitye'pi guṇānveṣaṇatatparaḥ|| 120||

yato nimantraṇaṁ te'bhūt saviṣaṁ sahutāśanam |

tatrābhūdabhisaṁyānaṁ sadayaṁ sāmṛtaṁ ca te || 121||

akroṣṭāro jitāḥ kṣāntyā drugdhāḥ svastyayanena ca |

satyena cāpavaktārastvayā maitryā jighāṁsavaḥ || 122||

anādikālaprahatā bahṛyaḥ prakṛtayo nṛṇām |

tvayā vibhāvitāpāyāḥ kṣaṇena parivartitāḥ || 123||

duṣkarastavo nāmaikādaśaḥ paricchedaḥ |

12 kauśalastavaḥ

yatsauratyaṁ gatāstīkṣṇāḥ kadaryāśca vadānyatām |

krurāḥ peśalatāṁ yātāstat tavopāyakauśalam || 124||

indriyopaśamo nande mānastabdhe ca saṁnatiḥ |

kṣamitvaṁ cāṅgulīmāle kaṁ na vismayamānayet|| 125||

bahavastṛṇaśayyāsu hitvā śayyāṁ hiraṇmayīm |

aśerata sukhaṁ dhīrāstṛptā dharmarasasya te || 126||

pṛṣṭenāpi kvacinnoktamupetyāpi kathā kṛtā |

tarṣayitvā paratroktaṁ kālāśayavidā tvayā|| 127||

pūrvaṁ dānakathādyābhiścetasyutpādya sauṣṭhavam |

tato dharmo gatamale vastre raṅga ivārpitaḥ || 128||

na so'styupāyaḥ śaktirvā yena na vyāyataṁ tava|

ghorāt saṁsārapātālāduddhartṛṁ kṛpaṇaṁ jagat || 129||

bahūni bahurupāṇi vacāṁsi caritāni ca |

vineyāśayabhedena tatra tatra gatāni te || 130||

viśuddhānyaviruddhāni pūjitānyarcitāni ca|

sarvāṇyeva nṛdevānāṁ hitāni mahitāni ca|| 131||

na hi vaktuṁ ca kartuṁ ca bahu sādhu ca śakyate |

anyathānanyathāvādin dṛṣṭaṁ tadubhayaṁ tvayi|| 132||

kevalātmaviśuddhayaiva tvayā pūtaṁ jagadbhavet|

yasmānnaivaṁvidhaṁ kṣetraṁ triṣu lokeṣu vidyate || 133||

prāgevātyantanaṣṭānāmanādau bhavasaṁkaṭe |

hitāya sarvasattvānāṁ yastvamevaṁ samudyataḥ || 134||

kauśalastavo nāma dvādaśaḥ paricchedaḥ |

13 ānṛṇyastavaḥ

na tāṁ pratipadaṁ vedmi syādyayāpacitistava|

api ye parinirvānti te'pi te nānṛṇā janāḥ || 135||

tava te'vasthitā dharme svārthameva tu kurvate |

yaḥ śramastannimittaṁ tu tava kā tasya niṣkṛtiḥ || 136||

tvaṁ hi jāgarṣi suptānāṁ saṁtānānyavalokayan |

apramattaḥ pramattānāṁ sattvānāṁ bhadrabāndhavaḥ || 137||

kleśānāṁ vadha ākhyāto māramāyā vighāṭitā |

uktaṁ saṁsāradaurātmyamabhayā digvidarśitā || 138||

kimanyadarthakāmena sattvānāṁ karuṇāyatā |

karaṇīyaṁ bhaved yatra na dattānunayo bhavān || 139||

yadi saṁcāriṇo dharmāḥ syurime niyataṁ tvayā |

devadattamupādāya sarvatra syurniveśitāḥ || 140||

ata eva jagannātha nehānyo'nyasya kārakaḥ|

iti tvamuktavān bhūtaṁ jagat saṁjñāpayanniva|| 141||

cirāya bhuvi saddharmaṁ prerya lokānukampayā |

bahūnutpādya sacchiṣyāṁstrailokyānugrahakṣamān || 142||

sākṣādvineyavargīyān subhadrāntān vinīya ca|

ṛṇaśeṣaṁ kimadyāpi sattveṣu yadabhūt tava|| 143||

yastvaṁ samādhivajreṇa tilaśo'sthīni cūrṇayan |

atiduṣkarakāritvamante'pi na vimuktavān || 144||

parārthāveva me dharmarupakāyāviti tvayā |

duṣkuhasyāsya lokasya nirvāṇe'pi nidarśitam || 145||

tathāhi satsu saṁkrāmya dharmakāyamaśeṣataḥ |

tilaśo rupakāyaṁ ca bhittvāsi parinirvṛtaḥ || 146||

aho sthitiraho vṛttamaho rupamaho guṇāḥ|

na nāma buddhadharmāṇāmasti kiñcidanadbhutam || 147||

upakāriṇi cakṣuṣye śāntavākkāyakarmaṇi |

tvayyapi pratihanyante paśya mohasya raudratām || 148||

puṇyodadhiṁ ratnanidhiṁ dharmarāśiṁ guṇākaram |

ye tvāṁ sattvā namasyanti tebhyo'pi sukṛtaṁ namaḥ || 149||

akṣayāste guṇā nātha śaktistu kṣayiṇī mama|

ataḥ prasaṅgabhīrutvāt sthīyate na vitṛptitaḥ || 150||

aprameyamasaṁkhyeyamacintyamanidarśanam|

svayamevātmanā''tmānaṁ tvameva jñātumarhasi || 151||

na te guṇāṁśāvayavo'pi kīrtitaḥ

parā ca nastuṣṭiravasthitā hṛdi |

akarśanenaiva mahāhradāmbhasāṁ

janasya tarṣāḥ praśamaṁ vrajanti ha || 152||

phalodayenāsya śubhasya karmaṇo

muniprasādapratibhodbhavasya me|

asadvitarkākulamāruteritaṁ

prayātu cittaṁ jagatāṁ vidheyatām || 153||

ānṛṇyastavo nāma trayodaśamaḥ paricchedaḥ |

adhyardhaśatakaṁ samāptam| kṛtirācāryamātṛceṭasya||

Technical Details

Text Version: 

Romanized

Input Personnel: 

DSBC Staff

Input Date: 

2004

Proof Reader: 

Miroj Shakya

Supplier: 

Nagarjuna Institute of Exact Methods

Sponsor: 

University of the West

Chapter: 

0